Tag media92tv

اسلام آباد(نیٹ نیوز/ایمرا نیوز) بنی گالا میں سیوریج واٹر ٹریٹمنٹ پلانٹ سے متعلق کیس کی سپریم کورٹ میں سماعت ہوئی جس کے دوران منصوبےکی منظوری نہ ہونے پر عدالت نے اظہار برہمی کیا ہے۔جسٹس عمر عطاء بندیال کی سربراہی میں دورکنی بنچ نے کیس کی سماعت کی۔جسٹس عمر عطا بندیال نے ریمارکس دیے کہ چاہتے ہیں کہ منصوبہ جلد شروع ہو، معاملہ کمیٹی میں رہا تو کچھ بھی نہیں ہو گا، کیا پراجیکٹ کے پی سی ون کا دوبارہ جائزہ لیا جائے گا؟سی ڈی اے کے وکیل نے جواب دیا کہ جی ٹیکنیکل ماہرین اس کو دیکھیں گے۔جسٹس عمر عطا بندیال نے استفسار کیا کہ منصوبہ کتنی لاگت میں مکمل ہو گا؟وکیل سی ڈی اے نے جواب دیا کہ منظوری کے بعد منصوبہ تین ارب روپے میں مکمل ہو گا۔نمائندہ سی ڈی اے نے عدالت کو بتایا کہ ہم کوشش کر رہے ہیں کہ منصوبہ کی لاگت تین ارب روپے سے کم کی جائے۔جسٹس عمر عطا بندیال نے ان سے سوال کیاکہ کیا بڑے پراجیکٹ کی بجائے اس کو چھوٹے یونٹس میں نہیں بنا سکتے؟نمائندہ سی ڈی اے نے جواب دیا کہ سر یہ منصوبہ تین فیز میں مکمل ہو گا، ایک فیز میں چار یونٹس ہوں گے۔جسٹس عمر عطا بندیال نے پوچھا کہ یہ پراجیکٹ کب تک منظور ہو گا؟نمائندہ سی ڈی اے نے کہا کہ اس پر مزید ڈسکشن جاری ہے، ای پی سی بورڈ میں گیا تومزید 6 ماہ لگ سکتے ہیں۔جسٹس عمر عطا بندیال نے کہا کہ اس منصوبے میں ماہرین کی نمائندگی کم ہے، پنجاب کچھ اور کہہ رہا ہے۔نمائندہ سی ڈی اے نے کہا کہ اس منصوبے میں جدید ترین ٹیکنالوجی استعمال کی جا رہی ہے،جدید ٹیکنالوجی کے بغیر 5ایکڑ زمین درکار ہو گی جو کہ 15 لاکھ روپے فی مرلہ ہے۔جسٹس عمر عطا بندیال نے کہا کہ ہم چاہتے ہیں کہ منصوبہ جلد شروع ہو، معاملہ کمیٹی میں رہا تو کچھ بھی نہیں ہو گا، کیا دو ہفتوں میں اس منصوبے کی منظوری ہوجائے گی؟نمائندہ سی ڈی اے نے جواب دیا کہ جی سر دو ہفتوں میں منظوری لے لیں گے۔عدالت نے منصوبے کی منظوری نہ ہونے پر برہمی کا اظہار کرتے ہوئے کہا کہ سیوریج واٹر ٹریٹمنٹ پلانٹ منصوبہ ابھی تک صرف ڈسکشن تک محدود ہے، دو ہفتوں میں منصوبے کی پیش رفت رپورٹ جمع کرائی جائے۔سپریم کورٹ نے سیکریٹری داخلہ اور سیکریٹری پلاننگ کو بھی آئندہ سماعت پر طلب کر لیا جبکہ کیس کی سماعت دو ہفتوں تک ملتوی کر دی۔

