Tag pakistan

اسلام آباد(میڈیا نائن ٹو ڈاٹ ٹی وی) اسلامی ممالک کے فوجی اتحاد کے سربراہ اور سابق آرمی چیف جنرل ریٹائرڈ راحیل شریف کا کہنا ہے کہ پاکستانی قوم نے دہشت گردی کے ناسور کا ڈٹ کر مقابلہ کیا اور اسے شکست دی۔اسلام آباد میں اسلامک ملٹری کاؤنٹر ٹیرارزم کولیشن کانفرنس سے خطاب کرتے ہوئے جنرل (ر) راحیل شریف کا کہنا تھا کہ دنیا بھر میں دہشت گردی کے ناسور سے سب سے زیادہ مسلم امہ متاثر ہوئی ہے، گزشتہ 6 برسوں میں دہشت گردی سے ہونے والی اموات میں سے 70 فیصد اموات مسلم ممالک میں ہوئیں، پاکستانی عوام اور افواج نے بھی بے پناہ قربانیاں دیں، پاکستانی قوم نے دہشت گردی کے ناسور کا ڈٹ کر مقابلہ کیا اور اسے شکست دی۔
راحیل شریف کا کہنا تھا کہ دہشت گردی کے ناسور سے نمٹنے کے لئے تمام ریاستیں انفرادی طور پر کام کررہی ہیں لیکن انفرادی طور پر اس سے نمٹنے کے لئے مسلم ریاستوں کے پاس وسائل نہیں ہیں، اس لئے اسلامی ممالک کا اتحاد بنایا گیا جو کسی ملک یا مسلک کے خلاف نہیں بلکہ دہشت گردی کے خلاف ہے، یہ اتحاد اپنے اتحادیوں کو دہشت گردی نمٹنے کے لئے انٹیلی جنس کا تبادلہ اور استعداد بڑھانے میں تعاون کرے گا۔

لاہور(میڈیا نائن ٹو ڈاٹ ٹی وی) کرکٹ کے بعد ہاکی کا عالمی میلہ پاکستان میں سجانے کا منصوبہ تیار کرلیا گیا ہے۔ورلڈ الیون کے خلاف سیریز کے لیے کھلاڑیوں کے نام فائنل کر لیے گئے جب کہ حتمی اعلان دو تین روز تک متوقع ہے۔ مہمان ٹیم جنوری میں پاکستان کا دورہ کرے گی اور میزبان ملک کے خلاف 3 ٹیسٹ میچز کی سیریز میں حصہ لے گی جب کہ سیریز کے یہ مقابلے لاہور، کراچی اور اسلام آباد میں ہوں گے۔
ذرائع کے مطابق 9 ممالک کے 20 کھلاڑیوں نے پاکستان آنے پر رضامندی ظاہر کر دی، ورلڈ الیون ٹیم 14 کھلاڑیوں اور 2 آفیشلز پر مشتمل ہوگی جس میں ہالینڈ، ارجنٹائن، آسٹریلیا، بیلجیئم، جرمنی، انگلینڈ، جاپان، نیوزی لینڈ، جنوبی کوریا اور ملائیشیا کے کھلاڑی شامل ہوں گے، ورلڈ الیون کا اعلان 25 نومبر تک کر دیا جائے گا۔

اسلام آباد(میڈیا نائن ٹو ڈاٹ ٹی وی) پاکستان پیپلز پارٹی کے شریک چیرمین آصف زرداری نے نواز شریف کے ساتھ ملاقات سے ایک بار پھر انکار کر دیا ہے۔سابق صدر اور پاکستان پیپلز پارٹی کے شریک چیرمین آصف زرداری نے سابق وزیراعظم نواز شریف کے ساتھ ملاقات سے ایک بار پھر انکار کر دیا ہے، ذرائع کا کہنا ہے کہ آصف زرداری نے موقف اپنایا ہے کہ نواز شریف سے ملنا یا ہاتھ ملانا خارج از امکان ہے، نواز شریف کو صرف اپنی ذات کے لیے میثاق جمہوریت یاد آتا ہے جب کہ موجودہ ملکی سیاسی صورت حال کے ذمہ دار نواز شریف ہیں۔
واضح رہے کہ پی پی پی کے شریک چیرمین آصف زرداری اور سابق وزیراعظم نوازشریف کے درمیان گزشتہ کئی ماہ سے ملاقات کے لیے کوششیں جاری ہیں اور سابق صدر نے چوتھی بار نواز شریف سے ملاقات سے انکار کیا ہے۔

