Category بزنس

لاہور(رپورٹ:-ذیشان علی + ایمرا نیوز آن لائن)لاہور میں مرغی کے گوشت کی رسد میں اضافہ کے باعث نرخ کم ہو گئے، تفصیلات کے مطابق لاہور میں مرغی کے گوشت کی رسد میں اضافہ ہو گیا جس سے گوشت کے نرخوں میں 4روپے فی کلو کمی واقع ہو گئی۔ گزشتہ روز تک مرغی 190روپے فی کلو تک فروخت ہو رہی تھی جبکہ 4روپے نرخ کمی کے بعد اب 186روپے کلو فروخت ہو رہا ہے۔

لاہور(رپورٹ :ذیشان علی +ایمرا نیوز آن لائن نیوز) صوبائی دارالحکومت کے اتوار بازار شہریوں کو سرکاری نرخوں پر سبزیوں اور پھلوں کی فراہمی میں ناکام ہو گئے، مہنگائی کے مارے عوام کے لئے بالخصوص تنخواہ دار طبقہ کے لئے دو وقت کی روٹی بھی مشکل ہو گئی، اتوار بازاروں میں گراں فروشی کا راج قائم رہا،70روپے فی کلو پیاز،100روپے کلو فروخت ہوا۔

لہسن چائنا 245روپے کلو کی بجائے 300روپے فی کلو فروخت کیا گیا، ٹماٹر بدستور مہنگائی کی بلندیوں پر فائز رہا۔شادمان اتوار بازار میں مہنگائی کے مارے عوام کیلئے پیٹ بھرنا بھی مشکل ہو گیا۔ سبزیوں کے نرخ عام آدمی کی پہنچ سے باہر ہو گئے۔ منافع خور عوام کو دونوں ہاتھوں سے لوٹنے میں مصروف ہیں۔

تفصیلات کے مطابق پیاز 75 روپے کے بجائے 100 روپے کلو بیچا جا رہا ہے۔ لہسن کی سرکاری قیمت 255 جبکہ فروخت 300 روپے فی کلو ہو رہی ہے۔ خریداری کے لئے شہریوں کو مایوس کا سامنا ہے۔سبزی کے علاوہ سرخ مرچ کے نرخ بھی بڑھ گئے ہیں۔ مرچ کا سرکاری ریٹ 325 روپے مقرر کیا گیا ہے لیکن دکاندار 520 روپے فی کلو تک فروخت کر رہے ہیں۔

لاہور شادمان بازار میں سبزیوں کی قیمتیں خریداروں کی پہنچ سے باہر ہو گئیں، ٹماٹر، پیاز، بھنڈی سب کچھ مہنگا ہو گیا۔ پریشان شہریوں نے حکومت سے نوٹس لینے کا مطالبہ کر دیا۔گوشت اور دالیں تو پہلے ہی مہنگی تھیں، اب تو سبزیوں کی قیمتوں کو بھی پر لگ گئے ہیں، غریب آدمی کھائے تو کیا کھائے۔

سبزیوں کی سپلائی سے منسلک افراد کا کہنا ہے کہ حکمت عملی نہ ہونے کے باعث بحران پیدا ہوجاتا ہے۔لوگوں کا کہنا ہے کہ مقامی انتظامیہ جاری کردہ نرخ ناموں پر عمل درآمد میں بھی ناکام ہوچکی ہے۔ کریلے 50 پالک 22 روپے کلو فروخت، لاہور کے تمام اتوار بازارو ں سے بھی ریلیف غائب ہو گیا۔

سستی اشیاءکی خریداری کیلئے آئے شہری پریشان ہو گئے اور حکومت سے منافع خوروں کیخلاف سخت کارروائی کا مطالبہ کرتے رہے۔دکانداروں کا کہنا ہے کہ سبزیوں کی قیمتوں میں اضافہ خود ساختہ نہیں ہے بلکہ بڑھتی ہو ئی مہنگائی کا نتیجہ ہے۔دوسری جانب شہریوں کا کہنا ہے کہ سبزیوں کی قیمتوں میں بے پناہ اضافے

