Tag world cup

لاہور(ایمرا نیوزآن لائن) ویسٹ انڈیز کرکٹ بورڈ نے ورلڈ کپ کے لیے 15 رکنی ٹیم کا اعلان کردیا۔میگا ایونٹ میں ویسٹ انڈیز کرکٹ ٹیم کی قیادت جیسن ہولڈر کریں گے جب کہ وکٹ کیپر بلے باز شائی ہوپ، آندرے رسل، کرس گیل، ایشلے نرس، کیرلس براتھویٹ، ڈیرن براوو، ایون لوئس، شمرون ہیٹمیئر، فیبیئن ایلن اسکواڈ میں شامل ہیں۔علاوہ ازیں شیلڈن کوٹرل، کیمر روچ، شینون گیبریل، نیکولس پورن، اوشین تھامس ٹیم میں جگہ بنانے والوں میں شامل ہیں۔

ویسٹ انڈیز کرکٹ بورڈ نے ورلڈ کپ کے لیےکپتان سمیت تمام کھلاڑیوں کو مضبوط ٹیم قرار دیا ہے جب کہ بہترین بلے باز کرس گیل کو گیم چینجر اور آل راؤنڈر آندرے رسل کو ٹیم کے مرکزی کھلاڑی قرار دیے ہیں۔یاد رہے کہ ورلڈ کپ 2019 کا باقاعدہ آغاز 30 مئی کو میزبان انگلینڈ اور جنوبی افریقا کے میچ سے ہوگا۔

لندن: (ایمرا نیوزآن لائن) بابائے کرکٹ انگلینڈ کے دیس شاہینوں نے ڈیرے جما لیے، ورلڈ کپ اور انگلینڈ کے خلاف سیریز کیلئے پریکٹس کا آج سے آغاز کریں گے، سیریز کا واحد ٹی ٹوئنٹی میچ پانچ مئی کو کھیلا جائے گا۔گوروں کی سرزمین پر شاہینوں کا بسیرا، انگلینڈ سیریز اور پھر ورلڈکپ کا بڑا معرکہ درپیش ہے جو پانچ مئی سے شروع ہو گا۔ قومی کھلاڑی آج سے سخت ٹریننگ کا آغاز کریں گے، فزیکل فٹنس پر خصوصی توجہ دی جائے گی۔

مکی آرتھر سمیت کوچز کی زیر نگرانی کھلاڑی بیٹنگ، بولنگ اور فیلڈنگ میں پسینہ بہائیں گے اور انگلینڈ کی موسمی تبدیلیوں میں خود کو ایڈجسٹ کریں گے۔سرفراز احمد کی قیادت میں ٹیم پاکستان اور کینٹ کاؤنٹی کا مقابلہ 27اپریل کو ہو گا۔ پاک انگلینڈ واحد ٹی ٹوئنٹی اور پانچ ون ڈے میچز کی سیریز پانچ مئی سے شیڈول ہے۔ورلڈکپ کا میگا ایونٹ تیس مئی سے شروع ہو گا، قومی کھلاڑی فاتحانہ انٹری اکتیس مئی سے ویسٹ انڈیز کے خلاف ڈالیں گے۔ روایتی حریف پاکستان اور بھارت کے درمیان زور کا جوڑ سولہ جون کو ہو گا جس کے تمام ٹکٹس فروخت ہوچکے ہیں۔