لندن(سپورٹس ڈیسک/ایمرا نیوز) رواں سال شیڈول میگا ایونٹ کیلیے پاک بھارت سمیت بڑے میچوں کی ٹکٹوں کی بلیک میں فروخت کا انکشاف ہوا ہے۔ برطانوی نشریاتی ادارے (بی بی سی) کی رپورٹ کے مطابق ٹکٹیں فروخت کرنے والی ایک ویب سائٹ پر ورلڈکپ کے مختلف اہم میچز کے ٹکٹ انتہائی مہنگے داموں دستیاب ہیں، انگلینڈ کے آسٹریلیا اور بھارت کے ساتھ میچز کے 115 پاؤنڈ والے چند ٹکٹ تو 12029 پاؤنڈ میں فروخت کے لیے پیش کیے گئے ہیں۔دوسری جانب روایتی حریف پاکستان اور بھارت کی ٹیمیوں کے درمیان اولڈ ٹریفورڈ میں 16 جون کو شیڈول میچ کا 150 پاؤنڈ والا ٹکٹ 3 ہزار 280 پاؤنڈ میں فروخت ہونے لگا۔ورلڈکپ آرگنائزنگ کمیٹی کے ترجمان کا کہنا ہے کہ آن لائن ٹکٹ ایکسچینج کمپنی کی جانب سے قواعد و ضوابط کی خلاف ورزی کا نوٹس لے لیا، قانونی کارروائی کے لئے اپنے وکلاء سے مشاورت کر رہے ہیں۔یاد رہے کہ انگلینڈ میں شیڈول ورلڈکپ کا آغاز رواں سال 30 مئی کو ہوگا، قانونی رکاوٹوں کے باوجود چیمپئنز ٹرافی میں بھی ٹکٹ بلیک میں فروخت ہوئی تھیں۔

اسلام آباد:(نیٹ نیوز/ایمرا نیوز) وزیراعظم عمران خان کا کہنا ہے کہ سی پیک منصوبوں کی قبل ازوقت تکمیل سے عوام کو وسیع معاشی مواقع ملیں گے۔وزیراعظم عمران خان کی زیرصدارت سی پیک سے متعلق اجلاس ہوا، اجلاس میں سی پیک منصوبوں پرپیش رفت کا جائزہ لیا گیا۔ وزیراعظم نے سی پیک منصوبو ں پرکام کی رفتارتیز کرنے کی ہدایت کرتے ہوئے کہا کہ سی پیک منصوبوں کی قبل ازوقت تکمیل سے عوام کووسیع معاشی مواقع ملیں گے اورسی پیک بزنس ایڈوائزری کونسل تشکیل دی جائے۔وزیراعظم نے کہا کہ پاکستان عوام کوغربت سے نکالنے کیلئے چینی تجربے سے فائدہ اٹھاسکتا ہے، چیئرمین سرمایہ کاری بورڈ سی پیک اقتصادی زونزپرکام تیزکرنے کیلئے چارہفتے میں سفارشات دیں۔

بوگوٹا:(نیٹ نیوز/ایمرا نیوز) کولمبیا کے دارالحکومت بوگوٹا میں پولیس ٹریننگ اکیڈمی میں کار بم دھماکے کے نتیجے میں 21 افراد ہلاک جب کہ 68 زخمی ہوگئے۔غیر ملکی خبر رساں ادارے کے مطابق جنوبی امریکی ملک کولمبیا کے دارالحکومت بوگوٹا میں پولیس اکیڈمی میں کار بم دھماکے کے نتیجے میں 21 افراد ہلاک جب کہ 68 زخمی ہوگئے، دھماکا اتنا شدید تھا کہ آواز دور دور تک سنائی دی جب کہ آس پاس کی عمارتوں کے شیشے بھی ٹوٹ گئے، واقعہ کے بعد پولیس نے دھماکے کی جگہ کو گھیرے میں لے لیا اور امدادی اہلکاروں نے زخمیوں کو فوراً قریبی اسپتال منتقل کیا جہاں زخمیوں کی حالت تشویشناک ہونے کے باعث ہلاکتوں میں اضافے کا خدشہ ہے۔

پولیس کے مطابق دھماکا پولیس اکیڈمی کے کمپاؤنڈ میں ہوا جہاں پولیس نے گاڑی کو چیک پوائنٹ پر رکنے کا اشارہ کیا تاہم ڈرائیور گاڑی روکنے کے بجائے اکیڈمی کمپاؤنڈ میں گھس گیا اور تھوڑی دیر بعد دھماکا ہوگیا، پولیس کا کہنا ہے کہ گاڑی میں 80 کلوگرام دھماکا خیز مواد رکھا گیا تھا اور ممکنہ طور پر گاڑی کا ڈرائیور بھی دھماکے میں مارا گیا تاہم ابھی تک کسی بھی تنظیم نے دھماکے ذمہ داری قبول نہیں کی، دھماکے کے بعد ملک بھر میں سیکیورٹی انتہائی سخت کردی گئی ہے اور دھماکے کی مزید تحقیقات کی جارہی ہیں۔

