Category تازہ ترین

اسلام آباد : جوڈیشل کمپلیکس حملہ کیس،عمران خان کے قابلِ ضمانت وارنٹ گرفتاری جاری کر دئیے گئے۔ انسداد دہشت گردی عدالت میں چیئرمین تحریک انصاف عمران خان سمیت دیگر رہنماؤں کیخلاف جوڈیشل کمپلیکس حملے سے متعلق درج مقدمات کی سماعت ہوئی۔عمران خان کی جانب سے آج حاضری سے استثنیٰ کی درخواست دائر کی گئی۔وکیل سردار مصروف نے بتایا کہ عمران خان نے لاہور ہائیکورٹ میں پیش ہونا ہے،چیئرمین پی ٹی آئی لاہور ہائیکورٹ میں پیشی کے باعث اسلام آباد نہیں آ سکے۔ عدالت نے عمران خان کے قابلِ ضمانت وارنٹ گرفتاری جاری کر دئیے،انسداد دہشت گردی عدالت نے ریمارکس دئیے کہ ملزم کو عدالت پیش ہونا پڑے گا۔چیئرمین تحریک اںصاف سمیت دیگر ملزمان کو 19 جولائی کو ذاتی حیثیت میں طلب کر لیا گیا،عدالت نے کیس کی سماعت 19 جولائی تک ملتوی کر دی۔جبکہ جوڈیشل کمپلیکس حملہ کیس میں فرخ حبیب،شبلی فراز اور حسان نیازی کے بھی قابل ضمانت وارنٹ گرفتاری جاری کر دئیے گئے۔

سرینگر:مقبوضہ کشمیر کے ضلع پونچھ میں حادثاتی طورپرفائرنگ میں ایک بھارتی فوجی ہلاک ہو گیاہے۔کشمیر میڈیا سروس کے مطابق 24سالہ بھارتی فوجی اہلکار ضلع پونچھ میں کنٹرول لائن پرنورکوٹ کے مقام پراپنی رائفل سے حادثاتی طورپر گولی چلنے سے شدید زخمی ہو گیا۔زخمی فوجی کوفوری طورپر ہسپتال منتقل کیاگیا جہاں ڈاکٹروں نے اسے مردہ قراردیا۔ادھر بھارتی فوجیوں نے سرینگر کے علاقے حیدر پورہ میں محاصرے اور تلاشی کی کارروائی شروع کی ہے۔دوسری جانب بدنام زمانہ تحقیقاتی ادارے این آئی اے نے بھارتی پیراملٹری اہلکاروں کے ہمراہ جنوبی کشمیر کے مختلف علاقوں میں گھروں پر چھاپے مارے ہیں۔کشمیر میڈیا سروس کے مطابق این آئی اے اورپیراملٹری اہلکاروںنے جمعرات کو جنوبی کشمیر کے متعدد اضلاع میں گھروں پر چھاپے مارے۔ایک حریت کارکن نے سرینگر میں میڈیا کو بتایا کہ این آئی اے ، بھاتی فوج، پیراملٹری اور پولیس اہلکاراپنے ناقابل تنسیخ حق خودارادیت کا مطالبہ کرنے والے کشمیریوں کو ہراساں کررہے ہیں اور تلاشی کی کارروائیوں کی آڑ میں ان کے گھروں کو ضبط اورلیپ ٹاپس اور موبائل فون چھین رہے ہیں۔بھارتی فورسز کی کارروائیوں کیخلاف لوگوں میں سخت غم و غصہ پایا جاتا ہے۔

لاہور:سیاسی و سماجی شخصیات سمیت سول سوسائٹی اور صحافیوں کے وفد کا جناح ہاوس کا دورہ ، پاک افواج کے شانہ بشانہ تاحیات کھڑے رہنے کا عزم ، قائد کے گھر تباہی پھیلانے والوں کے خلاف حکومت پاکستان اور عدالتوں کو جلد از جلد کاروائی کرکے سخت سزا دینے کا مطالبہ کر دیا،سیاسی اور سماجی شخصیات سمیت سول سوسائٹی اور صحافیوں کے وفد نے جناح ہاوس کا دورہ کیا ،وفد کا کہنا تھا کہ ہم نے جناح ہاوس کا دورہ کیا تو دیکھ کر انتہائی دکھ ہوا کہ شرپسندوں نے اپنے ہی قائد کے گھرکو کس قدر بری طرح جلایا، پاک افواج اور شہدا ء کی یادگاروں کی بے حرمتی کرنا کسی بھی لحاظ سے قابلِ معافی جرم نہیں ہے، شرکاء نے عزم کا اعادہ کیا کہ ہم اپنی پاک افواج کے ساتھ شانہ بشانہ کھڑے ہیں اور تاحیات کھڑے رہیں گے، شرپسندوں نے قائد کے گھر لہراتے قومی پرچم اور مسجد کے تقدس کو بھی پامال کرنے میں کوئی کسر نہ چھوڑی، وفد نے مطالبہ کیا کہ قائد کے گھر تباہی پھیلانے والوں کے خلاف حکومتِ پاکستان اور عدالتوں کو جلد از جلد کاروائی کرکے سخت سزا دینی چاہئے۔

