All posts by EMRA

لاہور (وقت ٹی وی آن لائن) لاہور میں ادکارہ اور کمپیئر عائشہ ثناءکےخلاف بوگس چیک دینے کا مقدمہ درج ہو گیا لیکن 15 دن گزرنے کے بعد بھی گرفتار نہ کیا جاسکا۔تھانہ ڈیفنس بی میں میاں محمد علی معین نے27 مئی کو ادکارہ اور کمپیئر عائشہ ثناءکےخلاف مقدمہ درج کرایا تھا کہ جس میں الزام عائد کیا گیا کہ اداکارہ نے ان سے 20 لاکھ روپے ادھار لیے تھے۔

عائشہ ثنا مختلف لوگوں سے کروڑوں روپے کا فراڈ کرکے روپوش ہوگئی ہیں جب کہ اسی سلسلہ میں چیک ڈس آنر ہونے پر ان کے خلاف مقدمہ بھی درج کرلیا گیا ہے۔ عائشہ ثنا نے گھریلو ضروریات اور”کمیٹی” کے لئے اپنے کئی دوستوں اور جاننے والوں سے لگ بھگ 6 کروڑ روپے جمع کئے . pic.twitter.com/rRTxWl8PEW

— Sarfraz Ali (@ItsSarfrazAli) June 12, 2020

مقدمے میں بتایا گیا ہے کہ اداکارہ عائشہ نے انہیں 20 لاکھ مالیت کا چیک دیا جو بائونس ہوگیا تھا۔انچارج انویسٹی گیشن کے مطابق مقدمہ 15 روز قبل درج ہوا، اسی دن سے ملزمہ روپوش ہے، ملزمہ شامل تفتیش ہوئی ہے اورنہ ہی اس نےضمانت کروائی ہے۔

بیجنگ(وقت ٹی وی آن لائن ) ایک بچہ پالیسی اس کا سبب ہے یا کچھ اور، کہ چین میں اس وقت خواتین کی تعداد مردوں سے کہیں کم ہے اور کنوارے پھرتے کروڑوں مرد بیچارے شوہر کہلانے کو ترس رہے ہیں۔ اب اس صورتحال سے نمٹنے کے لیے ایک چینی پروفیسر نے ایسا مشورہ دے ڈالا ہے کہ ہر سننے والا دنگ رہ جائے۔ میل آن لائن کے مطابق 77سالہ پروفیسر ژیو کوانگ این جی کا کہنا ہے کہ چین میں خواتین کو بیک وقت ایک سے زائد شادیوں کی اجازت دے دینی چاہیے تاکہ وہ مرد جنہیں شادی کے لیے کوئی خاتون نہیں مل رہی، وہ بھی شادی کر سکیں۔

پروفیسر کوانگ کا کہنا تھا کہ ”حکام کو اس معاملے پر غور کرنا چاہیے اور خواتین کو بیک وقت 2یا اس سے زائد شادیوں کی اجازت دینی چاہیے۔ مرد میری اس بات سے اتفاق کریں گے کیونکہ اس وقت کروڑوں مرد کنوارے ہیں اورانہیں بیویاں نہیں مل رہیں۔ یقینا وہ ہمیشہ کنوارے رہنے کی بجائے دوسرے مردوں کے ساتھ بیوی شیئر کرنے کو ترجیح دیں گے۔“ چین میں مردوخواتین کی تعداد میںفرق اس قدر زیادہ ہے کہ ایک حالیہ تحقیق کے مطابق 2050ءتک 3کروڑ مرد ایسے ہوں گے جنہیں بیوی نہیں ملے گی۔

اسلام آباد(وقت ٹی وی آن لائن)ادارہ شماریات نے ہفتہ وار مہنگائی کے اعدادوشمار جاری کر دیئے،جون کے دوسرے ہفتے میں بھی مہنگائی کا سلسلہ کم نہ ہو سکا۔

ادارہ شماریات کے اعدادوشمار کے مطابق ایک ہفتے کے دوران 19 اشیا ضروریہ کی قیمتوں میں اضافہ ریکارڈکیاگیا ،دستاویزات کے مطابق ایک ہفتے کے دوران ٹماٹر کی قیمت 4 روپے فی کلو اضافہ ہوا ،ایک ہفتے کے دوران آٹے کے 20کلو کے تھیلے کی قیمت میں 16 روپے کا اضافہ ہوا۔ایک ہفتے کے دوران تازہ دودھ کی قیمت میں ایک روپے کا اضافہ ریکارڈکیاگیا۔

