Category بزنس

اسلام آباد(میڈیا پاکستان) ایشیائی ترقیاتی بینک (اے ڈی بی) نے پاکستان کیلیے 43 کروڑ 50 لاکھ ڈالر مالیت کے قرضے کی منظوری دے دی۔گزشتہ روز اے ڈی بی کی جانب سے جاری تفصیلات کے مطابق مذکورہ قرضے میں سے پشاور کے ٹرانسپورٹ سسٹم کیلیے 33 کروڑ ڈالر اور سندھ میں انفرا اسٹرکچر کیلیے 10 کروڑ ڈالر دیے جائیں گے۔

کراچی(میڈیا پاکستان) سونے کی قیمتوں میں گزشتہ روز کمی ریکارڈ کی گئی ہے۔بین الاقوامی بلین مارکیٹ میں سونے کی قیمت 11 ڈالر کی کمی سے 1336 ڈالر فی اونس ہونے کے باعث پیر کو مقامی صرافہ مارکیٹوں میں بھی سونے کی تولہ اور 10 گرام قیمتوں میں بالترتیب 300 اور 257 روپے کی کمی ہوئی جس کے نتیجے میں کراچی، حیدرآباد، سکھر، کوئٹہ، پشاور، اسلام آباد، راولپنڈی، لاہور، ملتان اور دیگر شہروں کی مارکیٹوں میں سونے کی تولہ قیمت گھٹ کر 52 ہزار 800اور 10گرام 45 ہزار 257 روپے رہ گئی۔واضح رہے کہ سونے کی طرح چاندی کی قیمتوں میں بھی کمی ہوئی، چاندی کی تولہ قیمت 20 روپے کی کمی سے 790 اور 10 گرام 17.14 روپے گھٹ کر 660 روپے رہ گئی، چاندی کی عالمی قیمت 17.81 ڈالر فی اونس ریکارڈ کی گئی۔

شنگھائی(میڈیا پاکستان) فرانس اور جرمنی کے بعد چین نے بھی پٹرول اور ڈیزل کاروں پر پابندی کا اعلان کردیا ہے تاہم اس حوالے سے تاریخ کا تعین نہیں کیا گیا۔نائب وزیر صنعت وانفارمیشن ٹیکنالوجی زن گیوبن نے شمالی شہر تیان جن میں فورم سے خطاب کرتے ہوئے کہاکہ وزارت نے متعلہ تحقیق پر کام شروع کردیا ہے اور اس حوالے سے تاریخ کے تعین پر بھی کام کیا جا رہا ہے۔ ان اقدامات کے ذریعے ماحول میں گہری تبدیلیاں آئیں گی اور چین کی آٹو صنعت کی ترقی کو بھی سپورٹ ملے گی، اداروں کو روایتی کاروں میں توانائی کی بچت کی سطح کو بہتر بنانے کے لیے محنت کرنی چاہیے اور تشخیص کردہ ضروریات کے مطابق نیوانرجی وہیکلز کو تیزی سے تیار کیا جانا چاہیے۔اگرچہ نائب وزیرصنعت نے مذکورہ کاروں پر پابندی کے حوالے سے کوئی ڈیڈلائن نہیں دی تاہم چینی آٹو سیکٹر کی نمائندہ نیشنل پسنجر کار ایسوسی ایشن کے سربراہ کیوئی ڈونگ شو نے کہاکہ یہ طویل عمل ہے۔ روایتی فیول سے چلنے والی گاڑیوں کی پیداوار روکنا آئندہ یا دو دہائیوں میں بھی مشکل ہوگا، پسنجر کاروں کے حوالے سے ہم 2040 تک نمایاں پیشرفت کر سکتے ہیں مگر ہیوی ڈیوٹی ٹرک جیسی دیگر مصنوعات کے لیے یہ بہت مشکل کام ہوگا، آٹو میکرز نے اس شعبے میں زیادہ کام نہیں کیا اور صارفین بھی نئی توانائی کی گاڑیوں سے زیادہ واقفیت نہیں رکھتے۔

