Tag singer

لاہور(ایمرا نیوزآن لائن) پاکستان کی فلمی موسیقی پر کئی دہائیوں تک راج کرنے والے گلوکار احمد رشدی کو گذرے36 برس بیت گئے۔پاکستان کے پہلے پاپ سنگر کا اعزاز حاصل کرنے والے معروف فلمی گلوکار احمد رشدی 24 اپریل 1934 کو حیدرآباد دکن میں پیدا ہوئے ۔وہ 1954 میں حیدر آباد دکن ہجرت کر کے پاکستان آئے اور انہوں نے اپنے فنی کریئر کا آغاز ریڈیو پاکستان کراچی سے شروع کیا۔احمد رشدی کو یہ اعزاز حاصل ہے کہ انہوں نے 1955 میں دیگر گلوکاروں کے ساتھ مل کر پاکستان کا قومی ترانہ پہلی مرتبہ گایا تھا۔انہوں نے فلم ‘انوکھی کے مقبول عام گانے بندر روڈ سے کیماڑی میری چلی ہے گھوڑا گاڑی سے شہرت حاصل کی تاہم 1961 میں لاہور آنے کے بعد فلم ‘سپیرن کے گیت چاند سا مکھڑا گورا بدن، اور اگلے سال فلم ‘مہتاب کے گیت گول گپے والا آیا گول گپے لایا نے احمد رشدی کو صف اوّل کا گلوکار بنا دیا۔اس کے بعد انھوں نے کبھی پیچھے مڑ کر نہیں دیکھا اور پلے بیک سنگنگ میں ان کے انداز کی انفرادیت ہمیشہ قائم رہی۔یوں تو احمد رشدی نے لولی وڈ کے تمام ہیروز کے لئے گیت گائے لیکن چاکلیٹی ہیرو وحید مراد پر ان کی آواز کو موزوں ترین قرار دیا گیا۔دونوں فنکاروں کے تال میل سے فلم ارمان کا گیت ‘اکیلے نہ جانا کو کون بھول سکتا ہے۔ 1963 سے 1977 کا دور احمد رشدی کے عروج کا عہد تھا، اسی عرصے میں انھوں نے فلم ‘خاموش رہو کے لئے حبیب جالب کی غزل میں نہیں مانتا گا کر جالب کو بھی پاکستان بھر میں مشہور کر دیا۔اس کے علاوہ اس عرصے میں انھوں نے، کیا ہے جو پیار تو پڑے گا نبھانا، دل کو جلانا ہم نے چھوڑ دیا، کبھی تو تم کو یاد آئیں گے وہ نظارے اور تجھے اپنے دل سے کیسے میں بھلا دوں جیسے یادگار گیت گائے۔احمدر شدی کو پاکستان کا پہلا پاپ سنگر ہونے اور سب سے زیادہ فلمی نغمے گانے کا اعزاز حاصل ہے۔گیارہ اپریل 1983 کواحمد رشدی کی رسیلی آواز ہمیشہ ہمیشہ کے لئے خاموش ہوگئی مگر وہ اپنے گیتوں کے ذریعے آج بھی لوگوں کے دلوں میں زندہ ہیں،ان کی وفات کے بعد حکومت کی جانب سے انہیں ستارہ امتیاز کے اعزاز سے نوازا گیا تھا۔

