Category بزنس

کراچی:(ایمرا نیوزآن لائن) ہرسال کی طرح امسال بھی رمضان کے آغاز پرروزے داروں کو گراں فروشی کے طوفان کا سامنا ہے۔حسب روایت شہری انتظامیہ اورسندھ حکومت کی جانب سے مہنگائی کی روک تھام کیلیے بیانات توبہت دیے تاہم اس سلسلے میں کوئی عملی اقدامات نہیں کیے گئے ہیں جس کاخمیازہ عوام کومہنگائی کے صورت میں بھگتنا پڑرہا ہے، ناجائز منافع خوروں نے یکم رمضان سے ہی پھلوں کی قیمتوں میں ہوشربا اضافہ کردیا۔

شہری سندھ حکومت کے اعلان کردہ سستے پھلوں کے اسٹال ڈھونڈتے رہے جو سرے سے لگائے ہی نہیں گئے، شہری انتظامیہ عام بازاروں میں تو درکنار سبزی منڈی کی سطح پر بھی سرکاری قیمت کا اطلاق نہ کرسکی،پھلوں کے سرکاری نرخ نامے غیرموثرہوگئے،پھل فروش من مانی قیمتوں پر پھل فروخت کررہے ہیں۔

کراچی میں گزشتہ ماہ 50 روپے کلو فروخت ہونے والے خربوزے کی قیمت 120 روپے کلو تک پہنچ گئی، گرما بھی150روپے کلو فروخت کیا گیا،کیلوں نے بھی سینچری عبورکرلی،درجہ اول کیلا 150 روپے درجن جبکہ درجہ دوم 120 روپے درجن فروخت کیا گیا، آڑو کی شروعات ہی 200 روپے کلو سے کی گئی درجہ اول آڑو 250 روپے کلو فروخت کیا گیا درجہ اول چیکو 150 روپے درجہ دوم 120 روپے کلو فروخت ہوا ،فالسہ 80 روپے پاؤ فروخت کیا گیا، 150 سے 200روپے کلو فروخت کیا گیا، درآمدی سیب 250 سے 300 روپے کلو جبکہ مقامی سیب 150 سے 200 روپے کلو فروخت کیاگیا ،پپیتہ کی بھی قسمت جاگ اٹھی 60 سے70روپے کلو بکنے والا پپیتا اب 100سے کم دستیاب نہیں،500 گرام ایرانی کھجور کا پیکٹ جو 120 سے 150روپے میں فروخت ہورہا تھا پہلے روزے پر200 روپے تک فروخت کیا گیا ،کھلی ہوئی پاکستانی کھجور 200 سے 250 روپے کلو جبکہ ایرانی کھجور 300 سے350 روپے کلو تک فروخت ہوئی، کراچی سبزی اینڈ فروٹ منڈی میں بھی پھلوں کی قیمت آسمان سے باتیں کرنے لگی ہیں۔سبزی منڈی کے وائس چیئرمین آصف احمد کے مطابق رمضان میں پھلوں کی طلب 10 گنا بڑھ جاتی ہے اس لیے طلب و رسد کے مطابق قیمت کا تعین پھلوں کی نیلامی کے ذریعے کیا جارہا ہے جس کی نگرانی کمشنر کراچی،حکومت کا محکمہ بیورو آفس سپلائی اینڈ پرائسز اور مارکیٹ کمیٹی کرتی ہے،منڈی میں یکم رمضان کو کیلا درجہ اول 120 روپے درجن،فالسہ 300 روپے کلو،خربوزہ درجہ اول 120 روپے کلو مقامی کلو سیب 150 روپے کلو، ایرانی گولڈن سیب 250 روپے کلو،تربوز 50،چیکو 120 روپے پپیتہ 90 اور اڑو 200 روپے کلو قیمت پر فروخت کیے گئے۔