نے ان کی کمر توڑ کے رکھ دی ہے اب حکومت سبزیوں سمیت دیگر اشیا کی قیمتوں میں کمی کر کے انھیں ریلیف فراہم کرے۔ مہنگائی سے تنگ شہریوں نے حکومت سے نوٹس لینے اور قیمتیں کم کرنے کا مطالبہ کر دیا۔

کراچی(ایمرا نیوز آن لائن) عالمی صرافہ مارکیٹ میں فی اونس سونامہنگا ہو گیا جس کی وجہ سے ملکی صرافہ مارکیٹوں میں بھی سونا مہنگا ہو گیا ۔ آل پاکستان سپریم کونسل جیولرز ایسوسی ایشن کے مطابق ہفتہ کو عالمی صرافہ مارکیٹ میں7ڈالر کے اضافے سے فی اونس سونے کی قیمت 1464ڈالر ہو گئی جس کی وجہ سے ملکی صرافہ مارکیٹوں میں ایک تولہ سونا100روپے مہنگا ہو کر85200روپے جبکہ دس گرام سونا 85 روپے مہنگا ہو کر73045روپے کا ہو گیا

دوسری جانب روپے کے مقابلے میں ڈالرکی قدر میں گزشتہ ایک ہفتے کے دوران انٹر بینک اور مقامی اوپن کرنسی مارکیٹ میں کمی کا رجحان رہا ۔فاریکس ایسوسی ایشن آف پاکستان کی رپورٹ کے مطابق ایک ہفتے کے دوران انٹر بینک میں روپے کے مقابلے میں ڈالر کی قدر5پیسے گھٹ گئی جس سے ڈالر کی قیمت خرید 155.30روپے اور قیمت فروخت 155.40 روپے پر آگئی اسی طرح گزشتہ ایک ہفتے میں مقامی اوپن کرنسی مارکیٹ میں ڈالر کی قدر میں10پیسے کی کمی ریکارڈ کی گئی جس سے ڈالر کی قیمت فرخت 155.50روپے ہو گئی

(ایمرا نیوزآن لائن) فیڈرل بورڈ آف ریونیو (ایف بی آر) نے انکم ٹیکس گوشوارے جمع کرانے کی تاریخ میں ایک بار پھر توسیع کردی۔

انکم ٹیکس گوشوارے برائے محصولاتی سال 2019 جمع کرانے کی آخری تاریخ 30 نومبر تھی۔ ایف بی آر کی جانب سے جاری نوٹیفکیشن کے مطابق اب 16 دسمبر 2019 تک انکم ٹیکس گوشوارے جمع کرائے جاسکیں گے۔

(ایمرا نیوزآن لائن) یکم دسمبر سے پیٹرولیم مصنوعات کی قیمتوں میں کمی کا امکان ہے۔

آئل اینڈ گیس ریگولیٹری اتھارٹی (اوگرا) کی جانب سے وزارت پیٹرولیم کو بھیجی گئی سمری میں پیٹرولیم مصنوعات کی قیمتوں میں کمی کی سفارش کی گئی ہے۔

ذرائع کے مطابق پیٹرول 25 پیسے اور مٹی کا تیل 83 پیسے فی لیٹر سستا ہونے کا امکان ہے جب کہ لائٹ ڈیزل 2 روپے 90 پیسے فی لیٹر سستا کرنے کی سفارش کی گئی ہے۔ ذرائع کا بتانا ہے کہ پیٹرولیم مصنوعات کی قیمتوں میں ردوبدل کا حتمی فیصلہ وزیراعظم کریں گے۔

(ایمرا نیوزآن لائن) بلوچستان میں گندم کی قلت کے باعث آٹے کی قیمت میں تیزی سے اضافہ ہو رہا ہے، اس کے سبب 100 کلو آٹے کی بوری کی قیمت 5 ہزار 300 روپے تک پہنچ گئی ہے۔