اسلام آباد:(ایمرا نیوزآن لائن) ورلڈ کپ کے لیے منتخب ہونے والی قومی ٹیم کی وزیر اعظم عمران خان سے ملاقات جاری ہے۔وزیراعظم آفس میں ہونے والی ملاقات میں 17 کھلاڑیوں کے ہمراہ چیئرمین پاکستان کرکٹ بورڈ احسان مانی، کوچ مکی آرتھر اور چیف سلیکٹر انضمام الحق بھی شریک ہیں۔پاکستان کرکٹ بورڈ کی مینجمنٹ کے حکام بھی ملاقات کا حصہ ہیں۔ذرائع کے مطابق وزیر اعظم قومی کھلاڑیوں کو ورلڈ کپ کی تیاریوں کے لئے مشورے دیں گے اور بڑے ٹورنامنٹ سے متعلق قومی ٹیم کی حوصلہ افزائی کریں گے۔ واضح رہے کہ انگلینڈ میں ہونے والے ورلڈ کپ 2019 کے لیے قومی ٹیم کا اعلان گزشتہ روز کیا گیا جس میں کپتان سرفراز احمد، فخر زمان، امام الحق عابد علی، حارث سہیل، بابراعظم، شعیب ملک، محمد حفیظ، شاداب خان، عماد وسیم، حسن علی، فہیم اشرف، شاہین شاہ آفریدی اور محمد حسنین شامل ہیں۔فاسٹ بولر محمد عامر کو ڈراپ کر کے جنید خان کو ٹیم میں شامل کیا گیا ہے اور ان کی شمولیت کا دار و مدار ورلڈ کپ سے قبل انگلینڈ کے خلاف کھیلی جانے والی سیریز میں پرفارمنس پر ہوگا۔

لاہور(ایمرا نیوزآن لائن) آئی سی سی ورلڈ کپ ٹرافی کی نمائش آج لاہور میں کی جائے گی۔آئی سی سی ورلڈ کپ ٹرافی کی نمائش آج لاہور میں کی جائے گی جبکہ میگاایونٹ کی ٹرافی کل کراچی کے شہریوں کے درمیان ہوگی، جہاں ایک خصوصی تقریب ہوگی جس میں محفل موسیقی ، فوڈ فیسٹیول اور آتش بازی کا مظاہرہ بھی کیا جائے گا۔کرکٹ کا سب سے بڑا میلا آئی سی سی ورلڈ کپ 2019 کے آغاز 30 مئی سے ہوگا ۔ایک جانب ٹیموں کی تیاریاں جاری ہیں تو میگا ایونٹ کی ٹرافی ان دنوں پاکستان میں ہے ۔گزشتہ روز اسلام آباد میں ٹرافی کی نمائش کی گئی اور کرکٹ کے چاہنے وا لوں نے بڑی تعداد میں ٹرافی کے ساتھ تصاویر بنوائیں۔

