Tag statement

کراچی(ایمرا نیوزآن لائن) سابق کرکٹر معین خان کا کہنا ہے کہ سرفراز احمد بہترین کھلاڑیوں میں سے ایک ہے، سرفراز ٹیم کی ضرورت کے مطابق بیٹنگ کے لیے آئیں۔معین خان نے کہا کہ ورلڈ کپ میں پاکستان ٹیم کو بلاخوف کرکٹ کھیلنا ہوگی، پاکستان کے پاس اچھے پلیئرز ہیں، اچھے نتائج دے سکتے ہیں، اگر اعتماد کے ساتھ میدان میں اترے تو یقینی طور پر جیت ہوگی، کھلاڑی یہ سوچ کر میدان میں اتریں کہ وہ جیت سکتے ہیں۔

سابق کرکٹر کا کہنا تھا کہ رمضان ٹورنامنٹس پی ایس ایل فرنچائز کو ایمرجنگ ٹیلنٹ بھی مہیا کرسکتا ہے، رمضان ٹورنامنٹس پاکستان میں صنعت کا درجہ اختیار کرچکے ہیں۔انہوں نے کا کہا کہ دوسری انڈسٹری کے لوگ بھی رمضان ٹورنامنٹس سے مستفید ہوتے ہیں۔

لاس اینجلس(ایمرا نیوز آن لائن )ہالی وڈ اداکار رابرٹ پٹنسن نے کہا ہے کہ انہیں اپنی نجی زندگی پر بات کرنا پسند نہیں کیونکہ وہ محبت کی قدر و اہمیت کم نہیں کرنا چاہتے۔ذرائع ابلاغ کے مطابق رابرٹ پٹینسن نے ایک انٹرویو کے دوران ماڈل و اداکارہ سوکی واٹر ہاﺅس کے متعلق سوال کے جواب میں کہا کہ کیا مجھے اس متعلق بات کرنی چاہیئے، اگر گلی میں کوئی اجنبی آپ سے اپنے تعلقات یا محبت کے متعلق پوچھے تو آپ کو یہ بہت ناگوار گزرے گا اس لئے مجھے اپنی نجی زندگی پر بات کرنا پسند نہیں کیونکہ میں اپنی محبت کی قدر و اہمیت کم نہیں کرنا چاہتا۔ان کا کہنا تھا کہ اگر آپ لوگوں سے ہر وقت محبت پر بات کریں گے تو وہ محبت کی قدر و اہمیت کم کر دیتی ہے، اگر آپ ایک حد مقرر کر دیں تو بہتر ہوتا ہے.

آئیں آج پاکستان کی ترقی و خوشحالی کا مل کر عہد کریں،صدر مملکت کا مزدوروں کے عالمی دن کے موقع پر بیان
اسلام آباد(ایمرا نیوز آن لائن)صدر مملکت عارف علوی نے کہا ہے کہ ملازم اور آجر کا تعلق صنعتی و اقتصادی ترقی میں بہت اہم ہے یوم مئی مزدور عزت اور بنیادی حقوق کے فراہمی کے وعہد تجدید کا دن ہے ان خیالات کا اظہار صدر عارف علوی نے بدھ کے روز یوم مزدور کے عالمی دن کے موقع پر اپنے ایک پیغام میں کیا انہوں نے کہا کہ ملک کی ترقی میں ملازم اور آجر حصہ دار ہیں ملازم و آجر کا تعلق صنعتی اور اقتصادی ترقی میں بہت اہم ہے یوم مئی مزدور عزت اور بنیادی حقوق کے فراہمی کے وعہد کی تجدید کا دن ہے آئیں آج کے دن پاکستان کی ترقی اور خوشحالی کیلئے مل کر عہد کریں.

