Tag pcb

لاہور(حافظ عمر سعید)پاکستان کرکٹ بورڈ نے پشاور میں بھی پی ایس ایل میچز کرانے کا فیصلہ کیا ہے۔آئندہ سیزن میں انٹرنیشنل میچوں کی میزبانی کے ساتھ پی ایس ایل مقابلے بھی کرانے کی منصوبہ بندی کرلی گئی ہے، اس حوالے سے 4 فروری کو گورننگ بورڈ کا اجلاس پہلی بار پشاور میں ہورہا ہے جس میں ان معاملات پر مزید پیش رفت کا جائزہ لیاجائے گا۔

ذرائع کے مطابق پشاور میں پہلی بار ہونے والے گورننگ بورڈ کے اجلاس میں بنگلا دیش کے خلاف سیریز، پی ایس ایل اور انٹرنیشنل کرکٹ کیلنڈز پر تبادلہ خیال کے ساتھ اہم فیصلوں کی منظوری بھی ہوگی جب کہ بورڈ سربراہ کھیل کی ترقی کے لیے کیے جانے والے اقدامات پر اپنی رپورٹ بھی پیش کریں گے۔

لاہور(حافظ عمر سعید)قومی ٹیم کے سابق کپتان شعیب ملک کا کہنا ہے کہ قطعی طور پر مایوس نہیں ہوں اور اب بھی پاکستان کیلیے پرفارم کرسکتا ہوں۔

آل راؤنڈر شعیب ملک کا کہنا ہے کہ دور کے اہداف پر نظر نہیں رکھتا، ورلڈ کپ کے بارے میں نہیں سوچ رہا، بنگلا دیش کیخلاف سیریز میں عمدہ کارکردگی پر توجہ مرکوز ہوگی، بطور سینئر اپنا کردار ادا کرنے کی کوشش کروں گا، نوجوانوں کو مواقع ملنے سے مستقبل میں بھی نئے بابر اعظم ملیں گے۔

آل راؤنڈر نے کہا کہ سنٹرل کنٹریکٹ پر نوجوان کرکٹرز کا حق ہے، ان کو طویل عرصہ ملک کی نمائندگی کرنا ہے۔پاکستان مں سکیورٹی اور شاندار ماحول دیکھ کر دیگر ٹیمیں بھی آئندہ آنے کیلیے تیار ہوں گے۔

شعیب ملک نے کہا کہ کسی کی پسند ناپسند کا نہیں اپنی کارکردگی کے بارے میں سوچتا ہوں، بائولنگ میں بھی ٹیم کے کام آسکتا ہوں، فٹ رہنے کیلیے ٹریننگ کا سلسلہ کبھی نہیں چھوڑتا، ورلڈ ٹوئنٹی کے قریب جاکر مستقبل کا سوچوں گا۔

لاہور(وقت آن لائن) پاکستان کرکٹ بورڈ (پی سی بی) نے انٹرنیشنل کرکٹ کونسل (آئی سی سی) ویمنز ٹی 20 ورلڈکپ کیلئے قومی ویمنز سکواڈ کا اعلان کر دیا ہے۔

تفصیلات کے مطابق قومی ویمن کرکٹ ٹیم کی چیف سلیکٹر عروج ممتاز نے کپتان بسمعہ معروف کے ہمراہ قذافی سٹیڈیم میں پریس کانفرنس کرتے ہوئے ویمنز ٹی 20 ورلڈکپ کیلئے 15 رکنی سکواڈ کا اعلان کیا جس میں آل راؤنڈر ثناءمیر کو شامل نہیں کیا گیا ہے۔

ورلڈکپ کیلئے بسمہ معروف کو کپتان برقرار رکھا گیا ہے جبکہ دیگر کھلاڑیوں میں ایمن انور، عالیہ ریاض، انعم امین، عائشہ نسیم، ڈیانا بیگ، فاطمہ ثناء، ارم جاوید ، جویریہ ودود، منیبہ علی، ندا ڈار، عمیمہ سہیل، سعدیہ اقبال، سدرہ نواز اور سیدہ عروب شاہ شامل ہیں۔

