Tag m92tv

کراچی: شہر قائد میں گزشتہ رات سے ہونے والی شدید بارش کے باعث متعدد علاقوں میں سیلابی صورتحال کا سامنا ہے۔ کراچی میں گزشتہ روز سے جاری موسلا دھار بارش نے شہر قائد میں نظام زندگی درہم برہم کردیا

جب کہ مختلف علاقوں میں کرنٹ لگنے سے پانچ افراد جان کی بازی ہار گئے، بارش سے ہر طرف پانی ہی پانی ہے اور شہر کا برا حال ہے، کئی سڑکیں ندی نالوں میں تبدیل ہوگئی ہیں اور نشیبی علاقوں میں پانی گھروں میں داخل ہوگیا ہے۔

نشیبی آبادیاں زیر آب؛

اورنگی ٹاؤن کے بیشتر علاقے زیر آب آنے کے باعث سیلابی صورتحال کا سامناہے جب کہ شہریوں نے پاک فوج سے مدد کا مطالبہ کیا ہے، منظور کالونی میں بھی نالا اوور فلو ہونے کے باعث رہائشیوں کو شدید مشکلات کا سامنا ہے جب کہ گجر نالے کا پانی ایف سی ایریا کے گھروں میں داخل ہوگیا ہے اور علاقہ مکین نقل مکانی پر مجبور ہیں۔ کراچی کے علاقے صدر زیب النسااسٹریٹ کی مارکیٹوں میں بھی پانی داخل ہوگیا ہے اور الیکٹرانک مارکیٹ بھی زیرآب آگئی ہے جب کہ سڑکوں سے ریسکیو ٹیمیں غائب ہیں۔ بارشوں کے نتیجے میں شہرکی بیشتر مصروف شاہراہیں زیر آب آچکی ہیں جب کہ پاک فوج اور رینجرز کے دستے بھی مدد کے لیے میدان میں آگئے اور لوگوں کی مدد میں مصروف ہیں۔محکمہ موسمیات کے مطابق 24 گھنٹوں کے دوران زیادہ سے زیادہ بارش سرجانی ٹاون میں 150.6 ملی میٹر ریکارڈ ہوئی جب کہ پہلوان گوٹھ 111، مسرور بیس 110، بیس فیصل 121، گلشن حدید 149، نارتھ کراچی 78 اور صدر میں 86 ملی میٹر بارش ہوئی۔

ایمرجنسی نافذ کرنے کا مشورہ؛

دوسری جانب کے الیکٹرک نے کراچی میں ایمرجنسی نافذ کرنے کا مشورہ دیا ہے، ترجمان کے الیکٹرک کے مطابق شہر کے بیشتر علاقوں میں سیلابی صورتحال ہے، نشیبی علاقوں میں پانی گھروں میں داخل ہورہا ہے اور حفاظتی اقدامات کے پیش نظر کئی جگہوں پر بجلی بند کردی گئی ہے، سیلابی پانی کے باعث تکنیکی عملے کو شدید دشواری کا سامنا ہے اور بجلی کی کچھ تنصیبات سیلابی پانی سے متاثر ہیں۔ترجمان کے الیکٹرک کے مطابق سولجر بازار اور منگھوپیر سمیت دیگر مقامات پر اندرونی نوعیت کے کرنٹ لگنے کے حادثات پیش آئے، موسیٰ لین اور کھارادر کے علاقوں میں کنڈوں اور ہینگنگ لائٹس سے کرنٹ لگنے کی رپورٹس آئیں، کنڈوں اور سیلاب کے باعث کچھ مقامات پر عارضی بجلی بند کی گئی ہے جب کہ صدر، گلشن، جوہر، ٹاور اور نارتھ کراچی کے بیشتر علاقوں میں بجلی بحال ہے۔