اسلام آباد:(ایمرا نیوزآن لائن) آئی ایم ایف نے کہا ہے کہ پاکستان پر 2سال میں 27 ارب ڈالر کا بیرونی قرض واجب الادا ہوجائے گا جب کہ قرض کا یہ حجم پاکستان کے مجموعی بیرونی قرضوں کا 27 فیصد ہے۔حکومت اور کچھ نجی سیکٹر کے ماہرین کے جائزوں کے مطابق جاری کھاتوں کے خسارے کو پورا کرنے کے لیے درکار رقم کو شامل کرنے کے بعد پاکستان کو اقتصادی بحران سے بچنے کے لیے اگلے دو برسوں میں 46 سے 50 ارب ڈالر کی ضرورت ہوگی۔ 27 ارب ڈالر کے بیرونی قرضوں کا ذکر پیر کو جاری کردہ آئی ایم ایف کی نئی ریجنل آؤٹ لُک رپورٹ اپ ڈیٹ میں کیا گیا ہے۔
رپورٹ کے مطابق پاکستان واحد علاقائی ملک ہے جسے سب سے زیادہ غیرملکی قرضہ ادا کرنا ہے۔ آئی ایم ایف کی رپورٹ کے مطابق رواں برس جون تک قرض کا تناسب جی ڈی پی کے 77 فیصد تک رہنے کی توقع ہے۔ سابقہ دور حکومت کے اختتام پر یہ تناسب 72.5 فیصد تھا۔ آئی ایم ایف کی جانب سے یہ رپورٹ اسی دن جاری کی گئی ہے جس روز پاکستان کے ساتھ ممکنہ بیل آؤٹ پیکیج پر مذاکرات شروع ہوئے ہیں۔

قبل ازیں گذشتہ برس نومبر میں بہت اہم معاملات پر اختلافات کے باعث مذاکرات ناکام ہوگئے تھے۔ تاہم اس بار حکام کو توقع ہے کہ اختلافات دور کرلیے جائیں گے اور 6.5 ارب ڈالر قرض کے معاہدے پر دستخط ہوجائیں گے۔پاکستان کو یہ قرض 3 سال میں ادا کرنا ہوگا۔ بیجنگ میں جمعے کو بیلٹ اینڈ روڈ فورم کی سائیڈلائن پر وزیراعظم پاکستان کی ملاقات آئی ایم ایف کی ایم ڈی کرسٹائن لوگارڈ سے ہوئی تھی۔ایوان وزیراعظم سے جاری کردہ بیان کے مطابق دونوں رہنماؤں نے فنڈ پروگرام کی اہمیت اور معاہدے کی جانب پیش قدمی پر اتفاق کیا تھا۔ پاکستان اورآئی ایم ایف کے درمیان تکنیکی سطح کے مذاکرات شروع ہوگئے ہیں، پیرکو ہونے والے مذاکرات کے پہلے روزپاکستان نے آئی ایم ایف کو 600 ارب روپے سے زائدکے نئے ٹیکسزلگانے پرآمادگی ظاہرکردی۔پاکستان نے ٹیکس اصلاحات، توانائی کے شعبہ میں تجاویز تیارکرلی ہیں جبکہ آئی ایم ایف سے 3 سالہ پروگرام کے تحت ساڑھے 6 ارب ڈالرکے لگ بھگ قرضے کا معاہدہ 10مئی کوطے پانے کا امکان ہے، مذاکرات میں آئی ایم ایف جائزہ مشن کی سربراہی ارنستو ریگوکرہے ہیں جبکہ پاکستانی ٹیم کی قیادت سیکریٹری خزانہ نے کی، وفد نے پہلے روز وزارت خزانہ ، ایف بی آر اور وزارت توانائی کے حکام سے مذاکرات کیے۔پاکستان نے 600ارب روپے کے نئے ٹیکسز لگانے کی یقین دہانی کرادی، آئی ایم ایف کو یقین دہانی کرائی گئی ہے کہ نئے بجٹ میں ایف بی آرکا ہدف 4500 ارب روپے سے زائد مقررکیا جائے گا، رواں سال ایف بی آر 4100 ارب روپے کا ٹیکس اکٹھا کرے گا، مذاکرات میںچیئرمین ایف بی آر اور ٹیکس حکام نے ٹیکس اصلاحات پر بھی آئی ایم ایف کو بریفنگ دی اورٹیکس کی چھوٹ محدود کرنے پر بھی تبادلہ خیال ہوا۔

