Tag lahore high court

لاہور(عامر بٹ سے)لاہورہائیکورٹ نے وزیر صحت پنجاب ڈاکٹریاسمین راشد کو ہسپتالوں کافضلہ ٹھکانے لگانے کیلئے اقدامات کرنے کا حکم دیدیا، وزیرصحت یاسمین راشد نے عدالتی حکم پر عملدرآمد کی یقین دہانی کرادی۔

میڈیارپورٹس کے مطابق لاہورہائیکورٹ میں ہسپتالوں کا فضلہ نہ اٹھانے کیخلاف درخواست پر سماعت ہوئی،وزیر صحت یاسمین راشد،ایڈیشنل چیف سیکرٹری اورسیکرٹری خوراک عدالت میں پیش ہوئے۔چیف جسٹس لاہورہائیکورٹ مامون رشید شیخ نے درخواست پر سماعت کی ۔چیف جسٹس ہائیکورٹ نے کہا کہ ہسپتالوں میں مریضوں کیلئے ناکافی سہولیات ہیں ،چیف جسٹس مامون رشید نے استفسار کیا کہ فضلہ ٹھکانے لگانے کیلئے کیا اقدامات کئے جا رہے ہیں ؟۔فضلے کے بارے میں سپریم کورٹ کے فیصلے بھی موجود ہیں ۔

صوبائی وزیر صحت ڈاکٹر یاسمین راشد نے کہا کہ ہر ضلع میں فضلے کو ٹھکانے لگانے کیلئے انسینریٹرز نصب ہیں ،صرف ایک ضلع میں انسینریٹرز نہیں ہیں وہاں نصب کیا جارہا ہے ،یاسمین راشد نے کہاکہ کچھ ہسپتالوں میں فضلے کو ٹھکانے لگانے کیلئے نجی کمپنیزکو ٹھیکہ دیا گیا ہے ،ایسی سرنجیں لا رہے ہیں جو استعمال کے بعد خودبخود ناقابل استعمال ہو جائیں گی ۔

لاہورہائیکورٹ نے وزیر صحت پنجاب ڈاکٹریاسمین راشد کو ہسپتالوں کافضلہ ٹھکانے لگانے کیلئے اقدامات کرنے کا حکم دیدیا،وزیرصحت یاسمین راشد نے عدالتی حکم پر عملدرآمد کی یقین دہانی کرادی۔

لاہور (عامر بٹ سے)پاکستان میں طاقتور ترین بیوروکریٹ سمجھے جانے والے فواد حسن فواد کی درخواست ضمانت پر لاہور ہائی کورٹ کا فیصلہ جاری۔عدالت کے مطابق نیب فواد حسن فواد کے خلاف کرپشن ثابت کرنے میں ناکام رہا۔لاہور ہائیکورٹ نے فواد حسن فواد کی درخواست ضمانت منظور کی تھی۔

فواد حسن فواد کو گرفتاری کے تقریبا بیس ماہ کے بعد ضمانت پر رہائی ملی ہے۔ذرائع کے مطابق فواد حسن فواد کو 5 مئی 2018 کو آشیانہ اقبال سکینڈل میں گرفتار کیا گیا تھا۔فواد حسن فواد پر آشیانہ اقبال پراجیکٹ میں غیر قانونی طور پر ٹھیکہ دینے کا الزام عائد کیا گیا۔گریڈ بائیس سے تعلق رکھنے والے دبنگ بیورو کریٹ30 برس تک اہم سرکاری عہدوں پر خدمات سر انجام دیتے رہے۔

فواد حسن فواد ایک ذاتی پلازے کے بھی مالک ہیں۔فواد حسن کا موقف ہے کہ ان کا اپنا کوئی ذاتی گھر نہیں ہے۔فواد حسن فواد سیکرٹری ایکسائز اور سیکرٹری امپلی مینٹینشن پنجاب بھی رہے۔ذرائع نے بتایا کہ فواد حسن فواد نے دو سابق وزرائے اعظم نواز شریف اور شاہد خاقان عباسی کے پرنسپل سیکرٹری کے طور پر بھی فرائض سرانجام دئے ۔لاہور ہائیکورٹ نے اپنے تحریری فیصلہ میں کہا کہ نیب فواد حسن فواد پر غیر قانونی طریقے سے پراپرٹی بنانے کے الزمات بھی ثابت نہیں کر سکا۔

