Tag new

سان فرانسسکو(وقت نیوز آن لائن)فیس بک چیٹ اور واٹس ایپ کی طرح اب ٹویٹر نے بھی ایموجی پیش کردیئے ہیں جنہیں براہِ راست پیغام میں شامل کیا جاسکتا ہے۔

اس طرح صارفین کسی بھی گفتگو کے تھریڈ میں اپنے احساسات اور جذبات ایموجی کی صورت میں داخل کرسکیں گے۔ اس موقع پر ٹوئٹر نے اپنے ایک بیان میں کہا ہے:

’ اب براہِ راست پیغام خواہ وہ متن کی صورت میں ہو یا میڈیا کی شکل میں، ایموجی کو فوری طور پر شامل کرنا بہت آسان ہے۔ جس جگہ ایموجی لگانی ہو وہاں کرسر لائیں تو دل اور جمع کے نشان کا آئکن نمودار ہوگا ۔ یا پھر فون پر ایموجی لانے کے لیے ڈبل ٹیپ کیجئے اور پاپ اپ آئکن میں سے کوئی بھی ایموجی منتخب کیجئے۔‘

آپ کسی بھی وقت اسے ہٹاسکتےہیں اور یہ تمام شرکا کے پیغام سے بھی ہٹ جائے گا خواہ ان کی تعداد ہزاروں میں ہی کیوں نہ ہو۔ کسی بھی ٹویٹ کے ردِ عمل میں آپ ٹیپ کرکے دیکھ سکتے ہیں کہ کس کس نے آپ کے پیغام میں اپنا ایموجی اظہار کیا ہے۔ اسی طرح ایموجی چلتی رہے گی اور اس کا اظہار آپ کی لسٹ میں موجود ہرفرد تک پہنچتا رہے گا۔

گزشتہ برس اکتوبر میں ٹوئٹر نے پہلی بار اس کا عندیہ دیا تھا جسے تجزیہ نگاروں نے محسوس کیا تھا۔ ٹویٹر کے مطابق اب ایموجی کی تعداد کو مزید بڑھایا جائے گا۔ ٹویٹر نے اس سے قبل ایموجی ری ایکشن شامل کرنے کے منصوبے بنائے تھے لیکن وہ روبہ عمل نہ ہوسکے۔

اب دنیا کی مشہور ایپس اور سوشل میڈیا میں ایموجی کے استعمال اور مقبولیت کے بعد ٹویٹر نے حتمی طور پر انہیں داخل کرنے کا منصوبہ بنایا ہے۔ لیکن یاد رہے کہ اس کے لیے صارفین کو ٹویٹر کا نیا ورژن انسٹال کرنا ہوگا۔

ممبئی(ایمرا نیوزآن لائن) بالی ووڈ کے چاکلیٹی ہیرو رنبیر کپور اور اداکارہ عالیہ بھٹ اکثر اپنی شادی کی خبروں کے حوالے سے میڈیا کی زینت بنے ہوتے ہیں، آج کل بھی ان سے متعلق یہ خبریں گردش کررہی ہیں کہ وہ لیک کومو میں شادی کی پلاننگ کر رہے ہیں۔ہندوستان ٹائمز کے مطابق بالی ووڈ اداکار رنبیر کپور اور اداکارہ عالیہ بھٹ سے متعلق یہ خبریں پھیلی ہوئی ہیں کہ وہ بھی دیپکا اور رنویر کی طرح اٹلی کے خوبصورت ترین مقام ’لیک کومو‘ میں شادی کی پلاننگ کررہے ہیں۔تاہم عالیہ بھٹ کی والدہ سونی رزدان کااس حوالے سے کہنا ہے کہ عالیہ اور رنبیر کی شادی سے متعلق تمام خبریں جھوٹی اور بے بنیاد ہیں، دونوں نے اب تک اس بات کا فیصلہ نہیں کیا ہے کہ وہ کہاں اور کب شادی کریں گے۔سونی رزدان نے مزید بتایا کہ عالیہ اور رنبیر کی لیک کومو میں شادی کی خبر جنگل میں آگ کی طرح پھیل گئی ہے جبکہ یہ صرف اور صرف بے بنیاد افواہیں ہیں اور کچھ نہیں۔

