All posts by News Editor

پاکستان تحریک انصاف (پی ٹی آئی) کے نومنتخب رکن قانون ساز اسمبلی عبدالقیوم نیازی آزاد جموں و کشمیر کے نئے وزیراعظم منتخب ہوگئے اور اپنے منصب کا حلف بھی اٹھالیا۔

مظفر آباد میں آزاد جموں و کشمیر کے صدر سردار مسعود خان نے نئے وزیراعظم عبدالقیوم نیازی سے حلف لیا۔

عبد القیوم نیازی نے آزاد جموں و کشمیر کی نئی بننے والی قانون ساز اسمبلی میں 33 ووٹ حاصل کیے جبکہ مشترکہ اپوزیشن کے امیدوار چوہدری لطیف اکبر نے 15 ووٹ حاصل کیے۔

یاد رہے کہ عبدالقیوم سے قبل مسلم لیگ (ن) کے راجا فاروق حیدر آزاد جموں و کشمیر کے وزیراعظم تھے اور ان کی عہدے کی معیاد30 جولائی کو ختم ہوگئی تھی۔

علاوہ ازیں عبد القیوم نیازی نے سماجی رابطے کی ویب سائٹ ٹوئٹر پر بیان جاری کرتے ہوئے کہا کہ ‘میں وزیراعظم عمران خان کا شکریہ ادا کرتا ہوں جنہوں نے مجھے وزیراعظم آزاد کشمیر نامزد کیا’۔

ان کا کہنا تھا کہ ‘میں اپنے عوام اور عمران خان سے وعدہ کرتا ہوں کہ میں اپنی ذمہ داریاں ایمانداری سے ادا کروں گا اور آپ کے اعتماد پر پورا اترنے کی کوشش کروں گا’۔

واضح رہے کہ سردار عبدالقیوم خان نیازی نے اپنے سیاسی کیریئر کا آغاز 2006 میں مسلم کانفرنس کے پلیٹ فارم سے کیا اور آزاد جموں وکشمیر کی قانون ساز اسمبلی کے رکن منتخب ہوئے۔

وہ 2011 تک بطور وزیر خوراک، جنگلات اور جیل خانہ جات و ریونیو رہے، انہوں نے 2016 میں پاکستان تحریک انصاف میں شمولیت اختیار کی تھی۔

قبل ازیں وفاقی وزیر اطلاعات و نشریات فواد چوہدری نے اعلان کیا تھا کہ وزیر اعظم عمران خان نے عبدالقیوم نیازی کو آزاد جموں و کشمیر کا اگلا وزیر اعظم نامزد کردیا ہے۔

سماجی روابط کی ویب سائٹ ٹوئٹر پر ایک ٹوئٹ میں انہوں نے کہا کہ ‘طویل مشاورت اور تجاویز کے جائزے کے بعد وزیر اعظم پاکستان و چیئرمین تحریک انصاف عمران خان نے نومنتخب ایم ایل اے جناب عبدالقیوم نیازی کو وزیر اعظم آزاد کشمیر کے عہدے کیلئے نامزد کیا ہے’۔

ان کا کہنا تھا کہ ‘وہ ایک متحرک اور حقیقی سیاسی کارکن ہیں جن کا دل کارکنوں کے ساتھ دھڑکتا ہے’۔

وزیر اعلیٰ پنجاب کے ڈیجیٹل میڈیا کے لیے فوکل پرسن اظہر مشوانی نے کہا کہ عبدالقیوم نیازی سرحدی علاقے عباس پور، پونچ سے آزاد کشمیر کے قانون ساز اسمبلی کے رکن ہیں۔

انہوں نے کہا کہ وہ پی ٹی آئی کے مرکزی جوائنٹ سیکریٹری بھی ہیں۔

خیال رہے کہ وزیر اعظم عمران خان نے جمعہ اور ہفتے کو آزاد کشمیر کے وزیر اعظم کے عہدے کے لیے 7 اُمیدواروں کے انٹرویو کیے تھے۔

وزیر اعظم نے ان سے مستقبل کی حکمت عملی، ماحولیات، سیاحت اور قومی اور بین الاقوامی مسائل کے بارے میں خیالات سمیت مختلف سوالات کیے تھے۔

ایک ذرائع کے مطابق وزیر اعظم عمران نے اس حقیقت پر برہمی کا اظہار کیا تھا کہ ان سے مختلف حلقوں کی طرف سے رابطہ کیا جا رہا ہے جو مخصوص امیدواروں کو منتخب کرنے کے لیے دباؤ ڈال رہے ہیں۔

عبدالقیوم نیازی، جنہوں نے حالیہ آزاد جموں و کشمیر کے انتخابات میں ایل اے 18 کی نشست سے فتح حاصل کی تھی، اس سے قبل وزیر اعظم کے انتخاب میں شامل نہیں تھے تاہم ان کا نام اچانک منظر عام پر آیا۔

آزاد جموں و کشمیر کے حالیہ انتخابات میں کامیابی کے بعد پی ٹی آئی نے اکثریت حاصل کی اور وزیراعظم کے انتخاب سے قبل قانون ساز اسمبلی میں گزشتہ روز اسپیکر اور ڈپٹی اسپیکر کا انتخاب ہوا تھا جہاں پی ٹی آئی کے چوہدری انوار الحق اسپیکر اور ریاض احمد ڈپٹی اسپیکر منتخب ہوگئے تھے۔

اپوزیشن جماعتوں پاکستان پیپلز پارٹی (پی پی پی) کے راجا فیصل ممتاز راٹھور اور پاکستان مسلم لیگ (ن) کی نثاراں عباسی اسپیکر اور ڈپٹی اسپیکر کے لیے ان کے مدمقابل تھے تاہم انہیں 32 کے مقابلے میں 15 ووٹ ملے۔

یاد رہے کہ آزاد جموں و کشمیر میں 25 جولائی کو منعقدہ عام انتخابات 2021 میں پی ٹی آئی نے براہ راست مقابلے میں 26، پیپلز پارٹی نے11 اور پاکستان مسلم لیگ (ن) نے 6 نشستیں حاصل کرلی تھیں بعد ازاں خواتین کے لیے مخصوص نشستوں میں سے تین پی ٹی آئی، ایک،ایک پی پی پی اور پاکستان مسلم لیگ (ن) کو ملی تھیں۔

