Category بزنس

ملتان(ایمرا نیوز آن لائن) ملتان میں سردی کی شدت میں اضافے کے ساتھ ہی گیس کی لوڈ شیڈنگ میں بھی اضافہ کر دیا گیا ہے جس کی وجہ سے لکڑی اور کوئلے کی مانگ میں اضافہ ہونے پر ٹال مالکان نے قیمتوں میں بھی 25 فیصد تک کا اضافہ کر دیا ہے۔

گیس کی لوڈشیڈنگ عروج پر ہے جس کی وجہ سے گھریلو صارفین نے چولہا جلانے کے لیے لکڑیاں اور کمرشل صارفین صنعتوں کا پہیہ رواں رکھنے کے لیےکوئلہ خریدنا شروع کر دیا ہے جس سے لکڑی اور کوئلے کی مانگ بھی بڑھ گئی ہے، ٹال مالکان نے فائدہ اٹھاتے ہوئے قیمتوں میں دو سو سے تین سو روپے تک کا اضافہ کر دیا ہے۔

لکڑمنڈی میں لکڑی کی فی من قیمت 600 روپے جبکہ کوئلے کے دو ہزار روپے تک وصول کیے جارہے ہیں جس پر ٹال مالکان کا کہنا ہے کہ قیمتوں میں اضافہ خود ساختہ نہیں بلکہ بڑھتی ہوئی مہنگائی کا نتیجہ ہے۔ سردی کی وجہ سے بےپناہ لکڑیاں اور کوئلہ خریدا جا رہا ہے ہے یہی وجہ ہے کہ ٹال مالکان کے لیے ڈیمانڈ پوری کرنا بھی مشکل ہوگیا ہے۔

(ایمرا نیوزآن لائن) مرکزی بینک کی جانب سے جاری اعلامیے کے مطابق مہنگائی کی رفتار ابھی بھی بلند سطح پر ہے،کھانے پینے کی اشیاء کی قیمتوں میں اضافہ مہنگائی کی اہم وجہ ہے۔

اسٹیٹ بینک کا کہنا ہے کہ کرنٹ اکاؤنٹ خسارے میں کمی آنا شروع ہوئی ہے، مالی سال20-2019 میں مہنگائی کی شرح 11 سے 12 فیصد تک رہے گی۔ مرکزی بینک کا کہنا ہے کہ گذشتہ مانیٹری پالیسی اجلاس میں ہونے والے فیصلوں کے اچھے اثرات آرہے ہیں، کرنٹ اکاؤنٹ 4 سال بعد اکتوبر 2019 میں سرپلس رہا، تجارتی خسارے میں کمی بھی بہت اہم ہے۔ اسٹیٹ بینک کا کہنا ہے کہ آنے والے مہینوں میں مہنگائی کی شرح میں کمی ہوتی دیکھ رہے ہیں، کھانے پینے کی اشیاء کی قیمتوں میں اضافے کے باوجود مہنگائی کی توقعات مستحکم رہیں گی۔

اسٹیٹ بینک کے مطابق مالیاتی دُوراندیشی کے سبب مارکیٹ کے احساسات بتدریج بہتر ہورہے ہیں، بیرونی کھاتوں پر دباؤ کم ہورہا ہے ، پہلے چار ماہ میں کرنٹ اکاؤنٹ خسارہ 73.5 فیصد کم ہو کر 1.5 ارب ڈالر رہ گیا، برآمدات میں معقول نمو ہو رہی ہے۔ اسٹیٹ بینک کا کہنا ہے کہ رواں سال جون کے مقابلے روپے کی قدر 5.6 فیصد بہتر ہوئی ہے، رواں مالی سال زرمبادلہ کے ذخائر میں ایک ارب 16 کروڑ ڈالر اضافہ ہوا۔

(ایمرا نیوزآن لائن) بلوم برگ کا کہنا ہے کہ پاکستان کی اسٹاک مارکیٹ 7 ماہ کی بلند ترین سطح پر پہنچ گئی۔

امریکی نیوز ایجنسی بلوم برگ کی رپورٹ کے مطابق اگست میں پاکستان کی اسٹاک مارکیٹ 5 سال کی کم ترین سطح پر تھی، بیرونی سرمایہ کاروں نے اسٹاک مارکیٹ میں 6 کروڑ 40 لاکھ ڈالر سرمایہ کاری کی، یہ 2014 کے بعد بیرونی سرمایہ کاروں کی سب سے بڑی انویسٹمنٹ ہے، فروری 2020 میں ایف اے ٹی ایف اے کے جائزہ کے بعد اسٹاک مارکیٹ میں مزید سرمایہ کاری متوقع ہے۔