انہوں نے بتایا کہ عالیہ اور رنبیر آج کل جرمنی میں موجود ہیں، جہاں اُن کی نئی ریلیز ہونے والی فلم ’براہمسترا‘ کی شوٹنگ جاری ہے۔عالیہ کی والدہ کا کہنا ہے کہ اس سال کے آغاز سے ہی عالیہ اور رنبیر کی شادی سے متعلق کوئی نا کوئی خبر میڈیا کلی زینت بنی ہوتی ہے جبکہ یہ بھی سننے میں آرہا ہے کہ ان کی شادی اسی سال یعنی2019 میں ہوجائے گی، اس حوالے سے سونی رزدان نے کہا کہ انہیں مداحوں کا عالیہ اور رنبیر کے بارے میں سوال پوچھنا اچھا لگتا ہے وہ پوچھ سکتے ہیں لیکن میں عالیہ کی ماں ہوں اور میںاپنی بیٹی کی نجی زندگی کے بارے میں بالکل بات نہیں کرنا چاہتی۔

انہوں نے مزید کہا کہ میں اپنی بیٹی کو خوش دیکھنا چاہتی ہوں اور وہ جو بھی کرتی ہیں میری دعائیں اور پیار ہمیشہ اُن کے ساتھ ہوتا ہے۔ اس کے علاوہ میں یہ بھی چاہتی ہوں کہ وہ اپنی زندگی اپنی مرضی سےگزارے۔ دو روز قبل فلم ساز آیان مکھرجی کی جانب سے سوشل میڈیا سائٹ انسٹاگرام پر ایک ویڈیو جاری کی گئی تھی جس میں وہ اور رنبیر کپور فلم کے کسی سین کی پریکٹس کرتے نظر آرہے ہیں جبکہ عالیہ اپنے فون سے دونوں کی ویڈیو بنانے میں مصروف ہیں۔

کراچی(ایمرا نیوزآن لائن) سابق کرکٹر معین خان کا کہنا ہے کہ سرفراز احمد بہترین کھلاڑیوں میں سے ایک ہے، سرفراز ٹیم کی ضرورت کے مطابق بیٹنگ کے لیے آئیں۔معین خان نے کہا کہ ورلڈ کپ میں پاکستان ٹیم کو بلاخوف کرکٹ کھیلنا ہوگی، پاکستان کے پاس اچھے پلیئرز ہیں، اچھے نتائج دے سکتے ہیں، اگر اعتماد کے ساتھ میدان میں اترے تو یقینی طور پر جیت ہوگی، کھلاڑی یہ سوچ کر میدان میں اتریں کہ وہ جیت سکتے ہیں۔

سابق کرکٹر کا کہنا تھا کہ رمضان ٹورنامنٹس پی ایس ایل فرنچائز کو ایمرجنگ ٹیلنٹ بھی مہیا کرسکتا ہے، رمضان ٹورنامنٹس پاکستان میں صنعت کا درجہ اختیار کرچکے ہیں۔انہوں نے کا کہا کہ دوسری انڈسٹری کے لوگ بھی رمضان ٹورنامنٹس سے مستفید ہوتے ہیں۔

اسلام آباد:(ایمرا نیوزآن لائن) وزیراعظم کے مشیر برائے خزانہ ڈاکٹر عبدالحفیظ شیخ کی زیر صدارت پیر کے روز فنانشنل ایکشن ٹاسک فورس (ایف اے ٹی ایف) ایکشن پلان پر پیش رفت کا جائزہ لینے کیلیے منعقدہ اجلاس میں فنانشل مانیٹرنگ یونٹ (ایف ایم یو) کی جانب سے وزارت خزانہ کی منظوری کے بغیرہی فنانشل ایکشن ٹاسک فورس کو نامکمل اور غیر تسلی بخش جواب پر مبنی رپورٹ بھجوانے کا انکشاف ہوا ہے۔اجلاس میں ایف اے ٹی ایف کو غیر تسلی بخش جوابات بھجوانے کی ذمے داری نیکٹا،ایف ایم یو اور ایف آئی اے ایک دوسرے پر ڈالتے رہے۔مشیر خزانہ نے اداروں کی اس بلیم گیم پر شدید ناراضگی کا اظہار کرتے ہوئے واضح کیا کہ اس اہم اور حساس نوعیت کے معاملہ پر آئندہ کسی قسم کی کوتاہی برداشت نہیں کی جائے گی۔

