Tag نواز شریف

لاہور(ویب ڈیسک) پاکستان مسلم لیگ ن لاہور کے صدر اور ممبر قومی اسمبلی پرویز ملک انتقال کر گئے۔ذرائع کے مطابق پرویز ملک گزشتہ کچھ عرصے سے علیل تھے. انہیں دل کی تکلیف کے باعث اچانک اسپتال منتقل کیا گیا تاہم وہ جانبر نہ ہو سکے۔پارٹی ذرائع کے مطابق پرویز ملک مسلم لیگ کے قائد نواز شریف اور پارٹی صدر شہباز شریف کے بہت قریب تھے اور پارٹی میں ان کی تجاویز کو بھی بہت زیادہ اہمیت دی جاتی تھی۔ پرویز ملک این اے 133 لاہور سے مسلم لیگ ن کے رکن قومی اسمبلی تھے جبکہ پرویز ملک کے بیٹے علی پرویز ملک اور ان کی اہلیہ شائستہ پرویز ملک بھی رکن قومی اسمبلی ہیں۔

لاہور(ویب ڈیسک) مسلم لیگ (ن) کے صدر شہباز شریف زخمی ہو گئے .تفصیلات کے مطابق شہبازشریف اپنے گھر کی سیڑھیوں سے پھسل کر زخمی ہوئے ہیں۔سیڑھیوں سے پھسلنے کی وجہ سے وہ ایک بارپھر کمر کی شدید تکلیف میں مبتلا ہوگئے ہیں۔ان کےخاندانی ذرائع کےمطابق شہباز شریف کے طبی معالجین نے معائنہ کیا اور ایکسرے لئے ہیں جس کے بعد ڈاکٹروں نے میڈیکل رپورٹس کی روشنی میں انہیں 2 ہفتے مکمل آرام کا مشورہ دیا ہے ، جس پر انہوں نے تمام سیاسی سرگرمیاں معطل کر دی ہیں۔

سابق گورنر سندھ اور مسلم لیگ ن کے قائد نواز شریف اور مریم نواز کے ترجمان محمد زبیر کی مبینہ ویڈیو کے حوالے سے نائب صدر مسلم لیگ ن کا بیان بھی سامنے آ گیا ہے۔نائب صدر مسلم لیگ ن مریم نواز نے اپنے ایک بیان میں کہا کہ محمد زبیر کو کافی دیر سے دھمکیاں مل رہیں تھیں، مبینہ ویڈیو کی حقیقت کیا ہے، یہ محمد زبیر اور اللہ کا معاملہ ہے لیکن محمد زبیر میرے ترجمان رہیں گے۔
سابق وزیراعظم کی وطن واپسی کے حوالے سے بات کرتے ہوئے مریم نواز نے کہا کہ چاہتی ہوں نواز شریف کی واپسی دسمبر سے پہلے ہو۔چیئرمین نیب کی مدت ملازمت میں توسیع کے حوالے سے مریم نواز کا کہنا تھا کہ چئیرمین نیب کی توسیع کے بارےمیں آئین کچھ نہیں کہتا، چیئرمین نیب کی توسیع کے فیصلے پر پارٹی بہتر بتا سکتی ہے۔ایک سوال کے جواب میں مریم نواز کا کہنا تھا کہ جنید صفدر نے ابھی سیاست میں آنے کا کوئی فیصلہ نہیں کیا ہے۔

وسی بابا کےقلم سے…..

پاکستان مسلم لیگ (ن) آج کل روزانہ کی بنیاد پر پارٹی اجلاس منعقد کر رہی ہے۔ پنجاب کے مختلف ڈویژن کے منتخب نمائندوں اور ٹکٹ ہولڈرز سے ان کی رائے لی جا رہی ہے۔ نوازشریف اجلاس میں موجود ہوتے ہیں اور نہایت صبر کے ساتھ اپنے ساتھیوں کی بات سنتے ہیں۔ یہ ساتھی انہیں یہ بتاتے ہیں کہ میاں صاحب آجاؤ، اب دل نہیں لگ رہا، یا پھر دوسری رائے دی جاتی ہے کہ نہ آنا، زمانہ خراب ہے۔

نوازشریف کا اسٹائل یہ ہے کہ وہ فیصلہ خود کرتے ہیں لیکن اس کے اعلان کے لیے ماحول ایسا بناتے ہیں کہ ہر بندہ سمجھتا ہے کہ یہ اصل میں اس کے کہنے پر ہوا ہے۔

میڈیا میں ان اجلاسوں کے حوالے سے جو خبریں آرہی ہیں وہ اس قسم کی ہیں کہ مفاہمت گروپ کی پٹواری فاختائیں انقلابی کلنگی مرغوں سے جا ٹکرائی ہیں اور میاں صاحب بیچ بچاؤ کروانے میں مصروف ہیں۔ سویر شام ہمیں بتایا جاتا ہے کہ اب مفاہمتی گروپ جیت گیا اور ووٹ کو عزت دو والے اس ووٹ کی ہلکی پھلکی ’بزتی‘ ہوتے رہنے پر بھی راضی ہوگئے ہیں۔

