Category کرکٹ

لاہور: پاکستان کے ٹیسٹ اسکواڈ سے نظر انداز اوپنر امام الحق نے تینوں فارمیٹ میں کھیلنے کو اپنا ہدف بنالیا۔

بائیں ہاتھ کے اوپنر ان دنوں پی ایس ایل اور دورہ انگلینڈ کے لیے اپنی فٹنس کو بہتر بنانے کے لیے کوشاں ہیں، وہ مقامی جم میں ٹرینر کے ساتھ کام کرکے فٹنس اور اسٹیمنا کو بڑھانے کے لیے مختلف مشقیں کرنے میں مصروف ہیں۔ جنوبی افریقہ کے خلاف ون ڈے سیریز کے بعد امام الحق وطن واپس لوٹ آئے تھے، زمبابوے کے خلاف ٹی ٹوئنٹی اور ٹیسٹ اسکواڈ کا انہیں حصہ نہیں بنایاگیا۔

امام الحق اب تک گیارہ ٹیسٹ، 43 ون ڈے اور دو ٹی ٹوئنٹی میچز میں پاکستان کی نمائندگی کرچکے ہیں۔ تاہم دسمبر دوہزار انیس کے بعد وہ ٹیسٹ اور ٹی ٹوئنٹی میچز میں واپسی کے منتظر ہیں، وہ نیشنل ہائی پرفارمنس سینٹر میں بیٹنگ کوچ محمدیوسف کی رہنمائی میں خامیوں کو دور کررہےہیں۔ امام الحق کا کہنا ہےکہ بطور کرکٹر تینوں فارمیٹ میں پاکستان کی کامیابیوں میں کردار ادا کرنے کی خواہش ہے۔

جنوبی افریقی کرکٹر بیجورن فورچوئین نے رمضان المبارک کے مقدس مہینے میں اہلیہ کے ہمراہ اسلام قبول کرلیا۔

بیجورن فورچوئین کا قبول اسلام کے بعد اسلامی نام عماد رکھا گیا ہے۔ بیجورن فورچوئین نے بھی گزشتہ روز انسٹاگرام پر اسلام قبول کرنے کی تصدیق کی ہے۔

پروٹیز اسپنر تبریز شمسی کی اہلیہ نے ایک تصویر شیئر کرتے ہوئے بیجورن اور ان کی بیوی کو رمضان المبارک کے مقدس مہینے میں اسلام قبول کرنے کی مبارکباد پیش کی ہے۔

یہ تصویر بیجورن فورچوئین اور اس کے بعد ان کی اہلیہ مشکا آئیسن نے بھی ری شیئر کی۔ انہوں نے لکھا گزشتہ روز بیجورن نےکلمہ شہادت پڑھا الحمداللہ۔ اور رمضان کے مقدس مہینے میں عماد نام کا انتخاب کیا۔ ہمیں آپ پر فخر ہے۔

میڈیارپورٹس کے مطابق 26 سالہ اسپنر بیجورن نے تصدیق کی ہے کہ انہوں نے ذاتی مطالعات کے بعد اسلام کو حقیقی مذہب کے طور پر قبول کیا ہے کسی نے اسلام قبول کرنے کے لیے ان پر دباؤ نہیں ڈالااور نہ ہی کسی کے زیراثر آکر انہوں نے اسلام قبول کیا ہے۔

یاد رہے کہ بیجورن فورچوئین دوسرے جنوبی افریقی کھلاڑی ہیں جنہوں نے اسلام قبول کیا ہے اس سے قبل جنوبی افریقی کرکٹر وائن پارنیل نے بھی 2011 میں اسلام قبول کر لیا تھا۔ ان کا نیا نام ولید ہے لیکن انہیں اب بھی وائن پارنیل کے نام سے ہی جانا جاتا ہے۔

زمبابوے نے دوسرے ٹی ٹوئنٹی میں باؤلرز کی شان دار کارکردگی کی مدد سے پاکستان کی پوری ٹیم کو صرف 99 رنز پر آؤٹ کرکے باآسانی 19 رنز سے شکست دے دی اور سیریز بھی 1-1 سے برابر کردی۔

