Tag وزیر اعظم عمران خان

اسلام آباد(ویب ڈیسک) وزیراعظم آفس کو نئے ڈی جی آئی ایس آئی کی تقرری کے لیے وزارت دفاع کی جانب سے سمری موصول ہوگئی ہے۔

میڈیارپورٹس کے مطابق وزارت دفاع کی جانب سے نئے ڈی جی آئی ایس آئی کی تقرری کے لیے سمری وزیراعظم آفس کو بھجوادی گئی ہے، وزیراعظم کی منظوری کے بعد نئے ڈی جی آئی ایس آئی کی تقرری کا اعلان کیا جائے گا۔
اس سے قبل اپنی ٹوئٹ میں فواد چوہدری نے کہا تھا کہ وزیر اعظم عمران خان اور آرمی چیف جنرل قمر جاوید باجوہ کے درمیان نئے ڈی جی آئی ایس آئی کی تقرری پر مشاورت کا عمل مکمل ہو چکا ہے اور نئی تقرری کا عمل بھی شروع ہو چکا ہے۔ذرائع کا کہنا ہے کہ گزشتہ روز وفاقی کابینہ کے اجلاس میں بھی سول ملٹری تعلقات کے حوالے سے قیاس آرائیوں پر گفتگو ہوئی تھی۔ وزیر اعظم نے پاک فوج میں تبادلوں سے متعلق کابینہ ارکان کو اعتماد میں لیا اور کہا کہ اہم عہدوں پر تعیناتیوں کے حوالے سے کوئی اختلاف نہیں اس معاملے میں ہونے والی قیاس آرائیوں پر توجہ نہ دیں۔

اسلام آباد (ویب ڈیسک) وزیر اعظم عمران خان اور آرمی چیف جنرل قمر جاوید باجوہ کے درمیان نئے ڈی جی آئی ایس آئی کی تقرری پر مشاورت مکمل ہو گئی ہے.تفصیلات کے مطابق وفاقی وزیر اطلاعات فواد چوہدری نے ٹوئٹر پرایک بیان میں کہا ہے کہ وزیر اعظم اور آرمی چیف میں نئے ڈی جی آئی ایس آئی کی تقرری پر مشاورت مکمل ہوگئی ہے اور نئےڈی جی آئی ایس آئی کی تقرری کاپراسس شروع ہوچکا ہے۔علاوہ ازیں ان کا کہنا تھا کہ ایک بارپھرسول اورفوجی قیادت نےثابت کردکھایا کہ ملک کے استحکام،سالمیت ،ترقی کے لئے ادارے متحد اور یکساں ہیں۔

اسلام آباد (ویب ڈیسک)وزیراعظم عمران خان نے کراچی سرکلر ریلوے منصوبے کا سنگ بنیادرکھ دیا.وزیر اعظم ایک روزہ دورے پر کراچی پہنچے۔دورے کے دوران وزیراعظم عمران خان سے پارٹی رہنماؤں اور ارکان اسمبلی نےملاقاتیں بھی کیں.اس موقع پروزیراعظم کو پارٹی امور اور ترقیاتی کاموں پر بریفنگ دی گئی۔ علاوہ ازیں وزیراعظم عمران خان مختلف مسالک کے علمائے کرام سے بھی ملاقات کریں گے۔
سرکلر ریلوے کے لیے اس منصوبے کے تحت بغیر پھاٹک نیا ٹریک بچھایا جائے گا اور ہر 6 منٹ بعد ٹرین اسٹیشن پر آئے گی۔ اس منصوبے سے یومیہ 3 سے 5لاکھ مسافرفائدہ اٹھا سکیں گے.
دریں اثناء وزیر اعظم عمران خان نے ایک ٹوئٹ کیا جس میں انہوں نے لکھا کہ کراچی کوسٹل ڈیولپمنٹ زون کی سی پیک میں شمولیت پر وزارت بحری امور کو شاباش دیتا ہوں ، کراچی کوسٹل ڈیولپمنٹ زون ایک گیم چینجر منصوبہ ہے، یہ منصوبہ کراچی کو دیگر ترقی یافتہ شہروں کی صف میں شامل کرے گا، اس سے سرمایہ کاری کے مواقع پیدا ہوں گے، ماہی گیروں کے لئے ساحل سمندر صاف ہوگا اور کم آمدنی والے افراد کے 20 ہزار نئے گھر بنیں گے۔