اگر اس کے علاوہ آپ کو مسلم لیگ (ن) کے اجلاسوں کی کچھ سمجھ آرہی ہے تو بتائیں؟

یہاں اہم بات یہ ہے کہ یہ جماعت دنیا بھر کی ٹیکنالوجی استعمال کرتے ہوئے ایک کام بہت جی جان سے کرتی ہے۔ اس ٹیکنالوجی کو بہت سیریس نہیں لینا بس اتنا سمجھنا ہے کہ اس کام پر یہ پیسے لگاتے نہیں گھبراتے اور وہ کام ہے الیکشن لڑنا۔ دنیا کی اچھی سروے فرم ہائر کی جاتی ہیں، ایک ایک حلقے کا جائزہ لیا جاتا ہے اور اس حلقے میں جو جیت سکتا ہو اسے گھیر گھار کر پارٹی میں لایا جاتا ہے۔ بہرحال اس پر پھر کبھی تفصیل سے بات ہوگی۔

ہاں، تو بات ہورہی تھی انتخابات میں حصہ لینے کی، تو اس حوالے سے توجہ طلب معاملہ یہ ہے کہ چونکہ اس جماعت کا مرکز پنجاب میں ہے، اس لیے ہر ایک سیٹ اس کے لیے اہم ہوتی ہے۔ ایسی صورت میں جنوبی پنجاب کا کردار انتہائی اہم تصور کیا جاتا ہے جہاں 94 صوبائی سیٹیں ہیں۔

اگر 2018ء کے انتخابات کا ذکر کریں تو مسلم لیگ (ن) نے ان 94 سیٹوں میں سے صرف 32 پر کامیابی حاصل کی تھی، اور سچ پوچھیے تو یہی وہ کارکردگی تھی جس کی وجہ سے صوبائی حکومت اس جماعت کے ہاتھ سے نکل گئی۔

اب جب حکومت ہی نہیں رہی تو بھلا اس پارٹی میں رہ کر لوگوں کو کیا فائدہ ہونا تھا، لہٰذا ان 32 میں سے بھی کچھ لوگ حکومت کی طرف لڑھک گئے۔ پنجاب کی حکومت جب بھی لینی ہو تو ان 94 سیٹوں کا کچھ کرنا ہوگا اور وہی کچھ کرنے کو اجلاس ہو رہے ہیں۔

سمجھنے کی بات یہ ہے کہ آخر ایسا کیا ہوگیا کہ اچانک یہ سوچنا اور سمجھنا شروع کردیا گیا ہے کہ الیکشن قریب ہیں؟

تو آئیے اس معاملے کو سمجھنے کی کوشش کرتے ہیں۔

معاملہ یہ ہے کہ شوکت ترین نے وزیرِ خزانہ کا حلف 17 اپریل کو اٹھایا تھا۔ یہ پاکستان تحریک انصاف (پی ٹی آئی) کے چوتھے وزیرِ خزانہ تھے، جو پارلیمنٹ کے رکن نہیں ہیں۔ قانون کہتا ہے کہ ایسی صورت میں یا تو وزیر کو 6 ماہ میں عہدے سے ہٹا دیا جائے، اور اگر انہیں برقرار رکھنا ہے تو پھر 6 ماہ کے اندر اندر سینیٹ یا قومی اسمبلی کا ممبر بنوا لیا جائے، اور یہاں یہ بات یاد رہے کہ شوکت ترین کے 6 ماہ اکتوبر میں پورے ہورہے ہیں۔ لہٰذا اب یہ امکان بڑھ چکے ہیں کہ شوکت ترین اپنا عہدہ چھوڑ دیں گے کیونکہ انتخابات کروانے کا وقت تقریباً گزر ہی گیا ہے۔

ایسی صورت میں اب ہمیں پانچویں وزیرِ خزانہ سے دل اور امید دونوں لگانے ہوں گے۔ پچھلے سال دسمبر میں ہم نے سعودی عرب کو 2 ارب ڈالر چین سے لے کر واپس کیے تھے۔ اب ہمیں چین سے یا تو پھر ترلا کرنا ہے کہ بس ایک سال اور، یا پھر یہ رقم واپس کرنی ہوگی۔ ہمارے ایک ارب ڈالر کے یورو بانڈ کی ادائیگی کا وقت بھی آ رہا ہے۔ منافع سمیت یہ ادائیگی بھی کرنی ہے۔ اس کے لیے ہم یا تو کسی سے پھر پیسے مانگیں گے یا نئے اور پہلے سے زیادہ مہنگے بانڈ جاری کریں گے۔

کچھ دن پہلے سینیٹ کی پلاننگ ڈیولپمنٹ کمیٹی کے اجلاس کی رپورٹ شائع ہوئی ہے۔ کمیٹی کے چیئرمین سلیم مانڈوی والا نے بتایا کہ کیسے چینی سفیر سی پیک سے متعلق پریشان نظر آئے۔ تاہم سی پیک کے حوالے سے وزیرِاعظم کے مشیر اس بات کی تردید کرتے پائے گئے۔ اس کے فوری بعد خبریں آئیں کہ چینی کمپنیوں کو ایک ارب ڈالر سے زیادہ منافع ادا کیا جانا ہے جو جزوی طور پر ادا کردیا جائے گا۔ اس کا مطلب ہے کہ چینی کمپنیوں کو یہ پیسے دیے جائیں گے تو چین سے لیا ادھار بھی ری شیڈول ہوجائے گا۔

