Category جرم وانصاف

نائیجریا میں مسلح افراد نے مسجد پر حملہ کر کے 16 نمازیوں کو شہید کر دیا۔
مغربی افریقی ملک نائجیریا کے شمالی خطے میں مسلح افراد نے مسجد پر حملہ کر دیا، 16 افراد کو شہید کرنے کے بعد متعدد افراد کو اغوا بھی کرلیا ہے۔
واقعہ نائجر صوبہ کے مشیگو علاقے کے گاؤں میں اس وقت پیش آیا جب موٹر سائیکل پر سوار درجنوں مسلح حملہ آوروں نے گاؤں پر حملہ کردیا۔ انہوں نے مسجد میں عبادت کرنے والے افراد کو ہلاک کرتے ہوئے لوٹ مار بھی کی۔ پولیس نے نو ہلاکتوں کی تصدیق کی ہے۔
اطلاعات کے مطابق نائیجیریا کے شمال وسطی اور شمال مغربی علاقوں میں مقامی مسلح گروہ تاوان کے لیے رہائشیوں کو اغوا اور قتل کرتے ہیں۔

آئی جی پنجاب کے مطابق سانحہ سیالکوٹ میں ملزمان کی گرفتاری کے لیے چھاپے مارے جارہے ہیں جبکہ فوٹیج اور موبائل کالز ڈیٹا کی مدد سے مزید 8مرکزی ملزمان کو گرفتار کیا گیا ہے۔
آئی جی پنجاب نے بتایا کہ ملزمان میں لاش کی بے حرمتی کرنے والا ذاکر سلمان بھی شامل ہے جبکہ دیگر گرفتار ملزمان میں ویڈیو بنانے، اشتعال دلانے اور تشدد کرنے والے شامل ہیں۔
ڈی پی او کا کہنا ہےکہ واقعےسے قبل پریانتھا نےاسٹچنگ ہال کا دورہ کیا تھا جبکہ سامنے آنے والی تصویر میں صبوربٹ اورپریانتھا کو واضح دیکھا جاسکتا ہے

لاہور کی ماڈل ٹاؤن کچہری کے بخشی خانے سے فرار ہونے والے 6قیدیوں کو گرفتار کرلیا گیا۔
ایس ایس پی آپریشنز مستنصر فیروز کے مطابق کچہری سے فرار ہونے والوں میں سے 6قیدیوں کو مختلف مقامات پر چھاپے مار کر گرفتار کیا گیا۔
پولیس کے مطابق گرفتار کیے جانے والوں میں احمد علی ،حیدر علی، فیصل ، پرویز، جاوید اور احسان شامل ہیں۔
پولیس کا بتانا ہے کہ ماڈل ٹاؤن کچہری واقعے میں قتل اور ڈکیتی کے ملزم سمیت 10 دیگر ملزمان فرار ہوئے تھے جبکہ دیگر قیدیوں کی گرفتاری کیلئے چھاپے مارے جارہے ہیں جنہیں جلد گرفتار کرلیا جائے گا۔

مفتی تقی عثمانی نے کہا ہے کہ سیالکوٹ واقعے نے پوری قوم کو ہلا کر رکھ دیا، ملوث عناصر کو قرار واقعی سزا دی جائے، متاثرہ فیملی کو معاوضہ ادا کیا جائے۔
اسلام آباد میں علما کا وفد سری لنکن ہائی کمیشن پہنچا، جہاں انہوں نے سیالکوٹ واقعے کی مذمت اور سری لنکن عوام سے یکجہتی کا اظہار کیا۔ مفتی تقی عثمانی نے دیگر علماء کرام کے ہمراہ میڈیا سے گفتگو کرتے ہوئے کہا کہ سری لنکن عوام کے غم میں برابر کے شریک ہیں، سری لنکا ہمارا برادر ملک ہے، ملزمان کو سخت سے سخت سزا دلائیں گے۔

گھوٹکی میں موٹروے 5 کی حفاظتی چوکی پر ڈاکوؤں کے حملے سے پولیس اہلکار جاں بحق ہوگیا۔
پولیس کے مطابق گھوٹکی میں موٹر وے 5 کی حفاظتی چوکی پر ڈاکوؤں نے حملہ کیا اور اندھا دھند فائرنگ کردی جس کے نتیجے میں چوکی پر تعینات پولیس اہلکار جاں بحق ہوگیا، چوکی پر موجود دیگر اہلکاروں کی جوابی فائرنگ سے ڈاکو فرار ہوگئے، جاں بحق پولیس اہلکار کی 11نومبر کو شادی ہوئی تھی جس نے شادی کے بعد حال ہی میں ڈیوٹی جوائن کی تھی۔

