Tag pakistan

کراچی(میڈیا نائن ٹو ڈاٹ‌ ٹی وی) پاکستان میں انسانوں کے بعد اب جانوروں کے بھی شناختی کارڈ بنانے کا فیصلہ کیا گیا ہے۔ذرائع کے مطابق پاکستان کی انتظامی تاریخ کا منفرد قانون بنانے کی تیاری جاری ہے۔ جانوروں کے لئے بھی نادرا کی طرز کا ادارہ بنایا جائے گا جس کے ذریعے انہیں شناختی کارڈ، ویزا اور پاسپورٹ بھی دیے جائیں گے۔
سندھ حکومت کے محکمہ لائیو اسٹاک نے انوکھا بل تیار کیا ہے جس کے تحت سندھ لائیو اسٹاک رجسٹریشن اتھارٹی کا قیام عمل میں لایا جائیگا۔ جانوروں کا سینٹرل ڈیٹا بیس بنایا جائے گا، ان کی نقل و حرکت اور پیدائش و انتقال کے بارے میں لائیو اسٹاک اتھارٹی کو آگاہ کرنا ہوگا اور دستاویز لینا ہوگی، کمپیوٹرائزڈ ڈیٹا بیس میں جانوروں کی پیدائش و اموات کا اندراج ہوگا۔
ہر جانور کو مخصوص شناختی کوڈ جاری کیا جائیگا اور انہیں ذبح خانوں میں لانے پر اتھارٹی کو اطلاع دینا لازمی ہوگی۔ لائیو اسٹاک اتھارٹی جانوروں کی ویلفئیر اور نیوٹریشن پر کام کریگی جبکہ قصابوں کی تربیت اور انکی رجسٹریشن ہوگی۔

لاہور(میڈیا نائن ٹو ڈاٹ ٹی وی)پنجاب لینڈ ریکارڈ اتھارٹی انتظامیہ صوبے بھر کے اراضی ریکارڈ سنٹرز میں تعینات اسسٹنٹ ڈائریکٹر لینڈ سروس سنٹر انچارج سمیت دیگر سٹاف کے اثاثہ جات کی تفصیلات اکٹھی کرنے میں ناکام ہو گئی،اراضی ریکارڈ سنٹرز میں تعینات سٹاف نے اثاث جات کا ریکارڈ فراہم کرنے سے صاف انکار کر دیا،ہمارا سروس سٹرکچر بناﺅ،پھر ریکارڈ فراہم کریں گے،سٹاف کا انتظامیہ کو دو ٹوک جواب،انتظامیہ کی جانب سے خاموشی اختیار کر لی گئی،روزنامہ پاکستان کو ملنے والی معلومات کے مطابق پنجاب حکومت کی جانب سے صوبے بھر کے صوبائی دفاتر میں ملازمین کے اثاثہ جات کا ریکارڈ مرتب کرنے کی ہدائت کی گئی ہے اور اس حوالے سے چیف سیکریٹری پنجاب کیپٹن (ر)زاہد سعید نے پنجاب لینڈ ریکارڈ اتھارٹی کے ڈی جی کیپٹن (ر)ظفر اقبال کو بھی ہدایات کی تھیں کہ پنجاب لینڈ ریکارڈ اتھارٹی کے اے ڈی ایل آرز ،سروس سنٹرز انچارج اور دیگر سٹاف کے اثاثہ جات کا ریکارڈ مرتب کیا جائے جس پر پنجاب لینڈ ریکارڈ اتھارٹی کے صوبے بھر کے ملازمین کو اثاثہ جات کا ریکارڈ مرتب کیا جائے جس پر پنجاب لینڈ ریکارڈ اتھارٹی کے صوبے بھر کے ملازمین کو اثاثہ جات فارم بھی تقسیم کر دیئے تاہم چار ماہ سے زائد عرصہ گرزجانے کے بعد بھی اراضی ریکارڈ سنٹر میں تعینات سٹاف سے اثاثہ جات کے حوالے سے انتظامیہ معلومات لینے میں ناکام نظر آئی ہے،ذرائع سے معلوم ہوا ہے کہ اے ڈی ایل آرز اور سروس سنٹر