ایف اے ٹی ایف کا اجلاس بھی سر پر آیا کھڑا ہے۔ آئی ایم ایف کا جائزہ اجلاس بھی ہونا ہے۔ نیوزی لینڈ اور انگلینڈ کی کرکٹ ٹیموں کا دورہ ملتوی ہوگیا ہے اور یہ کارنامہ فائیو (Five Eyes) آئیز کی انٹیلیجنس شیئرنگ پر ہوا ہے۔ ہمیں یہ سمجھنا ہوگا کہ دنیا ہمیں ابھی دہشت گردی کے مسئلے سے الگ کرکے نہیں دیکھنا یا دکھانا چاہتی۔

امریکا افغانستان سے چلا گیا ہے۔ جو بائیڈن کی جتنی ہونی تھی ہوچکی۔ اب طالبان کی ہونی شروع ہوگی اور ہو رہی ہے۔ تنخواہوں کا مسئلہ ہے، لوگوں کو روٹی کھلانی ہے، وہ اب تک جن سے لڑ رہے تھے ان سے ہی سویر شام اپیل کر رہے ہیں کہ ہمیں امداد دو۔ زکوٰۃ، خیرات، صدقات سب چلے گا۔ رہا پاکستان تو ہم دنیا کی چھٹی بڑی فوجی طاقت ہیں لیکن پیسوں سے البتہ ہمارا ہاتھ تنگ رہتا ہے تو افغانستان میں فتح کے بعد ہم امداد کے نام پر بس ہنس کر ہی دکھا سکتے ہیں۔

ہمارا سارا ریجن اوپر نیچے ہو رہا ہے۔ امریکا نے آسٹریلیا کو ایٹمی آبدوز بیچنے کا معاہدہ کرکے فرانس کو ناراض کرلیا ہے۔ یہ اتنی عام بات نہیں ہے۔ امریکی افغانستان کے علاوہ خلیج سے بھی رخصت باندھتے دکھائی دے رہے ہیں۔ امریکی اب اپنے تونائی کے ذرائع پر انحصار کر رہے ہیں۔ سعودی، اماراتی، قطری سب اب تیل بیچنے کے لیے مشرق کی طرف جاپان، چین اور انڈیا کو دیکھ رہے ہیں۔ جن راستوں سے یہ تیل جانا ہے، ان راستوں پر امریکیوں نے ایک اور اتحادی ڈھونڈ لیا ہے۔

یہ ساری تبدیلی اتنی تیزی سے ہو رہی ہے کہ کسی کو کچھ سمجھ نہیں آرہا۔ سعودی وزیرِ خارجہ افغانستان پر بات کرنے دہلی پہنچ جاتے ہیں، متحدہ عرب امارات چین اور امریکا میں توازن رکھنے کی کوشش کر رہا ہے اور ایران ایٹمی معاہدے پر کچھ نرم پڑتا دکھائی دے رہا ہے۔

اس ساری تبدیلی میں ہماری بہت اہمیت ہے۔ ہمارے پاس پیسے نہیں ہیں اس لیے جو پیسوں کا آسرا کرواتا ہے اس کے ساتھ ہم دو قدم چل لیتے ہیں۔ لیکن تیسرے قدم پر ہمیں جھجھک ہوتی ہے تو اگلے تپ جاتے ہیں اور پوچھتے ہیں کہ ہمارے ساتھ ہو یا خلاف؟ اس صورتحال میں کسی دن بھی حوالدار بشیر سر جی سے کہہ سکتا ہے کہ سر جی بس کریں تبدیلی کا اب مزہ نہیں آرہا چکر آ رہے ہیں، پھر سے شروع کرتے ہیں۔

تو بس نوازشریف اسی دن کا انتظار کر رہے ہیں جب انہیں تبدیلی کے ساتھ آزادی سے گھلنے کا موقع دے دیا جائے۔ پھر وہ آجائیں گے۔ یہ دن 2023ء میں بھی آیا تو بھی ان کا کوئی نقصان نہیں۔ حالات ایسے ہیں اور حکومت ایسی ہے کہ سب ہاتھ کھڑے کرسکتے ہیں اور بات نئے الیکشن کی طرف جاسکتی ہے۔ اسی کا اندازہ لگاتے ہوئے نواز شریف اب پارٹی کے لمبے لمبے اجلاس کر رہے ہیں۔
بشکریہ ڈان نیوز