مارکیٹ ذرائع کے مطابق بلوچستان میں گندم کی قلت اور فلور ملز کو رعایتی نرخوں پر گندم نہ ملنے کے باعث آٹے کی قیمتوں میں آئے روز اضافہ ہو رہا ہے۔

ذرائع کا کہنا ہے کہ گزشتہ دو ماہ کے دوران چار مرتبہ قیمتوں میں اضافے کے بعد فی کلو آٹے کی قیمت 53 روپے تک جا پہنچی ہے جس نے شہریوں کو پریشان کر کے رکھ دیا ہے۔

شہر کے نان بائیوں نے بھی روٹی کا وزن کم کر دیا ہے اور 300 گرام آٹے کی روٹی 20 روپے میں فروخت کی جا رہی ہے۔

اس سلسلے میں سیکریٹری خوراک بلوچستان محبوب شاہوانی کا کہنا ہے کہ اس سال مارچ میں گندم کی خریداری نہ ہونے کی وجہ سے آٹے کی ریٹس میں اضافہ ہوا ہے۔

دوسری جانب محکمہ خوراک نےگندم کی 5 لاکھ بوریوں کی خریداری کے لیے سمری وزیر اعلیٰ بلوچستان جام کمال کو بھجوا دی ہے۔ سمری کی منظوری کے بعد پاسکو سے گندم کی خریداری شروع کر دی جائے گی جس کے بعد آٹے کی قیمت میں کمی آئے گی۔ یاد رہے کہ وزیر اعلیٰ بلوچستان گندم کی بروقت خریداری نہ ہونے پر سابق سیکریٹری خوراک اصغر حریفال اور اس وقت کے ڈی جی محمد طارق کو معطل کر چکے ہیں۔

(ایمرا نیوزآن لائن) فیڈرل بورڈ آف ریونیو (ایف بی آر) کے چیئرمین شبر زیدی نے کہا ہے کہ معاشی نظام میں بہتری تک ٹیکس وصولیوں کا ہدف پورا نہیں کیا جاسکتا۔

اسلام آباد میں ایشیائی ترقیاتی بینک (اے ڈی بی) کے زیر اہتمام فورم سے خطاب میں شبر زیدی کا کہنا تھا کہ چھوٹے کاروباری کو ٹیکس حکام کی جانب سے ہراساں کیے جانے کا خوف ہے، چھوٹے کاروبار ٹیکس میں رجسٹرڈ ہونے سے کتراتے ہیں۔ انہوں نے کہا کہ پاکستان اسمال اینڈ میڈیم انٹرپرائزز ( ایس ایم ایز) دستاویزی نہ ہونے کے باعث زیادہ قرض حاصل نہیں کرسکا، ملک میں بجلی کے 31 لاکھ صنعتی اور کمرشل صارفین ہیں لیکن صرف 43 ہزار سیلز ٹیکس رجسٹرڈ ہیں، ایس ایم ایز کے لوگ ٹیکس سسٹم میں شامل ہی نہیں ہونا چاہ رہے۔

شبر زیدی کا کہنا ہے کہ ہمارے ملک میں گزشتہ ادوار میں ٹیکس سسٹم انتہائی مشکل تھا، چھوٹے اور درمیانے درجے کے صنعتوں کا معیشت میں 30 فیصد حصہ ہے، مینوفیکچرنگ کے شعبے سے منسلک ایس ایم ایز معیشت کی ریڑھ کی ہڈی ہوتی ہیں، معاشی نظام میں بہتری تک ٹیکس وصولیوں کا ہدف پورا نہیں کیا جاسکتا۔ ان کا کہنا تھا کہ ایک اور مسئلہ سنگل ٹیکس قانون ہے جو بڑے اور چھوٹے دونوں کاروبار پر لاگو ہوتا ہے، اس طرح ہم ٹیکس دوست ماحول پیدا نہیں کررہے، ہمیں ایس ایم ایز کے لیے ٹیکس قوانین کو آسان بنانا ہے، ٹیکس ریگولیٹری ماحول چھوٹے اور درمیانے درجے کی صنعتوں کے لیے سازگار نہیں بنایا گیا، ہمیں اس کو سازگار بنا کر ایس ایم ایز کی حوصلہ افزائی کرنی ہے۔