لاہور(ایمرا نیوزآن لائن) پٹیالہ گھرانے سے تعلق رکھنے والے کلاسیکل گائیک اسد امانت علی خان کو مداحوں سے بچھڑے بارہ برس بیت گئے۔موسیقی کا ہنستا بستا پٹیالہ گھرانہ آج بھی اپنے ہونہار اور سجیلے سپوت کے ذکر پر آبدیدہ ہو جاتا ہے اوراس گھرانے کے افراد یادوں میں اس کی شخصیت کے لمس کو محسوس کرتے ہیں۔نیم کلاسیکل گائیکی کے نمائندہ گلوکار اسد امانت علی خان 25 ستمبر 1955 کو لاہور میں پیدا ہوئے۔اسد امانت علی خان، استاد امانت علی خان کے صاحبزادے، استاد فتح علی، استاد حامد علی خان کے بھتیجے اورشفقت امانت علی خان کے بڑے بھائی تھے۔انہیں موسیقی کا فن اپنے والد امانت علی خان سے ورثے میں ملا لیکن انھوں نے اپنی شناخت علیحدہ سے منوائی۔اسد امانت علی خان نے اپنی گائیگی کا آغاز 10 سال کی عمر سے کیا اور ایف اے کی تعلیم مکمل کرنے کے بعد موسیقی کو ہی پیشہ بنایا۔اسد امانت علی خان نے کلاسیکل موسیقی سے تعلق رکھنے والے خاندان میں چار چاند لگائے۔ اپنے والد استاد امانت علی کی وفات کے بعد انشا جی کی لکھی اور استاد امانت علی کی گائی غزل ‘انشا جی اٹھو اب کوچ کرو گانے کے بعد اسد علی خان کو اولین شناخت اور مقبولیت حاصل ہوئی تاہم انہیں اصل شہرت ‘عمراں لنگھیاں پباں بھار سے ملی اور اس کے بعد وہ انتقال تک گائیکی کے ایک درخشاں ستارے رہے۔اپنے چچا حامد علی خان کے ساتھ ان کی جوڑی کو بھی بہت پسند کیا گیا جنہوں نے پاکستان کے علاوہ بھارتی فلموں میں بھی موسیقی کا جادو جگایا۔انہیں صدارتی ایوارڈ پرائڈ آف پرفارمنس سے بھی نوازا گیا تاہم ایوارڈ کے فوری بعد ہی ان کی طبیعت ناساز ہوگئی اور وہ علاج کیلئے لندن چلے گئے۔آٹھ اپریل 2007 کو 52 برس کی عمر میں ان کو دل کا دورہ پڑا جو جان لیوا ثابت ہوااور وہ جو فن موسیقی کا ایک درخشندہ ستارہ تھا، عین عالم شباب میں غروب ہو گیا ۔

لاس اینجلس(ایمرا نیوز آن لائن) کینیڈین گلوکار جسٹن بیبر نے اپنے تھراپی سیشن کے دوران بنائی گئی سیلفی انسٹاگرام پر شئیر کی ہے۔ میڈیا رپورٹ کے مطابق جسٹن بیبر نے ڈپریشن کے باعث حال ہی میں عارضی طور پر گلوکاری چھوڑنے کا اعلان کیا تھا، گلوکار نے اب انسٹاگرام پر اپنی تھراپی سیشن کے دوران بنائی گئی سیلفی شئیر کیہے اوراپنے مداحوں سے ان کو دعاﺅں میں یاد رکھنے کی اپیل کی۔انھوں نے بتایا ہے کہ ان دنوں میں ذہنی دباﺅ اور ڈپریشن کا شکار ہوں۔

لاس اینجلس (ایمرا نیوز آن لائن) امریکی پاپ گلوکارہ 33 سالہ لیڈی گاگا ویسے تو شہرت میں کسی سے کم نہیں، وہ جہاں متنازع لباس پہن کر گانوں میں پرفارمنس کرتی نظر آتی ہیں۔وہیں لیڈی گاگا پر یہ الزام بھی عائد کیا جاتا ہے کہ وہ تشدد پر اکسانے والے مناظر کو بھی میوزک کنسرٹ اور ویڈیوز کے ذریعے پیش کرتی ہیں۔اسی طرح امریکی پاپ گلوکارہ 25 سالہ آریانا گرانڈے پر بھی یہ الزام عائد کیا جاتا ہے کہ ان کی شاعری اور گیتوں سے لوگوں کے جذبات مجروح ہوتے ہیں۔ان پر بھی یہ الزام عائد کیا جاتا ہے کہ وہ بھی اپنے گیتوں کے ذریعے لوگوں کو تشدد پر اکساتی ہیں۔