ہرارے میں کھیلے جارہے میچ میں پاکستان نے ٹاس جیت کر پہلے خود باؤلنگ کا فیصلہ کیا جو درست ثابت ہوا۔

زمبابوے کو 19 کے مجموعی پر پہلی وکٹ کا نقصان اٹھانا پڑا اور کپتان برینڈن ٹیلر 5 رنز بنا کر کیچ آؤٹ ہوگئے۔

اس کے بعد تناشے کموہکاموے کا ساتھ دینے تدیوناشے مرومانی کریز پر آئے تاہم 13 رنز بنانے کے بعد ارشد اقبال نے ان کی اننگز کا خاتمہ کردیا۔

وقفے وقفے سے وکٹیں گرنے کے باعث زمبابوے کی رنز بنانے کی اوسط زیادہ نہ ہو سکی ہے اور وہ مقررہ اوورز میں 9 وکٹوں کے نقصان پر 118 رنز بنا سکی۔

تناشے کموہکاموے میزبان ٹیم کے ٹاپ اسکورر رہے جنہوں نے 34 رنز کی اننگز کھیلی، ریجِس چاکبوا 18 رنز بنا کر دوسرے نمایاں بلے باز رہے۔

پاکستان کی جانب سے محمد حسنین اور دانش عزیز نے 2، 2 جبکہ فہیم اشرف، ارشد اقبال، حارث رؤف اور عثمان قادر نے ایک، ایک حاصل کی۔

کپتان بابراعظم اور محمد رضوان نے ہدف کا تعاقب سست روی سے کیا اور 5 اوورز میں محض 21 رنز بنائے۔

محمد رضوان 18 گیندوں پر 13 رنز بنا کر آؤٹ ہونے والے پہلے بلے باز تھے، جس کے بعد فخر زمان 7 گیندوں پر 2 رنز بنا سکے۔

تجربہ کار آل راؤنڈر محمد حفیظ سیریز میں ایک مرتبہ پھر ناکام رہے اور 56 کے مجموعے پر صرف 5 رنز بنا کر آؤٹ ہوئے، جس کے لیے انہوں نے 10 گیندوں کا سامنا کیا۔

کپتان بابراعظم کی ہمت بھی 78 کے اسکور پر جواب دے گئی، وہ پاکستان کی جانب سے سب سے زیادہ رنز بنانے والے بلے باز تھے، انہوں نے 45 گیندوں پر 5 چوکوں کی مدد سے 41 رنز کی اننگز کھیلی۔

آصف علی کی ناکامیوں کا سلسلہ ختم نہیں ہوسکا اور وہ ایک مرتبہ پھر ٹیم کے کام نہ آسکے اور اہم وقت پر صرف ایک رن بنا کر آؤٹ ہوئے، جس کے بعد فہیم اشرف بھی دباؤ برداشت نہیں کر پائے اور 19 ویں اوور میں 87 کے اسکور پر 2 رنز بنا کر آؤٹ ہوئے۔

دانش عزیز کو بھی سیریز میں مسلسل موقع دیا گیا لیکن وہ اپنی صلاحیتوں کا بھرپور اظہار نہیں کر پائے اور سست بیٹنگ کا مظاہرہ کرتے ہوئے 24 گیندوں پر 22 رنز بنائے، جس میں صرف ایک چوکا شامل تھا۔

نوجوان بلے باز ایک ایسے موقع پر ٹیم کے لیے بہتر کارکردگی دکھانے میں ناکام رہے جب آخری اووورز میں برق رفتاری سے رنز بنانے تھے۔

پاکستان کی ٹیم آخری اوور میں 99 رنز پر ڈھیر ہوگئی اور میچ 19 رنز سے ہار گئی۔

آخری اوور میں حارث رؤف 6، عثمان قادر اور ارشد اقبال صفر پر آؤٹ ہوگئے۔

زمبابوے کی جانب سے لیوک جونگوے نے سب سے زیادہ 4 وکٹیں حاصل کیں اور ٹیم کو سیریز میں شان دار کامیابی دلائی، انہیں میچ کا بہترین کھلاڑی قرار دیا گیا۔

واضح رہے کہ پاکستان کو تین ٹی ٹوئنٹی میچز کی سیریز میں 0-1 کی برتری حاصل ہے۔

پاکستان نے محمد رضوان اور باؤلرز کی عمدہ کارکردگی کی بدولت زمبابوے کو پہلے ٹی20 میچ میں 11 رنز سے شکست دی تھی۔