لاہور(ایمرا نیوز آن لائن) پی ایس ایل فائیو کے میچز کے لیے ٹکٹوں کی قیمت کم رکھنے کی تجویز سامنے آگئی۔ذرائع کے مطابق پاکستان کرکٹ بورڈ نے ہاوس فل کے لیے ٹکٹوں کی کمائی سے زیادہ اسٹیڈیمز بھرنے کو اولین ترجیح قرار دیا ہے۔ مجوزہ پلان کے مطابق ڈے میچز کے ٹکٹ کے نرخ کم رکھے جارہے ہیں تاہم نائٹ میچز کے لیے نرخوں میں دو سے تین سو روپے کا اضافہ ہوگا۔

میزبان شہر میں ہونےو الے اہم میچز کے ٹکٹ کی نرخوں میں بھی کچھ فرق تجویز کیا گیا ہے، جن میچز میں شائقین کی زیادہ دلچسپی نہیں ہوگی، ان کے ٹکٹ سب سے کم ہوں گے۔ ٹکٹوں کے نرخوں کو چند روز میں فائنل کرکے پرنٹنگ کے لیے آرڈر دے دیاجائے گا ۔

ٹکٹوں کی فروخت بیس جنوری سے ہوگی، پی ایس ایل کی افتتاحی تقریب بیس فروری کونیشنل اسٹیڈیم کراچی میں جبکہ فائنل بائیس مارچ کو لاہورمیں شیڈول ہے۔

لاہور(ایمرا نیوز آن لائن) شان مسعود سپر فٹ کرکٹرزکی دوڑ میں سب سے آگے ہیں جب کہ سابق کپتان سرفرازاحمد کے فٹنس لیول میں نمایاں بہتری آگئی۔پیر کے روز نیشنل کرکٹ اکیڈمی لاہورمیں شروع ہونے والے فٹنس ٹیسٹ کا دوسرا مرحلہ گذشتہ روز جاری رہا، 10قومی کرکٹرز کو مختلف آزمائشوں سے گزارتے ہوئے ڈیٹا مرتب کیا گیا، ہیڈکوچ مصباح الحق اور بولنگ کوچ وقاریونس بھی ٹیسٹ کے مختلف مراحل میں کھلاڑیوں کی فٹنس کا جائزہ لیتے رہے۔

ذرائع کے مطابق شان مسعود سپر فٹ قرار پائے،یویو ٹیسٹ میں ان کا اسکور20رہا، سابق کپتان سرفرازاحمد کے لیول میں نمایاں بہتری آئی ہے، امام الحق، شاہین شاہ آفریدی اور محمد عباس بھی اپنا معیار برقرار رکھنے میں کامیاب رہے، عمادوسیم، یاسر شاہ اورعابد علی چند آزمائشوں میں تھوڑا مشکل میں دکھائی دیے۔ 1،2 روز میں مرتب کی جانے والی ٹرینر یاسر ملک کی حتمی رپورٹ میں تعین ہوسکے گا کہ مجموعی فٹنس تسلی بخش رہی یانہیں۔
یاد رہے کہ پی سی بی کو تمام سینٹرل کنٹریکٹ یافتہ کرکٹرز کے فٹنس ٹیسٹ لینا تھے، انجریز سے نجات کیلیے کوشاں حسن علی اور فخرزمان میڈیکل پینل سے کلیئرنس کے بعد جانچ کرانے کے قابل ہوں گے۔

وائرل انفیکشن کے شکار کرکٹراظہرعلی،اسد شفیق، محمد رضوان، ٹائیفائیڈ میں مبتلا عثمان شنواری کا ٹیسٹ چند روز بعد لیا جائے گا، وہاب ریاض، محمد عامر اور شاداب خان بنگلہ دیش پریمیئرلیگ سے واپسی پر 20جنوری کو نیشنل کرکٹ اکیڈمی میں رپورٹ کریں گے۔

پی سی بی نے اعلان کررکھاہے کہ جس کرکٹر کا فٹنس لیول مطلوبہ معیار سے کم ہوا اس کی تنخواہ سے 15فیصد کٹوتی شروع ہوجائے گی، یہ سلسلہ بہتری آنے تک جاری رہے گا۔

