Category بزنس

ملکی کرنسی روپیہ بدترین گراوٹ کا شکار، امریکی ڈالر تاریخ کی بلند ترین سطح پر پہنچ گیا۔
اوپن مارکیٹ میں امریکی ڈالر 1روپیہ بڑھ گیا اور قیمت 179روپے کی سطح پر پہنچ گئی ہے۔ سٹیٹ بینک آف پاکستان اعداد و شمار کے مطابق رواں ہفتے کے آخری کاروباری روز کے دوران انٹر بینک میں روپے کے مقابلے میں امریکی ڈالر مزید 35 پیسے مہنگا ہو گیا اور قیمت 176 روپے 42 پیسے سے بڑھ کر 176 روپے 77 پیسے ہو گئی ہے۔

زمین ڈاٹ کام کی جانب سے پیش کردہ 40 منصوبوں پر پُرکشش ڈیلز دی گئیں، عاطف رانا، ہیڈ آف یو اے ای ریجن، زمین ڈاٹ کام

پاکستان کے سب سے بڑے رئیل اسٹیٹ ادارے زمین ڈاٹ کام کی جانب سے پاکستان ایسوسی ایشن دبئی میں  تیسرے  پاکستان پراپرٹی ایونٹ کا انعقاد کیا گیا، جس میں متحدہ عرب امارات میں بسے پاکستانیوں اور  سرمایہ کاروں نے بھرپور شرکت کی۔پاکستان پراپرٹی ایونٹ میں زمین ڈاٹ کام متحدہ عرب امارات کے ہیڈ عاطف رانا،ایسوسی ایٹ ڈائریکٹرز پراجیکٹ سیلز فیضان خان، فیصل قریشی، فروغ خان ، توقیر الحسن، سینئر مینجر مارکیٹنگ رضوان کاظمی اور مینجر انڈسٹریل مارکیٹنگ یاسر نیازی سمیت زمین ڈاٹ کام کی سینئر مینجمنٹ بھی شریک ہوئی۔   ایونٹ میں  لاہور، کراچی، اسلام آباد، پشاور، فیصل آباد، ملتان اور رحیم یار خان سمیت ملک بھر کے 40خصوصی  تعمیراتی منصوبوں سمیت زمین ڈاٹ کام کے مجموعی طور پر 125 سے زائد منصوبوں کے حوالے سے سرمایہ کاروں کو معلومات فراہم کی گئیں۔پاکستان پراپرٹی ایونٹ میں پیش کردہ تمام منصوبوں کی مارکیٹنگ اور سیلز کے حقوق صرف زمین ڈاٹ کام کو حاصل ہیں۔

اس موقع پر میڈیا سے گفتگو کرتے ہوئے زمین ڈاٹ کام کے متحدہ عرب امارات ریجن کے ہیڈ عاطف رانا نے کہا کہ دبئی میں پاکستان پراپرٹی ایونٹ کروانے کا مقصد پاکستانیوں اور غیر ملکی سرمایہ کاروں کو پاکستان کے سب سے بہترین، کامیاب اور قابل اعتماد منصوبوں کے حوالے سے ہر ممکن رہنمائی اور معلومات فراہم کرنا ہے۔ اس ایونٹ کے ذریعے دبئی جیسے عالمی تجارتی مرکز میں پاکستان کی پراپرٹی مارکیٹ کو بہتر انداز میں دنیا کے سامنے لانے کی کوشش کی ہے۔

زمین ڈاٹ کام کے ایسوسی ایٹ ڈائریکٹر پراجیکٹ سیلز فیصل قریشی کا کہنا تھا کہ پاکستان کی پراپرٹی مارکیٹ اپنی شاندار سہولیات اور عالمی معیار کے منصوبوں کی بدولت ترقی کی منازل طے کر رہی ہے۔ جبکہ  ایسوسی ایٹ ڈائریکٹر پراجیکٹ سیلز فیضان خان کا کہنا تھا کہ زمین ڈاٹ کام نے ہمیشہ ملک کے سب سے قابل اعتماد تعمیراتی منصوبوں کو متحدہ عرب امارات سمیت دنیا بھر میں بسے پاکستانیوں اور سرمایہ کاروں تک پہنچانے کی کوشش کرکے پاکستان میں رئیل اسٹیٹ شعبے کےلئے ایک قابل تقلید مثال قائم کی ہے۔