ٹینکوکریٹ کی تینوں نشستیں بھی پی ٹی آئی کو ملیں اور اس طرح ایوان میں ان کے ارکان کی تعداد 32 ہوگئی جبکہ پی پی پی کی 12 اور پاکستان مسلم لیگ (ن) کی 7 ہوگئی۔

اسلام آباد: پارلیمانی حلقوں میں نئی بحث شروع ہوگئی کہ قیوم نیازی کیسے وزیراعظم آزاد کشمیر منتخب ہوگئے۔

نومنتخب وزیراعظم آزاد کشمیر قیوم نیازی اس عہدے کے امیدواران میں ہی شامل نہیں تھے اور انہیں کسی رسمی انٹرویو میں بھی نہیں بلایا گیا تھا، کیونکہ بطور امیدوار سردار تنویر الیاس، بیرسٹر سلطان، خواجہ فاروق اور اظہر صادق کا انٹرویو ہوا تھا۔

ذرائع کے مطابق قیوم نیازی کی بطور وزیراعظم نامزدگی میں دعاوٴں کا اثر زیادہ ہوا، استخارہ اور زائچہ میں ضلع پونچھ کا نام آیا جس پر فیصلہ ہوا، وزیراعظم نے امیدواروں اور پارٹی سیاست کو دیکھتے ہوئے روحانی طریقہ کار کے مطابق فیصلہ کیا، وزیراعظم آزاد کشمیر کی نامزدگی پر انتہائی راز داری سے مشاورت ہوئی اور وزیراعظم عمران خان کے قریبی حلقوں سے مشاورت کے بعد قرعہ ضلع پونچھ کے نام نکلا جس کے باعث ضلع پونچھ کی 7 نشستوں میں حلقہ ایل اے 18 پر اتفاق کیا گیا۔

نومنتخب وزیراعظم قیوم نیازی سے وزیراعظم عمران خان کی عباس پور جلسہ سے پہلے جان پہچان نہیں تھی، جس کا اندازہ اس بات سے لگایا جاسکتا ہے کہ وزیراعظم عمران خان نے قیوم نیازی کے نام پر بھی دوران جلسہ ہی تعجب کا اظہار کیا تھا۔

عبدالقیوم نیازی کا تعلق حلقہ ایل اے 18پونچھ سے ہے۔ ذرائع کے مطابق وزیر اعظم عمران خان کو مشورہ دیا گیا کہ آزاد کشمیر میں پی ٹی آئی کے لیے 13 یا 18 کا ہندسہ فائدہ مند اور برکت والاہو سکتا ہے۔ اس کے ساتھ ساتھ لفظ ‘ع‘ کے ساتھ شروع ہونے والا نام ہو تو آزاد کشمیر حکومت نہ صرف اپنی مددت پوری کرے گی بلکہ اس سے پی ٹی آئی کشمیر میں بھی مستحکم ہو گی۔

ذرائع کے مطابق اس کے بعد حلقہ ایل اے 13 سے انصر ابدالی اور حلقہ ایل اے18 سے سردار عبدالقیوم خان نیازی کو وزیر اعظم پاکستان کا ہیلی کاپٹر بھیج کر مظفرآباد سے اسلام آباد بلوایاگیا۔

ذرائع کے مطابق وزیراعظم نے کشمیر پالیسی اور امور ریاست کشمیر سمیت دیگر ایشوز پر ان سے تبادلہ خیال کیا اور پارٹی ذمہ داران سے طویل مشاورت کے بعد سردار عبدالقیوم نیازی کو آزادکشمیر کا نیا وزیر اعظم نامزد کر دیا۔

وہ آزاد کشمیر کے تیرہویں وزیر اعظم ہیں۔ واضح رہے سردار عبد القیوم نیازی کا تعلق کنٹرول لائن پر واقع گاؤں درہ شیر خان سے ہے۔

سردار عبد القیوم نیازی نے اپنے سیاسی کیریئر کا آغاز 1982 میں بطور ڈسٹرکٹ کونسلر ضلع پونچھ آزاد کشمیر سے کیا ، مسلم کانفرنس سے خاندانی طور پر تعلق رہا۔

2006 میں پہلی بار مسلم کانفرنس کے ٹکٹ پر ممبر اسمبلی منتخب ہوئے اور اپنی پارلیمانی سیاست کا آغاز کیا۔ 2006 سے 2011 تک وزیر مال، جیل خانہ جات و دیگر رہے۔

2021 کے الیکشن میں سردارعبدالقیوم نیازی نے 24 ہزار 500 سے زائد ووٹ لے کر تمام برادریوں کا بھرپور اعتماد لیا۔

عبد القیوم نیازی کے حوالے سے یہ مشہور ہے کہ یہ اپنے حلقے کے لوگوں کے دکھ کو ہمیشہ اپنا دکھ سمجھتے ہیں اور فوتگی ہو یا بیماری، سب سے پہلے متاثرہ فیملی کے پاس پہنچتے ہیں۔

سردار عبد القیوم نیازی کے بڑے بھائی سردار غلام مصطفیٰ دو بار آزاد کشمیر اسمبلی کے ممبر اور وزیر رہ چکے ہیں۔

سردار عبد القیوم نیازی کے ایک چھوٹے بھائی سردار حبیب ضیاء سپریم کورٹ آزاد کشمیر کے منجھے ہوئے وکیل ہیں۔ آپ کے تیسرے بھائی امریکا میں مقیم ہیں۔

سردار عبد القیوم نیازی کا ایک بیٹا برطانیہ میں کونسلر ہے۔ سردار عبد القیوم نیازی نے آزاد کشمیر یونیورسٹی سے گریجویشن کر رکھی ہے

نور مقدم قتل کیس میں ملزم ظاہر جعفر کے والدین ذاکر جعفر اور عصمت آدم جی کی درخواست ضمانت کا فیصلہ کل سنایا جائےگا۔

اسلام آباد کی مقامی عدالت میں ملزم ظاہرجعفر کے والدین کی درخواست ضمانت پرسماعت ہوئی۔

