Category صحت

لاہور(سٹاف رپورٹر/ایمرا نیوز)گردوں کا دائمی مرض جسے انگریزی میں کرانک کڈنی ڈزیذیا(CKD)بھی کہا جاتا ہے ایک عام مرض ہے ۔ گردوں کی بیماری کو دل کے عارضے سے بھی منسلک کیا جاسکتا ہے جبکہ گردوں کی تکلیف میں طوالت سے گردے خاتمے کی آخری سطح تک پہنچ سکتے ہیں ۔ پاکستان میں زیادہ تر لوگ اس مرض کی تشخیص نہیں کرا پاتے ، ہر سال فقط 16,000سے20,000کے قریب لوگوں میں اس مرض کی تشخیص ہوپاتی ہے ۔

اسی وجہ سے بین الاقوامی سطح پر اس بیماری کے حوالے سے پاکستان کا شمار 8یعنی آٹھویں نمبر پر آتا ہے ۔ اس سال بین الا قوامی سطح پر منائے جانے والے کڈنی ڈے پر ہم خصوصی طور پر خواتین کی صحت کے حوالے سے گردوں کی بیماریوں اور ان کے سد باب کی آگہی پھیلا رہے ہیں ۔ دنیا بھر سے قریباً 195میلین خواتینCKDکا نشانہ بنتی ہیں جن میں سے قریباً 6لاکھ خواتین ہر سالہ لقمہ اجل بن جاتی ہیں ۔ اس وجہ سے گردوں کی بیماری کو خواتین میں اموات کی آٹھویںبڑی وجہ سمجھا جاتا ہے ۔ مردوں کی نسبت خواتین میں اس بیماری کے بڑھتے رجہان کی ایک بڑی وجہ ترقی پذیر ممالک میں خواتین کے علاج میں حائل نفسیاتی اور معاشی و معاشرتی رکاوٹیں ہوتی ہیں ۔

مرد و خواتین میں گردوں کی بیماری کے محرکات ایک سے ہیں جن کا زیادہ ترتعلق فشارِ خون یعنی ہائی بلڈ پریشر، ذیابطیس یعنی شوگر اورموٹاپے سے ہے ۔ خواتین سے مخصوص محرکات میں سب سے اہم ، لوپس نفرائٹس ، ہے ۔ یہ ضرورت وقت ہے کہ حکومت سمیت دیگر بحالی صحت کے ادارے عوام میں بالعموم اور خواتین میں بالخصوص گردوں کی صحت ، ان کو لاحق خطرات اور ان سے بچاﺅ کے ممکنہ طریقوں کے بارے آگہی پھلائیں ۔ شوکت خانم میموریل کینسر ہسپتال اور ریسرچ سینٹر میں اس بات کو حتمی بنایا جاتا ہے کہ یہاں آنے والے تمام مریضوں کے گردوں کی ممکنہ بیماریوںکے حوالے سے جانچ کی جائے اور کسی بھی قسم کی بیماری کی تشخیص کی صورت میں ان مریضوں کو ہسپتال میں موجود گردوںکی بیماریوں سے متعلق شعبہ ” نفرالوجی‘ کے ڈاکٹروں کے زیر علاج لایا جاتا ہے ۔