اسلام آباد(میڈیا نائن ٹو ڈاٹ ٹی وی) سپریم کورٹ کا 2 رکنی بینچ دھرنا ازخود نوٹس کیس کی سماعت کررہا ہے جس میں وزارت داخلہ اور وزارت دفاع نےرپورٹس جمع کرادی ہیں۔سپریم کورٹ میں جسٹس مشیر عالم اور جسٹس قاضی فائز عیسیٰ پر مشتمل 2 رکنی بینچ دھرنا ازخود نوٹس کیس کی سماعت کررہا ہے جس میں وزارت داخلہ اور وزارت دفاع نے اپنی رپورٹس جمع کرادی ہیں۔
سماعت کے دوران جسٹس مشیر عالم نے استفسار کیا کہ اٹارنی جنرل صاحب کیا آپ نے رپورٹ کا جائزہ لیا، جسٹس قاضی فائز عیسیٰ نے ریمارکس دیے کہ حکومت سمیت احتجاج والے بنیادی نکتہ مس کر رہے ہیں، کیا اسلام میں کوئی ڈنڈاہے، کیا قرآن مجید کا ترجمہ پڑھنا چھوڑ دیا ہے، اختلاف ہوتا ہے لیکن کیا عدالتیں بند ہو گئی ہیں، کل کو کوئی اور اپنے موقف منوانے کے لیے راستے بند کر دے گا، حضور نے فرمایا کسی پر مسکرانا صدقہ ہے مگر مجھے مسکراتی شخصیات نظر نہیں آتیں، گالی گلوچ کی زبان نظر آتی ہے، کیا معاشرہ ایسے چل سکتا ہے۔
جسٹس قاضی فائز عیسیٰ نے ریمارکس دیے کہ سب سے غلطی ہوتی ہے، مجھ سے جو غلطی ہو اس کا اعتراف کرتا ہوں، کوئی غیر شرعی بات ہے تو شرعی عدالت موجود ہے، کیا اسلام میں دو رائے ہو سکتی ہیں، کنٹینر کا خرچہ بھی عوام برداشت کر رہے ہیں جب کہ ایجنسیوں پر اتنا پیسہ خرچ ہوتا ہے، ان کا کردار کیا ہے، سمجھ نہیں آ رہا کیا کریں اسلام امن سے پھیلا ہے ڈنڈے سے نہیں۔اٹارنی جنرل نے دلائل میں کہا کہ معاشرے اور ذہن کو ڈنڈے سے نہیں بدل سکتے جس پر جسٹس قاضی فائز عیسیٰ نے کہا کہ اتحاد، ایمان، تنظیم کہیں نظر نہیں آ تا، جس کو مرضی گالی دے دو، اگر یہ اسلامی باتیں ہیں تو مجھے قائل کریں، پاکستان دلائل دے کر بنا، ڈنڈے کے زور پر اچھی بات بھی اچھی نہیں لگتی اور دین میں کوئی جبر نہیں۔
جسٹس قاضی فائز عیسیٰ نے ریمارکس دیے کہ دشمنوں کے لیے کام بہت آسان ہو گیا، وہ ہمارے گھر میں آگ لگائیں گے، کتنے دن سے لوگوں کو تکلیف ہو رہی ہے، جب ریاست ختم ہو جائے گی تو قتل سڑکوں پر ہوں گے، ہم تو تشدد کرنے کا نہیں کہیں گے، آرٹیکل 5 کو ہم نے نظر انداز کر دیا ہے، اگر آرٹیکل 5 کی پابندی نہیں کرنی تو پاکستان کی شہریت چھوڑ دیں۔