وزیراعلیٰ سندھ دورہ؛

وزیراعلیٰ سندھ مراد علی شاہ نے جام صادق پُل، کاز وے ندی اور قیوم آباد کا دورہ کیا اور ریسکیو کا کام تیز کرنے کے لیے کمشنر کو ہدایت کی جب کہ وزیراعلیٰ سندھ نے پُل کے ٹکڑے پر پھنسے 5 لوگوں اور موٹر سائیکل کو نکالنے کے لیے ایدھی کی بوٹس بھی منگوا لیں۔

مزید بارشوں کا امکان؛

چیف میٹرولوجسٹ سردار سرفراز کا کہنا ہے کہ مون سون کا بارش دینے والا سسٹم سمندر کی جانب مڑنا شروع ہوگیا ہے، سسٹم کا بڑا حصہ شہر کی فضاؤں پر موجود ہے اور آئندہ چند گھنٹوں کے دوران مزید بارشیں متوقع ہے، مون سون سسٹم کے اثرات آج رات تک تیز بارشوں کی شکل میں برقرار رہ سکتے ہیں، سسٹم کے اثرات کے نتیجے میں پیر کی سہ پہر تک معتدل اور ہلکی بارش کا امکان موجود ہے۔

کراچی کو پانی کی فراہمی معطل؛

دھابیجی پمپنگ اسٹیشن پر بجلی کا بریک ڈاؤن ہونے کے باعث شہر کو پانی فراہم کرنے والے 20 پمپ بند ہوگئے، ادھر بیک پریشر سے 72 انچ قطر کی پائپ لائن پھٹ گئی جب کہ پانی کے پریشر سے پمپنگ اسٹیشن کے لنک روڈ کا بڑا حصہ اکھڑ گیا ہے۔ پانی جمع ہونے کے باعث پائپ لائن کا مرمتی کام شروع نہ ہو سکا ہے، کینجھر جھیل سے دھابیجی پمپنگ اسٹیشن کو پانی کی سپلائی بھی بند کر دی گئی ہے جب کہ دھابیجی میں قومی شاہراہ 2 مقامات سے بیٹھ گئی ہے اور کراچی ٹھٹھہ 2 رویہ روڈ کا ایک حصہ بھی ٹریفک کے لیے بند کر دیا گیا ہے۔

(ایمرا نیوز آن لائن)
میری لینڈ: ایک امریکی شخص نے اسٹور سے خریدی گئی پیک شدہ خوراک کو میعاد (ایکسپائری ڈیٹ) گزر جانے کے بعد استعمال کیا اور اپنی کیفیات پر ایک بلاگ لکھا ہے۔

میری لینڈ کے شخص اسکاٹ ناش کو تین سال قبل اس عجیب وغریب تجربے کا خیال آیا۔ پہلے اس نے پیکنگ میں بند دہی کو اس کی مدت ختم ہونے کے 6 ماہ بعد کھایا۔ اگرچہ اس کا ذائقہ بدل چکا تھا لیکن پورا دہی کھانے کے بعد اسے کچھ نہیں ہوا۔ واضح رہے کہ اسکاٹ خود بھی ایک ماحولیات داں ہیں اور ایک نامیاتی فوڈ اسٹور کمپنی کے مالک ہیں۔

اس کے بعد اسکاٹ کو خیال آیا کہ آخر ’ایکسپائر یا میاد ختم‘ ہونے کا کیا مطلب ہوتا ہے؟ اسی طرح ’ اس تاریخ سے قبل بہترین یا بیسٹ بیفور یا سیل بائے وغیرہ کس کو ظاہر کرتے ہیں؟ اسکاٹ کے نزدیک یہ ہدایات پریشان کن اور مبہم ہیں۔
اسکاٹ ناش نے اپنے بلاگ میں لکھا ’ میں سمجھتا ہوں کہ غذا اور غیر غذائی مصنوعات پر ایکسپائر تاریخ لکھنے کا رجحان تبدیل ہونا چاہیے، انہیں حقیقیت سے قریب ہونا چاہیے، بعض اشیا پر تاریخ لکھنے کی کوئی ضرورت ہی نہیں رہتی جن میں نمک، شہد اور بچوں کے وائپس شامل ہیں۔‘