کراچی(میڈیا پاکستان) ایل پی جی ڈسٹری بیوٹرز ایسوسی ایشن پاکستان (سندھ زون) کے صدر عمران فاروقی نے کہا ہے کہ ایل پی جی مارکیٹنگ کمپنیوں نے گزشتہ چند روز کے دوران ایل پی جی کی قیمتوں میں مجموعی طور پرفی کلو 15 روپے سے بھی زائد کا اضافہ کردیا ہے۔عمران فاروقی نے کہا ہے کہ ایل پی جی کی قیمت میں مسلسل اضافہ جاری ہے، موسم سرما کی آمد کا قبل ازوقت فائدہ اٹھاتے ہوئے بلیک مافیا سرگرم ہوچکا ہے اور ایل پی جی مارکیٹنگ کمپنیوں نے گزشتہ چند روز کے دوران ایل پی جی کی قیمتوں میں مجموعی طور پرفی کلو 15 روپے سے بھی زائد کا اضافہ کردیا ہے۔ جس کے بعد کراچی میں فی کلو ایل پی جی کی قیمت بڑھ کر 110 روپے تک جا پہنچی ہے جبکہ گھریلو سیلنڈر کی قیمت میں 250 روپے کا اضافہ ہوگیا ہے۔گزشتہ روز اپنے بیان میں عمران فاروقی نے بتایا کہ کمرشل سیلنڈر کی قیمت 800 روپے بڑھ گئی ہے۔ انہوں نے بتایا کہ مقامی مارکیٹ میں ایل پی جی کی قیمتوں میں اضافے کی وجہ مقامی پروڈیوسر نہیں بلکہ ایل پی جی مارکیٹنگ کمپنیاں ہیں، پروڈیوسر مہینہ میں ایک بار ایل پی جی کے ریٹس جاری کر دیتے ہیں جبکہ مارکیٹنگ کمپنیاں آئے دن ایل پی جی کی قیمتوں میں من مانا اضافہ کر دیتی ہیں۔

لاہور(میڈیاپاکستان)صوبے بھر میں پنجاب لینڈ ریکارڈ اتھارٹی کے قائم کردہ اراضی ریکارڈ سنٹر بدعنوانی کا گڑھ بن گئے ،شہریوں کی کثیر تعداد نے رشوت وصولی کی روک تھام کے لئے ڈی جی اینٹی کرپشن پنجاب اور ڈائریکٹر جنرل نیب سے اراضی ریکارڈ سنٹر ز کی نگرانی پر سٹاف تعینات کرنے کا مطالبہ کر دیا میڈیا پاکستان کی جانب کئے جانیوالے سروے کے دوران صوبائی دارلحکومت کے شہریوں کی مبینہ طور پنجاب لینڈ ریکارڈ اتھارٹی کے اراضی ریکارڈ سنٹر کو کرپشن کی آماجگاہ قرارد یا ہے شہری محمد الطاف ،محمد رمضان ،محمد دستگیر،محمد آصف ،محمد ذیشان اور محمد ادریس کا کہا ہے کہ وزیر اعلیٰ پنجاب میاں محمد شبہاز شریف نے پٹوار کلچر کے خاتمے اور صاف شفاف اس پراجیکٹ کے ذریعے کرپشن سے پاس اس سسٹم کو متعارف کروا دیاہے جو کہ اراضی ریکارڈ سنٹر پر تعینات سٹاف کی کثیر تعداد نے اس دعووں کو غلط ثابت کرتے ہوئے رشوت وصولی کی انتہا کر رکھی ہے صوبے بھر میں کوئی ایسا اراضی ریکارڈ سنٹر نہ ہے جہاں رشوت کے بغیر کام کیا جارہا ہے صبح پانچ بجے سے اراضی ریکار ڈ سنٹر کے باہر لمبی قطاروں میں کھڑا کیا جارہا ہے ٹوکن لینے کے باوجود باری آنے میں گھنٹوں لگ جاتے ہیں اور اپنے جائز کام کروانے میں کئی کئی دن درکار ہوتے ہیں۔ پٹواریوں کے منشی اراضی ریکارڈ سنٹر میں تعینات سٹاف کے معاونت بن چکے ہیں ان کے ذریعے ہر کام جلدی اور عام شخص کو کئی کئی دن خواری کا سامنا کرنا پڑرھا ہے۔ شہری محمد وقاص، تنویراحمد، احسن وحید، امتیاز احمد، محمد ندیم، لطیف خان اور معصوم علی نے الزام عائد کیا کہ تمام اراضی ریکارڈ سنٹرز میں کبھی کھیوٹ ٹینشن ایشو کے نام پر ہمارا کھاتہ بلاک ظاہرکیا جاتا ہے کبھی سنٹرز میں لنک ڈوان تو کبھی سوفٹ وئیر میں تبدیلی کا کہہ کر کئی کئی دن چکر لگوائے جاتے ہیں ابھی کام پٹواری کا فیشن اور ایس ای او اپنے پرائیویٹ بندے کے ذریعے منٹوں میں کروالیتے ہیں مگر اس کیلئے منہ مانگی رشوت وصول کی جارہی ہے اگر ڈی جی PLRAصرف اس بات کی تصدیق کرلیں کہ سب رجسٹرار آفس سے جوپرچہ رجسٹری بھجوائی جارہی ہے اسی پر وصولی ڈیٹ کیا ہے اور وصول ہونے کے بعد وہ کتنا عرصہ پینڈنگ رکھی جاتی جاتی ہے اس رپورٹ پر بھی تمام حقائق سامنے آجائیں گے اور پرچہ رجسٹری کے مطابق انتقالات کی تصدیق ہورہی ہے یا اشٹام سیلرز اور پٹواریوں کے فیسوں کے ذریعے کام ہورہے ہیں صوبے بھرمیں کوئی بھی ایسا ضلع نہیں ہے جہاں قائم کئے گئے اراضی ریکارڈ اور سنٹرزپررشوت وصول نہ کی جارہی ہو شہریوں نے ڈی جی اینٹی کرپشن پنجاب بریگیڈئیر(ر) مظفر علی رانجھا اورڈائریکٹر جنرل نیب سے مطالبہ کیا ہے صوبے بھر میں قائم کردہ اراضی ریکارڈ سنٹرزکے سٹاف کی نگرانی پر محکمہ اینٹی کرپشن اور نیب کا سٹاف بٹھایا جائے تاکہ رشوت وصولی کی ڈیمانڈ کرنے اور اس میں ملوث پائے جانے والے سٹاف کے خلاف فوری قانونی کارروائی عمل میں لائی جاسکے شہریوں کا مزید کہنا تھا کہ اراضی ریکارڈ سنٹرز میں فنڈز کا غبن کیاجارہا ہے اختیارات کا ناجائز استعمال کیاجارہاہے ریکارڈ میں ردوبدل کی جارہی ہے اگر صوبے بھر کے اراضی ریکارڈ سنٹرزکاریکارڈ قبضے میں لے کراس کی تحقیقات کی جائے تو کروڑوں روپے کی جعلسازی غبن اوررشوت وصول کی بنیاد پر ناصرف مقدمات کا اندراج کیا جاسکے گا بلکہ کرپٹ اہلکاروں کی کثیر تعداد کی گرفتاریاں بھی عمل میں لائی جاسکیں گی۔

لاہور(عامر بٹ سے)محکمہ کو آپریٹو نے غیر آباد سوسائٹیوں کو آباد کرنے کے لیے سوسائٹی انتظامیہ کو شوکاز نوٹس جاری کر دئیے ہیں جس کے لئے باقاعدہ قانون سازی پر عمل کرنے کا فیصلہ کیا گیا ہے ، معلومات کے مطابق محکمہ کو آپریٹو کے افسران نے گزشتہ کئی سالوں سے محکمہ سے رجسٹرڈ ہونے کے باوجود ڈیڈ روپ ڈھالنے والی سوسائٹی کو آباد کرنے کے لیے قانون سازی پر عمل درآمد کروانے کا فیصلہ کر لیا ہے اور اس ضمن میں صوبائی دارالحکومت لاہور میں رجسٹرڈ ہونے والی نان آپریشنل سوسائٹیوں کی انتظامیہ کو شوکاز نوٹسزبھی جاری کر دیے ہیں ، محکمہ کوآپریٹو سے رجسٹرڈ سالوں سے سوسائٹی مالکان اور انتظامیہ کی سستی،ذاتی مفادات ،ناقص حکمت عملی اور بد انتظامی کا شکار ہونے والی نان آپریشنل کو آپریٹو سوسائٹیوں میں فرنٹیرز ،دی لاہور پریس کلب ،القدوس، چمن زار، فاریسٹ فرینڈز، آفیشنل ایمپلائز، ڈان، نیشنل بنک سٹاف،دی نور ایونیو، یونائٹیڈ، سکائی وے، فین،متروکہ وقف املاک، دی نیوز پیپرز ایمپلائز،پی ٹی وی ایمپلائز، سٹی ویو، رضوان کو آپریٹو، راسٹر گلڈ،دی نیشنل کو آپریٹو سوسائٹیوں کے نام سرفہرست ہیں جو کئی سالوں سے محکمہ کوآپریٹو سے رجسٹرڈ ہیں لیکن وہ ڈیڈ حالت میں ہیں جہاں کوئی ترقیاتی کام اور ممبران کی فلاح کے لئے ایک فیصدبھی کام نہ کیا گیا ہے ، اس حوالے سے محکمہ کو آپریٹو کے افسران نے ان غیر آباد سوسائٹیوں کی انتظامیہ اور ممبران کو بھی باقاعدہ تحریری طور پر آگاہ کرنے کے ساتھ ساتھ میٹنگیں کرنا بھی شروع کر دیں ہیں، مزید معلوم ہوا ہے کہ ڈیڈ کوآپریٹو سوسائٹیوں کے ممبران کی تعداد جہاں انتہائی کم دیکھنے میں آئی ہے وہاں انتظامی معاملات میں بھی نمایاں کمی دیکھنے میں آئی ہے جس کی وجہ صرف اور صرف یہ ہے کہ کوآپریٹو ڈیپارٹمنٹ کے افسران کی اس طرف توجہ نہ ہے اور نہ سوسائٹی مالکان اس طرف کوئی دلچسپی دے لیتے ہیں اس وجہ سے ان سوسائٹیوں میں ممبران کی تعداد نہ ہونے کے برابر ہوتی ہے اور ان ڈیڈ سوسائٹیوں میں لوگ انوسٹمنٹ بھی کرتے ہیں تو غیر معیار سہولیات اور ناکافی سہولیات کے باعث ادھر آباد ہونے کو ترجیح نہیں دیتے ہیں ان ڈیڈ سوسائٹیوں بہتری کے لیے محکمہ کو آپریٹوان سوسائٹی انتظامیہ کے ساتھ تعاون کرنے کا ارادہ رکھتی ہے تاکہ ان ڈیڈ سوسائٹیوں کو آباد کاری کے دائرہ میں لایا جاسکے ۔محکمہ کوآپریٹو کے ترجمان کا کہنا ہے کہ ان تمام ڈیڈ سوسائٹیوں کو کرنے اور مالکان کے ساتھ میٹنگز کے شیڈول کو حتمی شکل دے دی گئی ہے ،محکمہ کوآپریٹو ان تمام رجسٹرڈ سوسائٹیوں کو آباد کرنے کے لئے ہر ممکن تعاون اور سہولیات دینے کی یقینی دھانی کرواتا ہے

لاہور(میڈیاپاکستان) ملک بھر میں عیدالاضحی پر28ارب روپے مالیت کے80لاکھ سے زائد جانوروں کی قربانی کی گئیں،30لاکھ گائے اور بچھڑے،40لاکھ بکرے اور 10لاکھ سے زائد چھترے اور بھیڑیں ذبح کی گئیں۔ ان جانوروں کی کھالوں کی قیمت7ارب روپے سے زائد بنتی ہیں تاہم رواں برس کھالو ں کے نرخ گزشتہ برس کی نسبت 30فیصد کم رہے جس سے بیوپاری پریشان نہیں جبکہ خام چمڑے کے کاروبار سے وابستہ تاجرمن مانے نرخوں پر کھالیں خریدرہے ہیں۔ لاہور چمڑا منڈی میں بکرے کی کھالیں200سے 280روپے،چھترے کی کھال300سے 350، بچھڑے اور گائے کی کھال2100سے2700روپے اوراونٹ کی کھال صرف100سے150روپے میں فروخت ہوئی۔ ذرائع کے مطابق عالمی مارکیٹ میں چمڑے کی مانگ میں کمی کے باعث کھالوں کی قیمتیں گر گئیں ہیں۔ پاکستان ٹینریزایسوسی ایشن کے ذرائع نے ”میڈیا پاکستان“ کوبتایا کہ پاکستان میں کھالوں کو محفوظ کرنے میں محض گھنٹوں کی تاخیر سے بڑی تعداد میں کھالیں ضائع ہوجاتی ہیں ایک محتاط اندازے کے مطابق اس عیدالاضحی پر35فیصد کھالیں ضائع ہوجائینگی جن کی مالیت2ارب40کروڑ روپے ہے۔ کھالوں کے ضائع ہونے کی سب سے بڑی وجہ یہ ہے کہ اسے اتارنے کے ابتدائی گھنٹوں میں فوری نمک لگاکر محفوظ نہیں کیا جاتا۔

لاہور(میڈیا پاکستان) صوبائی محکمہ خزانہ کی جانب سے پنجاب پولیس کو مالی سال2017-18کے پہلے تین ماہ کیلئے35ارب روپے سے زائد کے فنڈزجاری کردئیے گئے ہیں۔34ارب11کروڑ 56لاکھ اور ایک ہزار روپے کے فنڈ ز آئی جی پنجاب کیپٹن(ر)عارف نواز خان کی منظوری کے بعد جاری کیے گئے ہیں۔ ذرائع کے مطابق فنڈزکی عدم دستیابی کے باعث شدید دشواری کا سامنا کرنا پڑرہا تھا جس کے باعث پنجاب پولیس کے متعدد ترقیاتی کام روک دئیے گئے تھے جبکہ پٹرول بھی ادھار لینا پڑتا تھا۔ پولیس افسران بھی پٹرول نہ ہونے کے باعث اپنی جیب سے پٹرول ڈلوارہے تھے۔ آئی جی پنجاب کی جانب سے سفارش کی گئی تھی کہ جلد فنڈز جاری کئے جائیں تاکہ اس بحران کی سی کیفیت کو دور کیاجاسکے۔ ذرائع کے مطابق فنڈز مختلف ہیڈز میں جاری کئے گئے جن میں تنخواہوں کیلئے15ارب ،26کروڑ،22لاکھ اور42ہزار روپے، ملازمین کے ریگولر الاؤنسز کی مد میں15ارب،22کروڑ،82لاکھ اور20ہزار ، وردیوں کے لئے4کروڑ، 61لاکھ اور70ہزار روپے، ٹریولنگ الاؤنس کی مد میں11کروڑ53لاکھ 35ہزار روپے، سٹیشنری کی مد میں8کروڑ، 61لاکھ اور78ہزار روپے، پولیس افسران کے دفاتروں اور تھانوں کی بلڈنگز کے کرائے کی مد میں 3کروڑ،62لاکھ،18لاکھ اور78ہزار روپے، پولیس افسران کے دفاتروں اورتھانوں کی بلڈنگز کے کرائے کی مد میں3کروڑ،62لاکھ اور25ہزار روپے، بجلی کے بلوں کی مد میں 31کروڑ،86لاکھ اور11ہزار ، گیس کے بلوں کی مد میں 22کروڑ،43لاکھ اور 37ہزار پانی کے بلوں کی مد میں 39لاکھ اور6ہزار ، ٹیلی فونز کے بلوں کی مد میں11کروڑ،85لاکھ اور30ہزار روپے،پوسٹیج اینڈ ٹیلی گراف کی مد میں23لاکھ اور99ہزار روپے، ٹرانسپورٹ کی مد میں11کروڑ،40لاکھ اور75ہزار روپے،ماڈل ٹاؤن پولیس سٹیشنز کیلئے3کروڑ اور4لاکھ روپے، دوران ڈیوٹی کھانے کیلئے ایک کروڑ43لاکھ اور68ہزار روپے، ماڈل پولیس سٹیشنز کیلئے3کروڑ اور4لاکھ روپے، دوران ڈیوٹی کھانے کیلئے ایک کروڑ،43لاکھ اور68ہزارروپے، ٹینٹ اورترپال کیلئے ایک کروڑ25لاکھ اور10ہزار روپے ، محرم ڈیوٹی کے لئے6لاکھ اور75ہزار روپے، سپورٹس