Category صحت

اسلام آباد(ایم نائن ٹو ڈاٹ ٹی وی)گلے کی خرابی ایک ایسی تکلیف ہے جس کا شکار سردیوں کے موسم میں تقریباََ ہر شخص ہو جاتا ہے۔ اور بعض افراد تو ایسے بھی ہوتے ہیں جو گرمیوں میں بھی گلا خرابی کا شکار رہتے ہیں۔ گلا خرابی کا باعث حساس تھائیرائیڈز گلینڈ ہوتے ہیں جن میں ذرا سی ٹھنڈی یا کھٹی چیز کھانے پر تکلیف شروع ہو جاتی ہے۔ ناریل کا باقاعدہ استعمال آپ کو گلے کی خرابیسے نجات دلا سکتا ہے۔ ماہرین صحت کے مطابق ناریل کا تیل گلے کی تکالیف کو مندمل کرنے کی صلاحیت رکھتا ہے،یہ قوت مدافعت میں اضافہ اور میٹابولزم کے عمل کو بہتر بناتا ہے۔ناریل کے تیل میں موجود چکنائی انسانی جسم کیلئے نہایت فائدہ مند ہوتی ہے۔ اپنے روزہ مرہ کے کھانوں میں صرف ناریل کے تیل کے 3چمچے آپ کی صحت کیلئے نہایت فائدہ مند ثابت ہو سکتے ہیں۔

اسلام آباد(ایم نائن ٹو ڈاٹ ٹی وی) مجھے بے خوابی کا سامنا ہے اور میں جانتا ہوں کہ جب میری کم از کم سات گھنٹے کی نیند پوری نہیں ہوتی تو تھکاوٹ اور چڑچڑا پن کا شکار ہو جاتا ہوں۔ میں نے یہ بھی محسوس کیا ہے کہ راتوں کو مناسب نیند نہ آنے کی وجہ سے میری یادداشت پر اثر پڑا ہے۔ ’نیند سے اہم باتیں یاد رکھنے میں مدد ملتی ہے‘میں نے نیند اور یادداشت کے درمین تعلق کو طویل عرصے سے منسلک کر رکھا ہےاور ایک معقول نظریہ یہ ہے کہ گہری نیند کے دوران آپ کا دماغ مختصر مدت کی یادداشت کو طویل المدت یادداشت کو محفوظ رکھنے والے حصے میں منتقل کر دیتا ہے اور اگر آپ اچھی نیند نہیں لیتے تو یہ یادداشت ختم ہو جائے گی۔ بی بی سی ون کے لیے نیند کے بارے میں حقائق جاننے کے دوران جس چیز نے مجھے واقعی میں حیران کیا کہ کس طرح سے راتوں کی خراب نیند خون میں شوگر کی مقدار اور بھوک کو متاثر کر سکتی ہے جہاں تک اس تحقیق میں شامل صحت مند رضاکاروں کے ساتھ بھی ایسا ہوا۔اس بارے میں مزید معلومات اور مدد حاصل کرنے کے لیے ہم نے لیڈز یونیورسٹی کے ڈاکٹر ایلینور سکاٹ سے بات کی۔اس کے بعد ہم نے رضاکاروں سے کہا ہے کہ وہ دو راتوں تک معمول کے مطابق نیند پوری کریں اور دو راتیں تین گھنٹے کی تاخیر سے بستر پر سونے جائیں اور اس کے بعد دو راتوں کو وہ جتنا چاہیں سو سکتے تھے اور میں بھی اس تحقیق میں شامل ہو گیا۔ مجھے ناخشگوار حیرانگی ہوئی کہ جن دنوں نیند کم لی تھی اس وقت میری بلڈ شوگر کا لیول بڑھ گیا اور میری بھوک بڑھ گئی۔