لاہور(سٹی رپورٹر ایمرا نیوز)پنجاب میں نوزائیدہ بچوں کے دودھ کے 60 ہزار ڈبے تلف لاہور: پنجاب فوڈ اتھارٹی نے نوزائیدہ اورکم عمربچوں کے لئے قواعد کی خلاف ورزی اورصارفین کو دھوکہ دینے والے دعوؤں کے ساتھ انفینٹ فارمولا ملک تیارکرنے والی کمپنیوں کے خلاف کارروائی کرتے ہوئے مارکیٹ سے انفینٹ فارمولا ملک کے 60 ہزار ڈبے قبضے میں لے لئے ہیں۔
پنجاب فوڈ اتھارٹی ترجمان کے مطابق کارروائی کے دوران مجموعی طورپر 3 ہزار870 میڈیکل اسٹورچیک کئے گئے، مختلف برانڈزکی ایک ہی قسم کی پراڈکٹ کے 41 ہزارجبکہ دوسری قسم کے 19 ہزارڈبے قبضے میں لئے گئے ہیں، ترجمان کے مطابق بچوں کی خوراک میں دھوکہ دہی کرنے والوں کے خلاف سخت کریک ڈاون جاری ہے۔ کارروائیاں پنجاب فوڈ اتھارٹی انفینٹ فارمولا ریگولیشن کی خلاف ورزی پر عمل میں لائی گئیں ہیں، انفینٹ فارمولا میں امپورٹ اور مارکیٹنگ ریگولیشن کی خلاف ورزیاں کی جا رہی تھیں۔ چین سے درآمد شدہ پراڈکٹس کو فرانسیسی اور جرمن کہہ کر فروخت کیا جا رہا تھا، پنجاب فوڈ اتھارٹی ٹیموں نے ڈبوں میں سوراخ کر کے ناقابل استعمال بنادیا۔
ترجمان کا یہ بھی کہنا ہے کہ دھوکہ دہی پر مبنی مارکیٹنگ کی وجہ سے مائیں اپنے دودھ کی بجائے انفینٹ فارمولا کو ترجیح دیتی ہیں، انفینٹ فارمولا کے ناقص معیار کی وجہ سے بچوں میں غذائی اجزاء کی کمی واقع ہو رہی ہے، ایک سال تک کے بچوں کے انفینٹ فارمولا کی مارکیٹینگ پر مکمل پابندی عائد کر دی گئی ہے، ایک سال سے زائد عمر کے بچوں کے لئے بھی صرف بہترین معیار کے انفینٹ فارمولا کی محدود رسائی کی اجازت ہے

ہیلسنکی(مانیٹرنگ ڈیسک/ایمرا نیوز) فن لیند: کئی عشروں سے ہم ذیابیطس یا شوگر کے مرض کو ٹائپ ون یا ٹائپ ٹو ذیابیطس میں تقسیم کرتے آرہے ہیں لیکن ماہرین نے ذیابیطس کی مزید ذیلی اقسام دریافت کی ہیں جس سے اس مرض کے علاج میں بہت مدد مل سکے گی۔

ٹائپ ون ذیابیطس ایک خود امنیاتی (آٹو اِمیون) مرض ہے جس میں لبلبہ انسولین نہیں بنا پاتا جبکہ ٹائپ ٹو ذیابیطس میں جسم انسولین سے مزاحم ہوجاتا ہے۔

اب سویڈن اور فِن لینڈ کے ماہرین نے ٹائپ ٹو ذیابیطس کی مزید چار ذیلی اقسام دریافت کی ہیں۔ لیونڈ یونیورسٹی سے وابستہ ان ماہرین نے خیال ظاہر کیا ہے کہ اس سے ذیابیطس کی عالمی وبا کو قابو کرنے میں مدد ملے گی اور مریضوں کے مرض کے لحاظ سے ذیابیطس کے علاج کی راہ ہموار ہوسکے گی۔
ذیابیطس کی نئی درجہ بندی کے تحت ٹائپ ون ذیابیطس کو ’شدید خود امنیاتی ذیابیطس‘ یا ’severe autoimmune diabetes‘ کا نام دیا گیا ہے جبکہ ٹائپ ٹو کو چار زمروں میں تقسیم کیا گیا ہے جن میں سے دو شدید اور دو درمیانے درجے کے امراض ہیں۔ پہلی یعنی انسولین کی شدید کمی والی ذیابیطس ان لوگوں میں ہوتی ہے جن کے خون میں شکر کی زائد مقدار ہو، لبلبہ کم انسولین بناتا ہو اور انسولین مزاحمت یا ریزسٹینس درمیانے درجے کی ہو۔

دوسری قسم کو انسولین سے شدید مزاحمت والی ذیابیطس کا نام دیا گیا ہے جس میں مریض موٹاپے کا شکار ہوتا ہے اور اس کا جسم انسولین سے شدید مزاحمت رکھتا ہے۔ اس کیفیت میں جسمانی خلیات انسولین کو بھرپور انداز میں استعمال نہیں کرتے اور اس سے خون میں شکر بڑھتی جاتی ہے۔

نئی درجہ بندی کے تحت ذیابیطس کو ان پانچ درجوں میں رکھا جائے گا:

کلسٹر اول
اس قسم میں شدید خود امنیاتی یا سیویئر آٹوامیون ڈائبٹیز شامل ہے جس کا پہلا نام ’ٹائپ ون‘ ذیابیطس تھا۔ یہ جسم کے قدرتی دفاعی نظام کے تحت ازخود پیدا ہوتی ہے اور لبلبہ انسولین بنانا بند کردیتا ہے۔ عموماً بچپن میں ہی اس کا حملہ ہوتا ہے لیکن آثار جوانی میں ظاہر ہوتے ہیں اور عمر بھر انسولین انجیکشن کی ضرورت پیش آتی ہے۔

کلسٹر دوم
یہ انسولین کی شدید کمی کی کیفیت ہے جسے ’انسولین ڈیفی شنٹ ڈائبٹیز‘ کہتے ہیں۔ نوعمر افراد میں اسے غلطی سے ٹائپ ون ذیابیطس سمجھ لیا جاتا ہے جبکہ ان کا امنیاتی نظام بہترین ہوتا ہے۔ اصل میں یہ ٹائپ ٹو ذیابیطس ہی کی ایک قسم ہے۔ اس میں مریض کا وزن ٹھیک ہوتا ہے، خون میں شکر زیادہ ہوتی ہے، جسم کم انسولین بناتا ہے اور انسولین سے مزاحمت درمیانے درجے کی ہوتی ہے۔

کلسٹر سوم
اس کیفیت میں جسم انسولین سے شدید مزاحمت دکھاتا ہے جس میں موٹاپا بھی شامل ہے۔

کلسٹر چہارم
چوتھی قسم درمیانے درجے کے موٹاپے کی ذیابیطس ہے جس کا مریض فربہی (موٹاپے) کا شکار ہوتا ہے لیکن یہ مرض کم شدت کا ہوتا ہے۔ اس کا حملہ کم عمری میں ہوتا ہے۔

کلسٹر پنجم
سب سے زیادہ آبادی اسی مرض کی شکار ہے۔ ذیابیطس کے 40 فیصد مریض اس کے شکار ہیں جسے عمر رسیدگی سے وابستہ درمیانے درجے کی ذیابیطس کہا جاتا ہے۔

اس تحقیق کی تفصیلات ریسرچ جرنل ’دی لینسٹ: ڈائبٹیز اینڈ اینڈوکرائنولوجی‘ میں شائع ہوئی ہیں جن سے معلوم ہوتا ہے کہ اس مطالعے میں 14 ہزار سے زائد مریضوں کا جائزہ لیا گیا۔ ماہرین کے مطابق اس سے ذیابیطس کو سمجھنے اور اس کے علاج میں بہت مدد ملے گی۔

کراچی(بیورو رپورٹ،وقت نیوز ) پنجاب فوڈ اتھارٹی کے بعد محکمہ داخلہ سندھ نے بھی چائنیز کھانوں کا لازمی جز تصور کیے جانے والے اجینو موتو یعنی چائنیز نمک پر پابندی لگانے کا اعلان کردیا۔

محکمہ داخلہ سندھ نے اجینوموتو پر پابندی کا نوٹیفکیشن بھی جاری کردیا۔

نوٹیفکیشن کے مطابق انسانی صحت کے تحفظ کے پیش نظر اجینوموتو کی درآمد، تیاری اور فروخت پر پابندی عائد کی گئی۔

پنجاب میں چائنیز نمک پر پابندی عائد

نوٹیفکیشن کے مطابق پابندی کا اطلاق دفعہ 144 کے تحت پورے سندھ میں ہوگا۔

اس سے قبل گذشتہ ماہ پنجاب فوڈ اتھارٹی نے اجینو موتو پر پابندی لگانے کا اعلان کیا تھا۔

پنجاب فوڈ اتھارٹی کے سائنٹیفک پینل کا کہنا تھا کہ اجینو موتو میں مونو سوڈیم گلومیٹ پایا جاتا ہے جو سر درد، دل کی دھڑکن کے مسائل اور دماغی و اعصابی بیماریوں کا باعث بنتا ہے