پاکستان نے محمد رضوان اور باؤلرز کی عمدہ کارکردگی کی بدولت زمبابوے کو پہلے ٹی20 میچ میں 11رنز سے شکست دے کر سیریز میں 0-1 کی برتری حاصل کر لی۔

ہرارے اسپورٹس کلب میں کھیلے گئے سیریز کے پہلے ٹی20 میچ میں زمبابوے نے ٹاس جیت کر پہلے باؤلنگ کا فیصلہ کیا۔

پاکستان کی اننگز کا آغاز کچھ اچھا نہ تھا اور جنوبی افریقہ کے خلاف سیریز کے ہیرو اور کپتان بابراعظم صرف دو رنز بنا کر چلتے بنے۔

فخر زمان نے 13 رنز کی اننگز کھیلنے کے ساتھ ساتھ دوسری وکٹ کے لیے 34 رنز کی شراکت قائم کی لیکن اس کے بعد میڈھویرے کا شکار بن کر وہ بھی پویلین لوٹ گئے۔

محمد حفیظ ایک مرتبہ پھر ناکامی سے دوچار ہوئے اور پانچ رنز بنانے کے بعد میڈھویرے کی دوسری وکٹ بن گئے۔

دانش عزیز اور رضوان کے باعث وکٹیں گرنے کا سلسلے کچھ دیر کے لیے تھام گیا اور چوتھی وکٹ کے لیے 34 رنز کی ساجھے داری قائم کی جس کے بعد دانش کی 15 رنز کی اننگز بھی اختتام کو پہنچی۔

حیدر علی کا بلا اس مرتبہ بھی خاموش رہا اور وہ صرف پانچ رنز بنا سکے جبکہ آل راؤنڈرز فہیم اشرف اور محمد نواز کی اننگز بالترتیب ایک اور 9 رنز تک محدود رہی۔

دوسرے اینڈ سے مایوسی کے ساتھ ساتھیوں کی یکے بعد دیگرے پویلین واپسی کا منظر دیکھنے والے محمد رضوان نے ایک اور نصف سنچری مکمل کی۔

ایک موقع پر پاکستان کی ٹیم نے 18 اوورز میں 124 رنز بنائے تھے لیکن آخری دو اوورز میں وکٹ کیپر بلے باز نے جارحانہ بیٹنگ کر کے پاکستان کو قدرے معقول مجموعے تک رسائی دلائی اور بالآخر یہی رنز میچ میں اصل فرق ثابت ہوئے۔

پاکستان کی ٹیم نے مقررہ اوورز میں 7 وکٹوں کے نقصان پر 149 رنز بنائے، رضوان نے 61 گیندوں ایک چھکے اور 10 چوکوں کی مدد سے 82 رنز کی اننگز کھیلی اور آؤٹ نہیں ہوئے۔

زمبابوے کی جانب سے میڈھویرے اور لیوک جونگوے نے دو، دو وکٹیں حاصل کیں۔

ہدف کے تعاقب میں اوپنرز نے زمبابوے کو 21 رنز کا آغاز فراہم کیا لیکن اس موقع پر محمد حسنین نے پاکستان کو یکے بعد دیگرے دو کامیابی دلا کر میڈھویرے اور تدیوناشے مرومانی کو چلتا کردیا۔

دو وکٹیں گرنے کے بعد تناشے کمن ہکموے کا ساتھ دینے کریگ ارون آئے اور دونوں کھلاڑیوں نے ذمے دارانہ کھیل پیش کرتے ہوئے 56 رنز کی ساجھے داری قائم کی۔

اس سے قبل کہ یہ شراکت مزید خطرناک ثابت ہوتی، ایک عرصے بعد باؤلنگ کرنے والے محمد حفیظ نے رضوان کی مدد سے 29 رنز بنانے والے کمن ہکموے کو قابو کر لیا۔

ارون سے بھی ساتھی کھلاڑی کی جدائی برداشت نہ ہوئی اور دو گیند کے بعد وہ عثمان قادر کی گیند پر نواز کو کیچ دے بیٹھے۔