سانحہ سیالکوٹ، پولیس کی کوئی کوتاہی نہیں، آئی جی پنجاب

پنجاب حکومت کے ترجمان حسان خاور کا کہنا ہےکہ سیالکوٹ واقعے میں ملوث تمام مرکزی ملزمان گرفتار ہیں اور ان کی شناخت بھی ہوچکی ہے جب کہ آئی جی پنجاب نے پولیس کی کوتاہی کا امکان خارج کردیا۔
آئی جی پنجاب کے ہمراہ پریس کانفرنس کرتے ہوئے ترجمان پنجاب حکومت نے بتایا کہ سیالکوٹ واقعے میں ملوث 118گرفتار ملزمان میں 13مرکزی ملزم شامل ہیں، ان تمام مرکزی ملزمان کی شناخت ہوچکی ہے، واقعے سے متعلق 160کیمروں کی فوٹیج لی گئی ہے اور گرفتاریوں کے لیے 10ٹییمیں بنائی گئی ہیں جب کہ واقعے کے مقدمے میں دہشتگردی کی دفعات شامل ہیں، آر پی او اور ڈی پی او 24 گھنٹے چھاپوں کی نگرانی کررہے ہیں۔
آئی جی پنجاب نے کہا کہ واقعے کی اطلاع ملنے پر مقامی پولیس نے فوری طورپر حکام کوآگاہ کیا، ڈی پی او اور ایس اپی پیدل چل کر وہاں پہنچے، واقعے کے بعد راستے بلاک تھے اس میں پولیس کی کوتاہی ثابت نہیں ہوئی، اگر واقعے میں پولیس کی کوئی کوتاہی ہوئی تو اس کا جائزہ لیں گے۔
انہوں نے کہا کہ واقعے میں سارے ملزم تو قاتل نہیں ہر ملزم کا کردار طےکیا جائےگا اور تفتیش میں طے کریں گے کس ملزم کا کیا رول تھا، ابھی تک جتنی تحقیقات ہوئیں سب بتائی جاچکیں، اب تک جو کچھ کیا ہے اس کی تفصیلات شیئر کررہے ہیں، 160فوٹیجز کی روشنی میں گرفتاریاں کی جائیں گی۔

سانحہ سیالکوٹ کی ابتدائی رپورٹ وزیراعظم عمران خان اور وزیراعلیٰ پنجاب عثمان بزدار کو ارسال کر دی گئی،،
رپورٹ میں بتایا گیا کہ چند غیر ملکیوں کمپنیوں کے وفد نے فیکٹری کا دورہ کرنا تھا، مینجر نے ورکرز کو کہا سب مشینیں صاف ہونی چاہیے، مینجر نے مشین پر لگے سٹکیرز ہٹانے کا کہا، مبینہ طور پر جب فیکٹری ملازمین نے سٹکر نہیں ہٹایا تو منیجر نے خود ہٹا دیا، بادی النظر میں ورکرز نے سٹیکرز کا بہانہ بنا کر تشدد کیا، سٹیکرز پر مذہبی تحریر درج تھی، واقعہ کے وقت فیکٹری مالکان غائب ہوگئے۔
ابتدائی رپورٹ میں بتایا گیا کہ مرکزی ملزمان سمیت اب تک 112ملزمان گرفتار کئے جا چکے ہیں، سیالکوٹ میں ایسے افراد جنہوں نے اشتعال دلایا، ان کو بھی گرفتار کر لیا، پولیس نے مرکزی ملزمان کی گرفتاری کر کے مزید تحقیقات شروع کر دیں۔ مار پیٹ کا واقعہ صبح گیارہ بجے شروع ہوا، گیارہ بج کر 25منٹ پر 3اہلکار موقع پر پہنچے، واقعے سے کچھ دیر قبل ورکرز کو ڈسپلن توڑنے پر فارغ کیا گیا، مینجر کے سخت ڈسپلن اور کام لینے پر ورکرز پہلے سے غصے میں تھے۔

عمارتیں بلند کرنے سے صلاحیتیں بلند نہیں ہوتیں، شیخ رشید

شیخ رشید کہتے ہیں جتنے مظاہرے ڈی چوک میں ایک ماہ میں ہوتے ہیں، ہائیڈ پارک میں ایک سال میں نہیں ہوئے، اسلام آباد پولیس پر امن و امان قائم رکھنے کی زیادہ ذمہ داری ہے۔
وفاقی وزیر داخلہ شیخ رشید نے پولیس لائن اسلام آباد میں تقریب کے بعد میڈیا سے گفتگو کرتے ہوئے کہا کہ ہماری کوشش ہے اسلام آباد پولیس کی تعداد میں اضافہ کیا جائے، اسلام آباد پولیس کی ذمہ داری بڑھتی جا رہی ہے، معاشرہ ذمہ داریوں کا احساس کرے، پولیس پر بلا جواز تنقید نہ کی جائے، عمارتیں بلند کرنے سے صلاحیتیں بلند نہیں ہوتیں۔

