All posts by News Desk

بیجنگ(ویب ڈیسک) بھارت اور چین کے درمیان سرحدوں پر 17 ماہ سے جاری کشیدگی کو کم کرنے کے لیے ہونے والے مذاکرات ناکام ہوگئے۔
عالمی خبر رساں ادارے کے مطابق بھارت کی جانب سے لداخ کی خصوصی حیثیت کے خاتمے اور متنازع علاقے کو اپنا حصہ قرار دینے کے بعد سے سرحد پر کشیدگی میں اضافہ ہوا تھا۔ دونوں ممالک کی افواج کے درمیان جھڑپیں بھی ہوئیں۔سرحدوں پر کشیدگی کے خاتمے اور تناؤ کو کم کرنے کے لیے 17 ماہ سے دونوں ممالک کے افواج کے درمیان مذاکرات جاری تھے جو بے نتیجہ ثابت ہوئے اور دوسرے برس بھی منجمد کردینے والی سخت سردی میں دونوں افواج کو سرحدوں پر ڈیوٹی دینا ہوگی۔چین اور بھارت کے فوجی کمانڈرز نے مذاکرات میں ناکامی کی تصدیق کرتے ہوئے بتایا کہ دونوں کے لیے قابل قبول تجاویز پر اتفاق نہیں ہوسکنے کے باعث مذاکرات تعطل کا شکار ہو گئے۔
چینی فوج کے ترجمان کی جانب سے جاری بیان میں کہا گیا ہے کہ بھارتی فوج غیرمعقول اور غیر حقیقت پسندانہ مطالبات پر بضد ہے اور مذاکرات میں جان بوجھ کر مشکلات میں اضافہ کر رہا ہے۔خیال رہے کہ دونوں افواج کے کمانڈروں نے گزشتہ روز ہی لداخ کے علاقے میں چینی سرحد پر دو ماہ کے وقفے کے بعد مذاکرات کے لیے ملاقات کی تھی۔

دبئی(ویب ڈیسک) ٹی 20 ورلڈ کپ میں بھی ڈی آر ایس ڈیبیو کے لیے تیار ہے جب کہ مختصر فارمیٹ کے میگا ایونٹ میں بھی پلیئرز کو اب امپائرز کے فیصلے چیلنج کرنے کا اختیار ہوگا۔
آئی سی سی مینز ٹی 20 ورلڈ کپ میں پہلی بار ڈسیشن ریویو سسٹم ڈی آر ایس کا استعمال ہوگا، آئی سی سی نے میگا ایونٹ کیلیے سسٹم کی دستیابی کی تصدیق کردی ہے، ٹورنامنٹ کا آغاز 17 اکتوبر سے عمان میں ابتدائی راؤنڈ کے ساتھ ہوگا جبکہ باقی مقابلے متحدہ عرب امارات میں کھیلے جائیں گے۔
ہر ٹیم کو ایک اننگز میں زیادہ سے زیادہ 2 ریویوز حاصل ہوں گے، کھیل کی عالمی گورننگ باڈی نے گذشتہ برس جون میں ہی واضح کیا تھا کہ کوویڈ کی وجہ سے بانسبت کم تجربہ کار ہوم امپائرز کی وجہ سے تمام فارمیٹس میں ہر اننگز کے دوران ٹیموں کو 2 ریویوز دستیاب ہوں گے۔ اس کے بعد سفید بال کرکٹ میں اننگز میں 2 جبکہ ٹیسٹ کرکٹ میں اننگز میں 3 ریویو دیے جاتے ہیں۔
آئی سی سی نے بارش کی وجہ سے تاخیر کا شکار ہونے والے مقابلوں کیلیے کم سے کم اوورز کی تعداد میں اصافہ کردیا ہے، ڈی ایل ایس پر نتیجے کیلیے پر ٹیم کو کم سے کم 5 اوورز تک بیٹنگ کرنا ہوگی تاہم سیمی فائنلز اور فائنل کیلیے دونوں ٹیموں کا کم سے کم 10 اوورز تک کھیلنا ضروری ہے۔
گزشتہ برس ویمنز ٹی 20 ورلڈ کپ میں بھی یہی کنڈیشنز لاگو تھیں، جب سڈنی میں انگلینڈ اور بھارت کے درمیان پہلا سیمی فائنل بارش کی نذر ہوا اور ریزرو ڈے نہ ہونے کی وجہ سے اس قانون کو تنقید کا بھی نشانہ بنایا گیا تھا۔
یاد رہے کہ آخری مرتبہ مینز ٹی 20 ورلڈ کپ 2016 میں کھیلا گیا تھا جس میں ڈی آر ایس کا استعمال نہیں ہوا تھا۔ ویمنز ٹی 20 ورلڈ کپ میں ڈی آر ایس کا استعمال 2018 میں ہوا تھا۔

