Category جرائم

لودھراں(کرائم رپورٹر/میڈیا 92نیوز)صوبہ پنجاب کے شہر لودھراں میں لاپتہ ہونے والی بچی عاصمہ کی لاش 6 دن بعد مل گئی، جس کی ابتدائی پوسٹ مارٹم رپورٹ میں بچی سے بدفعلی کے شواہد ملے ہیں۔

لودھراں کے علاقے دنیا پور کی رہائشی 6 سالہ عاصمہ 19 فروری کی شام لاپتہ ہوئی تھی، جس کی لاش جمعہ (23 فروری) کو گھر کے قریب گندے پانی کے جوہڑ سے ملی۔

پولیس نے بچی کی لاش کو پوسٹ مارٹم کے لیے ڈسٹرکٹ اسپتال منتقل کیا، جہاں بچی کا پوسٹ مارٹم مکمل کرلیا گیا۔

اسپتال کے میڈیکل سپرنٹنڈنٹ (ایم ایس) ڈاکٹر وسیم اقبال کے مطابق بچی کی موت 48 گھنٹے قبل ہوئی۔

دوسری جانب ڈسٹرکٹ پولیس آفیسر (ڈی پی او) امیر تیمور کا کہنا ہے کہ پوسٹ مارٹم کی ابتدائی رپورٹ میں بچی سے بدفعلی کے شواہد ملے ہیں، تاہم اس کی حتمی تصدیق فرانزک رپورٹ کے بعد ہی ہوسکے گی۔

ڈی پی او کا مزید کہنا تھا کہ بچی کے قتل کے شبہ میں کچھ افراد کو حراست میں لےکر تفتیش شروع کردی گئی ہے تاہم ملزمان کی گرفتاری کے لیے کوئی ٹائم فریم نہیں دے سکتے۔

واضح رہے کہ ڈی این اے ٹیسٹ کے لیے نمونے آج صبح فرانزک لیب بھجوا دیئے گئے ہیں، جس کی رپورٹ آئندہ 2 سے 3 روز میں موصول ہوگی۔

بچی کو گذشتہ روز مقامی قبرستان میں سپردخاک کردیا گیا۔

یہ واقعہ ایک ایسے وقت میں پیش آیا ہے، جب گذشتہ ماہ پنجاب کے ضلع قصور سے 7 سالہ زینب کی لاش برآمد ہوئی تھی، جسے زیادتی کے بعد قتل کیا گیا تھا۔

زینب کے قتل کے مجرم عمران کو 4 بار سزائے موت، عمر قید اور جرمانے کی سزا سنائی گئی ہے۔

کراچی(کرائم رپورٹر/میڈیا 92نیوز) وزیر داخلہ سندھ نے شارع فیصل پر شہری کی کھلے عام ہوائی فائرنگ کا نوٹس لیتے ہوئے ملزم کی فوری گرفتاری کا حکم دے دیا۔

کراچی کے رہائشی نوجوان نے شہر کی اہم ترین سڑک شارع فیصل پر رات کے اوقات میں کھلے عام فائرنگ کی جس کی ویڈیو سوشل میڈیا پر اپ لوڈ کردی۔

نوجوان نے ہوائی فائرنگ کرتے ہوئے قانون نافذ کرنے والے اداروں کو چیلنج کیا اور اس دوران اپنا نام ’عدنان پاشا‘ بتایا۔

ذرائع کے مطابق فائرنگ کرنے والا نوجوان رینٹ اے کار کا کام کرتا ہے۔

نوجوان کی ویڈیو میڈیا پر آنے کے بعد وزیر داخلہ سندھ نے اس کا نوٹس لیتے ہوئے ایس ایس پی ایسٹ کو فوری کارروائی کا حکم دیا ہے۔

وزیر داخلہ سندھ نے حکم دیا کہ ملزم کو فوری گرفتار کرکے اس کے خلاف تحقیقات کی رپورٹ بھی ارسال کی جائے۔

دوسری جانب آئی جی سندھ اے ڈی خواجہ نے بھی واقعے کا نوٹس لیتے ہوئے متعلقہ پولیس افسران کو شہری کے خلاف فوری کارروائی کا حکم دیا ہے۔

کراچی (کرائم رپورٹر/کورٹ رپورٹر/میڈیا 92نیوز)انتظار قتل کیس کی کراچی کی مقامی عدالت میں سماعت، تفتیشی افسر نے چالان پیش کرنے کے لیے مزید مہلت طلب کرلی، عدالت نے تفتیشی افسر کو چالان جمع کرانے کے لیے کل تک مہلت دے دی۔

کراچی میں جوڈیشل مجسٹریٹ جنوبی کی عدالت میں انتظار قتل کیس کی سماعت کے دوران تفتیشی افسر نے عدالت کو بتایا کہ نئی جے آئی ٹی تشکیل دے دی گئی ہے جو تحقیقات کررہی ہے۔جے آئی ٹی رپورٹ سامنے آنے تک چالان جمع کرانے کی مہلت دی جائے۔