انچارج کی کثیر تعداد نے اثاثہ جات کی معلومات مہیا کرنے کے حوالے سے انتظامیہ کے ساتھ ساتھ نئی شرائط رکھ دی،جس میں سر فہرست سروس سٹرکچر واضح کرنے اور مستقبل کرنے کا مطالبہ کرنے کا مطالبہ کیا گیا ہے،اس کے علاوہ سکیورٹی ،اورٹائم ،دیگر الاﺅنسز ز اور سابقہ ادائیگیاں بھی کلیئر کرنے کا مطالبہ کیا ہے اور اس حوالے سے شرائط کی منظوری کے بعد اثاثہ جات کی تفصیلات مہیا کرنے پر رضامندی ظاہر کی ہے جس پر انتظامیہ صوبے بھر کے ملازمین کے یکجا موقف کے سامنے بے بس لاچار نظر آرہی ہے دوسری طرف پنجاب لینڈ ریکارڈ اتھارٹی کے شعبہ ایچ آر کی ڈائریکٹر مس نادیہ چیمہ کا کہنا ہے کہ سٹاف کی کمی کے باعث تاخیر ضرور ہوئی ہے مگر اراضی ریکارڈ سنٹر سٹاف کی جانب سے آنے والی شرائط قابل قبول نہ ہیں اثاثہ جات فارم کی تفصیلات اور ریکارڈ ہر صورت لیں گے،اس حوالے سے آئندہ سخت اقدامات اٹھائیں گے بصورت دیگر ریکارڈ فراہم نہ کرنے والوں کے خلاف کارروائی کاآغاز کر دیا جائے گا۔

اسلام آباد (میڈیا نائن ٹو ڈاٹ ٹی وی ) پاکستان میں سعودی عرب کے سفیر نواف بن سعید احمد المالکی نے کہا ہے کہ سعودی حکومت پاکستان کے سابق وزیراعظم میاں نواز شریف کےلئے کوئی این آر او نہیں کرا رہی اور ہم اس بارے میں بالکل خاموش ہیں۔ ان خیالات کا اظہار انہوں نے سابق وفاقی وزیر اطلاعات اور سابق سنیٹر محمد علی درانی کے عشائیہ میں اخبارات کے چند سینئر ایڈیٹروں سے گفتگو کرتے ہوئے کیا۔ روزنامہ نیا اخبار کے مطابق کھانے کی میز پر ہونے والی اس بات چیتمیں سعودی سفیر نے کہا کہ ان پر پاکستان کی اعلیٰ عدالتوں میں مالی مقدمات چل رہے ہیں۔ ایک سوال کے جواب میں انہوں نے کہا کہ دہشتگردی کے خلاف اسلامی فوج کا منصوبہ جاری و ساری ہے اور نومبر کے آخر میں اس بارے میں کوئی واضح شکل سامنے آ جائے گی۔ پاکستان کے سابق آرمی چیف راحیل شریف کے بارے میں متعدد سوالوں کے جواب میں انہوں نے کہا کہ وہ بڑی محنت سے کام کر رہے ہیں۔ ان سے پوچھا گیا کہ ایک طرف سعودی حکومت اور اس کے اعلیٰ عہدیداروں کے علاوہ خانہ کعبہ اور مسجد نبوی کے تمام امام حضرات نے سختی سے دہشتگردی کی مذمت کی ہے اور ایک مسلمان کے خون کو دوسرے مسلمان کےلئے حرام قرار دیا ہے۔ برسوں پہلے نیویارک میں ورلڈ ٹریڈ سنٹر پر حملے کے کلیدی ملزمان میں سے بعض کا تعلق سعودی عرب سے تھا۔ یہی نہیں بلکہ اس دور میں عالمی سطح پر دہشتگردوں کا سرغنہ قرار دئیے جانے والے اسامہ بن لادن بھی آپ ہی کے ملک سے تعلق رکھتے تھے۔ اس سوال پر سعودی سفیر نے ہنستے ہوئے کہا کہ آپ کے ملک پاکستان میں ہزاروں بے گناہ اور معصوم لوگ دہشتگردی کا شکار بنے ہیں مگر یہ بھی حقیقت ہے کہ اس ملک سے ان گنت لوگ دہشتگردی کی تحریکوں میں شامل رہے اور فوج کی تمام تر کوششوں کے باوجود آج بھی پاکستانمیں خودکش حملہ آور موجود ہیں اور آئے دن ان کی طرف سے خوفناک کارروائیاں کی جاتی رہی ہیں۔ نیویارک ورلڈ ٹریڈ سنٹر پر حملے کے بارے میں شریک مجلس کے ایک سابق فوجی افسر نے کہا کہ کیا اتنی بڑی عمارت ایک جہاز کے ٹکرانے سے تباہ ہو سکتی ہے تو سعودی سفیر نے کہا کہ اس کے بارے میں بھی بہت بحث ہوتی رہی ہے تاہم یہ حقیقت ہے کہ اس روز تین ہزار سے زیادہ یہودیوں کو پیشگی علم کیسے ہو گیااور انہوں نے ورلڈ ٹریڈ سنٹر کی عمارت خالی کر دی۔ ان سے پوچھا گیا کہ کیا امریکہ کی طرف سے اسامہ بن لادن کی ایبٹ آباد سے گرفتاری کے بعد یہ امریکی دعویٰ تسلیم کیا جا سکتا ہے کہ انہوں نے اسامہ کی نعش سمندر میں پھینک دی تو انہوں نے کہا اس مسئلہ کو بھی متنازعہ سمجھا جاتا ہے۔ ان سے پوچھا گیا کہ سعودی عرب کی تاریخ میں شاہی خاندان سے تعلق رکھنے والے شہزادوں اور دوسرے قریبی لوگوں کی کرپشن میں گرفتاری پہلاواقعہ ہے جبکہ یہ سمجھا جاتا تھا کہ وہاں انہیں کوئی پوچھنے والا نہیں۔ جس پر سفیر محترم نے کہا یہ درست نہیں کہ سعودی عرب میں حکمران خاندان کے لوگوں کو ہر جرم کی چھٹی رہی ہے۔ ان کے خلاف قانون حرکت میں آتا رہا ہے لیکن ایسے واقعات الگ الگ پیش آتے رہے ہیں مگر اس طرح کی اجتماعی مہم سامنے نہیں آئی تھی۔ یمن کے بارے میں سوال پر انہوں نے کہا یہ کہنا درست نہیں ہوگا کہ مسئلہ مکمل طور پر ختم ہو گیا ہے۔چونکہ پاکستان کے شمالی علاقوں اور افغانستان کے اندر انتہا پسندوں اور دہشتگردوں کا طرز زندگی قبائلی ہے اور یمن میں بھی مختلف قبائل کے اندر بھی یہی مشکل پائی جاتی ہے۔ قبائلی جنگ کا مکمل طور پر خاتمہ مشکل ہوتا ہے اس کا اندازہ آپ افغانستان کے اندر کابل حکومت کے باغی قبائلی افراد سے لگا سکتے ہیں جو دنیا کی بڑی فوجی قوت اور سپر طاقت کے علاوہ مختلف اتحادی ممالک کی فوج سے بھی مکمل طور پر ختم نہیں ہوئےلیکن سعودی عرب کی کوشش جاری ہے اور انشاءاللہ ہم کامیاب ہونگے۔ ان سے سوال کیا گیا کہ داعش ہو یا دہشتگردی اور انتہاپسندی میں ملوث تنظیمیں حال ہی میں عالمی ذرائع ابلاغ کے ذریعے سے یہ امر سامنے آیا ہے کہ سعودی عرب خفیہ طور پر اسرائیل سے تعلقات بڑھا رہا ہے۔ جس پر سفیر نے کہا کہ یہ سو فیصد جھوٹ اور بے بنیاد بات ہے۔ دراصل یہ اکثر مسلمان ممالک کی مستحکم حکومتوں کے خلاف دہشتگرد جماعتوں کا پراپیگنڈا ہے کہوہ اپنے لئے مختلف مسلم ممالک کے عوام کی ہمدردیاں حاصل کر سکیں۔ قبل ازیں محمد علی درانی کی طرف سے خیر مقدمی الفاظ میں سعودی حکومت کی پاکستان سے محبت اور برسہا برس سے پاکستانی عوام اور حکومت کےلئے ان کی نیک خواہشات کا اعتراف کیا اور توقع ظاہر کی کہ نئے سعودی سفیر کی محنت، سرگرمی اور ایمان کی حد تک پہنچے ہوئے خلوص اور دیانتدارانہ کوششوں سے پاکستان اور سعودی عرب کے عوام میں دوستی، محبت اور بھائی چارے کے مزید جذبات پیدا ہونگے۔ جس کے جواب میں سعودی سفیر نے بھی عشائیہ کے شرکاءسے اظہار خیال کرتے ہوئے اپنی اور حکومت کی طرف سے بھرپور تعاون اور خیرسگالی کے جذبات کا اظہار کیا۔ عشائیہ کا گلبرگ کے ایک ہوٹل میں اہتمام کیا گیا تھا جس میں زندگی کے ہر شعبہ کے نمائندہ افراد نے شرکت کی۔

نیو یارک(M92) امریکا میں پاکستانی سفیراعزاز چوہدری کا کہنا ہے کہ پاکستان میں امن واستحکام کیلئے افغانستان میں امن ناگزیرہے۔
امریکا میں پاکستانی سفیراعزازچودہری نے جارج ٹاؤن یونیورسٹی کے طلباء سے خطاب میں جنوبی ایشیا میں امن و سلامتی کو درپیش چیلنجز پر روشنی ڈالتے ہوئے کہا کہ پاکستان کی دہشت گردی کے خلاف جنگ میں کامیابیوں سے معاشی صورتحال بہتر ہوئی، سی پیک پورے خطے کے کروڑوں افراد کی زندگیوں میں تبدیلی لائے گا۔اعزازچوہدری نے کہا کہ افغانوں کے زیر قیادت امن عمل میں سہولت کیلئے اپنا کردار جاری رکھیں گے، افغانستان کے مسئلے کا کوئی فوجی حل نہیں ہے اورپاکستان میں امن واستحکام کیلئے افغانستان میں امن ناگزیر ہے۔
بھارت کے حوالے سے اعزاز چوہدری نے کہا کہ پاکستان بھارت کے ساتھ اچھے ہمسائیگی کے تعلقات چاہتا ہے اور خطے میں دیرپا امن و استحکام کیلئے مسئلہ کشمیرکا حل ضروری ہے۔

نیو یارک(M92) اقوام متحدہ میں حق خودارادیت کی حمایت کی پاکستانی قرارداد منظور کرلی گئی۔ذرائع کے مطابق اقوام متحدہ کی جنرل اسمبلی کی کمیٹی نے پاکستان کی جانب سے پیش کی گئی بلاامتیاز تمام انسانوں کے حق خودارادیت کی قراداد متفقہ طور پر منظور کرلی۔
اقوام متحدہ میں پاکستان کی مستقل مندوب ملیحہ لودھی نے کہا کہ قرارداد میں بلا امتیاز تمام لوگوں کے حق خود ارادیت کی حمایت کی گئی ہے، جس کا مقصد کشمیر اور فلسطین میں برسرپیکارحریت پسندوں کی جدوجہد پرتوجہ دلانا ہے ، عالمی برادری نے قرارداد کے ذریعے قابض افواج کے تمام غیر قانونی قبضوں کو مسترد کردیا ہے۔