لاہور(میڈیا آن لائن)سابق وزیر اعلی پنجاب شہباز شریف کو احتساب عدالت لاہور سے ریلیف مل گیا، عدالت نے شہباز شریف کی عدالت میں مستقل حاضری کی درخواست منظور کرتے ہوئے ان کو تاحکم ثانی حاضری سے استثنی دے دیا۔ تفصیلات کے مطابق احتساب عدالت نے شہباز شریف کی حاضری سے استثنی کی درخواست پر فیصلہ سنا دیا، شہباز شریف کو تاحکم ثانی ذاتی حیثیت میں پیشی سے استثنی مل گیا،
سابق وزیر اعلی پنجاب کی جانب سے طبی اور نجی وجوہات پر حاضری سے استثنی کی استدعا کی گئی تھی ۔عدالت کے روبرو شہباز شریف کے وکیل نے دلائل دیے کہ شہباز شریف کا لندن میں ہونے کا بنیادی مقصد صرف اور صرف بھائی کا علاج ہے، شہباز شریف خود بھی متعدد بیماریوں میں مبتلا ہیں، عدالت کا ہر حکم ماننے کو تیار ہیں،
شہباز شریف کی عدم موجودگی میں ان کے وکیل پیش ہونگے تاکہ عدالتی کارروائی پر فرق نہ پڑے، لہذا شہباز شریف کو حاضری سے مستقل استثنی دیا جائے ۔شہبازشریف کے حاضری سے استثنی پر نیب پراسیکیوٹر وارث علی جنجوعہ نے مخالفت کرتے ہوئے دلائل دیے کہ یہ کوئی ٹھوس دلائل نہیں جسکی بنیاد پر حاضری سے استثنی دیا جائے، وارث علی جنجوعہ نے اعتراض کیا کہ کیا بیرون ملک اور کوئی نہیں جو نواز شریف کی دیکھ بھال کر سکے ، شہباز شریف ملزم ہیں انھیں عدالتی کارروائی میں شریک ہونا چاہئے، وارث علی جنجوعہ نے استدعا کی کہ عدالت شہباز شریف کی حاضری معافی کی درخواست مسترد کرے، عدالت نے فیصلہ سناتے ہوئے شہباز شریف کو تاحکم ثانی حاضری سے استثنی دے دینے کا حکم دے دیا۔

اسلام آباد(ایمرا نیوز آن لائن) الیکشن کمیشن نے گوشواروں کی تفصیلات جمع نہ کرانے پر 318 اراکین پارلیمنٹ اورصوبائی اسمبلیوں کی رکنیت معطل کردی۔

ایکسپریس نیوز کے مطابق الیکشن کمیشن نے گوشواروں کی تفصیلات جمع نہ کرانے پر318 اراکین پارلیمنٹ اورصوبائی اسمبلیوں کی رکنیت معطل کردی۔ معطل شدہ پارلیمنٹرینز اسمبلی اجلاس اور قانون سازی میں حصہ نہیں لے سکتے۔ اس متعلق الیکشن کمیشن نے پارلیمنٹ اور چاروں صوبائی اسمبلیوں کے سیکرٹریزکو آگاہ بھی کردیا۔

الیکشن کمیشن کے مطابق قومی اسمبلی کے 70 اورسینیٹ کے 12 اراکین کی رکنیت، پنجاب اسمبلی کے 115، سندھ اسمبلی 40، کے پی کے اسمبلی 60 اور بلوچستان اسمبلی کے 21 ممبران کی رکنیت معطل کی۔

جن ارکان کی رکنیت معطل ہوئی ان میں وفاقی وزیر فواد چوہدری، وفاقی وزیرنورالحق قادری، صداقت عباسی، عامر کیانی، ثناءاللہ مستی خیل، فرخ حبیب ،راجا ریاض، طارق بشیر چیمہ ،عامر لیاقت حسین،عالمگیرخان ،عبدالقادر پٹیل، برجیس طاہر اور راجا پرویزاشرف شامل ہیں۔