پاکستان پراپرٹی ایونٹ کے دوران زمین ڈاٹ کام کی باخبر سیلز ٹیم نے تازہ ترین اعداد و شمار اور تحقیق پر مبنی تفصیلات کے ذریعے پاکستان میں سرمایہ کاری کے قابل منافع مواقعوں کے حوالے سے رہنمائی بھی فراہم کی۔

شیری رحمان نے کہا ہے کہ حکومت 600ارب روپے کا منی بجٹ بم گرانے جا رہی ہے، پاکستان آئی ایم ایف کی ڈکٹیشن پر کیوں چل رہا ہے؟۔
پاکستان پیپلزپارٹی کی رہنما و سینیٹر شیری رحمان نے ٹویٹ کرتے ہوئے کہا کہ ایڈجسٹمنٹ، اخراجات میں کٹوتیوں اور ٹیکس چھوٹ میں کمی کی وجہ سے بے روزگاری اور افراط زر میں اضافہ ہوگا، عوام کو آگے مزید مشکلات کا سامنا کرنا پڑے گا، کیا یہ وہ تبدلی ہے جس کا تباہی سرکار نے وعدہ کیا تھا؟۔
شیری رحمان کا کہنا تھا کہ یہ ملک کو مدینہ کی ریاست نہیں، آئی ایم ایف کی کالونی بنا رہے ہیں، پہلے کہتے تھے آئی ایم ایف نہیں جائیں گے، پی ٹی آئی حکومت یو ٹرن لے کر آئی ایم ایف چلی گئی، پھر کہتے تھے منی بجٹ نہیں ہوگا، اب منی بجٹ بم گرا رہے ہیں، جس سے مہنگائی کی سونامی آئے گی۔

حکومت نے آئی ایم ایف کی شرائط کےمطابق منی بجٹ تیار کر لیا، منی بجٹ کا مسودہ وزارت قانون کوبھجوا دیا گیا ہے، 360ارب روپے کے ٹیکسز لگائے جائیں گے۔
منی بجٹ میں امپورٹڈ لگژری آئٹمز پر کسٹم ڈیوٹی بڑھائی جائے گی، امپورٹڈ میک اپ کا سامان، امپورٹڈ کپڑے، جوتے اور پرفیومز سمیت کئی اشیاء مہنگی کرنے کی تجویز ہے۔ مقامی طور پر تیار ہونے والی اشیاء پر بھی سیلز ٹیکس 12سے بڑھا کر 17فی صد کیا جائے گا۔ وزارت قانون ابتدائی مسودہ کو آرڈیننس کی شکل دے گی اور پھر وفاقی کابینہ سے منظوری کے بعد پارلیمنٹ میں پیش کیا جائے گا۔

پاکستان انڈسٹریل اینڈ ٹریڈرز ایسوسی ایشنز فرنٹ (پیاف) کے سیئنر وائس چیئرمین ناصر حمید خان اور وائس چیئرمین جاوید اقبال صدیقی نے کہا ہے کہ سٹیٹ بینک کی جانب سے شرح سود میں 1.50فیصداضافہ سے معیشت مزید سست روی کا شکار ہو جائے گی جو پہلے ہی مہنگائی کا شکار ہے۔
اپنے ایک بیان میں ناصرحمید خان اور جاوید اقبال صدیقی کا کہنا تھا ہماری زیادہ تر ملکی برآمدات کریڈٹ بیسڈ ہیں، انٹرسٹ ریٹ بڑھنے سے ان پٹ کاسٹ بڑھ جائے گی اور عالمی منڈی میں مقابلہ کرنا مشکل ہو جائے گا۔ جس سے برآمدات کو بڑھانے میں مشکلات آئیں گی اور تجارتی خسارہ مزید بڑھے گا۔ حکومت مہنگائی سے نمٹنے کے لئے شرح سود بڑھانے کی بجائے ڈالر کی بڑھتی ہوئی قیمت کو کنٹرول کرے، غیر پیداواری اخراجات کو ختم کرے اور غیر ضروری درآمدات پر فی الفور پابندی لگائے۔ شرح سود میں 150 بیسس پوائنٹ کا اضافہ کاروبار کرنے کی لاگت کو بڑھا دے گا جو کہ پہلے ہی بہت زیادہ ہے جبکہ نجی شعبہ کو قرضوں کے حصول میں مشکلات کا سامنا ہے۔ بزنس کمیونٹی پہلے ہی بڑھتی ہوئی کاروباری لاگت، افراط زر اور روپے کی قدر میں کمی سے پریشان ہے اور اب شرح سود میں اضافہ سے انکے مسائل میں مزید اضافہ ہو گا۔