کمشنر کراچی کی جاری کردہ پرائس لسٹ میں کیلے درجہ اول کی قیمت 85 درجہ دوم کی قینت 67 روپے درجن مقرر کی گئی، درجہ اول پپیتہ 75 اور درجہ دوم کی قیمت 63 روپے مقرر کی گئی،سرکاری نرخ نامہ کے مطابق سیب درجہ اول 137 جبکہ درجہ دوم کی قیمت 105 روپے مقرر ہے۔سرکاری لسٹ کے مطابق خربوزہ درجہ اول 70 روپے فی کلع سے زائد قیمت پر فروخت نہیں کیے جاسکتے درجہ دوم خربوزہ کی قیمت 58 روپے مقرر ہے،درجہ اول چیکو 105 درجہ دوم 85روپے مقرر ہے، اڑو 166اور درجہ دوم 117 روپے مقرر ہے تربوز کی خوردہ سرکاری قیمت 42 روپے کلو مقرر کی گئی سرکاری لسٹ کے مطابق گرما 58 روپے کلو سے زاید قیمت پر فروخت نہیں کیا جاسکتا۔

اسلام آباد: (ایمرا نیوزآن لائن) اثاثے ظاہر کرنے کی سکیم لانے میں حائل بڑی رکاوٹ دور ہوگئی، پاکستان نے ایمنسٹی سکیم پر آئی ایم ایف مشن کو راضی کرلیا۔ذرائع کے مطابق اثاثے ظاہر کرنے کی سکیم اسی ماہ متعارف کرائے جانے کا امکان ہے، اثاثے ظاہر کرنے کی سکیم سے ٹیکس آمدن میں اضافہ ہوسکتا ہے، حکومت کا موقف ہے کہ سکیم سے 170 ارب روپے کا ٹیکس مل سکتا ہے۔

وزارت خزانہ ذرائع کے مطابق سکیم سے 2500 ارب روپے کے اثاثے قانونی بن سکتے ہیں، اثاثے ظاہر کرنے کی سکیم آسان اور سہل ہوگی، اثاثے ظاہر کرنے کی سکیم آئی ایم ایف پروگرام سے پہلےجاری ہوگی، آئی ایم ایف سے قرض پروگرام لینے کے بعد سکیم کا اجرا نہیں ہوسکتا۔

کراچی(وقت آن لائن) ملک میں بڑھتی مہنگائی کے باعث صارفین کو مہنگائی سے بھرپور رمضان دیکھنے کو ملا ہے، جہاں تقریباً تمام ضروریات زندگی گوشت، گھی، کھانے پکانے کا تیل، آٹا، پیاز، چکن اور پھلوں کی قیمتیں میں ہوشربا اضافہ دیکھنے میں آیا۔میڈیا رپورٹ کے مطابق گوشت فروشوں نے فی کلو قیمت میں 20 سے 50 روپے تک اضافہ کردیا، جو علاقوں کے حساب سے مختلف ہے، بچھیا کا گوشت جو پہلے 500 روپے فی کلو فروخت کیا جارہا تھا اس کی قیمت اب 520 سے 540 روپے لی جارہی ہے جبکہ بغیر ہڈی کا گوشت 600 روپے فی کلو کے بجائے 620 سے 640 روپے کلو فروخت کیا جارہا ہے۔اس کے علاوہ مٹن فروخت کرنے والوں نے بھی قیمتوں کو ہول سیل قیمتوں میں اضافے سے منسوب کرتے ہوئے 950 روپے کلو سے ایک ہزار روپے کلو کردیا۔واضح رہے کہ ماہ مقدس کے آغاز سے کچھ روز قبل ہی مٹن فروخت کرنے والوں نے قیمتوں میں اضافہ کیا تھا جبکہ میونسپل انتظامیہ اس تمام صورتحال کو ایک جانب کھڑے ہو کر دیکھ رہی ہے اور صارفین کو ریلیٹرز کے رحم و کرم پر چھوڑ دیا گیا ہے۔

لاہور: (ایمرا نیوزآن لائن) لاہور میں لگائے گئے سستے رمضان بازار مذاق بن کر رہ گئے، روزہ دار مرد و خواتین اشیا ضروریہ کے حصول میں پریشان نظر آئے، سستی اشیا کی فراہمی میں مزید کمی کر دی گئی۔سستے رمضان بازاروں میں سستی اشیا کا ملنا محال ہو گیا۔ فراوانی کے بجائے روز مرہ کی اشیا کی فراہمی مزید کم کر دی گئی۔ چینی 2 کی بجائے ایک کلو فراہم کی جانے لگی۔ پیاز کی مقدار بھی 2 سے کم کر کے ایک کلو کر دی گئی، ٹماٹر بدستور ایک کلو فی کس مل رہے ہیں۔