اسلام آباد(ایمرا نیوزآن لائن) : قومی کرکٹ ٹیم کے کپتان سرفراز احمد نے ورلڈکپ ٹرافی کو شوکیس میں سجانے کا عزم کرلیا۔آئی سی سی ورلڈ کپ ٹرافی ایک مرتبہ پھر پاکستان پہنچ گئی۔ قومی ٹیم کے کپتان سرفراز احمد گذشتہ روز اسے دبئی سے اسلام آباد لے کر آئے، آئی سی سی کا معاون اسٹاف بھی ہمراہ تھا، سخت سیکیورٹی میں ٹرافی کو ایئرپورٹ سے ہوٹل پہنچایا گیا جو وہاں موجود میڈیا اور لوگوں کی بھرپور توجہ کا مرکز بنی، سرفراز احمد نے پریس کانفرنس بھی کی۔جمعے کو مقامی شاپنگ مال میں رونمائی ہوگی،شائقین ٹرافی کے ساتھ تصاویر بھی بنوا سکیں گے،اسے وزیر اعظم ہاؤس لے جانے کا امکان ہے، ٹرافی ہفتے کو لاہور اور اگلے روزکراچی میںجلوے بکھیرے گی، شہر قائد میں کنسرٹ کا انعقاد اور آتش بازی کا مظاہرہ بھی کیا جائے گا۔یاد رہے کہ ٹرافی اس سے قبل گذشتہ سال اکتوبر میں بھی پاکستان آچکی، اس وقت میزبانی اور سیکیورٹی کی ذمہ داریاں پی سی بی کے سپرد تھیں، ٹرافی کو لاہور میں گھمایا بھی گیا تھا، میگا ایونٹ سے قبل اب اس کی آمد اور تقریبات کا اہتمام ایک اسپانسر ادارے کی جانب سے کیا جا رہا ہے۔اسلام آباد میں میڈیا سے بات چیت کرتے ہوئے سرفراز احمد نے کہا کہ کرکٹ کو پاکستان بھر میں بہت پسند کیا جاتا ہے، گذشتہ 3 سال میں یہاں انٹرنیشنل کرکٹ کی واپسی کا عمل بڑی تیزی سے ہوا، عوام کو اپنے میدانوں پر کرکٹرز کو ایکشن میں دیکھنے کا موقع ملا، یہ سب چیف آف آرمی اسٹاف، پاک فوج اور پی سی بی کی کوششوں سے ممکن ہوا۔انھوں نے کہا کہ میں ٹرافی کے پاکستان آنے پر بہت پُرجوش ہوں، عام لوگوں کو اسے دیکھنے اور سیلفیز بنانے کا موقع مل رہا ہے، قوم میں ایک جذبہ پیدا ہو گا، عوام گرین شرٹس کی کامیابی کیلیے دعا کریں۔ ہم کوشش کریں گے کہ چیمپئن بن کر ٹرافی کو وطن واپس لائیں،انھوں نے کہا کہ مشن ورلڈ کپ مشکل اور تمام ہی ٹیمیں مضبوط ہیں،ہماری کوشش ہوگی کہ عمدہ کارکردگی کا مظاہرہ کرتے ہوئے عوام کی توقعات پر پورا اتریں۔سرفراز نے کہا کہ قومی ٹیم کی مڈل آرڈر بیٹنگ مضبوط اوراس میں بابر اعظم اور حارث سہیل جیسے بیٹسمین موجود ہیں، اس لیے کسی تبدیلی کی ضرورت نہیں، اضافی وکٹ کیپر کی ضرورت ہوئی تو محمد رضوان کو لے جایا سکتا ہے، انھوں نے کہا کہ محمد عامر کو فٹنس ٹیسٹ پاس کرنا ہوگا، انگلینڈ کیخلاف سیریز اور وارم اپ میچز میں خامیاں دور کرنے کی کوشش کریں گے۔یاد رہے کہ انگلینڈ میں شیڈول ورلڈکپ کا آغاز 30مئی کو ہوگا۔

محمد عامر کا پہلا ورلڈ کپ کھیلنے کا خواب چکنا چور ہونے کا امکان
”لاڈلے“ پیسر ہیڈ کوچ مکی آرتھر کے دل سے اتر گئے
لاہور(ایمرا نیوز آن لائن) ”لاڈلے“ محمد عامر مسلسل ناقص کارکردگی کے سبب ہیڈ کوچ مکی آرتھر کے دل سے بھی اتر گئے۔ورلڈکپ کیلئے حتمی پاکستانی سکواڈ کا اعلان 18 اپریل کو ہونا ہے‘ جس سے قبل 15 اور 16 تاریخ کو 23کھلاڑیوں کے فٹنس ٹیسٹ لیے جائینگے۔ ذرائع کے مطابق اب بھی مختلف آپشنز پر غور جاری ہے تاہم بیشتر پلیئرز پر ٹیم مینجمنٹ اور سلیکٹرز میں اتفاق رائے ہو چکا ہے،طویل عرصے سے آوٹ آف فارم محمد عامر اب ہیڈ کوچ مکی آرتھر کے دل سے بھی اتر چکے ہیں اور پیسر شاید ہی انگلینڈ کا ٹکٹ حاصل کرسکیں گے، بعض ”حلقوں“ کی پوری کوشش ہے کہ کسی طرح عامر کو سکواڈ میں شامل کرا دیا جائے، عامر نے 18 جون 2017ئ کو بھارت سے چیمپئنز ٹرافی فائنل میں16رنز دیکر3 کھلاڑی آؤٹ کیے تاہم اس کے بعد وہ 14 ون ڈے میچز میں کبھی ایک سے زائد وکٹ حاصل نہ کر سکے، 9مقابلوں میں انہیں کوئی وکٹ نہ ملی ،اس دوران انھوں نے88.6 کی اوسط سے5 وکٹیں لی ہیں،آسٹریلیا سے یو اے ای میں منعقدہ گزشتہ سیریز کے افتتاحی میچ میں بغیر کسی وکٹ کے59رنز دینے کے بعد عامر کو بقیہ میچزمیں موقع نہ ملا، نوجوان پیسر محمد حسنین کو انگلینڈ لے جانے پر غور جاری ہے، انھوں نے 3ون ڈے میچز میں صرف 2 وکٹیں لیں تاہم اپنی رفتار سے سب کو بیحد متاثر کیا،شاہین شاہ آفریدی اور حسن علی کیساتھ ٹیم میں پیسرکی ایک اور خالی جگہ کیلئے محمد عباس،جنید خان اور عثمان شنواری میں مقابلہ ہے تاہم عثمان شنواری کی شمولیت کا امکان زیادہ روشن ہے۔