پاکستانی نژاد امریکی بزنس مین اور ڈپٹی نیشنل فنانس چئیر ڈیموکریٹ پارٹی امریکہ طاہر جاوید نے کہا ہے کہ امریکی صدر جو بائیڈن دور حکومت میں پاکستان اور امریکہ کے درمیان تعلقات میں بہتری ارہی ہےاور مستقبل میں پاک امریکہ تعلقات مزید مستحکم ہوں گے۔
طاہر جاوید کا ایک انٹرویو میں کہنا تھا کہ اوورسیز پاکستانیوں کو جو ووٹ دینے کا فیصلہ کیا گیا ہے اس کے دور رس نتائج نکلیں گے اور اوورسیز پاکستانی ائندہ الیکشن میں اہم کردار ادا کریں گے۔ اگر بیس لاکھ اوورسیز پاکستانیز اپنا حق رائے دہی استعمال کریں کریں تو پی ٹی آئی کی حکومت کو ائندہ انتخابات میں بہت فائدہ ہوگا۔
طاہر جاوید کا کہنا تھا پاک امریکہ تجارتی حجم بہت کم ہے غالبا پانچ ارب کے قریب ہے اور پاکستان کو ٹیرف پر سہولت کا بل بھی امریکہ نے تیار کر لیا ہے جس سے پاکستانی مصنوعات بغیرت کے امریکہ بھجوائی جائیں گی، اس سے پاکستانی برآمدات میں اضافہ ہوگا اور کثیر زرمبادلہ بھی حاصل ہوگا
طاہر جاوید نے بتایا کہ عمران خان ملکی معیشت کو بحالی کے لیے لانگ ٹرم پالیسی بنا رہے ہیں کیونکہ مصنوعی طور پر پر عوام کو عمران خان ریلیف دینے کے حق میں نہیں ان کی سوچ ہے کہ کہ پاکستانی عوام کو معاشی طور پر خوشحال بنایا جائے اور ایسی پالیسیاں ترتیب دی جائیں جس کا آنے والی نسلوں کو فائدہ ہو اور یقینا لانگ ٹرم پالیسی کے حوصلہ افزا ضلع نتائج نکلیں گے گے جس کا عوام اور ملک دونوں کو فائدہ ہو

فیڈرل بورڈ آف ریونیو (ایف بی آر) نے کراچی اور لاہور سمیت 40 بڑے شہروں میں غیرمنقولہ جائیداد کی قیمتیں بڑھا دی ہیں اور اس سلسلے میں اب کراچی میں پراپرٹی کی قدر سے متعلق تفصیلات جاری کی گئی ہیں۔
ایف بی آر کی جانب سے جاری تفصیلات میں سول لائنز، گارڈن ایسٹ، کراچی ایڈمن،جوہر بلاک 17 زائد قدر کے علاقوں میں شامل ہیں جب کہ ایف بی آر نے پی ای سی ایچ ایس، ڈی ایچ اے ملیر، ائیر فورس سوسائٹی، این او آر ای ون کو اے ون کیٹیگری میں شامل کیا ہے۔
پارسی کالونی، بلوچ کالونی، نیوچالی، فیرئیر روڈ، محمودآباد، شارع فیصل، شارع لیاقت، نارتھ ناظم آباد اور جوہر کے کچھ بلاس کو ون کیٹیگری میں رکھا گیا ہے۔
ایف بی آر کے مطابق کراچی میں پوش ایریاز اے ون کیٹیگری میں فی اسکوائر فٹ مکان کی قیمت 81 ہزار روپے مقرر کی گئی ہے جب کہ سرکار سے منظور شدہ کچی آبادیوں کا فی اسکوائرفٹ مکان ریٹ 5000 روپےمقرر کیا گیا ہے۔
ایف بی آر کے مطابق کیٹیگری ون کے لیے فی اسکوائر فٹ ریٹ 56 ہزار روپے مقرر کیا گیا ہے ۔