آئی ایم ایف جائزہ مشن کے ساتھ مذاکرات میں رواں مالی سال کے پہلے 9 ماہ کے اقتصادی اعدادوشمار پر مشتمل مرتب کردہ ڈیٹا شیئرکیاگیا ہے، ذرائع کا کہنا ہے کہ آئی ایم ایف جائزہ مشن کے ساتھ آئندہ مالی سال 2019-20 کے وفاقی بجٹ کے لیے تیارکردہ تجاویز اور بجٹ اسٹریٹجی پیپراورمڈٹرم اکنامک فریم ورک بارے بھی تفصیلی تبادلہ ہوا ہے اور بجٹ اسٹریٹجی پیپر کے مجوزہ اہداف کو حتمی شکل دینے پرتبادلہ خیال ہواہے۔ذرائع کا کہنا ہے کہ آئی ایم ایے کے ساتھ مالیاتی خسارہ اور ادئیگیوں کے توازن سمیت دیگر اہداف پر بھی بات چیت ہورہی ہے او مالیاتی خسارہ رواں مالی سال کے آخر تک 7 فیصدکے لگ بھگ جبکہ پروگرام کے تحت اس میں بتدریج کمی لائی جائیگی اور 5.6 فیصد تک اگلے سال لایا جائے گا۔آئی ایم ایف پاکستان کی ٹیکس آمدنی جی ڈی پی کے 13.2 فیصد تک بڑھانے کا مطالبہ کررہا ہے لیکن حکومت پاکستان نے 12.7 فیصد تک بڑھانے کی یقین دہانی کرائی ہے، ذرائع کاکہنا ہے کہ آئی ایم ایف سے ہونے والے مذاکرات میں ریونیو فریم ورک کے بارے میں بھی تفصیلی تبادلہ خیال ہوا ہے۔ذرائع کا کہنا ہے کہ مذاکرات میں چین سے لیے جانے والے قرضوں کے بارے میں آگاہی سے متعلق آئی ایم ایف کو آگاہی دینے میں بھی پیشرفت ہوئی ہے، قرضوں کی تفصیلات پاکستان کے مجموعی قرضوں میں ظاہرہے، وہی آئی ایم ایف کو دی جائے گی۔آئی ایم ایف کو بتایا گیا ہے کہ پاکستان آمدن بڑھانے کی کوشش کر رہا ہے، تجارتی خسارے میں کمی ہو رہی ہے جبکہ درآمدات کو روکا جا رہا ہے، امید ہے رواں سال جاری کھاتوں کا خسارہ کم ہوگا، پاکستان نے ٹیکس اصلاحات، توانائی کے شعبہ میں تجاویزتیارکرلی ہیں۔

