Category صحت

لاہور ( ایم نائن ٹو ڈاٹ ٹی وی )شادی تو وہ رشتہ ہے جس کے بارے میں کہا جاتا ہے کہ یہ وہ لڈو ہے جو کھائے پچھتائے اور جو نہ کھائے وہ بھی پچھتائے مگر ایک پرمسرت تعلق آپ کو موٹاپے کا شکار بھی بنا سکتا ہے۔یہ دعویٰ اسکاٹ لینڈ میں ہونے والی ایک طبی تحقیق میں سامنے آیا۔گلاسکو یونیورسٹی کی تحقیق کے مطابق شادی کے بعد نوبیاہتا جوڑے کا جسمانی وزن بڑھنے کا امکان بہت زیادہ ہوتا ہے۔تحقیق میں بتایا گیا کہ شادی کے ایک سال بعد جوڑے کے جسمانی وزن میں اوسطاً دو سے ڈھائی کلو گرام وزن بڑھ سکتا ہے جبکہ جن لوگوں پر چربی زیادہ جلدی بڑھتی ہے، وہ تین ماہ کے دوران ہی دو کلو اضافی وزن کے مالک بن جاتے ہیں۔تحقیق کے مطابق اس کی اصل وجہ شادی کے بعد کھانے کی مقدار میں اضافہ ہوجانا ہے، جبکہ نوبیاہتا جوڑے جسمانی طور پر زیادہ سرگرم نہیں رہتے یا ورزش سے دور ہونے لگتے ہیں، جس کی وجہ سے جسمانی وزن بڑھنے لگتا ہے۔تحقیق میں مزید بتایا گیا کہ شادی کے بعد لوگوں کو اپنے جسمانی وزن پر نظر رکھنے کی ضرورت ہے، کیونکہ موٹاپے کا شکار ہونا خود اعتمادی کو نقصان پہنچاتا ہے جبکہ شریک حیات سے تعلق بھی متاثر ہوسکتا ہے۔ اس سے قبل گزشتہ سال امریکا کی فلوریڈا اسٹیٹ یونیورسٹی کی تحقیق میں بھی یہی بات سامنے آئی تھی۔اس تحقیق میں کہا گیا تھا کہ اپنی شادی سے خوش جوڑوں میں جسمانی وزن بڑھنے کا امکان زیادہ ہوتا ہے۔محققین کا خیال تھا کہ اس کی ممکنہ وجہ یہ ہے کہ شادی کے بعد لوگوں کے اندر اپنی شخصیت یا جسمانی وزن کے حوالے سے تشویش کم ہوجاتی ہے یا ان کی نظر میں اس کی زیادہ اہمیت نہیں رہتی۔ایک اور امریکی تحقیق میں یہ دعویٰ کیا گیا تھا کہ میاں بیوی کے درمیان پیار جتنا بڑھتا ہے، جسمانی وزن بھی اسی طرح تیزی سے بڑھتا ہے۔اس کے مقابلے میں جو جوڑے ایک دوسرے سے زیادہ خوش نہیں ہوتے، ان کا وزن بھی زیادہ نہیں بڑھتا۔

لاہور ( ایم نائن ٹو ڈاٹ ٹی وی ) اگر اپنے دل کو ہمیشہ صحت مند رکھنا چاہتے ہیں تو آج کل عام دستیاب اس چیز کا استعمال عادت بنالیں جو کہ انتہائی سستی بھی ہے۔یہ بات امریکا میں ہونے والی ایک طبی تحقیق میں سامنے آئی۔بوسٹن یونیورسٹی کی تحقیق کے مطابق شکرقندی کا استعمال صرف منہ کا ذائقہ ہی دوبالا نہیں کرتا بلکہ دل کی صحت کے لیے بھی بہتر ہے۔شکرقندی میں وٹامن سی اور بی سکس کے ساتھ ساتھ دل کی صحت کے لیے فائدہ مند فائبر اور مینگنیز جیسے اجزاءموجود ہوتے ہیں۔ایک درمیانے سائز کی شکر قندی جسم کے لیے روزانہ درکار وٹامن اے کی مقدار بھی فراہم کرنے کے لیے کافی ثابت ہوتی ہے۔وٹامن اے وہ جز ہے جو عمر بڑھنے کے ساتھ مختلف اعضاءمیں آنے والی تنزلی کی روک تھام کرنے کے ساتھ ساتھ بینائی کو بہتر رکھتا ہے۔