149 روپے فی کلو کے حساب سے ایک خریدار آدھا کلو لیموں لے سکتا ہے جبکہ سستے بازار میں آلو 12، پیاز 23، ٹماٹر 21 روپے اور چینی 55 روپے فی کلو فروخت کی جا رہی ہے۔شہریوں کا کہنا ہے کہ جس مہینے میں اللہ اپنی ہر نعمت کو بے حد و حساب کر دیتا ہے، اس مقدس ماہ میں اگر حکومت کو راشن بندی ہی کرنا تھی تو پھر ان بازاروں کا ناٹک رچانے کی کیا ضرورت تھی۔

اسلام آباد:(ایمرا نیوزآن لائن) وزیراعظم کے مشیر برائے خزانہ ڈاکٹر عبدالحفیظ شیخ کی زیر صدارت پیر کے روز فنانشنل ایکشن ٹاسک فورس (ایف اے ٹی ایف) ایکشن پلان پر پیش رفت کا جائزہ لینے کیلیے منعقدہ اجلاس میں فنانشل مانیٹرنگ یونٹ (ایف ایم یو) کی جانب سے وزارت خزانہ کی منظوری کے بغیرہی فنانشل ایکشن ٹاسک فورس کو نامکمل اور غیر تسلی بخش جواب پر مبنی رپورٹ بھجوانے کا انکشاف ہوا ہے۔اجلاس میں ایف اے ٹی ایف کو غیر تسلی بخش جوابات بھجوانے کی ذمے داری نیکٹا،ایف ایم یو اور ایف آئی اے ایک دوسرے پر ڈالتے رہے۔مشیر خزانہ نے اداروں کی اس بلیم گیم پر شدید ناراضگی کا اظہار کرتے ہوئے واضح کیا کہ اس اہم اور حساس نوعیت کے معاملہ پر آئندہ کسی قسم کی کوتاہی برداشت نہیں کی جائے گی۔

مشیر خزانہ ڈاکٹر عبدالحفیظ شیخ نے تمام اسٹیک ہولڈرز کو ہدایت کی کہ وہ ایف اے ٹی ایف ایکشن پلان کے اہداف کے حصول کیلیے مسلسل کام کو یقینی بنائیں اور اسے اعلیٰ ترین ترجیحات میں رکھا جائے تاکہ ہدف سے بڑھ کر کام کو یقینی بنایا جا سکے۔ سیکریٹری خزانہ نے تمام اہم اسٹیک ہولڈرز کو اجلاس کی سنجیدہ نوعیت، سنجیدہ چیلنجوں اور اعلیٰ ترجیحات کے بارے میں تفصیلات سے آگاہ کیا۔سیکریٹری خزانہ یونس ڈھاگا نے اجلاس کو ایف اے ٹی ایف سفارشات پر بریفنگ دی۔ان کا کہنا تھا کہ ایف اے ٹی ایف سفارشات پر عمل درآمد انتہائی ضروری ہے۔ مشیر خزانہ نے ڈی جی فنانشل مانیٹرنگ یونٹ منصور صدیقی جب ایف اے ٹی ایف کو نامکمل رپورٹ بھجوانے کے بارے میں وضاحت طلب کی تو انھوں نے بتایا کہ انھوں نے متعلقہ اداروں کے ذمے داران کے ساتھ وٹس ایپ اور ای میل کے ذریعے خط و کتابت کرنے کے بعد یہ رپورٹ بھجوائی ہے۔

اجلاس میں یہ بات سامنے آئی کہ جو رپورٹ بھجوائی گئی ہے اس کا وزارت خزانہ میں نہ تو فائل ورک ہوا اور نہ ہی اس رپورٹ کی کوئی منظوری لی گئی۔ذرائع کا کہنا ہے کہ اس رپورٹ میں ایف اے ٹی ایف ایکش پلان کے نکات پر عملدرآمد کے بارے میں غیر تسلی بخش جواب دیے گئے ہیں اور زیادہ تر نکاتکے جوابات میں مستقبل کا صیغہ استعمال کیا گیا ہے ۔ مشیر خزانہ نے اس پر شدید ناراضگی کا اظہار کیا۔اجلاس میں فیصلہ کیا گیا کہ وفاق و صوبوں کے درمیان رابطوں کو بڑھانے اور منی لانڈرنگ و ٹیررازم فنانسنگ سے نمٹنے کی صلاحیتیں بڑھائی جائیں گی۔