تفتیشی افسرکی جانب سےچالان پیش کرنے کے لیے مہلت طلب کرنے پرعدالت نے سماعت کل تک ملتوی کردی۔

واضح رہے کہ انتظار قتل کیس میں اے سی ایل سی کے 8 اہلکار گرفتار اور ایک ضمانت پرہے۔ملزمان کے خلاف مقدمہ تھانہ درخشاں میں درج ہے۔

کراچی (کرائم رپورٹر/میڈیا 92نیوز)کراچی کے علاقے گلشن حدید میں خاندانی دشمنی پر دو افراد کو فائرنگ کرکے قتل کردیا گیا۔

کراچی کے علاقے گلشن حدید میں موٹرسائیکل پر سوار دو نامعلوم مسلح ملزمان نے ایک دکان پر فائرنگ کی جس کے نتیجے میں وہاں موجود دو افراد موقع پر ہی جاں بحق ہوگئے۔

ایس ایس پی ملیر عدیل چانڈیو کے مطابق واقعہ بن قاسم تھانے کی حدود نصیرآباد میں پیش آیا جہاں نقاب پوش دو ملزمان نے دکان پر موجود دو افراد کو ٹارگٹ کرکے ان پر فائرنگ کی۔

ایس ایس پی کا کہنا ہے کہ جاں بحق ہونے والے افراد کی شناخت 40 سالہ نواب اور 35 سالہ عمر کے نام سے ہوئی ہے،واقعہ ذاتی دشمنی کا شاخسانہ لگتا ہے جب کہ ملزمان نے دکان پر کوئی رہزنی یا ڈکیتی کی واردات نہیں کی۔

واقعے کے بعد پولیس کی بھاری نفری جائے وقوعہ پر پہنچ گئی اور لاشوں کو ضابطے کی کارروائی کے لئے اسپتال منتقل کرکے تفتیش شروع کردی ہے۔

لاہور (کرائم رپورٹر/کورٹ رپورٹر/میڈیا 92نیوز)لاہور ہائیکورٹ نے زنیب قتل کیس کے مجرم کو سر ِعام پھانسی دینے کیلئے دائر درخواست کو قبل از وقت قرار دیتےہوئے نمٹا دیا، اور واضح کیا کہ مجرم کے پاس اپیل کیلئے ابھی فورم موجود ہیں۔

لاہور ہائیکورٹ کےجسٹس صداقت علی خان کی سربراہی میں2 رکنی بنچ نےاشتیاق چوہدری ایڈوکیٹ کی درخواست پر سماعت کی، درخواست گزار کا موقف تھا کہ مجرم عمران کسی رعایت کا مستحق نہیں، اس لیے اسے اسی مقام پر سرعام پھانسی دی جائے، جہاں سے زنیب کی لاش ملی تھی۔

سر عام پھانسی کیلئے قانون میں ترمیم کی ضرورت نہیں، عدالت نے درخواست نمٹاتے ہوئے قرار دیا کہ مجرم عمران کے پاس سزا کےخلاف اپیل کیلئے فورم موجود ہیں، جب تک مجرم کی تمام اپیلیں مسترد نہیں ہوجاتیں تب تک پھانسی کے حکم پر عمل درآمد نہیں ہوسکتا۔

اسلام آباد(/کورٹ رپورٹر/میڈیا 92نیوز)سپریم کور ٹ نے مردان میں قتل ہونے والی اسماء کے قتل سے متعلق ازخود نوٹس کیس نمٹا دیا۔

مردان کی کم سن اسماء قتل کیس کی سپریم کورٹ میں سماعت چیف جسٹس پاکستان کی سربراہی میں 3 رکنی بنچ نے کی۔

چیف جسٹس نے استفسار کیا ، کیاملزم گرفتار ہوا ہے؟ چالان کب تک فائل کر رہے ہیں، ڈپٹی ایڈوکیٹ جنرل کے پی نے عدالت کو بتایاکہ
ملزم کا نام غلام نبی ہے اسے گرفتار کر لیا گیا ہے اور وہ جوڈیشل حراست میں ہے۔