خود پر کیے گئے تجربات میں اس نے ایک سال پرانی روٹیاں بھی کھائیں اور خود اپنے اہلِ خانہ کو بھی کھلائیں یہاں تک گوشت کی تاریخ گزرنے کے ایک ہفتے بعد، دہی کی ایکسپائری ڈیٹ ختم ہونے کے اسے چھ سے آٹھ ماہ بعد، کئی ماہ بعد کریم استعمال کی اور ایک مرتبہ ایسا مکھن کھایا جس پر پھپھوند آگئی تھی اور ان تجربات سے انہیں کوئی نقصان نہیں ہوا۔

اسکاٹ نے بتایا کہ بعض کھانے میعاد کے بعد اتنے خراب ہوجاتے ہیں کہ انہیں کوڑے دان کی نذر کرنا پڑتا ہے، اگر کھانے کی شکل، ذائقے اور بو میں کچھ فرق ہوجائے تو آپ اسے نہیں کھاتے لیکن بعض لوگ ایسے ہوتے ہیں کہ وہ بہترین کھانوں کو بھی میعاد ختم ہونے کے ایک روز بعد ہی تلف کردیتے ہیں۔

انہوں نے کہا کہ نمک خود کروڑوں سال پرانا ہوتا ہے اور اس کی ایکسپائر تاریخ کس طرح مرتب کی جاسکتی ہے؟ یہی حال ٹوتھ پیسٹ کا بھی ہے جس پر دو ماہ بعد خراب ہونے کی تاریخ لکھی ہوتی ہے۔ انہوں نے یہ اعتراف بھی کیا کہ بعض کمپنیاں چاہتی ہیں کہ لوگ تیزی سے ان کا کھانا تلف کریں تاکہ وہ اسٹور سے نئی غذائیں اور اشیا خریدسکیں اور ان کا منافع بڑھتا رہے۔

امریکی فوڈ اینڈ ڈرگ اتھارٹی (ایف ڈی اے)، غذائی سائنس کے ماہرین اور خود سپراسٹور کے مالکان یہ کہتے آئے ہیں کہ ایکسپائرڈ ڈیٹ کو واضح ہونا چاہیے تاکہ غذا کو ضائع ہونے سے بچایا جاسکے۔

اسلام آباد(ایمرا نیوز آن لائن)
پاکستان ریلوے نے محکمے کے ریٹائرڈ ڈرائیورز کو دوبارہ نوکری پر رکھنے کے لیے غور شروع کردیا۔ چیئرمین اسد جونیجو کی زیرصدارت سینیٹ کی قائمہ کمیٹی برائے ریلوے کا اجلاس ہواجس میں ریلوے حکام نے جناح ایکسپریس اور سکھر ریلوے حادثے پر حکام کو بریفنگ دی جب کہ وزیر ریلوے شیخ رشید بھی قائمہ کمیٹی میں پیش ہوئے۔

جناح ایکسپریس حادثے پر ریلوے حکام نے بتایا کہ خراب سگنلز سے پہلے رپیٹر سگنل اشارہ دے رہا تھا، جناح ایکسپریس کے ڈرائیور نے سگنل کو نظر انداز کیا، ڈرائیور ٹرین 50 کلو میٹر فی گھنٹہ کی رفتار سے چلا رہا تھا جب کہ اسٹیشن پر رفتار15 کلومیٹرفی گھنٹہ ہونی چاہیے اس لیے بظاہر ذمہ دار ٹرین ڈرائیور ہی ہے۔

وزیرریلوے شیخ رشید نے کمیٹی کو بتایا کہ اسسٹنٹ ڈرائیورز کی ٹریننگ کیلئے حکمت عملی تیار کررہے ہیں، ریلوے کے ریٹائرڈ ڈرائیورز کو دوبارہ رکھنے پر غور کررہے ہیں، ریٹائرڈ ڈرائیور کی بھرتیوں کیلئے وزیراعظم سے اجازت لیں گے۔