اسلام آباد(ویب ڈیسک) پولیس نے عدالتی حکم پر سابق وفاقی وزیر قانون وصی ظفر کے بیٹے وقار وصی کو گرفتار کرلیا۔سینئر سول جج فیملی کورٹ قدرت اللہ نے وقار وصی کی گرفتاری کا حکم سناتے ہوئے عدالتی فیصلے پر عملدرآمد نہ کرنے پر اسے ایک سال قید کی سزا سنا دی۔ عدالت نے حکم دیا کہ وقار وصی کو عدالتی فیصلے پر عملدرآمد کرنے پر ایک سال سے قبل ہی رہا کر دیا جائے۔عدالت نے 20 مارچ 2018 کو وقار وصی کو سابقہ بیوی کو زیورات واپسی کا حکم دیا تھا، لیکن وقار وصی نے عدالتی فیصلے کو طویل عرصہ گزرنے کے باوجود اپنی مطلقہ بیوی کو جہیز کا سامان واپس نہیں کیا۔
جج قدرت اللہ نے فیصلے میں کہا کہ وقار وصی عدالتی فیصلے پر عملدرآمد میں ناکام رہے اور جہیز کا سامان واپس نہ کرنے کا کوئی مناسب جواز بھی پیش نہ کر سکے۔
وصی ظفر کا تعلق مسلم لیگ (ق) سے تھا اور پرویز مشرف کی کابینہ میں وفاقی وزیرِ قانون تھے۔ وہ رواں سال 72 سال کی عمر میں انتقال کر گئے۔ انہوں نے ایک انٹرویو میں نازیبا زبان استعمال کی تھی جو وائرل ہوگئی تھی۔

کراچی(ویب ڈیسک) بختاور بھٹو زرداری کے ہاں بیٹے کی پیدائش ہوئی ہے۔سابق صدر آصف علی زرداری کی صاحبزداری بختاور بھٹو زرداری کے ہاں بیٹے کی پیدائش ہوئی ہے جس کی تصدیق خود بختاور بھٹو زرداری نے سماجی رابطے کی ویب سائٹ پر ٹوئٹ کرتے ہوئے کی۔بختاور بھٹو زرداری نے اپنی ٹوئٹ میں اللہ کا شکر ادا کرتے ہوئے کہا ’’یہ بتانے میں بہت خوشی محسوس ہورہی ہے کہ اللہ نے ہمیں بیٹے سے نوازا ہے‘‘۔ انہوں نے اپنی ٹوئٹ میں بچے کی تاریخ پیدائش 10 اکتوبر 2021 لکھی
دوسری جانب پاکستان پیپلزپارٹی کے چیئرمین بلاول بھٹو زرداری نے اپنی بہن بختاور بھٹو زرداری کی ٹوئٹ پر کہا ’’میں باقائدہ ماموں بن گیا ہوں‘‘۔آصف علی زرداری کی چھوٹی بیٹی آصفہ بھٹو زرداری نے ٹوئٹ کرتے ہوئے کہا ’’ الحمداللہ، میں باقاعدہ خالہ بن گئی ہوں‘‘۔واضح رہے بختاور بھٹو زرداری کی شادی رواں سال 29 جنوری کو محمود چوہدری سے ہوئی تھی۔

لاہور(ویب ڈیسک) مینار پاکستان واقعے میں نئی پیش رفت ہوئی ہے جس میں ٹک ٹاکر عائشہ اکرام اور اس کے ساتھی ریمبو کی مبینہ آڈیو ٹیپ سامنے آ گئی۔
عائشہ اور ریمبو کے درمیان شناخت کیے گئے 6 ملزمان سے پانچ پانچ لاکھ روپے لینے کا مکالمہ ہورہا ہے۔خاتون کہتی ہے کہ ملزم غریب ہیں اور وہ پانچ پانچ لاکھ روپے ہی دے دیں تو بہت ہیں۔ دوسری طرف ریمبو عائشہ کو جواب دیتا ہے کہ چلیں ٹھیک ہے میں بات کرتا ہوں۔ آڈیو ٹیپ ریمبو نے فراہم کی جسے پولیس نے ریکارڈ کا حصہ بنا لیا ہے۔
واضح رہے کہ عائشہ اکرم نے مینار پاکستان پر پیش آنے والے واقعے کا ذمے دار اپنے ساتھی ریمبو کو ٹھہرا یا،جس پر ریمبو کو گرفتار کرلیا گیا۔ عائشہ اکرم نے الزام لگایا کہ ریمبو مجھے بلیک میل کرکے دس لاکھ روپے لے چکا ہے ، میں اپنی تنخواہ میں سے آدھے پیسے ریمبو کو دیتی تھی ۔ ریمبو اپنے ساتھی بادشاہ کے ساتھ مل کر ٹک ٹاک گینگ چلاتا ہےدوسری طرف ریمبو نے الزام لگایا ہے کہ عائشہ اکرام گرفتار ملزمان سے پیسے لے کر انہیں چھڑوانے کا منصوبہ بنارہی تھی۔