ملیحہ لودھی کا کہنا تھا کہ حق خودارادیت کی قرارداد غیرملکی قبضے کے خلاف برسرپیکار حریت پسندوں کیلئے امید کی کرن ہے، جس کی آئندہ ماہ جنرل اسمبلی سے توثیق ہوگی۔ انہوں نے مزید کہا کہ حق خود ارادیت عالمی قانون اور اقوام متحدہ چارٹر کے تحت بنیادی اصول ہے، جب کہ قرارداد میں جارح ممالک پر اپنے مقبوضہ علاقوں میں فوری طور پر فوجی مداخلت روکنے کا مطالبہ کیا گیا ہے۔

اسلام آباد(M92) سینیٹ نے انتخابات ایکٹ 2017 میں ترمیم کا بل متفقہ طور پر منظور کرلیا۔ذرائع کے مطابق قومی اسمبلی کے بعد سینیٹ نے بھی انتخابات ایکٹ ترمیمی بل اتفاق رائے سے منظور کرلیا ہے۔ ترمیمی بل کے ذریعے انتخابات ایکٹ 2017 میں 48 الف شامل کی گئی ہے۔
ترمیمی بل کے تحت آئین میں قادیانیوں کی حیثیت تبدیل نہیں ہوگی۔ ختم نبوت پر ایمان نہ رکھنے والے شخص کے غیر مسلم ہونے کی حیثیت برقرار رہے گی۔ ووٹرلسٹ میں درج کسی شخص پر منکر ختم نبوت ہونے کا اعتراض اٹھے تو اسے 15 دن میں طلب کیا جائیگا۔ جس شخص پر منکر ختم نبوت ہونے کا شبہ ہو وہ شخص اقرار نامے پر دستخط کرے گا کہ وہ ختم نبوت پرایمان رکھتا ہے۔ اگر وہ شخص اقرار نامے پر دستخط سے انکار کرے تو اسے غیر مسلم تصور کیا جائے گا اور اس کا نام ووٹر لسٹ سے ہٹا کر غیر مسلم کے خانے میں لکھا جائے گا۔

راولپنڈی(M92) پاک فوج کے سربراہ جنرل قمر جاوید باجوہ کا کہنا ہے کہ پاکستان نے افغانستان میں امن و امان کے قیام کے لئے ہمیشہ کوششیں کی لیکن ہمارے مثبت رویئے کے باوجود افغانستان سے سرحد پار دہشت گردی جاری ہے۔پاک فوج کے شعبہ تعلقات عامہ (آئی ایس پی آر) کے مطابق آرمی چیف جنرل قمر جاوید باجوہ سے امریکی سینٹرل کمانڈ کے کمانڈر جنرل جوزف نے ملاقات کی۔ جس میں خطے کی سیکیورٹی صورتحال اور بالخصوص افغانستان کی موجودہ صورتحال پر بات چیت اور خطے میں امن کے لئے پاکستان کی مثبت کوششوں پر بھی تبادلہ خیال کیا گیا۔
آئی ایس پی آر کے مطابق اس موقع پر جنرل قمر جاوید باجوہ نے کہا کہ افغانستان میں امن پاکستان کے لئے بھی ضروری ہے اسی لئے پاکستان نے افغانستان میں امن و امان کے قیام کے لئے ہمیشہ کوشش کی جو آئندہ بھی جاری رکھیں گے لیکن پاکستان کے مثبت رویے کے باوجود افغانستان سے سرحد پار دہشت گردی جاری ہے۔

