Category بزنس

اسلام آباد (ایمرا نیوز آن لائن)دہشت گردی کی روک تھام سے متعلق اقدامات پر حکومت پاکستان نے فنانشل ایکشن ٹاسک فورس (ایف اے ٹی ایف) کو اپنا جواب جمع کرا دیا ہے۔

وفاقی وزیر برائے معاشی امور حماد اظہر کا اس حوالے سے کہنا ہے کہ بنکاک میں ایف اے ٹی ایف کی ٹیکنیکل ٹیم کے ساتھ بات چیت ہوئی۔

حماد اظہر کا کہنا ہے کہ تکنیکی سطح ہر 4 ماہ کی کارکردگی پر ایف اے ٹی ایف حکام کو بریف کیا، پاکستان نے گزشتہ 4 سے 5 ماہ میں اہداف کو حاصل کیا۔

وفاقی وزیر نے بتایا کہ ایف اے ٹی ایف کا تکنیکی وفد پاکستان کی بریفنگ پر رپورٹ مرتب کرے گا جو اگلے ماہ ایف اے ٹی ایف کے رکن ممالک کو پیش کی جائے گی۔

حماد اظہر نے کہا کہ ایف اے ٹی ایف حکام کو بریفنگ پہلے سے بہت موثر رہی اور ایف اے ٹی ایف کی رپورٹ کی روشنی میں پاکستان کے اسٹیٹس کا فیصلہ کیا جائے گا۔

لاہور (وقت نیو ز آن لائن) بینک دولت پاکستان کے گورنر ڈاکٹر رضا باقر کے دستخط کے حامل کرنسی نوٹوں کا اجرا شروع کر دیا گیا ہے۔ اس حوالے سے میڈیا رپورٹس میں بتایا گیا ہے کہ گورنر اسٹیٹ بینک رضا باقر کے دستخط کے حامل کرنسی نوٹوں کا اجرا بینکنگ سروسز کارپوریشن کے فیلڈ دفاتر کے ذریعے سے 30اگست سے شروع ہوا ہے۔

وہ کرنسی نوٹ جن پر ان کے پیش رو کے دستخط ہیں وہ زیر گردش رہیں گے، واضح رہے کہ ڈاکٹر رضا باقر آئی ایم ایف کی نوکری چھوڑ کر پاکستان خدمت کے لیے آئے ہیں، انہیں انگریزی، اردو اور پنجابی زبانیں آتی ہیں۔ ان کا تعلق ملتان کے قریبی علاقہ وہاڑی کے ایک گا ؤں 571 ای بی سے ہے اور یہ وہیں کے رہنے والے ہیں۔

ڈاکٹر رضا باقر پاکستان آنے سے پہلے آئی ایم ایف کے لئے مصر میں کام کر رہے تھے۔ ڈاکٹر رضا باقر اس سے قبل آئی ایم ایف کے لئے رومانیہ میں کنٹری ہیڈ تھے، ڈاکٹر رضا باقر نے کیلیفورنیا سے ڈاکٹریٹ کی ڈگری حاصل کی۔

رضا باقر اس سے پہلے آئی ایم ایف کی جانب سے مصر میں خدمات انجام دے رہے تھے ۔ انہوں نے مصر کی معیشت بہتر بنانے میں اہم کردار ادا کیا ۔ رضا باقر کے دور میں آئی ایم ایف نے مصر کو 12ارب ڈالر کی معاشی امداد دی تھی۔آئی ایم ایف نے یہ امداد 2016 میں مصر کو دی جس کے بعد مصر کی معاشی ترقی کی شرح میں اضافہ ہوا اور زرِ مبادلہ کے ذخائر بھی بڑھ گئے تھے ۔

لاہور (ایمرا نیوز آن لائن) چیئرمین ایف بی آر شبر زیدی کا کہنا ہے کہ دو ماہ کے دوران ٹیکس وصولی 580 روپے رہی۔شبر زیدی نے سوشل میڈیا پر جاری اپنے بیان میں کہا کہ اگست میں 8 سے 10 چھٹیوں کے باوجود 297 ارب 40 کروڑ روپے کی ٹیکس وصولی ہوئی۔
50 ہزار کی خریداری پر شناختی کارڈ کی شرط موجود ہے