کولمبیئن حکومت کی جانب سے دھماکے کی شدید مذمت کی گئی ہے اور ملک میں 3 دن کے سوگ کا اعلان کیا گیا ہے جب کہ کولمبیئن صدر کا کہنا ہے کہ حملے کے ذمہ داروں کو انصاف کے کٹہرے میں ضرور لائیں گے۔

نیویارک:(نیٹ نیوز/ایمرا نیوز) امریکی کمپنی نے ایسا انقلابی بلیو ٹوتھ ٹرانسمیٹر بنایا ہے جو ہوا میں موجود برقناطیسی یا ریڈیائی امواج سے توانائی جذب کرکے بیٹری کے بغیر توانائی پیدا کرتا ہے اور اسمارٹ فون تک سگنل بھیجتا ہے۔نیویارک میں واقع ویلیئٹ کمپنی نے اس کے لیے 5 کروڑ میں سے 3 کروڑ ڈالر کی فنڈنگ جمع کرلی ہے۔ اسٹیکر نما بلو ٹوتھ پیوند میں اے آر ایم پروسیسر نصب ہے جو اطراف سے توانائی جمع کرکے خود کو چلاتا ہے۔

اس میں ایک چھوٹی سی چپ پر اینٹینا چھاپ کر اسے کسی بھی کاغذ یا پلاسٹک کے ٹکڑے پر پیوست کیا جاسکتا ہے جسے آپ ویڈیو میں بھی دیکھ سکتے ہیں۔اس کی ڈیزائننگ میں خیال رکھا گیا ہے کہ بلو ٹوتھ کے دیگر بہت سے اجزا کو کم کیا جائے یا اسے مائیکرو الیکٹرانکس میں سمودیا جائے۔ اس آلے کو نینو واٹ کمپیوٹنگ کا ایک حصہ بھی قرار دیا جاسکتا ہے۔بلو ٹوتھ اسٹیکر کسی بھی اسمارٹ فون، آئی او ٹی (انٹرنیٹ آف تھنگس) یا دیگر پلیٹ فارم سے رابطہ کرسکتا ہے۔

ابتدائی ٹیسٹ میں اس نے شاندار کارکردگی دکھائی ہے اور اس کی تحقیق کا زیادہ تر کام اسرائیل میں کیا گیا ہے۔ اس کے لیے فنڈنگ ایمیزون اور سام سنگ نے کی ہے۔ماہرین کے مطابق فضا میں ہر وقت ہزاروں ریڈیائی سگنل گزرتے رہتے ہیں اور یہ اسٹیکر ان سے توانائی جذب کرتا ہے اسے ری سائیکل ریڈی ایشن آلات بھی کہا جاسکتا ہے۔ ڈاک ٹکٹ جتنا بلو ٹوتھ اسٹیکر کسی بیٹری کے بغیر مسلسل کام کرسکتا ہے اور اس کی بدولت ہر جگہ ہرموقع پر موجود انٹرنیٹ آلات (آئی او ٹی) کو ممکن بنا کر تمام اشیا کو باہم جوڑا جاسکتا ہے۔

ٹوکیو:(نیٹ نیوز/ایمرا نیوز) بہت بڑا ٹریلر یا ٹرک عموماً مرد حضرات ہی چلاتے ہیں لیکن جاپان میں 24 سالہ خوبرو لڑکی بڑی مہارت سے یہ ٹرک چلاتی ہے اور اس کا حسن دیکھ کر لوگ اسے سراہتے ہیں تاہم وہ چاہتی ہے کہ لڑکیاں بھی اس شعبے میں مردوں کے شانہ بشانہ کام کریں۔

رائنو ساساکی جاپانی علاقے کوچی میں رہتی ہے اور 7 سال قبل اس کے ٹرک ڈرائیور والد شدید بیمار ہوگئے جس کے بعد رائنو نے سیکڑوں میل دور اکیلے ٹرک چلانے میں والد کی مددگار بننے کا فیصلہ کیا۔ 21 سال کی عمر میں رائنو نے رقص کی تعلیم ادھوری چھوڑ کر خود ڈرائیونگ سیٹ سنبھالی لی۔

رائنو اب ٹرک میں اپنے والد کے ساتھ سفر کرتی ہے اور ان سے ٹرک ڈرائیونگ کے گُر بھی سیکھتی رہتی ہے۔ اس کے حسن اور ہمت کی بنا پر فیس بک، ٹویٹر اور انسٹا گرام پر ہزاروں لوگ رائنو کے فالوورز بن چکے ہیں اور اس کی مقبولیت میں اضافہ ہوتا جارہا ہے۔