لاہور(ویب ڈیسک )نواز شریف لندن میں موجود ہیں مگر لاہور میں ان کو کورونا ویکسین لگانے کا کیس سامنے آہا ہے جس کے بعس این سی او سی پر انگلی اٹھ گئی ہے.
اس حوالے سے کیس میں پیش رفت ہوئے ہے. نواز شریف کے نام پر کورونا ویکسین کے غلط اندراج کے حوالے سے کوٹ خواجہ سعید اسپتال کے ایم ایس ڈاکٹر احمد ندیم اور غفلت کے باعث سینئر میڈیکل آفیسر ڈاکٹر منیر کو معطل کر دیا گیا ہے علاوہ ازیں محکمہ اسپیشلائزڈ ہیلتھ کیئر نے بھی نوٹیفکیشن جاری کر دیے ہیں .
دوسری جانب چار رکنی تحقیقاتی ٹیم نے اس کیس کی رپورٹ وزیراعلی پنجاب کو پیش کر دی جس میں تہلکہ خیز انکشافات کئے گئے ہیں۔ رپورٹ میں بتایا گیا ہے کہ ہے چار ملازمین نے تسلیم کیا کہ انہوں نے نواز شریف کا کورونا ویکسینیشن کا ڈیٹا رجسٹرڈ کیا ہے۔
تحقیقاتی رپورٹ میں مزید کہا گیا کہ اسپتال انتظامیہ کی طرف سے سنٹر میں کوئی سینئر سٹاف تعینات نہیں لہذٰا ڈیٹا رجسٹرڈ کرنے کا ٹاسک وارڈ سرونٹ اور چوکیدار کو دیا تھا.

لاہور(ویب ڈیسک)پاکستان میں ایک حیران کن واقعہ پیش آیا ہے.کورونا کے بڑھتے مثبت کیسز کے باعث حکومت نے ویکسین لگانے پر زور دیا ہے.اس حوالے سے این سی او سی کی جانب سے سخت اقدامات اٹھائے گئے ہیں .کورونا ویکسین کے حوالے سےاین سی اوسی کے ریکارڈ سامنے آئے ہیں جن کے مطابق (ن) لیگ کے قائد نوازشریف کو 22 ستمبرکو ویکسین لگائی گئی ہے۔ذرائع کا کہنا ہے کہ لندن میں موجود نوازشریف کولاہورمیں کورونا ویکسین لگائی گئی ہے۔ تفصیلات کے مطابق میاں نوازشریف کے شناختی کارڈ پرکورونا ویکسین پاکستان میں موجود کوٹ خواجہ سعید اسپتال میں لگائی گئی۔ ریکارڈ کے مطابق میاں نوازشریف کوچینی ویکسین سائنو ویک کی ڈوز لگائی گئی ہے۔تاہم دوسری ڈوز ابھی لگنا باقی ہے۔اس مضحکہ خیز واقعے کے بعد کورونا ویکسین کی پہلی خوراک کے اعداد وشمارپرشکوک وشبہات پیدا ہوگئے۔

لندن (ویب ڈیسک)پاکستان مسلم لیگ ن کی نائب صدرمریم نواز کے صاحبزادے جنید صفدر کی پچھلی دنوں لندن میں نکاح کی تقریب ہوئی .شادی کے باقی تقریبات کے حوالے سے اہم انکشاف سامنے آیا ہے . تفصیالت کے مطابق جنید صفدر نے ایک بیان میں کہا ہے کہ ان کے ولیمے اوررخصتی کی تقریبات اسلام آباد اور لاہور میں منعقد کی جائیں گی.جنید صفدر کا اس حوالے سے مزید کہنا تھا کہ شادی کی باقی تقریبات کے لیے حتمی تاریخوں کا اعلان فی الحال نہیں کیا جا رہا مگر توقع ہے کہ یہ تقریبات دسمبر کے مہنے میں ہوں گی۔جنید صفدر نے ایک سوال کا جواب دیتے ہوئے بتایا کہ انہیں بالی وڈ فلمیں بہت پسند ہیں جنمیں بالخصوص فلم” زندگی نہ ملے گی دوبارہ” ہے علاوہ ازیں ان کا کہنا تھا کہ مجھےمعروف اداکار و ہدایت کار فرحان اختر کی فلمیں پسند ہیں۔

لاہور (ایمرا نیوز آن لائن) احتساب عدالت میں چوہدری شوگر ملز کیس کے دوران مریم نواز کی تاریخ پیدائش زیر بحث رہی۔ مسلم لیگ ن کی نائب صدر مریم نواز اور ان کے کزن یوسف عباس کے خلاف چوہدری شوگر ملز کیس کی سماعت احتساب عدالت کے جج امیر محمد خان کی سربراہی میں ہوئی۔دوران سماعت نیب حکام کی جانب سے مریم نواز اور یوسف عباس کے مزید 15 روزہ جسمانی ریمانڈ کی استدعا کی گئی۔نیب کی جانب سے تفتیشی افسر حافظ اسد اللہ نے دلائل دیتے ہوئے کہا کہ مریم نواز اور یوسف عباس سے چوہدری شوگر ملز کیس میں مزید تفتش درکار ہے۔

