Category بزنس

سرگودھا(ایمرا نیوز)صوبائی حکومت نے صوبہ بھر میں دلہا پر ٹیکس عائد کرنے کی تیاریاں کر لی ہیں۔ تفصیلات کے مطابق حکومت نے سرگودھا سمیت صوبہ بھر میں دلہوں پر بھی ٹیکس لگانے کی تیاریوں کو حتمی شکل دے دی ہے۔ اس حوالے سے محکمہ لوکل گورنمنٹ ذرائع نے کہا کہ نکاح کے موقع پر دس ہزار سے زائد حق مہر دینے والے دلہوں سے ٹیکس وصول کیا جائے گا۔
یہ ٹیکس نکاح خوان کی وساطت سے متعلقہ یونین کونسل وصول کرے گی۔
خیال رہے کہ اس سے قبل بھی حکومت نے شادی ہالز اور دلہا دلہن کے والدین پر ٹیکس عائد کیا تھا جس کے خلاف شہریوں نے عدالت سے بھی رجوع کیا تھا تاہم اب حکومت نے دلہوں پر ٹیکس عائد کرنے کی تیاریوں کو حتمی شکل دے دی ہے۔ جس کی حتمی منظوری کے بعد دس ہزار سے زائد حق مہر دینے والے دلہوں پر ٹیکس کی ادائیگی لازم ہو گی۔ اس خبر پر شہریوں نے ملے جُلے رد عمل کا اظہار کیا ہے۔ شہریوں کا کہنا ہے کہ دلہوں پر ٹیکس عائد کرنا کسی ظلم سے کم نہیں ہے۔ شادی اخراجات کی وجہ سے پہلے ہی دونوں خاندان پریشان ہوتے ہیں ایسے میں اب یہ نیا ٹیکس ناقابل قبول ہے۔

جدہ (ایمرا نیوز) سعودی عرب میں خواتین کو ڈرائیونگ کی اجازت ملنے کے بعد یہ خیال کیا جا رہا تھا کہ اس کے بعد سے لاکھوں غیر مُلکی ڈرائیورز کی چھُٹی ہو جائے گی یا پھر ان کی تعداد میں نمایاں کمی ہو جائے گی۔ تاہم سعودی وزارت محنت و سماجی بہبود کی جانب سے جاری کردہ اعداد و شمار سے یہ تمام قیاس آرائیاں اور خدشات دم توڑ گئے ہیں۔
حیرت انگیز طور پر غیر ممالک سے گھریلو ڈرائیورز کے لیے ویزوں کے اجراء میں اضافہ ہوا ہے۔ وزارت محنت کی جانب سے بتایا گیا ہے کہ 2019ء کی پہلی سہ ماہی کے دوران ہر ماہ اوسطاً 50ہزار ویزے گھریلو ڈرائیورز کے شعبے میں جاری کیے گئے۔ سب سے زیادہ ویزے بنگلہ دیش کے لیے جاری کیے گئے جہاں سے 64 ہزار گھریلو ڈرائیور اور ملازمین منگوائے گئے۔
اس کے بعد پاکستان کا نمبر آتا ہے جہاں کے ڈرائیورز اورگھریلو ورکرز کے لیے 51800 ویزے جاری ہوئے۔
بھارت کے لیے ان شعبوں میں اس سہ ماہی کے دوران 49000 ویزے حاصل کیے گئے۔ ان کے بعد سب سے زیادہ ویزوں کا اجراء فلپائن، مصر، یمن، سوڈان، ایتھوپیا، یوگنڈا اور کینیا کے لیے لیبر ویزے حاصل ہوئے۔ اس بار خواتین ڈرائیورز کے لیے بھی سینکڑوں ویزوں کا اجراء کیا جا چکا ہے۔ وزارت کے مطابقاور 2019کے دوران ویزوں کی تعداد کا تقابل کرتے ہوئے بتایا کہ 2019کی پہلی سہ ماہی کے دوران 1538870 ویزے ڈرائیوروں کے جاری ہوئے۔
459خواتین کیلئے بھی ڈرائیور کے ویزے حاصل کئے گئے۔ 2019کی پہلی سہ ماہی کے دوران گھریلو ملازمین کے نام پر 324348ویزے نکلوائے گئے۔2018کی پہلی سہ ماہی میں گھریلو ویزوں کی تعداد 932436تھی۔2018کی پہلی سہ ماہی کے دوران غیر ملکی ڈرائیورو ں کی تعداد 1363324رہی۔ کسی ڈرائیور خاتون کا ویزہ 2018 میں جاری نہیں ہوا۔ گھریلو ملازمین کیلئے ویزوں کی تعداد 236593 تھی جبکہ گھریلو ملازماؤں کے ویزوں کی تعداد 684622ریکارڈ کی گئی تھی۔

