Category صحت

لاہور (میڈیا نائن ٹو ڈاٹ ٹی وی )کہا جاتا ہے کہ دنیا کا سب سے بہترین کینو پاکستان میں ملتا ہے اور یہ ایسا غلط بھی نہیں۔مالٹے کی اس قسم کا ذائقہ لوگوں کے دلوں کو خوب بھاتا ہے جب ہی تو ہر سال یہ اس موسم میں سب سے زیادہ فروخت ہونے والا پھل ہے جبکہ برآمد بھی کیا جاتا ہے۔کینو کا ترش ذائقہ کیلوریز میں کم مگر غذائی اجزاء سے بھرپور ہوتا ہے جبکہ اس میں موجود وٹامنز اسے بہترین پھل بناتا ہے۔یہاں ذیل میں اس کے فوائد بتائے جارہے ہیں۔
جلد اور بالوں کے لیے مفید
وٹامن سی کی مناسب مقدار جسم کے دفاعی نظام کو ہی مضبوط نہیں کرتی بلکہ ایک پروٹین کولیگن کی مقدار مستحکم رکھنے میں بھی مدد دیتی ہے جو بالوں اور جلد کے لیے بہت ضروری ہے۔ کینو وٹامن سی سے بھرپور ہوتا ہے جبکہ اس میں وٹامن اے بھی پایا جاتا ہے جو بالوں کی نمی برقرار رکھنے میں مدد دیتا ہے۔
دماغی افعال بہتر بنائے
کینو میں موجود مختلف اجزاء جیسے پوٹاشیم، وٹامن بی 9 اور اینٹی آکسائیڈنٹس دماغ کے لیے فائدہ مند مانے جاتے ہیں؛ پوٹاشیم دماغ کی جانب دورانِ خون بڑھانے اور اعصابی سرگرمیاں بڑھانے کے حوالے سے توجہ مرکوز کرنے کے لیے ضروری ہے، وٹامن بی 9 عمر بڑھنے سے آنے والی دماغی تنزلی کی روک تھام کرکے الزائمر امراض سے بچاتا ہے، اس کے علاوہ کینو میں موجود وٹامن بی 6 متلی اور ڈپریشن سے بچاتا ہے۔
حاملہ خواتین کے لیے فائدہ مند
اس میں موجود بی وٹامنز اور فولک ایسڈ دوران حمل فائدہ مند ثابت ہوتے ہیں، فولک ایسڈ کی کمی بچوں کے پیدائشی وزن میں کمی کا باعث بنتی ہے۔
خون کی شریانوں کی صحت کے لیے معاون
وٹامن بی 6، وٹامن سی، پوٹاشیم اور فائبر دل کی صحت کو بہتر بناتے ہیں، ایک تحقیق کے مطابق جو لوگ پوٹاشیم سے بھرپور غذا کھاتے ہیں، ان میں خون کی شریانوں کے مسائل جیسے امراض قلب یا فالج وغیرہ سے موت کا خطرہ 49 فیصد تک کم ہوجاتا ہے۔
معدے کو مضبوط بنائے
کینو، فائبر کے حصول کا بہترین ذریعہ ہیں، فائبر معدے کی صحت کے لیے بہت ضروری جز ہے جو کہ قبض، بدہضمی اور دیگر مسائل کی روک تھام کرتا ہے۔
بلڈ پریشر کو صحت مند رکھے
اس پھل میں موجود پوٹاشیم اور نمکیات کی کم سطح خون کی شریانوں کو پھیلاتی ہے اور بلڈ پریشر کو معمول کی سطح پر رکھتی ہے۔
موسمی امراض سے لڑے
اس پھل میں موجود وٹامن سی جسمانی دفاعی نظام کو بہتر کرتا ہے جو کہ موسمی بیماریوں یا انفیکشن وغیرہ کے خلاف مزاحمت کرتا ہے جبکہ کینسر کا باعث بننے والے فری ریڈیکلز کو بھی کم کرتا ہے۔