ویب ڈیسک: وزیر اعظم عمران خان کی زیرصدارت وفاقی کابینہ کا اجلاس ہوا۔ جس میں 21 نکاتی ایجنڈے پر غور کیا گیا۔وفاقی کابینہ نے ٹک ٹاک پر پابندی برقرار رکھنے کا فیصلہ کیا ہے۔کابینہ نے عدالتی فیصلوں اور احکامات کی روشنی میں ٹک ٹاک پر پابندی سے متعلق معاملے پرغورکیا گیا اورو فاقی کابینہ کی جا نب سے ٹک ٹاک پرپابندی برقرار رکھنے کا فیصلہ کیا گیا۔
اسلام آبادہائیکورٹ کی جانب سے اپنےتحریری فیصلے میں کہاتھاکہ پی ٹی اے ٹک ٹاک پر پابندی کا کوئی مناسب جواز پیش نہیں کر سکا۔ جب یہ تسلیم شدہ حقیقت ہے کہ ایک فیصد افراد ٹک ٹاک کا غلط استعمال کررہے ہیں تو سوشل میڈیا سائٹس پر پابندی حل نہیں۔ عدالت عالیہ کا اپنے فیصلے میں کہنا تھا کہ سوسائٹی میں تنزلی کی علامت کوسوشل میڈیا سائٹس پر موجود مواد سے نہیں ملایا جا سکتا، عالمی سطح پر ٹیکنالوجی کی غیر معمولی ترقی سوسائٹی میں بہت سے چیلنج سامنے لائی ہے۔

وفاقی کا بینہ کےاجلاس میں عدالتی فیصلوں اوراحکامات کی روشنی میں ویڈیو شیئرنگ ایپ ٹک ٹاک پر پابندی سے متعلق معاملے پر غور کیا اور کابینہ نے ٹک ٹاک پر پابندی برقرار رکھنے کا فیصلہ کیا۔ واضح رہے کہ پاکستان ٹیلی کام اتھارٹی نے ٹک ٹاک پر پابندی عائد کررکھی ہے اورایپ پرپابندی کیخلا ف درخواست پر اسلام آباد ہائی کورٹ نے پی ٹی اے کو معاملہ وفاقی کابینہ میں رکھنے کا حکم دیا تھا۔

لاہور(ویب ڈیسک) پنجاب میں نئے بلدیاتی نظام کے حوالے سے تحریک انصاف اور مسلم لیگ ق کی قیادت کی اعلی سطحی مشاورت ہوئی۔ دونوں جماعتوں نے صوبہ میں متوازن بلدیاتی نظام لانے پر اتفاق کیا۔
پنجاب میں نیا بلدیاتی نظام لانے کے معاملے پر پاکستان تحریک انصاف (پی ٹی آئی) اورمسلم لیگ ق کی قیادت میں اعلی سطحی مشاورت ہوئی۔ ویڈیو لنک پر ہونے والے اجلاس میں نئے بلدیاتی نظام پر تبادلہ خیال کیا گیا۔پی ٹی آئی سے وفاقی وزرا ء شاہ محمود قریشی ، اسد عمر، غلام سرور،پنجاب کے وزرا ء میاں محمود الرشید، راجہ بشارت ، میاں اسلم اقبال اور ہاشم جواں بخت نے شرکت کی۔
پاکستان مسلم لیگ ق کی جانب سے وفاقی وزرا ء طارق بشیر چیمہ اور مونس الہی نے اجلاس میں شرکت کی ۔۔دونوں حکمران جماعتوں نے پنجاب میں متوازن بلدیاتی نظام لانے پر اتفاق کیا۔پی ٹی آئی اور مسلم لیگ ق کے درمیان میئر کا انتخاب براہ راست کرانے پر اتفاق ہو گیا، اجلاس میں ضلع ناظم کا سیٹ اپ لانے پر بھی مشاورت کی گئی ۔ تحصیل اور ضلع کی سطح پر اختیارات کی تقسیم کی تجاویز پر غور کیا گیا۔
اجلاس میں طے تجاویز کی حتمی منظوری آئندہ ہفتے وزیر اعظم عمران خان سے لینے کا فیصلہ کیا گیا۔ اتحادی قیادت نے پنجاب میں جلد بلدیاتی انتخابات کروانے پر بھی اتفاق کیا۔اجلاس میں فیصلہ کیا گیا کہ تحریک انصاف اور مسلم لیگ ق ملکر پنجاب اسمبلی سے نیا قانون پاس کروائے گی۔

اسلام آباد (میڈیا 92 نیوز آن لائن ) وزیراعظم عمران خان نے سعودی ولی عہد شہزادہ محمد بن سلمان سے ٹیلی فونک رابطہ کر کے مقبوضہ کشمیر کی کشیدہ صورتحال پر تبادلہ خیال کیا۔