ادارہ شماریات کے مطابق ایک ہفتے کے دوران انڈے فی درجن 4 روپے مہنگے ہوئے،ایک ہفتے کے دوران ایل پی جی کا گھریلو سلنڈر اڑھائی روپے مہنگا ہوا ،ایک ہفتے کے دوران چینی کی قیمت میں بھی معمولی اضافہ ریکارڈ کیا گیا، ایک ہفتے کے دوران کوکنگ آئل کی قیمت میں ڈیڑھ روپے کا اضافہ ریکارڈ کیاگیا،ایک ہفتے کے دوران دال ماش، چاول، ماچس اورمصالحہ جات کی قیمتیں بھی بڑھ گئیں۔

دستاویزات کے مطابق ایک ہفتے کے دوران 10 اشیا ضروریہ کی قیمتوں میں کمی ریکارڈ کی گئی،ایک ہفتے کے دوران مرغی کا گوشت 26 روپے فی کلو سستا ہوگیا ،ایک ہفتے کے دوران کیلا فی درجن 7 روپے سستا ہوا ،ایک ہفتے کے دوران پیاز کی قیمت میں 2 روپے فی کلو کمی ریکارڈکی گئی جبکہ ایک ہفتے کے دوران دال مسور، دال مونگ ،جلانے کی لکڑی اور لہسن کی قیمتوں میں کمی ہوئی ۔ایک ہفتے کے دوران بناسپتی چاول ،بریڈ ،چائے کی پتی سمیت 22اشیا کی قیمتوں میں استحکام رہا۔

اسلام آباد (وقت ٹی وی آن لائن )کورونا وائرس نے گزشتہ چوبیس گھنٹوں میں اٹھائیس افراد کی جان لے لی جبکہ 6,472 نئے کیسز سامنے آئے ،اب تک مجموعی طور پر 2,551 اموات اور 50,056 مریض تندرست ہوچکے ہیں۔

تفصیلات کے مطابق گزشتہ چوبیس گھنٹوں کے دوران ملک بھر میں29,850 ٹیسٹ کیے گئے جس میں مزید 6,472 افراد میں وائرس کی تصدیق کی گئی ہے جو کہ ایک روز میں سامنے آنے والے اب تک کے سب سے زیادہ کیسز ہیں جس کے بعد پاکستان میں متاثرہ افراد کی تعداد 132,405 ہو گئی ہے ۔ گزشتہ چوبیس گھنٹوں میں 9,809 افراد صحت یاب ہوئے ۔

سب سے زیادہ کیسز

کورونا وائرس کے سب سے زیادہ ایکٹو کیسز پنجاب میں ہیں جہاں تعداد 31,589 ہو گئی ہے جبکہ سندھ میں 25,350 ، خیبر پختون خواہ میں11,701، بلوچستان میں 5,064، اسلام آباد میں 5,421 ، گلگت بلتستان میں 352 اور آزاد کشمیر میں 321 ایکٹو کیسز ہیں۔

اموات

کورونا وائرس کے باعث اب تک 2,551 افراد جان کی بازی ہار چکے ہیں جن میں پنجاب میں 938 ، سندھ میں 793، کے پی کے میں 642، بلوچستان میں 80 ، اسلام آباد میں 71 ، گلگت بلتستان میں 16 اور آزاد کشمیر میں 11 افراد وائرس کے باعث دنیا سے رخصت ہو گئے ہیں ۔

صحت یاب

کوروانا وائرس سے اب تک مجموعی طور پر 50,056 افراد صحت یاب ہوئے ہیں ، سندھ میں 23,113، پنجاب میں 17,560، کے پی کے میں 4,072، بلوچستان میں 2,722، اسلام آباد میں 1,671، گلگت بلتستان میں 676 اور آزاد کشمیر میں 242 افراد صحت یاب ہونے کے بعد گھروں کولوٹ گئے ہیں ۔