کراچی(میڈیا نائن ٹو ڈاٹ ٹی وی) انسان کا مدافعتی نظام نقصان دہ اور بیمار کرنے والے جراثیم سے لڑنے کے لیے قدرتی ہتھیار ہے جوبیماریوں کو جسم پر حملہ آور نہیں ہونے دیتا تاہم مدافعتی نظام کی بھی ایک حد ہوتی ہے اور جب زیادہ طاقتور جراثیم انسان پر حملہ کرتے ہیں تو مدافعتی نظام کمزور پڑجاتا ہے اور انسان بیمار ہوجاتاہے اس صورت میں اینٹی بائیوٹک اور ویکسین لے کر مدافعتی نظام کو جراثیم کے خلاف لڑنے کے لیے پھر سے تیار کیاجاتا ہے۔
بعض اوقات دوائیاں اور ویکسین جہاں انسان کو فائدہ پہنچاتی ہیں وہیں نقصان بھی پہنچاتی ہیں لہٰذا یہاں قدرتی اجزا سے بھرپور مشروبات سے متعلق بتایا جارہا ہے کیونکہ قدرتی مشروبات میں ایسے کئی اجزا موجود ہوتے ہیں جن کے استعمال سے سردی، ٹھنڈ اور نزلے کے اثرات سے بچاجاسکتا ہے۔
سیب، گاجراور موسمی کا جوس:
یہ قدرتی مرکب کئی وٹامنز پر مشتمل ہوتا ہے۔ مثلاً وٹامن بی 6، وٹامن اے اور سی کے علاوہ پوٹاشیئم اور فولک ایسیڈ جو سردیوں سے متعلق امراض جیسے نزلہ، زکام اور فلو سے محفوظ رکھتے ہیں۔
گریپ فروٹ کاجوس:
کینو اور مالٹا کی فیملی سے تعلق رکھنے والا پھل گریپ فروٹ وٹامن سی کا اہم ترین جزو سمجھاجاتا ہے جو ٹھنڈ اور فلو کا مقابلہ کرتاہے۔ اس کے علاوہ یہ اینٹی آکسیڈنٹ میں بھی شمار کیا جاتا ہےجو جسم کو بیماریوں سے محفوظ رکھتے ہیں۔
ٹماٹر کاجوس:
عام طور پر سبزی کے طور پراستعمال ہونےو الا پھل ٹماٹر تقریباً تمام لوگوں کا پسندیدہ ہے۔ ٹماٹر کا جوس موسم سرما میں خاص فائدہ پہنچاتاہے کیونکہ یہ فولک ایسیڈ، فولاد اور وٹامن اے اور سی سے بھرپور ہوتا ہے۔ اس کے علاوہ یہ جسم کی قوت مدافعت کو مضبوط بناتاہے۔
ٹماٹر، سلاد کے پتوں اور بند گوبھی کا جوس:
ٹماٹر، سلاد کے پتوں اور بند گوبھی کے جوس میں کئی مفید عناصر موجود ہوتے ہیں جن میں میگنیشئم ، پوٹاشئیم، فولاد ، فیٹی ایسیڈ اور وٹامن سی شامل ہیں۔ یہ جوس مدافعتی نظام کو مضبوط بناتاہے اور اسے انفیکشنز جیسے امراض کے خلاف مزاحمت کرنے کے قابل بناتاہے۔
چقندر، گاجر، ادرک اور ہلدی کا جوس:
ان چاروں سبزیوں کا جوس سردیوں میں بے حد مفید ہےکیونکہ اس میں فولاد، کیلشئیم، فولک ایسیڈ، وٹامن سی اور ای ہوتے ہیں جو فلو، ٹھنڈ، کھانسی، جسم میں درد اور گٹھیا سے متعلق جوڑوں کے درد کوکم کرتا ہے۔
اسٹرابیری اور آم کاجوس:
اسٹرابیری کہنے کو تو چھوٹاساپھل ہے لیکن اس میں قدرت نے بےشمار فائدے چھپاکر رکھے ہیں جب کہ آم بھی بےشمار فائدوں کاحامل ہوتا ہے۔ ان دونوں پھلوں کا جوس بہترین اینٹی آکسیڈنٹ ہوتا ہے جو انفیکشنز کے خلاف مزاحمت کرتاہےاور فلو سے بچاتاہے۔
تربوز کا شربت:
تربوز کا شربت انسان کے مدافعتی نظام کو زیادہ اہلیت کے ساتھ کام کرنے میں معاون ثابت ہوتاہے۔ یہ پٹھوں کے درد میں کمی کرتاہے اور تھکن کے احساس کو روکتا ہے بالخصوص عمر رسیدہ افراد کو فلو سے بچاتاہے۔
کیوی، اسٹرابیری اور پودینے کا جوس:
کیوی، اسٹرابیری اور پودینے کا جوس میگنیشئیم ، زنک، فولک ایسیڈکے علاوہ وٹامن سی ، اے اور بی 6 سے بھرپور ہوتاہے اور مدافعتی نظام کو مضبوط بناتاہے۔
کدو کے بیجوں کا جوس:
کدو عام طور پر لوگوں کو زیادہ پسند نہیں ہوتا تاہم اس کے بیج بہت فائدے مند ہوتے ہیں۔ کدو کے بیجوں کا جوس مدافعتی نظام کونہ صرف بڑھاتا ہے بلکہ اس کے بہت سے طبی فوائد ہوتے ہیں، یہ ہڈیوں کو مضبوط بنانے کے ساتھ یورینری سسٹم کو بھی بہتربناتاہے۔
پالک، بند گوبھی اور سلاد کے پتوں کا جوس:
ان تینوں سبزیوں کے جوس میں فولاد کی بڑی مقدار پائی جاتی ہے جس سے مدافعتی نظام کو تقویت حاصل ہوتی ہے۔