دورانِ سماعت ملزمان کے وکیل نےکہا کہ ان کے موکل متاثرہ پارٹی کے ساتھ کھڑے ہیں ، اپنے بیٹے کے ساتھ نہیں، انہیں نہیں معلوم تھا کہ ان کےگھر ایسا کوئی کام ہو رہا ہے، ماں اور بیٹے کا رابطہ ہونا کوئی جرم نہیں ، یہ تو روٹین کا رابطہ ہے۔

وکیل کا کہنا تھا کہ پہلے دن سے میرے مؤکلین نے پبلک میں اس قتل کی مذمت کی،ملزم کے بیان کوبنیاد بناکر ذاکرجعفر اورعصمت کو شامل کیا گیا، انہوں نے کونسی معلومات غلط دیں ،کون سا ثبوت چھپایا ، ریکارڈ پر ایسا کچھ بھی نہیں۔

پبلک پراسیکیوٹر نےکہا کہ ملزم کی والدین کے ساتھ بات ہورہی تھی لیکن انہوں نے پولیس کو آگاہ نہیں کیا ، انہوں نے بیٹے کو بچانے کی کوشش کی، جب ملازم نےکال کی تو وہاں ایکٹ ہو رہا تھا،انہوں نے پولیس کے بجائےتھراپی ورک والوں کوبھیجا،پستول بھی ملاہے جو ملزم کے والد ذاکر جعفر کے نام پر ہے۔

پراسیکیوٹر نےکہا کہ کال ، سی ڈی آر ، ڈی وی آر ،سی سی ٹی وی فوٹیج دیکھی جاسکتی ہے، بد دیانتی کی بنیاد پر انہوں نے بچےکو بچانے کی کوشش کی، اس اسٹیج پر ضمانت کی درخواست مسترد ہونی چاہیے۔

مقتولہ نور مقدم کے والد کے وکیل شاہ خاور نےکہا کہ 20 جولائی کی شام ملزم نے 3 بار والد کو کال کی ، والدہ کو بھی کال کی ، یہ وقت تھا جب نور مقدم ظاہر جعفر کے پاس تھی، آدھا کلومیٹر پر پولیس اسٹیشن ہے، چوکیدار کو نہیں کہا گیا وہ وہاں جائے،بادی النظرمیں ذاکرجعفر اور عصمت کا ایکٹ ملزم کےساتھ کنیکٹ ہوتا ہے اوریہ کافی ہے۔

ایڈیشنل سیشن جج محمد سہیل نے ضمانت کی درخواستوں پر فیصلہ محفوظ کرلیا ہے جو کہ کل سنایا جائےگا۔

خیال رہے کہ 20 مئی کو تھانہ کوہسار کی حدود ایف سیون فور میں 28 سالہ لڑکی نور مقدم کو تیز دھار آلے سے قتل کردیا گیا تھا۔

ملزم ظاہر جعفر اور اُس کے والدین ذاکر جعفر اور عصمت آدم جی جوڈیشل ریمانڈ پر اڈیالہ جیل میں ہیں ۔

پاکستان تحریک انصاف (پی ٹی آئی) کے رکن پنجاب اسمبلی نذیر چوہان نے جیل سے رہائی کے بعد سینئر رہنما جہانگیر ترین پر شدید تنقید کرتے ہوئے اعلان کیا کہ ان کا جہانگیرترین گروپ سے کوئی تعلق نہیں۔

واضح رہے کہ گزشتہ ماہ نذیر چوہان کو وزیراعظم کے مشیر احتساب مرزا شہزاد اکبر کی شکایت پر گرفتار کیا گیا تھا تاہم دونوں کے درمیان صلح کے بعد عدالت نے ضمانت پر رہا کرنے کا حکم دیا تھا۔

جیل سے رہائی کے بعد صوبائی وزیر فیاض الحسن چوہان کے ہمراہ میڈیا سے گفتگو کرتے ہوئے نذیر چوہان نے کہا کہ اعلیٰ قیادت کا مشکور ہوں جس نے اس معاملے کا فوری نوٹس لیا۔

انہوں نے کہا کہ چوہدری پرویز الہٰی کا بھی مشکور ہوں کہ انہوں نے میرے لیے ایک مضبوط مؤقف اپنایا۔

نذیر چوہان نے بتایا کہ مرزا شہزاد اکبر نے میرے بیمار ہونے پر سب سے پہلے کال کی اور میرا حال چال پوچھا، شہزاد اکبر سے میں نے واضح طور پر معافی مانگی، شہزاد اکبر اور ان کے اہل خانہ سے شرمندہ ہوں۔

ان کا کہنا تھا کہ میں شہزاد اکبر کی دل آزاری کی وجہ سے معذرت خواہ ہوں، شہزاد اکبر کے پاس جا کر ان کا شکریہ ادا کروں گا۔

نذیر چوہان نے کہا کہ میرا ایک ہی لیڈر ہے اس کا نام عمران خان ہے اور رہے گا، میرا جہانگیر ترین گروپ کے ساتھ کوئی تعلق نہیں ہے، جہانگیر ترین نے اپنے کیس کے لیے مجھے استعمال کیا۔

انہوں نے کہا کہ جہانگیر ترین کو شرم آنی چاہیے کہ انہوں نے ہسپتال آ کر میرا حال تک نہیں پوچھا، جہانگیر ترین جیسا بندہ کسی کا ساتھ نہیں دے سکتا۔

پی ٹی آئی رکن اسمبلی نے کہا کہ اس سارے معاملے میں بہت سے منافق لوگوں کے چہرے سامنے آ گئے ہیں، جہانگیر ترین کو نہ کبھی اپنا لیڈر مانا تھا اور نہ ہی وہ میرے لیڈر ہیں۔

انہوں نے کہا کہ شہزاد اکبر پر الزام سوچ سمجھ کر نہیں لگایا تھا وہ فی البدیع میرے منہ سے نکل گیا تھا، انسان کو جب اپنی غلطی کا احساس ہو تو سافٹ وئیر اپ ڈیٹ ہو جاتا ہے۔