اسلام آباد(ایمرا نیوز آن لائن)اسلام آباد ہائی کورٹ نے وفاقی دارالحکومت میں نیلامی کے سوا دیگر پلاٹوں کی الاٹمنٹ پر پابندی برقرار رکھنے کا حکم دے دیا۔اسلام آباد ہائی کورٹ کے چیف جسٹس اطہر من اللہ نے وفاقی دارالحکومت میں ایکوائر زمین کے متاثرین اور الاٹیز کو پلاٹ الاٹمنٹ کے کیس کی سماعت کی۔ وزیراعظم کے معاون خصوصی علی اعوان نے کمیشن کی رپورٹ پیش کی۔

ہائی کورٹ نے حکم امتناع میں توسیع کرتے ہوئے اسلام آباد میں نیلامی کے سوا دیگر پلاٹوں کی الاٹمنٹ پر پابندی برقرار رکھی۔چیف جسٹس اطہر من اللہ نے ریمارکس دیے کہ اسلام آباد میں کچہری کے لیے جگہ نہیں،ہسپتالوں کے لیے جگہ نہیں،

یہاں کبھی بھی عام آدمی کو سہولت دینا ترجیح نہیں رہی، 1960سے جن کی زمینیں ایکوائر کی گئیں پہلے ان کو معاوضہ دیا جائے گا، لوگ پھر رہے ہیں ان کو آج تک انصاف نہیں ملا، یہ ریاست کی ناکامی ہے۔

چیف جسٹس اطہر من اللہ نے مزید کہا کہ لینڈ ایکوزیشن پوری دنیا میں حکومتیں مارکیٹ ریٹ سے زیادہ دیتی ہیں، جو بڑے لوگوں کو پلاٹ دئیے گئے کیوں نہ وہ متاثرین کوالاٹ کردئیے جائیں۔
عدالت نے کیس کی مزید سماعت تین فروری تک ملتوی کردی۔

(ایمرا نیوز آن لائن)لاہور ہائی کورٹ نے سابق صدر جنرل (ر) پرویز مشرف کی جانب سے خصوصی عدالت کی کارروائی کو رکوانے کے لیے دائر کی گئی متفرق درخواست پر وفاقی حکومت کو نوٹس جاری کردیا۔
خیال رہے کہ اسلام آباد کی خصوصی عدالت میں زیرسماعت سنگین غداری کیس کا فیصلہ گزشتہ ماہ محفوظ کیا تھا تاہم اسلام آباد ہائی کورٹ نے وزارت داخلہ اور پرویز مشرف کی درخواست پر خصوصی عدالت کو فیصلہ سنانے سے روک دیا گیا تھا، جس کے بعد خصوصی عدالت نے کیس کی روزانہ بنیاد پر سماعت کا فیصلہ کیا تھا اور اب ان کی جانب سے 17 دسمبر (منگل) کو فیصلہ سنائے جانے کا امکان ہے۔
واضح رہے کہ اسلام آباد ہائی کورٹ کا حکم 27 نومبر کو آیا تھا جبکہ 28 نومبر کو خصوصی عدالت نے فیصلہ سنانا تھا۔
عدالتی فیصلے کے علاوہ جنرل (ر) پرویز مشرف نے اپنے وکیل خواجہ طارق احمد رحیم اور اظہر صدیقی کے ذریعے لاہور ہائی کورٹ میں ایک اور متفرق درخواست دائر کی تھی، جس میں موقف اپنایا گیا کہ ان کی پہلی درخواست ہائی کورٹ میں زیرسماعت ہے اور اس پر فیصلہ ہونے تک خصوصی عدالت کی کارروائی کو روکا جائے۔اپنی درخواست میں سابق صدر نے سنگین غداری کے تحت ان کے ٹرائل کے لیے خصوصی عدالت کی تشکیل اور طریقہ کار میں قانونی خامیوں کو چیلنج کیا تھا۔
پرویز مشرف نے اپنی درخواست میں ہائی کورٹ پر زور دیا تھا کہ وہ فوری طور پر دائر کی گئی شکایت، چالان، استغاثہ کی ٹیم کا تقرر اور ٹرائل کورٹ کی تشکیل سمیت تمام اقدامات کو معطل کرے۔
اس درخواست پر صوبائی عدالت عالیہ کے جسٹس سید مظاہر اکبر علی نقوی نے سماعت کی اور پوچھا کہ جب ایک درخواست لاہور ہائی کورٹ میں زیرسماعت ہے تو پھر یہ دوسرے درخواست کیوں دائر کی گئی؟ جس پر پرویز مشرف کے وکیل کا کہنا تھا کہ یہ متفرق درخواست ٹرائل رکوانے کے لیے دائر کی گئی۔
اس پر عدالت عالیہ کے وکیل نے پوچھا کہ کیا پرویز مشرف کی درخواستوں پر سماعت کے لیے فل بینچ تشکیل دینا مناسب ہوگا؟ جس پر وفاقی حکومت کے وکیل نے کہا کہ عدالت تقریباً اس کیس کو سن چکی ہے، ایسے میں فل بین کی تشکیل کی بظاہر ضرورت نہیں۔