رپورٹ میں کہا گیا ہے کہ پاکستان نے منی لانڈرنگ کی روک تھام کےلیے کافی کام کیا ہے، لندن کی دو معروف کمپنیوں نے بھی پاکستانی اسٹاک مارکیٹ میں سرمایہ کاری کی ہے۔

اسلام آباد(ایمرا نیوزآن لائن) فیڈرل بورڈ آف ریونیو (ایف بی آر) نے ٹیکس گوشوارے جمع کرانے کی تاریخ میں توسیع کردی۔

فیڈرل بورڈ آف ریونیو کی جانب سے جاری اعلامیے کے مطابق ٹیکس گوشوارے جمع کرانے کی تاریخ میں 25 نومبر تک ایک بار پھر توسیع کردی گئی ہے۔ ایف بی آر نے اس سے پہلے ٹیکس گوشوارے جمع کرانے کی آخری تاریخ 18 نومبر رکھی تھی۔

کراچی(ایمرا نیوز آن لائن ) قومی خزانے کو 5 ارب کا نقصان پہنچانے والا گروہ بے نقاب ہوگیا۔ڈائریکٹر آف انٹیلی جنس اینڈ انویسٹی گیشن کسٹمز عرفان جاوید نے میڈیا کو بتایا کہ ٹریڈ کے دوران اوور انوائسنگ اور انڈر انوائسنگ کے ذریعے منی لانڈرنگ ہو رہی ہےجسے روکنے کے لیے ڈائریکٹوریٹ آف کسٹمز انٹیلی جنس موثر اقدامات کر رہا ہے۔انہوں نےکہا کہ اس سلسلے میں ہم نہ صرف فنانشل مانیٹرنگ یونٹ(FMU) سے رابطے میں ہیں بلکہ چین کے ساتھ بھی ہمارا مسلسل رابطہ ہے ،ہم نے اس سلسلے میں سولر پینل کی درآمد کا ایک بڑا کیس پکڑا ہے ،اسی طرح اسٹیل شیٹ کے ذریعے ٹیکس چوری اور منی لانڈرنگ کا اسکینڈل بے نقاب کیا ہے ۔

ان کا کہنا تھا کہ 10روپے کا سولر پینل 20 روپے کا ظاہر کر کے کلیئر کرایا جا رہا تھا اگرچہ اس پر کوئی ڈیوٹی نہیں لیکن اس طرح اضافی پیسہ باہر بھیجا جا رہا تھا، ابھی فتیش ابتدائی مراحل میں ہے تاہم اس طرح ایک بڑی رقم باہر بھیجی جا چکی ہے ۔عرفان جاوید نے بتایا کہ اگرچہ ہم اینٹی اسمگلنگ پر بھی کام کر رہے ہیں اور اس سلسلے میں ہم نے چیمبر و ایسوسی ایشن سے تعاون مانگا ہے کہ وہ آرگنائز سیکٹر کے ذریعے ہماری مدد کریں مگر وہاں سے مثبت جواب نہیں آیا۔

انہوں نے بتایا کہ ہم نے اسٹیل سیکٹر کا ایک بڑا اسیکنڈل بے نقاب کیا ہے یہ لوگ بڑے منظم طریقے سے کام کر رہے تھے جس سے نہ صرف ٹیکس چوری ہو رہا تھا بلکہ اس سے ملک کے مینوفیکچرز سیکٹر کو بھی بھاری نقصان کا سامنا تھا یہ گروہ ایک جانب ای پی زیڈ چینل کا غلط استعمال کر رہے تھا۔ان کا کہنا تھا کہ دوسری جانب 2006کے ایک ایس آر او کا بھی ناجائز فائدہ اٹھا رہا تھا ،حکومت نے الیکٹرو اسٹیل شیٹ کی پرائم کوالٹی پر 11فیصد کسٹمز ڈیوٹی عائد کر رکھی ہے جبکہ سیکنڈری شیٹ پر ڈیوٹی کی شرح 20 فیصد ہے تاہم آٹو وینڈر کے لیے جاری ہونے والے ایس آر او 655کے تحت یہ صرف ایک فیصد ڈیوٹی ادا کر کے مال کلیئر کراتے تھے اور پھر بھاری منافع پر اسے مارکیٹ میں فروخت کر دیتے تھے اس سلسلے میں ہم نے 8ایف آئی آر درج کی ہیں ،جب کسٹمز انٹیلی جنس نے ایس آر او 655کے غلط استعمال کو چیک کرنا شروع کیا تو ان گروپوں نے پورٹ قاسم سے مس ڈکلیریشن شروع کر دی۔

