Tag new

لاہور ( ایم نائن ٹو ڈاٹ ٹی وی )جاپانی کمپنی سوزوکی نے اپنی گاڑی سیلیریو کا نیا ماڈل بھارت میں فروخت کے لیے پیش کردیا ہے (واضح رہے کہ اس گاڑی کا پرانا ورژن پاکستان میں نئی کلٹس کے نام سے متعارف کرایا گیا تھا)۔ اسپورٹی سیلیریو ایکس اس ماڈل کی پہلی گاڑی ہے جس میں آٹو گیئر شفٹ ٹیکنالوجی بھی کمپنی نے متعارف کرائی ہے اور یہ فیچر اس کے تمام ورژن میں موجود ہوگا۔سیلیریو ایکس اسپورٹس ایرو ڈائنامک ڈیزائن کے ساتھ ہے جس کے فرنٹ پر ایکس تھیم پر مبنی گرل دی گئی ہے۔بھارت میں اس گاڑی کو متعارف کراتے ہوئے کمپنی کا کہنا تھا کہ اس کو پہلے سے زیادہ اسٹائلش اور اسپورٹی ٹچ دیا گیا ہے تاکہ نوجوانوں کے دلوں میں جگہ بناسکے۔اسی طرح یہ گاڑی جدید ترین حفاظتی فیچرز سے لیس ہے اور 998 سی سی کی اس گاڑی میں تھری سلنڈر پٹرول انجن دیا گیا ہے جو کہ 67 ہارس پاور کا ہے۔اسی طرح فائیو اسپیڈ مینوئل موجود ہیں جبکہ آپشنل اے ایم ٹی یونٹ بھی دیا گیا ہے۔یہ نئی سیلیریو وی ایکس آئی اور زی ایکس آئی کے ساتھ آٹھ مختلف ورژن میں دستیاب ہوگی۔اس کے وی ایکس آئی ماڈل کی قیمت 4 لاکھ 57 ہزار 226 بھارتی روپے (7 لاکھ 48 ہزار پاکستانی روپے سے زائد) سے شروع ہوتی ہے جبکہ مختلف ورژن اور فیچرز کے لحاظ سے یہ 5 لاکھ 42 ہزار بھارتی روپے سے زائد (آٹھ لاکھ 88 ہزار پاکستانی روپے سے زائد) تک میں فروخت کی جائے گی۔ممکنہ طور پر یہ پاکستان میں بھی اگلے سال کلٹس کے نئے ماڈل کے طور پر متعارف کرائی جاسکتی ہے تاہم یہاں آنے کے بعد اس کی قیمت کیا ہوگی، اس بارے میں کہنا مشکل ہے۔ پاکستان میں جو ماڈل رواں سال اپریل میں متعارف کرایا گیا تھا اس کی قیمت ساڑھے بارہ لاکھ روپے سے شروع ہوتی تھی۔

واشنگٹن (M92) ماہرین فلکیات نے ایک نئی دنیا دریافت کرلی جو تقریبا ہماری زمین کے حجم کے برابر ہے، جہاں ایک سال 10 دِن کا ہوتا ہے،نئے سیارے کا نام راس 128 بی رکھا گیا ہے ، سائنس دانوں کا کہنا ہے کہ یہ کائنات میں زمین کے علاوہ زندگی کی تلاش کا عمدہ ہدف ثابت ہو سکتا ہے۔غیر ملکی میڈیا کے مطابق نیا سیارہ زمین سے صرف 11 نوری سال کی دوری پر واقع ہے اور اس اعتبار سے اب تک نظامِ شمسی سے باہردریافت ہونے والا دوسرا قریب ترین سیارہ ہے۔سب سے قریبی سیارہ پروکسیما بی ہے، تاہم وہ زندگی کے لیے ناموزوں ہے، کیوں کہ اس کا مدار اپنے ستارے کے خاصے قریب ہے اور اس پر خطرناک تابکاری کی بارش ہوتی رہتی ہے۔اس کے مقابلے پر راس 128 بی کا ستارہ(راس 128) زیادہ فعال نہیں ہے۔سوئٹزرلینڈ کی جنیوا لیبارٹری میں یہ سیارہ دریافت کرنے والی ٹیم کے رکن نکولا آستودیلو دیفرو نے بی بی سی کو بتایا: ‘میں سمجھتا ہوں کہ راس 128 بی زندگی کی نشو و نما کے لیے زیادہ مناسب ہے۔ لیکن ہمیں یہ جاننے کی ضرورت ہے کہ اس کی فضا کیسی ہے۔ اس کے اجزائے ترکیبی اور بادلوں کی روشنی منعکس کرنے کی صلاحیت سے پتہ چل سکتا ہے کہ آیا یہاں زمین کی طرح مائع پانی پایا جاتا ہے، یا پھر یہ زہرہ کی طرح بانجھ ہے۔ڈاکٹر نکولا نے کہا کہ یہ دریافت ہارپس نامی آلے کی مدد سے ایک دہائی پر مبنی سخت کوشش کا نتیجہ ہے۔اس سیارے کا وزن زمین کی نسبت 1.35 گنا زیادہ ہے، جب کہ اس کا اپنے ستارے سے فاصلہ زمین کے سورج سے فاصلے کے مقابلے پر 20 گنا کم ہے۔ تاہم چونکہ اس کا ستارہ ہمارے سورج کی نسبت بہت مدھم ہے، اس لیے اس پر زمین کے تقریبا مساوی روشنی پڑتی ہے۔اس کے باعث توقع ہے کہ یہاں سطح کا درج حرارت ہمارے سیارے جیسا ہی ہو گا۔کائنات میں زندگی کی تلاش میں سرگرداں ماہرینِ فلکیات عام طور پر کم وزن والے ایسے ٹھوس سیاروں کا کھوج لگاتے ہیں جن کا درج حرارت زمین سے ملتا جلتا ہو۔تاہم ایسے سیاروں کی دریافت خاصا مشکل کام ہے۔ اب تک نظامِ شمسی سے باہر دریافت ہونے والے 3500 سے زائد سیاروں کی بڑی اکثریت مشتری کی طرح بڑے اور گیسوں سے بنے سیاروں پر مشتمل ہے، جو زندگی کے لیے سخت ناموزوں ہیں۔