نیب پراسیکیوٹر نے بتایا کہ دوران تفتیش مریم صفدر اور یوسف عباس کے خاندان کی جائیداد کی تقسیم کے معاہدے کا انکشاف ہوا ہے، چوہدری شوگر ملز کے 1 کروڑ 45 لاکھ 58 ہزار 96 شیئرز تقسیم ہوئے۔نیب حکام نے بتایا کہ شیئرز نواز شریف، شہباز شریف، عباس شریف، بہن کوثر اور والدہ شمیم بیگم میں تقسیم ہوئے۔ تفتیشی افسر نے عدالت کو بتایا کہ ایس ای سی پی ریکارڈ کے مطابق 2008 میں 2 کروڑ 62 لاکھ شیئرز چوہدری شوگر ملز کے تھے لیکن دوران تفتیش 1 کروڑ 16 لاکھ 96 ہزار شیئرز کا فرق آیا ہے۔

پراسیکیوٹر نیب نے کہا کہ چوہدری شوگر ملز 2015 میں گوجرہ سے رحیم یار خان منتقل کی گئی، چوہدری شوگر ملز کی منتقلی کے دوران ڈیڑھ ارب روپے لگائے گئے، شوگر ملز منتقلی کے لیے خرچ ہونے والی رقم کے ذرائع آمدن کا بھی تعین کرنا باقی ہے۔نیب کے تفتیشی افسر نے بتایا کہ 3 غیر ملکیوں نے 2008 میں مریم کے نام پر شیئرز بھجوائے جب کہ 48 لاکھ ڈالرز یوسف عباس کو ٹیلی گرافک ٹرانسفر کئے گئے۔تفتیشی افسر نے مؤقف اختیار کیا کہ چوہدری شوگر ملز کے ڈائریکٹرز اور شیئر ہولڈز کو فائدہ پہنچانے کے لیے رقم منتقل کی گئی۔

مریم نواز کے وکیل امجد پرویز کے دلائل امجد پرویز نے دلائل دیتے ہوئے کہا کہ جب چوہدری شوگر ملز بنی اس وقت مریم نواز اور یوسف عباس کم عمر تھے، تمام شریف فیملی چوہدری شوگر ملز میں شئیر ہولڈرز تھی۔انہوں نے کہا کہ نیب کہتی ہے کہ چوہدری شوگر ملز کی بینیفیشری نواز شریف فیملی ہے، 2016 سے نواز شریف فیملی کا چوہدری شوگر ملز میں کوئی شیئر نہیں ہے۔ان کا کہنا ہے کہ جو دستاویزی ثبوت نیب کو چاہیے تھے وہ مہیا کر دیئے۔

مریم نواز کے وکیل نے بتایا کہ ان کی مؤکلہ تو پبلک آفس ہولڈر بھی نہیں تھی۔اس دوران نیب پراسیکیوٹر اور مریم نواز کے وکیل امجد پرویز کے درمیان تلخ کلامی بھی ہوئی جس پر امجد پرویز نے کہا کہ آپ میرے دلائل کے درمیان مت بولیں۔نیب پراسیکیوٹر نے کہا میں پراسیکیوٹر ہوں اور مجھے آپ بولنے سے نہیں روک سکتے۔امجد پرویز نے اپنے دلائل جاری رکھتے ہوئے کہا کہ نیب کسی قسم کی تفتیش نہیں کر رہی، نیب پچھلے 7 روز سے پانچ منٹ کے لیے بھی تفتیش نہیں کر رہی۔

مریم نواز کے وکیل نے بتایا کہ کھانا باہر رکھ دیا جاتا ہے اور کہا جاتا ہے کہ خود اٹھا لیں، مریم نواز کے کمرے سے تعفن اٹھتا ہے، کئی کئی روز تک صفائی نہیں کروائی جاتی۔ان کا کہنا تھا کہ نیب مریم نواز اور یوسف عباس کو ذہنی اذیت دے رہی ہے، شریف خاندان کی جائیداد تقسیم کا معاہدہ پہلے دن سے نیب کے پاس ہے، میاں شریف 2004 میں انتقال کر گئے اور 2008 میں شیئرز تقسیم ہوئے۔
جج کے استفسار پر مریم نواز نے اپنی تاریخ پیدائش بتا دی
دوران سماعت عدالت نے استفسار کیا کہ مریم نواز کی تاریخ پیدائش کیا ہے؟نیب کے تفتیشی افسر نے بتایا کہ مریم نواز کی پیدائش کا سال 1973 ہے مگر تاریخ کا علم نہیں۔اس موقع پر مریم نواز نے بتایا کہ میری تاریخ پیدائش 28 اکتوبر 1973 ہے۔مریم نواز کے جسمانی ریمانڈ کی استدعا مسترد احتساب عدالت نے نیب کی جانب سے مریم نواز اور یوسف عباس کے مزید جسمانی ریمانڈ کی استدعا مسترد کرتے ہوئے دونوں کو جوڈیشل ریمانڈ پر جیل بھیجنے کا حکم دے دیا۔ عدالت نے مریم نواز اور یوسف عباس کو 9 اکتوبر کو دوبارہ پیش کرنے کا حکم دیا ہے۔