وزیراعظم عمران خان نے کہا ہے کہ حکومت عام آدمی کی آسانی کیلئے ہر ممکن اقدامات کر رہی ہے،
وزیراعظم عمران خان کی زیر صدارت احساس راشن پروگرام سے متعلق اجلاس ہوا، جس میں ڈاکٹر ثانیہ نشتر، مشیر خزانہ شوکت ترین، وزیر اعلیٰ گلگت بلتستان خالد خورشید، معاون خصوصی شہباز گل اور متعلقہ سینئر افسران شریک ہوئے، وزیراعظم نے احساس راشن پروگرام سے متعلق کریانہ سٹورز اور ممکنہ فائدہ اٹھانے والوں میں بیداری کے لیے ضلعی حکام کو بھی شامل کرنے کی ہدایت کر دی،،
وزیراعظم کا کہنا تھا کہ مہنگائی کی وجہ سے لوگوں کو مشکلات کا سامنا ہے، غریب ترین لوگوں کو اشیائے ضروریہ پر سبسڈی دے رہے ہیں۔ عمران خان نے ہدایت کی کہ متعلقہ حکام غریبوں کو فائدہ پہنچانے کے لیے رجسٹریشن عمل کو تیز کریں۔

اسلام آباد (سٹاف رپورٹر)پبلک اکاؤنٹس کمیٹی نے حکومت کو یوٹیلٹی اسٹورز کو مکمل طور ختم کرنے کی تجویز دے دی ہے۔تفصیل کے مطابق پبلک اکاؤنٹس کمیٹی کا اجلاس رانا تنویر کی زیر صدارت ہوا، جس میں انکشاف ہوا کہ یوٹیلیٹی اسٹورز پر غیرمعیاری اور گھٹیا اشیا فروخت کی گئیں، چئیرمین کمیٹی رانا تنویر نے کہا کہ یوٹیلٹی سٹورز نے ارکان پارلیمنٹ اور عوام کو بیوقوف بنا رکھا ہے۔چیئرمین کمیٹی کا کہنا تھا کہ یوٹیلٹی اسٹورز پر دنیا کا سب سے غیرمعیاری گھی فروخت ہو رہا ہے، یوٹیلٹی سٹورز اشیا کی خریدوفروخت میں اربوں روپے کی کرپشن کر رہی ہے، کورونا فنڈز میں یوٹیلٹی اسٹورز کو 50 ارب میں 10 ارب جاری کیے گئے، سیکرٹری وزارت خزانہ ایسا نااہل آدمی اس کو کچھ معلوم ہی نہیں۔خواجہ آصف نے کہا کہ غیرمعیاری اشیا کی فروخت کا کام سیکرٹری صنعت وپیداوار کی ناک تلے ہو رہا ہے، ملک کی ناکامی کی وجہ بیوروکریسی ہے، بیوروکریسی نے ملک کا بیڑا غرق کیا، سیکرٹری وزارت صنعت وپیداوار کو کرپشن کے پیسے ملتے ہیں، نیب نے میرے، میری بیوی اور بچوں کے فارن ٹرپس کا بھی حساب مانگا، ایف آئی اے میں یوٹیلٹی سٹورز کی تحقیقات تاحال یونہی پڑی ہے۔ نورعالم نے کہا کہ یوٹیلٹی اسٹورز پر دستیاب اشیائے خوردونوش پکانے سے بھی نہیں پکتی، اس ملک میں سول، ملٹری اور ججز کا کوئی احتساب نہیں ہے، عدالتوں میں دہائیوں سال پہلے کے کیسز بغیر کارروائی کے پڑے ہیں۔اجلاس میں پبلک اکاؤنٹس کمیٹی نے یوٹیلٹی اسٹورز کو مکمل طور ختم کرنے کی تجویز دی، جب کہ ایف آئی اے سے یوٹیلٹی سٹورز کی تحقیقات کی رپورٹ 10 دنوں میں طلب کر لی گئی۔اجلاس میں فرنیچر پاکستان کمپنی کے حوالے سے بات کرتے ہوئے چیئرمین کمیٹی رانا تنویر نے کہا کہ چئیرمین نیب گزشتہ اجلاس میں پیش نہیں ہوئے، ڈی جی نیب نے پی اے سی سے جھوٹ بولا، اور کہا چئیرمین نیب لاہور میں لاپتہ افراد کا کیس سن رہے ہیں، جب کہ میری معلومات کے مطابق وہ لاہور میں ہی تھے لیکن کچھ اور کر رہے تھے، ہمیں چاہئیے تھا کہ ڈی جی نیب سے تحریری حلف لے لیتے۔چیئرمین کمیٹی نے وزارت صنعت و پیداوار حکام سے پوچھا کہ فرنیچر پاکستان کمپنی کا اب کیا بنا؟۔ حکام نے بتایا کہ اس کمپنی کو ضم کردیا گیا۔ رانا تنویر نے کہا کہ نیب والے تو اونچے بندے ہیں۔ چیئرمین کمیٹی نے ایف آئی اے حکام سے سوال کیا کہ کب تک ملوث لوگوں کو گرفتار کریں گے؟، آپ کو نہیں پتہ تو آگلی دفعہ ڈی جی ایف آئی کو بلالیں گے۔ ایف آئی اے حکام نے کمیٹی کو یقین دہانی کرائی کہ ایک ہفتہ ملوث افراد کی گرفتار کرلیا جائے گا۔