کی مد میں 22لاکھ اور50ہزار روپے، ملازمین کی مالی امداد کیلئے25لاکھ روپے،سکالر شپ کیلئے76لاکھ اور50ہزار ، انٹرٹیمنٹ اورتحائف کی مد میں18لاکھ روپے، کیش ایوارڈ کی مد میں58لاکھ اور 5ہزار روپے، کاسٹ آف انویسٹی گیشن کی مد میں12کروڑ،88لاکھ اور 16ہزار روپے، روڈ سیفٹی کمپین کی مد میں75لاکھ اور60ہزار روپے، ملازمین کی ریٹائرمنٹ کی مد میں41کروڑ،17لاکھ اور50ہزار روپے، کمپیوٹرسٹیشنری کی مد میں4کروڑ،61لاکھ اور25ہزار روپے،اینٹی رائیٹ ڈیپو کیلئے76لاکھ اور40ہزار روپے،ادویات کی مد میں22لاکھ اور5ہزار روپے، کمپیوٹرائزڈ ڈرائیورنگ لائسنس کے سامان کی خریداری کی مد میں50لاکھ اور99ہزارروپے، آنسو گیس کے شیلوں کی خریداری کی مد میں5لاکھ 85ہزار روپے اور اسلحہ ڈیپور کیلئے4لاکھ اور5ہزار روپے کے فنڈز جاری کردئیے گئے ہیں۔ فنڈز جاری ہونے کے محکمہ پولیس کے التوا کا شکار ہونے والے ترقیاتی منصوبوں پر کام شروع ہوگیاہے۔

کراچی: پاکستان اسٹاک ایکسچینج میں کاروباری ہفتے کے پہلے روز ہی مندی کا رجحان ہے۔گزشتہ ہفتے بھی پاکستان اسٹاک ایکسچینج میں مندی دیکھی گئی اور کاروباری ہفتے میں مجموعی طور پر ہنڈرڈ انڈیکس میں 437 پوائنٹس کی کمی رہی۔
آج کاروباری ہفتے کے آغاز پر ہی پاکستان اسٹاک ایکسچینج میں مندی دیکھی جارہی ہے اور سرمایہ کار بے یقینی کی کیفیت میں نظر آتے ہیں۔
کاروبار کے آغاز پر 100 انڈیکس میں 175 پوائنٹس کی کمی ہوئی جس سے انڈیکس 42 ہزار 500 کی سطح سے نیچے آگیا۔
پہلے کاروباری سیشن میں انڈیکس مزید نیچے کی طرف گیا اور 230 پوائنٹس کی کمی دیکھی جانے لگی جس سے ہنڈرڈ انڈیکس 42 ہزار 410 کی سطح پر آگیا ہے۔

کراچی : پاکستان اسٹاک ایکسچینج (پی ایس ایکس) میں مندی کا رجحان رہا، کے ایس ای 100 انڈیکس 642 پوائنٹس کمی سے 42ہزار 268 پوائنٹس پر بند ہوا۔
تفصیلات کے مطابق کاروباری ہفتے کے چوتھے روز پی ایس ایکس میں حصص کی فروخت کے دباﺅ اور مارکیٹ کریکشن کے باعث مندی کا رجحان رہا اور کے ایس ای 100 انڈیکس 642 پوائنٹس کمی سے 42 ہزار 268 پوائنٹس پر بند ہوا۔
رپورٹ کے مطابق مارکیٹ سرمایہ میں 1 کھرب 22 ارب 30 کروڑ 90 لاکھ 94 ہزار 802 روپے کی کمی رہی تاہم تجارتی حجم میں 69 کروڑ 63 لاکھ 95 ہزار 880 روپے کا اضافہ ریکارڈ کیا گیا، اسی طرح خرید و فروخت میں بھی 1 کروڑ 78 لاکھ 83 ہزار 730 حصص کی مندی رہی۔
کاروبار کے اختتام پر کے ایس ای 30 انڈیکس بھی 315 پوائنٹس کی مندی سے 21 ہزار 845 پوائنٹس پر بند ہوا، کے ایس سی آل شیئر انڈیکس میں 416 پوائنٹس کی کمی ریکارڈ کی گئی جبکہ کے ایم آئی 30 انڈیکس 1266 پوائنٹس گر گیا۔