Tag NAB

لاہور (عامر بٹ سے)پاکستان میں طاقتور ترین بیوروکریٹ سمجھے جانے والے فواد حسن فواد کی درخواست ضمانت پر لاہور ہائی کورٹ کا فیصلہ جاری۔عدالت کے مطابق نیب فواد حسن فواد کے خلاف کرپشن ثابت کرنے میں ناکام رہا۔لاہور ہائیکورٹ نے فواد حسن فواد کی درخواست ضمانت منظور کی تھی۔

فواد حسن فواد کو گرفتاری کے تقریبا بیس ماہ کے بعد ضمانت پر رہائی ملی ہے۔ذرائع کے مطابق فواد حسن فواد کو 5 مئی 2018 کو آشیانہ اقبال سکینڈل میں گرفتار کیا گیا تھا۔فواد حسن فواد پر آشیانہ اقبال پراجیکٹ میں غیر قانونی طور پر ٹھیکہ دینے کا الزام عائد کیا گیا۔گریڈ بائیس سے تعلق رکھنے والے دبنگ بیورو کریٹ30 برس تک اہم سرکاری عہدوں پر خدمات سر انجام دیتے رہے۔

فواد حسن فواد ایک ذاتی پلازے کے بھی مالک ہیں۔فواد حسن کا موقف ہے کہ ان کا اپنا کوئی ذاتی گھر نہیں ہے۔فواد حسن فواد سیکرٹری ایکسائز اور سیکرٹری امپلی مینٹینشن پنجاب بھی رہے۔ذرائع نے بتایا کہ فواد حسن فواد نے دو سابق وزرائے اعظم نواز شریف اور شاہد خاقان عباسی کے پرنسپل سیکرٹری کے طور پر بھی فرائض سرانجام دئے ۔لاہور ہائیکورٹ نے اپنے تحریری فیصلہ میں کہا کہ نیب فواد حسن فواد پر غیر قانونی طریقے سے پراپرٹی بنانے کے الزمات بھی ثابت نہیں کر سکا۔

لاہور(زیشان علی)چیئرمین نیب جاوید اقبال کی زیر صدارت نیب لاہور میں اجلاس ہوا جس میں انہوں نے نیب ترمیمی آرڈیننس سے متعلق غیر رسمی گفتگو کرتے ہوئے کہا کہ نیب قانون میں ترمیم کے باوجود افسران کے حوصلے بلند ہیں اور کرپشن کیسز میں کسی کو نہیں چھوڑا جائے گا۔

جسٹس ریٹائرڈجاوید اقبال کا کہنا تھا کہ نیب کی مجرموں کو سزا دلوانے کی مجموعی شرح تقریبا 70فیصد ہے اور نیب کا ایمان کرپشن فری پاکستان ہے۔

واضح رہے کہ حکومت اور اپوزیشن کے درمیان نیب قانون میں ترمیم پر بات چیت جاری ہے۔ اس حوالے سے حکومت نے نیب ترمیمی آرڈیننس جاری کیا تھا لیکن اپوزیشن سے مشاورت کے بعد اسے واپس لے لیا گیا اور نیب قانون میں ترمیم کے لیے پارلیمنٹ کے ذریعے قانون سازی پر اتفاق کیا گیا ہے۔

(ایمرا نیوزآن لائن) قومی اسمبلی میں قائد حزب اختلاف اور مسلم لیگ (ن) کے صدر شہباز شریف کے صاحبزادے سلیمان شریف نے معاون خصوصی برائے احتساب و داخلہ شہزاد اکبر کے الزامات کو مسترد کرتے ہوئے انہیں جاہل قرار دے دیا۔

گزشتہ روز وزیراعظم کے معاون خصوصی برائے احتساب و داخلہ شہزاد اکبر نے پریس کانفرنس میں شہبازشریف فیملی کے خلاف نیا پنڈورا باکس کھولا جس میں انہوں نے بتایا کہ قومی احتساب بیورو (نیب) کی تحقیقات کے مطابق شہباز شریف کے اثاثوں میں 10 سال کے دوران 70 گنا اضافہ ہوا، حمزہ اور سلمان شہباز کے اثاثوں میں بھی ہوشربا اضافہ ہوا ہے۔