بولاوایو(M92) فکسنگ کا عفریت کپتانوں کے پیچھے پڑگیا، ویسٹ انڈیز اور زمبابوے کے مابین اکتوبر میں ٹیسٹ سیریز سے قبل میزبان کپتان گریم کریمر سے بکی کے رابطے کی کوشش کا انکشاف ہوا ہے، آئی سی سی نے بھی تصدیق کردی ہے۔انھوں نے پاکستانی قائد سرفراز احمد کی تقلید کرتے ہوئے فوری طور متعلقہ حکام کو مطلع کردیا،آئی سی سی نے بھی تصدیق کردی،اینٹی کرپشن یونٹ زمبابوین کرکٹ بورڈ کی معاونت سے معاملے کی چھان بین میں مصروف ہے۔ترجمان کا کہنا ہے کہ تحقیقات جاری ہیں،پالیسی کے مطابق کارروائی کے دوران مزید کسی تفصیل سے آگاہ نہیں کرسکتے، کسی کے پاس اس حوالے سے معلومات ہوں تو اے سی ایس یو کے ساتھ بذریعہ ای میل رابطہ کرے،2ماہ میں ٹیم لیڈرز کو بدعنوانی سے آلودہ کرنے کے دوسرے واقعے نے مزید سخت اقدامات کی ضرورت بڑھا دی ہے۔
تفصیلات کے مطابق اکتوبر میں ویسٹ انڈیز اور زمبابوے میں پہلے ٹیسٹ سے قبل بکی کی جانب سے میزبان کپتان گریم کریمر سے فکسنگ کیلیے رابطہ کیے جانے کا انکشاف ہوا ہے،واقعے کی آئی سی سی نے تصدیق بھی کردی ہے،ذرائع کے مطابق بولاوایو میں21اکتوبر کو میچ شروع ہونے سے قبل میزبان ٹیم کے تمام کھلاڑیوں کو آگاہ کیا گیا تھا کہ ایک کرکٹر سے بکی نے رابطہ کرتے ہوئے کرپشن کیلیے آمادہ کرنے کی کوشش کی لیکن اس نے انکار میں جواب دیا،اس واقعے سے آئی سی سی کو بھی مطلع کردیا گیا جو زمبابوے کرکٹ بورڈ کی معاونت سے معاملے کی چھان بین کررہی ہے۔
ذرائع کے مطابق بکی نے میزبان ٹیم کے کپتان گریم کریمر کو فکسنگ کیلیے اکسانا چاہا، آئی سی سی ترجمان نے بتایا کہ زمبابوے میں اینٹی کرپشن یونٹ کی تحقیقات جاری ہیں،پالیسی کے مطابق اس کارروائی کے دوران مزید کسی تفصیل سے آگاہ نہیں کیا جا سکتا، البتہ اگر کسی کے پاس اس واقعے کے حوالے سے کوئی معلومات ہوں تو اینٹی کرپشن یونٹ سے بذریعہ ای میل رابطہ کرسکتا ہے،اس مقصد کیلیے ایڈریس بھی جاری کردیا گیا۔ یاد رہے کہ 2ٹیسٹ میچز کی سیریز ویسٹ انڈیز نے 1-0سے جیت لی تھی، گزشتہ 2ماہ میں یہ دوسرا موقع ہے کہ بکیز نے ٹیم کے کھلاڑیوں کے بجائے کپتان کو کرپشن کی آلودگی میں دھکیلنا چاہا ہے،اس سے قبل سری لنکا کیخلاف یواے ای میں ون ڈے سیریز کے دوران پاکستانی قائد سرفراز احمد سے بکی کے رابطے کی اطلاعات نے بھی دنیائے کرکٹ میں تہلکہ مچایا تھا، وکٹ کیپر بیٹسمین نے پیشکش ٹھکرانے کے ساتھ بروقت متعلقہ حکام کو بھی مطلع کرکے دنیا بھر کے کرکٹرز کیلیے ایک مثال چھوڑی تھی۔
سرفراز احمد کی اس جرات مندی کو دنیا بھرکے سابق اور موجودہ کھلاڑیوں نے زبردست الفاظ میں سراہا تھا،اس معاملے میں مبینہ بکی عرفان انصاری کا نام سامنے آیا، آئی سی سی اینٹی کرپشن یونٹ نے کارروائی کرتے ہوئے چھان بین جاری رکھی، چند روز بعد ہی بھارتی شہر پونے میں فکسنگ کے قدرے غیر روایتی انداز کا اسکینڈل سامنے آیا جب ایک ٹی وی چینل کے اسٹنگ آپریشن میں کیوریٹر پانڈورنگ سالگاؤنکرکو پچ فکسنگ کرتے پکڑا گیا،اس نے بکیز کی روپ میں آنے والے صحافیوں کے ساتھ معاملات طے کیے اور وکٹ تک لے گیا،ساتھ آنے والوں کو پچ کھرچنے کی اجازت اور معلومات دیتے ہوئے اسے سٹے بازوں کی مرضی کے مطابق بنانے کی پیشکش بھی کردی،اس واقعے کی ویڈیو نے بھی کرکٹ کی دنیا میں طوفان برپا کیا، 2ماہ میں ٹیم کے کھلاڑیوں کے بجائے لیڈرز کو بدعنوانی سے آلودہ کرنے کے دوسرے واقعے نے مزید سخت اقدامات کی ضرورت بڑھا دی ہے۔

اسلام آباد(M92) چیف جسٹس آف پاکستان کی جانب سے سابق وزیر اعظم نوازشریف کی 3 ریفرنسزیکجا کرنے کی ان چیمبراپیل مسترد کردی گئی۔ذرائع کے مطابق چیف جسٹس آف پاکستان جسٹس ثاقب نثارنے سابق وزیراعظم نوازشریف کی 3 ریفرنسزیکجا کرنے کی ان چیمبردرخواست کی سماعت کی۔ سماعت کے دوران چیف جسٹس نے رجسٹرارآفس کی جانب سے لگائے گئے اعتراضات کو برقراررکھا۔ چیف جسٹس نے اپنے ریمارکس میں کہا کہ نوازشریف پاناما فیصلے پرنظرثانی کاآپشن حاصل کرچکے ہیں۔
اس سے قبل احتساب عدالت نے بھی تینوں نیب ریفرینس یکجا کرنے کے لیے سابق وزیراعظم نواز شریف کی درخواست مسترد کردی تھی۔
واضح رہے کہ سپریم کورٹ نے 28 جولائی کو پاناما لیکس مقدمے میں نواز شریف کو نااہل قرار دیتے ہوئے نیب کو ان کے خلاف ریفرنس دائر کرنے کا حکم دیا تھا۔ نیب نے 8 ستمبر کو نوازشریف اور ان کے بچوں کے خلاف لندن فلیٹس، آف شورکمپنیوں، عزیزیہ اسٹیل اور ہل میٹل کمپنی سے متعلق 3 مقدمات درج کیے تھے۔

راولپنڈی(M92) پاک فوج کے سربراہ جنرل قمر جاوید باجوہ نے کہا ہے کہ پاکستان کے دفاع کے لیے تمام ریاستی اداروں کو ملکی مفاد میں کام کرنا ہوگا۔پاک فوج کے شعبہ تعلقات عامہ سے جاری بیان کے مطابق آرمی چیف جنرل قمر جاوید باجوہ نے اسٹرائیک کور منگلا کا دورہ کیا جہاں انہوں نے تربیتی مشقوں کا معائنہ کیا اور جوانوں کے حوصلے اور تربیت کے معیار کو سراہا۔
اس موقع پر افسروں اور جوانوں سے خطاب کرتے ہوئے آرمی چیف نے کہا کہ قائداعظم نے کہا تھا کہ دنیا کی کوئی طاقت پاکستان کو ختم نہیں کرسکتی، ہمیں چیلنجز کے مقابلہ کے لئے لمبا سفر طے کرنا ہے، انشاءاللہ پاکستان جلد اقوام عالم کی صف اول میں شامل ہوگا۔
جنرل قمر جاوید باجوہ نے کہا کہ ہم اعلیٰ معیار کی تربیت اور آپریشنل تیاریوں سے غافل نہیں رہ سکتے، ہم نے طویل سفر کے بعد چیلنجز پر قابو پالیا ہے، ہمیں ترقی کے لیے صرف اور صرف پختہ عزم اور بطور قوم متحد رہنے کی ضرورت ہے۔ دفاع پاکستان کے لیے تمام ریاستی اداروں کو ملکی مفاد میں کام کرنا ہوگا۔