Tag pakistan

فوڈ اتھارٹی کی کاروائی،43 سوکلو مضر صحت گوشت برآمد
لاہور(ایمرا نیوزآن لائن) ڈی جی فوڈ اتھارٹی کیپٹن(ر) محمد عثمان کی سربراہی میں ویجیلینس ٹیموں نے بکرمنڈی کے علاقے میں کارروائیاں کرتے ہوئے لاہوریوں کو بیمار جانوروں کا ناقص گوشت کھلانے کی بڑی کوشش ناکام بنا دی ہے. میٹ سیفٹی ٹیموں نے 4300 کلو بیمار جانوروں کا گوشت اور 8 ہزار کلو جانوروں کی باقیات برآمد کرلیں. بکرمنڈی اولڈ سلاٹر ہاؤس ایریا میں کارروائیوں کے دوران 3 غیر قانونی مذبح خانے ،میٹ چلر اور فیٹ رینڈنگ یونٹ سیل کردیے گئے. فوڈ اتھارٹی نے چکن فیڈ میں ہارمونز کی موجودگی کا پتی لگانے کے لیے کی ابتدائی تحقیق کا آغاز کردیا. پنجاب فوڈ اتھارٹی کی محکمانہ کارکردگی اور طے کیے گئے اہداف کے جائرہ اجلاس میں فیصلہ کرتے ہوئے ڈی جی فوڈ اتھارٹی نے وزیراعظم پاکستان کی ہدایت پرانے ہارمونز کی موجودگی کا پتہ چلانے پر تحقیق کا حکم دے دیا.

پشاور(ایمرا نیوزآن لائن)ایف آئی اے پشاور نے بے نامی اکائونٹس سے 9ارب روپے سے زائد کی ٹرانزیکشن کے الزام میں فضیل خان نامی شخص کو گرفتار کرلیا ہے ، ملزم کے مختلف بینکوں میں 35 اکائونٹس ہیں جن کے ذریعے اب تک 9 ارب روپے کی ٹرانزیکشن ہوچکی ہیں، ایف آئی اے کمرشل بینک سرکل حکام کے مطابق گزشتہ روز پشاور کے مال روڈ پر ایک مکان پر چھاپہ مار کر وہاں سے اہم دستاویزات برآمد کرکے حاجی خان آفریدی المعروف وڑوکے حاجی کے صاحبزادے فضیل خان کو گرفتار کرلیا ہے ،حکام نے بتایا کہ فضیل خان کے پاکستان کے مختلف بینکوں میں 35 اکائونٹس ہیں جو اُس نے اپنے منشیوں کے نام سے کھلوائے تھے جن کے ذریعے اب تک 9 ارب روپے کی ٹرانزیکشن ہوچکی ہیں،ملزم فضیل خان پر الزام ہے کہ وہ پاکستان میں غیر ملکی کرنسی کا سب سے بڑا ڈیلر ہے جبکہ دبئی اور سعودی عرب میں مقیم پاکستانی اپنی رقم فضیل خان کے ملازمین کے ذریعے غیر قانونی طریقے سے پاکستان بھیجتے تھے ،حکام نے بتایا کہ ملزم فضیل خان کے اکائونٹس کے تانے بانے کراچی سے ملنے والے بے نامی اکائونٹس سے ملتے ہیں اور اِس کے اکائونٹس سے جن جن کو رقم بھیجی گئی ہے اس کا ریکارڈ حاصل کرلیا گیا ہے ،اب مزید گرفتاریاں متوقع ہیں،ایف آئی اے حکام نے بتایا کہ ملزم کے خلاف مقدمہ درج کرکے مزید تفتیش شروع کردی گئی ہے ۔