ان الزامات پر برہمی کا اظہار کرتے ہوئے سلیمان شریف نے سماجی رابطے کی سائٹ ٹوئٹر پر اپنی ایک ٹوئٹ میں لکھا کہ شہزاد اکبر نے ایک لفظ نہیں کہا کہ سرکاری خزانے میں کہاں کرپشن کی گئی ہے۔ سلیمان شریف کا کہنا تھا کہ شہزاد اکبر نجی کاروبار کو بدنام کرکے سستی شہرت حاصل کرنے کی کوشش کر رہے ہیں۔ لگتا ہے یہ حکومت نہیں مزاحیہ تھیٹر ہے: احسن اقبال

ادھر مسلم لیگ ن کے رہنما احسن اقبال نے بھی شہزاد اکبر کی پریس کانفرنس پر سخت ردعمل دیتے ہوئے کہا کہ عوام کی توجہ ہٹانے کے لیے نام نہاد احتساب سیل نے پریس کانفرنس کی تھی۔ احسن اقبال کا کہنا تھا کہ قائد حزب اختلاف پر جھوٹے الزام لگائے گئے ، لگتا ہے کہ یہ حکومت نہیں کوئی مزاحیہ تھیٹر ہے حالانکہ سپریم کورٹ میں حکومت اور نیب نے شہباز شریف کے خلاف کوئی ثبوت پیش نہیں کیے۔

(ایمرا نیوزآن لائن) وزیراعظم عمران خان سے حال ہی میں ترقی پانے والے وفاقی سیکریٹریز نے ملاقات کی۔

وزیراعظم سے وفاقی سیکریٹریز نے وزیراعظم آفس میں ملاقات کی جس میں وزیراعظم کے مشیر عشرت حسین بھی موجود تھے۔ اس دوران وزیراعظم عمران خان نے کہا کہ 60 کی دہائی میں گورننس کے لحاظ سے مثالی سمجھا جانے والا ہمارا ملک آج خطے میں دوسرے ممالک سے قدرے پیچھے رہ گیا ہے، سیاسی قیادت اور بیوروکریسی نے ملک کے مستقبل کا تعین کرنا ہے لہٰذا اس کے لیے نئی سوچ اور بہتر طرز حکومت (گڈگورننس) کی ضرورت ہے۔

انہوں نے ترقی پانے والے افسران کو مخاطب کرتے ہوئے کہا کہ وہ اپنی ذمہ داریاں جہاد اور قومی فریضہ سمجھ کر ادا کریں۔ وزیراعظم عمران خان کا ترقی پانے والے افسران کو مبارکباد دیتے ہوئے کہنا تھا کہ ان کی ترقی، کارکردگی اور خالصتاً میرٹ کو مدنظر رکھ کر کی گئی ہے۔ انہوں نے امید ظاہر کی کہ ترقی پانے والے افسران اپنی نئی ذمہ داریاں نہایت فرض شناسی اور ملک و قوم کی خدمت کے بھرپور جذبے کے تحت ادا کریں گے۔

ان کا کہنا ہے کہ پاکستان تاریخ کے اہم دوراہے پر کھڑا ہے، ملک کی تعمیر و ترقی کے لیے جہاں سیاسی لیڈرشپ نے وژن دینا ہے، وہاں بیوروکریسی نے اس وژن کو عملی جامہ پہنانا ہے ۔ انہوں نے کہا کہ گزشتہ 15 ماہ میں غیر ملکی سرمایہ کاروں نے معیشت کے ہر شعبے میں دلچسپی کا اظہار کیا ہے، اس استحکام کو مزید تقویت دینے کے لیے ضروری ہے کہ بیوروکریسی طرز حکومت اور عوام کی فلاح و بہبود کے ضمن میں اپنا بھرپور کردار ادا کرے۔