اسلام آباد (ایمرا نیوز آن لائن نیوز) مشیر خزانہ حفیظ شیخ نے اعتراف کیا ہےکہ ٹیکس آمدن شروع سے نیچے گررہی ہے اور اب بھی ویسی ہی حالت ہے۔

اسلام آباد میں ایس ای سی پی کے تحت منعقدہ سیمینار سے خطاب کرتے ہوئے مشیر خزانہ حفیظ شیخ نے کہا کہ پاکستان چاہتا ہے کہ کیپٹل مارکیٹ ترقی کرے، خطے کی ترقی کے لیے مواصلات اور رابطے بڑھانا ضروری ہے، ریگولیشن بہتر بنا کر کیپٹل مارکیٹ میں شفافیت بڑھائی جاسکتی ہے، کیپٹل مارکیٹ نجی شعبے کی مالیاتی ضروریات کے لیے اہم ہے۔

انہوں نے کہا کہ تحریک انصاف کی حکومت شفافیت پر یقین رکھتی ہے، موجودہ حکومت کوقرض کا بڑا بوجھ ورثے میں ملا، دنیا بھرکو یہ پیغام دے دیا ہے کہ پاکستان معاشی نظم وضبط قائم کرے گا، پاکستان معاشی تبدیلی کے ایجنڈے کی طرف گامزن ہے۔

مشیر خزانہ کا کہنا تھا کہ پاکستان نے اینٹی کرپشن ایجنڈا اپنایا ہوا، مالی خسارہ کم ہوا اور برآمدات بڑھی ہیں، آئی ایم ایف پروگرام میں جانے سے مثبت معیشت کا تاثر گیا، آئی ایم ایف کا پیسہ اہم نہیں، اس سے بیرونی دنیا میں مثبت معاشی پیغام گیا۔

دوسری جانب میڈیا سے غیر رسمی گفتگو میں حفیظ شیخ نے اعتراف کیا کہ ٹیکس آمدن شروع سے نیچے گررہی ہے،اب بھی ویسی ہی حالت ہے، معیشت کی بہتری کا سفر آسان نہیں ہے۔