یہ وٹامن کسی زخم کی صورت میں اسے جلد بھرنے میں بھی مدد دیتا ہے۔محققین کا کہنا تھا کہ وٹامن اے جلد کی ساخت کو ٹھیک رکھنے میں مدد دیتا ہے ورنہ دوسری صورت میں بیکٹریا اور وائرس زیادہ آسانی سے جسم میں داخل ہوسکتے ہیں۔انہوں نے بتایا کہ شکر قندی میں موجود پوٹاشیم جسم میں سوڈیم کے اثرات کو کم کرتا ہے جس سے ہائی بلڈ پریشر سے نجات پائی جاسکتی ہے جو کہ ہارٹ اٹیک اور فالج جیسے جان لیوا امراض کا خطرہ بڑھاتا ہے۔

(میڈیانائن ٹو ڈاٹ ٹی وی)ویسے تو سموسہ اور پیزا دونوں کو ہی مضرِ صحت قرار دیا جاتا ہے لیکن ان دونوں میں سے صحت کے لیے کم نقصان دہ کیا ہے؟
جیسا کہ ہم جانتے ہیں کہ پیزا اپنی روٹی(بریڈ) کی وجہ سے کاربوہائیڈرٹس پر مشتمل ہوتا ہے اور اس میں پنیر(چیز)،گوشت اور دیگر اشیا کی صورت میں فیٹ پایا جاتا ہے، پیزا کو تیل میں تلا(ڈیپ فرائی) نہیں جاتا بلکہ مائیکروویو اون میں بیک کیا جاتا ہے۔
پیزا کے مقابلے میں سمومہ کو بیک نہیں بلکہ تیل میں تلا جاتا ہے جب کہ اس میں آلو اور مرچیں شامل ہوتی ہیں، آلو اس وقت مضرِ صحت کاربوہائیڈریٹس کا مجموعہ بن جاتے ہیں جب انہیں ڈیپ فرائی کیا جاتا ہے اور اسی وجہ سے اس میں فیٹ کی مقدار بڑھ جاتی ہے، ڈیپ فرائی ہونے کے بعد سموسہ اپنےاندر تیل یا گھی کو جذب کرلیتا ہے اور پیزا کے مقابلے میں زیادہ فیٹ کا سبب بنتا ہے۔
اگر موازنہ کیا جائے تو 100گرام پیزا میں 276 جب کہ 100 گرام سموسے میں تقریباً 400 کیلوریز پائی جاتی ہیں اگر سموسے کو ڈیپ فرائی کرنے کے بجائے اوون میں بیک کیا جائے تو اسے صحت کے لیے کم نقصان دہ بنایا جاسکتا ہے۔

کراچی(میڈیا نائن ٹو ڈاٹ ٹی وی) دنیا بھر میں لوگ عام طور پر بڑھے ہوئے وزن سے پریشان نظرآتے ہیں اور موٹاپے سے چھٹکارہ حاصل کرنے کے لیے نت نئے نسخے اور ٹوٹکے آزماتے رہتے ہیں تاہم ایسے لوگ بھی موجود ہیں جو موٹاپے سے نہیں بلکہ وزن میں کمی کے باعث پریشان ہیں۔ہمارے آس پاس ایسے کئی لوگ موجود ہیں جن کا وزن قدرتی طور پر کم ہوتا ہے جس کی وجہ سے وہ نہایت کمزور نظر آتے ہیں ۔ یہ لوگ موٹے لوگوں کی طرح اپنے وزن کو لے کر مشکلات کا شکار ہوتے ہیں اور وزن میں اضافے کے لیے مختلف ٹوٹکےاور حکیمی نسخے استعمال کرتے ہیں۔ اکثر یہ نسخے استعمال کرنے سے انہیں فائدے کے بجائے نقصان ہوتا ہے۔ لہٰذا یہاں وزن میں اضافے کے لیے چند غذائی اجزاکے متعلق بتایاجارہا ہے جن سے نہ صرف کیلوریز میں اضافہ ہوگا بلکہ ان سے جسم کو نقصان بھی نہیں پہنچے گا۔
چاول:
وزن میں اضافے کے لیے سب سے موثر غذا چاول ہے یہ باآسانی ہر جگہ دستیاب ہوتا ہے اور اسے ہرکوئی گھر پر بناسکتا ہے۔ وزن میں اضافے کے خواہشمند افراد براؤن رائس کی جگہ سفید چاول لیں دونوں میں فرق صرف فائبر کا ہوتا ہے۔ براؤن رائس میں فائبر کی مقدار زیادہ ہوتی ہے اسی لیے انہیں موٹے افراد کو کھانے کا مشورہ دیاجاتا ہے فائبر وزن گھٹانے میں اہم کردار اداکرتا ہے۔ جب کہ سفید چاول میں فائبر کی مقدار کم ہوتی ہے ۔ ایک کپ پکے ہوئے چاولوں میں تقریباً 180 کیلوریز موجود ہوتی ہیں یہ وزن میں اضافہ کے خواہشمند افراد کے لیے مکمل اور بہترین غذا ہے۔
خشک میوے:
خشک میووں میں بھی کیلوریز کی بڑی مقدار موجود ہوتی ہے ۔ وزن میں اضافے کے لیے بعض افراد تیل میں تلی ہوئی چیزیں اور چپس وغیرہ کھاتے ہیں جن سے جسم میں چربی بڑھ جاتی ہے اور ان میں موجود غیرمعیاری تیل دل کے لیے بھی نقصان دہ ہوتاہے لہٰذا دبلے پتلے لوگ وزن میں اضافے کے لیے اسنیکس کے طور پر خشک میوہ جات کھائیں ان میں گڈ فیٹس(چربی)، کاربوہائیڈریٹ اور پروٹین وافر مقدار میں پائی جاتی ہیں جو وزن میں اضافہ کرنے کے ساتھ جسم کو نقصان بھی نہیں پہنچاتی۔
کاربوہائیڈریٹ اور نشاستہ دار غذائیں:
وزن میں اضافے کے لئے ایسی سبزیاں کھائیں جن میں نشاستہ موجود ہوجیسے آلو، مٹر،شکر قندی، شملہ مرچ وغیرہ۔ اس کے علاوہ کاربوہائیڈریٹ سے بھرپور غذائیں جیسے بھٹا، ڈبل روٹی اور مختلف طرح کے بیج بھی وزن میں اضافے کے لیے بہترین غذا ہیں۔
پنیر:
پنیر جسے عام طور پر’چیز‘بھی کہاجاتا ہےمیں 70 فیصد گڈ فیٹس ہوتے ہیں۔ چیز کو عموماً بیرون ممالک زیادہ استعمال کیا جاتا ہے تاہم اب یہ پاکستان میں بھی مختلف کھانوں میں استعمال ہونے لگا ہے ۔چیز کے 1 گرام کے ٹکڑے میں 9 گرام کیلوریزموجود ہوتی ہیں۔ لہٰذاوزن میں اضافے کے خواہشمند افراد کے لیے چیز(پنیر) سے بہتر اور کچھ نہیں۔

(میڈیا نائن‌ٹو ڈاٹ ٹی وی)آپ نے یہ سنا ہوگا کہ عام طور پر 18 سال کے بعد انسان کا قد نہیں بڑھتا لیکن یہ حقیقت نہیں۔ اب آپ 18 سال کی عمر کے بعد بھی اپنا قد بڑھا سکتے ہیں اگر آپ ذیل میں دی گئی عادتوں کو اپنانا شروع کردیں۔
صحت مند غذا
وہ لوگ جو اپنے قد نہ بڑھنے کے باعث پریشان ہیں، انہیں چاہیے کہ وہ اپنی غذا میں سبزیوں، پھل، پروٹین اور کاربوہائیڈریٹس، دودھ اور خشک میوہ جات کا زیادہ سے زیادہ استعمال کریں۔ یہ غذائیں ان کے ہارمونز کو بڑھائیں گی اور قد بڑھانے میں مددگارثابت ہوں گی۔
روزانہ ورزش کیجیے
18 سال کی عمرکے بعد بھی قد میں اضافے کا ایک طریقہ یہ بھی ہے کہ آپ روزانہ بنیادوں پر کم سے کم 20 منٹ کی ورزش کیجیے جو نہ صرف قد بڑھانے میں مددگار ثابت ہوگی بلکہ آپ تندرست اور توانا بھی رہیں گے۔
بھرپور نیند
اپنی عمر کے لحاظ سے ضروری ہے کہ آپ رات کو 8 گھنٹے کی بھرپوراور پُرسکون نیند لیجیے۔ نیند میں خلل یا نیند پوری نہ ہونے سے بھی آپ کے قد میں اضافہ نہیں ہوتا۔