شیخ رشید کی تجویز پر چیئرمین کمیٹی نے کہا کہ ریٹائرڈ ڈرائیورز کو ٹرین کیسے دوبارہ چلانے دیں گے، ریٹائرڈ ڈرائیورز سے ٹرینیں دوبارہ چلوانا خطرناک ہے۔ ریلوے کی کارکردگی پر وزیر ریلوے کا کہنا تھا کہ 24 اگست کو ریلوے کی کارکردگی پوری قوم کے سامنے لاؤں گا، ڈالرمہنگا ہونے سے پرزوں کی خریداری کی مد میں بھی اخراجات میں اضافے کا سامنا ہے، گالف سٹی کیس جیت گئے تو ریلوے اپنے پیروں پر کھڑا ہوجائےگا، خودکار کمانڈ اینڈ کنٹرول سسٹم پر کام شروع کردیا ہے، اس سسٹم سے ٹرین کی ٹریکنگ میں آسانی ہوگی، سگنلز اور لائنوں کی مرمت کے بعد انجنوں کی تبدیلی پر غور کریں گے۔

(میڈیا 92 نیوز آن لائن)
لاہور: پاکستان شکستوں کی بھول بھلیوں سے نکلنے کا راستہ تلاش کرنے لگا ایونٹ میں بقا کی موہوم سی امید لیے کھلاڑی جنوبی افریقہ کیخلاف میچ کی تیاری میں مصروف رہے۔

ہیڈ کوچ مکی آرتھر نئے معرکے سے قبل اعتماد بحال کرنے کیلیے کوشاں نظر آئے، پریکٹس سیشن میں بیٹسمین شارٹ گیندوں پر کارکردگی بہتر بنانے کیلیے سرگرم رہے، بولرز نے اپنی لائن و لینتھ پر کام کیا، اسپنرز نے بھی خود کو لارڈز کی کنڈیشنز سے ہم آہنگ کرلیا، پروٹیز کیخلاف گزشتہ 4ورلڈکپ مقابلوں میں صرف ایک فتح سمیٹنے والے گرین شرٹس کیلیے نیا چیلنج بھی آسان نہیں ہوگا۔

تفصیلات کے مطابق ورلڈکپ میں پاکستان اور جنوبی افریقہ اتوارکو ہوم آف کرکٹ لارڈز میں مقابل ہوں گے، ابھی تک دونوں ٹیموں کی کارکردگی ناقص رہی ہے، جنوبی افریقہ کے 6 میچز میں 3پوائنٹس ہیں، پاکستان نے 5 مقابلوں میں 3 پوائنٹس جوڑے ہیں، پروٹیز کا میگا ایونٹ میں سفر اصولی طور پر تمام ہوگیا۔

پاکستان کی سیمی فائنل میں رسائی کا امکان نہ ہونے کے برابر رہ گیا ہے، گرین شرٹس اگر اپنے چاروں میچ بھی جیت جائیں تو 11 پوائنٹس ہوں گے،اس کے بعد بھی پیش قدمی جاری رکھنے کا انحصار اس بات پر ہوگا کہ انگلینڈ، نیوزی لینڈ،آسٹریلیا اور بھارت جیسی مضبوط ٹیموں میں سے کوئی ایک مسلسل ناکامیوں سے دوچار ہوکر راستے سے ہٹ جائے، بظاہر ایسا ہوتا نظر نہیں آتا۔

گزشتہ روز لارڈز میں پریکٹس سیشن کے دوران پاکستانی کرکٹرز شکستوں کی بھول بھلیوں سے نکلنے کے راستے تلاش کرتے نظر آئے،ہیڈ کوچ مکی آرتھر نے بھارت کیخلاف میچ میں ناقص کارکردگی سے مزید متزلزل ہونے والا اعتماد بحال کرنے کیلیے لیکچر دیا، لارڈز کی کنڈیشنز اور پچ کی ممکنہ صورتحال سے بھی آگاہ کیا،بعد ازاں سخت مشقت سے کھلاڑیوں کا لہوگرمایا گیا، نیٹ میں بیٹنگ کرنے والوں کو تسلسل کیساتھ شارٹ گیندوں کا سامنا کرایا گیا۔