انہوں نے بتایا کہ رواں مالی سال کے دو ماہ میں ٹیکس وصولی کے ہدف کا 90 فیصد حاصل کر لیا ہے۔شبر زیدی نے کہا کہ رواں مالی سال جولائی اور اگست میں ٹیکس وصولی ہدف کے مقابلے میں 90 فیصد رہی، جولائی تا اگست ٹیکس وصولی 644 ارب روپے کے ہدف کے مقابلے میں 580 ارب روپے رہی۔

اسلام آباد(ایمرا نیوز آن لائن) ایف بی آر کو ماہانہ ٹیکس ہدف پورا کرنے میں 60 ارب روپے کی کمی کا سامناہے۔ تفصیلات کے مطابق ایف بی آر کو اگست 2019 میں 352 ارب روپے کا ہدف پورے کرنے میں 60 ارب روپے کے ریونیو کی کمی کا سامنا ہےکیوں اس سے اب تک رواں ماہ کے دوران 292 ارب روپے جمع کیے ہیں۔

جمعے کے روز جاری کیے گئے ریونیو کے ضمنی اعداد وشمار کے مطابق ایف بی آر نے رواں مالی سال کے ابتدائی دوماہ (جولائی اور اگست2019) میں مطلوبہ ہدف 644 ارب روپے کے مقابلے میں 576 ارب روپے جمع کیے یعنی مذکورہ مدت میں ایف بی آر کو 68 ارب روپے کی کمی کا سامنا رہا۔

اگست 2019 میں ایف بی آر کی مقامی ٹیکسز کے حوالے سے خالص نمو 17 اعشاریہ 5 فیصد رہی اس میں انکم ٹیکس، سیلز ٹیکس(مقامی)اور فیڈرل ایکسائز ڈیوٹی (ایف ای ڈی)کی نمو 30 فیصد رہی تاہم درآمدات کے حوالے سے ٹیکس نمو 16فیصد منفی رہا ہے۔

چیئرمین ایف بی آر شبر زیدی کا کہنا ہے کہ اگست 2019 میں ٹیکس ہدف 378 ارب روپے نہیں 350 ارب روپے سے کم تھا۔جب کہ ایف بی آر رکن آئی آر پالیسی ڈاکٹر حامد عتیق سرور کا کہنا تھا کہ ایف بی آر کوشش کررہا ہے کہ ابتدائی دو ماہ کے دوران 600 ارب روپے ٹیکس جمع کیا جائے۔

ایس این پی (ایمرا نیوز)معاشی ریٹنگ کے عالمی ادارے اسٹینڈرڈز اینڈ پوورز (ایس این پی) کی جاری رپورٹ کے مطابق پاکستانی معیشت کی ریٹنگ ’بی مائنس‘ برقرار رہے گی۔
رپورٹ میں بتایا گیا ہے کہ مالیاتی خسارہ اور غیر ملکی ادائیگیاں پاکستانی معیشت کے لیے پریشان کُن ہیں، پاکستان کو مستقل معاشی اصلاحات کی ضرورت ہے۔
ریٹنگ ایجنسی کی رپورٹ میں یہ بھی کہا گیا ہے کہ پاکستانی کی معاشی ترقی کی شرح 2 اعشاریہ 4 فیصد رہنے، تجارتی خسارہ جی ڈی پی کا 9 فیصد رہنے اور مہنگائی کی شرح 8 فیصد رہنے کا امکان ہے۔
ایس این پی کی رپورٹ میں کہا گیا ہے کہ پاکستان کو آمدنی بڑھانے کے لیے خصوصی توجہ دینا ہو گی، سال 2020 کے بعد پالکستانی معیشت مستحکم ہونا شروع ہو جائے گی۔