سگریٹ اور شراب نوشی ترک کردیجیے
اگر واقعی آپ قد بڑھانا چاہتے ہیں توسگریٹ اور شراب نوشی ترک کردیجیے اور اس کی جگہ آپ سبزیوں کا سوپ اور جوس استعمال کیجیے۔
جسم کو سیدھا رکھیے
جسم کو سیدھا رکھنا ہماری فٹنس کےلیے بہت ضروری ہے اور اس سے قد بڑھنے میں بھی اضافہ ہوتا ہے۔ وہ افراد جو اپنا قد بڑھانے کے خواہش مند ہیں انہیں چاہیے کہ وہ اپنے جسم کو سیدھا رکھیں اور جب بیٹھے ہوں تو 90 ڈگری کا خاص طور پر خیال رکھیں۔
جسم کے کھنچاؤ اور لٹکنے والی ورزش کیجیے
آپ دن بھرمیں کسی بھی وقت کم از کم 15 منٹ کےلیے وہ ورزش کیجیے جس سے آپ کے جسم میں کھنچاؤ پیدا ہو جب کہ لٹکنے والی تمام ورزشیں بھی آپ کےلیے بے حد فائدہ مند ہوسکتی ہیں۔
دھوپ میں چہل قدمی
آپ قد بڑھانے کےلیے دھوپ میں صبح کے وقت چہل قدمی بھی کرسکتے ہیں جب کہ کھلے ماحول میں جاگنگ بھی کرسکتے ہیں۔

نیویارک(میڈیا نائن ٹو ڈاٹ ٹی وی) امریکا میں کی گئی ایک تحقیق میں کہا گیا ہے کہ روزانہ دانت صاف نہ کرنے والے افراد میں غذا کی نالی کا کینسر ہونے کے امکانات بڑھ جاتے ہیں۔دانتوں کے امراض سے متعلق یہ تحقیق امریکا میں ایک لاکھ 22 ہزار افراد پر کی گئی جسے کینسر ریسرچ نامی جریدے نے شائع کیا ہے جس میں کہا گیا ہے کہ روزانہ دانت صاف نہ کرنے کا عمل جہاں دانتوں کے امراض کا سبب بنتا ہے وہیں دانتوں میں موجود بیکٹیریا کے باعث غذا کی نالی کا سرطان (کینسر) لاحق ہونے کے امکانات میں 21 فیصد تک اضافہ ہوجاتا ہے۔
تحقیق کے مطابق ان افراد کے مشاہدے سے معلوم ہوا ہے کہ دانتوں کے امراض کا غذا کی نالی سے گہرا تعلق ہے، دانتوں میں موجود بیکٹیریا غذا کی نالی پر منفی اثرات مرتب کرتے ہیں اور یہ بیکٹیریا کینسر کا موجب بن سکتے ہیں۔ دانتوں کے مرض کا باعث بننے والے دو قسم کے بیکٹیریا کی وجہ سے حلق سے معدے تک موجود غذا کی نالی کا کینسر لاحق ہونے کے وسیع خطرات ہیں۔
تحقیق میں شریک نیویارک یونیورسٹی اسکول آف میڈیسن کے ایسوسی ایٹ پروفیسر جیونگ آہن کا کہنا ہے کہ غذا کی نالی کا کینسر عام طور پر لاحق ہونے والے کینسر میں آٹھویں نمبر پر ہے جب کہ اس سے ہونے والی ہلاکتیں کینسر سے ہونے والی ہلاکتوں میں چھٹے نمبر پر ہیں کیوں کہ غذا کی نالی کے کینسر کی اس وقت تک تشخیص نہیں ہوتی جب تک وہ اپنے آخری اسٹیج پر نہ پہنچ جائے۔
پروفیسر جیونگ نے مزید بتایا کہ دنیا بھر میں 5 برس میں اس مرض کا شکار ہوکر بچ جانے والے افراد کی تعداد صرف 15 تا 25 فیصد ہے۔ اس مرض کا شکار بقیہ افراد اپنی جانوں سے ہاتھ دھو بیٹھے ہیں۔ غذا کی نالی کا کینسر انتہائی جان لیوا مرض ہے جسے فوری تشخیص کرنے اور مرض کو مزید بڑھنے سے روکنے کےلیے فوری علاج کی ضرورت ہے۔