لیگ اسپنر نے عمدہ باؤلنگ کا سلسلہ جاری رکھتے ہوئے حریف کپتان شان ولیمز اور ریگس چکابوا کی اہم وکٹیں حاصل کر کے زمبابوے کے لیے ہدف کا حصول مشکل بنا دیا۔

ریان بُرل اور لیوک جونگوے نے کچھ ہاتھ دکھا کر اپنی ٹیم کی سنچری مکمل کرائی لیکن حارث نے بُرل کی اننگز کا خاتمہ کر کے پاکستان کو ساتویں کامیابی دلا دی۔

زمبابوے کو آخری اوور میں فتح کے لیے 20 رنز درکار تھے لیکن حارث رؤف نے انہیں صرف 8 رنز بنانے دیے اور اس طرح پاکستان نے میچ میں 11 رنز سے کامیابی حاصل کر لی۔

میچ میں کامیابی کے ساتھ ہی قومی ٹیم نے سیریز میں بھی 0-1 کی برتری حاصل کر لی۔

پاکستان کی جانب سے عثمان قادر نے تین اور حسنین نے دو وکٹیں حاصل کیں۔

محمد رضوان کو فتح گر کارکردگی کا مظاہرہ کرنے پر میچ کا بہترین کھلاڑی قرار دیا گیا۔

خیال رہے کہ پاکستان اور زمبابوے کے درمیان ٹی 20 سیریز کے اگلے دو میچز بھی ہرارے میں 23 اور 25 اپریل کو کھیلے جائیں گے اور اسٹیڈیم میں شائقین کو داخلے کی اجازت نہیں ہو گی۔

ٹی20 سیریز کے بعد دونوں ٹیموں کے درمیان دو ٹیسٹ میچوں کی سیریز بھی کھیلی جائے گی۔

دونوں ٹیمیں ان کھلاڑیوں پر مشتمل تھیں:

پاکستان: بابر اعظم (کپتان)، محمد رضوان، فخر زمان، محمد حفیظ، حیدر علی، دانش عزیز، محمد نواز، فہیم اشرف، عثمان قادر، محمد حسنین اور حارث رؤف

زمبابوے: سین ولیمز (کپتان)، تِناشے کموہکاموے، ویزلے مدہیورے، تدیوَناشے مرومانی، کریگ اروائن، رائن بَرل، ریجِس چاکبوا، لیوک جونگوے، ویلنگٹن مساکڈزا، بلیسنگ مزربانی اور رِچرڈ نراوا

پی سی بی نے عمر اکمل کے جرمانے کی قسطوں میں ادائیگی کی درخواست مسترد کردی۔

پاکستان کرکٹ بورڈ نے کرکٹر عمر اکمل کے جرمانے کی قسطوں میں ادائیگی کی درخواست مسترد کردی، ذرائع کے مطابق عمر اکمل نے درخواست میں موقف اختیار کیا تھا کہ ان دنوں میں معاشی مشکلات کا شکار ہوں، اتنی بڑی رقم کی یکمشت ادائیگی نہیں کرسکتا لہذا قسطوں میں ادائیگی کی اجازت دی جائے۔

پی سی بی نے عمر اکمل کی جانب سے دیے گئے اکاؤنٹس اور شواہد کا جائزہ لینے کے بعد درخواست مسترد کردی۔ اب عمر اکمل 42 لاکھ 50 ہزار روپے جرمانہ یکمشت ادا کرنے کے بعد ہی بحالی پروگرام کا حصہ بنیں گے۔

واضح رہے کہ کھیلوں کی عالمی ثالثی عدالت نے کرکٹر عمر اکمل پر 42 لاکھ 50 ہزار روپے جرمانہ عائد کیا تھا۔

زمبابوے کے خلاف ٹیسٹ اسکواڈ میں شامل نوجوان فاسٹ بولر شاہنواز دھانی انگلینڈ کے جوفرا آرچر کی طرح تگڑا بولر بننے کے خواہشمند ہیں۔