لاہور(ایمرا نیوزآن لائن) لاکھوں دلوں پرراج کرنے والی مقبول ترین پاپ گلوکارہ نازیہ حسن کی54 ویں سالگرہ آج منائی جارہی ہے۔پاپ موسیقی کو غیرمعمولی شہرت بخشنے والی خوبرو گلوگارہ نازیہ حسن کے پرستارتین آج ان کی54 ویں سالگرہ منا رہے ہیں،برصغیر میں پاپ موسیقی کے بانیوں میں شمار کی جانے والی گلوکارہ نازیہ حسن 3 اپریل 1965 کو کراچی میں پیدا ہوئیں۔1980 میں پندرہ سال کی عمر میں وہ اس وقت شہرت کی بلندیوں تک پہنچ گئیں جب انہوں نے بھارتی فلم قربانی کا گیت آپ جیسا کوئی میری زندگی میں آئے تو بات بن جائے گایا جسکے بعد 1981 میں ریلیز ہونے والے نازیہ حسن کے پہلے البم ‘‘ڈسکو دیوانے‘‘ نے سابقہ تمام ریکارڈ توڑ دیئے۔عالمی شہرت یافتہ شمارے ٹائمز نے نازیہ حسن کو اس وقت کی ان با اثر پچاس شخصیات کی فہرست میں شامل کیا ،جنھوں نے پاک و ہند کی نوجوان نسل کے مزاج پر گہر ااثر ڈالااپنے بھائی زوہیب حسن کے ساتھ مل کرنازیہ حسن نے 1982 میں بوم بوم،1986میں ینگ ترنگ ،1987ء میں ہاٹ لائن اور1992ء میں کیمرا کیمرا کے ناموں سے چار البم ریلیزکئے۔یہ بہن بھائی جلد ہی نوجوانوں میں بے حد مقبول ہوئے اور انکے گائے ہوئے گیت اکثریت کی زبان پر تھے۔ حسن، دلکشی، فن اور شہرت میں وہ اپنی مثال آپ تھیں،ان خوبیوں کے ساتھ قدرت نے جہاں نازیہ پر بے حساب مہربانیاں کیں وہیں ان کی زندگی بہت مختصر رکھی۔نازیہ حسن محض35 برس کی عمر میں پھیپھڑوں کے کینسر میں مبتلا ہو کر13 اگست سال 2000 کو اس دار فانی سے رخصت ہوگئیں لیکن اس کی سریلی آواز اور مسکراتا چہرہ پرستاروں میں آج بھی مقبول ہے انہیں 2002 میں حکومت پاکستان کی طرف سے بعدازوفات پرائیڈ آف پرفارمنس سے بھی نوازا گیا۔

واشنگٹن (ایمرا نیوز آن لائن) مشہور میوزک بینڈ ’رولنگ سٹون‘ کے گلوکار مک جیگر اوپن ہارٹ سرجری کرائیں گے،انھوں نے اپنی بیماری کے پیش نظر
شمالی امریکا کا ٹور بھی منسوخ دیا ہے۔ میڈیا رپورٹ کے مطابق مک جیگر جن کی عمر 75برس ہے کو معالجین نے ان کے دل کے عارضے کے سبب سرجری کا مشورہ دیا ہے جس میں ان کے دل کا والوو تبدیل کیا جائے گا۔جیگر کے منیجر کے مطابق ان کا شمالی امریکی ٹور”نو فلٹر“منسوخ کر دیا گیا ہے۔ انھوں نے بتایا کہ ان کے دل کا آپریشن 5 اپریل کو کیا جائے گا اور وہ مکمل صحت یابی کے بعد سٹیج پر واپس آئیں گے۔مک جیگر نے بعد ازاں اپنی ٹویٹ میں اپنے پرستاروں سے معذرت کی جنہوں نے امریکا اور کینیڈا میں ان کے شو کے ٹکٹس خرید لئے تھے۔انھوں نے کہا کہ”میں امریکا اور کینیڈا میں ٹکٹس لینے والے اپنے تمام پرستاروں سے معذرت خواہ ہوں،مجھے آپ کو ایسا کہتے ہوئے بہت افسوس ہو رہا ہے لیکن میں جلد از جلد واپس آنے کے لئے محنت کروں گا“۔

لاہور(ایمرا نیوز آن لائن) گلوکارہ فریحہ پرویز نے کہا ہے کہ گلوکاری کیلئے ریاضت اتنی زیادہ ضروری ہے جس طرح کسی انسان کیلئے خوراک ضروری ہوتی ہے۔ موجودہ ملکی حالات نے میوزک پر کچھ اثر ضرور ڈالا ہے مگر یہ سب عارضی ہے اور عنقریب میوزک دوبارہ اپنے عروج پر نظر آئے گا۔ ایک انٹر ویو میں انہوں نے کہا کہ میری تمام میوزک البمز نے شاندار بزنس کئے ہیں اور میں چاہتی ہوں کہ میں جو بھی کام کروں وہ میرے پہلے کام سے بہتر ہو اور اس کے لئے بھرپور محنت کرتی ہوں۔