حافظ آباد (ایمرا نیوزآن لائن) ایڈیشنل ڈپٹی کمشنر ریونیو حافظ آباد آمنہ رفیق کا کہنا ہے کہ تعلیمی ا داروں میں دنیاوی تعلیم کے ساتھ ساتھ دینی تعلیم کا حصول اس بات کا عملی ثبوت ہے کہ ہمارے طلباء و طالبات دینی، مذہبی تعلیمات پر بھی خصوصی توجہ اور دلچسپی رکھتے ہیں۔ انہوں نے ان خیالات کا اظہار 35ویں قومی حفظ و قرآن اور حسن قرات کے مقابلوں میں پوزیشن ہولڈرز طلباء وطالبات میں انعامات تقسیم کرنے کی تقریب سے خطاب کرتے ہوئے کیا۔مقابلوں میں مختلف تعلیمی اداروں اور جامعات کے طلباء و طالبات نے حصہ لیا جبکہ ممتاز عالم دین قاری فیصل ندیم کیلانی، قاری محمد یوسف۔پروفیسر حافظ محمد عباس، پروفیسر محمد رضوان نے مقابلوں کے بطور ججز فرائض سر انجام دئیے

راولپنڈی(ایمرا نیوزآن لائن) فوجی شرٹ اور ٹوپی پہن کر میچ دیکھنے کی عوامی خواہش مسلح افواج عوام کی محبت اور سپورٹ کو سراہتی ہیں:ترجمان
سوشل میڈیا پر پی ایس ایل کیلئے فوجی ٹوپیاں پہن کر سٹیڈیم جانے کی مہم جاری ہے ، ڈی جی آئی ایس پی آر میجر جنرل آصف غفور نے بھی پیغام جاری کر دیا۔ اپنے ٹویٹ میں انہوں نے کہا پیارے پاکستانیو!آپ کی خواہش ہے کہ فائنل فوج کی شرٹ اور ٹوپی پہن کر دیکھیں،مسلح افواج آپ کی محبت اور حمایت کو قدر کی نگاہ سے دیکھتی ہیں۔ انہوں نے کہا کہ کھیل سیاست سے ماورا ہوتے ہیں، ہمارا یقین ہے کہ ہمارا تعلق صرف اس اظہار تک محدود نہیں ۔انہوں نے کہا عوام روشنیوں کے شہر میں میچ سے لطف اندوز ہوں،پاک فوج عوام کی محبت اور سپورٹ کو سراہتی ہے ۔علاوہ ازیں صارفین سوشل میڈیاپرپاکستانی مسلح افواج سے اظہاریکجہتی کرتے نظرآرہے ہیں۔صارفین کا کہنا ہے جو بھی میچ دیکھنے جائے وہ ملٹری کیپس اورشرٹس پہنے ۔ایک صارف نے لکھا پاکستانی بھائیوں کے پا س یہ اچھاموقع ہے جسے ضائع نہ کریں۔ایک اورصارف نے لکھا کہ آسٹریلیاکیخلاف میچ میں بھارتی کھلاڑیوں نے فوجی ٹوپیاں پہنیں،اس لئے اب تمام شائقین فوجی ٹوپیاں پہن کر سٹیڈیم پہنچیں،ایک صارف کے مطابق ملٹری کی ٹوپیاں پہن کر بھارت کوجواب دینا چاہتے ہیں ہم صاف دل کے مالک ہیں،ایک اورصارف لکھتاکہ ملٹری کیپس پہننے سے بھارت اورآئی سی سی کوکراراجواب ملے گا۔پاک فوج سے اظہاریکجہتی کیلئے شائقین نے ابھی سے تیاریاں کرلی ہیں،جسے وہ تصاویرکی صورت میں سوشل میڈیاپرشیئربھی کررہے ہیں۔