اسلام آباد(ایمرا نیوز)ایشیائی ترقیاتی بینک نے پاکستان کو 7.5 ارب ڈالرز قرض دینے کا وعدہ کر لیا ہے۔تفصیلات کے مطابق وزارت برائے ترقی و منصوبہ بندی نے اعلان کیا کہ ایشیائی ترقیاتی بینک نے 3 سالوں میں پاکستان کو 7.5 ارب ڈالر کی معاونت کا وعدہ کیا ۔ وزیر منصوبہ بندی مخدوم خسرو بختیار نے ایشیائی ترقیاتی بینک کے ڈی بی کی معاونت کو خوش آئند قرار دیتے ہوئے اُمید ظاہر کی کہ اے ڈی بی کا پورٹ فولیو دیگر شعبوں کو شامل کرنے کے لیے وسیع ہوگا۔
خسرو بختیار کا کہنا تھا کہ سی پی ایس 24-2020ء کو تمام اسٹیک ہولڈرز سے مشاورت کے بعد حتمی شکل دے دی جائے گی۔ ایشیائی ترقیاتی بینک نومبرمیں پاکستان کو ایک ارب ڈالر سے زائد رقم جاری کرے گا، رقم بجٹ سپورٹ اور توانائی اصلاحات کے لیے دی جائےگی۔
ایشیائی ترقیاتی بینک ایک ارب ڈالربجٹ سپورٹ کے لیے جبکہ تیس کروڑ ڈالر توانائی سیکٹراصلاحات کے لیے دئے جائیں گے۔
ایشیائی ترقیاتی بینک کے مطابق بینک پاکستان کو سال 2020ء سے 2024ء کےدرمیان ساڑھے سات ارب ڈالرفراہم کرے گا، اور یہ رقم کنٹری آپریشنزبزنس پلان کےتحت دی جائے گی۔ دوسری جانب حکومت پنجاب نے بھی ایشیائی ترقیاتی بینک سے تین سال میں 2 کھرب 92 ارب قرضہ لینے کا فیصلہ کیا تھا، یہ فیصلہ گذشتہ روز محکمہ ترقیاتی و منصوبہ بندی میں ہونے والے اجلاس کے بعد وزیراعلٰی پنجاب کی زیر صدارت اجلاس میں کیا گیا تھا جس کے بعد ایشیائی ترقیاتی بینک کی جانب سے قرضہ دینے پر آمادگی ظاہر کرنے کی خبر سامنے آئی تھی۔
وزیراعلیٰ پنجاب سردار عثمان بزدار کی زیر صدارت اجلاس میں فیصلہ کیا گیا تھا کہ پنجاب ایگری کلچر مارکیٹ ڈویلپمنٹ پراجیکٹ پر سولہ ارب کا قرض لیا جائے گا۔ گریٹر تھل کینال پروگرام نامی منصوبے کے لیے 24 ارب روپے کا قرض لیا جائے گا۔ ورک فورس پروگرام کے منصوبے پر 16 ارب کا قرض لیا جائے گا۔ ڈی جی خان میں کینال اور زرعی زمین کی بہتری کے منصوبے کے لئے 12 ارب روپے کا قرض لیا جائے گا۔
صوبہ پنجاب میں سڑکوں کی تعمیر کے پروگرام کے لئے 24 ارب روپے کا قرض لیا جائے گا۔ پنجاب بھر میں واٹر سپلائی پروگرام پر 32 ارب روپے کا قرض لیا جائے گا۔ پنجاب سسٹین ایبل ڈویلپمنٹ گول کے لئے 32 ارب روپے کا قرض لیا جائے گا۔ دریائے راوی کے بحالی پروگرام پر 16 ارب روپے قرض لیا جائے گا۔ گریٹر تھل کینال پروگرام کے لیے 2022 میں فیز ٹو کے لیے 48 ارب روپے کا قرض لیا جائے گا اور دیگر منصوبوں کے لئے مختلف فیز میں مزید قرض لیا جائے گا۔
ذرائع کے مطابق معاہدہ طے پانے کے بعد پنجاب حکومت ایشین ڈویلپمنٹ بینک سے یہ قرض وصول کرے گا۔ واضح رہے کہ ایشیائی ترقیاتی بینک کے نائب صدر شی ژن چن پاکستان کے دورے پر تھے جس دوران انہوں نے پاکستان میں اہم ملاقاتیں بھی کیں۔ وزیراعظم عمران خان سے بھی ایشیائی ترقیاتی بینک کے وفد کی ملاقات ہوئی تھی۔