اسلام آباد ( وقت ٹی وی آن لائن ) مالی سال 21۔2020 کا وفاقی بجٹ آج پیش کیا جائے گا، وزیر صنعت و پیداوار حماد اظہر قومی اسمبلی میں بجٹ پیش کریں گے۔

ذرائع کا کہنا ہے کہ پی ٹی آئی حکومت 34 کھرب روپے سے زائد خسارے کا بجٹ پیش کرے گی، وفاقی بجٹ کا مجموعی تخمینہ 88 کھرب روپے سے زائد لگایا گیا ہے۔

وزیراعظم کی زیر صدارت وفاقی کابینہ کے خصوصی اجلاس میں آج بجٹ تجاویز کی منظوری دی جائے گی، کابینہ کے اجلاس میں سرکاری ملازمین کی تنخواہوں میں اضافے کا بھی فیصلہ کیا جائے گا۔

آئندہ مالی سال کے لیے وفاقی بجٹ میں ایف بی آر کی ٹیکس وصولیوں کا ہدف 49 کھرب 50ارب روپے مقرر کیے جانے کی تجویز ہے جب کہ بجٹ خسارے کا تخمینہ 34 کھرب 27 ارب روپے سے زائد رہنے کا امکان ہے۔

وفاقی بجٹ میں سود اور قرضوں کی ادائیگی پر 31 کھرب 50 ارب روپے، دفاع کے لیے بجٹ میں 12 کھرب 80 ارب روپے کا تخمینہ لگایا گیا ہے۔

بجٹ میں پنشن کے لیے چار کھرب 75 ارب ارب روپے کے فنڈز مختص کرنے کی تجویز ہے جب کہ وفاقی وزارتوں اور محکموں کے لیے چار کھرب 95 ارب روپے کا بجٹ مختص کیے جانے کا امکان ہے، وفاق سبسڈی پر دو کھرب 60 ارب روپے خرچ کرسکتا ہے، گرانٹس کی مد میں 8 کھرب 20 ارب روپے جاری ہو سکتے ہیں۔

ذرائع کا کہنا ہے کہ وفاق کا ترقیاتی بجٹ 6 کھرب 50 ارب روپے رکھا جائے گا، مختلف شعبوں کے لیے سیلز ٹیکس کی چھوٹ ختم کرنے کی سفارش ہے جب کہ نان فائلرز کے لیے ٹیکس کی شرح میں اضافے کی تجویز اور تنخواہ دار طبقے کے لیے انکم ٹیکس میں کسی رعایت کا امکان نہیں، غیر رجسٹرڈ افراد کو ان پٹ ٹیکس کریڈٹ کی سہولت بھی ختم کی جا سکتی ہے۔

نئے مالی سال کے بجٹ میں غیرملکی کرنسی کے لین دین پر ودہولڈنگ ٹیکس عائد کیے جانے کا امکان ہے،غیرملکی کرنسی کے لین دین پر اعشاریہ چھ فیصد سے ایک فیصد تک ودہولڈنگ ٹیکس عائد کرنے کی تجویز ہے جب کہ ای سگریٹ پر فیڈرل ایکسائز ڈیوٹی عائد کیے جانے کا امکان ہے۔

لاہور (وقت ٹی وی آن لائن ) تھائی لینڈ کی عدالت نے ریسٹورینٹ کے دو مالکان کو فراڈ کرنے کے جرم میں 1446 سال قید کی سزا سنادی۔

برطانوی نشریاتی ادارے کے مطابق گزشتہ سال تھائی لینڈ کے ایک مقامی سی فوڈ ریسٹورینٹ نے آن لائن ایڈوانس رقم لے کر کھانا فراہم کرنے کی پیشکش کی جس پرتقریباً 20 ہزار افراد نے 50 ملین تھائی باتھ کی رقم کے برابر واؤچر خریدے لیکن بعد میں ریسٹورینٹ نے واؤچر خریدنے والوں کے آرڈر پورے کرنے سے معذرت کرلی اور ریسٹورینٹ بند کردیا۔

برطانوی میڈیا کے مطابق فراڈ کے بعد سیکڑوں لوگوں نے ریسٹورینٹ کے دو مالکان کے خلاف شکایات درج کرائیں جس پر پولیس نے انہیں گرفتار کرلیا۔