لاہور(میڈیا نائن ٹو ڈاٹ ٹی وی) محکمہ صحت کی جانب سے آئندہ سال سے تمام سرکاری ہسپتالوں میں مفت تشخیصی ٹیسٹ کی سہولت ختم کردی جائےگی اس تناظر میں ریڈیویالوجی ڈیپارٹمنٹس اور لیبارٹریز نجی کمپنیوں کو ٹھیکہ پر دینے کا اصولی فیصلہ کرلیا گیا ہے۔ باوثوق ذرائع نے مزید بتایا ہے کہ سرکاری ہسپتالوں میں بھاری بھر کم مالی امور اور اخراجات کو”سلف انکم سورسز“ بڑھانے کی پالیسی کے تحت ریڈیالوجی ڈیپارٹمنٹس اور لیبارٹریز نجی کمپنیوں کو ٹھیکہ پر دی جارہی ہیں۔ اس سلسلے میں محکمہ صحت نے تمام امور کو حتمی شکل دیدی ہے۔ محکمہ کے ذرائع کے مطابق اس تناظر میں آئندہ سال2018ءمارچ میں تمام ہسپتالوں کے دونوں شعبہ جات باقاعدہ طور پر نجی کمپنیوں کے سپرد کردئیے جائیں گے۔دوسری جانب محکمہ صحت اور وزارت صحت کے حکام نے ریڈیالوجی ڈیپارٹمنٹس اور لیبارٹریز کو نجی کمپنیوں کو دینے کے حوالے سے چپ سادھ لی ہے اور سرکاری ہسپتالوں سمیت دیگر ڈیپارٹمنٹس کی نجکاری کے عمل کو بے بنیاد افواہ قراردیاہے۔

لاہور(میڈیا نائن ٹو ڈاٹ ٹی وی) حکومت پنجاب کا مالی مشکلات سے دوچار پی ایچ اے کی انکم کا ذریعہ آﺅٹ ڈور ایڈورٹائزنگ کا شعبہ مرحلہ وار غیر ملکی کمپنیوں کو دینے کا فیصلہ فرموں کی پری کوالیفکیشن کےلئے درخواستیں مانگ لی گئیں ہیں۔ جس سے پارکس اینڈ ہارٹیکچر اتھارٹی کو مزید کم وبیش40کروڑ سے زائد کا نقصان ہوگا۔ تفصیلات کے مطابق شہر بھر میں آﺅٹ ڈور ایڈورٹائزنگ کی مد میں پی ایچ اے سالانہ60کروڑروپے کماتی ہے اس سال ٹارگٹ 65کروڑ سے زائد ہے حکومت پنجاب کی ہدایت پر کمشنر عبداللہ سنبل نے غیر ملکی کمپنی جے سی ڈیو اور پی ایچ اے کے درمیا ن کوارڈینیشن کرواکر معاملات طے کروادئیے ہیں جس کے مطابق پی ایچ اے نے اہم سڑکوں جن میں مین بلیووارڈ ، ایم ایم عالم روڈ، قصوری روڈ، جیل روڈ اور پارک لین روڈ شامل ہیں کو نجی ایڈورٹائزرکمپنیوں کو دینے کےلئے ان کی پری کوالیفکیشن کرنے کےلئے درخواستیں مانگ لی ہیں ان شاہراہوں پر ڈیجٹیل بورڈز زمین پر بھی لگائے جاسکیں گے جن پر2008ءسے حکومت نے پابندی عائد کررکھی ہے۔پی ایچ اے ان شاہراہوں سے کم وبیش40,35کروڑ روپے سالانہ کمارہی ہے اور ڈیجٹیل بورڈز لگوائے تو اس مد میں مزید دس سے پندرہ کروڑ روپے کااضافہ ہوسکتاہے۔

لاہور(ایم نائن ٹو ڈاٹ ٹی وی)اوورسیز پاکستانیز کمیشن (او پی سی)پنجاب کی کاوشوں سے اوورسیز پاکستانیز فاﺅنڈیشن (او پی ایف)ہاﺅسنگ سکیم کی 30کروڑ روپے مالیت کی 75 کنال اراضی غیر قانونی قبضہ سے واگزار کرالی گئی ہے۔ وائس چیئرپرسن او پی سی شاہین خالد بٹ نے اس حوالے سے بتایا کہ اوپی ایف نے موضع رکھ رائے ضلع لاہور میں اوورسیز پاکستانیوں کیلئے ہاﺅسنگ سکیم بنانے کی غرض سے 75 کنال 12 مرلہ اراضی خریدی تھی تاہم ادائیگی کے باوجود سابق مالک اوپی ایف کو زمین کا قبضہ نہیں دے رہا تھا۔ اوپی ایف کی طرف سے شکایت کے اندراج کے بعد اوپی سی نے متعلقہ محکموں کی مدد سے کارروائی کے بعد زمین سے ناجائز قبضہ ختم کروایا۔وائس چیئرپرسن نے بتایا کہ اوپی سی سمندرپارمقیم پاکستانیوں کے مسائل کے حل کیلئے بھرپور کو ششیں کررہاہے اور ابتک موصول ہونے والی شکایتوں میں سے 50 فیصد کا ازالہ کیاجاچکاہے ۔