اسلام آباد(سٹاف رپورٹر) نورمقدم قتل کیس میں ملزم ظاہرجعفرکے وکیل نے ملزم کو ذہنی مریض قرار دینے کی درخواست دائرکردی ہے۔اسلام آباد کی ڈسٹرکٹ سیشن کورٹ میں نورمقدم قتل کیس کی سماعت ہوئی۔ ایڈیشنل سیشن جج عطا ربانی نے کیس کی سماعت کی۔ نورمقدم کیس کے مرکزی ملزم ظاہرجعفرکے وکیل نے ملزم کے ذہنی مریض ہونے کی درخواست دائرکردی۔ ظاہرجعفرکے وکیل نے عدالت سے میڈیکل بورڈ تشکیل دے کرچیک اپ کی بھی استدعا کی۔اسلام آباد کی رہائشی نور مقدم کو رواں سال 20 جولائی کو قتل کر دیا گیا تھا۔

اسلام آباد(ویب ڈیسک) سپریم کورٹ نے ڈی جی ایف آئی اے، چیئرمین پیمرا اورآئی جی اسلام آباد سے صحافیوں کے مقدمات سے متعلق تفصیلی رپورٹ طلب کرلی۔

سپریم کورٹ کے 3 رکنی بینچ نے صحافیوں کو ہراساں کیے جانے سے متعلق ازخود نوٹس کیس کی سماعت کی، سپریم کورٹ نے ڈی جی ایف آئی اے،چئیرمین پیمرا اور آئی جی اسلام آباد سے صحافیوں کے مقدمات سے متعلق تفصیلی رپورٹ طلب کر لی۔ سپریم کورٹ نے چیئرمین پیمرا سے چینلز کیخلاف کارروائی کے اختیار سے متعلق جواب طلب کرلیا۔ عدالت نے ڈی جی ایف آئی اے، چئیرمین پیمرا اور آئی جی اسلام آباد کو آئندہ سماعت پر ذاتی حثیت میں پیش ہونے کا حکم دیتے ہوئے سماعت غیر معینہ مدت کے لیےملتوی کردی۔

دوران سماعت ڈی جی ایف آئی اے نے عدالت کو بتایا کہ چار سال میں صحافیوں کیخلاف 27 شکایات ملیں،27 میں سے صرف چار شکایات انکوائری میں تبدیل ہوئیں اورمقدمات درج ہوئے۔
جسٹس اعجاز الاحسن نے ریمارکس دیئے کہ ایف آئی اے الیکٹرانک کرائمزایکٹ کا اطلاق پہلے کرتا ہے سوچتا بعد میں ہے، ایف آئی اے سمیت کسی ادارے کو اختیارات کا ناجائز استعمال نہیں کرنے دیں گے، گائیڈ لائنزجاری کریں گے جس پرحکومت اورتمام ادارے عمل کریں گے۔ جائزہ لیں گے کہ الیکٹرانک کرائم ایکٹ کے تحت کارروائی آرٹیکل 19 سے متصادم تونہیں۔

جسٹس منیب اخترنے ریمارکس دیئے کہ آزادی صحافت کوریگولیٹ آئین کا آرٹیکل 19 کرتا ہے پیکا نہیں، میں یوٹیوب چینل بنا کر کردار کشی شروع کر دوں تو کیا یہ صحافت ہوگی؟ بنیادی حقوق کی خلاف ورزی ہوئی تو ذمہ دار ڈی جی ایف آئی اے ہوں گے۔

جسٹس قاضی امین نے ریمارکس دیئے کہ کیا صحافی کو گولی مارنے والے ملزم پکڑے گئے؟ صحافت کی آڑ میں کسی کے ذاتی فعل کوتحفظ نہیں دیں گے، کسی کو صحافیوں سے مسئلہ ہے تو قانونی راستہ اپنائے، صحافیوں کو گولیاں مارنا یا تشدد کرنا لاقانونیت ہے، آئی جی اسلام آباد یقینی بنائیں کہ صحافیوں پرحملے کرنے والے گرفتارہوں، فاضل جج کے استفسارپرآئی جی اسلام آباد نے کہا کہ نادرا کو ویڈیوز بھجوائیں لیکن ملزمان کی شناخت نہیں ہوسکی۔ جس پر جسٹس قاضی امین نے ریمارکس دیئے کہ ملزمان کا گرفتار نہ ہونا آپ کی ناکامی ہے، مینار پاکستان واقعے کے ملزم پکڑے جا سکتے تو صحافیوں کے کیوں نہیں۔