میسا چیوسیٹس: آپ خاتون ہوں یا مرد لیکن اگر آپ اولاد کے خواہش مند ہیں تو اس کےلیے سافٹ ڈرنک کا بے تحاشا استعمال کم کرکے اسے معمول پر لانا ہوگا۔

امریکی ماہرین نے ایک بڑے سروے کے بعد کہا ہے کہ جو لوگ روزانہ کی بنیاد پر میٹھے سوڈے کے مشروبات استعمال کرتے ہیں ان میں والد بننے کی صلاحیت کم ہوجاتی ہے اور خواتین میں بھی حمل ٹھہرنے کا امکان معدوم ہوتا جاتا ہے۔ یہ تحقیق ریسرچ جرنل ’’ایپیڈیمیولوجی‘‘ کے تازہ شمارے میں شائع ہوئی ہے۔

ماہرین نے کہا ہے کہ مرد اور عورتوں پر ان کے طرز زندگی اور غذائیت کا اثر ہوتا ہے جو ان کے والدین بننے پر بھی اثر انداز ہوتا ہے۔ گزشتہ 50 برس میں عام امریکیوں کے شکر کھانے میں غیرمعمولی اضافہ ہوا جس میں سے ایک تہائی اضافے کی وجہ میٹھے کاربونیٹڈ مشروبات ہیں۔ سافٹ ڈرنکس کا اندھا دھند استعمال امریکیوں کا وزن بڑھا رہا ہے اور ذیابیطس کی وجہ بھی بن رہا ہے۔
اس سے قبل کئی تحقیقات سے عیاں ہوچکا ہے کہ سافٹ ڈرنک خواتین میں بے قاعدہ ماہانہ ایام کے علاوہ مردوں کے مادہ منویہ (اسپرم) کو شدید متاثر کررہی ہیں۔ اس کے علاوہ پہلے بھی ماہرین سافٹ ڈرنک اور تولیدی عمل کی تباہی کے درمیان تعلق دریافت کرچکے ہیں۔

بوسٹن یونیورسٹی اسکول آف پبلک ہیلتھ کے سائنس دانوں نے 21 سے 45 سال کی 3,828 خواتین اور ان کے شوہروں کو اس سروے میں شامل کیا جن کا تعلق امریکا اور کینیڈا سے تھا۔

اس سروے میں طرز زندگی، غذا اور میڈیکل ریکارڈ دیکھا گیا۔ ان میں خواتین سے ہر دو ماہ بعد ایک سوال نامہ بھروایا گیا اور ان سے حاملہ ہونے کے بارے میں بھی پوچھا گیا اور کل 12 ماہ تک ان خواتین کا جائزہ لیا گیا۔

ماہرین نے سروے کے آخر میں ڈیٹا کا جائزہ لیتے ہوئے کہا کہ خواہ مرد ہو یا عورت اگر وہ سافٹ ڈرنک کی زائد مقدار پیتے ہیں تو ماہانہ بنیادوں پر ان کے والدین بننے کا امکان 20 فیصد تک کم ہوجاتا ہے۔

جن خواتین نے روزانہ ایک گلاس سافٹ ڈرنک پی ان میں ماہانہ بنیادوں پر حمل ٹھہرنے کا امکان 25 فیصد تک کم نوٹ کیا گیا۔ جبکہ مردوں میں یہ شرح 33 فیصد تک نوٹ کی گئی۔ جن خواتین و حضرات نے سافٹ ڈرنک استعمال نہیں کی ان میں یہ شرح کم دیکھی گئی۔

تاہم ڈاکٹروں نے عندیہ دیا ہے کہ ان کی تحقیقات کو ایک طرح کا انتباہ سمجھا جائے کیونکہ اس میں شریک افراد کی تعداد بہت کم ہے۔ ڈاکٹروں کا اصرار ہے کہ سافٹ ڈرنک سے تولیدی صحت شدید متاثر ہوتی ہے اس لیے میٹھے سوڈا سے دور رہنا ہی بہتر ہے۔

کراچی(ہیلتھ رپورٹر/میڈیا 92نیوز) پاکستان میں پہلی بار ایک ایسی نئی تکنیک متعارف کرادی گئی جس سے دوران حمل ماں کے پیٹ میں پرورش پانے والے بچے کے ڈی این اے سے بچے کی 110 بیماریوں کی قبل ازپیدائش تشخیص کی جاسکے گی یہ تکنیک جینوم ٹیکنالوجی کی مدد سے حاصل کی گئی۔