اب رائنو کو جاپان کی سب سے خوبصورت ٹرک ڈرائیور کے نام سے بھی پکارا جارہا ہے۔رائنو کو ٹرک چلاتے ہوئے 7 برس ہوگئے ہیں لیکن اب تک اس کی جسامت کے مطابق یونیفارم نہیں مل سکا کیونکہ جیکٹ، پینٹ اور دستانے وغیرہ سب مردوں کے لیے تیار کیے جاتے ہیں۔وہ مستقبل میں خواتین ڈرائیورز کے لیے یونیفارم کی ایک کمپنی قائم کرنا چاہتی ہے۔ وہ جاپان کے ایک علاقے سے دوسرے علاقے تک سبزیاں اور پھل لے کر جاتی ہے۔وہ ایک سال میں دولاکھ کلومیٹر کا سفر طے کرتی ہے تاہم وہ ٹرک سے سامان اتارنے، چڑھانے اور ٹرک کی مرمت کے کام نہیں کرتی۔

ممبئی:(شوبز ڈیسک/ایمرا نیوز) فلموں کی ناکامی کو بالی ووڈ کنگ شاہ رخ خان نے خود پرحاوی نہیں ہونے دیا وہ اپنے کیریئر کو بچانے اور بالی ووڈ پر حکمرانی کرنے کیلئے اب بھی پُرعزم ہیں۔حال ہی میں دئیے گئے ایک انٹرویو میں شاہ رخ خان نے اپنی فلم ’’زیرو‘‘ کی ناکامی پر کھل کر بات کی اور کہا کہ اگرمیری زندگی میں چیلنجزنہ ہوتے تو میں کبھی اس مقام پرنہیں پہنچ پاتا جہاں آج ہوں۔

آج جب میں 25 سال پیچھے دیکھتاہوں تو محسوس ہوتا ہے یہ سفر اتنا بھی آسان نہ تھا۔شاہ رخ خان نے ’’زیرو‘‘ سے قبل اپنی فلم ’’فین‘‘ کی ناکامی پر بات کرتے ہوئے کہا فلم ’’فین‘‘ کی ناکامی نے مجھے اداس کردیا تھا لیکن میں نے اس ناکامی کو کبھی خود پر حاوی ہونے نہیں دیا بلکہ اس ناکامی کے بعد میں نے اپنا بہترین کام پیش کرنے کا عزم کیا۔کنگ خان نے 2011 میں ریلیز ہوئی فلم ’’را ون‘‘ کے بارے میں کہا جب ’’را ون‘‘ شائقین کے معیار پر پوری نہیں اتری تو لوگ یہ سوچ رہے تھے کہ میں ویژول ایفیکٹس (وی ایف ایکس) والی فلمیں بنانا بند کردوں گا لیکن میں نے ایسا نہیں کیا، ’’راون‘‘ کے بعد ’’فین‘‘ اور’’زیرو‘‘ بنائیں۔واضح رہے کہ شاہ رخ خان کو بالی ووڈ کا کنگ کہا جاتا ہے تاہم ان کی آخری ریلیز ہونے والی فلم ’’زیرو‘‘ شائقین کو متاثر کرنے میں ناکام رہی لیکن فلم کی ناکامی نے بھی شاہ رخ خان کے حوصلوں کو پست نہیں کیا ہے وہ ابھی بہترین فلمیں کرنے کے لیے پُر عزم ہیں۔

لاہور(نیٹ نیوز/ایمرا نیوز) ایڈونچر کا شوق ہوتو پھر خطرناک راستوں پر چلنے سے ڈر نہیں لگتا، ویڈیو میں نظر آنے والے ان جانبازوں کا شمار بھی ایسے ہی خطروں کے کھلاڑیوں میں ہوتا ہے جو اپنے شوق کی تکمیل کے لیےکچھ بھی کر جاتے ہیں۔

خطروں کا مقابلہ کرنے والےدو جانباز بنا کسی ڈر کے سوئٹزرلینڈکی ہزاروں فٹ بلند و بالا برفیلی چوٹی کے سرے پر پہنچ گئے۔میڈیا رپورٹس کے مطابق Daron Rahlves اور Jeremie Heitz نامی جانباز اسکیئرز نے کچھ منفرد کرنے کی ٹھانی اور سوئزرلینڈ کی 14ہزار فٹ بلند Hohberghorn نامی عمودی چوٹی سے اسکینگ کا ایسا شاندار پیش کیا کہ جیسے یہ اُسکے بائیں ہاتھ کا کھیل ہو۔اس دوران دونوں نے ایک دوسرے سے خوب ریس بھی لگائی اور اس ایڈونچر کو خوب انجوائے کیا۔