ٹاپ آرڈر بیٹسمینوں نے محمد عامر، وہاب ریاض، محمد حسنین، شاہین شاہ آفریدی اور مقامی بولرز کی پیس اور باؤنس پر اپنی تکنیک بہتر بنانے کیلیے کام کیا،فخرزمان، امام الحق اور بابر اعظم مشکل گیندوں پر اچھے اسٹروکس کھیل کر کوچز سے داد وصول کی، سرفراز احمد نے بھی طویل سیشن میں اپنا کھویا ہوا اعتماد حاصل کرنے کی کوشش جاری رکھی، محمد حفیظ اور حارث سہیل بھی نیٹ میں سرگرم رہے، بولنگ کوچ اظہر محمود پیسرز کی کارکردگی کا جائزہ لیتے ہوئے خامیوں سے آگاہ کرتے نظر آئے،اسپنرز شاداب خان، عماد وسیم الگ نیٹ میں اپنی لائن اور لینتھ درست کرنے کیلیے کوشاں رہے۔

یاد رہے کہ پاکستان اور جنوبی افریقہ کے مابین ابھی تک 78ون ڈے انٹرنیشنل میچ کھیلے گئے ہیں جن میں سے گرین شرٹس نے صرف 27جیتے اور 50میں مات کھائی،ایک مقابلہ بے نتیجہ رہا،گزشتہ سیریز میں جنوبی افریقہ نے مہمان پاکستان ٹیم کو 3-2 سے مات دی تھی،ورلڈکپ کے باہمی مقابلوں میں بھی پروٹیز کا پلڑا بھاری رہا ہے۔

دونوں ٹیمیں ابھی تک 4 بار مقابل ہوئی ہیں،پاکستان ٹیم نے صرف ایک بار کامیابی حاصل کی،ورلڈکپ 1992میں برسبین میں کھیلے جانے والے میچ میں پاکستان کو بارش زدہ میچ میں 20رنز سے مات ہوئی، 1996میں کراچی میں کھیلے جانے والے میچ میں گرین شرٹس عامر سہیل کی سنچری کی بدولت 6 وکٹ پر 242رنز بنانے کے بعد ہدف کا دفاع نہیں کرپائے اور 5 وکٹ سے مات کھائی،وقار یونس3اور ثقلین مشتاق 2وکٹیں لینے کے باوجود شکست کو نہ ٹال سکے۔

ورلڈکپ1999میں ناٹنگھم میں کھیلے جانے والے میچ میں پاکستان ٹیم نے معین خان کے 63 رنز کی مدد سے 7 وکٹ پر 220 رنز بنانے کے بعد 3 وکٹ سے ناکام ہوئی،لانس کلوزنر کے ناقابل شکست 46 رنز نے گرین شرٹس کو یقینی فتح سے محروم رکھا، اظہر محمود کی 3 اور شعیب اختر کی 2 وکٹیں کسی کام نہ آئیں، پروٹیز کیخلاف پاکستان کی اکلوتی فتح گزشتہ ورلڈکپ میں تھی، گرین شرٹس نے مصباح الحق(56) اور سرفراز احمد(49) کی بدولت 222 کا مجموعہ حاصل کیا،جواب میں ڈک ورتھ لوئیس میتھڈ پر جنوبی افریقی ٹیم 29 رنز سے ناکام ہوئی، ڈی ویلیئرز کے 77رنز بیکارگئے، محمد عرفان، راحت علی اور وہاب ریاض نے 3،3شکار کیے۔