وزیراعظم نے وفاقی سیکریٹریز کو ہدایت کی کہ بہتر طرز حکومت کے حوالے سے وفاقی بیوروکریسی مثال قائم کرے اور اپنی توانائیاں اور تجربہ ملک و قوم کی خدمت اور عوامی فلاح و بہبودکے لیے برؤے کار لائیں اس موقع پر سیکریٹریز نے وزیرِ اعظم کا شکریہ ادا کیا اور ملک کی تعمیر و ترقی کے لیے اپنا بھرپور کردارادا کرنے کی یقینی دہانی کرائی۔ خیال رہے کہ گزشتہ دنوں پنجاب کے ساتھ ساتھ وفاقی بیورو کریسی میں بھی بڑے پیمانے پر اکھاڑ پچھاڑ کی گئی تھی۔

(ایمرا نیوزآن لائن) چوہدری شوگر مل کیس کی سماعت احتساب لاہور کے جج امیر محمد خان کی سربراہی میں ہوئی۔

دوران سماعت عدالت نے نیب کے تفتیشی افسر نے استفسار کیا کہ ریفرنس کب فائل کیا جا رہا ہے؟ جس پر تفتیشی افسر نے جواب دیا کہ ابھی تحقیقات چل رہی ہے، مکمل ہونے پر فائل کر دیں گے۔ دوسری جانب مریم نواز کے وکیل نے ریفرنس دائر ہونے تک مریم نواز کی حاضری سے استثنیٰ کی درخواست دائر کی۔

ایڈوکیٹ امجد پرویز نے کہا کہ نواز شریف لاہور ہائی کورٹ کے حکم پر علاج کرانے بیرون ملک جا چکے ہیں، جس پر عدالت نے کہا کہ لاہور ہائی کورٹ میں نواز شریف کا نام ای سی ایل سے نکالنے کی حد تک تھا۔

امجد پرویز نے کہا کہ عدالت نے درست فرمایا ہے، عدالت کا حکم نامہ ساتھ لف ہے، نواز شریف کو عدالت نے 4 ہفتوں کے لیے بیرون ملک علاج کرانے کی اجازت دی، طبعیت بہتر نہ ہونے پر مزید مہلت مل سکتی ہے۔ جج نے استفسار کیا کہ مریم نواز کی حاضری سے استثنیٰ کی درخواست پر پراسیکیوشن کیا کہتی ہے؟

نیب پراسیکیوٹر نے کہا عدالت موقع دے تو درخواست کو تفصیلی پڑھ کر جواب جمع کراؤں گا۔ عدالت نے نیب ریفرنس فائل ہونے تک مریم نواز کو حاضری سے استثنیٰ دیتے ہوئے حکم دیا کہ ریفرنس فائل ہونے کے بعد مریم نواز ٹرائل کا سامنا کریں گی۔

(ایمرا نیوزآن لائن) نیب کے پاس جے یو آئی ف کے رہنما اکرم درانی کے وارنٹ گرفتاری کا جواز پیش کرنے کے لیے مواد نہ ہونے پر اسلام آباد ہائی کورٹ نے جے یو آئی ف کے رہنما کی درخواست ضمانت سے متعلق کیس نمٹا دیا۔

اکرم درانی کی درخواست ضمانت پر سماعت اسلام آباد ہائی کورٹ کے چیف جسٹس اطہر من اللہ اور جسٹس میاں گل حسن نے کی۔ نیب نے مؤقف اختیار کیا کہ اکرم درانی کے وارنٹ گرفتاری جاری نہیں کر رکھے، جس پر جسٹس میاں گل حسن نے کہا کہ ہم درخواست نمٹا دیں اور کل آپ انہیں وارنٹ جاری کر کے گرفتار کر لیں تو پھر کیا ہو گا؟ ایک کیس میں پہلے ایسا ہو بھی چکا ہے۔

نیب پراسیکیوٹر نے کہا کہ نئے شواہد سامنے آنے پر ہی کسی کو گرفتار کیا جاتا ہے، جس پر جسٹس اطہر من اللہ نے ریمارکس دیئے کہ نیب کو کسی بھی گرفتاری کا جائز جواز بتانا بھی ضروری ہے، نیب کسی کو ٹارچر کرنے کے لیے تو گرفتار نہیں کر سکتا۔ جسٹس اطہر من اللہ نے کہا کہ نیب تفتیش کے لیے بھی روز طلب کر سکتا ہے، نیب گرفتار کر کے ہی کیوں سرکار کا خرچہ بڑھاتا ہے۔