لاہور(ایمرا نیوز آن لائن)اعجاز احمد کا کہنا ہے کہ ناکامی سے گھبرانے والا نہیں ہوں، اگر ٹیم ہار گئی تو ساری ذمہ دار ی قبول کروں گا،پاکستان انڈر 19کرکٹ ٹیم کے ہیڈ کوچ اعجاز احمد کا کہنا ہے کہ نوجوان کھلاڑی جنوبی افریقا میں مایوس نہیں کریں گے اور ورلڈ کپ میں اچھا کھیلیں گے۔خیال رہے کہ انٹرنیشنل کرکٹ کونسل(آئی سی سی) انڈر 19 کرکٹ ورلڈ کپ 17 جنوری سے 9 فروری تک جنوبی افریقا میں کھیلا جائے گا۔

پاکستان انڈر 19 ٹیم نے 5 روز کے وقفے کے بعد نیشنل کرکٹ اکیڈمی (این سی اے) لاہور میں ٹریننگ آغاز کر دیا ہے، ٹریننگ کیمپ کا دوسرا مرحلہ 9 جنوری تک جاری رہے گا۔ اس دوران پاکستان ٹیم 4 پریکٹس میچز بھی کھیلے گی اور انڈر19 ٹیم 10 جنوری کی صبح جنوبی افریقا روانہ ہو گی۔

پاکستان انڈر19 ٹیم کے ہیڈ کوچ اور سابق کرکٹر اعجاز احمد کا کہنا ہے کہ میگا ایونٹ کے لیے نوجوان کھلاڑی پرجوش ہیں، پہلے 25 دن کھلاڑیوں نے سخت محنت کی ہے، اس دوران انہیں 9 میچز بھی کھلائے گئے جس کا مقصد نوجوان کرکٹرز کو کھیل سے متعلق مکمل آگاہی اور ٹیم کمبی نیشن آزمانا تھا ۔ہیڈ کوچ کا کہنا ہے کہ کھلاڑیوں کے ساتھ انفرادی طوپر بھی کام کیا گیا ہے ان کی خامیوں پر قابو پانے کی کوشش کی گئی ہے اور سب سے بڑھ کر انہیں جنوبی افریقا کی کنڈیشنز کے مطابق کھیلنے کے بارے میں بتایا گیا ہے۔

اعجاز احمد کا کہنا ہے کہ میں ناکامی سے گھبرانے والا نہیں ہوں، ذمہ داری لیتا ہوں اگر ٹیم ہار گئی تو ساری ذمہ دار ی قبول کروں گا،ہار میری اور جیت کھلاڑیوں کی۔‏ سابق ٹیسٹ کرکٹر اعجاز احمد نے کہا کہ انہوں نے سلیکشن میں کئی ایک بڑے فیصلے کیے اور وہ بڑے فیصلے اسی وقت کرتے ہیں جب انہیں علم ہو کہ جن کرکٹرز کو منتخب کیا گیا ہے وہ آگے چل کر پاکستان ٹیم میں بھی جگہ بنائیں گے۔ان کا کہنا تھا کہ محمد شہزاد کو انڈر 16 سے لیا ہے مجھے اس سے بڑی توقعات ہیں وہ جلد پاکستان ٹیم میں آئے گا ۔

نسیم شاہ آسٹریلیا میں ڈیبیو کرنے والے سب سے کم عمر کھلاڑی بن گئے نوجوان فاسٹ بولر نسیم شاہ کے حوالے سے اعجاز احمد نے کہا کہ وہ پاکستان انڈر 19 کا حصہ رہے ہیں اور وہ اس ورلڈ کپ اسکواڈ میں بھی شامل تھے۔ پہلے نسیم شاہ کو قومی ٹیم کے ساتھ آسٹریلیا جانے کا موقع ملا، وہاں انہوں نے ڈیبیو کیا اور ایک ٹیسٹ میچ کھیلا پھر نسیم شاہ کو سری لنکا کے خلاف ہوم سیریز میں بھی برقرار رکھا گیا جہاں انہوں نے شاندار پرفارمنس کا مظاہرہ کیا۔