مشیر خزانہ ڈاکٹر عبدالحفیظ شیخ نے تمام اسٹیک ہولڈرز کو ہدایت کی کہ وہ ایف اے ٹی ایف ایکشن پلان کے اہداف کے حصول کیلیے مسلسل کام کو یقینی بنائیں اور اسے اعلیٰ ترین ترجیحات میں رکھا جائے تاکہ ہدف سے بڑھ کر کام کو یقینی بنایا جا سکے۔ سیکریٹری خزانہ نے تمام اہم اسٹیک ہولڈرز کو اجلاس کی سنجیدہ نوعیت، سنجیدہ چیلنجوں اور اعلیٰ ترجیحات کے بارے میں تفصیلات سے آگاہ کیا۔سیکریٹری خزانہ یونس ڈھاگا نے اجلاس کو ایف اے ٹی ایف سفارشات پر بریفنگ دی۔ان کا کہنا تھا کہ ایف اے ٹی ایف سفارشات پر عمل درآمد انتہائی ضروری ہے۔ مشیر خزانہ نے ڈی جی فنانشل مانیٹرنگ یونٹ منصور صدیقی جب ایف اے ٹی ایف کو نامکمل رپورٹ بھجوانے کے بارے میں وضاحت طلب کی تو انھوں نے بتایا کہ انھوں نے متعلقہ اداروں کے ذمے داران کے ساتھ وٹس ایپ اور ای میل کے ذریعے خط و کتابت کرنے کے بعد یہ رپورٹ بھجوائی ہے۔

اجلاس میں یہ بات سامنے آئی کہ جو رپورٹ بھجوائی گئی ہے اس کا وزارت خزانہ میں نہ تو فائل ورک ہوا اور نہ ہی اس رپورٹ کی کوئی منظوری لی گئی۔ذرائع کا کہنا ہے کہ اس رپورٹ میں ایف اے ٹی ایف ایکش پلان کے نکات پر عملدرآمد کے بارے میں غیر تسلی بخش جواب دیے گئے ہیں اور زیادہ تر نکاتکے جوابات میں مستقبل کا صیغہ استعمال کیا گیا ہے ۔ مشیر خزانہ نے اس پر شدید ناراضگی کا اظہار کیا۔اجلاس میں فیصلہ کیا گیا کہ وفاق و صوبوں کے درمیان رابطوں کو بڑھانے اور منی لانڈرنگ و ٹیررازم فنانسنگ سے نمٹنے کی صلاحیتیں بڑھائی جائیں گی۔

ذرائع کا کہنا ہے کہ پاکستان کی جانب سے مولانا مسعود اظہر کے حوالے سے جو حال ہی میں اہم فیصلے کیے ہیں اور اسی طرح کالعدم تنظیموں پر پابندی اور ان کے اثاثہ جات و بینک اکاونٹس منجمد کرنے اور مدارس پر سرکاری کنٹرول کے حوالے سے جو اقدامات اٹھائے ہیں اس سے عالمی سطح پر اور ایف اے ٹی ایف میں پاکستان کی صورتحال بہتر ہوئی ہے اور امریکا نے بھی اس پر اطمینان کا اظہار کیا ہے اور سب سے بڑھ کر یہ کہ پاکستان کے سب سے مخالف ممبر بھارت کی جانب سے بھی دباؤ کم ہوا ہے اس لیے توقع کی جارہی ہے کہ 16 مئی سے ایف اے ٹی ایف کے ساتھ شروع ہونے والے فیس ٹو فیس مذاکرات میں پاکستان کا نام بلیک لسٹ میں شامل نہیں کیا جائیگا تاہم پاکستان کا نام گرے لسٹ میں برقرار رہنے کا امکان ہے۔

لاہور(ایمرا نیوزآن لائن) ایونجرز سیریز کی نئی فلم ایونجرز اینڈ گیم نے کمائی کے نئے ریکارڈز قائم کردیے ۔ فلم نے10دن میں دنیا بھر سے ڈھائی کھرب روپے کا بزنس کرلیا ہے۔26 اپریل کو ریلیز ہونے والی ایوینجرز سیریز کی 22 ویں فلم ’ایوینجرز اینڈ گیم‘ نے دنیا بھر میں کمائی کے کئی ریکارڈ توڑے اور کئی نئے ریکارڈ بنائے ہیں۔

’ایوینجرزاینڈگم‘دنیا بھر میں اب تک ڈھائی کھرب روپے کا بزنس کرچکی ہے جبکہ فلم نے صرف پاکستان میں8 دن میں 25 کروڑ روپے کے قریب ریکارڈ بزنس کیا ۔فلم کی کہانی اس بار نئے ولن کو منظرِ عام پر لائی ہے جو انسانوں کو اپنا دشمن سمجھتے ہوئے انہیں صفحہِ ہستی سے مٹانا چاہتا ہے جبکہ ایونجرز کی ٹیم اْسے روکنے میں مصروف ہے۔