اسلام آباد(نیٹ نیوز/ایمرا نیوز) قومی اسمبلی میں قائد حزب اختلاف اور مسلم لیگ نواز کے صدر شہباز شریف نے کہا ہے کہ وزیراعظم کےمشیررزاق داؤدسےمجھے کوئی ذاتی مسئلہ نہیں، گزارش ہےکہ مہمندڈیم کےٹھیکے کے معاملے پراسپیکر رولنگ دیں۔واضح رہےکہ وزیراعظم عمران خان کے مشیر برائے صنعت و تجارت عبدالرزاق داؤد کی ملکیتی کمپنی ‘ڈیسکون نے مہمند ڈیم کی تعمیر کا ٹھیکا حاصل کیا ہے جس کے بعد اپوزیشن کی جانب سے اس معاملے پر شدید تنقید کی جارہی ہے۔اپوزیشن لیڈر شہباز شریف نےقومی اسمبلی میں اظہار خیال کرتے ہوئے کہا کہ یہاں سنگل بڈ پر 309ارب روپے کا پروجیکٹ دیا جارہا ہے ، پیپرا رولز کہتا ہےکہ ایک بڈر ہو تو دوبارہ بڈنگ کرائیں یا مارکیٹ سے چیک کریں کہ آفر مناسب ہے لہٰذا مطالبہ کرتاہوں کہ اس معاملے پر ہاؤس کمیٹی فوری قائم کی جائے ۔عوام اورمانگےتانگےکاپیساآنکھوں پرپٹی باندھ کرخرچ کیاجارہاہے، عوام کاپیسا کہاں خرچ ہورہا ہےعوام کوجاننےکاحق ہے۔اس سے قبل میڈیا سے گفتگو کرتے ہوئے انہوں نے کہا کہ بلاول بھٹو،مراد علی شاہ کا نام ای سی ایل سے نکالنا بہت اچھی بات ہے،دیرآید درست آید،حکومت کودیرسے خیال آیا کہ سپریم کورٹ کے فیصلہ کونظرانداز نہیں کیا جاسکتا۔شہباز شریف نےآصف علی زرداری کے بیان پرجو اب دینے سے گریز کیا۔صحافی نے ان سے سوال کیا تھا کہ آصف زرداری نے کہا ہے کہ عمران خان 5 سال پورے نہیں کریگا،آپ کیا کہتے ہیں؟صحافی کے اور سوال پر کہ وزیراعظم نے الیکشن کمیشن کے دو ممبران کے حوالے سے مشاورت کی؟انہوں نے کہا کہ اپوزیشن لیڈرشہباز شریف نے صحافی کے سوال پر نفی میں گردن ہلائی۔

کراچی (نیٹ نیوز/ایمرا نیوز) اپنے اردگرد پھیلی ہوئی سچائیوں کو افسانوں اور خاکوں کے قالب میں ڈھال کر امر ہو جانے والے سعادت حسن منٹوکو ہم سے جدا ہوئے 64برس بیت گئے ۔سعادت حسن منٹو11مئی1912کو بھارت کے ضلع لدھیانہ میں پیدا ہوئے اورابتدائی تعلیم اپنے گھر میں حاصل کی۔1921میں ایم اومڈل اسکول میں چوتھی جماعت میں داخلہ لیا، ان کا تعلیمی دورانیہ حوصلہ افزاء نہیں تھا مگر پھر بھی منٹو نے اپنی تعلیم جاری رکھی۔ سوتیلے بہن بھائیوں کی موجودگی اور والد کی سختی کی وجہ سے منٹو کو اپنا آپ ظاہر کرنے میں مدت لگی۔پاکستان بننے کے بعد منٹو ٹوبہ ٹیک سنگھ ،کھول دو،ٹھنڈا گوشت،دھواں اور بوسمیت کئی بہترین افسانے تخلیق کیے جو اردو ادب کے آسمان پر ہمیشہ جگمگاتے رہیں گے۔ ان کے افسانوں پر مقدمے بھی چلے لیکن منٹو ان سے بری ہو گئے ،وہ ادب برائے زندگی کے قائل تھے جن کی کہانیوں میں دکھی انسان چلتے پھرتے دکھائی دیتے ہیں۔