سعودی خبر رساں ادارے ایس پی اے کے مطابق دونوں رہنماؤں کے درمیان ہونے والی ٹیلی فونک گفتگو میں خطے میں پیدا ہونے والی صورتحال پر تبادلہ خیال کیا گیا۔

اس کے علاوہ وزیراعظم عمران خان اور سعودی ولی عہد شہزادہ سلمان نے بھارتی اقدامات اور مقبوضہ کشمیر کے مسئلے پر بھی بات چیت کی۔

خیال رہے کہ دو روز قبل بھارت نے صدارتی حکم نامے کے ذریعے مقبوضہ کشمیر کی خصوصی حیثیت سے متعلق آرٹیکل 370 کو ختم کر دیا تھا۔

گزشتہ روز بھارتی لوک سبھا نے بھی آرٹیکل 370 ختم کرنے کی منظوری دیدی تھی۔

پاکستان نے مقبوضہ کشمیر کی آئینی حیثیت ختم کرنے کے بھارتی اقدام کو یکسر مسترد کرتے ہوئے اقوام متحدہ کی سلامتی کونسل سے واقعے کا فوری نوٹس لینے کا مطالبہ کیا ہے۔

وزیراعظم عمران خان نے گزشتہ روز پارلیمنٹ کے مشترکہ ا جلاس سے خطاب کرتے ہوئے کہا کہ پاکستان ہر فورم پر مقبوضہ کشمیر کا مقدمہ لڑے گا، سربراہان مملکت سے بات چیت کی جائے گی۔

وزیراعظم نے کہا کہ اقوام متحدہ کی سلامتی کونسل میں معاملہ اٹھایا جائے گا، عالمی عدالت انصاف میں بھی کیس لے کر جائیں گے۔

اسلام آباد (میڈیا 92 نیوز آن لائن ) وزیر اعظم عمران خان نے کہا ہے کہ اقلیتوں کی عبادت گاہوں کی حفاظت کریں گے اور انہیں تمام سہولیات فراہم کریں گے

اسلام آباد میں ایوان صدر میں اقلیتوں کے حوالے سے تقریب سے خطاب کرتے ہوئے ان کا کہنا تھا مدینہ کی ریاست مسلمانوں کے لیے رول ماڈل ہے اور ہم چاہتے ہیں کہ ہمارے ملک میں لوگ سمجھیں کہ مدینہ کی ریاست کیا تھی، مدینہ کی ریاست ایک جدید ریاست تھی۔

عمران خان کا کہنا تھا کہ پاکستان واحد ملک ہے جو اسلام کے نام پر وجود میں آیا ہے اور میرا نئے پاکستان سے متعلق ایک وژن ہے۔

انہوں نے کہا کہ لوگ سمجھتے ہیں کہ میں ریاست مدینہ کی بات ووٹ لینے کے لیے کرتا ہوں جبکہ ریاست مدینہ نئے پاکستان کے لیے ایک ماڈل کی حیثیت رکھتی ہے۔عمران خان کا کہنا تھا کہ پاکستانیوں کے لیے ضروری ہے کہ ہم سمجھیں کہ اس کا وژن کا تھا اور مدینہ کی ریاست کو سمجھے بغیر ہم نہیں سمجھیں گے کہ یہ ملک کیوں بنا تھا۔

انہوں نے کہا کہ ہم کوشش کر رہے ہیں کہ جامعات میں باقاعدہ چیئرز دی جائیں اور مدینہ کی ریاست پر پی ایچ ڈی کی جائے اور لوگوں کو سمجھ میں آئے کہ یہ ریاست کیا تھی۔اپنے خطاب میں عمران خان کا کہنا تھا کہ مدینہ کی ریاست دنیا کی پہلی فلاحی ریاست تھی، وہاں انسانیت اور رحم تھا اور یہ جدید ریاست تھی، وہاں اقلیتوں کا تحفظ کیا گیا۔

وزیراعظم نے کہا کہ حضورﷺ کی زندگی ہمارے لیے ایک مثال اور مشعل راہ ہے جبکہ قرآن پاک میں حکم ہے کہ دین میں کوئی زبردستی نہیں ہے تو پھر ہم کیسے آج زبردستی لوگوں کا مذہب تبدیل کرواتے ہیں، یہ سب غیر اسلامی ہے۔

عمران خان کا کہنا تھا کہ جو لوگ زبردستی کرکے لوگوں کو اسلام کی طرف لاتے ہیں وہ نہ تو اسلام کی تاریخ جانتے ہیں اور نہ انہیں دین کا علم ہے اور نہ ہی وہ قرآن اور سنت کو جانتے ہیں۔