لاہور(کامرس رپورٹر)ڈپٹی جنرل مینجر انفورسمنٹ پنجاب ٹرانسپورٹ کمپنی فیصل یوسف نے سی ای او خواجہ سکندر ذیشان کی ہدایت پر گلبرگ سیکٹر کا سرپرائز وزٹ کیا، ڈپٹی جنرل مینجر انفورسمنٹ نے ڈیوٹی پر مامور ٹرانسپورٹ انسپکٹر غفار کو ماسک کا استعمال نہ کرنے پر سرزنش کی۔ ٹریفک کے بہاؤ میں خلل ڈالنے والے غیر قانونی موٹر سائیکل رکشوں کے خلاف موثر کارروائی کی ہدایت۔ ڈی جی ایم انفورسمنٹ فیصل یوسف نے کہا ہے کہ ڈیوٹی کو عبادت سمجھ کر کرنے والے اہلکار پنجاب ٹرانسپورٹ کمپنی کے ماتھے کا جھومر ہیں۔ شہریوں کے وسیع تر مفاد کے لیے بغیر روٹ پرمٹ و فٹنس چلنے والی غیر قانونی پبلک ٹرانسپورٹ کی روک تھام اور مسافروں کے ساتھ عزت و احترام سے پیش آنے والے افسران و اہلکار باعث فخر اور دیگر ملازمین کیلئے قابلِ تقلید ہیں۔خوش اخلاق ٹرانسپورٹ انسپکٹرز پنجاب ٹرانسپورٹ کمپنی انفورسمنٹ ونگ کا مثبت تشخص اجاگر کرتے ہیں۔ان خیالات کا اظہار انہوں نے گرین ٹاؤن سیکٹر کی سرپرائز چیکنگ ڈیوٹی کے دوران کیا۔ ڈیوٹی کو فرض شناسی،خوش اخلاقی اور اچھی کارکردگی پر تعریفی اسناد اور نقد انعام بھی دئے جائیں گے۔ ڈرائیور حضرات کو عزت سے مخاطب کریں۔ بہترین فیلڈ ڈیوٹی پر گرین ٹاؤن سیکٹر انچارج ڈپٹی ایم ایم پی آئی واصف رضا کو شاباش اور شہر میں ماحولیاتی آلودگی اور سموگ کا باعث بننے والی پبلک ٹرانسپورٹ کے خلاف بھرپور کریک ڈاؤن کی ہدایت دی۔ پنجاپ ٹرانسپورٹ کمپنی اہلکار محکمہ ماحولیات اور ڈسٹرکٹ ریجنل ٹرانسپورٹ اتھارٹی کے آفسران کے ساتھ ملکر بھی زیادہ دھواں چھوڑتے ہوئے ماحولیاتی آلودگی کا سبب بننے والی گاڑیوں کے خلاف کارروائی کر رہے ہیں۔