کراچی (ایمرا نیوز) ایک ہی دن میں روپے کی بڑی چھلانگ، ڈالر کی قیمت میں مزید کمی ہوگئی، اوپن مارکیٹ میں ڈالر کی قیمت میں 40 پیسے تک کی کمی، قیمت 157 روپے 40 پیسے کی سطح پر آگئی، 2 ماہ کے دوران روپے کی قدر میں 4 فیصد سے زائد کا اضافہ ریکارڈ۔ تفصیلات کے مطابق امریکی کرنسی ڈالر کے مقابلے میں پاکستانی کرنسی روپے کی مسلسل پیش قدمی جاری ہے۔
بتایا گیا ہے کہ 2 ماہ کے دوران روپے کی قدر میں مسلسل بہتری آئی ہے۔ گزشتہ 2 ماہ کے دوران ڈالر کے مقابلے میں روپے کی قدر میں 4 فیصد تک اضافہ ہوا ہے۔ معاشی ماہرین کے مطابق حکومت نے آئی ایم ایف معاہدے کے تحت ڈالر کی قیمت کو کنٹرول کرنے کی پالیسی ترک کر دی تھی جس کے بعد خدشہ تھا کہ ڈالر 200 روپے کی سطح تک پہنچ سکتا ہے۔
تاہم حکومت کی موثر پالیسیوں کے باعث ڈالر کی قیمت میں اضافہ ہونے کی بجائے کمی ہوئی ہے، جو یقینی طور پر حیران کن ہے۔
اب بتایا گیا ہے کہ منگل کے روز بھی کرنسی مارکیٹ میں ڈالر کی قیمت میں مزید کمی ہوئی ہے۔ منگل کے روز اوپن مارکیٹ میں امریکی ڈالر مزید 40 پیسے سستا ہوگیا۔ انٹربینک میں ڈالر 10 پیسے کمی کے بعد 157 روپے 26 پیسے پر بند ہوا۔ انٹربینک کی دیکھا دیکھی اوپن مارکیٹ میں بھی امریکی کرنسی کی قیمت کم ہونے لگی۔ اوپن مارکیٹ میں ڈالر 40 پیسے کمی کے بعد 157 روپے 40 پیسے پر فروخت ہوا۔
کرنسی ڈیلرز کے مطابق سخت قوانین اور جاری کھاتوں کے خسارے میں کمی کے باعث ڈالر کے دام گھٹنا شروع ہو چکے ہیں۔ بتایا گیا ہے کہ حکومت کی جانب سے ڈالر کی نقل و حمل پر کڑی نگرانی اور جاری کھاتوں کے خسارے میں کمی کے اثرات نظر آنے لگے ہیں۔ ڈالر کی طلب کم ہوئی تو اس کے ریٹ بھی گرنے لگے۔ دوسری جانب سٹاک ایکسچینج میں 64 پوائنٹس کا اضافہ ریکارڈ کیا گیا۔ منگل کو کاروبار کے اختتام پر 100 انڈیکس 64 پوائنٹس کے اضافے سے 30 ہزار 584 پوائنٹس کی سطح پر بند ہوا۔

اسلام آباد (ایمرا نیوز)پاک بھارت کشیدہ تعلقات کے پیش نظر بھارت کے لیے پاکستان کی فضائی حدود ایک مرتبہ پھر سے بند کرنے کی تجویز زیر غور ہے۔ اگر اس تجویز کو منظور کر کے اس پر عملدرآمد شروع کر دیا گیا تو اس صورت میں بھارت کو فی پرواز 25 لاکھ کا اضافی بوجھ اُٹھانا پڑے گا۔ تفصیلات کے مطابق بھارت سے جانے والی روزانہ کی بنیاد پر امریکہ یورپ جانے والی 400 پروازیں پاکستان کی فضائی حدود استعمال کرتی ہیں۔
27 فروری 2019ء سے 16 جولائی 2019ء تک پہلے بھی پاک بھارت کشیدگی کے باعث قومی ائیرلائن سمیت چار غیر ملکی ائیر لائنز کو نقصان برداشت کرنا پڑا تھا۔ پاکستان ایوی ایشن جانب سے ایک مرتبہ پھر وزیر اعظم کی جانب سے جونہی احکامات موصول ہوں گے تو بھارت کی فضائی حدود ایک مرتبہ پھر بند ہونے سے قومی ایئر لائن کی بنکاک تھائی لینڈ اور ملائشیا کے لیے پروازیں بند کرنا پڑیں گی۔
نیوزی لینڈ، آسٹریلیا ،انڈونیشیا کے لیے بھی پروازیں منسوخ کرنا پڑیں گی۔ مسافروں کو بھارت سے بحریہ عرب سے ہوتے ہوئے پانچ گھنٹے کی اضافی پرواز مہنگی ٹکٹ خرید کر سفر کرنا ہو گا۔ بھارت کو براستہ دبئی یا ویت نام سے فیولینگ کروانی پڑے گی۔ بھارتی ائیر لائن کو اس وقت 76 کروڑ روپے مالی خسارے کا سامنا ہے۔ لیکن پاکستان کی فضائی حدود کی بندش سے فی پرواز 25 لاکھ روپے اضافی اخراجات کا بوجھ بڑھے گا۔
یہی نہیں بلکہ پاکستان آنے والی کولمبو سے ائیرلنکا ملائشیا سے کوالالمپور سے آنے والی ملنڈو ایئر تھائی ایئر کی بنکاک سے آنے والی پروازیں بھی متاثر ہوں گی۔ سول ایوی ایشن اتھارٹی پاکستان کو بھی سالانہ اربوں روپے کا نقصان فضائی حدود بند ہونے سے اُٹھا نا پڑے گا، اتحاد ایئر ایمرٹس گلف ایئر ہی براستہ دبئی پاکستان سے مشرقی ملکوں میں مسافروں کو لے جانے کے لیے منہ مانگے داموں ٹکٹیں فروخت کریں گے۔
پاکستان کو صرف چار سیکٹر بند کرنا پڑیں گے جبکہ بھارت کو اپنی فضائی حدود کے لیے فی جہاز تین پائلٹ ایکسٹرا اور پچیس لاکھ روپے فی کس پرواز کا نقصان برداشت کرنا پڑے گا۔یاد رہے کہ پلوامہ حملے کے بعد بھی پاکستان نے بھارت کے لیے اپنی فضائی حدود بند کر دی تھیں جس سے بھارت کو اربوں روپے کا نقصان بھی اُٹھانا پڑا تھا۔