میونخ(میڈیا نائن ٹو ڈاٹ ٹی وی) ایک نارمل شخص دن میں 8 سے 10 گلاس پانی پیتا ہے لیکن دنیا میں ایسا منفرد شخص بھی ہے جسے زندہ رہنے کے لیے کم از کم 20 لیٹر پانی پینا ضروری ہے ورنہ اس کے جان کے لالے پڑسکتے ہیں۔
جرمنی سے تعلق رکھنے والے 35 سالہ مارک وبین ہورسٹ اگر دن میں تقریباً 20 لیٹر پانی نہ پیے تو اس کی جان کو شدید خطرات لاحق ہوجاتے ہیں۔ مارک نامی شخص میٹابولک(نظام ہضم میں کیمیائی تبدیلی) کی بیماری ’’ڈائبیٹس انسائپیڈس‘‘ کا شکار ہے اس بیماری میں کثرت سے پیشاب آتا ہے جو کہ شدید پیاس اور ڈی ہائیڈریشن کی وجہ بنتا ہے۔
اگر مارک چند گھنٹوں کے لیے پانی نہ پیئے تو اس کا بدن خشک ہونے لگتا ہے اور ایسا محسوس ہوتا ہے کہ اگلے ہی لمحے اس کی موت واقع ہوجائے گی۔ پانی پینے میں دو گھنٹے کا وقفہ بھی مارک کے لیے جان لیوا ثابت ہوسکتا ہے کہ کیونکہ ڈی ہائیڈریشن کی وجہ سے اس کے ہونٹ سوکھنے لگتے ہیں اور سر چکرانے کے ساتھ ساتھ بے چینی ہونے لگتی ہے۔
یہ ایک کمیاب بیماری ہے جو عمر کی کسی بھی حصے پر حملہ آور ہوسکتی ہے۔ تاہم مارک نے جب سے ہوش سنبھالا ہے وہ اس مرض کے شکار ہیں اور کبھی بھی ان کی پیاس ختم نہیں ہوتی۔
اپنی نوعیت کے اس منفرد شخص کا کہنا ہے کہ وہ رات میں کبھی 2 گھنٹے سے زائد مسلسل نہیں سوپاتا ہے اور تھوڑے تھوڑے وقفے کے بعد اٹھ کر پانی پیتا ہے یہاں تک کے بیماری کے ابتدائی دنوں میں پانی کی شدید طلب کے پیشِ نظر پانی کی بوتلیں اپنے کمرے میں رکھتا تھا اور ایک رات میں کم سے کم 50 بار بیت الخلا جاتا تھا۔

(میڈیا نائن ٹو ڈاٹ ٹی وی)اکثرافراد سردیوں کے موسم میں وزن بڑھنے کی شکایت کرتے ہیں اوراس کا ذمہ داراپنی خوش خوراکی کوقراردیتے ہیں لیکن زیادہ کھانا ہی موٹاپے کی وجہ نہیں درحقیقت دیگرکئی عوامل موسم سرما میں ہمارا وزن بڑھنے کی وجہ بنتے ہیں۔
سردیوں میں گھرمیں زیادہ رہنا
سردی کے موسم میں زیادہ ٹھنڈ کے باعث ہر انسان کی کوشش ہوتی ہے کہ باہر جانے کے بجائے گھر میں زیادہ سے زیادہ رہے۔ گھر میں زیادہ وقت گزارنے سے انسان ورزش سے بھی دور رہتا ہے جب کہ اسے دھوپ بھی نہیں ملتی۔
لمبی راتیں
سردیوں کے دن چھوٹے اور راتیں لمبی ہوتی ہیں، جس کے باعث انسان زیادہ سوتا اور آرام پسند ہوجاتا ہے جس کے باعث ’باڈی سائیکل‘ بھی سست روی کا شکار ہوجاتی ہے جو وزن میں اضافہ کا باعث بنتا ہے۔
سردی میں اچھا کھانا
سردیوں کے موسم میں انسان اچھا کھانا پسند کرتا ہے۔ زیادہ موسمی پھل اور مختلف کھانے آپ کے جسم کو بہت زیادہ موٹا بنا دیتے ہیں۔
میٹابولزم کا بڑھنا
میٹابولزم کا بڑھنا صحت کے لیے اچھا عمل ہے لیکن اس عمل کا ایک دم اضافہ وزن بڑھنے کا بھی باعث بنتا ہے۔ ایک تحقیق کے مطابق جب ہمارے جسم کی کیلیریز یکا یک کم ہوتی ہیں تو ہمیں بھوک بھی بہت لگتی ہے اور ہم زیادہ کھاتے ہیں جس سے موٹاپے کا شکارہوجاتے ہیں۔