ممبئی :شاہ رخ خان کی نئی فلم ’ جوان ‘ کا ٹریلر ریلیز ہوتے ہی ہٹ ہوگیا اور اس کو پسند کرنے والوں میں بالی ووڈ کے میگا اسٹار
بھی شامل ہیں۔بالی ووڈ کے دبنگ سلمان خان نے شاہ رخ خان کی آنے والی فلم ’جوان کے ٹریلر کی نہ صرف کھل کر تعریف کی بلکہ فلم کے حوالے سے اپنے مستقبل کے منصوبے کے بارے میں بھی بتا دیا۔سلمان خان نے جوا ن کا ٹریلر اپنے سوشل میڈیا پر شئیر کرتے ہوئے کیپشن لکھا کہ پٹھان جوان بن گیا۔ بہت شاندار اور غیر معمولی ٹریلر ہے جو مجھے بہت زیادہ اچھا لگا۔

استنبول : مشہور ترک ڈرامے کرولش عثمان کے ہیرو براک اوزجیفت نجی کمپنی کی دعوت پر پاکستان آئیں گے۔ ایک بڑے فیشن برانڈ کے سوشل میڈیا اکاؤنٹ پر کرولس عثمان کے ہیرو براک اورزجیفت نے ویڈیو پیغام میں کہا کہ وہ جلد پاکستان کا دورہ کریں گے اورپاکستانی مداحوں سے ملاقات کریں گے۔ انہوں نے اپنے مداحوں کو یہ اطلاع بھی دی کہ پاکستانی برانڈ نے انہیں اپنا سفیر مقرر کیا ہے۔

کراچی : پاکستانی خوبرو فلم و ٹی وی اداکارہ حمیمہ ملک نے اپنے بھائی، اداکار فیروز خان کی ناکام شادی سے متعلق خود پر لگنے والے الزامات پر پہلی بار جواب دیا ہے۔اداکار کا اپنے انسٹاگرام اکاؤنٹ پر نئی پوسٹ شیئر کرتے ہوئے بتانا تھا کہ آج اْن کی سالگرہ ہے اور پھر بھی وہ اپنی آنے والی نئی فلم ’اکھارا‘ کی شوٹنگ میں مصروف ہیں۔دوسری جانب اداکارہ حمیمہ ملک نے اپنے بھائی کے لیے ایک پوسٹ شیئر کی جس میں اْنہوں نے ایک لمبے چوڑے نوٹ میں اپنے چھوٹے بھائی کو سالگرہ کے موقع پر خوب دعائیں دیں اور اْن کی آنے والی زندگی کے لیے نیک تمناؤں کا اظہار کیا۔ حمیمہ ملک کی اس پوسٹ پر ایک انسٹاگرام صارف نے فیروز خان اور علیزا سلطان کی شادی ٹوٹنے کی وجہ اداکارہ کو قرار دے دیا۔صارف کا لکھنا تھا کہ ’میری نندیں بھی اس جیسی ہیں، وہ میاں بیوی ایک دوسرے کو وقت نہیں دینے دیتیں۔ صارف نے حمیمہ ملک کی ناکام شادی کی جانب اشارہ کرتے ہوئے مزید لکھا کہ ناکام شادی شدہ زندگی گزارنے والی خواتین، خواہ وہ ماں ہوں یا بہنیں، صرف اپنے بھائیوں پر انحصار کرتی ہیں۔ اس کے کمنٹ کے جواب میں حمیمہ ملک پھٹ پڑیں، حمیمہ کا صارف کو مخاطب کرتے ہوئے لکھنا تھا کہ ’میں نند نہیں اْن کی دوست تھی اور وہ میری بہن ہے۔ میرے بھائی کے بچوں کی ماں ہے تو براہ کرم ہمارا اپنی نندوں کے ساتھ موازنہ نہ کریں۔

کراچی : پاکستان شوبز انڈسٹری کی معروف ماڈل، میزبان و اداکارہ نتاشا حسین نے کہا ہے کہ وہ شہروز سبزواری کو اداکار نہیں سمجھتیں۔ایک نجی ٹی وی پرواگرام میں گفتگو کرتے ہوئے انہوں نے کہا شہروز سبز واری اچھے اداکار نہیں ہیں اور انہیں شوبز انڈسٹری میں کام صرف اپنے والد کی وجہ سے ملا ہے تاہم ان کے والد بہروز سبزواری بہترین اداکار ہے۔اسی طرح انہوں نے ایک اور سوال کے جواب میں آمنہ حق کو بہترین ماڈل اور بْری اداکارہ قرار دیا جبکہ سونیا امام کے بارے میں بات کرتے ہوئے کہا انہیں ماڈل نہیں سمجھتی۔