ماہرین کی سر توڑ کوششوں کے نتیجے میں جینوم ٹیکنالوجی کی مدد سے ہر دفعہ حمل کے دوران قبل از پیدائش بیماریوں کی تشخیص کرائی جاسکتی ہے۔ جینوم ٹیکنالوجی کا بنیادی مقصد یہ ہے کہ جاں لیوا اورموروثی بیماریوں کے پھیلاؤ کوروکا جاسکے۔ یہ ٹیکنالوجی دنیا بھرکے مختلف ممالک میں استعمال کی جارہی ہے۔ قبل ازپیدائش بیماریوں میں دل کی بیماریاں، دماغ، گردوں، کھال اور خون کے امراض سمیت دیگر بیماریاں شامل ہیں۔ جینوم ٹیکنالوجی کی مدد سے 5 دن میں 110 بیماریوں کا قبل ازوقت پتا چلایاجاسکتا ہے، یہ تیکنیک پہلی بارکراچی کے نیشنل انسٹیٹوٹ آف بلڈ ڈیزیز میں متعارف کرادی گئی ہے۔

نئی تیکنیک کے ذریعے ان 110 بیماریوں کا باعث بننے والی550 جینزکے ڈی این اے کوجینوم ٹیکنالوجی جس کوشعبہ طب میں NGSبھی کہتے ہیں کی مدد سے ڈی کوڈ کیاجاتا ہے جس میں بچے کی بیماریوں کی قبل ازوقت تشخیص کرلی جاتی ہے۔ اس تیکنیک کی مدد سے جرائم پیشہ اوردہشت گرد افرادکی بھی شناخت کی جاتی ہے، پاکستان میں خاندان میں ہونے والی شادیوں کی وجہ سے جان لیوا اور موروثی امراض نسل درنسل منتقل ہورہے ہیں جس کے نتیجے میں پیدا ہونے والے بچے ان موذی امراض میں مبتلا ہوجاتے ہیں اورسسک سسک کرزندگی گزرانے پر مجبور ہیں۔

ان جان لیوا اورموروثی بیماریوں میں جنم لینے والے بچے مشکل سے 5 سال جی پاتے ہیں جس کے بعد وہ بیماریوں سے لڑتے لڑتے جاں بحق ہوجاتے ہیں۔ حکومت پاکستان کے جاری کردہ اعداد وشمار کے مطابق پاکستان میں 40فیصد شادیاں فرسٹ کزن سے ہوتی ہیں اور30 فیصد شادیاں خاندان یا برادری بنیادوں پر کی جاتی ہیں جس کی وجہ سے خاندان میں ہونے والی بیماریوں کا خمیازہ پیداہونے والے بچوں کو بھگتنا پڑرہا ہے۔ نئی تیکنیک کے موجد ڈاکٹر طاہر شمسی نے جینوم ٹیکنالوجی اور خاندان میں شادیوں کے حوالے سے بتایا کہ موروثی بیماریوں کی بچوں میں منتقلی کی وجہ سے شرح اموات میں بھی اضافہ ہورہا ہے تاہم جینوم ٹیکنالوجی کی مدد سے ماں کے پیٹ میں پرورش پانیوالے بچے کی قبل ازپیدائش اس کی بیماریوں کی تشخیص کی جاسکتی ہے۔ ان کا کہنا تھاکہ پاکستان میں پہلی بارنیشنل انسٹیٹوٹ آف بلڈڈیزیز میں جنیوم ٹیکنالوجی متعارف کردی گئی ہے۔