لاہور(ایمرا نیوزآن لائن) پاک فوج کے ترجمان( ڈی جی آئی ایس پی آر ) میجر جنرل آصف غفور کا کہنا ہے کہ 1971 میں آج کا میڈیا ہوتا تو مشرقی پاکستان علیحدہ نہیں ہوتا۔ پاک فوج کے شعبہ تعلقات عامہ ( آئی ایس پی آر) کے ڈائریکٹر جنرل میجر جنرل آصف غفور نے پریس کانفرنس سے خطاب کرتے ہوئے کہا کہ بھارت ان گنت جھوٹ بولے جارہا ہے، بھارت کی لفظی اشتعال انگزیزی کا بھی جواب نہیں دیا، پلواما واقعہ پہلا نہیں تھا، پولیس پر حملے پہلے بھی ہوتے رہے ہیں،پاکستان نے بھارتی ایئراسٹرائیک ناکام بنائی۔میجر جنرل آصف غفور نے کہا کہ بھارت نے 26 فروری کو فضائی حدود کی خلاف ورزی کی تھی، جس پر انہیں نوٹس دیا تھا کہ ہمارے جواب کا انتظار کریں، دو جہاز گرانے ایک پائلٹ گرفتار کرنے کی تفصیلات بتائی تھیں۔انہوں نے کہا کہ بھارت اپنا میڈیا پاکستان بھیج دے انہیں بھی وہ جگہ دکھائیں گے کہ کہاں بھارت نے اسٹرائیک کیا اور کیا ہوا، بھارتی ایئرفورس نے اپنا ایم سیونٹین خود گرادیا، رپورٹس کی بنیاد پر کہا کہ دو پائلٹ گرفتار کیے ہیں،جب واپس گیا تو پتا چلا کہ پائلٹ ایک ہی تھا لیکن وہ دو جگہ سے رپورٹ ہوا،بھارت کا کوئی جھوٹ ثابت نہیں ہوا۔آصف غفور نے کہا کہ بھارت نے کہا اس نے پاکستان کا ایف سولہ گرایا، ایف سولہ تو بہت دور کی بات ہے، آج تک تو موٹرسائیکل کا حادثہ نہیں چھپتا، ایئرفورس کے شاہینوں کو خراج تحسین پیش کرنا ہے لیکن مناسب وقت کا انتظار کررہے ہیں، بھارت نے اسٹرائیک رات میں کی پاکستان نے دن میں کی۔انہوں نے کہا پاکستان نے چار ٹارگٹ کے لیے چھ میزائل گرائے، جس بریگیڈ ہیڈکوارٹر کے قریب ہمارا میزائل گیا اس بریگیڈ ہیڈکوارٹر میں کون تھا یہ بھی بھارت بتائے، بھارت نے ہمارے گانے کو اپنا گانا بنا لیا۔ڈی جی آئی ایس پی آر نے کہا کہ 28تاریخ کو بھارت نے کتنی گن پوزیشن تبدیل کی وہ بھی اپنے عوام کو بتائے، جب بات ملکی دفاع اور سلامتی کی ہو تو پاکستان ہر قسم کی صلاحیت اپنائے گا، بھارت کچھ کرنا چاہتا ہے تو پہلے نوشہرہ اسٹرائیک اور بھارتی جہازوں کے گرنے کا حساب ذہن میں رکھے۔ان کا کہنا ہے کہ یہ 1971 نہیں ہے، نہ وہ فوج ہے اور نہ ہی وہ حالات ہیں،اگر 1971 میں آج کا میڈیا ہوتا اور بھارتی حالات بے نقاب کرتا تو مشرقی پاکستان علیحدہ نہیں ہوتا،میڈیا نے جو کردار 2دہائیوں اور 3دن کی جنگ میں ادا کیا اس سے بہتر میڈیا کا کردار نہیں ہوسکتا۔میجر آصف غفور نے کہا کہ بھارت کے میڈیا کو تبدیل ہونے کی ضرورت ہے۔انہوں نے کہا حالیہ کامیابی پر اللہ کے شکر کے بعد، عوام ، سیاستدانوں، میڈیا اور سوشل میڈیا پر جوانوں کا شکریہ ادا کرتے ہیں، پاکستان کے نوجوانوں نے دہشت گردی اور آپریشن دیکھے، ان کے خیال میں یہی پاکستان ہے، 60 سے 70 کی دہائی میں پاکستان بہت بہترین ملک تھا، جی ڈی پی گروتھ 11 سے اوپر تھی اور اُس میں زراعت کا حصہ 46.22 فیصد تھا۔اس کے علاوہ انہوں نے کہا کہ کشمیر ہماری رگوں میں دوڑتا ہے، افغانستان میں سوویت یونین اور پھر نائن الیون کے بعد امریکا آیا۔1979 کے بعد جہاد کی ترویج شروع ہوئی، افغان جنگ کو جائز قرار دے کر پاکستان میں جہاد کی فضا قائم ہوگئی، عسکریت پسندی اور انتہا پسندی پاکستانی معاشرے میں سرائیت کرنا شروع ہوگئی۔بھارت میں ہندواتا کی وجہ سے مسلمانوں کی زندگی خراب ہوئی ہے،بھارت میں مسلمانوں پر کیا ہورہا ہے سب کے سامنے ہے، پچھلی چار دہائیاں پاکستان کو ان حالات کی طرف لے کر آئیں۔ ڈی جی آئی ایس پی آر میجر آصف غفور نے کہا کہ جب افغانستان میں عالمی فورسز نے آپریشن شروع کیا تو پاکستان میں دہشت گردی آئی، نائن الیون سے اب تک 17531 دہشت گردوں کو مارا گیا،پاکستان میں اس وقت دہشت گردوں کا کوئی انفرا اسٹرکچر موجود نہیں ہے۔ستر ملکوں کے ساتھ انٹیلی جنس شیئرنگ ہوتی ہے۔انہوں نے کہا کہ فوجی جوانوں سمیت 81 ہزار پاکستانی شہید ہوئےاور پاکستانی معیشت کو 300 ارب ڈالر سے زائد کا نقصان ہوا،2016 میں آرمی چیف مونخ گئے تو انہوں نے کہا کہ جو کاٹا ہے وہ چالیس سال پہلے بویا تھا، لوگوں نے اس کا یہ مطلب نکال لیا کہ فوج نے اپنی غلطی مان لی ہے۔یکم جنوری 2019 کو کالعدم تنظیموں سے متعلق فیصلہ ہوگیا تھا لیکن جب تک مالی مسائل تھے،کالعدم تنظیموں کے ویلفیئر نیٹ ورک کو کنٹرول کرنے کے لیے یہ طریقہ کار بنایا ہے کہ انہیں حکومتی تحویل میں لے لیا جائے۔اس کے علاوہ ڈی جی آئی ایس پی آر نے کہا کہ دنیا میں 129 ممالک میں پاکستان کا تعلیم میں نمبر 113واں ہےاور یہ شرمناک بات ہے، پاکستان میں 30ہزار سے زائد مدارس ہیں، 25 لاکھ بچے اس میں تعلیم حاصل کرتے ہیں۔ 30 ہزار میں سے 0.5 فیصد مدرسے ایسے ہیں جو دہشت گردی کی ترویج کرتے ہوں گے۔ان 30ہزار مدرسوں سے 225 ملین بچے پڑھ کر نکلتے ہیں تو سوچیں ان کا کیا مستقبل ہے؟ تمام مدارس کو قومی دھارے میں لایا جائے گا، ہر مدرسے میں 4 سے 6مضامین کے اساتذہ چاہیے ہوں گے۔ترجمان پاک فوج نے کہاکہ حکومت نے فیصلہ کیا ہے کہ تمام مدارس کو وزارت تعلیم کے ماتحت کیا جائے گا جہاں ایک ایسا سلیبس بنانا ہے جس میں نفرت انگیز تقریر نہیں ہوگی جبکہ آرمی چیف کہتے ہیں اپنا فقہ چھوڑو نہیں دوسرے فقہ کو چھیڑو نہیں۔