شاہنواز دھانی نے ڈومیسٹک کرکٹ سیزن میں عمدہ کارکردگی دکھائی تو سب کی توجہ کا مرکز بن گئے اور پھر پی ایس ایل کا چھٹا ایڈیشن ان کی شناخت بن گیا، پی ایس ایل میں انہوں نے اپنے انداز سے خاصی شہرت حاصل کی اور اب شاہنواز دھانی زمبابوے کے خلاف ٹیسٹ اسکواڈ کا حصہ ہیں۔

نوجوان فاسٹ بولر کہتے ہیں کہ میرا خواب تھا کہ میں جلد از جلد پاکستان کی نمائندگی کروں، میں خوش ہوں کہ زمبابوے کے خلاف ٹیسٹ اسکواڈ میں شامل کیا گیا، اگر موقع ملا تو ڈیبیو پر اچھی کارکردگی کا مظاہرہ کرنے کی کوشش کروں گا۔

ان کا کہنا ہے کہ میں اس وقت کوچز کے ساتھ مل کر سوئنگ پر کام کر رہا ہوں، میں ایک نہیں تینوں فارمیٹ میں کھیلنا چاہتا ہوں۔

شاہنواز دھانی کہتے ہیں کہ ہر بولر کا کوئی نا کوئی رول ماڈل ہوتا ہے، پہلے شین بونڈ میرے فیورٹ تھے انہیں دیکھتا تھا لیکن وہ ریٹائر ہو گئے، اب جوفرا آرچر رول ماڈل ہیں، انہیں کاپی کرتا ہوں اور ان کی طرح بننا چاہتا ہوں۔

دھانی کا کہنا ہے کہ یہاں تک کا سفر آسان نہیں ہے، والد کو میرا کھیلنا پسند نہیں تھا، وہ چاہتے تھے کہ پڑھائی پر توجہ دوں اور نوکری کروں لیکن مجھے کرکٹ کا بہت شوق تھا، کھیل کے ساتھ گاؤں میں کام بھی کیا جو سب کرتے ہیں، گاؤں میں دکان پر کام کرتا رہا، کھیتی باڑی کی اور امرود کے باغ میں بھی کام کیا۔

جنوبی افریقہ نے پاکستان کو دوسرے ٹی20 میچ میں یکطرفہ مقابلے کے بعد باآسانی 6 وکٹوں سے شکست دے دی۔

جوہانسبرگ میں کھیلے گئے سیریز کے دوسرے ٹی20 میچ میں پاکستان نے جنوبی افریقہ کو پہلے باؤلنگ کی دعوت دی۔

پاکستان نے بیٹنگ کا آغاز تو میچ کی پہلی ہی گیند پر گزشتہ میچ کے مرد میدان محمد رضوان بغیر کوئی رن بنائے چلتے بنے۔

شرجیل خان نے چھکا لگا کر خطرناک عزائم ظاہر کرنے کی کوشش کی لیکن 12 گیندوں پر 8 رنز بنانے کے بعد وہ بھی جیارج لنڈے کو وکٹ دے بیٹھے۔

10 رنز پر دونوں اوپنرز کے آؤٹ ہونے کے بعد کپتان بابراعظم کا ساتھ دینے تجربہ کار محمد حفیظ آئے اور دونوں نے 58 رنز کی شراکت قائم کر کے ابتدائی نقصان کا ازالہ کرنے کی کوشش کی۔

قومی ٹیم کو تیز رفتاری سے رنز بنانے میں مشکلات پیش آتی رہیں اور جارحانہ کھیل کی کوشش میں حفیظ 6 چوکوں سے مزین 32 رنز بنا کر چلتے بنے۔

نوجوان حیدر علی کی اننگز 12 رنز پر محیط تھی جبکہ فہیم اشرف بھی صرف 5 ہی رنز بنا سکے۔

بابر اعظم نے ایک مرتبہ پھر ذمے دارانہ بیٹنگ کرتے ہوئے نصف سنچری مکمل کی لیکن پوری اننگز کے دوران وہ جدوجہد کرتے نظر آئے اور بالآخر 50 گیندوں پر 50 رنز کی اننگز کھیلنے کے بعد پویلین لوٹ گئے۔

حسن علی نے لگاتار دو چھکے لگائے لیکن دوبارہ اسی کوشش میں تیزی گیند پر باؤنڈری پر کیچ دے بیٹھے۔ پاکستان نے مقررہ اوورز میں 9 وکٹوں کے نقصان پر 140 رنز بنائے۔