لاہور(پ.ر) پاکستان کے سب سے بڑے پراپرٹی ادارے زمین ڈاٹ کام نے مین رائیونڈ روڈ لاہور پرزیر تعمیر جدید کثیر المنزلہ منصوبے جے مال کی مارکیٹنگ اور سیلز کے حقوق حاصل کر لئے ہیں۔ اس حوالے سے زمین ڈاٹ کام کے ہیڈ آفس میں تقریب منعقد کی گئی، جس میں زمین ڈاٹ کام کے سینئر ڈائریکٹرسیلز لاہور لئیق چوہدری، ڈائریکٹرز پراجیکٹ سیلز لاہور باسل حفیظ، علی ریحان اور محمد عثمان، یونٹ ہیڈ پراجیکٹ ایکوزیشنز اینڈ جے ویز محسن گلزار جبکہ جے مال کےچیئرمین میاں جہانگیر سمیت دیگر عہدیداران شریک ہوئے۔
ٹھوکر نیاز بیگ سے صرف ایک کلومیٹر مین رائیونڈ روڈ کی پرائم لوکیشن پرایل ڈی اے سے منظور شدہ جے مال ایک کثیر المقاصد منصوبہ ہے جس میں شہر لاہور کے سب سے شاندار اور لگژری اپارٹمنٹس پیش کئے جائیں گے۔ جے مال سے موٹروے ایم-2 تک رسائی صرف 2 منٹ اوررنگ روڈ 5 منٹ کی مسافت پر ہے۔ جے مال میں مخصوص پارکنگ، سمارٹ سکیورٹی سسٹم اور روف ٹاپ ٹیرس سمیت دیگر عالمی معیار کی سہولیات بھی فراہم کی جائیں گی۔
اس حوالے سے گفتگو کرتے ہوئے زمین ڈاٹ کام کے سینئر ڈائریکٹر سیلز لاہور لئیق چوہدری نے کہا کہ جے مال میں پیش کئے جانے والے لگژری اپارٹمنٹس اپنی جدید اور عالمی معیار کے مطابق سہولیات کی بدولت رئیل اسٹیٹ مارکیٹ میں ایک منفرد اضافہ ثابت ہوں گے۔ انہوں نے کہا کہ ایسے بے مثال منصوبے متعارف ہونے کے بعد شہر لاہور میں اب اپارٹمنٹ لیونگ کا کلچر فروغ پا رہا ہے جو کہ رئیل اسٹیٹ مارکیٹ کے لئے خوش آئند ہے۔
جے مال کےچیئرمین میاں جہانگیر نے کہا کہ مین رائیونڈ روڈ کی شاندار لوکیشن پر اورنج لائن ٹرین اسٹیشن کےبالکل قریب پیدل مسافت پر جے مال کی تعمیر 80 فیصد مکمل ہو چکی ہے اور فنشنگ کا عمل جاری ہے۔ اس منصوبے کے تمام لگژری اپارٹمنٹس کو عالمی معیار کے مطابق نہ صرف جدید اور منفرد سہولیات دستیاب ہوں گی بلکہ شہر کی سب سے پرائم لوکیشن کی وجہ سے یہاں سے تمام اہم مقامات تک رسائی بھی آسان ترین ہو گی۔