برطانوی میڈیا کا بتانا ہےکہ ریسٹورینٹ کی پیشکش پر لوگوں کی بڑی تعداد نے سی فوڈ لینے کے لیے آرڈر دیے اور واؤچر خریدے لیکن بعد میں ریسٹورینٹ نے اتنی بڑی تعداد میں سی فوڈ فراہم کرنے سے معذرت کرلی اور ریسٹورینٹ کو بند کردیا جب کہ واؤچر خریدنے والے افراد کو رقم واپس کرنے کی بھی پیشکش کی گئی تھی۔

رقم واپس لینے کی پیشکش پر متعدد لوگوں کو رقم کی ادائیگی نہ ہونے پر انہوں نے مالکان کے خلاف جعلی سازی کی شکایت درج کرائی۔ پولیس نے ریسٹورینٹ مالکان کو گرفتار کرنے کے بعد عدالت میں پیش کیا جہاں انہیں عوام سے جھوٹ بولنے اور جعل سازی پر سزا سنائی گئی۔

عدالت نے دونوں مالکان کو مجموعی طور پر 1446 سال کی سزا سنائی جس کے تحت ایک ملزم کو 723 سال کی سزا ہوگی تاہم قوانین کے تحت دونوں ملزمان زیادہ سے زیادہ 20 سال جیل میں گزاریں گے۔

اس کے علاوہ عدالت نے ریسٹورینٹ کو 1.8 ملین تھائی باتھ جرمانہ اور متاثرین کو 2.5 ملین تھائی باتھ ادا کرنے کا بھی حکم دیا۔

برطانوی میڈیا کا بتانا ہےکہ تھائی لینڈ کی عدالت نے 2017 میں فراڈ کے ایک کیس میں ملزم کو 13000 ہزار سال قید کی سزا سنائی تھی لیکن ملکی قوانین کسی بھی ملزم کو زیادہ سے زیادہ 20 سال جیل میں رکھنے کی اجازت دیتے ہیں۔

واشنگٹںن (وقت ٹی وی آن لائن ) واٹس ایپ کمپنی نے دعویٰ کیا ہے کہ اس نے ایپ میں اس سیکیورٹی مسئلے کو دور کردیا ہے جس کی وجہ سے صارفین کے فون نمبرز گوگل سرچ رزلٹ پر دکھائی دے رہے تھے۔

ٹیکنالوجی ویب سائٹ ٹیک کرنچ کی رپورٹ کے مطابق ایک انٹرنیٹ سیکیورٹی محقق اتول جے رام نے کہا کہ صارفین کی جانب سے شکایت کی جارہی تھی کہ جو فون نمبر کلک ٹو چیٹ فیچر کے لیے استعمال کیے جارہے ہیں وہ گوگل سرچ میں نمایاں ہو رہے ہیں۔

جے رام کا کہنا تھا کہ کلک ٹو چیٹ سے ایک لنک بنتا ہے جس میں صارفین کے فون نمبر سادہ ٹیکسٹ میں نظر آتے ہیں تاہم ان لنکس کے لیے سرور روٹ میں robot.txt فائل نہیں ہوتی تو یہ گوگل یا دیگر سرچ انجنز کے انڈیکس میں انہیں شو ہو جاتے ہیں۔

انہوں نے بتایا کہ 3 لاکھ فون نمبروں کو گوگل سرچ رزلٹس میں دیکھا جسے ‘ site:wa.me ‘ سرچ کیا جاسکتا ہے۔

رپورٹ کے مطابق یہ پہلی بار نہیں جب اس مسئلے کو رپورٹ کیا گیا ہے اس سے قبل فروری میں WaBetaInfo نے بھی اس کی نشاندہی کی تھی۔

تاہم اس نئے سیکیورٹی مسئلے پر واٹس ایپ کے ایک ترجمان نے بتایا کہ کلک ٹو چیٹ فیچر صارفین کو مدد دینے کے لیے ڈیزائن کیا گیا خصوصاً چھوٹے اور مائیکرو کاروباری اداروں کے لیے تاکہ وہ اپنے صارفین سے رابطے میں رہ سکیں۔

جب کہ فیس بک نے 2018 میں فون نمبروں کی مدد سے صارفین کو لوگوں کو تلاش کرنے سے پہلے ہی روک دیا تھا۔