ان کا کہنا تھا کہ جہانگیر ترین ہمارے لیے بڑے قابل احترام ہیں لیکن پاکستان تحریک انصاف (پی ٹی آئی) میں کوئی دھڑا نہیں ہے، جو عمران خان کے ساتھ کھڑا ہے وہ پی ٹی آئی کا حصہ ہے اور جو عمران خان کے ساتھ نہیں وہ پی ٹی آئی کا حصہ نہیں ہے۔

نذیر چوہان نے کہا کہ میری وجہ سے اگر عمران خان کی دل آزاری ہوئی ہے تو میں ان سے بھی معذرت خواہ ہوں۔

اس موقع پر فیاض الحسن چوہان نے کہا کہ نذیر چوہان کی ضمانت اللہ کے فضل و کرم سے ہوگئی ہے، پچھلے کئی ماہ سے ایک تنازع چل رہا تھا اور اعلیٰ قیادت کو اعتماد میں لے کر میں نے اپنا کردار ادا کیا۔

صوبائی وزیر نے کہا کہ شہزاد اکبر نے انتہائی مثبت انداز میں ثالثی کے کردار ادا کرنے میں مدد کی، نذیر چوہان کا بھی بہت بڑا کردار رہا اور انہوں نے میری تجاویز پر بھی عمل کیا۔

انہوں نے کہا کہ ہمارا کوئی اختیار نہیں کہ ہم کسی کے عقیدے پر اعتراض کریں اور تحقیقات کریں، شہزاد اکبر نے وضاحت کر دی ہے کہ وہ ختم نبوت پر مکمل یقین رکھتے ہیں۔

خیال رہے کہ نذیر چوہان کو ضمانت کی منظوری کے بعد جیل سے رہا کر دیا گیا، لاہور کی مقامی عدالت کی جانب سے ضمانتی مچلکے جمع کرانے پر نذیر چوہان کے روبکار جاری کیے گئے اور سپرینٹنڈنٹ جیل اعجاز اصغر نے روبکار کی جانچ پڑتال کے بعد نذیر چوہان کی رہائی کا حکم دیا۔

متنازع بیان اور مقدمے کا معاملہ
یاد رہے کہ نذیر چوہان نے 19 مئی کو ایک ٹی وی ٹاک شو میں شہزاد اکبر کے عقیدے کے بارے میں الزام لگایا تھا اور مطالبہ کیا تھا کہ انہیں وزیر اعظم کے احتساب و داخلہ کے مشیر کے عہدے سے استعفیٰ دینا چاہیے۔

تاہم شہزاد اکبر نے اگلے ہی روز لاہور کے ریس کورس تھانے میں ایک درخواست جمع کرائی تھی اور 29 مئی کو لاہور آمد پر مقامی تھانے میں مزید ایک ایف آئی آر درج کرائی۔

شہزاد اکبر کی شکایت پر نذیر چوہان کو 27 جولائی کو پاکستان پینل کوڈ (پی پی سی) کی دفعات 506، 189، 298 اور 153 کے تحت گرفتار کیا گیا۔

نذیر چوہان کو ایف آئی آر کے بارے میں معلوم ہوا تو انہوں نے کہا کہ وہ گرفتاری کے لیے دستیاب ہیں اور انہوں نے مزید کہا تھا کہ ان کے پاس تمام ثبوت ہیں اور وہ وزیراعظم عمران خان کو پیش کریں گے۔

رکن صوبائی اسمبلی گرفتاری کے لیے ریس کورس تھانے بھی گئے تھے لیکن پولیس نے انہیں یہ کہتے ہوئے گرفتار نہیں کیا کہ انہوں نے ابھی تک پنجاب اسمبلی کے اسپیکر سے اجازت نہیں لی ہے۔

تقریباً دو ماہ کے بعد ریس کورس پولیس نے نذیر چوہان کو ایل ڈی اے کے دفتر سے گرفتار کیا لیکن بعد میں جوڈیشل مجسٹریٹ نے انہیں ضمانت دے دی۔

تاہم نذیر چوہان کو کوٹ لکھپت سینٹرل جیل سے رہائی کے بعد پی ای سی اے کی دفعہ 11 اور 20 اور آر/ڈبلیو 298 کے تحت مشیر کی شکایت کے بعد ایف آئی اے نے سائبر قوانین کے تحت گرفتار کر لیا۔

نذیر چوہان پر شہزاد اکبر کے خلاف سوشل میڈیا پلیٹ فارم پر ‘بدنیتی پر مبنی اور نفرت انگیز’ مہم چلانے کا الزام تھا۔

سیٹلائٹ تصاویر، مالیاتی اعداد و شمار اور زمینی شواہد سے انکشاف ہوا ہے کہ بھارت موریشس کے دور دراز جزیرے آگالیگا پر بحری تنصیبات کی تعمیر کررہا ہے۔

الجزیرہ کے تحقیقاتی یونٹ کے مطابق شواہد کا جائزہ لینے والے عسکری ماہرین نے کہا کہ زیر تعمیر رَن وے یقینی طور پر بھارتی بحریہ کی جانب سے سمندری گشت کے لیے استعمال ہوگا۔

مذکورہ مقام پر فوجی اڈے کے بارے میں افواہیں اور میڈیا رپورٹس پہلی مرتبہ 2018 میں منظر عام پر آئیں لیکن ماریشس اور بھارت دونوں نے اس بات سے انکار کیا کہ تعمیراتی منصوبہ فوجی مقاصد کے لیے ہے اور دعویٰ کیا کہ بنیادی ڈھانچہ صرف جزیرے والوں کو فائدہ پہنچانے کے لیے ہے۔

سیٹلائٹ تصاویر سے معلوم ہوتا ہے کہ ماریشس کے مرکزی جزیرے سے تقریبا ایک ہزار 100 کلو میٹر دور واقع آگالیگا میں دو بڑی جیٹیاں اور ایک رن وے کی تعمیر دیکھی جا سکتی ہیں جو 3 کلومیٹر سے زیادہ طویل ہے۔