نئی دہلی (ایمرا نیوزآن لائن) سلامتی کونسل میں مودی سرکاری کی شکست پر اپوزیشن رہنما راہول گاندھی نے تنقید کے تیر برساتے ہوئے کہا ہے کہ مودی کی چین کے حوالے سے پالیسی ناکام ہو گئی، کمزور مودی چین کے صدر شی جن پنگ سے ڈرتے ہیں، سلامتی کونسل میں قرار داد کی ناکامی پر مودی جی کے منہ سے ایک لفظ بھی نہیں نکلا۔ راہول نے اپنی ٹویٹ میں مزید کہا کہ مودی گجرات میں شی جن پنگ کے ساتھ ناچتے رہے ، مودی نے دہلی میں شی جن پنگ کو گلے لگایا اور چین میں شی جن پنگ کے سامنے لیٹ گئے ، کمزور مودی کی کمزور پالیسیوں نے بھارت کی تذلیل کرا دی۔ بی جے پی نے اپنے ردعمل میں کہا کہ راہول گاندھی سکیورٹی کونسل اور قومی سلامتی کے معاملات مودی پر چھوڑ دیں اورخود بس چینی سفیر سے خفیہ ملاقاتیں کریں۔

اسلام آباد، لاہور (ایمرا نیوزآن لائن) وزیراعظم عمران خان نے ارکان پنجاب اسمبلی کی تنخواہوں اور مراعات میں اضافے کے معاملے پر شدید مایوسی کا اظہار کرتے ہوئے کہا ہے جب ہم عوام کو بنیادی ضروریات دینے کے قابل نہیں تو یہ فیصلہ نامناسب ہے ۔ اپنے ٹویٹ میں وزیر اعظم نے کہا اراکین اسمبلی، وزرا ،وزیراعلیٰ کی تنخواہوں اور مراعات میں اضافے کا فیصلہ سخت مایوس کن ہے ۔ پاکستان خوشحال ہوجائے تو شاید یہ قابل فہم ہو مگر ایسے میں جب عوام کو بنیادی سہولیات کی فراہمی کیلئے بھی وسائل دستیاب نہیں، یہ فیصلہ بالکل بلاجواز ہے ۔ علاوہ ازیں وزیراعظم نے گورنرپنجاب کو ارکان پنجاب اسمبلی کی تنخواہوں میں اضافے کے بل پر دستخط کرنے سے روک دیا،وزیراعظم نے وزیراعلی پنجاب کو بل دوبارہ ایوان میں لانے کی ہدایت کردی،وزیراعظم کی طرف سے وزیر اعلی کو تاحیات مراعات کے فیصلے پر نظرثانی کی ہدایت کی گئی۔ذرائع کے مطابق وزیراعظم کا کہنا ہے وزیراعلی کو پوری زندگی کیلئے گھردینے کا فیصلہ مناسب نہیں،ذرائع کے مطابق مراعات کا دورانیہ زیادہ سے زیادہ تین ماہ کرنے کی تجویزدی گئی ہے دریں اثنا ذرائع کے مطابق وزیراعلی پنجاب کی مراعات کو ارکان پنجاب اسمبلی کی تنخواہوں میں اضافے والے بل سے نکالنے کا فیصلہ کرلیاگیا، مراعات کو قانونی طریقے سے نئی ترمیم کے ذریعے نکالا جائیگا،حکومتی سطح پر وزیراعلی کی مراعات کلاز بل سے نکالنے پر اتفاق ہوگیا ۔ تحریک انصاف کی اعلی قیادت نے روزنامہ 92نیوز کو وزیر اعظم نے وزیر اعلی پنجاب کو ہدایت کر دی کہ وہ اسمبلی میں ممبران کی تنخواہوں میں اضافے کے لئے عوامی نمائندگان قانون ترمیمی بل 2019 کی منظوری کی منظوری سے گریز کریں۔ اسلام آباد(سپیشل رپورٹر، اے پی پی، صباح نیوز، 92 نیوز رپورٹ) وزیراعظم عمران خان نے کہا ہے آج پاکستان بہت محفوظ اور امن کے راستے پر چل نکلا ہے ، بھارت میں الیکشن تک مسائل رہیں گے ، اگر نفرت پھیلا کر الیکشن لڑا جائے تو پھر وہی ہوتا ہے جو مقبوضہ کشمیر میں ہوا ۔ وزیر اعظم آفس میں پاکستان کے آن لائن ویزا سسٹم کے افتتاحی تقریب سے خطاب کرتے ہوئے وزیر اعظم نے کہا پاکستان اس قدر محفوظ ملک بن چکا ہے کہ اگلا پورا پی ایس ایل یہیں ہو گا ، بھارت کے الیکشن تک تھوڑا بہت مسئلہ ہے توقع ہے الیکشن کے بعد معاملات ٹھیک ہو جائیں گے اوربھارت سمیت تما م پڑوسی ممالک کے ساتھ ہمارے خوشگوار تعلقات قائم ہو ں گے ۔ وزیر اعظم نے کہا آن لائن ویزا سسٹم کا آغاز ایک بہت بڑا اقدام ہے ، ملک کو غیر ملکیوں کے لیے کھولنا نئے پاکستان کی جانب پہلا قدم ہے ۔ یہ ایک بہت بڑی تبدیلی ہے ۔ ملک میں سرمایہ کاری تب آئے گی جب کسی کا پیسہ بنے گا ۔ 70 کی دہائی میں یہاں پیسہ بنانے کو گناہ سمجھا جانے لگا ،اس مائنڈ سیٹ نے پاکستان کو بڑا نقصان پہنچایا ، اب ہم پاکستان کو کھول رہے ہیں ، ہم چاہتے ہیں کہ بیرونی سرمایہ کار پاکستان آ کر پیسہ بنائیں۔وزیر اعظم عمران خان نے کہا ہمارے شمالی علاقہ جات میں سوئٹزر لینڈ سے بھی دگنی سیاحت ہے اور ابھی بھی بہت سے سیاحتی مقامات ایسے ہیں جن کو تلاش نہیں کیا جا سکا ، حکومت نے ماحولیاتی سیاحت کے آغاز کا بھی فیصلہ کیا ہے جو ماحول دوست ہو گی ،جبکہ مذہبی سیاحت کی یہاں اس سے بھی زیادہ صلاحیت ہے جس میں بدھ ازم ، سکھ ازم اور صوفی ازم شامل ہے ۔ حکومت نے مذہبی سیاحت کو مارکیٹ کرنے کا فیصلہ کیا ہے ۔تمام تاریخی مقامات کو نقشے پر لانے اور ان کی ویب سائٹس بنانے کا فیصلہ کیا ہے ۔ علاوہ ازیں وزیراعظم کی زیر صدارت اجلاس میں بجلی سے متعلق امور اور مسائل کے درمیانی اور طویل مدتی حل میں پیش رفت کا جائزہ لیا گیا۔ اجلاس میں وفاقی وزرا، چئیرمین ٹاسک فورس برائے توانائی اور توانائی کے شعبہ سے منسلک ماہرین نے شرکت کی۔ دریں اثنا چیف آف ائیر سٹاف ائیر چیف مارشل مجاہدانورخان نے وزیر اعظم سے ملاقات کی ہے ۔وزیر اعظم آفس سے جاری بیان کے مطابق ملاقات میں پاک فضائیہ کے پیشہ ورانہ امور اور آپریشنل تیاریوں پر بات چیت ہوئی۔عمران خان نے پاک فضائیہ کی پیشہ ورانہ صلاحیتوں کو سراہا ہے اور کہا پوری قوم کو اپنی بہادر فورسز پر فخر ہے ۔ مزید برآں وزیر اعظم سے ممتاز عالم شیخ محمد الجیلانی اور ڈاکٹر عمر فاروق عبداﷲ نے ملاقات کی ہے ۔ملاقات میں اسلامی تعلیمات کے فروغ کے سلسلے میں تفصیلی گفتگو کی گئی اور اسلامی تعلیمات کے فروغ کے سلسلے میں بنائی جانے والے اسلامک یونیورسٹی کے سلسلے میں بھی تبادلہ خیال کیا گیا۔ وزیراعظم کے معاون خصوصی افتخار درانی نے اپنے ٹویٹ میں کہا ہے عمران خان آج باجوڑ ایجنسی کا دورہ اور قبائلی عوام سے خطاب کریں گے ۔ افتخار درانی نے قبائلی عوام سے اپیل کی وہ جمعہ کو کرکٹ گرائونڈ باجوڑ پہنچیں اور عمران خان کا خطاب خود سنیں ۔