لاہور ( وقت ٹی وی آن لائن ) سوئنگ کے سلطان وسیم اکرم نے گیند پر تھوک لگانے پر پابندی عائد کرنے پر خدشہ ظاہر کیا ہے کہ اس سے بولرز کی کارکردگی متاثر ہوگی اور وہ روبوٹ بن جائیں گے۔

انٹرنیشنل کرکٹ کونسل (آئی سی سی) کی جانب سے کورونا وائرس کے باعث کھیلوں کی سرگرمیاں شروع کرنے کے لیے چند گائیڈ لائنز جاری کی گئی ہیں جس میں بولرز کے تھوک سے گیند چمکانے پر پابندی شامل ہے البتہ پسینا لگانے کی اجازت ہے۔

اس حوالے سے خبررساں ادارے اے ایف پی سے بات کرتے ہوئے وسیم اکرم نے کہا کہ اس پابندی سے بولرز روبوٹ بن جائیں گے، جب وہ آکر بغیر سوئنگ کے بولنگ کرائیں گے تو انہیں گیند کے قدرتی طور پر پرانے ہونے کے لیے صبر کے ساتھ انتظار کرنا ہو گا۔

سابق کپتان کا کہنا تھا کہ میرے لیے یہ عجیب صورتحال ہے کیونکہ میں تو تھوک سے بال چمکا کر سوئنگ کرتے ہوئے بڑا ہوا ہوں۔

انہوں نے مزید کہا کہ میں اس مشکل وقت میں احتیاطی تدابیر اپنانے کا قائل ہوں لہٰذا اب بولرز کو گیند پرانے ہونے کا انتظار کرنا ہوگا تاکہ وہ سوئنگ ہو سکے۔

پسینے سے گیند چمکانے پر وسیم اکرم کا کہنا تھا کہ صرف پسینے سے ٹھنڈے ممالک میں گیند سوئنگ ہونا ممکن نہیں اور پسینے کا زیادہ استعمال گیند کو گیلا کر دے گا۔

سابق فاسٹ بولر کا ماننا ہے کہ آئی سی سی کو گیند چمکانے کے حوالے سے کوئی مناسب حل تلاش کرنے کی ضرورت ہے تاہم بال سوئنگ کیلئے مصنوعی طور پر ویسلین کا استعمال ہوسکتا ہے مگر آخر کتنا زیادہ ہوگا؟

سوئنگ کے سلطان کا کہنا تھا کہ ابھی انگلینڈ اور ویسٹ انڈیز کی سیریز ہے اس میں دیکھتے ہیں کیا ہوتا ہے یہ پابندی کیسی رہتی ہے کیونکہ میں نے کبھی اس کا تجربہ نہیں کیا۔

علاوہ ازیں وسیم اکرم نے تجویز دیتے ہوئے کہا کہ حکام کو تھوڑی حد تک بولرز کو بال ٹیمپرنگ کی اجازت دینے پر غور کرنا چاہیے، اس پر بیٹھ کر فیصلہ کیا جائے کہ وہ پہلے اوور سے یا 25 اوورز کے بعد کب کرسکتے ہیں، ورنہ تو گیم پہلے ہی بلے بازوں کے حق میں جاچکا ہے۔

لاہور (ایمرا نیوز آن لائن ) ملک میں آج اب تک کورونا سے مزید 39  افراد انتقال کرگئے جس کے بعد اموات کی مجموعی تعداد 2356 ہوگئی جب کہ نئے کیسز سامنے آنے کے بعد مریضوں کی تعداد 119536 تک پہنچ گئی ہے۔

اب تک پنجاب میں کورونا سے 841 اور سندھ میں 738 افراد انتقال کرچکے ہیں جب کہ خیبر پختونخوا میں 619 افراد جاں بحق ہو چکے ہیں۔

اس کے علاوہ بلوچستان میں 73، اسلام آباد 62، گلگت بلتستان میں 14 اور آزاد کشمیر میں مہلک وائرس سے 9 افراد جاں بحق ہو چکے ہیں۔

آج کے کیسز کی صورت حال

آج بروز جمعرات اب تک ملک بھر سے کورونا کے مزید 2320 کیسز اور 39 اموات سامنے آئی ہیں جن میں پنجاب سے 2003 کیسز اور 34 اموات، اسلام آباد 273 کیسز 5 اموات اور آزاد کشمیر سے 44 کیسز رپورٹ ہوئے ہیں۔