اکرم درانی کے وکیل نے کہا کہ اگر کل کو نیب وارنٹ جاری کرے تو ہمیں پہلے بتائے، جس پر نیب پراسیکیوٹر نے کہا کوئی قانون نہیں ہے کہ ہم پہلے کسی کو بتائیں۔ نیب پراسیکیوٹر نے عدالت کو بتایا کہ اکرم درانی کے فرنٹ مین رحمت اللہ کے وارنٹ جاری کئے ہیں، رحمت اللہ اکرم درانی کے پرسنل سیکریٹری تھے اور غیر قانونی بھرتیوں میں ان کا کردار تھا۔

جسٹس میاں گل حسن نے ریمارکس دیئے کہ اُن بھرتیوں کا تو الگ سے کیس ہمارے سامنے موجود ہے، اُس کیس میں نیب الگ سے کیسے کارروائی کر رہا ہے۔ نیب پراسیکیوٹر نے عدالت کو بتایا کہ ہم اُس معاملے کے مجرمانہ پہلو پر تفتیش کر رہے ہیں، عدالت کے سامنے جو الگ کیس ہے وہ ایک سِول کیس ہے، ملزم کے فرار ہونے کا خدشہ ہے۔

چیف جسٹس اسلام آباد ہائی کورٹ نے کہا کہ آپ کو یہ خدشہ ہے تو ای سی ایل میں نام ڈال دیں، آپ نے کرپشن روکنےکے لیے کیس چلانے ہیں۔ جسٹس اطہر من اللہ نے ریمارکس دیئے کہ دیکھا گیا ہے نیب کا کیس بہت کمزور ہوتا ہے، دوسرے ممالک میں وہ ہر ملزم کو گرفتار نہیں کرتے۔ انہوں نے مزید کہا کہ سنگین الزامات کے باوجود لندن میں الطاف حسین باہر پھر رہے ہیں، آپ کے پاس نئے شواہد بھی آجائیں تب بھی گرفتاری پر مطمئن کرنا ہو گا۔ چیف جسٹس اسلام آباد ہائی کورٹ نے کہا کہ تفتیشی افسر کے کافی شواہد آئے تو پھر گرفتاری کی جا سکتی ہے۔

نیب پراسیکیوٹر نے عدالت کو بتایا کہ نیب کے پاس اکرم درانی کے وارنٹ گرفتاری کا جواز پیش کرنے کے لیے مواد دستیاب نہیں ہے جس پر عدالت نے اکرم خان درانی کی درخواست ضمانت سے متعلق کیس نمٹا دیا جب کہ ملزم رحمت اللہ کی عبوری ضمانت میں 8 دسمبر تک توسیع کر دی گئی۔

اسلام آباد(ایمرا نیوزآن لائن) قومی احتساب بیورو (نیب) کے چیئرمین جسٹس (ر) جاوید اقبال نے کہا ہےکہ جو کرے گا وہ بھرے گا کیونکہ ہماری طرف سے کوئی سمجھوتا ہوگا، نہ کوئی ڈیل ہوگی، نہ کوئی ڈھیل ہوگی اور نہ کوئی این آر او ہوگا۔

اسلام آباد میں تقریب سے خطاب کرتے ہوئے جسٹس (ر) جاوید اقبال نے کہا کہ جہاں بھی کرپشن ہوگی خواہ وہ کس نے کی ہے اور اس میں کون ملوث ہے اس پر نیب ایکشن لے گا، ہر طاقت ہر اثر اور ہر دھمکی نیب کے گیٹ کے باہر ختم ہوجاتی ہے، اندر آنے کی کسی کو اجازت نہیں، کام ایسے ہی چلے گا جیسے چل رہا ہے، آپ جو چاہے کہیں، کارواں نے چلنا ہے اور چلتا رہے گا۔

انہوں نے کہا کہ نیب نے اپنی منزل کا تعین کرلیا ہے،کرپشن فری پاکستان نیب کی منزل ہے، اس میں جتنے طوفان آئیں اور کچھ بھی کہا جائے لیکن نیب پیچھے نہیں ہوگا جو مقدمات ہیں ان کو دیکھا جائیگا۔