واشنگٹن (میڈیا 92 نیوز آن لائن ) وزیراعظم عمران خان کا کہنا ہے کہ آج تک کبھی کسی کے سامنے جھکا ہوں اور نا اپنی قوم کو کبھی جھکنے دوں گا۔واشنگٹن کے کیپیٹل ارینا میں جلسے سے خطاب کرتے ہوئے وزیراعظم عمران خان کا کہنا تھا کہ انشاء اللہ پاکستانیوں کو کبھی شرمندہ نہیں ہونے دوں گا۔

عمران خان نے کہا کہ اللہ تعالیٰ نے ایک خاص نعمت کے طور پر ہمیں پاکستان دیا، کسی کو بھی اندازہ نہیں کہ پاکستان اللہ کی کتنی بڑی نعمت ہے۔انہوں نے کہا کہ آپ پاکستان کو تبدیل ہوتا دیکھیں گے اور ہر سال ملک اوپر جاتا رہےگا۔

ان کا کہنا تھا کہ جمہوریت میں دو چیزیں ہوتی ہیں ہیں جو بادشاہت میں نہیں ہیں، جمہوریت میں میرٹ ہے جب کہ بادشاہت میں میرٹ نہیں ہوتی اور دنیا میں جن ممالک نے بھی ترقی کی میرٹ کی بنیاد پر کی، جس ملک میں میرٹ کم تھا وہ پیچھے رہ گیا۔

وزیراعظم نے کہا کہ اگر ایک اچھا بادشاہ ہو تو ضروری نہیں ہے کہ اس کا بیٹا بھی اچھا ہو، ہندوستان سپر پاور ہوا کرتا تھا، ایک سے ایک مغل بادشاہ آیا، اورنگزیب کے بعد جو اس کے بچے آئے لیکن کسی میں بھی صلاحیت نہیں تھی جس کے باعث مغل دور ختم ہو گیا۔

پاکستان کے حوالے سے بات کرتے ہوئے وزیراعظم نے کہا کہ ہمارے ملک میں قائداعظم کے بعد کیوں اچھا لیڈر نہیں ملا، ایک ذوالفقار علی بھٹو تھے لیکن پھر ہمارے ملک میں بھی ایک قسم کی بادشاہت آگئی۔انہوں نے بتایا کہ نواز شریف کو ایک آمر نے اٹھا کر لیڈر بنا دیا، شہباز شریف کیوں وزیراعلیٰ بن گئے کیونکہ وہ نواز شریف کے بھائی تھے۔

ان کا کہنا تھا کہ جمہوریت میں ملک کا سربراہ جواہدہ ہوتا ہے لیکن ہمارے ملک میں جب عدالت فیصلہ کرتی ہے تو کہتے ہیں مجھے کیوں نکالا، جو آج پاکستان میں ہو رہا ہے یہ نیا پاکستان بن رہا ہے، ماضی میں کبھی ان لوگوں سے نہیں پوچھا گیا۔

وزیراعظم نے کہا لوگ پوچھتے تھے کہاں ہے نیا پاکستان، آپ کے سامنے نیا پاکستان بن رہا ہے، جس سے پوچھو، سب کہتے ہیں عمران خان کرا رہا ہے، ان پر سارے کیسز پرانے ہیں، ہم نے کوئی کیس نہیں کیا، ہم نے صرف اداروں کو آزاد کیا ہے، نیب اور ایف آئی اے کو آزاد کیا ہے۔

انہوں نے بتایا کہ 1960 کی دہائی میں پاکستان پورے ایشیاء میں تیزی سے ترقی کر رہا تھا، ہماری بیوروکریسی پورے ایشیاء میں بہترین تھی، ہمارے سرکاری اسپتالوں کا بہترین حال ہوا کرتا تھا اور پورے خطے میں پاکستان کی مثالیں دی جاتی تھیں۔

ان کا کہنا تھا ہم نے پاکستان کو آہستہ آہستہ نیچے آتے دیکھا، 1985کے بعد اصل تباہی شروع ہوئی اور پہلی دفعہ سیاست میں پیسہ آیا، رشوت چلنا شروع ہوئی، آج سب اکھٹے ہو گئے ہیں۔
جمعیت علمائے اسلام (ف) کے سربراہ مولانا فضل الرحمان کا نام لیے بغیر انہوں نے کہا کہ آج پہلی دفعہ پاکستان کی اسمبلی ڈیزل کے بغیر چل رہی ہے۔

انہوں نے کہا کہ فضل الرحمان، بلاول اور ن لیگ سب اکھٹے ہو گئے ہیں، ان کا ایک ہی مقصد ہے کہ انہیں این آر او مل جائے، مجھے باہر سے بھی سفارشیں بھجوائی ہیں، ایک آدھ بادشاہ نے بھی مجھ سے ان کی سفارش کی ہے لیکن ہم نے طاقتور کا احتساب شروع کر دیا ہے کیونکہ ہم نے پاکستان میں میرٹ کا سسٹم لانا ہے۔