نئی دہلی میں آبزرور ریسرچ فاؤنڈیشن (او آر ایف) تھنک ٹینک کے ایسوسی ایٹ فیلو ابھیشیک مشرا نے کہا کہ ’یہ بھارت کے لیے فضائی اور بحری موجودگی کو جنوب مغربی بحر ہند اور موزمبیق چینل میں نگرانی بڑھانے کے لیے ایک انٹیلی جنس سہولت ہے‘۔

انہوں نے کہا کہ میری ذاتی معلومات کی بنیاد اور میرے حلقے کے ان تمام لوگوں کے ساتھ بات چیت سے ثابت ہوتا ہے کہ اڈے کو جہازوں کے برتھنگ کے لیے استعمال کیا جائے گا اور رن وے زیادہ تر بھارتی پی 81 طیاروں کے لیے استعمال کیا جائے گا۔

ابھیشیک مشرا نے بتایا کہ پی 81 بھارتی طیارہ بحری گشت اور نگرانی سمیت سطح زمین اور اینٹی سب میرین جنگ کے لیے استعمال کیے جا سکتے ہیں۔

ایسے طیارے، جو آگالیگا پر اترنا چاہتے ہیں انہیں فی الحال 800 میٹر کی مختصر لینڈنگ پٹی کا استعمال کرنا پڑتا ہے، جو موریشین کوسٹ گارڈ کے پروپیلر طیاروں کے لیے کافی لمبا ہے۔

زیر تعمیر نیا رَن وے اتنا بڑا ہے کہ جو بین الاقوامی ہوائی اڈوں پر ہوتا ہے اور اسے بڑے طیارے استعمال کرسکتے ہیں۔

آسٹریلین نیشنل یونیورسٹی کے نیشنل سیکیورٹی کالج کے ایک محقق سیموئل باش فیلڈ نے الجزیرہ کو بتایا کہ بحر ہند تیزی سے ممالک کے لیے اپنے جیو پولیٹیکل اثر و رسوخ کو بڑھانے کے لیے ہاٹ سپاٹ بن رہا ہے۔

انہوں نے کہا کہ جنوب مغربی بحر ہند ایک ایسا علاقہ ہے جہاں بھارت کے طیارے اپنے جہازوں کی مدد کر سکتے ہیں اور جہاں اس کے علاقے ہیں وہ آپریشن کے لیے لانچنگ پیڈ کے طور پر استعمال کر سکتے ہیں۔

سیموئل باش فیلڈ نے کہا کہ میں سمجھتا ہوں کہ بھارت کے دیگر نکات کے اضافے کے طور پر جس سے وہ کام کرسکتا ہے، یہ ناقابل یقین حد تک اہم ہے۔

ان کا کہنا تھا کہ مجھے لگتا ہے کہ یہ ایک فوجی اڈے کے لیے بالکل درست جگہ ہے۔

الجزیرہ نے ایک درجن بلک کیریئرز کا سراغ لگایا جنہوں نے بھارتی بندرگاہوں سے آگالیگا تک کا سفر تعمیراتی سامان کی ترسیل کے لیے کیا۔

تصاویر اور اعداد و شمار بتاتے ہیں کہ کس طرح گزشتہ دو برس کے دوران جزیرے کے شمالی سرے پر نیم مستقل کیمپ میں رہنے والے سیکڑوں تعمیراتی کارکنوں کا گھر بن گیا ہے۔

خیال رہے کہ افریقی ملک موریشس براعظم میں امیر ملک شمار ہوتا ہے جبکہ اس میں بدعنوانی کی شرح بھی انتہائی کم ہے۔

موریشس کی معیشت کا بڑا حصہ چینی کی برآمد، بیرونی خدمات اور مالی معاملات میں معاونت پر مشتمل ہے جبکہ سیاحت بھی مرکزی شعبوں میں شمار ہوتی ہے۔

لاہور: پاکستان ریلوے نے یکم ستمبر سے ان تمام مسافروں پر 10 فیصد کووڈ سرچارج عائد کرنے کا فیصلہ کیا ہے جنہوں نے تاحال ویکسینیشن نہیں کرائی ہے۔

رپورٹ کے مطابق مسافروں پر فی ٹکٹ کووڈ سرچارج عائد ہوگا۔

آئندہ سال اپریل سے تمام ویکسین نہ لگوانے والے ریلوے مسافروں پر بھی مکمل پابندی متوقع ہے۔

پاکستان ریلوے ہیڈ کوارٹر کی جانب سے جاری کردہ ایک مراسلے کے مطابق ہیڈ آفس اور تمام ڈویژنل دفاتر (فیلڈ فارمیشنز) سے متعلقہ اعلیٰ حکام کو پشاور، راولپنڈی، لاہور، ملتان، کراچی اور روہڑی سمیت تمام بڑے اسٹیشنز پر آئندہ 15 دنوں میں ویکسینیشن سینٹرز کھولنے کی ہدایت کی گئی ہے۔

مراسلے میں کہا گیا کہ کہ 31 اگست تک تمام ملازمین اور ان کے اہل خانہ کی ویکسینیشن یقینی بنائی جائے گی۔

اس کے مطابق یکم ستمبر 2021 سے تمام مسافروں پر 10 فیصد کووڈ سرچارج ہوگا جنہوں نے ویکسینیشن نہیں کروائی۔

یکم جنوری سے پاکستان ریلوے نے 20 سال سے کم عمر کے مسافروں کو سفر کرنے کی اجازت دینے کا فیصلہ کیا ہے جبکہ 20 سال سے زائد عمر کے افراد کو سفر کے دوران ویکسینیشن سرٹیفکیٹ دکھانا ہوں گے۔

مراسلے میں کہا گیا کہ یکم اپریل 2022 سے ویکسینیشن کے بغیر سفر پر مکمل پابندی ہوگی۔

پاکستان ریلوے بورڈ کے چیئرمین/ سیکریٹری ڈاکٹر حبیب الرحمٰن گیلانی نے کہا کہ ملک میں کووڈ کے پھیلاؤ کو مدنظر رکھتے ہوئے محکمہ زیادہ سے زیادہ ریلوے ملازمین اور مسافروں کو ویکسین کے لیے کچھ ‘سخت’ فیصلے کرنے کے سوا کوئی چارہ نہیں تھا۔