چیئرمین نیب کا کہنا تھا کہ اب ایسے کیسز کی جانب بڑھ رہے ہیں جس سے اس تاثر کی نفی ہوگی کہ احتساب یکطرفہ ہے، یہ الزام اس لیے درست نہیں کہ وہ جماعتیں جو 30،35 سال اقتدار میں رہیں اور وہ گروپ جن کو آئے کچھ ماہ گزرے تو کچھ نہ کچھ دیکھنا ہوگا کہ اتنے سالوں میں کیا کرپشن ہوئی اور 12 ماہ میں کیا کرپشن ہوئی۔

انہوں نے کہا کہ 2017 کے بعد کوئی بڑا اسکینڈل منظر عام پر نہیں آیا کہ کوئی بھی ناقد اس پر تنقید کرے، کبھی ایسا لگتا ہے کہ ہر طرف نیب ہی نیب ہے، کبھی کبھی اچھا لگتا ہے لیکن کبھی لگتا ہے کہ کچھ باتوں کاکوئی وجود نہیں، کچھ باتوں کا مقصد نیب کے امیج کو خراب کرنا ہے۔

جسٹس (ر) جاوید اقبال کا کہنا تھا کہ لوگ کہتے ہیں نیب نے بی آر ٹی پشاور کے لیے کیا کیا،اس کیس میں سپریم کورٹ نے حکم امتناع دیا ہواہے، اس کی روشنی میں نیب ایک قدم بھی آگے نہیں بڑھتی، کوشش کررہے ہیں یہ حکم امتناع ختم ہو تاکہ قدم بڑھائیں۔

انہوں نے مزید کہا کہ نیب کے نزدیک کسی شخص کی اہمیت نہیں، چھوٹی سے بات ہے کہ جو کرےگا وہ بھرے گا، نیب کے اختیار میں جو کچھ ہوا وہ اس لیے کرینگے کہ عوام کی حالت آپ کے سامنے ہے، کسی پر غلط تنقید سے قد میں اضافہ نہیں ہوتا، مجھ پر الزام تراشی، کردار کشی، دھمکیوں اور لالچ کا کوئی فائدہ نہیں، عمر کے اس حصے میں ہوں کہ کوئی خیال ذہن میں لانا کہ کوئی سمجھوتا ہوگا۔

چیئرمین نیب کا کہنا تھا کہ ہماری طرف سے کوئی سمجھوتا ہوگا، نہ کوئی ڈیل ہوگی، نہ کوئی ڈھیل ہوگی اور نہ کوئی این آر او ہوگا، نہ ہماری کسی سے دشمنی ہے اور نہ دوستی ہے، صرف آئین و قانون کے تحت کام کرنا ہے، جن لوگوں نے نیب قانون کو نہیں پڑھا وہ بھی اس پر تنقید کرتے ہیں۔

انہوں نے کہا کہ یہ وائٹ کالر کرائم ہے اس میں اور ایک عام جرم میں زمین آسمان کا فرق ہے، اس کرائم کی ابتدا مشرق سے ہوتی ہے تو انتہا مغرب پر ہوتی ہے، یہ ریکارڈ کی بات ہے کہ اگر لاہور کا کیس ہے تو وہ اسلام آباد تک پہنچا اور وہاں سے کراچی اور پھر خلیجی ریاست تک پہنچا، ایسا تو اسکاٹ لینڈ یارڈ کے لیے ممکن نہیں کہ وہ 90 دن میں پورا کام کرلے۔ جاوید اقبال کا کہنا تھا کہ آج کسی کو گرفتار کریں تو کہتے ہیں سیاسی انتقام لیا جارہا، ہم سیاسی انتقام کیوں لیں گے۔

لاہور(ایمرا نیوزآن لائن) سابق وزیراعظم نوازشریف کا نام ایگزٹ کنٹرول لسٹ (ای سی ایل) سے نکالنے کے لیے حکومتی شرائط کے خلاف شہبازشریف کی جانب سے دائر درخواست پر سماعت جار ی ہے۔