تین ڈاکو زخمی حالت میں گرفتار ایک کانسٹیبل بھی زخمی
جہانیاں (ایمرا نیوز آن لائن) نواحی علاقہ میں علی الصبح پولیس مقابلہ ،تین ڈاکو زخمی حالت میں گرفتار ایک کانسٹیبل زخمی ہو ا۔تفصیل کے مطابق صوبہ پنجاب کے علاقہ جہانیاں کے نواحی علاقہ جنگل مڑیالہ میں پولیس مقابلے کے دوران تین زخمی ڈاکو گرفتار کر لیے گئے ۔پولیس ترجمان کے مطابق پانچ ڈاکو مویشی سرقہ کرکے جا رہے تھے جنہیں سی آئی اے اور تھانہ صدر خانیوال پولیس نے روکا تو ڈاکوﺅں نے فائرنگ کر دی سخت مقابلے اور فائرنگ کے تبادلے کے بعد تین ڈاکوﺅں کو زخمی حالت میں گرفتار کر لیا گیاجبکہ مقابلے میں ایک پولیس اہلکار بھی زخمی ہوا ۔ڈاکوﺅں کے دیگر ساتھی فرار ہو گئے جن کی تلاش جاری ہے ۔پولیس ترجمان کے مطابق پولیس مقابلہ علی الصبح پانچ بجے جہانیاں کے نواحی علاقہ جنگل مڑیالہ حدود تھانہ صدر خانیوال کے علاقے میں ہوا ۔پولیس مقابلے میں ایلیٹ فورس ،سی آئی اے ،تھانہ صدر خانیوال اور جہانیاں پولیس نے حصہ لیا ۔زخمی ڈاکوﺅں کو ڈی ایچ کیو ہسپتال خانیوال داخل کروا کر پولیس کا سخت پہرہ لگا دیا گیا ہے جبکہ پولیس پکڑے گئے ڈاکوﺅں کی شناخت کو صیغہ راز میں رکھ رہی ہے ذرائع کے مطابق پکڑے گئے ڈاکوﺅں کا تعلق پاکپتن کے علاقہ سے بتایا جاتا ہے۔

واشنگٹن اور نئی دہلی ملک میں جوہری تنصیبات لگانے پر بات چیت ایک دہائی سے کر رہے ہیں
واشنگٹن(ایمرا نیوز آن لائن)امریکا نے بھارت کو یقین دہانی کرائی ہے کہ وہ نئی دہلی کےساتھ باہمی سول جوہری تعاون کے وعدے پر عمل پیرا ہے اور بھارت میں 6 جوہری تنصیبات لگانا چاہتا ہے۔خبر رساں ادارے کے مطابق امریکہ نے یہ یقین دہانی واشنگٹن میں ہونےوالے 9ویں امریکا بھارت اسٹریٹجک سیکیورٹی ڈائیلاگ میں کرائی۔بھارت کے سیکریٹری خارجہ وجے گوکھلے اور امریکا کے انڈر سیکریٹری آف اسٹیٹ برائے آرمز کنڑول اینڈ انٹرنیشنل سیکیورٹی اینڈریا تھومپسن نے اجلاس کی قیادت کی۔ڈائیلاگ کے بعد مشترکہ اعلامیے میں کہا گیا کہ ’انہوں نے باہمی سیکیورٹی اور سول جوہری تعاون کو مزید بڑھانے کے عزم کا اظہار کیا جس میں بھارت میں 6 امریکی جوہری تنصیبات کا قیام بھی شامل ہے۔تاہم انہوں نے اس کی مزید وضاحت نہیں دی۔