انہوں نے کہا کہ وہ افسران کو تمام ریلوے ورکشاپوں میں ویکسینیشن سینٹرز (اگر ضرورت ہو) قائم کرنے کی ہدایت کریں گے جہاں ہزاروں ملازمین کام کر رہے ہیں۔

ڈاکٹر حبیب الرحمٰن گیلانی نے واضح کیا کہ ویکسینیشن سینٹرز پہلے ہی ہمارے ہسپتالوں/ ڈسپنسریوں میں کام کر رہے ہیں جہاں ملازمین/ کارکنوں کو ویکسین دی جا رہی ہے۔

انہوں نے کہا کہ انہیں پاکستان ریلوے کے چیف میڈیکل افسر کو فوکل پرسن کے طور پر مقرر کیا ہے تاکہ این سی او سی کے ساتھ تمام مراکز پر ویکسین کی مسلسل فراہمی کے لیے رابطہ قائم کیا جا سکے۔

چیئرمین نے کہا کہ ہم نے ٹرینوں میں فرائض سرانجام دینے والے عملے سے کہا کہ وہ کووڈ سے متعلقہ ایس او پیز پر عمل درآمد کو یقینی بنائیں جس میں ماسک پہننا اور سماجی فاصلہ وغیرہ شامل ہیں۔

پاکستان کرکٹ بورڈ (پی سی بی) نے مڈل آرڈر بلے باز عمر اکمل کو کلب کرکٹ کھیلنے کی اجازت دے دی۔

پی سی بی سے جاری بیان کے مطابق عمر اکمل کو کلب کرکٹ کھیلنے کی اجازت ان کے ری ہیب پروگرام کا حصہ ہے۔

بیان میں کہا گیا کہ پچھلے ماہ شروع ہونے والے ری ہیب پروگرام میں اب تک عمر اکمل نے ندامت کے اظہار کے علاوہ اینٹی کرپشن لیکچر میں بھی شرکت کی ہے جبکہ پی سی بی سیکیورٹی اینڈ اینٹی کرپشن ڈپارٹمنٹ کے سوالات کے جوابات بھی دیے ہیں۔

عمر اکمل کا ری ہیب پروگرام اگلے ماہ تک مکمل ہوجائے گا جس کے بعد وہ رواں سال ڈومیسٹک کرکٹ کھیلنے کے اہل ہوں گے۔

واضح رہے کہ پابندی کا شکار عمر اکمل نے گزشتہ ماہ کرپٹ عناصر کی جانب سے رسائی کی اطلاع نہ دینے پر عوام سے معافی مانگ لی تھی۔

پی سی بی کی جانب سے جاری ایک ویڈیو پیغام میں 31 سالہ عمر اکمل نے کہا تھا کہ ‘میں نے گزشتہ سال ایک غلطی کی ہے جس سے کیریئر اور کرکٹ دونوں کو نقصان پہنچا’۔

انہوں نے کہا تھا کہ کچھ لوگوں نے مجھ سے رابطہ کیا لیکن میں پی سی بی کے اینٹی کرپشن یونٹ کو اس کی اطلاع دینے سے قاصر رہا جس کی وجہ سے مجھے 12 ماہ کی پابندی کا سامنا کرنا پڑا اور یہ میرے لیے بہت مشکل وقت رہا۔

عمر اکمل نے مزید کہا تھا کہ میں نے اس دوران بہت کچھ سیکھا اور آج میں آپ سب کے سامنے اعتراف کرتا ہوں کہ اس غلطی سے پاکستان کرکٹ کی بدنامی ہوئی۔

عمر اکمل پر پابندی
یاد رہے کہ پاکستان سپر لیگ کے پانچویں ایڈیشن کے آغاز سے چند گھنٹوں قبل ہی فروری 2020 میں عمر اکمل کو معطل کردیا گیا تھا جہاں ان پر الزام تھا کہ وہ کرپت عناصر کی جانب سے ان تک کی گئی رسائی کے بارے میں بتانے میں ناکام رہے۔

پی سی بی کے ڈسپلنری پینل نے اپریل 2020 میں عمر اکمل کو دو خلاف ورزیوں کا مرتکب قرار دیا تھا اور ان پر 3 سال کی پابندی عائد کردی تھی۔

عمر اکمل اور پی سی بی دونوں معاملے کو کھیلوں کی ثالثی عدالت میں لے گئے تھے اور مڈل آرڈر بلے باز کی اپیل پر ان پر عائد کی گئی پابندی آدھی کردی گئی تھی۔

رواں سال فروری میں کھیلوں کی ثالثی عدالت نے بلے باز پر عائد پابندی کو کم کرکے 12 ماہ تک محدود کر دیا تھا لیکن پی سی بی کے اینٹی کرپشن کوڈ کی خلاف ورزی کرنے پر ان پر 4 کروڑ 25 لاکھ روپے کا بھاری جرمانہ عائد کیا گیا تھا۔

پی سی بی نے اس وقت کہا تھا کہ عمر اکمل بحالی پروگرام مکمل کرنے کے بعد دوبارہ کرکٹ میں واپسی کے اہل ہوں گے۔

عمر اکمل نے 2009 میں نیوزی لینڈ کے خلاف پہلا ٹیسٹ میچ سنچری اسکور کر کے دنیائے کرکٹ میں یادگار انداز میں قدم رکھا لیکن ان کا کیریئر مختلف اسکینڈلز اور مسائل سے دوچار رہا جس کی وجہ سے انتہائی باصلاحیت ہونے کے باوجود وہ تواتر کے ساتھ پاکستان ٹیم کی نمائندگی نہ کر سکے۔

وہ اب تک 16 ٹیسٹ، 121 ایک روزہ بین الاقوامی میچوں کے ساتھ ساتھ 84 ٹی20 انٹرنیشنل میچوں میں پاکستان کی نمائندگی کر چکے ہیں۔

انگلینڈ میں ہونے والی 2017 چیمپئنز ٹرافی سے قبل فٹنس ٹیسٹ میں ناکامی کے بعد مڈل آرڈر بلے باز کو گھر بھیج دیا گیا تھا اور ان پر گزرے سالوں میں کئی جرمانے بھی عائد کیے جا چکے ہیں۔