لاہور(ایمرا نیوزآن لائن) کینسر کے مرض میں مبتلا مریضوں کے لئے طاقت اور جرات کی علامت بھارتی اداکارہ سونالی باندرے نے انکشاف کیا ہے کہ جب انہیں ’’ہائی گریڈ کینسر‘‘ جیسے موذی مرض کی تشخیص ہوئی تو وہ پوری رات روئیں۔بھارتی ویب سائٹ ٹائمز آف انڈیا کی رپورٹ کے مطابق سونالی باندرے نے کینسر تشخیص کے بعد ہمت کا مظاہرہ کرتے ہوئےحالات سے سمجھوتا کر لیا اور ارادہ کیا کہ وہ آئندہ نہیں روئیں گی۔اداکارہ نے اپنے شوہر گولڈی بہل کو اپنی زندگی میں سب سے اہم شخص قرار دیتے ہوئے کہا کہ انہوں نے میری زندگی کے اس مشکل فیز سے نکلنے میں میری بہت مدد کی۔یاد رہے سونالی باندرے نے گولڈی بہل سے 2002 میں شادی کی تھی اور دونوں کا ایک بیٹا رنویر بہل ہے۔

واضح رہے کینسر کے مرض کو شکست دینے والی بالی ووڈ کی معروف اداکارہ سونالی باندرے تقریباً دو ماہ امریکا کے شہر نیویارک میں زیر علاج رہنے کے بعدصحت یاب ہو کر دسمبر میں واپس بھارت پہنچی تھیں۔44سالہ سونالی باندرے نے کیریئر کا آغاز 1994 میں ریلیز ہونے والی فلم ’آگ’ سے کیا، انہوں نے 50 کے قریب فلموں میں اداکاری کے جوہر دکھائے۔سونالی باندرے کی مشہور فلموں میں ‘کل ہو نہ ہو، لجا، جس دیش میں گنگا بہتی ہے، ہمارا دل آپ کے پاس ہے، ڈھائی اکشر پریم کے، زخم، انگارے، میجر صاحب، دل جلے،بھائی، انگلش بابو، دیسی میم، ثپوت‘ اور ’اپنے دم پر‘ شامل ہیں۔ان کی آخری فلم ’ونس اپون ٹائم ان ممبئی: دوبارہ‘ 6سال قبل 2013 میں ریلیز ہوئی تھی۔

لاہور: (ایمرا نیوزآن لائن) عہد ساز پنجابی فلم ’’مولا جٹ‘‘ کیس میں نیا موڑ آ گیا، فلمساز سرور بھٹی کے بعد فلمساز چودھری جمیل کے بیٹے صائم جمیل نے بھی فلم مولا جٹ کے فلمساز ہونے کا دعویٰ کر دیا۔میڈیا رپورٹ کے مطابق صائم جمیل نے پریس کانفرنس میں کہا کہ گزشتہ کچھ عرصہ سے فلم مولا جٹ کے کاپی رائٹس اور دیگر معاملات کے بارے میں تنازعات دیکھنے میں آ رہے ہیں۔ان کا کہنا تھا کہ فلم مولا جٹ کسی ایک فرد کی ملکیت نہیں تھی بلکہ 6 پروڈیوسرز کی کمپنی نے مل کر اسے بنایا تھا، جس کا نام باہو کارپوریشن تھا۔ اس فلم میں میرے والد چودھری جمیل مرحوم کے 35 فیصد شیئرز تھے۔

لاس اینجلس(ایمرا نیوز آن لائن )ہالی وڈ اداکار رابرٹ پٹنسن نے کہا ہے کہ انہیں اپنی نجی زندگی پر بات کرنا پسند نہیں کیونکہ وہ محبت کی قدر و اہمیت کم نہیں کرنا چاہتے۔ذرائع ابلاغ کے مطابق رابرٹ پٹینسن نے ایک انٹرویو کے دوران ماڈل و اداکارہ سوکی واٹر ہاﺅس کے متعلق سوال کے جواب میں کہا کہ کیا مجھے اس متعلق بات کرنی چاہیئے، اگر گلی میں کوئی اجنبی آپ سے اپنے تعلقات یا محبت کے متعلق پوچھے تو آپ کو یہ بہت ناگوار گزرے گا اس لئے مجھے اپنی نجی زندگی پر بات کرنا پسند نہیں کیونکہ میں اپنی محبت کی قدر و اہمیت کم نہیں کرنا چاہتا۔ان کا کہنا تھا کہ اگر آپ لوگوں سے ہر وقت محبت پر بات کریں گے تو وہ محبت کی قدر و اہمیت کم کر دیتی ہے، اگر آپ ایک حد مقرر کر دیں تو بہتر ہوتا ہے.