لاہور (مانیٹرنگ ڈیسک/میڈیا 92نیوز)آپ کی جِلد جسم کے انتہائی اہم ترین اعضاء میں سے ایک ہے۔
جو بظاہر اپنی جگہ سے سرکتی یا چلتی نظر نہیں آتی مگر یہ بہت کچھ ایسا کرتی ہے جس کا آپ نے کبھی تصور بھی نہیں کیا ہوگا۔
جی ہاں اپنی جِلد کے بارے میں درج ذیل حقائق آپ کو دنگ کرکے رکھ دیں گے۔
اگر آپ جسم پر موجود جِلد کو کسی طرح اتار کر چادر کی طرح پھیلائیں تو یہ 20 اسکوائر فٹ تک کے حصے کو کور کرلے گی۔
یہ انسانی جسم کا سب سے بڑا عضو ہے جو مجموعی جسمانی وزن کے 15 فیصد حصے کے برابر ہوتا ہے۔
میلانن نامی ہارمون یا مادہ آپ کے جِلد اور آنکھوں کی رنگت کو کنٹرول کرتا ہے۔
انساجی جِلد ہر 28 دن بعد خود کو نیا یا تجدید کرتی ہے۔
آپ کے گھر میں پائی جانے والی مٹی کا بڑا حصہ درحقیقت مردہ جِلدی خلیات پر مشتمل ہوتا ہے۔
جسم میں پائے جانے والا ایک پروٹین کیراٹین آپ کی جِلد کو واٹر پروف بناتا ہے۔
یہ سورج کی روشنی میں اپنے لیے خود وٹامن ڈی تیار کرتی ہے۔
جِلد تین تہوں پر مشتمل ہوتی ہے اور اوپری تہہ میں 18 سے 23 چھوٹی تہیں ہوتی ہیں جو مردہ جِلدی خلیات کی ہوتی ہیں۔
جِلد کے اندر 11 میل لمبی خون کی شریانیں سمائی ہوئی ہیں۔
جِلد پر موجود روئیں گرم ہوا کو جِلد کے پاس رکھنے میں مددگار ثابت ہوتی ہیں۔
آپ کی جِلد لاکھوں کروڑوں آرگنزم (عضویہ) کا گھر ہے اور ایک ہزار قسم کے بیکٹیریا بھی اس میں رہتے ہیں۔

کنبرا(مانیٹرنگ ڈیسک/میڈیا 92نیوز) دانتوں کو کیڑالگ جائے تو بہت ہی تکلیف اور شرمندگی کا سامنا کرنا پڑتا ہے لیکن اب ایک معروف دندان ساز نے کھانے کی کچھ ایسی چیزیں بتا دی ہیں جن کے ذریعے آپ اپنے دانتوں کو کیڑے لگنے سے محفوظ رکھ سکتے ہیں۔ رپورٹ کے مطابق سڈنی کے ڈینٹسٹ ڈاکٹر لیوس ایرلک نے بتایا ہے کہ سیب کا سرکہ دانتوں کی صحت کے لیے انتہائی مفید چیز ہے۔ صبح اٹھنے کے بعد سب سے پہلے اگر تھوڑا سا سیب کاسرکہ پی لیا جائے تو دانت کیڑا لگنےسے محفوظ رہتے ہیں۔اس کے علاوہ انڈا، ڈارک چاکلیٹ، سبزیوں کا آملیٹ اور سبز چائے بھی دانتوں کو کیڑا لگنے سے بچانے کے لیے بہترین غذائیں ہیں۔ڈاکٹر لیوس کا کہنا تھا کہ میں خود اپنے دن کا آغاز سیب کے سرکے سے کرتا ہوں۔ اس کے بعد میں بہت ساری سبزیاں ڈال کر آملیٹ بناتا ہوں اور اس سے ناشتہ کرتا ہوں۔ دوپہر کے کھانے میں کچھ سبزیاں، تھوڑا چکن یا پروٹین کی حامل کوئی اورچیزکھاتا ہوں اور سہ پہر میں خشک میوہ جات اور ڈارک چاکلیٹ کھاتا ہوں۔