جنوبی افریقہ کی جانب سے لیزاد ولیمز اور لنڈے نے تین، تین جبکہ تبریز شمسی اور سیسانڈا مگالا نے ایک ایک وکٹ حاصل کی۔

ہدف کے تعاقب میں جنوبی افریقی اوپنرز نے جارحانہ انداز اپنایا اور اپنی ٹیم کو 44 رنز کا شاندار آغاز فراہم کر کے جیت کی بنیاد رکھی۔

جنوبی افریقہ کو پہلا نقصان جینمن ملان کی شکل میں اٹھانا پڑا جو 15 رنز بنانے کے بعد پویلین لوٹ گئے۔

پاکستان کو دوسری وکٹ کے لیے بھی زیادہ انتظار نہیں کرنا پڑا اور ویہان لوبے 12 رنز بنا کر چلتے بنے۔

ایڈن مرکرم نے لگاتار دوسرے میچ میں نصف سنچری اسکور کی اور کپتان ہنری کلاسن کے ساتھ مل کر اسکور کو 88 تک پہنچا دیا۔

ابھی میزبان ٹیم اس نقصان سے سنبھلی بھی نہ تھی کہ پیٹ وین بلجون بھی صرف دو رنز بنا کر عثمان قادر کی دوسری وکٹ بن گئے۔

اس موقع پر قومی ٹیم کی میچ میں واپسی کی موہوم سی امید پیدا ہوئی تھی لیکن کلاسن اور جیارج لنڈے نے اپنی ٹیم کو باآسانی ہدف تک رسائی دلا دی۔

دونوں کھلاڑیوں نے 49 رنز کی ناقابل شکست شراکت قائم کر کے جنوبی افریقہ کو 6 اوورز قبل ہی چھ وکٹوں کی فتح سے ہمکنار کرا کے سیریز 1-1 سے برابر کردی۔

کلاسن نے 36 اور لنڈے نے 20 رنز بنائے اور انہیں بہترین باؤلنگ کے بعد جارحانہ بیٹنگ پر میچ کا بہترین کھلاڑی قرار دیا گیا۔

دونوں ٹیموں کے درمیان سیریز کا تیسرا ٹی20 میچ 14 اپریل کو کھیلا جائے گا۔

میچ کیلئے دونوں ٹیمیں ان کھلاڑیوں پر مشتمل تھیں۔

پاکستان: بابر اعظم(کپتان)، شرجیل خان، حیدر علی، محمد رضوان، محمد حفیظ، محمد نواز، فہیم اشرف، حسن علی، شاہین شاہ آفریدی، عثمان قادر اور محمد حسنین۔

جنوبی افریقہ: ہنری کلاسن(کپتان)، جینمن ملان، ایڈن مرکرم، پیٹ وین بلجوئن، ویہان لوبے، جیارج لنڈے، ایندائل فلکوایو، سیسانڈا مگالا، بیورن ہینڈرکس، لیزاڈ ولیمز، تبریز شمسی۔

کرکٹ بورڈ نے پاکستان سپر لیگ 6 کے باقی میچز کا شیڈول جاری کردیا۔

پاکستان کرکٹ بورڈ نے پی ایس ایل کے باقی میچز کا شیڈول جاری کر دیا جس کے مطابق سپر لیگ 6 کے بقیہ میچز کا آغاز یکم جون سے ہوگا جب کہ ٹورنامنٹ کا فائنل 20 جون کو کھیلا جائے گا، ایونٹ کے تمام شرکاء کے لیے 22 مئی سےایک ہی ہوٹل میں قرنطینہ کی 7 روزہ مدت کا آغاز کیا جائے گا۔

پی سی بی کے مطابق 3 روزہ ٹریننگ سیشنز کے بعد یکم جون سے ایونٹ شروع ہوجائے گا، تمام میچز نیشنل اسٹیڈیم کراچی میں کھیلے جائیں گے، نائٹ میچز کا آغاز رات 8 بجے سے ہوگا جب کہ ڈبل ہیڈر والے دن پہلا میچ شام 5 بجے اور دوسرا رات 10 بجے شروع ہوگا۔