پنجاب

پنجاب سے آج کورونا کے مزید 2003 کیسز اور 34 اموات سامنے آئی ہیں جس کی تصدیق پی ڈی ایم اے نے کی۔

صوبائی ڈیزاسٹر مینجمنٹ اتھارٹی کے مطابق صوبے میں کورونا کے مریضوں کی کل تعداد 45463 اور اموات 841 ہوگئی ہیں۔

اس کے علاوہ صوبے میں اب تک کورونا سے صحت یاب ہونے والوں کی تعداد 9005 ہے۔

اسلام آباد

وفاقی دارالحکومت سے آج کورونا کے مزید 273 کیسز اور 5 اموات سامنے آئی ہیں جس کی تصدیق سرکاری پورٹل پر کی گئی ہے۔

پورٹل کے مطابق اسلام آباد میں کیسز کی مجموعی تعداد 6236 ہوگئی ہے جب کہ 62 افراد انتقال بھی کر چکے ہیں۔

اسلام آباد میں اب تک کورونا وائرس سے 1164 افراد صحت یاب ہو چکے ہیں۔

آزاد کشمیر

آزاد کشمیر سے آج کورونا کے مزید 44 کیسز سامنے آئے ہیں جو سرکاری پورٹل پر رپورٹ کیے گئے ہیں۔

پورٹل کے مطابق آزاد کشمیر میں کورونا کے کل کیسز کی تعداد 488 ہوگئی ہے اور اموات کی تعداد 9 ہے۔

سرکاری پورٹل کے مطابق آزاد کشمیر میں کورونا سے اب تک 219 افراد صحت یاب ہوچکے ہیں۔

سندھ

سندھ سے بدھ کو کورونا کے مزید 2487 کیسز اور 42 ہلاکتیں رپورٹ ہوئیں جس کی تصدیق وزیراعلیٰ نے کی۔

مراد علی شاہ نے بذریعہ ٹوئٹر بتایا کہ گزشتہ 24 گھنٹوں میں ریکارڈ 9100 ٹیسٹ کیے گئے جن میں سے 2487 نئے کیسز سامنے آئے اور مزید 42 افراد انتقال کرگئے جس کے بعد صوبے میں کورونا کے مریضوں کی مجموعی تعداد 43790 اور اموات 738 ہوگئی ہیں۔

وزیراعلیٰ کے مطابق صوبے بھر میں 2487 کیسز میں سے کراچی میں 1755 نئے کیسز آئے ہیں۔

مراد علی شاہ نے بتایا کہ مزید 1111 مریض صحت یاب ہوکر گھروں کو چلے گئے جس سے صحتیاب ہونے والے مریضوں کی تعداد 21007 ہوگئی ہے۔

خیبرپختونخوا

بدھ کو خیبر پختونخوا میں کورونا کے باعث مزید 9 افراد انتقال کرگئے جس کے بعد صوبے میں ہلاکتوں کی تعداد 619 ہوگئی۔

صوبائی محکمہ صحت نے بتایا کہ گزشتہ 24 گھنٹوں کے دوران مزید 679 افراد میں مہلک وائرس کی تصدیق ہوئی جس کے بعد متاثرہ مریضوں کی تعداد 15206 ہوگئی ہے۔

صوبے میں اب تک 3771 افراد کورونا وائرس سے صحت یاب بھی ہو چکے ہیں۔

بلوچستان

بدھ کو بلوچستان میں کورونا کے مزید 304 کیسز اور 11 اموات کی تصدیق ہوئی جس کے بعد صوبے میں متاثرہ مریضوں کی تعداد 7335 ہوگئی جب کہ ہلاکتوں کی تعداد 73 ہوگئی ہے۔

بلوچستان میں کورونا وائرس سے صحت یاب ہونے والوں کی تعداد 2596 ہے۔

گلگت بلتستان

گلگت بلتستان سے بدھ کو کورونا کے 44 نئے کیسز سامنے آئے جس کے بعد علاقے میں کورونا سے متاثرہ مریضوں کی تعداد 1018 ہو گئی ہے جب کہ گلگت میں کورونا سے جاں بحق افراد کی تعداد 14 ہے۔