لاہور (میڈیا 92 نیوز آن لائن ) آئی سی سی کرکٹ ورلڈ کپ کے وارم اپ میچ میں آسٹریلیا نے انگلینڈ کو 12رنز سے شکست دے دی۔ سائوتمھپٹن میں کھیلے گئے وارم اپ میچ میں انگلینڈ کی ٹیم 298 رنز کا ٹارگیٹ حاصل نہ کرپائی اور ان کی پوری ٹیم 49 اعشاریہ 3 اوورز میں 285 رنز بناکر آئوٹ ہوگئی۔

انگلینڈ کی طرف سے جیمس ونس نے 64 رنز اور جوس بٹلر 52 رنز کے ساتھ نمایاں بیسٹمین رہے ۔ اس سے قبل اسٹیو اسمتھ کے 116 رنز کی بدولت آسٹریلیا نے مقررہ 50 اوورز میں 9 وکٹوں کے نقصان پر 297 رنز بنائے تھے۔ آسٹریلیا کے بلے باز اسٹیو اسمتھ 102 گیندوں پر 8 چوکوں اور 3 چھکوں کی مدد سے 116 رنز بنائے جبکہ ڈیوڈ وارنر 43، عثمان خواجہ 31 جبکہ شان مارش اور ایلیکس کیری نے 30، 30 رنز کی اننگز کھیلی۔ انگلینڈ کی طرف سے پلنکیٹ سب سے کامیاب بولر رہے، انہوں نے 69 رنز دے تین وکٹیں حاصل کیں۔ مارک ووڈ، ٹام کرن اور ڈاؤسن نے ایک، ایک کھلاڑی کو آؤٹ کیا۔

کراچی: (ایمرا نیوز آن لائن) اداکارہ اور ماڈل مہوش حیات نے کہا ہے کہ ٹی وی فنکاروں کی فلموں میں کامیابی کو آرٹ لورز کی جانب سے سراہا جانا خوش آئند امر ہے، اچھے کام کی پذیرائی سے فنکاروں میں کام کرنے کا جنون بڑھ جاتاہے۔

میڈیا رپورٹ کے مطابق مہوش حیات کا کہنا تھا کہ فلموں میں کام کرنے یہ مقصد ہرگز نہیں کہ ٹی وی ڈراموں سے دور ہوگئی ہوں اچھے کردار و سکرپٹس ہر فنکار کی خواہش ہوتے ہیں۔ اداکارہ نے کہا کہ فلموں اور ٹی وی ڈراموں کے ساتھ اشتہاری فلموں میں مصروف ہوں اپنے مداحوں کو عید کا تحفہ نئی فلم ’’چھلاوا ‘‘کی صورت میں دوں گی۔ اس فلم میں پنجاب کا رنگ ایک بار پھر خوبصورت انداز میں نظر آئے گا۔