اجلاس میں دونوں ممالک میں عالمی سیکیورٹی کے چیلنجز پر تبادلہ خیال کیا گیا اور ہتھیاروں کے پھیلاو¿ اور دہشت گردوں تک ان کی رسائی کو روکنے کے لیے مل کر کام کرنے کی یقین دہانی کرائی گئی۔مشترکہ اعلامیے میں امریکا نے بھارت کی نیوکلیئر سپلائرز گروپ میں رکنیت میں تعاون کی یقین دہانی بھی کرائی۔12 مارچ کو بھارت کے ایڈیشنل سیکریٹری برائے عالمی سیکیورٹی امور ڈاکٹر یلیم ڈی ایس اور سیکریٹری برائے تخفیف اسلحہ اندرا مانی پانڈے، امریکی اسسٹنٹ سیکریٹری آف اسٹیٹ برائے آرمز کنٹرول نے مشترکہ طور پر امریکا بھارت اسپیس ڈائیلاگ کے تیسرے مرحلے کی صدارت کی تھی۔امریکا اور بھارت ملک میں جوہری تنصیبات لگانے پر بات چیت ایک دہائی سے کر رہے ہیں ،تاہم بھارت کے قوانین کو عالمی قوانین کے مطابق بنانے کی ضرورت اس کام میں تاخیر کا سبب بنتی رہی ہے۔بھارت کے موجودہ قوانین کے مطابق جوہری تنصیبات لگانے والا ہی حادثے کی صورت میں تمام اخراجات برداشت کرے گا۔امریکا کی خواہش ہے کہ اس قانون میں تبدیلی کرتے ہوئے تنصیبات لگانے والے کے بجائے اسے چلانے والے کو حادثے کے تمام اخراجات اٹھانے کا قانون چاہتا ہے۔

کراچی(ایمرا نیوز آن لائن)کراچی میں رینجرز نے کارروائی کرتے ہوئے بھتہ طلب کرنے والے اور دستی بم پھینک کر فرار ہونے والے 3 ملزمان کو گرفتار کر لیا۔سندھ رینجرز کے مطابق رینجرز نے کراچی کے علاقوں لیاری اور گارڈن میں کارروائی کی جس کے دوران یہ 3 ملزمان گرفتار ہوئے ہیں۔ترجمان سندھ رینجرز کا مزید کہنا ہے کہ گرفتار ملزمان کے قبضے سے ہینڈ گرینیڈ، ڈیٹونیٹرز، کلاشنکوف، 9 ایم ایم پسٹل برآمد ہوئے ہیں۔رینجرز ترجمان کا یہ بھی کہنا ہے کہ دستی بم پھینکنے اور تاجروں سے بھتہ وصول کرنے میں ملوث ان ملزمان کو پولیس کے حوالے کر دیا گیا ہے۔

دونوں ملکوں کے کرکٹ بورڈزنے دورہ کی منسوخی کا مشترکہ فیصلہ کیا
کرائسسٹ چرچ(ایمرا نیوز آن لائن)مساجد میں دہشتگردی کے باعث بنگلہ دیش کرکٹ ٹیم کا دورہ نیوزی لینڈ منسوخ کر دیا گیا۔کیوی میڈیا کے مطابق کرائسٹ چرچ کی دومساجد میں دہشتگردی کے بعد بنگلہ دیش کرکٹ ٹیم کا دورہ نیوزی لینڈ منسوخ کر دیا گیا۔ دونوں ملکوں کے کرکٹ بورڈز نے دورہ کی منسوخی کا مشترکہ فیصلہ کیا۔نیوزی لینڈ اوربنگلہ دیش کے درمیان تیسرا اورآخری ٹیسٹ آج سے شروع ہونا تھا۔واضح رہے کہ نیوزی لینڈ کے شہرکرائسٹ چرچ کی مساجد میں فائرنگ سے 27 افراد جاں بحق اورمتعدد زخمی ہو گئے جب کہ دورہ پر موجود بنگلادیشی کرکٹ ٹیم بھی اس حملے میں بال بال بچ گئی۔