 گلگت میں اب تک 633 افراد صحت یاب بھی ہو چکے ہیں۔

اسلام آباد (وقت ٹی وی آن لائن ) اسلام آباد ہائیکورٹ نے چینی کمیشن رپورٹ پر عمل درآمد 10 روز کے لیے روکتے ہوئے چینی 70 روپے فی کلو فروخت کرنے کا حکم دے دیا۔

چینی کی قیمتوں میں اضافے کے حوالے سے بنائے گئے انکوائری کمیشن کی رپورٹ کے خلاف درخواست پر سماعت چیف جسٹس اسلام آباد ہائیکورٹ جسٹس اطہر من اللہ کی سربراہی میں ہوئی۔

شوگر ملز مالکان کے وکیل مخدوم علی خان نے اپنے دلائل میں کہا کہ آئین میں وفاق اور صوبوں کے اختیارات کا الگ الگ ذکر موجود ہے۔

انہوں نے کہا کہ فروری میں کارروائی کے لیے ایڈہاک کمیٹی بنائی گئی، انکوائری کمیشن نے شوگر ملزکے فارنزک آڈٹ کے لیے وفاقی حکومت کو لکھا، کمیٹی نے تجویز دی ویسے ہی وہ کمیشن بن گیا۔

چیف جسٹس اطہرمن اللہ کا سوال نے استفسار کیا کہ اس کمیشن نے پھر کیا کہا؟ چینی کی قیمت کیوں بڑھی؟

مخدوم علی خان نے جواب دیا کہ کمیشن نے 324 صفحات کی رپورٹ میں بہت زیادہ وجوہات بیان کی ہیں، کمیشن نے سفارش کی کہ ایف بی آر، ایف آئی اے، نیب کو ملزمان کے خلاف کارروائی کرنی چاہیے۔

چیف جسٹس اسلام آباد ہائیکورٹ نے پوچھا کہ کمیشن نے کیا بتایا کہ عام صارف کے لیے چینی کی قیمت کیوں بڑھی؟ چینی عام آدمی کی ضرورت ہے، حکومت کو بھی اس حوالے سے ہی اقدامات کرنے چاہئیں۔

انہوں نے مزید ریمارکس دیے کہ سادہ سی بات ہے کہ عام آدمی کا بنیادی حق ہے کیونکہ 30 فیصد چینی عام آدمی کے لیے ہوتی ہے۔

سلمان اکرم راجہ نے دلائل دیتے ہوئے کہا کہ عام آدمی اور کمرشل استعمال کی چینی کی قیمت کو کمیشن نے الگ الگ نہیں کیا، جس پر چیف جسٹس نے پوچھا کہ اگرکمیشن نے عام آدمی کو چینی کی دستیابی کے حوالے سے کچھ نہیں کیا تو پھر کیا کیا؟

مخدوم علی خان نے کہا کہ انکوائری کمیشن کا مقصد عام آدمی کو ریلیف مہیا کرنا نہیں بلکہ ہمارا میڈیا ٹرائل تھا، وزیراعظم کے معاون خصوصی کے ذریعے شوگر ملز مالکان کا میڈیا ٹرائل کرایا گیا، یہ میڈیا وار ہے، گزشتہ روزبھی اس حوالے سے پریس کانفرنس کی گئی۔

جسٹس اطہر من اللہ نے استفسار کیا کہ 2 سال پہلے چینی کی قیمت کیا تھی؟ مخدوم علی خان نے بتایا کہ نومبر 2018 میں چینی کی قیمت 53 روپے فی کلو تھی، جس پر چیف جسٹس اطہر من اللہ نے ریمارکس دیے کہ 2 سال میں چینی 85 روپے فی کلو ہوگئی۔

وکیل شوگر ملز نے کہا کہ کمیشن نے اپنے ٹی او آر سے باہر جاکر کارروائی کی۔

چیف جسٹس اسلام آباد ہائیکورٹ نے ریمارکس دیے کہ کمیشن نے عام آدمی کی سہولت کے لیے کوئی فائنڈنگ نہیں دی؟