ذرائع کا کہنا ہے کہ پاکستان کی جانب سے مولانا مسعود اظہر کے حوالے سے جو حال ہی میں اہم فیصلے کیے ہیں اور اسی طرح کالعدم تنظیموں پر پابندی اور ان کے اثاثہ جات و بینک اکاونٹس منجمد کرنے اور مدارس پر سرکاری کنٹرول کے حوالے سے جو اقدامات اٹھائے ہیں اس سے عالمی سطح پر اور ایف اے ٹی ایف میں پاکستان کی صورتحال بہتر ہوئی ہے اور امریکا نے بھی اس پر اطمینان کا اظہار کیا ہے اور سب سے بڑھ کر یہ کہ پاکستان کے سب سے مخالف ممبر بھارت کی جانب سے بھی دباؤ کم ہوا ہے اس لیے توقع کی جارہی ہے کہ 16 مئی سے ایف اے ٹی ایف کے ساتھ شروع ہونے والے فیس ٹو فیس مذاکرات میں پاکستان کا نام بلیک لسٹ میں شامل نہیں کیا جائیگا تاہم پاکستان کا نام گرے لسٹ میں برقرار رہنے کا امکان ہے۔

لاہور(ایمرا نیوزآن لائن) آج ملک بھر میں زکوٰۃ کی کٹوتی کے لیے تمام بینک اور مالیاتی ادارے بند ہیں ، تاہم بینک ملازمین کی چھٹی نہیں ہے۔اسٹیٹ بینک کی جانب سے جاری کیے گئے اعلامیے کے مطابق یکم رمضان کو بینک کھاتوں سے زکوٰۃ کی کٹوتی ہو گی، جس کی وجہ سے تمام مالیاتی ادارے اور بینک آج یکم رمضان کو بند رہیں گے۔واضح رہے کہ وزارت مذہبی امورکی جانب سے رواں سال کے لیے زکوٰۃ کا نصاب 44 ہزار 415 روپے مقرر کیا گیا ہے۔

زکوٰۃ کے نصاب کے حوالے سے اسٹیٹ بینک نے وزارت مذہبی امور سے مشاورت کی اور زکوٰۃ کا نصاب ساڑھے 52 تولے چاندی کی قیمت کی بنیاد پر کیا گیا ہے۔واضح رہے کہ بینکوں میں سیونگ اکاؤنٹس میں 44 ہزار 415 روپے یا اس سے زائد رقم موجود ہونے پر ازخود ڈھائی فیصد زکوٰۃ آج منہا کر لی جائے گی جبکہ کرنٹ اکاؤنٹ اور غیر ملکی کرنسی اکاؤنٹس پر زکوٰۃ نہیں کٹے گی۔

اسلام آباد (اپنے رپورٹرسے ) وفاقی حکومت نے ٹیکس امور کے ماہر شبر زیدی کو فیڈرل بورڈ آف ریونیو (ایف بی آر) کا چیئرمین تعینات کردیا۔

اسلام آباد میں سینئر صحافیوں سے گفتگو کے دوران وزیراعظم عمران خان نے شبر زیدی کو چیئرمین ایف بی آر تعینات کیے جانے کی تصدیق کی۔

شبر زیدی ٹیکسیشن کے ماہر اور چارٹرڈ اکاؤنٹنٹ ہیں اور وہ 2013 کے انتخابات سے قبل بننے والی سندھ کی عبوری حکومت میں وزیر بھی رہے ہیں۔

سید شبر زیدی کئی کتابوں کے مصنف بھی ہیں جن میں پانامہ لیکس – بلیسنگ ان ڈسگائس- آشور ایسٹس آف پاکستانی سٹیزنز اور پاکستان ناٹ اے فیلڈ اسٹیٹ شامل ہیں۔

واضح رہے کہ وزیراعظم عمران خان نے گزشتہ روز اپنی معاشی ٹیم میں مزید تبدیلی کرتے ہوئے اسٹیٹ بینک کے گورنر طارق باجوہ سے استعفیٰ لیا تھا جب کہ چیئرمین ایف بی آر جہانزیب خان کو بھی عہدے سے ہٹایا گیا۔

حکومت نے مصر میں آئی ایم ایف کے عہدیدار رضا باقر کو آئندہ تین سال کے لیے اسٹیٹ بینک کا گورنر مقرر کیا ہے۔