لاہور(ایمرا نیوز آن لائن) پاکستان کرکٹ ٹیم کے کھلاڑی امام الحق کو ورلڈ کپ کھیلنے کے لیے منتخب کی جانے والی ٹیم سے ڈراپ کیے جانے کا امکان ہے۔ میڈیا رپورٹ میں بتایا گیا ہے کہ امام الحق کی ناقص کارکردگی کی بنیاد پر ٹیم سلیکشن کمیٹی نے انہیں عالمی کپ کھیلنے کے لیے منتخب ہونے والے کھلاڑیوں میں شامل نہ کرنے کا فیصلہ کیا ہے۔ یاد رہے کہ امام الحق نے آسٹریلیا کے خلاف کھیلی جانے والی پانچ میچز کی سیریز میں سے 3میچز کھیلے جن میں وہ کوئی خاطر خواہ کارکردگی نہ دکھا سکے اور تینوں میچوں میں انہوں نے مجموعی طور پر63 رنز بنائے جس کی وجہ سے انہیں اب ورلڈ کپ کھیلنے کے لیے منتخب کی جانے والی ٹیم میں شامل نہیں کیا جارہا۔آسٹریلیا کے خلاف کھیلی جانے والی سیریز کے دوران ہی پاکستانی کھلاڑیوں کا فٹنس ٹیسٹ بھی ہوا اور امام الحق اس ٹیسٹ میں بھی کلئیر نہ ہو سکے اور انہیں ان فٹ قرار دیا گیا تھا۔ابھی ٹیم مینجمنٹ نے اس حوالے سے کوئی باضابطہ اعلان نہیں کیا لیکن جلد ان کی جانب سے اس اعلان کی توقع کیا جارہی ہے۔

کراچی(ایمرا نیوزآن لائن) قومی کرکٹ ٹیم کے کپتان سرفراز احمد کا کہنا ہے کہ ہم ورلڈ کپ ہر صورت پاکستان لائیں گے اور قوم کو عید کا تحفہ دیں گے۔کراچی میں قومی کرکٹ ٹیم کے کپتان کے اعزاز میں ایک عشائیہ دیا گیا، فنکاروں کے اس عشائیہ میں سرفراز احمد نے غیر رسمی گفتگو کرتے ہوئے کہا کہ کرکٹ اور فنکاروں کا چولی دامن کا ساتھ ہے، دونوں ایک دوسرے کے شعبوں میں گہری دلچسپی لیتے رہے ہیں۔اس موقع پر گلوکار سلیم جاوید نے کہا کہ موسیقی کے بعد کرکٹ میرا جنون ہے، میں کپتان سرفراز احمد کی بیٹنگ اور کیپنگ کا دیوانہ ہوں، ان کا کہنا تھا کہ میں نے کرکٹرز کے لیے سب سے پہلے گیت تیار کیے۔سلیم جاوید نے بتایا کہ عمران خان اور میانداد کے لیے گائے ہوئے گیت بہت مقبول ہوئے، میں اب سرفراز احمد کے لیے بھی نغمہ تیار کروں گا مجھے امید ہے سرفراز دھوکا نہیں دے گا۔تقریب میں میزبان بابر عباسی کی جانب سے کپتان سرفراز احمد کو تحائف پیش کئے گئے۔

ایونٹ کو یادگار بنانے کے لیے شاندار ریکارڈز شیئر کر دیئے،، ورلڈ کپ 2015 میں سب سے زیادہ 38 سنچریز بنیں
دبئی(ایمرا نیوز آن لائن) انٹرنیشنل کرکٹ کونسل نے ون ڈے ورلڈکپ کا 100 روزہ کاؤنٹ ڈاؤن شروع کر دیا، شاندار ریکارڈز نے ایونٹ کو ابھی سے یادگار بنا دیا۔آئی سی سی نے ورلڈکپ کا 100 روزہ کاؤنٹ ڈاؤن کرتے ہوئے ایونٹ کو یادگار بنانے کے لیے شاندار ریکارڈز شیئر کر دیئے۔ کرکٹ کے سپر میگا ایونٹ میں ماسٹر بلاسٹر سچن ٹنڈولکر چھ سینکڑوں کے ساتھ ٹاپ پر ہیں۔پانچ پانچ سنچریاں بنانے بیٹسمین رکی پونٹنگ اور کمارسنگا کارا ہیں، ورلڈ کپ 2015 میں سب سے زیادہ 38 سنچریز بنیں۔ آئرلینڈ کے کیون اوبرائن نے 2011 کے ورلڈ کپ میں 50 گیندوں پر یعنی تیزترین سنچری سکور کی۔ آئرلینڈ ہی سے تعلق رکھنے والے بلے باز پال سٹرلنگ 20 سال اور 196 دن کی عمر میں ورلڈ کپ سنچری بنا کر کم عمر ترین کھلاڑی بنے۔ 38 سال اور 135 دن کے سری لنکن لیجنڈری تلکا رتنے دلشان عمر رسیدہ سنچری میکر بنے۔سب سے زیادہ پانچ بار کے ورلڈ چیمپئن آسٹریلیا کے بلے بازوں کو سب سے زیادہ 26 سنچریز بنانے کا اعزاز حاصل ہے، لیجنڈری رکی پونٹنگ نے بطور کپتان ورلڈکپ 2003 کے فائنل میں ناٹ آؤٹ 140 کی شاندار اننگز کھیل کر ایونٹ کو یادگار بنا دیا تھا۔

لندن(سپورٹس ڈیسک/ایمرا نیوز) رواں سال شیڈول میگا ایونٹ کیلیے پاک بھارت سمیت بڑے میچوں کی ٹکٹوں کی بلیک میں فروخت کا انکشاف ہوا ہے۔ برطانوی نشریاتی ادارے (بی بی سی) کی رپورٹ کے مطابق ٹکٹیں فروخت کرنے والی ایک ویب سائٹ پر ورلڈکپ کے مختلف اہم میچز کے ٹکٹ انتہائی مہنگے داموں دستیاب ہیں، انگلینڈ کے آسٹریلیا اور بھارت کے ساتھ میچز کے 115 پاؤنڈ والے چند ٹکٹ تو 12029 پاؤنڈ میں فروخت کے لیے پیش کیے گئے ہیں۔دوسری جانب روایتی حریف پاکستان اور بھارت کی ٹیمیوں کے درمیان اولڈ ٹریفورڈ میں 16 جون کو شیڈول میچ کا 150 پاؤنڈ والا ٹکٹ 3 ہزار 280 پاؤنڈ میں فروخت ہونے لگا۔ورلڈکپ آرگنائزنگ کمیٹی کے ترجمان کا کہنا ہے کہ آن لائن ٹکٹ ایکسچینج کمپنی کی جانب سے قواعد و ضوابط کی خلاف ورزی کا نوٹس لے لیا، قانونی کارروائی کے لئے اپنے وکلاء سے مشاورت کر رہے ہیں۔یاد رہے کہ انگلینڈ میں شیڈول ورلڈکپ کا آغاز رواں سال 30 مئی کو ہوگا، قانونی رکاوٹوں کے باوجود چیمپئنز ٹرافی میں بھی ٹکٹ بلیک میں فروخت ہوئی تھیں۔