جسٹس اطہر من اللہ نے کہا کہ ہم حکومت کو نوٹس کر کے پوچھ لیتے ہیں لیکن آپ اس وقت تک 70 روپے کی قیمت پرچینی فروخت کریں۔

جسٹس اطہر من اللہ نے کہا کہ آپ کو شرط منظور ہے تو ہم آئندہ سماعت تک حکومت کو کاروائی سے بھی روک دیتے ہیں، یہ عدالت عمومی طور پرایگزیکٹو کے معاملات میں مداخلت نہیں کرتی۔

چیف جسٹس نے شوگر ملزمالکان کے خلاف کارروائی پرحکم امتناع جاری کرتے ہوئے کہا کہ عام عوام کو اگلے 10 روز تک چینی 70 روپے فی کلو فراہم کی جائے۔

جسٹس اطہر من اللہ نے ایڈیشنل اٹارنی جنرل سے استفسار کیا کہ وفاق عدالت کے آپشن کی مخالفت کرے گا؟ جس پر ایڈیشنل اٹارنی جنرل طارق کھوکھر نے کہا کہ مخالفت نہیں کریں گے۔

چیف جسٹس اطہرمن اللہ نے ریمارکس دیے کہ یہاں پر مفاد عامہ کا سوال سامنے آیا ہے، جس مقصد کے لیے کمیشن بنا تھا وہ ایڈریس ہی نہیں ہوا، کمیشن کو عام آدمی کو چینی کی سہولت فراہمی کے لیے کچھ کرنا تھا لیکن نہیں کیا۔

اسلام آباد ہائیکورٹ نے وفاق، کمیشن کے سربراہ واجد ضیاء، معاون خصوصی برائے احتساب شہزاد اکبر، سیکرٹری داخلہ اور انکوائری کمیشن کے ارکان سمیت درخواست کےتمام فریقین کو نوٹس جاری کر دیے۔

خیال رہے کہ گذشتہ دنوں حکومت چینی بحران پر وفاقی تحقیقاتی ایجنسی (ایف آئی اے) کی تحقیقاتی رپورٹ کا فارنزک کرنے والے کمیشن کی حتمی رپورٹ منظر عام پر لے آئی تھی۔

رپورٹ کے مطابق جہانگیر ترین، مونس الٰہی، شہباز شریف اور ان کے اہل خانہ، اومنی گروپ اور عمرشہریار چینی بحران کے ذمے دار قرار دیے گئے ہیں۔

فارنزک آڈٹ رپورٹ میں چینی اسیکنڈل میں ملوث افراد کےخلاف فوجداری مقدمات درج کرنے اور ریکوری کرنےکی سفارش کی گئی ہے جب کہ رپورٹ میں تجویز دی گئی ہے کہ ریکوری کی رقم گنےکے متاثرہ کسانوں میں تقسیم کردی جائے۔

انکوائری کمیشن کی رپورٹ کی سفارشات کی روشنی میں حکومت نے چینی پر 29 ار ب روپے کی سبسڈی کا معاملہ قومی احتساب بیورو(نیب) اور ٹیکس سے متعلق معاملات فیڈرل بورڈ آف ریونیو( ایف بی آر) کو بھیجنے کا فیصلہ کیا ہے۔

لیکن شوگر ملز ایسوسی ایشن نے چینی انکوائری کمیشن کی تحقیقاتی رپورٹ کو اسلام آباد ہائی کورٹ میں چیلنج کردیا ہے۔

شوگر ملز ایسوسی ایشن کا مؤقف ہے کہ چینی انکوائری کمیشن نے چینی کی قیمتوں میں اضافے اور بحران کی تحقیقات کے دوران قانونی تقاضے پورے نہیں کیے۔

گذشتہ دنوں وفاقی کابینہ کے اجلاس کے بعد میڈیا سے گفتگو میں وزیراعظم کے معاون خصوصی برائے احتساب شہزاد اکبر کا کہنا تھا کہ چینی افغانستان ایکسپورٹ کے معاملے کی تحقیقات ایف آئی اے کرے گی جب کہ مسابقتی کمیشن 90 روز میں چینی کےکاروبار میں گٹھ جوڑکی تحقیقات کرےگا اور اسٹیٹ بینک کو بھی ایسے معاملات میں 90 روز میں کارروائی کی ہدایت کی گئی ہے۔