مسلم لیگ (ن) کی سیکریٹری اطلاعات مریم اورنگزیب نے اعلان کیا ہے کہ ان کی پارٹی، پاکستان تحریک انصاف (پی ٹی آئی) کے تین سالہ اقتدار پر ‘کرپشن پیپر’ جاری کرے گی جس میں اس کی ‘مالی بے ضابطگیوں اور فنڈز کے چوری’ کا انکشاف ہوگا۔

اسلام آباد میں ایک پریس کانفرنس سے خطاب کرتے ہوئے مسلم لیگ (ن) کی رہنما نے دعویٰ کیا کہ پی ٹی آئی نے مہنگائی اور بے روزگاری جیسے بنیادی مسائل سے عوام کی توجہ ہٹانے کے لیے باقاعدگی سے مہم چلائی ہے۔

انہوں نے کہا کہ 17 اگست کو شروع ہونے والا پی ٹی آئی کا ‘کرپشن پیپر’ عوامی منصوبوں میں فنڈز میں خورد برد اور موجودہ حکومت کے گزشتہ تین سالوں میں ملک میں ہونے والی بدعنوانی سے متعلق تفصیلات کو اجاگر کرے گا۔

ان کا کہنا تھا کہ صرف جولائی میں پاکستان نے تاریخی مہنگائی دیکھی کیونکہ مہینے میں کم از کم 51 اشیائے ضروریہ کی قیمتیں آسمان کو چھو گئیں، اسی طرح حکومت نے ایل این جی 15.25 ڈالر فی یونٹ میں خریدی جو مسلم لیگ (ن) کے دور اقتدار میں خریداری گئی ایل این جی کی قیمت سے 70 فیصد زیادہ ہے۔

مریم اورنگزیب نے دعویٰ کیا کہ پی ٹی آئی نے اس وزیر کو نکال دیا ہے جو ایل این جی کا سودا 11 ڈالر اور 13 ڈالر میں حاصل کرنے والا تھا تاہم یہ بعد میں 15 ڈالر میں خریدا گیا اور اس کے نتیجے میں پاکستانیوں کو سالانہ 2 ارب ڈالر اپنی جیب سے ادا کرنے پڑیں گے۔

ریکارڈ درآمدات پر حکومت کو تنقید کا نشانہ بناتے ہوئے انہوں نے کہا کہ مسلم لیگ (ن) پر تجارتی خسارہ بڑھانے کی باتیں کی گئیں، جولائی میں ریکارڈ 16 ارب ڈالر کی درآمد دیکھی گئی جبکہ گزشتہ مہینے پاکستانی روپے کی قدر میں 40 فیصد کمی دیکھی گئی، کیا حکومت اس پر بات کرے گی؟’

انہوں نے یہ بھی دعویٰ کیا کہ آئی ایم ایف پروگرام ناکام ہو چکا ہے اور بتایا کہ حکومت نے بجٹ کے بعد آئی ایم ایف کے ساتھ کوئی معاہدہ نہیں کیا۔

مسلم لیگ (ن) کی رہنما نے کہا کہ اگر انہوں نے آئی ایم ایف کی شرائط کو قبول نہیں کیا تو آئندہ ہونے والی مہنگائی ملک اور اس کے عوام کے لیے نقصان دہ ہوگی۔

انہوں نے کہا کہ ‘ٹوئٹس کے ذریعے معیشت ٹھیک نہیں ہوتی، جب آپ اشیائے ضروریہ کی قیمتوں میں کمی لانے کے لیے اقدامات کرتے ہیں تو یہ ہموار ہوتی ہے’۔

مریم اورنگزیب نے کہا کہ ملک میں تمام بحرانوں کا صرف ایک شخص ذمہ دار ہے اور وہ ہے عمران خان۔

انہوں نے الزام لگایا کہ عمران خان نے اپنے ‘اے ٹی ایم اور مافیا’ کے لیے پالیسیاں بنائیں کیونکہ وہ انتخابات میں ووٹ خریدنے میں ان کی مدد کرتے ہیں۔

انہوں نے کہا کہ ان کی پارٹی پی ٹی آئی کی بددیانتیوں کو بے نقاب کرنے کے لیے روزانہ پریس کانفرنسز کرتی رہے گی۔

‘مسلم لیگ (ن) میں ایک سے زیادہ بیانیہ نہیں’
مسلم لیگ (ن) کی ترجمان نے عوامی مسائل پر مختلف انٹرا پارٹی بیانیوں کی خبروں کو بھی مسترد کرتے ہوئے کہا کہ نواز شریف اور شہباز شریف کا مؤقف بالکل واضح تھا اور ان کا بیانیہ آئین اور ووٹ کو عزت دینے کے بارے میں تھا۔

انہوں نے کہا کہ حکومت نے اپنی ‘نااہلی’ چھپانے کے لیے اپوزیشن پارٹی کے اندر مبینہ تقسیم کی باتیں بنائیں تاکہ عوام کو گمراہ کیا جاسکے۔

انہوں نے کہا کہ حکومت کو مختلف محاذوں پر شرمندگی کا سامنا کرنا پڑ رہا ہے، عمران خان اب شہباز شریف سے معافی مانگ رہے ہیں، انہوں نے اعتراف کیا کہ انہوں نے ان پر کرپشن کا جھوٹا الزام لگایا۔

ان کا کہنا تھا کہ پاناما تحقیقات کے دوران شہباز شریف کی جانب سے 10 ارب روپے کی مبینہ پیشکش کے بارے میں چار سال تک عدالت میں کوئی جواب داخل نہیں کیا گیا، اب وہ شہباز سے ہتک عزت کا کیس واپس لینے کو کہہ رہے ہیں۔

انہوں نے دعویٰ کیا کہ حکومت نے ڈیلی میل کی جانب سے دائر کیس کے حوالے سے برطانیہ کی عدالت میں بھی معافی مانگی ہے، شہزاد اکبر کہاں ہیں، انہیں اب براڈ شیٹ کیس پر پریس کانفرنس کرنی چاہیے اور لوگوں کو ان پیسوں کے بارے میں آگاہ کرنا چاہیے جو عوام کی جیب سے عدالت کو ادا کیے جائیں گے۔