کراچی(میڈیا نائن ٹو ڈاٹ ٹی وی) کہتے ہیں درخت لگانا کبھی نقصان کا سودا نہیں ہوتا بلکہ درخت لگانے سے انسان کو صرف فائدہ ہی حاصل ہوتا ہے۔ درخت شدید تپش اور دھوپ میں سایہ فراہم کرنے کے ساتھ میٹھے اور خوش ذائقہ پھل بھی فراہم کرتے ہیں تاہم وہ درخت جن سے پھل حاصل نہیں ہوتے یا جن سے حاصل ہونے والے پھلوں کو کھایا نہیں جاسکتا وہ بھی انسانوں کو فائدہ پہنچاتے ہیں۔
برصغیرمیں پیپل کے درخت کو بہت اہمیت حاصل ہے، ماضی میں مختلف جگہوں اورسڑکوں پر پیپل کے درخت نظرآنا عام بات تھی جب کہ گھروں میں بھی بے حد شوق سے یہ درخت لگایا جاتا تھا لیکن اب درخت لگانے کا رجحان کم ہوگیا ہے لوگ عالیشان گھروں میں حقیقی پودوں اور درختوں کے بجائے مصنوعی زیبائش والے پودے لگانا پسند کرتے ہیں تاہم ابھی بھی سڑکوں پرپیپل کے درخت نظرآجاتے ہیں جو سالوں سے اپنی جگہ پر قائم ہیں۔
اگرانسان درختوں کی اہمیت اور افادیت سے واقف ہوجائے تو روز ایک درخت لگائے۔ یہ سچ ہے کہ پیپل کے درخت سے انسانوں کو پھل حاصل نہیں ہوتے لیکن قدرت نے اس کے ہرحصے میں بےتحاشہ فوائد چھپارکھے ہیں۔ پیپل کے تنے، جڑوں اوربیجوں سے لے کراس کے ننھے پتوں میں بھی بے شمار فوائد چھپے ہیں۔
پیپل کے طبی فوائد:
سانس کی تکلیف، جلدی امراض، گردوں کے مسائل، قبض، خون سے متعلق مختلف بیماریوں اورسانپ کے کاٹنے میں پیپل کا درخت بہت فائدہ بخش ہے۔ خون کا بہاؤ روکنے کے لیے پیپل کے درخت کے تنے کا نرم حصہ لے کر اس میں دھنیے کے بیج اور مصری ہم وزن لے کر ملائیں اور اس مرکب کو 3 سے 4 ملی گرام دن میں دو بار کھائیں یہ مرکب بہت فائدے مند ہے۔
پیٹ میں درد کے لیے:
دو سے ڈھائی عدد پیپل کے پتے لیں اور اس کا پیسٹ بنالیں پھر اس میں 50 گرام گجک(مونگ پھلی اور گڑ)کے ساتھ ملاکر چھوٹی گھولیاں بنالیں اور دن میں 3 سے 4 بار یہ گولیاں کھائیں۔ یہ پیٹ کے درد میں آرام دلانے کے لیے بے حد موثر دوا ہے۔
کھانسی اور دمہ کے لیے:
کھانسی اور سینے میں تکلیف کے مختلف امراض، جلد کے جل جانے اورالٹی کے لیے بھی پیپل کے پھل بہت فائدے مند ہیں۔ دمہ یا استھما کے مرض میں مبتلا افراد پیپل کے درخت کے تنے کی چھال اورپھل ہم وزن لے کران کا الگ الگ سفوف بنالیں بعد ازاں اس سفوف کو ملالیں اور 2 سے 3 گرام سفوف کو دن میں2 بار پانی کے ساتھ کھائیں۔
سانپ کے کاٹنے میں فائدہ مند:
دو چمچ پیپل کے پتوں کا رس لے کرمریض کو جس جگہ سانپ نے کاٹا ہو وہاں 3 سے 4 بار لگائیں یہ رس زہر کا اثر کم کرنے میں بہت موثر ہے۔
جلدی امراض کے لیے:
جلدی امراض، جلد پرابھرنے والے ننھے دانوں اورخارش میں مبتلا افراد پیپل کے نرم پتوں کی 40 ملی لیٹرچائے بنا کر پئیں یہ چائے جلدی امراض میں بے حد فائدے مند ہے۔
ایڑیوں کا پھٹنا:
ٹھنڈ اورسرد موسم سے سب سے پہلے انسانی جسم متاثرہوتا ہے اور ہاتھوں، پیروں کی جلد کے علاوہ ایڑیاں بھی پھٹ جاتی ہیں جن میں شدید تکلف ہوتی ہے۔ بعض اوقات پھٹی ایڑیوں سے خون بھی رستا ہے۔ تاہم پیپل کے پتے پھٹی ایڑیوں میں بہت فائدے مند ہیں۔ پیپل کے نرم پتوں کا رس لے کر پھٹی ایڑیوں اور سردی سے متاثرہ ہاتھوں پرلگائیں یہ جلد سے سردی کا اثر ختم کرنے کے ساتھ ایڑیوں کو نرم ملائم بناتا ہے۔
بخار کے لیے:
بخارمیں آرام کے لیے پیپل کے چند پتے لیں اورانہیں دودھ میں ابال لیں اب اس میں چینی ملا کر اس مرکب کو دن میں دوبار پئیں یہ مرکب بخار کے لیے بےحد فائدے مند ہے۔
دانتوں میں درد کے لیے:
دانتوں کا درد انسانی برداشت سے باہر ہوتا ہے لوگ دانتوں کے درد میں آرام کے لئے ڈاکٹر سے رجوع کرنے کے ساتھ مختلف ٹوٹکے استعمال کرتے ہیں تاہم پیپل کے درخت اوربرگد کے درخت کے تنے کی چھال ہم وزن لے کرانہیں آپس میں ملالیں اوراسے پانی میں ابال لیں اب اس پانی سے کلی کریں۔ یہ نسخہ دانتوں میں درد کے لیے بے حد فائدے مند ہے۔