لاہور(میڈیا نائن ٹو ڈاٹ ٹی وی) محمد عامر نے ورلڈ کپ 2019 میں تہلکہ مچانے کی ٹھان لی۔محمد عامر نے کہا ہے کہ پابندی کی وجہ سے ورلڈ کپ 2011 اور 2015نہ کھیل پانے کا افسوس ہے،آئندہ ایونٹ میں بھرپور شرکت کرتے ہوئے اپنی کارکردگی سے گہرا تاثر چھوڑنا چاہتا ہوں۔
’’کرک انفو‘‘ کو انٹرویو میں محمد عامر نے کہا کہ میں تینوں فارمیٹ میں اپنی ذمہ داریوں سے انصاف کرنے کیلیے ٹریننگ کے سخت شیڈول پر عمل پیرا رہتا ہوں، 2010میں سامنے آنے والے اسپاٹ فکسنگ کیس میں میرے سزا مکمل کرنے کے بعد کم بیک تک کرکٹ میں انقلابی تبدیلیاں ہوئیں،اس کا انداز یکسر بدل چکا،خاص طور پر محدود اوورز کے کھیل میں بولرز کیلیے مشکلات بڑھ گئی ہیں، ون ڈے میچز میں 300سے زائد رنز عام سی بات ہوگئی، میچز میں بڑے اسکور معمول بن چکے۔
پیسر نے بتایا کہ دائرے کے اندر فیلڈرز کھڑے کرنے کا قانون متعارف کرائے جانے سے بولرز کو اپنی کارکردگی برقرار رکھنے کیلیے نئی ورائٹیز پر کام کرنا پڑا،کھیل میں اس قدر تیزی آنے کی وجہ مختلف ملکوں میں ہونے والی ٹی ٹوئنٹی لیگز بھی ہیں، انہوں نے کہا کہ کرکٹ پہلے سے بہت زیادہ مشکل اور محنت طلب کھیل ہوگیا ہے۔
مکی آرتھر کی طرف سے ٹیسٹ کرکٹ میں شارٹ لینتھ گیندوں کی وجہ سے زیادہ کامیاب نہ رہنے کے سوال پر محمد عامر نے کہا کہ اس میں کوئی شک نہیں کہ کم بیک کے وقت زیادہ فرسٹ کلاس میچز نہ ملنے کی وجہ سے میں ابتدا میں شارٹ گیندیں زیادہ کرتا تھا، بعد ازاں بہتری لانے کی کوشش کی اور مثبت نتائج بھی حاصل ہوئے، ویسٹ انڈیز میں زیادہ کامیابی ملی،اس کے ساتھ ایک اور پہلو بھی مد نظر رکھنا چاہیے کہ ایک ڈیڑھ سال میں ٹیسٹ میچز کے دوران میری بولنگ پر 16کے قریب کیچز بھی ڈراپ ہوئے،ایسا نہ ہوتا تو میرا ٹیسٹ ریکارڈ خاصا بہتر نظر آتا،ہم کسی کو الزام نہیں دے سکتے، کوئی فیلڈرنہیں چاہتا کہ کیچ چھوڑ دے۔