موسمی تبدیلی
موسم میں تبدیلی انسان کی صحت کو بہت زیادہ متاثرکرتی ہے، کچھ تو اس حد تک متاثر ہوجاتے ہیں کہ ڈپریشن کا شکار ہوجاتے ہیں، خود کو موسمیاتی تبدیلیوں سے بچانے کے لیے لوگ گھروں میں قید ہوجاتے ہیں جس کے باعث وہ موٹاپے کا شکار ہوجاتے ہیں۔
سردیوں میں میٹھا کھانا
جس طرح سردی کے موسم میں اچھا کھانے کا دل چاہتا ہے بالکل اسی طرح ٹھنڈ کے موسم میں میٹھا کھانے کو بھی دل چاہتا ہے اور جسم کو ضرورت سے زیادہ مٹھاس ملے تو موٹاپا بہت جلدی آپ کو آگھیرتا ہے۔

لندن(میڈیا نائن ٹو ڈاٹ ٹی وی) گوشت کے مسلسل استعمال سے آپ کی صحت کا توازن خراب ہوسکتا ہے مگر ان کے مقابلے میں سبزی خور افراد طویل عمر پاتے ہیں جب کہ پھلیاں سبزیوں میں نمایاں مقام رکھتی ہیں ان کے فوائد پڑھ کر آپ بھی پھلیاں کھانے پر مجبور ہوجائیں گے۔
پروٹین کا خزانہ
اگر آپ کسی طرح پروٹین کی کمی کے شکار ہیں تو پھلیاں (بینز) اس کا بہترین علاج ہیں، ان میں موجود امائنو ایسڈ جسم میں پروٹین بناتا ہے، پروٹین کو بھی دو اقسام میں بیان کیا جاتا ہے یعنی مکمل اور نامکمل پروٹین، سویا، حیوانی گوشت اور دودھ وغیرہ میں مکمل پروٹین پایا جاتا ہے جس میں تمام 9 اقسام کے امائنو ایسڈ پائے جاتے ہیں جبکہ سویابین میں تمام نو اقسام کے امائنو ایسڈز موجود ہوتے ہیں۔
اسی طرح اناج، ڈیری مصنوعات، خشک میووں وغیرہ کا استعمال کرکے آپ تمام امائنو ایسڈز کی کمی پوری کرسکتے ہیں، دن میں ایک مرتبہ مکمل پروٹین کی غذا ضرور کھانی چاہیے اگر آپ چاول کے ساتھ لوبیا یا پھرسیاہ لوبیا اور شام میں بادام اور پنیر کھائیں گے تو آپ کی روزمرہ مکمل پروٹین کی ضرورت پوری ہوجائے گی۔
غذائیت سے بھرپور
پھلیوں میں فولیٹ نامی مرکب موجود ہوتا ہے جو ماں کے پیٹ میں بچے کے اعصابی نظام کی تشکیل کرتا ہے اگر ماں فولیٹ نہ کھائے تو اس سے بچے کی اعصابی نشوونما متاثرہوتی ہے، خشک پھلیوں میں فولیٹ کی مقدار زیادہ ہوتی ہے اس اہم شے کی کمی سے کمزوری، دل کی دھڑکن، بھوک کی کمی اور دیگر کیفیات جنم لیتی ہیں، پھلیوں میں پولی فینولز جیسے طاقتور اینٹی آکسیڈنٹس بھی پائے جاتے ہیں اور یوں کئی امراض سے محفوظ رکھتے ہیں۔
پھلیاں اور دل کی صحت
یہ بات ثابت ہوچکی ہے کہ لوبیا کھانے والے افراد دل کے امراض کے شکار کم ہی ہوتے ہیں اس کی اہم وجہ یہ ہے کہ لوبیا اور دیگر پھلیاں کھانے سے کولیسٹرول قابو میں رہتا ہے علاوہ ازیں یہ دل کی رگوں کی حفاظت بھی کرتی ہیں۔
کینسر کو بھگائے