اسلام آباد (ایمرا نیوز) حکومت نے پٹرولیم مصنوعات کی قیمتوں میں کمی اور مہنگائی کے ستائے عوام کو ریلیف دینے کا فیصلہ کیا ہے۔میڈیا رپورٹس میں بتایا گیا ہے کہ پٹرولیم مصنوعات کی قیمتوں میں کمی کی سمری پٹرولیم ڈویژن کو موصول ہو گئی ہے جس میں ہائی اسپیڈ ڈیزل کی قیمت میں 7روپے 67 پیسے فی لیٹر کمی کی تجویز دی گئی ہے۔
لائٹ ڈیزل کی قیمت میں 5روپے 63 پیسے فی لیٹر کمی، مٹی کے تیل کی قیمت میں 4روپے 27 پیسے لیٹر کمی اور پٹرول کی قیمت میں 4روپے 59 پیسے فی لیٹر کمی کی سفارش کی گئی ہے۔تاہم حتمی فیصلہ کل وزارت خزانہ کی مشاورت سے ہو گا جس کی منظوری کی صورت میں نئی قیمتوں پر عمل درآمد یکم ستمبر سے ہو گا۔اس سے قبل ایک رپورٹ میں بتایا گیا تھا کہ عالمی منڈی میں پٹرولیم مصنوعات کی قیمتوں میں کمی کے بعد آئندہ ماہ پاکستان میں پٹرول کی قیمتیں کم ہونے کا امکان ہے۔
خام تیل کی قیمت رواں سال کی کم ترین سطح پر آگئی،گذشتہ 4 ماہ کے دوران خام تیل کی قیمتوں میں 16 ڈالر فی بیرل کی کمی ہوئی۔عالمی مارکیٹ کے مطابق 19 روپے 32 پیسے فی لٹر کمی ہونی چاہئیے۔ عالمی مارکیٹ کی کمی اور مقامی ٹیکسز شامل کر کے پٹرول کی قیمت 98روپے 68پیسے بنتی ہے۔میڈیا رپورٹس میں مزید بتایا گیا ہے کہ اوگرا نے اب تک جو وورکنگ کی ہے اس کے مطابق پٹرولیم مصنوعات کی قیمتوں میں 8روپے فی لیٹرکمی کا امکان ظاہر کیا جا رہا ہے۔
کہا جا رہا ہے کہ پٹرول کی قیمت میں 6روپے جب کہ ڈیزل کی قیمت میں 8روپے فی لیٹر تک کمی کی جا سکتی ہے۔ی۔واضح رہے مشیر خزانہ حفیظ شیخ نے پاکستانی عوام کو خوشخبری سنائی تھی ۔ مشیر خزانہ کی جانب سے اعلان کیا گیا تھا کہ یکم ستمبر سے پاکستان میں پیٹرولیم مصنوعات کی قیمتوں کی مد میں کمی کیے جانے کا امکان ہے۔ مشیر خزانہ حفیظ شیخ کا کہنا ہے کہ عالمی مارکیٹ میں خام تیل کی قیمتوں میں کمی کا رجحان دیکھا جا رہا ہے۔ حکومت کی کوشش ہے کہ عالمی مارکیٹ میں خام تیل کی قیمتوں میں جو کمی ہو رہی ہے کا اس کا فائدہ عوام کو پہنچایا جائے۔ اسی لیے اگلے ماہ پیٹرولیم مصنوعات کی قیمتوں میں کمی کی جا سکتی ہے۔ مشیر خزانہ کہتے ہیں کہ ہم نے 262 ارب روپے سبسڈی کی مد میں رکھے ہیں۔