اس کی وجوہات پر ڈاکٹر سکاٹ کہتے ہیں کہ’ ہم جانتے ہیں جب آپ نیند کی کمی کا شکار ہوتے ہیں تو بھوک کے ہارمونز میں تبدیلی آتی ہے اور آپ کو زیادہ بھوک محسوس ہو گی اور اس بات کا امکان کم ہے کہ آپ خود کو بھوکا محسوس نہ کریں۔ ہم یہ بھی جانتے ہیں کہ نیند کی کمی کا شکار لوگ اکثر میٹھی خوراک لیتے ہیں۔ ڈاکٹرسکاٹ کے مطابق اگر آپ اس وقت نیند سے بیدار ہوتے ہیں جب آپ کو ہونا نہیں چاہیے تو اعصابی دباؤ کے زیادہ ہارمونز اور زندگی کے لیے ضروری کارٹی زال ہارمونز پیدا کرتے ہیں اور یہ شکر کے لیول پر اثر انداز ہوتے ہیں اور ایسا اگلے دن بھی ہو سکتا ہے۔ کنگز کالج کی حالیہ تحقیق سے اندازہ ہوا ہے کہ نیند کی کمی کا شکار اوسطً 385 کیلریز اضافی لیتے ہیں۔

لندن(میڈیا نائن ٹو ڈاٹ ٹی وی) برطانیہ میں کی گئی ایک تحقیق سے پتا چلا ہے کہ روزانہ تین سے پانچ کپ کافی پینے سے جگر کے کینسر اور اس کے غیر فعال ہونے کا خطرہ 40 فیصد تک کم ہوجاتا ہے۔یہ تحقیق رائل سوسائٹی آف میڈیسن لندن کی جانب سے پیش کی گئی ہے جس میں کافی کے انسانی جسم پر ممکنہ اثرات سے متعلق بحث کی گئی ہے اور بتایا گیا ہے کہ اعتدال کے ساتھ کافی کا استعمال جگر کےلیے مفید ہے۔
یونیورسٹی کالج لندن کے پروفیسر گریم الیگزینڈر نے بتایا کہ جگر کے امراض بڑھ رہے ہیں اس لیے یہ معاملہ اہم ہے کہ کس طرح دنیا کا من پسند مشروب ’’کافی‘‘ جگر کے امراض کے خلاف معاون ثابت ہورہا ہے۔ تحقیق سے ثابت ہوا کہ کافی پینے سے جگر کے امراض لاحق ہونے کا خطرہ کم ہوجاتا ہے، اس لیے یہ ضروری ہے کہ مریض کی مناسب نگہداشت کےلیے انہیں اپنے معالجین کی طرف سے غذا کے درست استعمال سے متعلق ایسی معلومات فراہم کی جائیں جنہیں وہ سمجھیں اور ان پر عمل کرسکیں۔
اس تحقیق میں کہا گیا ہے کہ کافی نہ پینے والوں کے مقابلے میں کافی پینے والے افراد میں جگر کے کینسر کا خطرہ 40 فیصد تک کم ہوجاتا ہے۔
قبل ازیں اٹلی اور امریکی ماہرین کی جانب سے کی گئی ایک تحقیق میں بتایا گیا تھا کہ کافی کے مناسب استعمال سے جگر کے امراض 25 سے 70 فیصد تک کم ہوجاتے ہیں۔ اسی طرح ایک اور تحقیق میں کہا گیا تھا کہ کافی کے زیادہ استعمال سے 65 فیصد تک جب کہ کم استعمال سے جگر کے مرض میں مبتلا ہونے کا خطرہ 25 تا 30 فیصد تک کم ہوجاتا ہے۔
برطانوی ادارے برٹش لیور ٹرسٹ کے ایک ڈاکٹر کا کہنا ہے کہ جگر کا مرض ایک خاموش قاتل ہے کیوں کہ جب تک اس کی علامت ظاہر ہوتی ہیں، بہت دیر ہوچکی ہوتی ہے۔ کافی ایک ایسا مشروب ہے جس تک ہر شخص کی آسانی سے رسائی ہے۔ فلٹرڈ، انسٹنٹ یا ایسپریسو کے اثرات میں فرق ہوسکتا ہے تاہم کوئی بھی کافی ہو، اسے روزانہ پینے سے جگر کے امراض میں مبتلا ہونے کے امکانات کم سے کم ہوجاتے ہیں۔