چیئرمین ایف بی آر کے مطابق ایف بی آر اور ایس ایم ای سیکٹر میں اعتماد کے فقدان کو ختم کرنا ہے، ایس ایم ایز کے لیے کھاتوں کے نظام کو آسان بنانا ہے، ایس ایم ایز کو دستاویزی معیشت میں لانے کے لیے ایمنسٹی اسکیم بھی دی جاتی ہے۔ انہوں نے کہا کہ ہم گجرانوالہ کی چھوٹی فاؤنڈری سے ڈبل انٹری اکاؤنٹنگ کا مطالبہ کیسے کرسکتے ہیں؟ ہمیں ایس ایم ایز کے لیے آسان اکاؤنٹنگ نظام کی ضرورت ہے، ایس ایم ایز جب قرضے لینے بینکوں کے پاس جاتے ہیں تو بینک ان سے اکاؤنٹس دستاویزات طلب کرتے ہیں، اسی وجہ سے ایس ایم ایز کو قرضے بھی نہیں مل پاتے۔

شبر زیدی کا کہنا تھا کہ ٹیکس قوانین کوآسان بنائے بغیر ہم لوگوں کو ٹیکس نظام میں نہیں لاسکتے۔ یاد رہے کہ گزشتہ دنوں چیئرمین ایف بی آر شبر زیدی نے کہا تھا کہ اکتوبر میں 320 ارب روپے کے محصولات اکھٹے کیے جو گزشتہ سال کے اسی عرصے میں حاصل ہونے والے محصولات کے مقابلے میں 16 فیصد زیادہ ہیں۔

راولپنڈی(ایمرا نیوز آن لائن) قومی احتساب بیورو (نیب) نے جعلی اکاؤنٹس و منی لانڈرنگ کیس میں آصف زرداری اور فریال تالپور کے خلاف ضمنی ریفرنس دائر کردیا۔نیب راولپنڈی کی جانب سے دائر ریفرنس میں الزام عائد کیا گیا ہےکہ نجی بینک کے فنڈز کا غلط استعمال کیا گیا اور بے نامی دار کے نام پر زمین خریدی گئی۔ریفرنس میں بتایا گیا ہے کہ ملزم مشتاق کا سابق صدر کے ساتھ مشترکہ اکاؤنٹ بھی ہے اور بینک ریکارڈ کے مطابق اکاؤنٹ آصف زرداری کے لیے استعمال ہوتا تھا، اس اکاؤنٹ کے ذریعے بیرون ملک رقم بھی منتقل ہوتی تھی۔ریفرنس کے مطابق 8.3 ارب روپے کی رقم جعلی اکاؤنٹس کے ذریعے نکلوائی گئی اور نجی بینک کے اکاؤنٹ سے غیرقانونی طور پر 1200 ملین روپے منتقل کرائے گئے جب کہ 950 ملین روپے کی رقم دوبارہ آصف زرداری کے استعمال کے اکاؤنٹس میں منتقل ہوئی۔

ریفرنس میں مزید الزام عائد کیا گیا ہےکہ انور مجید، عبدالغنی مجید اور مصطفیٰ ذوالقرنین کا سارے معاملے میں اہم کردار ہے۔منی لانڈنگ کیس 2015 میں پہلی دفعہ اسٹیٹ بینک کی جانب سے اُس وقت اٹھایا گیا، جب مرکزی بینک کی جانب سے وفاقی تحقیقاتی ادارے (ایف آئی اے) کو مشکوک ترسیلات کی رپورٹ یعنی ایس ٹی آرز بھیجی گئیں۔ایف آئی اے نے ایک اکاؤنٹ سے مشکوک منتقلی کا مقدمہ درج کیا جس کے بعد کئی جعلی اکاؤنٹس سامنے آئے جن سے مشکوک منتقلیاں کی گئیں۔معاملہ سپریم کورٹ تک پہنچا تو اعلیٰ عدالت نے اس کی تحقیقات کے لیے مشترکہ تحقیقاتی ٹیم ( جے آئی ٹی) تشکیل دی جس نے 24 دسمبر 2018 کو عدالت عظمیٰ میں اپنی رپورٹ جمع کرائی جس میں 172 افراد کے نام سامنے آئے۔