وزیراعظم عمران خان نے کہا کہ پاکستان میں میرٹ نہیں ہے جس کی وجہ سے لوگوں کو مواقع نہیں ملتے، ہمارا تعلیم کا نظام لوگوں کو اوپر نہیں جانے دیتا، کس ملک میں تعلیم کے تین سسٹم چلتے ہیں؟انہوں نے کہا کہ امریکا میں لوگوں کو مواقع ملتے ہیں اور یہاں مزدوروں کے بچے اسکولوں میں مفت پڑھتے ہیں۔

ان کا کہنا تھا ہم پاکستان میں سرکاری اسکولوں کے سسٹم کو ٹھیک کر رہے ہیں، مدارس کے بچوں کو اوپر لانے کی کوشش کر رہے ہیں، 25 لاکھ بچے دینی مدارس میں جاتے ہیں، پاکستان میں تعلیم کا ایک نصاب لانے کی کوشش کر رہے ہیں۔عمران خان نے کہا کہ پاکستان میں میرٹ کا سسٹم تب آئے گا جب خاندانوں کی سیاست اور جاگیردرانہ نظام ختم ہو۔

انہوں نے کہا میرا کوئی دوست کسی عہدے پر نہیں ہے، مراد سعید کسی کا رشتے دار نہیں ہے، مراد سعید ایک طالبعلم تھا اور آج وزیر ہے۔وزیراعظم نے کہا مجھے خود اندازہ نہیں تھا کہ اللہ نے پاکستان کو کیا کیا دیا ہے، پاکستان کے پاس تانبے کے بے پناہ ذخائر ہیں، صرف ایک جگہ پر 200 ارب ڈالر کے تانبےکے ذخائر موجود ہیں لیکن ہمارا ملک صرف کرپشن کی وجہ سے پیچھے رہ گیا۔

انہوں نے کہا کہ بڑی بڑی کمپنیاں پاکستان میں نہیں آتی تھیں، ہر بڑی کمپنی سے بات کی ہے، سب کہتے ہیں پاکستان میں پیسے مانگے جاتے ہیں، رشوت لی جاتی ہے۔ان کا کہنا ہے کہ 180 ارب ٹن کا کوئلہ پاکستان میں موجود ہے، اس کوئلے سے ہم سعودی عرب سے زیادہ بجلی بنا سکتے ہیں۔

وزیراعظم پاکستان نے کہا کہ آسٹریلیا کی ایک منرل کمپنی کے سرمایہ کار نے بتایا کہ دنیا جانتی ہے کہ پاکستان میں قدرتی وسائل ہیں لیکن کرپشن کی وجہ سے وہاں سرمایہ کاری نہیں کرتے، ہم کرپشن ختم کر کے پاکستان کو اوپر لا کر دکھائیں گے۔

عمران خان نے کہا کہ میرا خواب ہے ایک دن باہر سے دنیا پاکستان میں نوکریاں ڈھونڈنے آئے گی، مدینہ کی ریاست ایک ماڈرن اسٹیٹ تھی اور جدید اصولوں پر استوار تھی، پینشنز کا تصور پہلی مرتبہ مدینہ کی ریاست میں آیا، خواتین کو حقوق دینے کا تصور بھی مدینہ کی ریاست نے دیا۔

انہوں نے کہا افسوس سے کہتا ہوں کہ پاکستانی دیہات میں آج تک خواتین کو جائیداد میں حصہ نہیں دیا جاتا، ایک قانون لے کر آ رہے ہیں جس میں خواتین کو جائیداد میں حصہ دینا پڑے گا۔ان کا کہنا تھا مسلم دنیا واحد مثال ہے جہاں غلام لیڈر بنے، ہم نے پاکستان کو مدینہ کی ریاست کی طرح بنانا ہے اور مدینہ کی ریاست میرٹ کی وجہ سے اوپر گئی۔

وزیراعظم نے کہا پاکستان میں سارے تاجروں کو رجسٹرڈ ہونا پڑے گا، سب مل کر تھوڑا تھوڑا ٹیکس دیں تو پاکستان کو قرضوں کی دلدل سے نکالنا کوئی مشکل نہیں ہے، چار ،چھ مہینے سال مشکل وقت ہے، اس سے نکل جائیں گے۔اپوزیشن کو تنقید کا نشانہ بناتے ہوئے وزیراعظم نے کہا کہ جو مرضی کرنا ہے کر لیں لیکن آپ کو قوم کا پیسا واپس کرنا ہو گا،

انہوں نے کہا کہ نواز شریف کہتے ہیں گھر سے کھانا منگواؤں گا، کھانا اچھا نہیں ہے، کہتے ہیں ٹی وی لگا دو ، اے سی لگا دو، جس طرح سے یہ لوگ جیل میں رہ رہے ہیں، یہ سزا تو نہ ہوئی، واپس جا کر جیل سے ٹی وی اور اے سی نکالوں گا۔

ان کا کہنا ہے مجھے پتا ہے مریم بی بی بہت شور مچائیں گی لیکن پیسا واپس کر دیں، یہ باہر آ جائیں گے۔پیپلز پارٹی کے صدر کے حوالے سے وزیراعظم نے کہا کہ آصف زرداری آپ کو بھی اس جیل رکھیں گے جہاں ٹی وی ہو گا اور نہ اے سی۔عمران خان نے کہا جیل سے نکلنا بہت آسان ہے، پیسا واپس کرو، ہم آپ کو جیل سے نکال دیں گے۔