ڈائریکٹر آف انٹیلی جنس اینڈ انویسٹی گیشن کسٹمز نے بتایا کہ ہمارے اندازے کے مطابق یہ قومی خزانے کو 5 ارب کا نقصان پہنچا چکے ہیں، لیکن درست تخمینہ مکمل تفتیش کے بعد سامنے آئے گا، اس مقصد کے لیے ہم ایک سے ڈیڑھ سال کا ڈیٹا نکا ل رہے ہیں۔عرفان جاوید نے کہا کہ کراچی میں اسمگل شدہ اشیاء کا بڑا ڈمپنگ گراونڈ یوسف گوٹھ ہے وہاں کارروائی کے لیے ہم نے رینجرز اور پولیس کو تعاون کے لیے لکھا ہے ایک سوال پر ان کا کہنا تھا کہ آج کل ٹریڈ ( درآمد وبرآمد) منی لانڈرنگ کا ایک بڑا ذریعہ ہے اوور انوائسنگ اور انڈر انوائسنگ کے ذریعے یہ کام ہو رہا ہے۔ان کا کہنا تھا کہ اس مقصد کے لیے ہم اپنے اسٹاف کو بھی تربیت دے رہے ہیں ،ہم نے اس سلسلے میں آئل ،پام آئل ،اسٹیل اور مشینری وغیرہ کو فوکس کیا ہے۔

کراچی(ایمرا نیوزآن لائن) :(18 نومبر 2019) کاروباری ہفتے کےپہلے روز پاکستان اسٹاک ایکسچینج میں زبردست تیزی دیکھی گئی۔ 827پوائنٹس کے اضافے سے مارکیٹ9ماہ کی بلند ترین سطح38ہزار411پر بندہوئی۔
کاروباری ہفتے کےپہلے روزمارکیٹ کے آغاز سے شروع ہونے والی تیزی اختتام تک برقرار رہی۔ تیزی کے باعث ہنڈرڈ انڈیکس 38ہزار کا نفسیاتی ہندسہ عبور کرگیا۔ 827پوائنٹس کے اضافے سے مارکیٹ9ماہ کی بلند ترین سطح 38ہزار411پربندہوئی۔
دن بھرمجموعی طور ہر390کمپنیز کے شیئرز میں کاروبار ہوا-278کے شیئرزکی قیمتوں میں اضافہ جبکہ 93کے شیئرز کی قیمتوں میں کمی دیکھی گئی۔ تیزی کے باعث آج ہنڈرڈ انڈیکس میں2 عشاریہ15فیصد کا اضافہ ہوا۔ آج مارکیٹ کی بلند ترین سطح38,452 جبکہ کم ترین سطح 37,583ریکارڈ کی گئی۔
انٹربینک میں ڈالر4پیسےکی کمی سے 155.39سے کم ہوکر 155.35 پربندہوا جبکہ اوپن مارکیٹ میں 155روپے 40پیسے پر مستحکم رہا۔ روپے کے مقابلے یوروکی قیمت172 روپے،برطانوی پاونڈ کی قیمت201 روپے جبکہ جاپانی ین ایک روپے44 پیسے، اماراتی درہم 42روپے35 پیسے جبکہ سعودی ریال کی قیمت41 روپے 35رہی۔
دوسری جانب سونا 450 روپے سستا ہوگیا جس کے بعد فی تولہ سونا 85ہزار700روپے کی سطح پر آگیا۔ اسی طرح10 گرام سونے کی قیمت 386روپے کی کمی سے73ہزار474روپے ہوگئی جبکہ عالمی مارکیٹ میں سونا 10ڈالر کی کمی سے1459 ڈالر فی اونس کی سطح پرآگیا۔

کراچی(ایمرا نیوز آن لائن ) پاکستان سٹاک مارکیٹ میں کاروباری ہفتے کے پہلے روز زبردست 827 پوائنٹس کی تیزی دیکھی گئی اور مارکیٹ 7 ماہ کی بلند ترین سطح پر بند ہوئی۔کاروباری ہفتے کے پہلے روز پاکستان سٹاک ایکسچینج میں تیزی دیکھنے میں آئی، سرمایہ کاروں نے حصص کی خریداری میں زیادہ دلچسپی لی تو اوسط کاروباری حجم 29 ماہ کی بلند ترین سطح کو چھو گئے۔

مارکیٹ 827 پوائنٹس کے اضافے سے 7 ماہ کی بلند ترین سطح 38 ہزار 411 پوائنٹس کی سطح پر بند ہوئی جبکہ شیئرز کی مالیت میں 120 ارب روپے سے زائد کا اضافہ ریکارڈ کیا گیا۔معاشی ماہرین کے مطابق معیشت کے حوالے سے مثبت خبریں آنے سے گذشتہ دو ہفتوں کے دوران سٹاک مارکیٹ 4 ہزار سے زائد پوائنٹس بڑھ چکی ہے۔