جے آئی ٹی نے سابق صدر آصف علی زرداری اور اومنی گروپ کو جعلی اکاؤنٹس کے ذریعے فوائد حاصل کرنے کا ذمہ دار قرار دیا اور ان کے نام ای سی ایل میں ڈالنے کی سفارش کی۔اس کیس میں سابق صدر آصف علی زرداری، ان کی ہمشیرہ فریال تالپور سے بھی تفتیش کی گئی جب کہ پیپلز پارٹی کے چیئرمین بلاول بھٹو زرداری نے بھی تحریری طور پر جے آئی ٹی کو اپنا جواب بھیجا جب کہ اومنی گروپ کے سربراہ انور مجید اور نجی بینک کے سربراہ حسین لوائی ایف آئی اے کی حراست میں ہیں۔سپریم کورٹ نے 7 جنوری 2019 کو اپنے فیصلے میں نیب کو حکم دیا کہ وہ جعلی اکاؤنٹس کی از سر نو تفتیش کرے اور 2 ماہ میں مکمل رپورٹ پیش کرے جب کہ عدالت نے جے آئی ٹی رپورٹ بھی نیب کو بجھجوانے کا حکم دیا۔

اعلیٰ عدالت نے حکم دیا کہ تفتیش کے بعد اگر کوئی کیس بنتا ہے تو بنایا جائے۔نیب نے 7 جنوری کو ہی جعلی اکاؤنٹس کیس کی تحقیقات کے لیے کمبائنڈ انویسٹی گیشن ٹیم (سی آئی ٹی) تشکیل دی جس کی سربراہی ڈی جی نیب راولپنڈی کو دی گئی۔آصف علی زرداری اور بلاول بھٹو زرداری نے 20 مارچ کو نیب کی کمائنڈ انویسٹی گیشن کے سامنے پیش ہو کر بیان ریکارڈ کرایا۔نیب راولپنڈی نے جعلی اکاؤنٹس کیس میں تین ریفرنسز تیار کر کے نیب ہیڈ کوارٹر بھجوائے اور چیئرمین نیب جسٹس (ر) جاوید اقبال کی زیر صدارت نیب ایگزیکٹو بورڈ نے 2 اپریل کو جعلی اکاؤنٹس کیس میں پہلا ریفرنس اومنی گروپ کے چیف ایگزیکٹو عبدالغنی مجید اور دیگر کے خلاف دائر کرنے کی منظوری دی۔

کوئٹہ(ایمرا نیوز آن لائن) دنیا کی سب سے قیمتی فصل زعفران ہے جو بہترین زرمبادلہ کمانے کے اعتبار سے ریڈ گولڈ کے نام سے مشہور ہے۔ اس نقد آور فصل کی جانب بلوچستان حکومت سمیت زمینداروں کا رجحان روز بروز بڑھ رہا ہے۔بلوچستان کی بظاہر خشک زمین بے شمار وسائل سےمالا ہے جس کا سینہ مختلف اقسام کی نباتات کے لئے نہایت زرخیز ہے، انہی میں زعفران بھی شامل ہے۔

کوئٹہ سمیت بلوچستان کے سطح سمندر سے بلند اور معتدل آب و ہوا والے علاقے زعفران کی کاشت کے لئے موزوں ترین ہیں جس کی ستمبر میں بوائی کے بعد نومبر میں فصل تیار ہوتی ہے جس کے لئے پھول کھلنے سے قبل ایک دوبارپانی دینا ہی کافی ہے۔اب مقامی زمیندارزعفران کاشت کی جانب راغب ہونےلگے ہیں، کوئٹہ، مستونگ، دشت سمیت دیگرعلاقوں میں کاشت ہونے والا زعفران معیار، رنگت، خوشبو اور ذائقے کے اعتبار سے دنیا کے کسی دوسرے خطے کے زعفران سے کم نہیں۔