اسلام آباد(ایم نائن ٹو ڈاٹ ٹی وی )انسان کا قد اس کی شخصیت کا اہم حصہ ہوتاہے۔ قد بڑھانے کا بہترین اور کارآمد طریقہ صحیح ورزش اور متوازن غذا ہے۔ورزش کرنے سے پٹھے کھنچتے اور مضبوط ہوتے ہیں جبکہ صحیح غذا کے استعمال سے وہ ہارمونز نشوونما پاتے ہیں جو قد بڑھنے میں کردارادا کرتے ہیں۔یوں تو قد کا اصل تعلق جینیاتی بناوٹ سے ہوتاہے لیکن اگر جسم کو مناسب غذا نہ ملے یا ورزش نہ کی جائے تو بھی قد چھوٹا رہ جانے کے خطرات بڑھ جاتے ہیں۔مندر جہ ذیل ورزشیں آپ کا قد بڑھانے میں مدد کرسکتی ہیں۔ان کو ہفتے میں دو سے 3بارضرور کیجیئے۔ لٹکنا کشش ثقل آپ کے قد پر اثر انداز ہوکر آپ کے جوڑوں اور ریڑھ کی ہڈی کو سکیڑ دیتی ہے۔ لٹکنے سے اس اثر کو کم کیا جاسکتاہے۔کسی راڈ یا اونچی چیز کو پکڑ کر لٹکنے سیی جسم کا نچلا حصہ ریڑھ کی ہڈی کوکھینچتاہے۔اس عمل سے قد میں ایک سے دو انچ تک اضافہ ہوسکتاہے۔البتہ اس کا اثر فوراً ظاہر ہونا شروع نہیں ہوتا۔ ایسی جگہ لٹکنا چاہیے جہاں پر آپ کے جسم کو آگے پیچھے حرکت کرنے کی جگہ ملے۔ خشکی پر تیرنا اس ورزش سے آپ کی پشت کے نچلے حصے پر زور پڑتاہے۔اس ورزش کے لیے سب سے پہلے پیٹ کے بل لیٹ جائیں۔اب اپنے بازووں کو مو ڑ کر ہتھیلیوں کا رخ زمین کی جانب کریں۔اب اپنے بائیں بازو کو دائیں بازو سے اونچا کریں۔ ٹانگوں کوسیدھا رکھتے ہوئے دائیں ٹانگ کو جس حد تک ہوسکے ہوا میں اٹھائیں۔اسی پوزیشن میں 4سیکنڈز تک رہیں پھر اپنے دوسرے بازو اور ٹانگ کیساتھ یہی عمل دہرائیں۔اس پریکٹس کو 4سیکنڈز سے بڑھا کر 20سیکنڈز تک لے جانے کی کوشش کریں۔اس سے نہ صرف آپ کا قد بڑھے گا بلکہ آپ کا جسم شیپ میں بھی آجائے گا۔ کوبرا اسٹریچ اس ورزش سے آپ کی ریڑھ کی ہڈی مضبوط ہوتی ہے۔اس سے پٹھوں میں لچک پیدا ہوتی ہے۔اپنا منہ زمین کی طرف کرکے لیٹ جائیں۔ہتھیلیاں بھی زمین پر رکھ دیں۔اب ہتھیلیوں کی مدد سے اپنی کمر کو اٹھائیں۔ٹھوڑی اور منہ کو سامنے کی طرف رکھیں۔ٹانگوں کو نہ ہلائیں۔ کمر اور ریڑھ کی ہڈی کو جتنا پیچھے کی طرف کھینچ سکتے ہیں کھینچیں۔اسی طرح 5سے 30سیکنڈز تک رہیں پھر جسم کو پہلے والی پوزیشن پر لے آئیں۔اس عمل کو 3سے 4بار دہرائیں۔ ٹوئسٹ ٹوئسٹ کئی اقسام کے ہوسکتے ہیں۔سب سے آسان طریقہ یہ ہے کہ کمر کے بل لیٹ جائیں۔گھٹنوں کو موڑ لیں اور پاوں کو زمین پر رکھ دیں۔اب بائیں گھٹنے کو دائیں ہاتھ سے پکڑ کر دونوں گھٹنوں کو دائیں طرف کھینچیں اور اسی طرح دائیں گھٹنے کو بائیں طرف سے پکڑ کر بائیں جانب کھینچیں۔ پیلوس شفٹ یہ ایک بے حد آسان و رزش ہے جس سے آپ کے جسم میں کھینچاو پیدا ہوتاہے۔قدلمبا کرنے میں یہ ورزش کافی کارآمد ہے۔اس سے آپ کاجسم شیپ میں آتاہے۔کمر کے بل زمین پر لیٹ جائیں۔بازووں اور کندھوں کو زمین پر سیدھا رکھ دیں۔اب اپنے پیروں کو کولہے کے قریب لے کر جائیں۔اپنی کمر کو موڑ کر کولہے اٹھائیں اور اوپر کی طرف لے کر جائیں۔اس پوزیشن میں 20سے 30سیکنڈز تک رہیں۔اس سے جسم میں لچک بھی پیدا ہوگی

لاہور (ایم نائن ٹو ڈاٹ ٹی وی )  کہا جاتا ہے کہ ناشتہ دن کی سب سے اہم غذا ہے مگر کیا آپ کو معلوم ہے کہ ایسا کیوں ہے؟ اگر نہیں تو جانیں کہ طبی سائنس ناشتے کے کن فوائد کو اب تک سامنے لاچکی ہے۔جسمانی وزن میں کمی
ایک تحقیق کے مطابق جو لوگ اکثر ناشتہ نہیں کرتے ان میں موٹاپے کا خطرہ 50 فیصد تک بڑھ جاتا ہے جس کی وجہ دن بھر میں جنک فوڈ یا ناقص غذا کا استعمال ہوتا ہے۔
ذہنی کارکردگی بہتر کرے
ایک اور تحقیق میں بتایا گیا کہ ناشتہ کرنا درحقیقت توجہ مرکوز کرنے کی صلاحیت کو بڑھاتا ہے جبکہ یہ یاداشت میں بہتری لانے کے ساتھ دیگر ذہنی افعال کے لیے بھی فائدہ مند ثابت ہوتا ہے۔
صحت بخش غذا کا زیادہ استعمال
یہ بات سائنسی طور پر طے ہوچکی ہے کہ جو لوگ ناشتہ کرنے کے عادی ہوتے ہیں وہ صحت کے لیے فائدہ مند غذاؤں کا زیادہ استعمال کرتے ہیں۔
میٹابولزم کے لیے فائدہ مند
صبح اٹھنے کے بعد اچھا ناشتہ میٹابولزم کی کارکردگی کو بڑھاتا ہے جس کے نتیجے میں چربی گھلنے کا عمل تیز ہوجاتا ہے۔
بسیار خوری سے بچاؤ
اگر صبح اچھا ناشتہ کیا ہو تو آپ دن کے وقت بہت زیادہ بھوکے نہیں ہوتے اور دوپہر کے کھانے میں حد سے زیادہ غذا کھانے سے گریز کرتے ہیں۔
جسمانی کارکردگی میں بہتری
ناشتہ جسم کو وٹامنز اور نیوٹریشن فراہم کرتا ہے، جس کے نتیجے میں جسمانی توانائی بڑھتی ہے اور آپ جسمانی طور پر کام کرنے کے لیے تیار ہوجاتے ہیں۔
امراض کا خطرہ کم
ایک صحت بخش ناشتہ ذیابیطس، بلڈ پریشر اور دیگر امراض کا خطرہ نمایاں حد تک کم کرتا ہے (تاہم اگر وہ بہت زیادہ چکنائی پر مشتمل ہو تو)۔
مزاج بہتر بنائے
سننے میں تو عجیب لگے گا مگر صبح کے وقت جو اجزاء جسم کا حصے بنتے ہیں وہ ذہنی طور پر خوشی کا احساس پیدا کرنے میں مددگار ثابت ہوسکتے ہیں۔
دل کی صحت میں بہتری
صحت بخش ناشتہ بلڈ کولیسٹرول لیول کو بہتر بناتا ہے اور یہ بتانے کی ضرورت نہیں کولیسٹرول امراض قلب کا خطرہ بڑھانے کا باعث بنتا ہے۔