اسکاٹ لینڈ (مانیٹرنگ ڈیسک/ میڈیا 92نیوز) دہائیوں سے دنیا بھر میں سب سے زیادہ پسند کی جانے والی سبزی آلو کو صحت کے لیے نقصان دہ اور زیادہ کھانے سے گریز کرنے کا مشورہ دیا جاتا تھا۔ مگر اب لگتا ہے کہ طبی سائنس نے یوٹرن لے لیا ہے اور دعویٰ کیا ہے کہ آلو درحقیقت صحت کے لیے بہت زیادہ فائدہ مند ہے۔ یہ بات اسکاٹ لینڈ میں ہونے والی ایک طبی تحقیق میں سامنے آئی۔ جیمز ہیوٹن انسٹیٹوٹ کی تحقیق میں بتایا گیا کہ اگر زندگی بھر بھی صرف آلو کو کھایا جائے تو لوگ صحت مند ہی رہیں گے۔تحقیق کے مطابق ایسے متعدد شواہد ملے ہیں جن سے ثابت ہوتا ہے کہ یہ سبزی صحت کے لیے بہت فائدہ مند ہے۔ تحقیق کے مطابق آلو کھانا ہارٹ اٹیک کا خطرہ کم کرتا ہے جبکہ دماغی تنزلی کے باعث بننے والے مرض ڈیمینشیا سے بھی تحفظ ملتا ہے۔ محققین کے مطابق ایسی سبزیاں بہت کم ہیں جن کے بارے میں یہ کہا جاسکتا ہے کہ صرف انہیں کھانا ہی صحت مند رکھتا ہے۔ انہوں نے مزید بتایا کہ آلو وٹامنز اور دیگر غذائی عناصر کے حصول کا بہترین ذریعہ ہے جو لوگ ہزاروں روپے خرچ کرکے سپلیمنٹس کی شکل میں حاصل کرنے کی کوشش کرتے ہیں۔ انہوں نے کہا کہ اس سبزی میں موجود دیگر اجزاء جیسے کیروٹین اور پولی فینول، بہترین غذائی فائبر بھی ہیں۔ تحقیق کے مطابق غذا میں گوشت کا کم استعمال اور آلو کو کھانا عادت بنانا ہارٹ اٹیک کے خطرے کو نمایاں حد تک کم کرتا ہے۔ اسی طرح آلو کھانا درمیانی عمر میں دماغی افعال کو بھی بہتر بناتا ہے اور ڈیمینشیا جیسے مرض سے تحفظ ملتا ہے بلکہ عمر بڑھنے سے لاحق ہونے والے کئی امراض کا خطرہ کم ہوتا ہے۔ محققین کے مطابق آلوؤں کو وٹامنز اور دیگر غذائی اجزاءکے حصول کا زیادہ بہتر ذریعہ نہیں سمجھا جاتا حالانکہ یہ غلط ہے۔’ تاہم انہوں نے خبردار کیا کہ بہت زیادہ فرنچ فرائز کو کھانے سے گریز کرنا چاہئے کیونکہ وہ موٹاپے کا خطرہ بہت زیادہ بڑھانے والی غذا ہے۔ اس تحقیق کے نتائج طبی جریدے سائنٹیفک جرنل میں شائع ہوئے۔

اسلام آباد(مانیٹرنگ ڈیسک/میڈیا 92نیوز) چائے آنکھوں میں موتیا (گلوکوما) کے خطرے کو 74 فیصد تک کم کردیتی ہے۔امریکا کے ماہرین صحت کی تحقیق، یونیورسٹی آف کیلی فورنیاکے شعبہ صحت میں کی گئی تحقیق میں 10 ہزار سے زائد افراد کی خوراک اور صحت پر ایک عرصے تک غور کیا گیا ، ان میں سے 1678 افراد کی آنکھوں کا معائنہ بھی کیا گیا جس کے بعد ماہرین اس نتیجے پر پہنچے کہ چائے پینے اور موتیا کے درمیان گہرا تعلق ہوتا ہے۔موتیا’’ گلوکوما‘‘ کےمرض میں آنکھ کے اندر دھیرے دھیرے دباؤ بڑھتا ہے جو خون کی رگوں کو متاثر کرتا ہے۔ بعدازاں بصارت متاثر ہونا شروع ہوجاتی ہے اورآہستہ آہستہ دیکھنے کی صلاحیت مکمل طور پر ختم کردیتی ہے جس سے مریض مکمل طور پر اندھا ہوجاتا ہے۔ ماہرین کے مطابق پوری دنیا میں نابینا پن کی یہ سب سے بڑی وجہ بھی ہے۔ چائے میں اینٹی اکسیڈنٹس اور سوزش دور کرنے والے اجزاء موجود ہوتے ہیں جو آنکھوں کو اس خطرناک مرض سے بچاتے ہیں۔