دیگرخطوں کی نسبت بلوچستان کےزعفران میں ریشے بھی زیادہ پائے گئے ہیں۔ محکمہ زراعت کی جانب سے رواں سال تقریبا 45 ہزار زعفران کے پودے زمینداروں میں تقسیم کئے گئے۔ایک کلو زعفران ڈیرھ لاکھ پھولوں سے حاصل ہوتا ہے، بلوچستان کے زعفران کی فی کلو قمیت 5 سے 6 لاکھ روپے ہے۔

لاہور(ایمرا نیوز آن لائن) شہر میں گراں فروشی کی روک تھام کے لئے 30 نئے مجسٹریٹ تعینات کئے جائیں گے۔ہوم ڈیپارٹمنٹ کی جانب سے 30 نئے پرائس کنٹرول مجسٹریٹس کی خدمات ضلعی انتظامیہ لاہور کے حوالے کر دی گئی۔ڈی سی لاہور دانش افضال کی زیر صدارت نئے تعینات ہونے والے پرائس کنٹرول مجسٹریٹس کا نادر ہال ڈی سی آفس لاہور میں اہم اجلاس ہوا۔

اجلاس میں ایڈیشنل ڈپٹی کمشنر ریونیو اصغر جوئیہ، ایس اے او شاہد محبوب، پی ایس او عاصم سلیم اور سپرنٹنڈنٹ اقبال شاہ اور دیگر نے شرکت کی۔اجلاس میں اہم فیصلے کئے گئے۔ایس اے او شاہد محبوب کو فوکل پرسن تعینات کر دیا گیا ہے۔ایس اے او ان 30 پرائس کنٹرول مجسٹریٹس کے ساتھ رابطے میں رہیں گے۔ڈی سی لاہور دانش افضال نے نئے تعینات ہونے والے پرائس کنٹرول مجسٹریٹس کو فیلڈ میں ہمہ وقت متحرک رہنے کی ہدایت کی اور کہا کہ پرائس کنٹرول مجسٹریٹس روزانہ کی بنیاد پر پلان ترتیب دیں۔

انہوں نے کہا کہ نئے تعینات ہونے والے پرائس کنٹرول مجسٹریٹس اسسٹنٹ کمشنرز کے ساتھ رابطے میں رہیں اورمیگا سٹورز اور دکانوں پر پرائس لسٹ کی چیکنگ کو یقینی بنائیں اور ریٹ لسٹ کو نمایاں جگہ پر آویزاں کروائیں۔ڈی سی لاہور نے کہا کہ سبزی منڈیوں میں روزانہ کی بنیاد پر وزٹس کریںاور نیلامی کے عمل کی خود مانیٹرنگ کریں۔انہوں نے کہا کہ سٹورز اور دکانوں پر آٹا، چینی اور اشیاء ضروریہ کی فراہمی اور ریٹس پر خصوصی فوکس کریںاورگراں فروشی پر سخت کریک ڈاؤن عمل میں لائیں۔

ڈی سی لاہور دانش افضال نے کہا کہ جہاں گراں فروشی ہو جرمانے عائد کریںاورایف آئی آرز کا اندراج کروائیں۔انہوں نے کہا کہ ایس او پیز پر عملدرآمد کروائیںاورسرکاری نرخوں پر فروخت کو یقینی بنائیں۔ڈی سی لاہور نے کہا کہ عوام الناس کے ریلیف کے لئے ہر ممکن وسائل کو بروئے کار لائیں۔انہوں نے کہا کہ لاہور کے شہریوں کو ہر ممکن سہولیات فراہم کرنا ضلعی انتظامیہ لاہور کی اولین ترجیح ہے۔