اسلام آباد (ویب ڈیسک) نیشنل کمانڈ اینڈ آپریشن سینٹر نے ماہِ ربیع الاوّل کے حوالے سے ہونے والے محفل میلاد اور سیرت کانفرنسوں کے انعقاد کے موقع پرہدایات جاری کی ہیں جس کے مطابق علماء اور نعت خوانوں کی مکمل ویکسی نیشن لازمی قرار دی گئی ہے۔تفصیلات کے مطابق نیشنل کمانڈ اینڈ آپریشن سینٹر نے محفل میلاد کے دوران کوویڈ ایس او پیز پرعمل کرنے سمیت ماسک کا استعمال، سماجی فاصلہ اور سینیٹائزر کی دستیابی کو یقینی بنانے پر زور دیا ہے۔
ہدایات میں مزید کہا گیا ہے کہ محفل میں شرکت کرنیوالوں کی ویکسی نیشن کی جائے، سیرت کانفرنسوں کے انعقاد کا مقام کھلا اور کشادہ ہونا چاہیے، 6فٹ سماجی فاصلے کوبرقرار رکھنا لازمی ہے علاوہ ازیں مسجد،پنڈال انتظامیہ سماجی فاصلے کے نشانات کوواضح کرنا یقینی بنائیں، داخلی راستوں پر تمام افراد کی تھرمل اسکریننگ کو یقینی بنایا جائے.

اسلام آباد(ویب ڈیسک) قومی کرکٹ ٹیم کے سابق اسپنر سعید اجمل نے کہا ہے کہ بھارت کے پاس پیسہ اور تگڑے اسپانسرز ہیں جس کی وجہ سے ان کا کرکٹ بورڈ بہت مضبوط ہے۔سابق اسپنر سعید اجمل ایک شو بولنگ ایکشن ’دوسرا‘ سے متعلق گفتگو کی۔لگنے والی پابندی سے متعلق سعید اجمل نے بتایا کہ انٹرنیشنل کرکٹ کونسل (آئی سی سی) نے ہر چیز میں سائنس کو ڈال دیا ہے اور کہا ہے کہ ہم ایسا نہیں ہونے دیں گے۔
انہوں نے مزید کہا کہ مجھ پر الزام لگانے سے قبل انھوں نے بھارتی اسپنر روی چندرن ایشون کو 6 ماہ کے لیے بولنگ سے روکا، ایشون کوبھی 6 ماہ ریسٹ کا کہا ، پھر بعد ازاں مجھے اور حفیظ کو سائیڈ لائن کر دیا گیا۔ بھارتی کرکٹ ٹیم کے فاسٹ بولر جسپریت بھمراہ اور بولر ہربھجن سنگھ کے ساتھ بھی مسئلہ تھا لیکن چونکہ وہ دونوں بھارتی کرکٹر ہیں اور پھر ان کے کرکٹ بورڈ کے پاس پیسہ اور اسپانسر دونوں تگڑے ہیں، اور پیسہ سر چڑھ کر بولتا ہے۔

(ویب ڈیسک)جموں کشمیر کی سابق وزیراعلیٰ اور پیپلز ڈیموکریٹک پارٹی کی صدرمحبوبہ مفتی نے منشیات کیس میں گرفتاراداکار شاہ رخ خان کے بیٹے کے حوالے سےاہم بیان جاری کیا ہے۔تفصیلات کے مطابق محبوبہ مفتی نے ٹوئٹر پر جاری اپنے پیغام میں کہا کہ قانون نافذ کرنے والے ادارے آریان کو اس کے سَر نیم کی وجہ سے نشانہ بنا رہے ہیں۔
انہوں نے انتہا پسند حکمران جماعت بی جے پی پر تنقید کرتے ہوئے لکھا کہ ملک کی ایجنسیاں یونین وزیر اجے مشرا کے بیٹے پر 4 کسانوں کو قتل کرنے کے جرم پر نظر ثانی کرنے کی بجائے 23 سالہ لڑکے کے پیچھے پڑگئی ہیں کیونکہ اس کا سَر نیم ‘خان’ ہے۔محبوبہ مفتی نے مزید لکھا کہ یہ انصاف کی توہین ہے کہ بی جے پی اپنے ووٹ بینک کی خوشی اور تسکین کیلئے مسلمانوں کو نشانہ بنا رہی ہے۔

کراچی (ویب ڈیسک) شوبز اداکار ہوں یا کرکٹر سوشل میڈیا پر ان کے چرچے ہوتے رہتے ہیں .اسی سلسلے میں اداکارہ عائشہ عمر اور کرکٹر شعیب ملک کا بولڈ فوٹو شوٹ سوشل میڈیا پر وائرل ہواہے، سوشل میڈیا صارفین کی جانب سے جہاں فوٹو شوٹ کی تعریف کی گئی ہے وہیں کچھ صارفین کی جانب سے سخت ناپسندیدگی کا اظہار بھی کیا گیا۔
دوسری طرف شعیب ملک نے فوٹو شوٹ کو انسٹاگرام پر شئیر کیا اورکہا کہ مجھے ہمیشہ اپنے دوستوں کے ساتھ کام کرکے خوشی محسوس ہوتی ہے، مجھے عائشہ عمر کے ساتھ کام کرکے مزہ آیا۔