کراچی: (ایمرا نیوزآن لائن) بینک کھاتوں سے زکوة کٹوتی کل ہو گی، سٹیٹ بینک کے مطابق تمام بینک عوام کے لئے بند رہیں گے۔وزارت مذہبی امور کی جانب سے زکوة نصاب کے اعلان کے بعد اب سٹیٹ بینک نے بھی اعلامیہ جاری کر دیا ہے جس کے مطابق کل تمام بینک کھاتوں سے زکوة کٹوتی ہو گی یہی وجہ ہے کہ بینک کل 7 مئی کو عوام کے لئے بند رہیں گے۔

رواں برس زکوة کا نصاب 44 ہزار 415 روپے مقرر کیا گیا ہے جو گذشتہ سال کے مقابلے میں 13 فیصد یعنی 5 ہزار 217 روپے زائد ہے، بینکوں میں سیونگ اکاونٹس سے رقم پر زکوة کٹوتی کی جائے گی جبکہ کرنٹ اور پینشن اکاؤنٹس زکوة کٹوتی سے مستثیٰ ہوں گے۔ بینکوں میں کھاتوں سے زکوة کٹوتی یکم رمضان المبارک کو ہو گی۔واضح رہے کہ گذشتہ سال زکوة کا نصاب 39 ہزار 198 روپے طے گیا گیا تھا جس کی بدولت 3 ارب 67 کروڑ روپے کی زکوة وصول ہوئی تھی۔

کراچی(ایمرا نیوزآن لائن) اسٹیل ملز ملازمین کی جانب سے نجکاری کے خلاف احتجاج کیا گیا، مظاہرین نے نیشنل ہائی وے بند کر دی، نیشنل ہائی وے پر صبح سے جاری احتجاج کچھ دیر قبل ختم کر دیا گیا۔اسٹیل مل ملازمین نے مل کی نجکاری کے خلاف احتجاج کیا اور نیشنل ہائی وے پر دھرنا دیا۔

دھرنے کے بعد مظاہرین نیشنل ہائی وے سے اسٹیل مل کے جناح گیٹ کی طرف روانہ ہو گئے۔نیشنل ہائی وے پر احتجاج ختم ہونے کے بعد کراچی تا ٹھٹھہ شاہراہ پر ٹریفک کی آمدورفت بحال ہو گئی۔احتجاج کے دوران اسٹیل مل کے ملازمین اور سی بی اے یونین کی جانب سے نجکاری اور حکومت کے خلاف زبردست نعرے بازی کی گئی۔

اسلام آباد(وقت آن لائن)بلاول بھٹو زرداری کے ترجمان مصطفیٰ نواز کھوکھر نے کہا ہے کہ قرض سے خودکشی کو ترجیح دینے کی بات کرنے والوں نے ملک آئی ایم ایف کے پاس گروی رکھ دیا۔گورنر سٹیٹ بینک اور چیئرمین ایف بی آر کی تبدیلی سے متعلق اپنے بیان میں بلاول بھٹو زرداری کےترجمان مصطفیٰ نواز کھوکھر نے کہا کہ وزیر خزانہ کے بعد گورنرسٹیٹ بینک اور چیئرمن ایف بی آر کو بدلنا حکومتی پالیسی کی ناکامی کا اعتراف ہے، مسئلہ معاشی ٹیم نہیں عمران خان کی غیرحقیقی پالیسیاں ہیں، عمران خان نےاپنی ناکامی کے بعد معیشت آئی ایم ایف کے حوالے کردی، عمران خان کے ہوتے ہوئے معیشت ٹھیک نہیں ہو سکتی۔سینیٹر مصطفیٰ نواز کھوکھر نے کہا کہ گورنرسٹیٹ بینک کے تقرر کے معاملے میں حکومت نے غیر ذمہ دارانہ فیصلہ کیا ہے، قرض سے خودکشی کو ترجیح دینے کی بات کرنے والوں نے ملک آئی ایم ایف کے پاس گروی رکھ دیا، ڈاکٹر باقر رضا کو مقرر کرکے حکومت نے معیشت پر براہ راست آئی ایم ایف کو بٹھا دیا ہے، کیا پاکستان میں معاشی ماہرکم تھے کہ سٹیٹ بینک کا گورنر بھی آئی ایم ایف سے لیا گیا ہے، اب قرض کے لیے آئی ایم ایف سے حکومت پاکستان کی طرف سے بھی آئی ایم ایف ہی مذاکرات کرے گا۔