تل ابیب(M92) ہماری سانس میں کئی امراض کے سالمات پائے جاتے ہیں جنہیں حساس آلات کے ذریعے شناخت کیا جاسکتا ہے تاہم امریکی اور اسرائیلی ماہرین نے جداگانہ طور پر ایسے آلات تیار کیے ہیں جو صرف سانس کے ذریعے 17 مختلف امراض کی شناخت کرسکتے ہیں۔
اسرائیلی سائنسدانوں نے ایک سادہ آلہ تیار کیا ہے جو کسی مرض کے شکار انسان کے سانس میں چھپے کیمیکلز شناخت کرسکتا ہے جب کہ دوسری طرف امریکی ماہرین نے ملاوی میں ملیریا کو سانس کے ذریعے بھانپنے کے ایک نظام کی آزمائش شروع کردی ہے۔ ابھی یہ سانس کے ذریعے مرض شناخت کرنے کی ابتدا ہے لیکن بہت جلد سانس سے مرض بھانپنے والے آلات عام دستیاب ہوں گے۔ آلے کی قیمت 100 سے 200 ڈالر یعنی 10 سے 20 ہزار ڈالر تک ہوسکتی ہے لیکن ایک آلے کو ہزاروں مرتبہ، بار بار استعمال کیا جاسکتا ہے۔
یہ دونوں نظام صحتمند شخص اور کسی مریض کی سانس کو شناخت کرکے اس کا موازنہ صحت مند سانس کی کیمیائی ترکیب سے کرتے ہیں اور کسی بیماری کی اطلاع دیتے ہیں۔ اگرچہ اسرائیلی ایجاد فوری طور دستیاب نہیں لیکن ماہرین پُرامید ہیں کہ بہت جلد یہ عام دستیاب ہوگی اور مریضوں میں فوری اور کسی تکلیف کے بغیر مرض کی موجودگی یا عدم موجودگی کی تصدیق کرسکے گی۔
ہماری سانس میں بہت سے امراض کی نشانیاں ہوتی ہیں اور اسی بنا پر تربیت یافتہ کتے کینسر سے لے کر مرگی تک شناخت کرنے کی زبردست صلاحیت رکھتے ہیں۔ اسرائیلی ماہرین نے جو آلہ تیار کیا ہے اسے ’نے نوز‘ کا نام دیا ہے جس کے معنی ’نینوذرات والی ناک‘ کے ہیں جو سانس میں چھپی ایک درجن سے زائد بیماریاں شناخت کرسکتا ہے جن میں پارکنسن، کینسر اور دیگر امراض شامل ہیں جبکہ اس آلے کی درستگی 86 فیصد تک نوٹ کی گئی ہے۔
دوسری جانب یونیورسٹی آف واشنگٹن کی پروفیسر اوڈرے اوڈم جان نے ایسی ہی ایک ٹیکنالوجی سے ملیریا شناخت کرنے کا کام لیا ہے جب کہ اس کی درستگی کا معیار 83 فیصد تک بتایا جارہا ہے۔ روایتی طور پر خون کے ٹیسٹ 90 سے 95 فیصد درستگی سے ملیریا شناخت کرلیتے ہیں۔ اس لحاظ سے سانس کا آلہ بہت بہتر اور مؤثر ثابت ہوسکتا ہے۔ ڈاکٹر اوڈرے کی ٹیم اسے تجرباتی طور پر افریقہ کے ایک غریب ملک ملاوی میں آزما رہی ہے۔ اس میں ایک حساس اسپیکٹرومیٹر لگا ہے جو سانس میں موجود کیمیکلز شناخت کرکے مرض کا پتا لگالیتا ہے۔
ڈاکٹر اوڈرے کے مطابق ملیریا کی بعض اقسام خون کے ٹیسٹ میں نہیں آپاتیں کیونکہ مریضوں میں اس کا پروٹین مختلف ہوسکتا ہے۔ دوسری جانب غریب افریقی ممالک میں اکثر خون کے ذریعے ملیریا کی شناخت کا انفراسٹرکچر موجود نہیں جس میں تربیت یافتہ عملہ، خون رکھنے کےلیے ریفریجریٹر اور جدید خردبین وغیرہ شامل ہیں۔