عوام بھی سرکاری ریٹ لسٹ سے زائد مانگنے والے دکانداروں کا محاسبہ کریں ‘ میاں عثمان کی گفتگو
لاہور(ایمرا نیوز آن لائن )پرائس کنٹرول کمیٹی کے سابق چیئرمین میاں عثمان نے کہا ہے کہ حکومت کی جانب سے گراں فروشوں کو لگام ڈالنے کےلئے تاحال کوئی اقدامات نہیں کئے گئے جو قابل تشویش ہے ، گراں فروشی کو کنٹرول کرنے کےلئے ویجی لینس کا نظام متعارف کرایا جائے ، عوام بھی سرکاری ریٹ لسٹ سے زائد مانگنے والے دکانداروں کا محاسبہ کریں ۔

اپنے ایک بیان میں انہوں نے کہا کہ رمضان المبارک کا آغاز ہونے سے قبل ہی سبزیوں ،پھلوں اور اشیائے خوردونوش کی قیمتوں میں 30فیصد تک اضافہ ہو گیا ہے جو آنے والے دنوں میں مہنگائی کے طوفان کا پیش خیمہ ہے ۔

ایک طرف حکومت کی طرف سے مہنگائی کی گئی ہے اور دوسری جانب گراں فروشوں کی من مانیاں جاری ہیںجس سے غریب عوام کی کمر ٹوٹ چکی ہے ۔ انہوں نے کہا کہ اگر یہی صورتحال بر قرار رہی تو رمضان المبارک میں 8سے 30ہزار روپے تک آمدنی والے طبقات کےلئے حساس اشاریے خطرناک حد تک بڑ ھ جائیں گے ۔گراں فروشوں کو لگا م ڈالنے کے لئے ویجی لینس کا نظام متعارف کرایا جائے اور اس کے لئے مقامی آبادیوں میں رہنے والے نوجوانوں کی مدد لی جائے ۔

اسلام آباد(ایمرا نیوز آن لائن ) روزگار کے معیاری مواقع اقتصادی شرح نمو کو ترقی کی شاہراہ پر گامزن کرنے کے لئے ضروری ہیں۔ عالمی بینک کی رپورٹ کے مطابق معیشت کی ترقی کے لئے زیادہ سے زیادہ روزگار کی فراہمی، معیاری روزگار کے مواقع، کم معیار کے روزگار کی بجائے بہتر روزگار کی دستیابی اور کم سے کم دورانیہ میں زیادہ سے زیادہ معیاری کام انتہائی ضروری ہیں۔معاشی تبدیلیوں اور مارکیٹ کی بدلتی ہوئی ضروریات کے پیش نظر لیبر مارکیٹ کا ڈ ھانچہ بھی تبدیل ہو تا ہے جو کم آمدنی، متوسط آمدن اور بہتر آمدن کے خدوخال وضع کرتا ہے۔