کراچی: پاکستانی معروف ٹک ٹاکر، اداکارہ، ماڈل و یوٹیوبر جنت مرزا نے ٹرولنگ کا نشانہ بننے کے بعد خود کو ڈرامہ سیریل پری زاد اور ہم کہاں کے سچے تھے۔ آفر ہونے کے ثبوت شیئر کیے ہیں۔اپنے ایک انٹرویو کے دوران انہوں نے کہا کہ اْنہیں پاکستانی ڈرامہ انڈسٹری کی تاریخ میں بلاک بسٹر ثابت ہونے والے ڈرامے پری زاد اور ہم کہاں کے سچے تھے کی آفر ہوئی تھی۔ تاہم وہ زیادہ تر جاپان میں رہتی ہیں اس لیے وہ یہ ڈرامے نہیں کر سکیں۔جنت مرزا کے اس بیان کے بعد اْنہیں سوشل میڈیا صارفین کی جانب سے خوب تنقید کا نشانہ بنایا گیا تھا۔جنت مرزا کو انٹرویو کے دوران دیئے گئے اپنے متعدد بیانات پر ٹرولنگ کا سامنا تھا جس پر انہوں نے خاموشی توڑتے ہوئے شواہد شیئر کر دیئے ہیں۔انسٹاگرام اکاؤنٹ کی اسٹوری پر اداکارہ نے واٹس ایپ چٹ شیئر کرتے ہوئے لکھا ہے کہ یہ شواہد ہیں کہ اْنہیں نجی ٹی وی چینلز سے ڈراموں کی آفرز آئی تھیں۔اداکارہ کا اپنی اسٹوریز میں مزید لکھنا ہے کہ اْنہیں سوشل میڈیا پر اپنے بیانات کی وضاحت دینے کی ضرورت نہیں تھی مگر صورتحال بہت گھمبیر اور ہاتھ سے نکلے جا رہی تھی اس لیے انہوں نے اپنی ذاتی چیٹس کے اسکرین شاٹس شیئر کیے ہیں۔

کراچی: انٹربینک اور اوپن مارکیٹ میں ڈالر مزید سستا ہوگیا، پاکستانی روپے کی قدر میں اضافے کا سلسلہ جاری ہے۔آئی ایم ایف سے معاہدے کی خبروں اور سعودی عرب سے دو ارب ڈالر ملنے کے بعد پاکستان میں امریکی کرنسی کی قیمت میں مسلسل کمی دیکھی جارہی ہے۔ڈیلرز کے مطابق (بدھ کو) پاکستانی کرنسی کے مقابلے میں امریکی ڈالر کی قیمت ایک روپے 7 پیسے گرگئی، جس کے بعد نرخ 277 روپے 50 پیسے پر آگئے۔ دوسری جانب اوپن مارکیٹ میں بھی ڈالر کی قدر میں کمی جاری ہے، امریکی کرنسی مزید 2 روپے سستی ہوکر 280 روپے پر آگئی۔ڈیلرز کا کہنا ہے کہ انٹربینک میں امریکی ڈالر دو روز کے دوران 2 روپے 30 پیسے اور اوپن مارکیٹ میں 3 روپے سستا ہوچکا ہے۔واضح رہے کہ کرنسی ایکسچینج ایسوسی ایشن کے سربراہ ملک بوستان نے دعویٰ کیا تھا کہ چند روز میں ڈالر 250 روپے پر آجائے گا۔

اسلام آباد: شیریں مزاری کا نام ای سی ایل اور پی این آئی ایل فہرست سے نکالنے کی درخواست پرعدالت نے فریقین کو نوٹس جاری کر کے تین دن میں رپورٹ جمع کرانے کی ہدایت کردی۔سابق وفاقی وزیر شیریں مزاری کا نام ای سی ایل اور پی این آئی ایل فہرست سے نکالنے کی درخواست پر سماعت ہوئی،جسٹس طارق محمود جہانگیری نے درخواست پر سماعت کی۔شریں مزاری اپنے وکلاء احسن جمال اور ایمان مزاری کے ہمراہ عدالت میں پیش ہوئیں،عدالت نے شریں مزاری کے وکیل سے سوال کیا کہ ای سی ایل میں آپ کا نام ہے تو کاپی کہاں ہے؟۔ وکیل شیریں مزاری نے بتایا کہ ای سی ایل میں نام ڈالنے کی کوئی کاپی نہیں،میڈیا رپورٹ سے پتہ چلا، عدالت نے استفسار کیا کہ اخباری خبر میں بھی آپ کا نام نہیں تو آپ عدالت کیسے آ سکتے ہیں؟آرٹیکل میں تو صرف ایک فیگر سے متعلق بتایا گیا ہے۔ اسلام آباد ہائیکورٹ نے وکیل شیریں مزاری سے سوال کیا کہ آپ کے کیسز کا کیا بنا؟ جس پر وکیل نے بتایا کہ شیریں مزاری کو کچھ کیسز سے نکال دیا گیا ہے،کچھ ابھی برقرار ہیں۔ عدالت نے وزارت داخلہ اور ایف آئی اے کو متعلقہ افسر تعینات کرنے کا حکم دے دیا،جبکہ فریقین کو نوٹس جاری کر کے تین دن میں رپورٹ جمع کرانے کی ہدایت کرتے ہوئے مزید سماعت19 جولائی تک ملتوی کر دی۔