بعد ازاں عدالت نے پرویز مشرف کی درخواست پر وفاقی حکومت کو کل (17 دسمبر) کے لیے نوٹس جاری کرتے ہوئے ریمارکس دیے کہ منگل کو مرکزی درخواست سماعت کے لیے مقرر ہے، اس درخواست کو بھی اسی کے ساتھ سنیں گے۔
واضح رہے کہ لاہور ہائی کورٹ کے جسٹس مظاہر علی نقوی پر مشتمل لاہور ہائی کورٹ کے بینچ نے 10 دسمبر کو سماعت میں سابق صدر جنرل (ر) پرویز مشرف کی مرکزی درخواست پر ایڈیشنل اٹارنی جنرل کو سیکریٹری داخلہ سے ہدایت لے کر پیش ہونے کا حکم دے دیا تھا۔

قبل ازیں 3 دسمبر کو ہونے والی سماعت میں لاہور ہائی کورٹ نے وفاقی حکومت کو پرویز مشرف کے خلاف سنگین غداری کیس کا مکمل ریکارڈ پیش کرنے کے لیے وقت دیا تھا۔
مسلم لیگ (ن) کی حکومت نے خصوصی عدالت میں پرویز مشرف کے خلاف سنگین غداری کے 5 الزامات عائد کیے تھے لیکن عدالت کی متعدد سماعتوں میں وہ پیش بھی نہیں ہوئے، بعد ازاں بیماری کو جواز بناتے ہوئے ملک سے باہر چلے گئے تھے اور واپس وطن نہیں لوٹے۔
اسلام آباد کی خصوصی عدالت نے رواں سال 19 نومبر 2019 کو سنگین غداری کیس کا فیصلہ محفوظ کیا تھا جسے 28 نومبر کو سنایا جانا تھا۔
تاہم مذکورہ فیصلے کو روکنے کے خلاف پرویز مشرف نے لاہور اور اسلام آباد ہائی کورٹ میں درخواست دائر کردی تھی۔
ساتھ ہی وفاقی حکومت نے بھی خصوصی عدالت کو فیصلہ سنانے سے باز رکھنے کے لیے اسلام آباد ہائی کورٹ سے رجوع کیا تھا جس پر عدالت نے خصوصی عدالت کو فیصلہ سنانے سے روک دیا تھا البتہ لاہور ہائی کورٹ کی جانب سے اب تک کوئی فیصلہ نہیں کیا گیا۔

(ایمرا نیوزآن لائن) گرفتار وکلاء کی رہائی کے لیے سماعت کرنے والا لاہور ہائیکورٹ کا دو رکنی بینچ تحلیل ہو گیا۔