(ایمرا نیوز آن لائن)
مجھے کہتے ہیں کہ تیرے گھر جانا ہے اور تیرا وہاں سے پتہ کرنا ہے۔میرے گھر کی ساری تلاشی لی اور ہمارے گھر کی خواتین کو بہت ذلیل و خوار کیا اور انہیں گندی گالیاں بھی دیںپھر ادھر سے واپس لا کر تھانے لے آئے اور مار مار کے میری ڈنڈ لگا دتی یہ دیکھیں میرے جسم پر نشان بھی پڑے ہوئے ہیں۔ آپ کا کوئی پرچہ وغیرہ ہوا ہے ۔نہیں جناب کوئی بھی پرچہ نہیں ہوا مجھے ساڑھے 8بجے سمن آباد تھانے میں لے کر آئے ۔ مجھے گھر سے پکڑکر تھانیدار خالد مجھے تھانے لے کر آ گیا۔ مجھے یہاں تھانے لا کر بہت مارا تھپڑ، مکوں ،گھونسوں سے مارا یہ دیکھیں منہ پر نشان بھی ہیں اس کے علاوہ میرے جسم پر ایسی چیز لگائی اور میرے جسم پر چھتر مارتے رہے یہ جتنے بھی افسر تھے سارے سول افسران تھے ان میں سے کوئی بھی پولیس افسر نہیں تھا۔پھر خوش قسمتی تھی کہ ان کو ایجنسی پڑ گئی ان میں سے دو تین بندے ایجنسی نے پکڑ لئے اور وہ حوالات میں بند ہیں اور کافی سارے تھانے سے بھاگ گئے ہیں۔ خالد جس کے پاس ناجائز پستول تھا اس نے اس پستول کو کہیں چھپا دیا۔مجھے جب تھانہ سمن آباد لے کر آئے تو میری آنکھوں پر کپڑا بندھا ہوا تھا میں ان کو پہچان نہیں سکتا۔ مجھے یہ بتائیں سر یہ مجھے آنکھوں پر کپڑا باندھ کر کیوں مارتے رہے اور کہتے رہے ہیں کہ ڈیڑھ لاکھ روپے دو پھر آپ کو چھوڑیں گے میں انہیں کہاں سے ڈیڑھ لاکھ روپے لا کر دوں ۔میرا کوئی ایسا رشتہ دار بھی نہیں تھا جس کو میں فون کرتا اور وہ ڈیڑھ لاکھ روپے لے کر آ جاتا اور مجھے یہاں سے لے کر چلے جاتا ۔
ویڈیو دیکھیں
https://youtu.be/Pvwv2VFZPV4

اسلام آباد:(نیٹ نیوز/ایمرا نیوز) وزیر اعظم عمران خان نے کہا ہے کہ اگر امداد کے لیے دوسروں پر انحصار کیا جائے تو کوئی چیز مفت نہیں ملتی۔ترک ٹی وی کو انٹرویو دیتے ہوئے وزیر اعظم عمران خان کا کہنا تھا کہ امداد اور قرض کے لیے دوسروں پر انحصار کیا جائے تو کوئی چیز مفت نہیں ملتی، پاکستان نے امریکا کا ساتھ دینے پر بھاری نقصان اٹھایا۔سی پیک اور چینی امداد سے متعلق وزیراعظم نے کہا کہ چین پاکستان میں اہم کردار ادا کرتا رہے گا چین کو معاشی معاملات کی تشہیر پسند نہیں ہے۔بھارت سے متعلق سوالات پر عمران خان کا کہنا تھا کہ بھارت سے جنگ مسئلے کا حل نہیں ہے پاکستان تو مذاکرات کے لیے تیار ہے لیکن بی جے پی انتخابات میں کامیابی کے لیے مذاکرات نہیں کررہی، بھارت سے کئی بار کہا ہے کہ آپ امن کی طرف ایک قدم بڑھائیں ہم دو بڑھائیں گے لیکن جواب میں پاکستان سے متعلق بھارتی سیاست دانوں کے بیانات افسوس ناک ہیں۔عمران خان نے کہا کہ بھارت نے مقبوضہ کشمیر میں ظلم کی تمام حدیں پار کرلیں، بھارتی فوج کشمیری نوجوانوں کو پیلیٹ گنز سے اندھا کر رہی ہے، مقبوضہ کشمیر میں ظلم و ستم سے معاملات کبھی حل نہیں ہوں گے بھارت کو آج نہیں تو کل سوچنا ہی پڑے گا۔افغانستان سے متعلق انہوں نے کہا کہ افغان مسئلے کا حل فوجی نہیں افغانستان میں قیام امن صرف مذاکرات سے ہی ممکن ہے وہاں طاقت کے استعمال سے فائدہ نہیں ہوگا۔