اسلام آباد(میڈیا نائن ٹو ڈاٹ ٹی وی) سابق وزیراعظم نواز شریف نے کہا ہے کہ عدلیہ کے فیصلوں نے معیشت کو نقصان پہنچایا۔نواز شریف اپنے خلاف دائر مالی بدعنوانی کے ریفرنسز کی سماعت کے لیے اسلام آباد کی احتساب عدالت میں پیش ہوئے۔ اس موقع پر صحافیوں سے گفتگو کرتے ہوئے سابق وزیراعظم نے کہا کہ عدلیہ کے فیصلوں کی وجہ سے معیشت پر ضرب پڑی اور ہماری حکومت کو چین کے ساتھ کام نہیں کرنے دیا گیا، گاڈ فادر اور اطالوی مافیا کے الفاظ عدالتوں کو زیب نہیں دیتے، ججوں نے پاناما کے بجائے اقامہ پر سزا دی، ہمارے لیے عدالت کا پیمانہ کچھ اور ہے۔
نواز شریف کا کہنا تھا کہ عدالتوں کا دہرا معیار سامنے آرہا ہے، کھیل کے اصول مساوی ہونے چاہئیں، پی ٹی آئی رہنماؤں عمران خان، جہانگیر ترین اور علیم خان کے خلاف بھی کرپشن کے مقدمات ہیں، ہمارے خلاف تو فیصلے جلدی آ جاتے ہیں، ان کے فیصلے کب آئیں گے، خیبرپختونخوا کا وزیراعلیٰ سرکاری خرچ پر جلوس کی قیادت کرنے آتا ہے۔
سابق وزیراعظم نے مزید کہا کہ ہمارے دور میں اللہ کے فضل کرم سے خوشحالی و بجلی آئی اور بے روزگاری ختم ہوئی، جبکہ ملک میں جی ڈی پی ریٹ 3 سے بڑھ کر 5 فیصد ہوگیا، 2014 سے دھرنے جاری ہیں اور کسی نہ کسی شکل میں چلتے رہے، حکومت کو چین سے کام نہیں کرنے دیا گیا لیکن دھرنوں کے باوجود ہم نے ڈلیور کیا اور بجلی فراہم کی۔
اس موقع پر نواز شریف نے کمرہ عدالت میں صحافیوں سے پوچھا کہ آج کی کیا تازہ خبر ہے، جس پر صحافیوں نے جواب دیا کہ آپ حاضری سے استثنیٰ ملنے کے باوجود آج عدالت کے سامنے پیش ہو گئے۔

اسلام آباد(میڈیا نائن ٹو ڈاٹ ٹی وی) سپریم کورٹ نے الیکشن ایکٹ 2017 کے خلاف درخواستوں پر اعتراضات مسترد کرتے ہوئے سماعت کے لیے منظور کرلیا ہے۔سپریم کورٹ کے چیف جسٹس ثاقب نثار نے الیکشن ایکٹ 2017 کے خلاف درخواستوں پر رجسٹرار آفس کے اعتراضات ختم کرتے ہوئے تمام پٹیشنز کو سماعت کے لیے منظور کرلیا ہے۔
سپریم کورٹ میں پاکستان پیپلزپارٹی، شیخ رشید اور جمشید دستی سمیت 9 فریقین نے الیکشن ایکٹ 2017 کے خلاف درخواستیں دائر کی تھیں جس پر رجسٹرار سپریم کورٹ نے اعتراضات لگاتے ہوئے درخواست گزاروں کو متعلقہ فورم سے رجوع کرنے کی ہدایت کی تھی۔ رجسٹرار سپریم کورٹ نے کہا تھا کہ درخواستیں براہ راست سپریم کورٹ میں دائر نہیں کی جا سکتیں۔
رجسٹرار سپریم کورٹ کے اعتراض کے بعد درخواست گزاروں نے چیف جسٹس پاکستان جسٹس ثاقب نثار سے ان چیمبر اپیلیں کیں۔ چیف جسٹس نے درخواست پر ان چیمبر سماعت کی اور درخواستوں پر اعتراضات کو ختم کرتے ہوئے سماعت کے لیے عدالت میں مقرر کرنے کا حکم دیا۔واضح رہے کہ حکومت نے اپنی عددی اکثریت کی بدولت دونوں ایوانوں سے انتخابات بل 2017 کی شق 203 میں ترمیم منظور کرائی تھی جس کے نتیجے میں عدالت کی جانب سے نااہل قرار دیئے گئے شخص کے پارٹی سربراہ بننے کی راہ ہموار ہوئی، جب کہ گزشتہ روز نااہل قرار دیے گئے شخص کے پارٹی سربراہ بننے پر پابندی سے متعلق پیپلز پارٹی کا بل قومی اسمبلی میں کثرت رائے سے مسترد ہوگیا تھا۔