پنجاب انسٹیٹوٹ آف کارڈیالوجی (پی آئی سی) پر حملے کے الزام میں گرفتار وکلاء کی رہائی کے لیے سماعت کرنے والا دو رکنی بینچ تحلیل ہو گیا۔ لاہور ہائیکورٹ میں پی آئی سی میں ہنگامہ آرائی کرنے والے وکلاء کی گرفتاری کے خلاف درخواست پر سماعت ہوئی۔

درخواست گزار اعجاز نے ایڈووکیٹ اللہ یار سپرا کے توسط سے دائر کی جس میں آئی جی پنجاب سمیت دیگر حکومتی عہدیداروں کو فریق بناتے ہوئے کہا گیا ہے کہ تھانہ مزنگ کی پولیس نے وکلاء کو ان دفتروں سے گرفتار کیا، وکلاء اپنے دفاتر میں ٹیکس ریٹرنز فائل کرنے کے کاغذات تیار کر رہے تھے۔

درخواست گزار نے کہا کہ پولیس اہلکار وکلاء کو گرفتار کرتے وقت 6 لاکھ روپے سے زائد رقم بھی ساتھ لے گئے، وکلاء پر تشدد کا خدشہ اور ان کی جان کو خطرہ لاحق ہے، عدالت پولیس حراست سے وکلاء کی بازیابی کا حکم دے۔

جسٹس انوار الحق پنوں نے درخواست پر ابتدائی سماعت کی تاہم بعدازاں انہوں نے کیس کی پیروی سے معذرت کر لی جس پر جسٹس قاسم خان نے معاملہ چیف جسٹس لاہور ہائی کورٹ کو بھجوا دیا۔

(میڈیا 92 نیوز آن لائن) لاہور ہائی کورٹ نے حکومت کی نظرثانی کمیٹی کو 7 روز میں مسلم لیگ (ن) کی نائب صدر مریم نواز کا نام ایگزٹ کنٹرول لسٹ (ای سی ایل) سے نکالنے کی نظرثانی درخواست پر قانون کے مطابق فیصلہ کرنے کا حکم دے دیا۔

صوبائی دارالحکومت کی عدالت عالیہ میں جسٹس علی باقر نجفی کی سربراہی میں 2 رکنی بینچ نے مریم نواز کی درخواست پر سماعت کی۔

اس موقع پر مریم نواز کے وکلا امجد پرویز اور اعظم نذیر تارڑ پیش ہوئے جبکہ وفاقی حکومت کی جانب سے ایڈیشنل اٹارنی جنرل اشتیار اے خان پیش ہوئے۔

سماعت کے دوران مریم نواز کے وکیل نے کہا کہ ان کی موکلہ پر کرپشن اور کرپٹ پریکٹرسز کا الزام لگا کر نام ای سی ایل میں ڈال دیا گیا۔

انہوں نے کہا کہ مریم نواز کا موقف سنے بغیر ان کا نام ای سی ایل میں شامل کیا گیا اور وفاقی حکومت نے ایگزٹ کنٹرول لسٹ آرڈیںننس کی خلاف ورزی کی ہے۔

اس پر جسٹس علی باقر نجفی نے کہا کہ آرڈیننس کے سیکشن 3 کے تحت آپ وفاقی حکومت کے سامنے نظرثانی کی اپیل دے سکتے ہیں، جس پر وکیل نے جواب دیا کہ مریم نواز نے ای سی ایل سے نام نکالنے کے لیے حکومت کو کوئی درخواست نہیں دی کیونکہ عدالت سے بہتر ہمارے پاس کوئی فورم نہیں۔

مریم نواز کے وکیل نے عدالت میں کہا کہ حکومتی وزرا بار بار کہہ رہے ہیں کہ وہ مریم نواز کو ملک سے باہر نہیں جانے دیں گے، حکومت خود مریم نواز کو باہر جانے نہیں دینا چاہتی تو حکومت کو کیسے درخواست دے دیں۔

اس پر عدالت نے ریمارکس دیے کہ سیاست میں تو مخالف جماعتیں ہوتی ہی ہیں، جس پر وکیل نے کہا کہ عدالتوں کے فیصلے موجود ہیں، عدالت وفاقی حکومت کو درخواست دیے بغیر نام ای سی ایل سے نکالنے کا حکم دے سکتی ہے۔