نیویارک(M92) فضائی آلودگی سانس، دل اور دیگر امراض کی وجہ تو بنتی ہی ہے لیکن اب معلوم ہوا ہے کہ آلودہ علاقوں میں رہنے سے ہڈیوں کی کمزوری اور گٹھیا کا مرض بھی لاحق ہوسکتا ہے اور انسان وقت سے قبل موت کی آغوش میں جاسکتا ہے۔ کولمبیا یونیورسٹی کے میلمن اسکول آف پبلک ہیلتھ نے اس ضمن میں شمال مشرقی امریکہ سے 90 لاکھ افراد کے ڈیٹا کا احتیاط سے موازنہ کیا ہے ۔ اپنی نوعیت کی اس واحد اسٹڈی میں انہوں نے کہا ہے کہ ٹریفک کا دھواں ہڈیوں کو کمزور کرکے فریکچر اور گٹھیا کی وجہ بن رہا ہے۔سائنسداں اس کی وجہ بتاتے ہوئے کہتے ہیں کہ فضائی آلودگی پیراتھائرائیڈ ہارمون پر اثر انداز ہوتی ہے جو کیلشیئم کی پیداوار کو کنٹرول کرتا ہے ۔ اس طرح کیلشیئم کم بنتا ہے ہڈیاں بھربھری ہوکر کمزور ہوتی رہتی ہیں ۔ اس طرح مریض بار بار فریکچرکا شکار ہوتا ہے اور اسے ہسپتال داخل کرنا پڑتا ہے۔
اس سے قبل یہ ثابت ہوچکا ہے کہ ٹریفک کےدھویں سے بھرپور علاقوں کےلوگ فالج، امراضِ قلب، پھیپھڑوں اور سانس کی بیماریوں ، دمے اور ڈیمنشیا جیسے مرض کے شکار ہوسکتے ہیں۔ لیکن اس مطالعے سے پہلی مرتبہ یہ ثابت ہوا ہے کہ آلودگی اب ہڈیوں کی بھی دشمن ہے۔کولمبیا یونیورسٹی کی ماہر ڈاکٹر آندرے بیکرالی کہتے ہیں کہ اب ثابت ہوچکا ہے کہ ہواؤں میں گھلی ہوئی آلودگی ہڈیوں کے لیے بھی یکساں طور پر تباہ کن ثابت ہوسکتی ہے اور صاف ہوا میں رہنا خود بہت سے فوائد کے ساتھ ہڈیوں کےلیے بھی مفید ہوتا ہے۔
ماہرین نے کہا ہے کہ سروے میں شامل جن افراد کی ہڈیوں میں فریکچر ہوا وہ ایسے علاقوں میں رہائش پذیر تھے جہاں پی ایم 2.5 ذرات کی مقدار غیرمعمولی طور پر ذیادہ تھی۔ سروے ظاہر کرتا ہے کہ یہ ذرات بہت باریک ہوتے ہیں اور جسم میں داخل ہوکرہڈیوں میں اترکر اسے کمزور کردیتے ہیں اور PM2.5 بزرگ افراد میں ہڈیوں کے ٹوٹنے کی وجہ بن رہا ہے۔
یہ تحقیق بین الاقوامی جریدے لینسٹ میں شائع ہوئی ہے جس میں 92 لاکھ افراد شامل کیے گئے ہیں جن میں درمیانی عمر اور بزرگ افراد موجود تھے۔ جن علاقوں میں پی ایم 2.5 اور سیاہ (بلیک) کاربن کی زائد مقدار تھی وہاں کے لوگوں میں پیراتھائیرائیڈ ہارمون کم تھا ۔ یہ ہارمون کیلشیئم جذب کرنے میں مدد دیتا ہے اور اس کی کمی سے کیلشیئم کم ہوتا جاتا ہے اور ہڈیاں نرم ہوکر کمزور پڑتی جاتی ہیں۔
تشویش کی بات یہ ہے کہ ہڈیاں کمزور ہونے اور بار بار فریکچر سے موت کا امکان 20 فیصد تک بڑھ جاتا ہے اور یوں بوڑھے لوگوں کی زندگی معذوری کی طرف بڑھنے لگتی ہے۔