ہم جانتے ہیں کہ اینٹی آکسیڈنٹس بدن میں سوزش و جلن کم کرتے ہیں، ماہرین اب تک متفق ہیں کہ جسمانی اندرونی جلن اور سوزش اور کینسر کے درمیان ایک تعلق پایا جاتا ہے، قبل ازیں 2015 میں ماہرین نے ایک سروے میں انکشاف کیا تھا کہ سیاہ لوبیا آنتوں اور معدے کے کینسر سے بچاتی ہیں کیونکہ یہ اینٹی آکسیڈنٹس سے بھرپور ہوتی ہیں۔
ذیابیطس سے بچائے
پھلیوں میں ریشہ یعنی فائبر کی زبردست مقدار موجود ہوتی ہے جو خون میں گلوکوز کی مقدار کنٹرول کرتی ہے، ماہرین نے یہ بھی کہا ہے کہ لوبیا انسانی لبلبے کی کارکردگی بہتر بنا کر ذیابیطس کو روکتی ہے۔
جگر کی چربی کو روکے
دنیا بھر کی طرح پاکستانیوں کی اکثریت جگر کی چربی (فیٹی لیور) میں مبتلا ہے، سال 2016ء میں کی گئی ایک تحقیق سے ثابت ہوا ہے کہ ایک طرح کی لوبیا جگر میں چربی جمع ہونے سے روکتی ہے اور یہ بات چوہوں پر تجربات سے ثابت ہوچکی ہے، ماہرین کے مطابق جگر پر چربی کی زیادتی کئی طرح کے مسائل کی وجہ بنتی ہے۔
بھوک اور ہاضمے کے لیے بہترین
اگر آپ کو بار بار بھوک لگتی ہے اور آپ موٹاپے کی جانب مائل ہیں تو لوبیا اور پھلیاں اس کا بہترین علاج ہیں،اس کے لیے کوشش کریں کہ ہر طرح کی پھلیاں کھائی جائیں کیوں کہ پھلیاں آنتوں میں مفید بیکٹیریا کو پروان چڑھا کر نظامِ ہضم کو مجموعی طور پر بہتر بناتی ہیں۔

(میڈیا نائن ٹو ڈاٹ ٹی وی)لڑکیاں اورخواتین جب کسی تقریب سے واپس آتی ہیں تو شاید سب سے مشکل کام انہیں اپنے چہرے سے میک اپ صاف کرنا لگتا ہے اوروہ سُستی کے باعث میک اپ صاف کیے بنا ہی سوجاتی ہیں کیونکہ انہیں اندازہ ہی نہیں کہ میک اپ صاف کیے بنا سونا ان کے لیے کتنا نقصان دہ ثابت ہوسکتا ہے۔
آنکھوں کا انفیکشن
آنکھوں کا میک اپ نکھار میں اہمیت کا حامل ہوتا ہے، تاہم کسی بھی تقریب سے واپسی پر جب آنکھوں پر لگا مسکارا یا دیگر میک اپ نہ ہٹایا جائے تو آنکھیں پہلے لال ہوسکتی ہیں بلکہ خطرناک انفیکشن کا بھی خطرہ ہوتا ہے جو صحیح ہونے میں بہت وقت لیتا ہے۔
چہرے پر نشان
رات سونے سے قبل میک اپ نہ ہٹانے سے آپ کا چہرہ کیل مہاسوں کا شکارہوسکتا ہے۔ رات بھر میک اپ چہرے پررہنے سے چہرے کے مسام متاثرہوں گے جس کے بعد ایسے کیل مہاسے نکل آئیں گے جو بہت مشکل سے جائیں گے۔
چہرے پردانے
میک اپ نہ ہٹانے سے آپ کے صاف ستھرے چہرے پردانے نکل سکتے ہیں جو بعض اوقات چہرے کا انفیکشن بھی بن جاتے ہیں۔
سوکھے ہونٹ
خواتین اور لڑکیاں چاہتی ہیں کہ تقریبات کی واپسی تک ان کی لپ اسٹک کا رنگ اور چمک ماند نہ پڑے تاہم رات بھرلپ اسٹک لگے رہنے سے ہونٹ بہت زیادہ خشک ہوجاتے ہیں جس سے ہونٹوں کا موائسچر ختم ہوجاتا ہے۔
خراب جلد
میک اپ نہ ہٹانے سے کیل مہاسوں اور دانوں کے بعد آپ کی جلد بہت زیادہ خشک اور روکھی ہونے کے ساتھ ساتھ کھچاؤ کا شکار بھی ہوجاتی ہے۔