دوران سماعت جسٹس علی باقر نجفی نے ریمارکس دیے کہ آپ کو وفاقی حکومت کو درخواست دینی چاہیے تاکہ وہ اس کا فیصلہ کریں، جس پر وکیل امجد پرویز نے کہا کہ حکومت تو کہتی ہے کہ طوطے کی جان ہمارے پاس ہے، سرکار ماں ہوتی ہے لہٰذا سب کے مسائل حل ہونے چاہیں۔

اس پرعدالت نے کہا کہ ہم چاہتے ہیں کہ ادارے اپنے اپنے کام کریں، جس پر وکیل نے کہا کہ نواز شریف کی طبیعت ٹھیک نہیں ہے مریم نواز کو ان کے پاس جانا ہے اور مریم نوازحکومت کو کیسے درخواست دیں حکومت تو ان کے خلاف اقدامات کرنے کے لیے تیار بیٹھی ہے۔

وکیل کے جواب پر عدالت نے ریمارکس دیے کہ ہم اس درخواست کو زیرالتوا رکھ کر حکومت پر دباؤ نہیں رکھنا چاہتے، جس پر وکیل نے کہا کہ عدالت اس درخواست کو زیرالتوا رکھ لے اور حکومت کو مریم نواز کی نظرثانی کی درخواست پر فیصلہ کرنے کا حکم دے۔

اس پر حکومت کے وکیل نے کہا کہ عدالت حکومت کو 15 دن کا وقت دے۔

بعد ازاں عدالت نے حکومت کی نظرثانی کمیٹی کو 7 دن میں مریم نواز کا نام ایس سی ایل سے نکالنے کی نظرثانی درخواست پر قانون کے مطابق فیصلے کا حکم دے دیا۔

مریم نواز کی درخواست
خیال رہے کہ ہفتہ 7دسمبر کو سابق وزیر اعظم نواز شریف کی صاحبزادی مریم نواز نے اپنا نام ایگزٹ کنٹرول لسٹ سے نکال کر 6 ہفتوں کے لیے بیرون ملک جانے کی اجازت کے لیے لاہور ہائی کورٹ میں درخواست دائر کی تھی۔

مریم نواز نے امجد پرویز ایڈووکیٹ کے توسط سے ہائی کورٹ میں درخواست دائر کی تھی، جس میں وزارت داخلہ، وفاقی تحقیقاتی ادارے (ایف آئی اے)، قومی احتساب بیورو (نیب) کے چیئرمین اور ڈی جی نیب لاہور کو فریق بنایا گیا تھا۔

درخواست میں مریم نواز کی جانب سے موقف اپنایا تھا کہ العزیزیہ ریفرنس میں سزا کے باوجود بیمار والدہ کو چھوڑ کر بیرون ملک سے والد کے ساتھ واپس آئی لیکن میرا موقف سنے بغیر ہی نام ای سی ایل میں شامل کر دیا گیا۔

درخواست گزار کا کہنا تھا کہ ای سی ایل میں نام شامل کرنے کا میمورنڈرم غیر قانونی اور آئین کی خلاف ورزی ہے جبکہ نام ای سی ایل میں شامل کرنے کا میمورنڈم اعلیٰ عدلیہ کے فیصلوں کی بھی خلاف ورزی ہے۔

مریم نواز نے موقف اپنایا تھا کہ والدہ کی وفات کے بعد والد نواز شریف کی دیکھ بھال وہ ہی کرتی رہی ہیں اور وہ بیماری میں مجھ پر ہی انحصار کرتے ہیں۔

علاوہ ازیں مریم نواز نے پاسپورٹ واپس لینے کے لیے بھی لاہور ہائی کورٹ میں متفرق درخواست دائر کی تھی، جہاں لاہور ہائی کورٹ نے مریم نواز کی ضمانت منظور کرنے کے بعد انہیں پاسپورٹ جمع کرانے کا حکم دیا تھا۔