کراچی(M92) ایک بین الاقوامی سروے میں یہ دلچسپ موازنہ سامنے آیا ہے کہ پاکستان، بھارت اور بنگلہ دیش کے معالجین اپنے مریضوں کو باقی دنیا کے مقابلے میں سب سے کم وقت دیتے ہیں۔ جبکہ سویڈن ، امریکا اور برطانیہ مریضوں کو تسلی سے دیکھتے ہوئے انہیں سب سے ذیادہ وقت دیتے ہیں۔
اس سروے میں 15 بڑے ممالک شامل ہیں جہاں دنیا کی نصف کے قریب آبادی رہتی ہے اور وہاں کے ڈاکٹر اپنے مریضوں کو اوسطاً 5 منٹ ہی دیکھ پاتے ہیں ۔ امریکی ڈاکٹر اپنے مریضوں کو تفصیل سے دیکھتے ہیں اور اوسطاً ایک مریض کے حصے میں 20 منٹ آتے ہیں جبکہ برطانیہ میں دس منٹ لیکن یہ شرح سویڈن میں سب سے ذیادہ یعنی 22 منٹ 30 سیکنڈ ہے۔
بھارت جو ایک بڑا ملک ہے وہاں آبادی کے اژدہام کی وجہ سے ایک ڈاکٹر مریض کو بمشکل دو منٹ ہی دے پاتا ہے اور بنگلہ دیش میں یہ شرح کم ترین یعنی 48 سیکنڈ ہے اور پاکستان یہ شرح دو منٹ بھی نہیں یعنی ہمارے ملک میں ایک ڈاکٹر مریض کو 1.79 منٹ ہی دے پاتا ہے۔
اپنی نوعیت کا یہ پہلا بین الاقوامی سروے نہ صرف بڑی آبادی والے ممالک میں صحت کا حال بیان کرتا ہے بلکہ اس میں یہ بتایا گیا ہے جس ملک میں ڈاکٹر مریضوں کو سب سے کم وقت دیتے ہیں وہاں صحت و معالجے کی صورتحال بہت خراب ہے جس کا براہِ راست تعلق ڈاکٹر کے وقت اور دلچسپی سے ہے۔ یہ سروے ممتاز طبی جریدے ’برٹش میڈیکل جرنل‘ (بی ایم جے) میں شائع ہوا ہے۔ ماہرین نے اپنی اس رپورٹ میں لکھا ہے کہ مریضوں کے لیے کم ہوتا وقت صحت کی ناکافی صورتحال کو ظاہر کرتا ہے۔
لیکن یہ زیادہ آبادی اور کم ڈاکٹروں والے ممالک میں طبی معائنہ اور وقت میں کمی کو بھی ظاہر کرتا ہے جس کا فی الحال کوئی حل دکھائی نہیں دیتا۔ ماہرین نے اس اہم مطالعے کے لیے 67 ممالک کے 178 سروے کا جائزہ لیا اور کل 28 کروڑ سے زائد کنسلٹیشنز (ڈاکٹروں سے مریضوں کی ملاقات) کا جائزہ لیا گیا ہے۔
تاہم بھارتی ڈاکٹروں نے کہا ہے کہ سرکاری ہسپتالوں میں مریضوں کی تعداد کی بنا پر کم وقت کی بات درست ہوسکتی ہے کیونکہ ایک سے دو گھنٹے میں ڈاکٹر کو 100 سے زائد مریضوں کو دیکھنا ہوتا ہے۔ لیکن دیگر پرائیوٹ ہسپتالوں میں یہ صورتحال بہتر ہے۔
سروے کے مصنفین نے کہا ہے کہ صرف اوسط دو منٹ یا پانچ منٹ میں ڈاکٹر مریض کو اچھی طرح نہیں دیکھ سکتا اور اس سے علاج کا دورانیہ بڑھ سکتا ہے اور وسائل بھی خرچ ہوتے ہیں۔