مشی گن(میڈیا نائن ٹو ڈاٹ ٹی وی) ماہرین نے کہا ہے کہ غذا میں دارچینی کا استعمال بڑھادیں کیونکہ اس کے بہت سے حیرت انگیز فوائد ہیں۔ ایک جانب یہ ذیابیطس کے مرض سے بچاتی ہے تو دوسری جانب جسم ک اضافی چربی گھلانے میں بھی اہم کردار ادا کرتی ہے۔
یونیورسٹی آف مشی گن میں واقع لائف سائنسس انسٹی ٹیوٹ (ایل ایس آئی) کے سائنسداں جُن وو اور ان کے ساتھیوں نے دارچینی میں موجود ایک مرکب سینامیلڈیہائیڈ کو چربی کے خلیات (فیٹ سیلز) پر آزمایا ہے۔ اس کے بعد انہوں نے یہ مرکب موٹے چوہوں پر بھی آزمایا اور بتایا ہے کہ اس سے چکنائی والے خلیات تیزی سے ختم ہوسکتے ہیں۔
ماہرین نے نے بتایا ہے کہ دارچینی میں موجود مرکب سینامیلڈیہائیڈ براہِ راست چکنائی پر اثر ڈال کر اسے گھلاتا ہے اور یہ عمل ’’تھرموجنیسس‘‘ کہلاتا ہے۔ اس طرح جسم میں جمع ہونے والی چکنائی کا مؤثر حل سامنے آیا ہے۔ تحقیقی ٹیم کے مطابق دارچینی انسانی جسم کے اندر تھرموجنیسس کا عمل شروع کردیتی ہے۔ دارچینی کئی طرح کے جین اور اینزائم کوسرگرم کرتی ہے جو فربہ بنانے والی چربی کم کرتے ہیں۔
دارچینی کے بارے میں یہ ماہر کہتے ہیں کہ چربی کم کرنے میں یہ گھریلو مصالحہ کسی بھی دوا سے کم نہیں اور جلد ہی اسے موٹاپے کے خلاف بطور دوا استعمال کیا جائے گا۔ تاہم انہوں نے خبردار کیا ہے کہ دارچینی کا ضرورت سے زیادہ استعمال کسی دیگر مسئلے کی وجہ بن سکتا ہے اور اس ضمن میں مزید تحقیق کی ضرورت ہے۔
واضح رہے کہ 2002 میں پاکستانی شہر پشاور میں ہونے والی ایک تحقیق سے پہلے ہی یہ ثابت ہوچکا تھا کہ دارچینی ٹائپ ٹو ذیابیطس کم کرنے میں لاجواب ثابت ہوتی ہے اور اگر روزانہ کھانے کے ساتھ صرف آدھا چمچہ دار چینی شامل کرلی جائے تو اس سے ذیابیطس کو قابو میں رکھا جاسکتا ہے۔