نواز شریف کا نام ای سی ایل سے نکالنے کی مشروط اجازت کے خلاف مسلم لیگ ن کے صدر شہباز شریف کی جانب سے لاہور ہائی کورٹ میں گزشتہ روز جمعرات کو درخواست دائر کی گئی تھی۔ درخواست میں مؤقف اختیار کیا گیا کہ کیس کو سماعت کے لیے آج ہی مقرر کیا جائے جسے عدالت عالیہ کی جانب سے منظور کرلیا گیا اور سماعت جسٹس باقر نجفی کی سربراہی میں 2 رکنی بینچ نے کی۔ گزشتہ روز ایڈیشنل اٹارنی جنرل کی جانب سے ایک روز کی مہلت طلب کرنے پر عدالت نے سماعت اگلے روز تک ملتوی کردی تھی۔

نیب اور حکومت نے تحریری جواب جمع کرایا: جمعہ کے روز لاہور ہائیکورٹ نے ایک بار پھر درخواست پر سماعت کا آغاز کیا جس دوران نیب اور وفاقی حکومت کی جانب سے تحریری جواب عدالت میں جمع کرایا گیا۔ عدالت نے شہبازشریف کے وکیل سے استفسار کیا کہ کیا آپ کو جواب کے معائنے کے لیے وقت کی ضرورت ہے؟ اس پر وکلا نے جواب پڑھنے کا وقت مانگا جس پر عدالت نے کیس کی سماعت ایک گھنٹے کے لیے ملتوی کردی۔ عدالت نے حکومت اور نیب کے جواب کی کاپی درخواست گزار کے وکلاء کو فراہم کرنے کا حکم دیا۔

حکومت نے شہبازشریف کی درخواست مسترد کرنے کی استدعا کردی: حکومت کی جانب سے جمع کرایا گیا جواب 45 اور نیب کا جواب 4 صفحات پر مشتمل ہے۔ حکومت نے اپنے جواب میں شہبازشریف کی درخواست کی مخالفت کرتے ہوئے کہا ہےکہ نواز شریف کے خلاف مختلف عدالتوں میں کیسز زیر سماعت ہیں، ان کا نام نیب کے کہنے پر ای سی ایل میں ڈالا گیا ہے۔ حکومت نے اپنے جواب میں مزید کہا کہ لاہور ہائیکورٹ کو اس درخواست کی سماعت کا اختیار نہیں ہے اور شہبازشریف کی درخواست ناقابل سماعت ہے۔

سیکیورٹی بانڈ کی شرط لاگو رکھی جائے: حکومتی مؤق حکومت نے اپنے جواب میں استدعا کی ہےکہ نواز شریف سزا یافتہ ہیں اس لیے انہیں بغیر سیکیورٹی بانڈز کے اجازت نہیں دی جا سکتی لہٰذا سیکیورٹی بانڈ کی شرط کو لاگو رکھا جائے اور عدالت اس درخواست کو ناقابل سماعت قرار دے کر مسترد کرے۔ شہبازشریف کی درخواست پر حکومت اور نیب کے جواب کا جائزہ لینے کے بعد لاہور ہائیکورٹ کا 2 رکنی بینچ درخواست پر دوسرے روز سماعت کررہا ہے۔

گزشتہ سماعت کی کارروائی: گزشتہ روز دوران سماعت درخواست گزار شہبازشریف کے وکیل امجد پرویز نے اپنے دلائل میں کہا کہ نواز شریف کے میڈیکل ٹیسٹ کروانے ہیں جن کی سہولت پاکستان میں میسر نہیں،سرکاری میڈیکل بورڈ نے بھی علاج کے لیے بیرون ملک جانے کا مشورہ دیا۔ وفاقی کابینہ نے نام ای سی ایل سے نکالنے کے لیے مشروط اجازت دی۔ جس پر وکیل امجد پرویز کا کہنا تھا کہ شہباز شریف کا نام عدالتی حکم پر ای سی ایل سے نکالا جاچکا ہے،نواز شریف کےخلاف نیب لاہور میں کیسز ہیں،ایون فیلڈ ریفرنس کا معاملہ عدالت میں زیر سماعت ہے جب کہ اسلام آباد ہائی کورٹ نے میرٹ پر سزا معطل کرکے ضمانت منظور کی اور عدالت نے ضمانت منظور کرتے وقت کوئی شرط عائد نہیں کی تھی۔