لاہور(ایمرا نیوزآن لائن) جنوبی ایشیاء میں موسیقی کی پہچان ، معروف گلوکار راحت فتح علی خان کا کہنا ہے کہ آکسفورڈ یونیورسٹی سے اعزازی ڈگری ملنا اعزاز کی بات ہے۔انہوں نے مزید کہا کہ آکسفورڈ یونیورسٹی کی اعزازی ڈگری ملنا پاکستان اور میرے خاندان کے لیے باعث افتخارہے۔واضح رہے کہ معروف برطانوی تعلیمی ادارے آکسفورڈ یونیورسٹی نے رواں سال 8 افراد کو اعزازی ڈگری دینے کا اعلان کیا ہے جن میں پاکستان کے عالمی شہرت یافتہ گلوکار راحت فتح علی خان بھی شامل ہیں۔آکسفورڈ یونیورسٹی کی جانب سے راحت فتح علی خان کا تعارف ’صوفیانہ موسیقی قوالی کے پاکستانی گلوکار کے طور پر کیا گیا ہے‘۔راحت فتح علی خان نے اس گھرانے میں آنکھ کھولی جو جنوبی ایشیائی روایتی موسیقی کی پہچان سمجھا جاتا ہے، 7 سال کی عمر میں ان کی باقاعدہ تربیت کا آغاز ہو گیا تھا ، اب تک ان کے 50 سے زائد البم ریلیز ہوچکے ہیں، یہی نہیں وہ دنیا بھر میں مختلف بڑے کانسرٹس میں اپنے فن کا مظاہرہ کرچکے ہیں اور انہیں عالمی شہرت حاصل ہے جبکہ وہ آن لائن ایک ارب ویوز حاصل کرچکے ہیں۔راحت فتح علی خان ٹیلی ویژن سیریلز کے 50 سے زائد ٹائٹل ٹریک اور 100 سے زائد فلموں کے گیت گا چکے ہیں۔آکسفورڈ یونیورسٹی کی جانب سے اعزازی ڈگری دینے کی تقریب اس سال 26 جون کو منعقد ہوگی، اس سے قبل 2016ء میں آکسفورڈ یونیورسٹی نے راحت فتح علی خان کی قوالیوں اور کلاسیکل موسیقی کی خدمات کو سراہتے ہوئے انہیں لائف ٹائم اچیومنٹ ایوارڈ سے نوازا تھا۔

عطا اللہ خان عیسی خیلوی کی طبیعت ناساز ہونے کے باعث انہیں اسپتال میں داخل
لاہور(ایمرا نیوز آن لائن) بین الاقوامی شہرت یافتہ گلوکار عطا اللہ خان عیسی خیلوی کی طبیعت ناساز ہونے کے باعث انہیں اسپتال میں داخل کرادیا گیا ہے۔پاکستان کے معروف گلوکارعطا اللہ خان عیسی خیلوی کو لاہور کے نجی اسپتال میں داخل کرادیا گیا ہے جہاں ڈاکٹروں نے ان کے مختلف ٹیسٹ کرنے کے بعد علاج شروع کردیا ہے۔ذرائع کے مطابق عطا اللہ عیسی خیلوی کی کمر میں شدید درد کے باعث انہیں اسپتال داخل کرایا گیا ہے جب کہ اب ان کی طبیعت پہلے سے بہتر محسوس ہورہی ہے۔واضح رہے عطا اللہ عیسی خیلوی کی طبعیت ناساز ہونے کے باعث لاہور آرٹس کونسل کے زیر اہتمام 29 مارچ کو ہونے والا گرینڈ شو کو بھی منسوخ کردیا گیا ہے۔

ایف بی آر نے گلوکار راحت فتح علی خان کو ایڈوانس جمع نہ کروانے پر نوٹس جاری کردیا
لاہور(ایمرا نیوز آن لائن) فیڈرل بورڈ آف ریونیو نے شہر ہ آفاق گلوکار راحت فتح علی خان کو ایڈوانس جمع نہ کروانے پر نوٹس جاری کردیا۔بتایاگیا ہے کہ ایف بی آر کی جانب سے گلوکار راحت فتح علی خان کوایڈوانس ٹیکس کی مد مین 9لاکھ روپے کا نوٹس جاری کیا۔ایف بی آر کے مطابق گلوکار راحت فتح علی خان نے تاحا ل سال 2019کے تیسرے کوارٹرکا ایڈوانس ٹیکس ادانہیں کیا۔