لاہور (ایم نائن ٹو ڈاٹ ٹی وی )موسم بہت تیزی سے سرد ہورہا ہے اور اس تبدیلی کے جسم اور ذہن پر کچھ غیر متوقع اثرات مرتب ہوتے ہیں۔ جی ہاں واقعی موسم بدلنے سے ہمارے جسم اور ذہن میں بھی متعدد تبدیلیاں آتی ہیں اور طبی ماہرین بھی اس بات کی تصدیق کرتے ہیں۔ان تبدیلیوں کو مدنظر رکھنا سارا سال صحت مند رہنے کے لیے بہت ضروری ہوتا ہے۔یہاں آپ موسم سرد ہونے سے جسم پر مرتب ہونے والے اثرات کے بارے میں جان سکیں گے جن میں کچھ آپ کو حیران کردیں گے۔
موٹاپے سے نجات پانا آسان ہوتا ہے

جی ہاں واقعی سرد موسم کا یہ بہت بڑا فائدہ ہے اور طبی تحقیقی رپورٹس کے مطابق جب موسم سرد ہوتا ہے تو ہمارا جسم زیادہ کیلوریز جلانے لگتا ہے تاکہ جسم کو گرم رکھا جاسکے، ویسے یہ اتنا بڑا فرق نہیں جو مکمل طور پر موٹاپے سے نجات دلا سکے تاہم اس کے ساتھ ورزش یا دیگر طریقوں کو اپنا کر اضافی چربی کو کافی حد تک کم کیا جاسکتا ہے۔
انگلیاں ‘سکڑ جاتی ہیں

کیا آپ نے کبھی نوٹس کیا ہے کہ سرد موسم میں آپ کی انگلی میں انگوٹھی ڈھیلی ہوجاتی ہے؟ یہ آپ کا تخیل نہیں، درحقیقت ہاتھوں اور پیروں کی انگلیوں کی ہڈیاں گرم موسم میں پھول جاتی ہیں اور سردیوں میں یہ عمل الٹا ہوجاتا ہے، جس کے نتیجے میں وہ ‘سکڑ جاتی ہیں۔ اس طرح جسم اپنے جسمانی حرارت کو محفوظ رکھنے کی کوشش کرتا ہے اور بنیادی درجہ حرارت برقرار رکھتا ہے۔
ہڈیوں کا درد

کچھ افراد کو سردیوں میں کچھ ہڈیوں میں تکلیف کا زیادہ سامنا ہوتا ہے جس کی وجہ سرد موسم میں سامنے آنے والا جسمانی ردعمل ہوتا ہے، عام طور پر یہ ہاتھوں، پیروں اور کانوں میں ہوتا ہے، جس کی وجہ وہاں موجود خون کی چھوٹی شریانوں میں خون کی سپلائی بہت زیادہ بڑھ جانا ہوتا ہے، یہ خطرناک تو نہیں ہوتا مگر تکلیف دہ ضرور ثابت ہوتا ہے۔ اس سے بچنے کے لیے مناسب گرم ملبوسات اور باہر زیادہ دیر تک رہنے سے گریز کرنا چاہیے۔
بینائی متاثر ہوسکتی ہے

زیادہ سرد درجہ حرارت، سر ہوا اور برفباری وغیرہ بینائی پر اثرات مرتب کرسکتے ہیں، ایسے علاقے جہاں برفباری ہوتی ہے وہاں لوگوں کے لیے ضروری ہے کہ سن گلاسز کا استعمال ضرور کریں۔
چہرہ سرخ ہوجانا