اسلام آباد(ایمرا نیوز)قرضوں کا بوجھ بڑھانے کے سابقہ تمام ریکارڈز توڑتے ہوئے پاکستان تحریک انصاف (پی ٹی آئی) نے اپنی حکومت کے پہلے سال میں ہر پاکستان پر واجب الادا قرضوں میں مزید 46 ہزار روپے کا اضافہ کردیا ہے۔
1947ء سے جون 2018ء تک یعنی 70 سال میں آنے والی ہر حکومت نے مجموعی طور پر ہر پاکستانی پر ایک لاکھ 36 ہزار روپے تک قرضوں کا بوجھ ڈالا۔
جولائی 2018ء سے جون 2019ء تک یہ اعداد و شمار اونچی چھلانگ لگا کر ایک لاکھ 82 ہزار روپے تک جا پہنچے ہیں یعنی ہر شہری پر واجب سابقہ قرضے میں 46 ہزار روپے اضافی۔ ماضی کی بیان بازی کے برعکس، پی ٹی آئی حکومت سرکاری قرضوں میں پیپلز پارٹی اور نون لیگ کے مشترکہ ادوار میں لیے گئے قرضوں سے بھی زیادہ کا اضافہ کرتی جا رہی ہے۔
تاہم پی ٹی آئی کا کہنا ہے کہ نئے قرضے پرانی حکومتوں کے لیے گئے قرضوں کا بوجھ اتارنے کیلئے لیے گئے ہیں، اگر یہ نئے قرضے نہ لیے جاتے تو ملک دیوالیہ ہو سکتا تھا۔
اسٹیٹ بینک آف پاکستان کے تازہ ترین اعداد و شمار سے معلوم ہوتا ہے کہ مارچ 2019ء تک پاکستان کے مجموعی قرضہ جات اور واجبات میں زبردست اضافہ ہوا اور یہ 40 ہزار 214 ارب روپے تک جا پہنچے۔
گزشتہ مالی سال یعنی جون 2018ء کے دوران مجموعی قرضہ جات اور واجبات 29 ہزار 879 ارب روپے تھے اور اب مارچ 2019ء تک ان میں 10 ہزار ارب روپے کا بے پناہ اضافہ ہوا ہے۔
جی ڈی پی کے فیصدی لحاظ سے دیکھیں تو قرضہ جات اور واجبات 104.3 فیصد ہوچکے ہیں۔ پاکستان پر قرضوں کا بوجھ تیزی اور پریشان کن انداز سے بڑھ رہا ہے جس کی پہلے کبھی مثال نہیں ملتی اور خدشہ ہے کہ اگر اس رجحان پر قابو نہ پایا گیا تو پی ٹی آئی حکومت کے پانچ سال میں قرضہ جات گزشتہ 70 سال میں لیے گئے قرضوں کے دو گنا سے بھی بڑھ جائے گا۔
ملک پر جون 2018ء تک قرضوں کے 30 ہزار ارب روپے کے جس بوجھ کی بات پی ٹی آئی والے کرتے ہیں وہ 2007ء میں 6 ہزار 691 ارب روپے تھے۔ پی ٹی آئی سمجھتی ہے کہ قرضوں میں زبردست اور بے پناہ اضافہ نون لیگ اور پیپلز پارٹی کی حکومتوں میں ہونے والی کرپشن کا نتیجہ ہے کیونکہ اس عرصہ میں دونوں جماعتوں کی حکومت تھی۔
حکومت نے ڈپٹی چیئرمین نیب حسین اصغر کی سربراہی میں کمیشن بھی تشکیل دیا تھا جس کا کام یہ معلوم کرنا ہے کہ پیپلز پارٹی اور نون لیگ کے دور میں قرضوں کا بوجھ کس طرح بڑھ گیا اور کہیں عوام کی فلاح کیلئے مختص کردہ رقم ان پارٹیوں کی جیب میں تو نہیں گئی۔
تاہم اسٹیٹ بینک آف پاکستان کے تازہ ترین اعداد و شمار سے معلوم ہوتا ہے کہ پی ٹی آئی حکومت نے قرضے لینے کے سابقہ تمام ریکارڈ توڑ دیے ہیں اور ملک پر قرضوں کو شدید بوجھ ڈال دیا ہے۔ جون 2018ء سے مارچ 2019ء تک صرف ایک سال کے دوران 10 ہزار ارب روپے کے قرضے لے کر گزشتہ مالی سال کے 29 ہزار 879 ارب روپے کو بڑھا کر 40 ہزار 214 ارب روپے تک پہنچایا گیا ہے۔ اگر قرضہ جات اسی رفتار سے بڑھتے رہے تو پانچ سال میں پی ٹی آئی حکومت اپنی مدت مکمل کرتے وقت 50 ہزار ارب روپے تک قرضے لے چکی ہوگی اور مجموعی قرضہ جات 80 ہزار ارب ہو چکے ہوں گے۔
اب صورتحال یہ ہے کہ ہر پاکستانی پر ان قرضوں کے بوجھ میں 46 ہزار روپے کا اضافہ ہوا ہے جو جون 2018ء تک ایک لاکھ 36 ہزار تھا جو اب تقریباً ایک لاکھ 81 ہزار روپے ہو چکا ہے۔
اسٹیٹ بینک کے مطابق جون 2013ء تک مجموعی قرضہ جات 16 ہزار 228 ارب روپے تھے۔ اُس وقت ہر پاکستانی 96 ہزار 422 روپے کا مقروض تھا۔ نون لیگ کی حکومت مکمل ہوئی تو ہر پاکستانی ایک لاکھ 36 ہزار کا مقروض تھا اور اب صرف ایک سال میں ہر پاکستانی ایک لاکھ 81 ہزار کا مقروض ہو چکا ہے۔ 2008ء میں جب ملک پر مجموعی قرضہ جات 6 ہزار 691 ارب روپے تھے اس وقت ہر پاکستانی 37 ہزار 172 روپے کا مقروض تھا۔