لاہور (میڈیا پاکستان) انڈے تو اکثر افراد کو پسند ہوتے ہیں مگر سب ہی کھانے کے بعد اس کے چھلکے پھینک دیتے ہیں۔ مگر کیا آپ کو معلوم ہے کہ انڈوں کے چھلکے صحت کے لیے فائدہ مند ثابت ہوسکتے ہیں؟جی ہاں واقعی، انڈوں کے چھلکے جسم کو انتہائی ضروری جز فراہم کرتے ہیں جو صحت کے لیے ضروری ہے تاہم اس کے لیے کچھ احتیاط کی بھی ضرورت ہوتی ہے۔ایک ویڈیو میں انڈوں کے چھلکے کے فوائد بتاتے ہوئے لوگوں کو مشورہ دیا گیا ہے کہ وہ اسے پھینکنے سے گریز کریں۔ویڈیو کے مطابق ان چھلکوں کو ضائع کرنے کی بجائے کھانا زیادہ بہتر ہے۔اس کی وجہ یہ ہے کہ انڈے کے چھلکے کیلشیئم کے حصول کا اچھا ذریعہ ثابت ہوسکتے ہیں کیونکہ وہ 95 فیصد کیلشیئم کاربونیٹ سے بھرپور ہوتے ہیں۔ایک انڈے کے چھلکے میں دو گرام کیلشیئم ہوتا ہے جو روزانہ تجویز کی گئی مقدار سے دو سے چار گنا زیادہ ہے۔مگر ان چھلکوں کو ایسے ہی کھانے سے گریز کریں بلکہ انہیں پانی میں ابالیں تاکہ ممکنہ جراثیم مر جائیں اور پھر 200 فارن ہائیٹ میں دس سے پندرہ منٹ تک بیک کریں۔اس کے بعد انہیں پیس کر سفوف بنالیں جو کیلشیئم کے لیے بہترین ذریعہ ثابت ہوگا۔یہ ان خواتین کے لیے خاص طور پر مفید ہے جو جوڑوں کے درد کا شکار ہوتی ہیں اور اس سفوف سے درد میں کمی اور ہڈیوں کے گھٹنے کا خطرہ کم ہوتا ہے۔اس سفوف کو روٹی یا کسی اور چیز میں ملا کر استعمال کیا جاسکتا ہے تاہم یہ یاد رہے کہ بہت زیادہ یا کم کیلشیئم نقصان دہ ثابت ہوسکتا ہے۔تو سفوف کی کچھ مقدار کا روزانہ استعمال ہی جسمانی صحت کے لیے بہتر ہے۔

لندن(M92)برطانوی سائنسدانوں نے صحت مند زندگی کے لیے خالص دودھ کے استعمال کو لازمی قرار دے دیا۔برطانیہ کی نیوکاسل یونیورسٹی میں محققین نے انسان کی صحت مند زندگی کے حوالے سےمختلف پہلوؤں کاجائزہ لیا اور وہ اس نتیجے پر پہنچے کہ توانا اور تندرست زندگی کا راز خالص دودھ میں مضمر ہے۔
محققین کا کہنا ہے کہ ایسی بھینسیں یا بکریاں جنہیں دیسی چارے پر پالاجائے ان کا دودھ فارم میں پالی جانے والی بھینسوں اور بکریوں کے دودھ سے کئی گنا بہتر ہوتا ہے۔دیسی چارے پر پلنے والی بھینس کے دودھ میں عام بھینس کی نسبت50 فیصدزیادہ غذائیت ہوتی ہےجب کہ ان میں وٹامنز کی مقدار اور دیگر خصوصیات بھی زیادہ ہوتی ہیں ۔
محققین کا کہنا ہے کہ خالص دودھ استعمال کرنے والے لوگ زیادہ صحت مند اور تندرست زندگی گزارتے ہیں، اس کے علاوہ خالص دودھ پینے والے کئی بیماریوں سے بھی محفوظ رہتے ہیں۔واضح رہے کہ دودھ میں کیلشیئم کی وافر مقدار پائی جاتی ہے جو دانتوں، مسوڑوں اور ہڈیوں کو مضبوط بنانے میں مددگار ثابت ہوتا ہے۔