واضح رہے کہ پاکستان سپر لیگ کے چھٹے ایڈیشن کو کورونا کے بڑھتے کیسز کے باعث ملتوی کردیا گیا تھا۔ پی ایس ایل کے چھٹے ایڈیشن کے دوران 7 افراد کے کورونا ٹیسٹ مثبت آئے تھے جن میں 6 کھلاڑی اور ایک آفیشل شامل ہے۔

پی ایس ایل پوائنٹس ٹیبل

20 فروری سے شروع ہونے والے پاکستان سپر لیگ کے چھٹے ایڈیشن میں اب تک 14 میچز کھیلے گئے ہیں جس میں کراچی کنگز 6 پوائنٹس کے ساتھ پوائنٹس ٹیبل پر سرفہرست ہے۔ پشاور زلمی بھی 3 میچ جیت کر 6 پوائنٹس لینے میں کامیاب رہی تاہم وہ رن ریٹ کی وجہ سے دوسرے نمبر پر ہے۔ اسلام آباد یونائیٹڈ اور لاہور قلندرز 6،6 پوائنٹس کے ساتھ تیسرے اور چوتھے نمبر پر موجود ہیں۔

دوسری جانب لیگ میں واحد میچ جیتنے والی ملتان سلطانز اور کوئٹہ گلیڈی ایٹرز 2,2 پوائنٹس کے ساتھ بالتریب پانچویں اور چھٹی پوزیشن پر براجمان ہیں۔

پاکستان کرکٹ بورڈ(پی سی بی) کے مطابق ایشیا کپ 2022 تک ملتوی ہوگیا ہے۔

ترجمان پی سی بی کے مطابق ایشیاکپ 2022 تک ملتوی گیا ہے جس کے بعد رواں سال شائقین پاک بھارت کرکٹ میچ سے محظوظ نہیں ہوسکیں گے۔

پی سی بی نے کچھ دیرقبل اعلامیہ میں ایشیا کپ کے التوا کااعلان کیا ہے۔

خیال رہےکہ اس سے قبل بھی ایشیاکپ گذشتہ سال ہونا تھا تاہم کورونا وائرس کے باعث اسے 2021 تک ملتوی کردیا گیا تھا تاہم اب اسے دوبارہ آئندہ سال تک کے لیے ملتوی کردیا گیا ہے۔

قومی ٹیم کے آل رائونڈر شعیب ملک کی اہلیہ و بھارتی ٹینس سٹار ثانیہ مرزا بھی معروف تْرک شیف براک ازدمیر کے منفرد ذائقے کی دیوانی نکلیں۔

انسٹاگرام پر شیئر کی گئی تصویر میں ثانیہ مرزا تْرک شیف براک ازدمیر کے ساتھ موجود ہیں جبکہ اٴْن کے ہاتھ میں تْرک شیف کی تیار کردہ انوکھی بریڈ بھی ہے جس پر انگریزی زبان میں ’مرزا‘ لکھا ہوا ہے۔

ثانیہ مرزا نے تصویر شیئر کرتے ہوئے مزیدار ڈنر کے لیے تْرک شیف براک ازدمیر کی تعریف کی۔ بھارتی ٹینس سٹار نے اٴْن کے لیے تیار کردہ بریڈ کے لیے بھی تٴْرک شیف کا شکریہ ادا کیا۔

ثانیہ مرزا اور براک ازدمیر کی اس تصویر کو سوشل میڈیا صارفین کی بڑی تعداد ناصرف لائک کر رہی ہے بلکہ یہ تصویر مختلف پیجز پر شیئر بھی کی جارہی ہے۔

واضح رہے کہ تْرک شیف براک ازدمیر نے گزشتہ سال ہی پاکستان کا دورہ کیا تھا، اٴْنہوں نے اسلام آباد میں پریس کانفرنس کرتے ہوئے کہا تھا کہ پاکستان آکر اٴْنہیں خوشی ہوئی ہے، پاکستان اور ترکی کے تعلقات ہمیشہ بہترین رہے ہیں۔

شیف براک اوزدمیر نے کہا تھا کہ آئندہ پاکستان آیا تو لاہور، کراچی سمیت مختلف شہروں میں جائوں گا اور مزید پاکستانی کھانے بنانا سیکھنا شروع کروں گا۔