کیا ای سی ایل آرڈیننس وفاق کو اختیار دیتا ہے کہ ایک دفعہ بیرون ملک جانے کی اجازت دے؟ عدالت: درخواست گزار کے وکیل کا کہنا تھا کہ اگر عدالتی حکم پر عملدرآمد نہیں ہوتاتو عدالت اپنا دائرہ اختیار استعمال کرے، ریاست کا اس معاملے میں کوئی تعلق نہیں ہے، ریاست کہاں سے آ گئی؟ عدالت نے استفسار کیا کہ کیا ای سی ایل آرڈیننس وفاق کو اختیار دیتا ہے کہ ایک دفعہ بیرون ملک جانے کی اجازت دے؟ وکیل امجد پرویز کا کہناتھا کہ احتساب عدالت کے حکم کی سزا معطل ہو چکی ہےجس پر جسٹس باقر نجفی نے ریمارکس دیئے کہ میرے خیال میں سزا معطل ہوئی ہے جرمانہ معطل نہیں ہوا۔

عدالت نے ایڈیشنل اٹارنی جنرل سے پوچھا کہ حکومت نے جو ضمانت مانگی ہے کیا یہ وہ رقم ہے جو احتساب عدالت نے جرمانہ کیاتھا؟کیا ای سی ایل آرڈیننس وفاق کو اختیار دیتا ہے کہ ایک دفعہ بیرون ملک جانے کی اجازت دے؟ کیا قانون میں وہ شرائط ہیں جو نواز شریف پرعائد کی گئی ہیں، نواز شریف کا نام کس نیب آفس کے کہنے پر ای سی ایل میں ڈالا گیا؟ ایڈیشنل اٹارنی جنرل نے جواب دینے کے لیے کل تک کی مہلت مانگ لی جس کے بعد کیس کی سماعت اگلے روز کے لیے ملتوی کردی گئی۔

واضح رہے کہ وفاقی کابینہ کی ذیلی کمیٹی نے گزشتہ روز نواز شریف کو علاج کے غرض سے 4 ہفتوں کیلئے بیرون ملک جانے کی مشروط اجازت دینے کا اعلان کیا تھا۔ وزیر قانون فروغ نسیم کے مطابق ’نواز شریف کی بیرون ملک روانگی اس بات سے مشروط ہے کہ نواز شریف یا شہباز شریف 7 یا ساڑھے 7 ارب روپے کے پیشگی ازالہ بانڈ جمع کرادیتے ہیں تو وہ باہر جاسکتے ہیں اور اس کا دورانیہ 4 ہفتے ہوگا جو قابل توسیع ہے‘۔

سابق وزیراعظم(ایمرا نیوزآن لائن) نواز شریف نے فیصلہ کیا ہے کہ اگر عدالت سے ریلیف نہ ملا تو وہ علاج کے لیے ملک سے باہر نہیں جائیں گے۔

نواز شریف کی حالت کے مد نظر خاندان اور لیگل ٹیم نے سر جوڑ لیے ہیں۔ مسلم لیگ ن نے حکومت کی جانب سے نواز شریف کو بیرون ملک جانے کے لیے مشروط اجازت دینے کے فیصلے کے خلاف آج ہی عدالت سے رجوع کا فیصلہ کیا ہے اور اس حوالے سے ن لیگ کی درخواست تیاری کے آخری مراحل میں ہے۔

دوسری جانب ذرائع کا بتانا ہے کہ نواز شریف نے اصولی فیصلہ کیا ہے کہ اگر عدالت سے انہیں ریلیف نہ ملا تو وہ علاج کے لیے بیرون ملک نہیں جائیں گے اور نواز شریف نے اس فیصلے سے خاندان کے افراد کو بھی آگاہ کر دیا ہے۔ ذرائع کا کہنا ہے کہ نواز شریف کو اُن کی والدہ، بیٹی اور شہباز شریف نے بیرون ملک علاج کے لیے مشکل سے منایا تھا اور ان کی بگڑتی صحت پر اہلخانہ پریشان ہیں۔