مریم نواز کی ضمانت
خیال رہے کہ 8 اگست 2019 کو چوہدری شوگر ملز کیس میں مسلم لیگ(ن) کی نائب صدر کو ان کے کزن یوسف عباس کے ساتھ گرفتارگیاتھا، بعد ازاں 25 ستمبر2019 کو احتساب عدالت نے انہیں عدالتی ریمانڈ پر جیل بھیج دیا تھا۔

مسلم لیگ (ن) کی نائب صدر نے 30 ستمبر کو اسی کیس میں ضمانت بعد ازگرفتاری کے لیے لاہور ہائی کورٹ سے رجوع کرلیا تھا۔

تاہم اکتوبر کے اواخر میں ان کے والد نواز شریف کی طبیعت اچانک خراب ہوگئی تھی جس کے باعث انہوں نے 24 اکتوبر کو بنیادی حقوق اور انسانی بنیادوں پر فوری رہائی کے لیے متفرق درخواست دائر کردی تھی۔

اس درخواست پر سماعت میں نیب کے ایڈیشنل پراسیکوٹر جنرل نے مریم نواز کی انسانی بنیادوں پر ضمانت کی مخالفت کی تھی اور کہا تھا کہ سپریم کورٹ کے فیصلے میں یہ بیان کردیا گیا ہے کہ انتہائی غیرمعمولی حالات میں ملزم کو ضمانت دی جاسکتی ہے۔

انہوں نے کہا تھا کہ مریم نواز کا کیس انتہائی غیرمعمولی حالت میں نہیں آتا۔

تاہم عدالت عالیہ نے مریم نواز کی درخواست ضمانت کو منظور کرتے ہوئے ان کی رہائی کا حکم دیا تھا لیکن انہیں اپنا پاسپورٹ اور ضمانتی مچلکے جمع کروانے کا کہا گیا تھا۔

بعد ازاں نیب نے لاہور ہائی کورٹ کی جانب سے مریم نواز کو دی گئی ضمانت کے خلاف سپریم کورٹ آف پاکستان سے رجوع کرلیا تھا۔

(ایمرا نیوزآن لائن) لاہور ہائیکورٹ نے گھی کی سرکاری قیمتیں مقرر کرنے کے احکامات پر عمل درآمد روک دیا۔ عدالت نے وفاقی اور صوبائی حکومتوں سمیت دیگر فریقین سے جواب طلب کرلیا۔
لاہور ہائیکورٹ کے جسٹس سید مظاہر علی اکبر نقوی نے 25 گھی ملز مالکان کی درخواستوں پر سماعت کی۔ درخواست گزاروں کی جانب سے ایڈووکیٹ ابو ذر سلیمان نیازی نے دلائل دئیے، درخواستوں میں گھی کی سرکاری قیمت مقرر کرنے کے اقدامام کو چیلنج کیا گیا۔
درخواست گزار گھی کمپنیوں کے وکیل ابو ذر سلمان نیازی ایڈووکیٹ نے عدالت کو بتایا کہ حکومت نے گھی ملز مالکان سے مشاورت کے بغیر ہی گھی کی قیمتوں کے تعین کر کے سرکاری نوٹفکیشن جاری کر دیا، حکومتی نوٹفکیشن بدنیتی پر مبنی ہے۔ ابو ذر سلیمان نیازی نے نشاندہی کی کہ حکومت نے مینوفیکچرنگ کے اخراجات کا تخمینہ لگائے بغیر ہی گھی کی قیمتوں کے تعین کا نوٹفکیشن جاری کیا اور حکومتی طے کردہ نرخ کے مطابق گھی فروخت ہونے سے ملز مالکان کو شدید نقصان ہوگا۔ وکیل نے استدعا کی کہ حکومتی نوٹیفکیشن کو کالعدم قرار دیا جائے۔ عدالت ںے ابوذر سلیمانی نیازی ایڈووکیٹ کی درخواست سماعت کے لیے منظور کرتے ہوئے گھی کے سرکاری نرخ مقرر کرنے کے نوٹفکیشن پر عمل درآمد روکتے ہوئے وفاقی اور صوبائی حکومت سے جواب طلب کرلیا۔