کوئٹہ(ایمرا نیوز آن لائن) ایران سے آنے کے باوجود بھی ٹماٹروں کی قمیت میں کمی نہیں آئی، جیب میں لال نوٹ نہ ہونے سے سرخ ٹماٹروں کی خریداری تاحال ناممکن ہے۔ پشاور اور کوئٹہ کی سبزی منڈی میں 2 سے اڑھائی سو روپے فی کلو ٹماٹر بک رہے ہیں۔

کوئٹہ کی سبزی منڈی میں ایرانی ٹماٹر پہنچ گئے، ایرانی سرخ سرخ گول مٹول ٹماٹر اب بھی 2 لال نوٹوں کے عوض فی کلو مل رہے ہیں، منڈی میں لوگ اپنی جیب کو دیکھ کر کلو آدھ کلو ہی خریدنے پر اکتفا کر رہے ہیں، ٹماٹروں کی قمیت میں کمی نہ آںے سے خواتین مسلسل پریشانی سے دوچار ہیں کیونکہ کچن کی ذمہ داری انکے کندھوں پر ہے۔

ٹماٹرکے نرخ آسمان پر ہونے کے باعث بہت سے شہری دھی استعمال کرنے پر مبجورہیں، سبزی فروشوں کا کہنا ہے دھی ٹماٹر کا نعم البدل نہیں ہو سکتی، لوگ کچھ انتطار کریں مقامی فصل آنے پر ٹماٹر سستے ہو جائیں گے۔

کوئٹہ کی سبزی منڈی میں ایرانی ٹماٹر پہنچنے کے بعد ملک کے دیگر شہروں کو بھی بھیجے جا رہے ہیں۔ ادھر پشاور میں بھی ٹماٹر 250 روپے کلو فروخت کیا جا رہا ہے، ، شہر کی سبزی منڈیوں میں مٹر 150، پیاز 80، مرچ 110 اور کچالو 100 روپے فی کلو فروخت ہو رہے ہیں جبکہ دیگر سبزیوں کی قیمت میں بھی اضافہ ہوا ہے۔

لاہور(ایمرا نیوز آن لائن)پاکستان میں ٹماٹر کے بحران کے پیش نظر ایران سے ٹماٹروں کی درآمد شروع ہوگئی ہے۔ ایران سے ٹماٹروں کی بھاری کھیپ لے کر 4 ٹریلر کوئٹہ اور 9 ٹریلر پاک ایران سرحدی شہر تفتان پہنچ گئے جب کہ تفتان پہنچنے والے 9 ٹریلر بھی ایک دو روز میں کوئٹہ پہنچ جائیں گے ۔

کسٹم حکام کے مطابق ایران سے آنے والے ٹریلروں میں مجموعی طور پر 4 ہزار 500 میٹرک ٹن ٹماٹر لدا ہوا ہے، ایرانی ٹماٹر کوئٹہ سے تعلق رکھنے والی 7 نجی کاروباری کمپنیوں نے درآمد کیے ہیں۔حکام نے بتایا کہ ایران سے درآمد کیے گئے ٹماٹر کراچی اور پنجاب سمیت ملک کے مختلف حصوں میں فروخت کے لیے بھیجے جائیں گے ۔

واضح رہےکہ ملک میں ٹماٹر کے بحران کے باعث اس کی قیمت 300 روپے فی کلو تک پہنچ گئی ہے جس کے بعد ٹماٹر درآمد کرنے سے پاکستان میں ٹماٹر کی قیمت میں خاطرخواہ کمی اور استحکام آنے کا قوی امکان ہے۔

گجرات(ایمرا نیوزآن لائن) مہنگے داموں ٹماٹر بیچنے سے روکنے پر آڑھتی نے مارکیٹ کے سیکریٹری پر فائرنگ کردی تاہم سیکریٹری خوش قسمتی سے محفوظ رہے۔

یہ واقعہ مارکیٹ کمیٹی جلال پور جٹاں میں پیش آیا جہاں ٹماٹر مہنگے داموں بیچنے سے روکنے پر آڑھتی مہر فیاض نے مارکیٹ کمیٹی کے سیکریٹری نشاط اشرف پر فائرنگ کردی۔

فائرنگ کے نتیجے میں سیکریٹری نشاط اشرف خوش قسمتی سے محفوظ رہے۔ واقعے کے بعد سٹی پولیس مقدمہ درج کرکے ملزم کی گرفتاری کے کارروائی شروع کردی۔