اسلام آباد (میڈیا 92 نیوز آن لائن ) ترک صدر رجب طیب اردوان نے وزیر اعظم عمران خان کو فون کرکے دوطرفہ تعلقات سمیت پاکستان، ترکی اور ملائیشیا پر مشتمل سہ فریقی معاملات کو آگے بڑھانے پر تبادلہ خیال کیا۔

وزیراعظم ہاؤس سےجاری اعلامیے کے مطابق ‘ترک صدر طیب اردوان نے وزیراعظم سے پاکستان میں دہشت گردی کے حالیہ واقعےمیں قیمتی جانوں کے ضیاع پر افسوس اور ہمدردی کا اظہار کیا’۔

بیان میں کہا گیا ہے کہ ‘دونوں رہنماؤں نے باہمی تعلقات کے مختلف پہلووں پر بہتری کے حوالے سے بات کی اور خاص طور پر وزیراعظم عمران خان کے رواں برس ترکی کے دورے میں ہونے والی گفتگو کا بھی جائزہ لیا’۔

ترک صدر اور وزیر اعظم عمران خان کے درمیان ہونے والی گفتگو کے حوالے سے بیان میں کہا گیا ہے کہ ‘انہوں نے دونوں ممالک کے درمیان مضبوط برادرانہ تعلقات اور قریبی تعاون پر اطمینان کا اظہار کیا’۔

دونوں رہنماؤں نے عزم کیا کہ ‘پاکستان-ترکی ہائی لیول اسٹریٹجک کوآپریشن کونسل (ایچ ایل ایس سی سی) کے اگلے سیشن میں مختلف شعبوں پر باہمی تعاون کو مزید مستحکم کیا جائے گا جو رواں برس کے اواخر میں اسلام آباد میں ہوگا’۔

ایچ ایل ایس سی سی کے سیشن کا حوالہ دیتے ہوئے وزیراعظم عمران خان نے کہا کہ حکومت پاکستان اور عوام صدر اردوان کے دورے پر انہیں خوش آمدید کہنے کے منتظر ہیں۔

بیان میں کہا گیا ہے کہ ‘وزیر اعظم عمران خان نے افغانستان کے امن عمل اور مصالحت کے لیے عالمی کوشش میں پاکستان کے کردار پر ترک صدر کی حمایت کو سراہا’۔

طیب اردوان سے گفتگو کے دوران وزیراعظم عمران خان نے مقبوضہ کشمیر کی موجودہ صورت حال بھی اجاگر کیا۔

وزیراعظم ہاؤس سے جاری بیان کے مطابق وزیر اعظم عمران خان اور ترک صدر طیب اردوان نے ‘پاکستان-ترکی-ملائیشیا پر مشتمل سہ فریقی لائحہ عمل پر بات کی اور اس حوالے سے اگلے اقدامات پر تبادلہ خیال کیا گیا’۔

خیال رہے کہ ملائیشیا کے وزیر اعظم مہاتیر محمد اور عمران خان نے رواں برس دوطرفہ تعلقات کو بڑھانے کا اعادہ کرتے ہوئے دورے بھی کیے تھے جبکہ مہاتیر محمد نے گزشتہ روز ترکی کا دورہ کیا تھا جہاں دونوں رہنماؤں نے تعلقات اور تجارتی معاملات پر گفتگو کی تھی۔

واشنگٹن: وزیراعظم عمران خان نے کہا ہےکہ شکیل آفریدی اور عافیہ صدیقی کے تبادلے پر امریکا سے بات چیت کر سکتے ہیں۔

امریکی ٹی وی کو انٹرویو میں وزیراعظم عمران خان نے کہا کہ شکیل آفریدی کا درجہ پاکستان میں جاسوس کا ہے۔اسامہ بن لادن سے متعلق ان کا کہنا تھا کہ ہم امریکا کے اتحادی تھے، اسامہ بن لادن کی گرفتاری میں پاکستان کو اعتماد میں لیا جانا چاہیے تھا۔

امریکی صدر سے ملاقات پر وزیراعظم عمران خان نے کہا کہ صدر ٹرمپ صاف گو انسان لگے جو لفظوں کی ہیرا پھیرا نہیں کرتے، میرا پورا وفد بھی میٹنگ سے بہت خوش ہے۔