اگر سردی سے ناک یا گال سرخ ہوگئے ہیں، تو اس کی وجہ یہ ہوتی ہے کہ ان حصوں کا خون زیادہ اہم اعضاءجیسے دل یا پھیپھڑوں کی جانب منتقل ہورہا ہوتا ہے، جب آپ گرم موسم میں آتے ہیں اور خون کی گردش معمول پر آجاتی ہے تو اس کا نتیجہ چہرے کے کچھ حصوں ٹماٹر کی طرح سرخ ہونے کی صورت میں نکلتا ہے۔
ہارٹ اٹیک کا زیاہ خطرہ

بزرگ افراد کے لیے اس موسم میں دل کے دورے کا خطرہ بڑھ جاتا ہے خاص طور پر جو پہلے ہی امراض قلب کا شکار ہوں۔ ایک تحقیق کے مطابق جب جسم درجہ حرارت محفوظ رکھنے کی کوشش کرتا ہے تو دل پر دباؤ بڑھ جاتا ہے، وہ خون پمپ کرنے کے لیے زیادہ کام کرنے لگتا ہے جس سے بلڈ پریشر کچھ حد تک بڑھ جاتا ہے۔
مزاج پر اتار چڑھاؤ

جب درجہ حرارت کم ہوتا ہے تو اس کے اثرات مزاج پر منفی طریقے سے اثرانداز ہوتے ہیں جس کی وجہ سورج کی روشنی کے کم وقت کی وجہ سے وٹامن ڈی کی کمی آنا ہوتا ہے، اس کی شدت کا انحصار موسمی شدت پر ہوتا ہے۔

نیویارک(میڈیا نائن ٹو ڈاٹ ٹی وی) امریکا میں ایک طبی تحقیق میں کہا گیا ہے کہ معمر افراد کےلیے کمپیوٹر گیم کھیلنا مفید ہے کیونکہ ویڈیو گیم کھیلنے والے افراد کو یادداشت کمزور ہونے والا مرض ڈیمنشیا لاحق ہونے کے امکانات 29 فیصد تک کم ہوجاتے ہیں۔خبر رساں ادارے اے ایف پی کے مطابق یہ طویل ترین تحقیق 10 برس کے عرصے پر محیط ہے جسے امریکی ادارے یو ایس نیشنل انسٹی ٹیوٹ آف ہیلتھ کے زیر اہتمام مکمل کیا جارہا ہے۔ اس تحقیق میں 74 سال کی اوسط عمر کے 2800 سے زائد معمر افراد کو کمپیوٹر پر ذہنی سطح کو جانچنے اور بصری قوت کو بہتر بنانے والے ایک مخصوص تربیتی پروگرام ’’ ڈبل ڈیسیشن‘‘ کا استعمال کرایا گیا جو ایک کمپیوٹر گیم ہی کی طرح ہے۔
اس تحقیق کے ابتدائی نتائج ماہرین کےلیے حوصلہ افزا ثابت ہوئے ہیں تاہم وہ اس بات کی آخری حد تک تصدیق کرنا چاہتے ہیں۔ تحقیق میں کہا گیا ہے کہ وہ معمر افراد جو کمپیوٹر پر ٹریننگ پروگرام یا مختلف گیمز کھیلنے کی پریکٹس میں رہتے ہیں، ان میں یادداشت بھولنے کا مرض ’’ڈیمنشیا‘‘ لاحق ہونے کے خطرات 29 فیصد تک کم ہوجاتے ہیں۔
اس تربیتی پروگرام کے ذریعے کسی بھی شخص کی اسکرین کے درمیان میں حرکت کرتی ہوئی اشیا کو دیکھنے کی صلاحیت کو جانچا جاتا ہے جیسا کہ ریسنگ گیمز جن میں ایک کار مسلسل حرکت میں ہوتی ہے۔ پروگرام میں اشیا تلاش کرنے کا مرحلہ بھی موجود ہے جس کے استعمال کے دوران ہر مرحلے پر اس میں تیزی آتی جاتی ہے اور یہ مزید مشکل ہوتا جاتا ہے۔ اس طریقے کے باعث دماغی صلاحیتیں بڑھانے کی مشقوں میں تبدیلی آئے گی۔ ساتھ ہی دماغی صلاحیت جانچنے کے طور طریقوں، فیصلے کرنے، سوچ اور یادداشت میں بھی تبدیلی ظاہر ہوگی۔
اس تحقیق کے دوران 2800 سے زائد افراد کو چار گروپوں میں تقسیم کیا گیا۔ پہلے گروپ نے کمپیوٹر ٹریننگ پروگرام کا استعمال کیا، دوسرے نے روایتی دماغی مشقوں کا سہارا لیا، تیسرے گروپ نے بھی اسی طرح مختلف مشقیں کریں اور چوتھے گروپ سے کوئی مشق نہ کرائی گئی۔ پہلے گروپ کے افراد نے پہلے 5 ہفتوں میں کم سے کم 10 گھنٹے تک کمپیوٹر پروگرام استعمال کیا جو ویڈیو گیم کی مانند ہے، اسی طرح اگلے تین برس تک اس کا دائرہ کار 18 گھنٹے تک بڑھا دیا گیا۔
اس ریسرچ کی قیادت کرنے والے یونیورسٹی آف ساؤتھ فلوریڈا کے محقق جیری ایڈورڈ کے مطابق کمپیوٹر پروگرام کی رفتار بڑھانے کے ساتھ ساتھ ڈیمنشیا کا مرض لاحق ہونے کے امکانات کم ہوتے ہیں، حتی کہ 10 برس کے دوران یہ مرض لاحق ہونے کے امکانات میں 29 فیصد تک کمی آئی بہ نسبت دوسرے طریقوں کے۔ مطالعے میں یہ بھی کہا گیا ہے کہ سیکھنے کا عمل اس طرح ہے جس طرح موٹر سائیکل چل رہی ہو، ایسی مہارت جس سے طویل عرصے تک سیکھنا ممکن نہ ہو اسے تبدیل کردینا چاہیے۔
اولڈ ایج سائیکاٹری یونیورسٹی کالج لندن کے پروفیسر راب ہورڈ نے بتایا کہ اس تحقیق کے نتائج کا اجراء اسی یونیورسٹی سے کیا گیا۔ 10 برس تک کئی ہفتوں میں محض چند گھنٹوں تک ویڈیو گیم کے استعمال کے حیران کن نتائج برآمد ہوئے ہیں، یہ طریقہ کار قابل قبول ہے تاہم ضرورت ہے کہ اس کے اثر کی مزید وضاحت کی جائے۔