انہوں نے یہ بھی کہا کہ پاکستان ڈیموکریٹک موومنٹ نے 13 اگست کو کراچی میں ایک جلسے کا اعلان کیا تھا، اسے کورونا وائرس کی وجہ سے ملتوی کر دیا گیا ہے۔

انہوں نے مزید کہا کہ جلد ہی ہم جلسے کی ایک نئی تاریخ کا اعلان کریں گے۔

اسلام آباد: وفاقی وزیر داخلہ شیخ رشید کا کہنا ہے کہ شہبازشریف کوشش کر رہے ہیں کہ نواز شریف کو ڈائریکٹ جیل نہ جانا پڑے۔

اسلام آباد میں میڈیا سے بات کرتے ہوئے وفاقی وزیر داخلہ شیخ رشید کا کہنا تھا کہ خطے کے حالات تیزی سے بدل رہے ہیں، پاکستان کے خلاف ہائبرڈ وار شروع کردی گئی ہے، آنے والے پانچ سے چھ ماہ بہت اہم ہیں، وزیراعظم نے شاہ محمودقریشی کی زیرصدارت ایک کمیٹی بنادی ہے، اس وقت پاکستان میں جو بھی دہشتگردی ہو رہی ہے اس کا ذمہ دار ہٹلر مودی ہے، بھارت نے فیٹف سے ایک روز قبل لاہور میں دھماکے کروائے، فیٹف میں پاکستان کا کیس لڑ رہے ہیں۔

شیخ رشید کا کہنا تھا کہ پیپلزپارٹی اور ن لیگ دونوں پارٹیوں میں مزاحمت اور مفاہمت کی لڑائیاں جاری ہیں، یہ لوگ صرف کیمرے کی سیاست کر رہے ہیں، ان کو مشورہ دوں گا پاکستان کی سیاست میں نئی سوچ آنے لگی ہے، عمران خان کہیں نہیں جارہے بلکہ وہ تمہاری سوچ سے زیادہ بڑی سیاست کرنے جارہے ہیں۔

وفاقی وزیر نے کہا کہ وزارت داخلہ میں بھی کرپٹ لوگوں کے خلاف جھاڑو پھیر دیں گے، کرپٹ لوگوں کو جیل کی ہوا کھلائی ہے لیکن عدالتی فیصلوں کی وجہ سے انہیں اندر نہیں کرسکے، میں نوازشریف کو لاسکتا ہوں نہ ہی الطاف حسین کو، شہبازشریف نے ای سی ایل سے نام نکالنے کی کوئی درخواست نہیں دی، شہباز شریف نے مفاہمت کی طرف ہی آنا ہے، وہ کوشش کر رہے ہیں کہ نواز شریف کو ڈائریکٹ جیل نہ جانا پڑے۔

وزیر داخلہ نے مزید کہا کہ کل پورے ملک میں یوم استحصال کشمیر منایا جائے گا، اور صبح نو بجے ایک منٹ کیلئے ٹریفک روکی جائے گی۔

لاہور: قومی اسمبلی میں قائد حزب اختلاف شہبازشریف کا کہنا ہے کہ آٹا چینی، دال گھی، دوائی بجلی سب کچھ مہنگاترین ہوگیا لیکن پھر بھی حکومت کا رونا دھونا جاری ہے۔

مہنگائی کے حوالے سے اپنے بیان میں مسلم لیگ (ن) کے صدر اور پارلیمنٹ میں قائد حزب اختلاف شہبازشریف کا کہنا تھا کہ حکومت کو متنبہ کرتا ہوں کہ عوام پر مہنگائی کا مزید بوجھ لادنے کے بجائے کم کرے، آئی ایم ایف کی شرائط پوری کرنے کے لئے بجلی، گیس، اشیائے خورونوش مزید مہنگی کرنے کا ظلم نہ کیاجائے۔

شہبازشریف کا کہنا تھا کہ تعجب اس بات پر ہے کہ حکومت قرض پر قرض لیتی جارہی ہے اور مہنگائی بھی بڑھتی جارہی ہے، عوام اور عالمی مالیاتی اداروں سے جمع ہونے والا سارا پیسہ آخرکہاں جا رہا ہے اور کہاں خرچ ہورہا ہے، آٹا چینی، دال گھی، دوائی بجلی سب کچھ مہنگا ترین ہوگیا ہے لیکن پھر بھی حکومت کا رونا دھونا جاری ہے۔

اپوزیشن لیڈر نے کہا کہ ملک میں آئندہ ایک سے تین ماہ میں مہنگائی کا نیا طوفان آنے والا ہے، کرنٹ اکاؤنٹ سرپلس کے حکومتی دعوے دم توڑ گئے ہیں، رواں مالی سال پہلے ماہ میں ہی تجارتی خسارہ 81.4 فیصد تک بڑھ گیا ہے، درآمدات دوگنا بڑھ چکی ہیں، ڈالر کی قیمت اوپر اور روپے کی قدر مسلسل نیچے جا رہی ہے، جولائی کے مہینے میں امپورٹ بل 47 فیصد بڑھنا معاشی تباہی کے اشارے ہیں، گزشتہ مالی سال کے 3.7 ارب ڈالر کے مقابلے میں گزشتہ ماہ 5.4 ارب ڈالر امپورٹس ہوئیں۔

صدر ن لیگ کا کہنا تھا کہ عوام پر ہر ماہ اور ہر ہفتے مہنگائی کی قیامت ڈھانے والے مزید اور کتنا ظلم کرنا چاہتے ہیں، ظلم کے اس نظام کے خلاف عوام کا لاوہ پک رہا ہے، پھٹا تو کوئی نہیں بچے گا، گاڑیوں کی ریکارڈ فروخت کو معاشی بحالی قراردینا اس حکومت کا عام آدمی کے لئے بے حس ہونے کا ثبوت ہے، حکومتی پالیسیوں نے غریب عوام کو فاقوں پر مجبور کردیا ہے جن کی زندگی شدید ترین مہنگائی نے جہنم بنا دی ہے، حکمرانوں کے دل میں غریب عوام کے لئے نہ کوئی رحم ہے اور نہ ذہن میں زرا سا احساس ہے۔