عدالت نے 10 روز میں ملزم کا چالان جمع کروانے کا حکم دیتے ہوئے کیس نمٹا دیا۔

لاہور (کرائم رپورٹر/کورٹ رپورٹر/میڈیا 92نیوز)سکیورٹی کے دعوے دھرے کے دھرے۔ ایوان عدل میں فائرنگ کا ایک اور واقعہ دو وکیل جاں بحق، وزیر اعلی پنجاب کا نوٹس رپورٹ طلب کرلی۔ چیف جسٹس لاہو ہائیکورٹ نےعدالتوں کی سکیورٹی کے حوالے سے اجلاس طلب کر لیا۔ صرف بیس روز بعد احاطہ عدالت پھر لہولہان۔ ایڈیشنل سیشن جج شیخ تاثیر الرحمان کی عدالت کے باہر فائرنگ۔ 2 وکیل گولیوں سے چھلنی۔ پلاٹ کے تنازع پر ایسی رنجش کہ وکیل نے اپنے ہی پھوپھی زاد بھائی وکیل کو گولیاں مار دیں۔ زد میں ایک ساتھی وکیل بھی آگیا۔ رانا ندیم ایڈووکیٹ موقع پر ہی جاں بحق۔ ملک اویس ایڈووکیٹ ہسپتال میں چل بسے۔ فائرنگ سے سیشن کورٹ میں بھگدڑ۔ خوف وہراس پھیل گیا۔ فوری طور پر عدالت کے خارجی و داخلی راستوں کو بند کر دیا گیا اور پولیس کی بھاری نفری پہنچ گئی۔ تمام عدالتوں میں کیسز کی سماعت روک دی گئی۔ پولیس نے فائرنگ کرنے والے ملزم کاشف راجپوت ایڈووکیٹ کو دبوچ لیا۔ اسلحہ بھی برآمد کر لیا۔ پولیس کے مطابق عدالت میں سماعت کے دوران فریقین کے وکلا میں تلخ جملوں کا تبادلہ ہوا۔ عدالت کے باہر نکلتے ہی ملزم نے فائرنگ کردی۔ ادھر وزیراعلی پنجاب نے واقعہ کا نوٹس لیتے ہوئے رپورٹ طلب کر لی ہے۔ چیف جسٹس ہائی کورٹ سیشن جج اور آئی جی پنجاب کا بھی نوٹس عدالتوں کی سکیورٹی کے حوالے سے اجلاس بھی طلب۔ اکتیس جنوری کو سیشن کورٹ میں فائرنگ کے نتیجہ میں ہی قتل کا ملزم اور ایک کانسٹیبل چل بسے تھے۔ جس کے بعد عدالتوں کی سکیورٹی بڑھانے کے دعوے کئے گئے تھے لیکن فائرنگ کے ایک اور واقعہ نے ان دعووں کی قلعی کھول دی ہے۔

لاہور(کورٹ رپورٹر/ایمرا نیوز) قصور میں 8 سالہ بچی زینب کو اغوا اور زیادتی کا نشانہ بنانے کے بعد قتل کرنے والے درندہ صفت انسان عمران علی نے اپنی سزا کے خلاف ہائی کورٹ میں اپیل دائر کردی ہے۔

ایمرا نیوزکے مطابق عمران کی جانب سے کوٹ لکھپت جیل کی انتظامیہ نے لاہور ہائی کورٹ میں انسداد دہشتگردی عدالت کی جانب سے سنائے گئے فیصلے کے خلاف اپیل دائر کی ہے۔

مجرم عمران نے اپنی اپیل میں اپنے آپ کو بے گناہ ظاہر کرتے ہوئے موقف اختیار کیا ہے کہ اس کے خلاف ٹرائل کے دوران قانونی تقاضے پورے نہیں کئے گئے، انسداد دہشت گردی کی عدالت نے فیصلہ بڑی جلدی میں دیا، لہٰذا انسداد دہشت گردی عدالت کا فیصلہ کالعدم قرار دیا جائے۔

واضح رہے کہ انسداد دہشتگردی عدالت نے مجرم عمران کو زینب قتل کیس میں 4 مرتبہ سزائے موت کے علاوہ عمر قید اور جرمانے کی سزا بھی سنائی تھی۔

کراچی(کرائم رپورٹر/ایمرا نیوز) کراچی کے نوجوان کرکٹر محمد زریاب نے ٹیم سے ڈراپ ہونے پر دلبرداشتہ ہوکر خودکشی کرلی۔

ایکسپریس نیوز کے مطابق سابق ون ڈے کھلاڑی عامر حنیف کے بیٹے محمد زریاب نے ٹیم سے ڈراپ ہونے پر دلبرداشتہ ہوکر خودکشی کرلی، محمد زریاب انڈر 19 ٹیم میں کھیل چکا تھا تاہم محمد زریاب نے کوچز کے غیر مناسب رویے کے باعث گزشتہ رات گلے میں پھندا ڈال کر خودکشی کرلی۔

17 سالہ محمد زریاب سابق کرکٹر عامر حنیف کا بیٹا اور فرسٹ ایئر کا طالب علم تھا۔ کرکٹر عامر حنیف کا کہنا ہے کہ میرے بیٹے کو خود کشی پر مجبور کیا گیا، کوچز کے رویے سے میرے بیٹے کی جان گئی۔

لاہور (کرائم رپورٹر/ایمرا نیوز)راہگیروں نے نیم بیہوشی کی حالت میں اسے ہسپتال منتقل کر دیا۔ بتایا گیا ہے کہ بند روڈ پر 35سالہ نامعلوم پردیسی کونوسر بازوں نے مبینہ طور پر زہریلی چیز کھلا کرنقدی اور موبائل سمیت دیگر اشیاسے محروم کر دیا اور نیم مردہ حالت میں چھوڑ کر فرار ہوگئے ۔ تاہم راہگیروں نے متعلقہ شہری کو نیم بیہوشی کی حالت میں ہسپتال منتقل کیا ۔