رپورٹ کے مطابق کسی بھی ملک کی بہتر اقتصادی کارکردگی سے رقزگار کے بہتر مواقع پیدا ہونا ضروری نہیں ہے اس لئے مجموعی قومی پیداوار (جی ڈی پی) کی بڑھوتری کے ساتھ ساتھ کارکنوں کی استعداد کار اور آمدنی میں اضافہ ہونا بھی ضروری ہے جو ان کو کام کے معیاری مواقع فراہم کرنے سے ہی ممکن ہو سکتا ہے۔کارکنوں کی استعداد کار کی بہتری سے روزگار کے معیار میں بھی بہتری ہوتی ہے۔ عالمی بینک نے کہاکہ جی ڈی پی کی شرح نمو لیبر مارکیٹ کی ترقی سے منسلک ہے۔ جب جی ڈی پی میں بہتری آتی ہے تو ہو سکتا ہے کہ روزگار کے نئے مواقع پیدا ہو ں لیکن یہ ضروری نہیں کہ کارکنوں کو معیاری روزگار بھی دستیاب ہو سکے۔

اس لئے پائیدار اقتصادی ترقی کے لئے ضروری ہے کہ روزگارکے معیاری مواقع اور کارکنوں کی استعداد کار سے زیادہ سے زیادہ استفادہ کو یقینی بنایا جائے۔ عالمی بینک نے کہا ہے کہ کسی بھی ملک میں پائیدار اقتصادی ترقی کے لئے روزگار کے بہتر اور معیاری مواقع پیدا کرنا ضروری ہیں تاکہ کارکنوں کی صلاحیت اور تجربہ سے حقیقی استفادہ کیا جا سکے۔

لاہور:(ایمرا نیوزآن لائن) قومی احتساب بیورو کے سربراہ جاوید اقبال نے کہا ہے کہ ایساقدم نہیں اٹھائیں گے جس سےملکی معیشت کونقصان ہو۔
چیئرمین نیب جاوید اقبال نے پنجاب سول سیکریٹریٹ میں خطاب کرتے ہوئے کہا کہ حکومتی معاملات چلانےکیلیےبیوروکریسی کا کردار اہم ہے، نیب نے جن بیوروکریٹس کےخلاف کارروائی کی، ان کے خلاف ٹھوس شواہدموجودہیں، ایساقدم نہیں اٹھائیں گےجس سےملکی معیشت کونقصان ہو۔

جاوید اقبال نے کہا کہ گزشتہ برس پنجاب میں میگا کرپشن کیسزسامنےآئے، حکومت پالیسی بناتی ہے،عملدرآمد بیوروکریسی کاکام ہے جو ملک کی ریڑھ کی ہڈی کی حیثیت رکھتی ہے، وہ فیصلے نہیں کرےگی توہم آگےکیسےبڑھیں گے، شواہدسےثابت کروں گا،نیب جو کام کررہا ہے وہ درست ہے۔

چیرمین نیب کا کہنا تھا کہ میگاکرپشن مقدمات کومنطقی انجام تک پہنچانااولین ترجیح ہے، نیب احتساب سب کیلئے کی پالیسی پر بلاتفریق عمل پیرا ہے، بدعنوانی تمام برائیوں کی جڑ ہے جس کے خاتمہ کو قومی فریضہ سمجھ کر فرائض سرانجام دے رہے ہیں۔