لاہور (ایمرا نیوز/رپورٹ رضا ملک سے) پاکستان پیپلز پارٹی کے چیئرمین بلاول بھٹو زرداری نے جوائنٹ انوسٹی گیشن کی رپورٹ کو سیاسی قرار دیتے ہوئے اسے تسلیم کرنے سے انکار کر دیا ہے۔ انہوں نے کہا کہ نیب حکومت کے دباو¿ پر کام کر رہی ہے، ہم جے آئی ٹی رپورٹ کو نہیں مانتے۔ لاہور میں میڈیا نمائندوں سے گفتگو میں بلاول بھٹو زرداری کا کہنا تھا کہ حکومت اداروں کو دباو میں لا کر سیاسی مخالفین کو نشانہ بنا رہی ہے، نیب حکومت کے دباو¿ پر کام کر رہی ہے، ہم جے آئی ٹی رپورٹ کو نہیں مانتے۔ دھمکیوں سے ڈرنے والے نہیں، ایک سال کی عمر سے جیلوں کا سامنا کرتے آیا ہوں۔ بلاول بھٹو کا کہنا تھا کہ کیا یہ حکومت چل رہی ہے؟ اتنی نااہل اور نالائق حکومت زندگی میں نہیں دیکھی، سردیوں میں بھی بجلی کی بدترین لوڈشیڈنگ جاری ہے۔ موجودہ حکومت کی کوئی پرفارمنس ہی نہیں ہے، ملک کی معیشت تباہ ہو رہی ہے۔ ان کا کہنا تھا کہ ہم جانتے ہیں یہ سارے کیسز جھوٹے اور جعلی ہیں۔ مخصوص طاقتوں کی کوشش ہے کہ پیپلز پارٹی کو بدنام کرنا ہے، شہید ذوالفقار علی بھٹو اور محترمہ بینظیر کی زندگی میں بھی سب کچھ ہو رہا تھا، آصف زرداری کو بغیر کسی جرم کے گیارہ سال جیل میں رکھا گیا۔ ہم اب بھی بھٹو کے اصولوں پر کمپرومائز نہیں کریں گے۔ ایک سوال کے جواب میں انہوں نے الزام لگایا کہ جے آئی ٹی سیاسی بنیادوں پر بنی، ہم سیاسی حملوں کا سیاسی جواب دے رہے ہیں اور لیگل ایشوز کا جواب عدالت میں دے رہے ہیں۔ یہ پولیٹیکل انجینئرنگ کے لیے عدالت کو استعمال کرنا چاہتے ہیں۔ پیپلز پارٹی کے چیئرمین نے واضح کیا کہ اپوزیشن کیلئے ہماری جماعت اکیلے ہی کافی ہے، حکومت کو ٹف ٹائم دیں گے، یہ لوگ الیکشن میں ہمارا مقابلہ نہیں کر سکتے، ہم گرینڈ الائنس کی طرف نہیں جا رہے، آصف زرداری کی مولانا فضل الرحمان سے ملاقات ہوتی رہتی ہے۔ انہوں نے کہا کہ اگر شیخ رشید میری سیاست پر تبصرہ کرے گا تو ٹرین کو کون چلائے گا؟ وہ اپنی وزارت پر توجہ دیں۔

شمالی وزیرستان:(نیٹ نیوز/ایمرا نیوز) وزیراعظم عمران خان، سربراہ پاک فوج جنرل قمر جاوید باجوہ کے ہمراہ میران شاہ پہنچے جہاں انہیں سیکیورٹی صورتحال پر بریفنگ دی گئی۔ترجمان پاک فوج میجر جنرل آصف غفور نے ٹوئٹر بیان میں کہا کہ وزیراعظم عمران خان اور آرمی چیف نے شمالی وزیرستان کا دورہ کیا، انہیں استحکام کے لیے جاری آپریشنز، سماجی و معاشی منصوبوں اور ٹی ڈی پیز کی بحالی پر بریفنگ دی گئی۔ترجمان پاک فوج کا کہنا تھا کہ وزیراعظم غلام خان ٹرمینل کا دورہ اور پاک افغان سرحد پر باڑ کا معائنہ بھی کریں گے، بعدازاں وزیراعظم میران شاہ میں جرگے سے خطاب بھی کریں گے۔