اسلام آباد:(ایمرا نیوزآن لائن) آئی ایم ایف نے کہا ہے کہ پاکستان پر 2سال میں 27 ارب ڈالر کا بیرونی قرض واجب الادا ہوجائے گا جب کہ قرض کا یہ حجم پاکستان کے مجموعی بیرونی قرضوں کا 27 فیصد ہے۔حکومت اور کچھ نجی سیکٹر کے ماہرین کے جائزوں کے مطابق جاری کھاتوں کے خسارے کو پورا کرنے کے لیے درکار رقم کو شامل کرنے کے بعد پاکستان کو اقتصادی بحران سے بچنے کے لیے اگلے دو برسوں میں 46 سے 50 ارب ڈالر کی ضرورت ہوگی۔ 27 ارب ڈالر کے بیرونی قرضوں کا ذکر پیر کو جاری کردہ آئی ایم ایف کی نئی ریجنل آؤٹ لُک رپورٹ اپ ڈیٹ میں کیا گیا ہے۔
رپورٹ کے مطابق پاکستان واحد علاقائی ملک ہے جسے سب سے زیادہ غیرملکی قرضہ ادا کرنا ہے۔ آئی ایم ایف کی رپورٹ کے مطابق رواں برس جون تک قرض کا تناسب جی ڈی پی کے 77 فیصد تک رہنے کی توقع ہے۔ سابقہ دور حکومت کے اختتام پر یہ تناسب 72.5 فیصد تھا۔ آئی ایم ایف کی جانب سے یہ رپورٹ اسی دن جاری کی گئی ہے جس روز پاکستان کے ساتھ ممکنہ بیل آؤٹ پیکیج پر مذاکرات شروع ہوئے ہیں۔

قبل ازیں گذشتہ برس نومبر میں بہت اہم معاملات پر اختلافات کے باعث مذاکرات ناکام ہوگئے تھے۔ تاہم اس بار حکام کو توقع ہے کہ اختلافات دور کرلیے جائیں گے اور 6.5 ارب ڈالر قرض کے معاہدے پر دستخط ہوجائیں گے۔پاکستان کو یہ قرض 3 سال میں ادا کرنا ہوگا۔ بیجنگ میں جمعے کو بیلٹ اینڈ روڈ فورم کی سائیڈلائن پر وزیراعظم پاکستان کی ملاقات آئی ایم ایف کی ایم ڈی کرسٹائن لوگارڈ سے ہوئی تھی۔ایوان وزیراعظم سے جاری کردہ بیان کے مطابق دونوں رہنماؤں نے فنڈ پروگرام کی اہمیت اور معاہدے کی جانب پیش قدمی پر اتفاق کیا تھا۔ پاکستان اورآئی ایم ایف کے درمیان تکنیکی سطح کے مذاکرات شروع ہوگئے ہیں، پیرکو ہونے والے مذاکرات کے پہلے روزپاکستان نے آئی ایم ایف کو 600 ارب روپے سے زائدکے نئے ٹیکسزلگانے پرآمادگی ظاہرکردی۔پاکستان نے ٹیکس اصلاحات، توانائی کے شعبہ میں تجاویز تیارکرلی ہیں جبکہ آئی ایم ایف سے 3 سالہ پروگرام کے تحت ساڑھے 6 ارب ڈالرکے لگ بھگ قرضے کا معاہدہ 10مئی کوطے پانے کا امکان ہے، مذاکرات میں آئی ایم ایف جائزہ مشن کی سربراہی ارنستو ریگوکرہے ہیں جبکہ پاکستانی ٹیم کی قیادت سیکریٹری خزانہ نے کی، وفد نے پہلے روز وزارت خزانہ ، ایف بی آر اور وزارت توانائی کے حکام سے مذاکرات کیے۔پاکستان نے 600ارب روپے کے نئے ٹیکسز لگانے کی یقین دہانی کرادی، آئی ایم ایف کو یقین دہانی کرائی گئی ہے کہ نئے بجٹ میں ایف بی آرکا ہدف 4500 ارب روپے سے زائد مقررکیا جائے گا، رواں سال ایف بی آر 4100 ارب روپے کا ٹیکس اکٹھا کرے گا، مذاکرات میںچیئرمین ایف بی آر اور ٹیکس حکام نے ٹیکس اصلاحات پر بھی آئی ایم ایف کو بریفنگ دی اورٹیکس کی چھوٹ محدود کرنے پر بھی تبادلہ خیال ہوا۔