اسلام آباد (ایمرا نیوز آن لائن) فیڈرل بورڈ آف ریونیو (ایف بی آر)نے ’فاسٹر‘ کے عنوان سے نیا ری فنڈ پے منٹ سسٹم متعارف کرایا ہے جس کا آغاز آج سے ہورہاہے۔اس سسٹم کے تحت کروڑوں روپے کے تسلیم شدہ فنڈز برآمد کنندگان کو جاری کئے جائیں گے جب کہ اس میں 5 برآمدی شعبے شامل ہیں۔

ٹیکسٹائل کا شعبہ جہاں زیرو ریٹنگ ریجیم بجٹ میں ختم کردی گئی تھی وہ بھی شامل کرلیا گیاہے۔ ریفنڈ کی مجموعی طلب کا حجم ایک ارب 20 کروڑ روپے ہے لیکن تسلیم شدہ ری فنڈ کا حجم کروڑوں روپے میں ہے جو ’فاسٹر‘ نظام کے ذریعے جاری ہوں گے۔5 برآمدی شعبوں میں زیرو ریٹنگ ریجیم ختم کئے جانے کی کامیابی کا دارومدار برآمد کنندگان کو فنڈز کے اجراء کی صلاحیت پر ہے۔

اسلام آباد (ایمرا نیوز) عالمی منڈی میں پٹرولیم مصنوعات کی قیمتوں میں کمی کے بعد آئندہ ماہ پاکستان میں پٹرول کی قیمتیں کم ہونے کا امکان ہے۔اسی حوالے سے میڈیا رپورٹس میں بتایا گیا ہے کہ خام تیل کی قیمت رواں سال کی کم ترین سطح پر آگئی،گذشتہ 4 ماہ کے دوران خام تیل کی قیمتوں میں 16 ڈالر فی بیرل کی کمی ہوئی۔عالمی مارکیٹ کے مطابق 19 روپے 32 پیسے فی لٹر کمی ہونی چاہئیے۔
عالمی مارکیٹ کی کمی اور مقامی ٹیکسز شامل کر کے پٹرول کی قیمت 98روپے 68پیسے بنتی ہے۔میڈیا رپورٹس میں مزید بتایا گیا ہے کہ اوگرا نے اب تک جو وورکنگ کی ہے اس کے مطابق پٹرولیم مصنوعات کی قیمتوں میں 8روپے فی لیٹرکمی کا امکان ظاہر کیا جا رہا ہے۔کہا جا رہا ہے کہ پٹرول کی قیمت میں 6روپے جب کہ ڈیزل کی قیمت میں 8روپے فی لیٹر تک کمی کی جا سکتی ہے۔
اس سلسلے میں 28 اگست کو سمری بھجوائی جائے گی۔جس کے بعد وزارت خزانہ وزیراعظم کی ہدایت پر نئی قیمتوں کا اعلان کرے گا۔اگرچہ پٹرولیم مصنوعات کی قیمتوں میں 19روپے کی کمی ہونی چاہئیے تاہم حکومت عوام کو صرف 8روپے کا ہی ریلیف دے گی۔واضح رہے مشیر خزانہ حفیظ شیخ نے پاکستانی عوام کو خوشخبری سنائی تھی ۔ مشیر خزانہ کی جانب سے اعلان کیا گیا تھا کہ یکم ستمبر سے پاکستان میں پیٹرولیم مصنوعات کی قیمتوں کی مد میں کمی کیے جانے کا امکان ہے۔
مشیر خزانہ حفیظ شیخ کا کہنا ہے کہ عالمی مارکیٹ میں خام تیل کی قیمتوں میں کمی کا رجحان دیکھا جا رہا ہے۔ حکومت کی کوشش ہے کہ عالمی مارکیٹ میں خام تیل کی قیمتوں میں جو کمی ہو رہی ہے کا اس کا فائدہ عوام کو پہنچایا جائے۔ اسی لیے اگلے ماہ پیٹرولیم مصنوعات کی قیمتوں میں کمی کی جا سکتی ہے۔ مشیر خزانہ کہتے ہیں کہ ہم نے 262 ارب روپے سبسڈی کی مد میں رکھے ہیں۔