لاہور(ایم نائن ٹو ڈاٹ ٹی وی ) نجی ٹی وی چینل پر میزبانی کے فرائض سرانجام دینے والی عائشہ جہانزیب نے کہا ہے کہ ماں کی بہتر صحت کیلئے بچے کی پیدائش کیلئے وقفہ بہت ضروری ہے ،معاشرے میں صحت مند رحجان کو اجاگر کرنے کیلئے مختلف سمینارز کا انعقاد ضروری ہے۔ انہوں نے ایک سیمینار کے دوران اظہار خیال کرتے ہوئے کہاکہ ماں کی صحت کیلئے بچوں کی پیدائش کے درمیان وقفہ ضروری ہے اس سے زچہ بچہ صحت مند رہتے ہیں۔انہوں نے کہا کہ شعور نہ ہونے کی وجہ سے لوگ اس پر عمل نہیں کرتے اور خاص طور پر دیہی علاقوں جہاں صحت کی صورتحال انتہائی ابتر ہوتی ہے وہاں پر اس وجہ سے زیادہ تر مائیں بچے کی پیدائش کے دوران انتقال کرجاتی ہیں اس طرح کی صورتحال سے نمٹنے کیلئے ضروری ہے کہ پاکستان چاروں صوبوں کے دیہی علاقوں میں صحت کی بہترین سہولتیں فراہم کرنے کے ساتھ آگاہی سیمینار منعقدہونے چاہئیں جس کے بڑے مثبت نتائج سامنے آئیں گے ۔

کراچی(میڈیا نائن ٹی ڈاٹ ٹی وی) کہتے ہیں کہ انسان کی پہلی نظر چہرے پر پڑتی ہے اور چہرے پر حسین مسکراہٹ ہی انسان کو حسین سے حسین تر بناتی ہے۔ مسکراہٹ کو حسین بنانے میں خوبصورت دانت ہی بنیادی کردار ادا کرتے ہیں لیکن لوگوں کی اکثریت دانتوں کو صاف اور دیگر بیماریوں سے بچانے میں ناکام رہتی ہیں۔ تاہم ایک گھریلو نسخے ایسا بھی ہے جس پرعمل کرکے دانتوں کو بغیر کسی دوا کا استعمال کیے، سفید اور چمکدار بنایا جاسکتا ہے۔
اجزاء
ہلدی: دو چائے کے چمچے
کھانے کا سوڈا: دو چائے کے چمچ
ناریل کا تیل: ڈیڑھ چمچ
طریقہ کار
ہلدی، کھانے کے سوڈے اور ناریل کے تیل کو آپس میں اچھی طرح ملا کر کسی بوتل میں محفوظ کرلیجیے۔ اسے 15 دن تک روزانہ دانت صاف کرنے کےلیے استعمال کیجئے۔ اس طرح آپ کے دانت موتیوں کی طرح سفید اور چمکدار ہوجائیں گے۔
نوٹ
اگر آپ اپنے دانتوں کو صحت مند دیکھنا چاہتے ہیں تو ضروری ہے کہ ان کی مناسب طریقے سے دیکھ بھال کیجیے۔ اس کے لئے ضروری ہے کہ باقاعدگی سے دن میں کم از کم دو مرتبہ دانتوں کو ٹوتھ برش یا انگلی کی مدد سے صاف کیا جائے۔ یہ عادت نہ صرف آپ کے دانتوں کو صحت مند بنائے گی بلکہ اس سے دانت سفید اور چمکدار بھی ہوجائیں گے۔