آئی ایم ایف جائزہ مشن کے ساتھ مذاکرات میں رواں مالی سال کے پہلے 9 ماہ کے اقتصادی اعدادوشمار پر مشتمل مرتب کردہ ڈیٹا شیئرکیاگیا ہے، ذرائع کا کہنا ہے کہ آئی ایم ایف جائزہ مشن کے ساتھ آئندہ مالی سال 2019-20 کے وفاقی بجٹ کے لیے تیارکردہ تجاویز اور بجٹ اسٹریٹجی پیپراورمڈٹرم اکنامک فریم ورک بارے بھی تفصیلی تبادلہ ہوا ہے اور بجٹ اسٹریٹجی پیپر کے مجوزہ اہداف کو حتمی شکل دینے پرتبادلہ خیال ہواہے۔ذرائع کا کہنا ہے کہ آئی ایم ایے کے ساتھ مالیاتی خسارہ اور ادئیگیوں کے توازن سمیت دیگر اہداف پر بھی بات چیت ہورہی ہے او مالیاتی خسارہ رواں مالی سال کے آخر تک 7 فیصدکے لگ بھگ جبکہ پروگرام کے تحت اس میں بتدریج کمی لائی جائیگی اور 5.6 فیصد تک اگلے سال لایا جائے گا۔آئی ایم ایف پاکستان کی ٹیکس آمدنی جی ڈی پی کے 13.2 فیصد تک بڑھانے کا مطالبہ کررہا ہے لیکن حکومت پاکستان نے 12.7 فیصد تک بڑھانے کی یقین دہانی کرائی ہے، ذرائع کاکہنا ہے کہ آئی ایم ایف سے ہونے والے مذاکرات میں ریونیو فریم ورک کے بارے میں بھی تفصیلی تبادلہ خیال ہوا ہے۔ذرائع کا کہنا ہے کہ مذاکرات میں چین سے لیے جانے والے قرضوں کے بارے میں آگاہی سے متعلق آئی ایم ایف کو آگاہی دینے میں بھی پیشرفت ہوئی ہے، قرضوں کی تفصیلات پاکستان کے مجموعی قرضوں میں ظاہرہے، وہی آئی ایم ایف کو دی جائے گی۔آئی ایم ایف کو بتایا گیا ہے کہ پاکستان آمدن بڑھانے کی کوشش کر رہا ہے، تجارتی خسارے میں کمی ہو رہی ہے جبکہ درآمدات کو روکا جا رہا ہے، امید ہے رواں سال جاری کھاتوں کا خسارہ کم ہوگا، پاکستان نے ٹیکس اصلاحات، توانائی کے شعبہ میں تجاویزتیارکرلی ہیں۔

لاہور(ایمرا نیوزآن لائن) مارول کامکس کی نئی سپر ہیرو ایکشن ایڈونچر فلم اسپائیڈر مین؛ فار فرام ہوم کا نیاٹریلر جاری کردیاگیا ۔جان واٹس کی ہدایتکاری میں بننے والی اس فلم میں اداکار ٹام ہالینڈ بحیثیت پیٹر پارکر/ اسپائیڈرمین مرکزی کردار میں جلوہ گر ہونگے جن کے علاوہ فلم کی دیگر کاسٹ میں مائیکل کیٹن،سیموئیل ایل جیکسن،میریسا ٹومی، ڈونلڈ گروور، مارٹن اسٹار، زینڈایااورٹونی ریولوری فلم کی دیگر کاسٹ میں نمایاں ہیں۔

کیون فیج اور ایمی پاسکل کی مشترکہ پرودیو کردہ اس فلم کی کہانی پیٹر پارکر نامی ایسے لڑکے گِرد گھوم رہی ہے جو غیرمعمولی صلاحیتوں کا مالک ہوتا ہے اور مکڑی کی طرح جال کے ذریعے بلند و بالا عمارتوں پر سیکنڈوں میں چڑھ جاتا ہے۔فلم سونی پکچرز کے تحت5جولائی کو سنیماگھروں میں نمائش کیلئے پیش کی جائے گی۔