لاھور(ایمرا نیوز)تحریک انصاف کی رکن قومی اسمبلی و پارلیمانی سیکریٹری برائے وزارت منصوبہ بندی وترقی کنول شوزب نےکہا ہےکہ پاک چین فری ٹریڈ معاہدے سے 313 مصنوعات کی برآمد سے سالانہ 9 ارب ڈالر کا زرمبادلہ حاصل ہو گا۔
حکومت نے پی ایس ڈی پی کے تحت ترقیاتی منصوبوں کے لیے رواں سال 701 ارب اور یوتھ پروگرام کے لیے 10 ارب، زرعی شعبہ کو بہتر بنانےکے لیے 12 ارب اور فاٹا میں ترقیاتی کاموں کے لیے 72 ارب روپے مختص کئے ہیں۔
کنول شوزب کا کہنا ہے کہ موجودہ حکومت رواں برس کرنٹ اکاؤنٹ خسارے میں 7 ارب ڈالر کمی لائی ہے۔
انہوں نے کہا کہ کشمیر کا معاملہ بین الاقوامی سطح پر جس طرح وزیراعظم عمران خان کی قیادت میں اٹھایا اس کے ثمرات کافی بہترن نظر آ رہے ہیں۔

اسلام آباد (ایمرا نیوز آن لائن) چیئرمین ایف بی آر شبر زیدی نے کہاہے کہ رواں ماہ میں ایف بی آر ٹیکس اکٹھا کرنے کے لیے اپنا مقررکردہ ہدف حاصل نہیں کر پائے گا،پروگرام میں گفتگو کرتے ہوئے شبر زیدی نے کہا کہ جولائی میں 292 ارب روپے کا ہدف تھا جبکہ ہم نے 282 ارب روپے اکٹھے کیے۔انہوں نے پروگرام کے میزبان عامر ضیاءگفتگو میں بتایا کہ اگست میں عید الاضحی اور اس کے ساتھ دیگر چھٹیوں کے باعث مقررہ ہدف حاصل نہیں ہوسکے گا۔

لاہور (ایمرا نیوز آن لائن نیوز) سونے کی قیمت میں کاروباری آخری روز بھی بڑا اضافہ دیکھا گیا جس کے بعد تولہ سونے کی قیمت 88550 روپے ہو گئی ہے۔

لاہور نیوز کے مطابق ملکی صرافہ مارکیٹوں میں سونے کی قیمت میں ایک مرتبہ پھر اضافہ دیکھے گیا جس کے بعد سونے کی قیمت میں مسلسل تیزی دیکھنے میں آ رہی ہے، آج بھی فی تولہ سونے کی قیمت 1450 روپے ہو گئی ہے۔

دوسری طرف صرافہ مارکیٹوں میں دس گرام سونے کی قیمت میں بھی بڑھوتری دیکھی گئی جس کے بعد سونے کی نئی قیمت 75917 روپے ہو گئی ہے۔