کراچی(ایمرا نیوز) فیڈرل بورڈآف ریونیو کے نوٹسز کے خوف سے کمرشل بینکوں کے ڈپازٹس میں سے ایک ماہ کے دوران 711 ارب روپے نکلوا لیے گئے جب کہ سب سے زیادہ کمی کنسٹرکشن سیکٹر والوں کے ڈپازٹس میں دیکھی گئی۔
اسٹیٹ بینک کے مطابق مالی سال کے پہلے ماہ کے دوران کمرشل بینکوں کے ڈپازٹس میں موجود رقم میں مجموعی طور پر 710 ارب 95 کروڑ 20 لاکھ روپے کی کمی ریکارڈ کی گئی اور ڈپازٹس کا مجموعی حجم 137 کھرب 47 ارب 35 کروڑ روپے رہ گیا۔
ایک ماہ میں بینکوں میں کنسٹریکشن سیکٹر والوں کے ڈپازٹس میں تقریبا 15 فیصد، مینوفیکچرنگ سیکٹر کے ڈپازٹس میں 9.5 فیصد، اور کامرس اور ٹریڈ والوں کے ڈپازٹس میں 5 فیصد کمی دیکھی گئی۔
جولائی کے دوران کنسٹرکشن سیکٹر والوں کے ڈپازٹس میں سے 45 ارب روپے نکلوائے گئے اور ان کا حجم 260 ارب 69 کروڑ روپے رہ گیا۔

لاہور(ایمرا نیوز آن لائن)
مہنگائی کے ستائے بجلی صارفین کے لیے بری خبر، فیول ایڈجسٹمنٹ کی مد میں بجلی ایک روپیہ 92 پیسے مہنگی ہونے کا امکان ہے، سی پی پی اے نے بجلی کے نرخ بڑھانے کی درخواست نیپرا کو بھجوا دی۔

حکومت ایک مرتبہ پھر صارفین پر بجلی گرانے کو تیار، سی پی پی اے نے بجلی نرخ بڑھانے کیلئے درخواست نیپرا کو بھجوائی ہے، اضافہ جولائی میں فیول ایڈجسٹمنٹ کی مد میں مانگا گیا ہے، نیپرا 4 ستمبر کو سماعت کے بعد فیصلہ کرے گی کہ بجلی نرخ بڑھائے جائیں گے یا نہیں۔

بتایا گیا ہے کہ بجلی کے نرخوں میں ایک روپے 92 پیسے مہنگی ہونے کا امکان ہے، اضافے کا اطلاق کے الیکٹرک، لائف لائن اور زرعی صارفین پر نہیں ہوگا۔