اعجاز احمد نے مزید بتایا کہ پاکستان کرکٹ بورڈ نے گزشتہ روز اعلان کیا تھا کہ نسیم شاہ کا ورلڈ کپ اسکواڈ سے نام واپس لیا جا رہا ہے وہ اب قومی ٹیم کے لیے دستیاب ہوں گے جس کے بعد محمد وسیم کو نسیم شاہ کی جگہ ٹیم میں شامل کیا گیا ہے۔‏ہیڈ کوچ اعجاز احمد کہتے ہیں کہ نسیم شاہ فاسٹ ٹریک سے ٹیسٹ کرکٹر بنے اور انہیں اب ٹاپ کرکٹ کے لیے مخصوص کر دیا گیا ہے، میں سمجھتا ہوں کہ جو کھلاڑی سینئیر ٹیم میں چلا گیا ہو اسے جونئیر ٹیم میں واپس نہیں آنا چاہیے۔

ان کا کہنا تھا کہ انڈر 19 ایسا پلیٹ فارم ہے جہاں سے ہی کھلاڑی اوپر کی سطح پر جاتے ہیں،اب نسیم شاہ کے بعد عامر خان ٹیم کو دیں گے، عامر خان میں بہت ٹیلنٹ ہے، وہ بھی جلد اپنی شناخت بنائے گا۔‏اعجاز احمد نے مزید کہا کہ وہ ٹیم کمبی نیشن سے مطمئن ہیں، بیٹسمینوں کو ساؤتھ افریقا کی کنڈیشنز کے مطابق تیار کیا ہے، انڈیا کی ٹیم ساؤتھ افریقا میں سیریز کھیل رہی ہے اور وہ ورلڈ کپ میں ٹف ٹائم دے سکتی ہے۔

(ایمرا نیوزآن لائن) پاکستان اور سری لنکا کے درمیان دو ٹیسٹ میچوں کی سیریز کے پہلے میچ کے دوسرے روز کا کھیل بارش کے باعث روک دیا گیا۔

سری لنکا نے اپنی پہلی نامکمل اننگز کا آغاز 202 رنز 5 کھلاڑی آؤٹ پر کیا لیکن ابھی سری لنکا کا اسکور 225 رنز پر پہنچا تھا کہ بارش کے باعث کھیل روک دیا گیا۔ دھنن جایا ڈی سلوا 54 اور نیروشن ڈک ویلا 15 رنز کے ساتھ وکٹ پر موجود ہیں۔

خیال رہے کہ خراب موسم اور بارش کے باعث پہلے روز بھی صرف 68 اوورز کا کھیل ہو سکا تھا۔ سری لنکان کی جانب سے کپتان ڈیموتھ کرونا رتنے 59 اور اوشادا فرنینڈو 40 رنز بنا کر آؤٹ ہوئے تھے۔

راولپنڈی(وقت ایمرا نیوزآن لائن) کرکٹ اسٹیڈیم میں کھیلے جا رہے میچ میں سری لنکن کپتان ڈیموتھ کرونا رتنے کا ٹاس جیت کر کہنا تھا وکٹ بیٹنگ کے لیے سازگار ہے اس لیے بیٹنگ کا فیصلہ کیا۔

کرونا رتنے کا کہنا تھا ہمارے پلیئرز ایسی کنڈیشنز میں کھیلنے کے عادی ہیں اور اسکور بورڈ پر بڑا ٹوٹل سجانے کی کوشش کریں گے۔ قومی ٹیم کے کپتان اظہر علی کا کہنا تھا کہ ہم نے بہت عرصے سے پاکستان میں کرکٹ نہیں کھیلی، عابد علی اور عثمان شنواری ٹیسٹ ڈیبیو کر رہے ہیں۔

قومی ٹیم کے ہیڈ کوچ مصباح الحق نے عابد علی اور بولنگ کوچ وقار یونس نے عثمان شنواری کو ٹیسٹ کیپ پہنائی۔ اظہر علی کا کہنا تھا وکٹ کو دیکھ کر چار فاسٹ بولرز کو کھلانے کا فیصلہ کیا ہے، یاسر شاہ کو ٹیسٹ اسکواڈ سے ڈراپ کرنا مشکل فیصلہ تھا۔