انہوں نے کہا شاہد خاقان عباسی بار بار کہتے تھے کہ اگر میں نے کچھ غلط کیا ہے تو جیل میں ڈالو، دھرنا دیں یا احتجاج کریں لیکن آپ کو پیسہ واپس کرنا پڑے گا۔وزیراعظم نے کہا فضل الرحمان اپوزیشن سےکہتے ہیں کیا ہم تب اکھٹے ہوں گے جب جیل میں ہوں گے تو انہیں کہتا ہوں ہاں فضل الرحمان، آپ سب جیل میں اکھٹے ہوں گے۔

افغانستان کے حوالے سے بات کرتے ہوئے وزیراعظم نے کہا کہ مجھے دہشت گرد اور طالبان خان کہا گیا لیکن آج ساری دنیا کہہ رہی ہے کہ افغان مسئلے کا فوجی حل نہیں ہے۔

لاہور (اپنے رپوٹر سے) وزیر ریلوے شیخ رشید احمد کا کہنا ہے کہ نواز شریف کے خلاف عدالتی فیصلہ واپس ہوا تو دوسرے کیس میں سزا ہوجائے گی۔ پاکستانی سیاست میں اگلے 92 دن بہت اہم ہیں ، ن لیگ میں دو گروپ ہیں ایک جوڈو کراٹے والا اور ایک اصلی گروپ .. ن لیگ کو مریم لے ڈوبے گی ،

لاہور میں پریس کانفرنس کے دوران شیخ رشید کا کہنا تھا کہ ریلوے میں بعض لوگ کہتے ہیں کام حرام ہے، ریلوے کا کوئی افسر سکھر نہیں جانا چاہتا، ولہار اسٹیشن کے قریب افسوس ناک حادثہ ہوا۔ گزشتہ کچھ عرصے میں 3 افسوسناک ٹرین حادثات ہوئے، ٹرین حادثے میں 24 ہلاکتیں ہوئیں، ایک ماہ کے اندر حادثے کے ذمہ داروں کے خلاف فیصلہ کریں گے، ریلوے لوکوموٹیو کے اندر کیمرے لگانے کا فیصلہ کیا ہے۔

وفاقی وزیر کا کہنا تھا کہ اس وقت 136مسافر اور 55 فریٹ ٹرینیں ٹریک پر ہیں، ریلوے میں جانے والے اکثر لوگ جہاز کا کرایہ برداشت نہیں کرسکتے، ریلوے ایک بہت بڑا نیٹ ورک ہے، 4 ارب کے اضافی تیل کے باوجود خسارہ کم کیا، ہم نےدس بلین کا ٹارگٹ زیادہ حاصل کیاہے اور 60 لاکھ مسافروں کا اضافہ کیا ہے، 278 میں سے 178ریلوے ویگنز نیلام کر دیں گے، 10 اے سی کوچز لاہور اور کراچی میں اسٹینڈ بائی کرنے کا فیصلہ کیا ہے، ان 2 اسٹیشنوں پر 2 لاکھ مسافر آرہے ہیں، ریلوے میں 1122 کی طرز کا منصوبہ لانے کا فیصلہ بھی کیا ہے۔

شیخ رشید کا کہنا تھا کہ عقلمند دشمن بیوقوف دوست سے بہتر ہوتا ہے، کلاشنکوف کیس میں میرے ساتھ کوئی کھڑا نہیں ہوا،ابھی بھی ملک میں عظیم جج موجود ہیں، اب ویڈیو کی سیاست ختم ہوچکی ہے، جج کی مبینہ ویڈیو مسلم لیگ (ن) کے گلے پڑ جائے گی، مریم نواز نے (ن) لیگ کو تباہ کردیا ہے، مریم نواز ویڈیو کیس میں پورس کی ہتھنی ثابت ہو گی، یہ سارے پھنس گئےہیں، یہ منی ٹریل نہیں دکھا سکتے،

ناصرجنجوعہ کبھی ان کے حق میں گواہی نہیں دیں گے۔ اگر فیصلہ واپس ہوا تو دوسرے کیس میں سزا ہوجائے گی۔ مسلم لیگ (ن) کے اندر بھی 2 گروپ ہیں، ایک ڈیل والا اور دوسرا جوڈو کراٹے والا، شہباز شریف کوحمزہ عزیز ہے اور مریم کو نواز شریف عزیز ہے، چور مچائے شور کی فلم 90 دن میں اپنے انجام کو پہنچ جائے گی، شہباز شریف وکٹ کے دونوں جانب کھیل رہے ہیں، شہباز شریف اور میری پارٹی ایک ہے۔
وفاقی وزیر نے کہا کہ عمران خان ٹرمپ سے ملنے جارہے ہیں، اللہ خیر کرے کیونکہ دونوں کا مزاج ایک جیسا ہے، کس حکومت کو شوق ہے کہ تاجروں کو ناراض کرے۔