نیویارک:(ایمرا نیوزآن لائن) ہالی ووڈ کی مقبول ترین اداکارہ انجلینا جولی نے افغان خواتین کے حق میں ایک بارپھرآوازاٹھاتے ہوئے کہا ہے کہ افغان خواتین کو اپنے لیے آوازاٹھانے کے قابل ہونا چاہئے وہ امن مذاکرات میں اہم کردار ادا کرسکتی ہیں۔نامورہالی ووڈ اداکارہ اوراقوام متحدہ کی خصوصی سفیربرائے مہاجرین انجلینا جولی نے ہمیشہ خواتین خصوصاً افغان خواتین کے لیے آواز بلند کی ہے۔ حال ہی میں ٹائمزمیگزین میں شائع ہونے والے کالم میں انجلینا جولی نے ایک بارپھرافغان امن مذاکرات میں افغانی خواتین کے کردارپرزوردیتے ہوئے کہا ہے کہ افغانی خواتین کو اپنے لیے آواز اٹھانے کے قابل ہونا چاہئے، جس کا مطلب یہ ہے کہ افغان امن مذاکرات میں حصہ لینے والے افغانی حکومت کے وفد میں خواتین کی شمولیت بھی ضروری ہے۔جولی نے کہا خواتین امن معاہدے کے نفاذ میں ایک کلیدی کردار اداکرسکتی ہیں۔ نوے کی دہائی میں جب طالبان نے افغانستان پر قبضہ کیا انہوں نے خواتین کی تعلیم پر پابندی عائد کردی تھی اور خواتین کو گھروں میں رہنے پر مجبورکیا تھا جب کہ انہیں کئی بارسزائیں بھی دی گئیں جن میں سنگساری بھی شامل ہے۔ تاہم 2001 کے بعد افغانستان میں امریکی مداخلت کے بعد خواتین کے حقوق میں بہتری آئی لیکن افغان کلچرمیں اب بھی خواتین کوالگ تھلگ رکھا جاتا ہے جہاں خواتین میں اب بھی اپنی آزادی چھن جانے کا خوف ہے۔ انجلینا نے کہا کہ خواتین پرمظالم، جبر اورناانصافی کے اس نئے دورمیں اگر امن معاہدہ نہیں ہوگا تواستحکام بھی نہیں آئے گا۔واضح رہے کہ اس سے قبل بھی انجلینا جولی نے اقوام متحدہ کی جنرل اسمبلی میں افغان خواتین کے حق میں آواز اٹھاتے ہوئے کہا تھا کہ خواتین کی شمولیت کے بغیر افغان امن مذاکرات نتیجہ خیز ثابت نہیں ہوں گے امن مذاکرات میں افغان خواتین کی شمولیت ناگزیر ہے۔

اسلام آباد(نیٹ نیوز/ایمرا نیوز) وزیر اعظم عمران خان نے کہا ہے کہ ہمارے چند قانون ساز ECL سے اتنے خوفزدہ کیوں ہیں؟انہیں بیرون ملک جانے میں اتنی دلچسپی کیوں ہے؟عمران خان نے سوشل میڈیا پر طنزیہ بیان جاری کرتے ہوئے کہا کہ ان پارلیمنٹیرینز کو بیرون ملک جانے میں اس قدر دلچسپی ہے،پاکستان میں سیاستدانوں کے کرنے کیلئے بہت کام ہے جس سے وہ محبت کے دعوے کرتے ہیں مگریہ لوگ بیرون ملک دوروں پر جانے کے لئے بے صبرے رہتے ہیں۔

Why are some of our lawmakers so scared of the ECL? Why are they so keen to go abroad? There is so much work to be done by politicians in & for Pak – the land they claim to love but some cannot wait to take frequent trips abroad & lawmakers have iqamas or residencies abroad.

— Imran Khan (@ImranKhanPTI) January 17, 2019

انہوں نے کہا کہ بہت سے ارکان بیرون ملک اقامے اور رہائش رکھتے ہیں۔انہوں نے مزید ٹوئٹ کرتے ہوئے کہا کہ کیا کوئی ہمارے لئے، کہ جن کا حقیقی عشق پاکستان ہے اور جنہیں اپنی دھرتی پر رہنا اور اپنے ملک کیلئے دن رات کام کرنا نہایت عزیز ہے، اس عجیب و غریب رسم کی وضاحت کرسکتا ہے؟واضح رہے سپریم کورٹ نے جعلی اکاونٹس کیس میں چیئرمین پاکستان پیپلز پارٹی بلاول بھٹو زرداری اور وزیراعلی سندھ مراد علی شاہ کے نام فی الحال ای سی ایل سے نکالنےکا حکم دیدیا ہے۔دوسری جانب وزیراعظم عمران خان کی زیر صدارت وفاقی کابینہ کا اجلاس آج ہوگا جس میں پیپلز پارٹی چیئرمین بلاول بھٹو زرداری اور وزیراعلیٰ سندھ مراد علی شاہ کا نام ایگزٹ کنٹرول لسٹ (ای سی ایل) سے نکالنے اور ملک کی سیاسی، معاشی اور توانائی صورتحال سمیت 17 نکاتی ایجنڈے پر غور کیا جائے گا۔