پاکستان کے تمام 11 پاکستانی کھلاڑی سری لنکا کے خلاف ہوم گراؤنڈ پر پہلا ٹیسٹ کھیل رہے ہیں۔ اظہر علی 75 اور اسد شفیق 71 ٹیسٹ کھیل چکے ہیں لیکن دونوں نے سری لنکا کے خلاف کوئی ٹیسٹ پاکستان میں نہیں کھیلا۔

(ایمرا نیوزآن لائن) اوپننگ بیٹسمین ناصر جمشید نے بالآخر پاکستان سپرلیگ (پی ایس ایل) اسپاٹ فکسنگ اسکینڈل میں اپنے کردار کا اعتراف کرلیا۔

پاکستان کرکٹ بورڈ (پی سی بی) تو پہلے ہی ناصر جمشید پر 10سال کی پابندی لگاچکا ہے، اب برطانوی عدالت سے بھی ناصر جمشید کو سزا سنائی جائے گی۔ پی ایس ایل کے دوسرے ایڈیشن میں پاکستان کرکٹ ٹیم کے 2 بیٹسمین شرجیل خان اور خالد لطیف اسپاٹ فکسنگ کے الزام میں پکڑے گئے تو معلوم ہوا کہ ان دونوں کی بکیوں سے ڈیل ناصر جمشید نے کروائی۔

ناصر جمشید کے ساتھ 2 مزید مبینہ بکی یوسف انور اور محمد اعجاز کے نام بھی منظر عام پر آئے ، تینوں کو برطانیہ میں پولیس نے گرفتار کیا اور تحقیقات کے بعد باضابطہ طور پر چارج کیا۔ یوسف انور اور محمد اعجاز نے ٹرائل کے آغاز سے قبل ہی اعتراف جرم کرلیا تھا ، ناصر جمشید نے ابتدائی طور پر صحت جرم سے انکار کیا لیکن ابتدائی سماعت کے بعد ناصر جمشید نے بھی اپنے جرم کا اعتراف کرلیا۔ ابتدائی سماعت میں اس بات کا انکشاف ہوا تھا کہ ایک خفیہ پولیس آفیسر نے سٹہ باز بن کر بکیوں کے گینگ سے ملاقات کی اور ایک ملاقات میں ناصر جمشید بھی شریک ہوئے تھے۔

اسپاٹ فکسنگ تحقیقات میں خفیہ پولیس افسر کا کردار: یہ خفیہ پولیس افسر کی ہی اطلاع تھی کہ پاکستان کرکٹ بورڈ کو پہلے سے معلوم ہوگیا تھا کہ پلیئرز میچ میں نو بال کھیلنے سے قبل کیا اشارے دیں گے۔ شرجیل خان نے پی ایس ایل 2017 میں پشاور زلمی اور اسلام آباد یونائٹیڈ کے درمیان میچ میں سب کچھ ویسا ہی کیا جیسا پی سی بی کو پہلے سے بتایا گیا تھا۔ شرجیل کو اسپاٹ فکسنگ پر 5 سال کی سزا ہوئی تھی جو اس سال مکمل ہوئی اور اوپنگ بیٹسمین نے بحالی کا پروگرام مکمل کرلیا جس کے بعد انہیں پاکستان سپر لیگ میں واپسی کا موقع ملا ہے۔

ناصر جمشید ڈھائی سال تک انکاری ہونے کے بعد اب اپنے جرم کو تسلیم کرچکے کہ انہوں نے پی ایس ایل میں اسپاٹ فکسنگ کیلئے کرکٹرز کو رشوت کی آفر کی تھی۔ برطانوی عدالت 9 فروری کو ناصر جمشید کے بارے میں فیصلہ سنائے گی ، اس سے قبل پاکستان کرکٹ بورڈ بھی ناصر جمشید پر دس سال کی پابندی عائد کرچکا ہے ‏پی ایس ایل اسپاٹ فکسنگ کیس میں خالد لطیف، شرجیل خان، شاہ زیب حسن اور محمد عرفان کو سزا ہوچکی ہے۔ واضح رہے کہ بائیں ہاتھ سے کھیلنے والے اوپننگ بلے باز ناصر جمشید پاکستان کی جانب سے 2 ٹیسٹ 48 ون ڈے اور 18 ٹی ٹوئنٹی انٹرنیشنل میچز کھیل چکے ہیں۔