افغان مسئلے کے حوالے سے ان کا کہنا تھا کہ افغانستان کے عوام 4 دہائیوں سے خانہ جنگی سےمتاثر ہیں، افغانستان کو امن کی ضرورت ہے، طالبان کوحکومت کا حصہ بن کر عوام کی نمائندگی ملنی چاہیے، طالبان کے ساتھ حالیہ امن مذاکرات اب تک کےکامیاب ترین مذاکرات رہے ہیں، طالبان ایک مقامی تحریک ہے، وہ کسی ملک کے لیے خطرہ نہیں، امریکا کو طالبان سے کوئی خطرہ نہیں ہونا چاہیے۔

وزیراعظم عمران خان نے کہا کہ افغانستان کا مسئلہ حل نہ ہوا تو داعش نہ صرف خطے بلکہ پوری دنیا کے لیے بڑا خطرہ بن جائے گی۔

ان کا کہنا تھا کہ ہم خطے میں امن چاہتے ہیں، ایران کے مسئلے پر مصالحت کے حق میں ہیں اور اپنا کردار ادا کرنے کو تیار ہیں، جنگ سے پہلے ہی خطہ متاثر ہے۔

وزیراعظم نے ایک بار بھارت سے اچھے تعلقات کی اور مسئلہ کشمیر کے حل کی خواہش کا اظہار کیا۔

واشنگٹن (میڈیا 92 نیوز آن لائن ) وزیراعظم عمران خان 21 سے 23 جولائی تک امریکا کا تین روزہ دورہ کریں گے جس میں وہ امریکی صدر ڈونلڈ ٹرمپ سے بھی ملاقات کریں گے۔

وزیراعظم عمران خان کے دورہ امریکا کے حوالے سے مختلف قسم کی قیاس آرائیاں کی جا رہی تھیں تاہم وائٹ ہاؤس کے بعد پاکستان کے دفتر خارجہ نے بھی وزیراعظم کے دورہ امریکا کی تصدیق کر دی ہے۔

ترجمان دفتر خارجہ کے مطابق وزیراعظم عمران خان صدر ڈونلڈ ٹرمپ کی دعوت پر امریکا کا تین روزہ دورہ کریں گے۔

ترجمان کا کہنا ہے کہ وزیراعظم عمران خان اور صدر ڈونلڈ ٹرمپ کے درمیان 22 جولائی کو وائٹ ہاؤس میں ملاقات ہوگی، ملاقات میں دو طرفہ تعلقات اور علاقائی صورتحال پر بات چیت ہوگی۔

ترجمان دفتر خارجہ نے کہا کہ وزیر اعظم کانگریس ارکان، کارپوریٹ سربراہان اور پاکستانی کمیونٹی سے بھی ملاقات کریں گے۔

دفتر خارجہ کے ترجمان کا کہنا ہے کہ وزیراعظم امریکا میں مختلف تقاریب میں نیا پاکستان وژن سے آگاہ کریں گے، وزیراعظم امریکا کے ساتھ کثیر الجہتی تعلقات کی اہمیت کا بھی بتائیں گے۔

ترجمان دفتر خارجہ کے مطابق وزیر اعظم افغانستان میں امن و استحکام کے لیے پاکستان کے عزم سے آگاہ کریں گے، وزیر اعظم اپنے دورہ امریکا کے دوران پاکستان کی پرُ امن ہمسائیگی کی پالیسی پر روشنی ڈالیں گے۔

دفتر خارجہ کے مطابق دورے سے باہمی مفاد پر مبنی شراکت داری مزید مضبوط ہو گی۔

دوسری جانب ترجمان وائٹ ہاؤس کی جانب سے جاری بیان میں کہا گیا ہے کہ امریکی صدر ڈونلڈ ٹرمپ وزیراعظم عمران خان کا 22 جولائی کو وائٹ ہاؤس آنے پر خیر مقدم کریں گے۔

وائٹ ہاؤس کے ترجمان کے مطابق وزیراعظم عمران خان کے دورے میں پاک امریکا تعاون کی مزید مضبوطی توجہ کا مرکز ہو گی، پاک امریکا تعاون کا مقصد خطے میں امن و استحکام اور معاشی خوشحالی لانا ہے۔

اعلامیے میں کہا گیا ہے کہ صدر ٹرمپ اور وزیرعظم عمران خان کے درمیان انسداد دہشتگردی، دفاع، توانائی اور تجارت سے متعلق امور پر بات چیت ہو گی۔

ترجمان وائٹ ہاؤس کے مطابق دونوں ممالک کے درمیان بات چیت کا مقصد جنوبی ایشیاء میں امن اور پاک امریکا دیرپا شراکت داری کا ماحول پیدا کرنا ہے۔