لاہور(میڈیا نائن ٹو ڈاٹ ٹی وی) پنجاب میں ذہنی امراض کی بڑھتی ہوئی شرح خطرناک حد سے تجاوز کرتی جارہی ہے۔36اضلاع میںذہنی مریضوں کےلئے صرف ایک سرکاری ہسپتال ہے۔ ذہنی مریضوں کی تعداد تیزی سے بڑھنے کے باوجود کوئی نیا ہسپتال قائم نہیں کیا گیا۔ پنجاب میں ذہنی مریضوں کےلئے واحد ہسپتال میں1333بیڈز کی گنجائش ہے۔2016ءمیں ذہنی امراض کے واحد ہسپتال کے بجٹ کو 52کروڑ25لاکھ روپے سے بڑھاکر71کروڑ4لاکھ کیا گیا مگر مریضوں کی تعداد کئی گنا تک بڑھنے کی وجہ سے سہولیات میں خاطر خواہ اضافہ نہیں ہوسکا۔ نجی سروے کے مطابق پاکستان میں30لاکھ سے زائد افراد ذہنی امراض میں مبتلا ہیں۔ پنجاب میں ذہنی امراض کے واحد ہسپتال میں زیر علاج مریضوں کی تعداد1لاکھ82ہزار752ہے جن میں 1لاکھ20ہزار528مرد 62ہزار224خواتین شامل ہیں۔ لاہو ر میں ذہنی امراض کے ہسپتال میں داخل ہونے والے مریضوں کی تعداد3ہزار424جبکہ بیڈز کی تعداد1ہزار333ہے۔ آﺅٹ ڈور معائنہ کےلئے آنےوالے نئے مریضوں کی تعداد81ہزار284اور پرانے مریضوں کی تعداد98ہزار44ہے۔ مریضوں کے مقابلے میں معالج کی پنجاب انسٹیٹیوٹ آف مینٹل ہیلتھ کا سٹاف بھی انتہائی کم ہے۔

لاہور(میڈیا نائن ٹو ڈاٹ ٹی وی) محکمہ صحت کی جانب سے آئندہ سال سے تمام سرکاری ہسپتالوں میں مفت تشخیصی ٹیسٹ کی سہولت ختم کردی جائےگی اس تناظر میں ریڈیویالوجی ڈیپارٹمنٹس اور لیبارٹریز نجی کمپنیوں کو ٹھیکہ پر دینے کا اصولی فیصلہ کرلیا گیا ہے۔ باوثوق ذرائع نے مزید بتایا ہے کہ سرکاری ہسپتالوں میں بھاری بھر کم مالی امور اور اخراجات کو”سلف انکم سورسز“ بڑھانے کی پالیسی کے تحت ریڈیالوجی ڈیپارٹمنٹس اور لیبارٹریز نجی کمپنیوں کو ٹھیکہ پر دی جارہی ہیں۔ اس سلسلے میں محکمہ صحت نے تمام امور کو حتمی شکل دیدی ہے۔ محکمہ کے ذرائع کے مطابق اس تناظر میں آئندہ سال2018ءمارچ میں تمام ہسپتالوں کے دونوں شعبہ جات باقاعدہ طور پر نجی کمپنیوں کے سپرد کردئیے جائیں گے۔دوسری جانب محکمہ صحت اور وزارت صحت کے حکام نے ریڈیالوجی ڈیپارٹمنٹس اور لیبارٹریز کو نجی کمپنیوں کو دینے کے حوالے سے چپ سادھ لی ہے اور سرکاری ہسپتالوں سمیت دیگر ڈیپارٹمنٹس کی نجکاری کے عمل کو بے بنیاد افواہ قراردیاہے۔