Category تازہ ترین

سابق صدر آصف زرداری نے اپوزیشن اتحاد پاکستان ڈیموکریٹک موومنٹ (پی ڈی ایم) اور جمعیت علمائے اسلام کے سربراہ مولانا فضل الرحمان سے ٹیلیفونک رابطہ کیا ہے۔

آصف زرداری نے مولانا فضل الرحمان سے فون پر مزاج پرسی کی اور کہا کہ میں آپ کی جلد صحتیابی کیلئے دعا کررہا ہوں۔

ٹیلیفونک رابطے میں دونوں رہنماؤں نے ملکی سیاسی صورتحال اور پی ڈی ایم کے مستقبل پر بھی گفتگو کی۔

خیال رہے کہ اپوزیشن اتحاد پاکستان ڈیموکریٹک موومنٹ میں سینیٹ میں اپوزیشن لیڈر کی تقرری کے بعد اختلافات سامنے آئے ہیں۔

وہی سربراہ اتحاد مولانا فضل الرحمان بھی بیمار ہیں اور انہوں نے سیاسی سرگرمیاں معطل کی ہوئی ہیں۔

وفاقی وزیر اسد عمر نے کورونا وائرس کے پھیلاؤ کے باعث برطانوی حکومت کی جانب سے پاکستان کو سفری پابندی کی ‘ریڈ لسٹ’ میں شامل کرنے کے فیصلے پر سوال کھڑا کردیا.

مائیکرو بلاگنگ ویب سائٹ ٹوئٹر پر برطانوی رکن پارلیمان ناز شاہ کا خط شیئر کر کے انہوں نے کہا کہ ‘ہر ملک کو اپنے شہریوں کے تحفظ کے لیے فیصلے لینے کا حق ہے’

اسد عمر کا کہنا تھا کہ ‘تاہم برطانوی حکومت کی جانب سے پاکستان سمیت کچھ ممالک کو ریڈ لسٹ میں شامل کرنے کے حالیہ فیصلے سے یہ جائز سوال پیدا ہوتا ہے کہ کیا ممالک کا انتخاب سائنسی بنیاد پر ہوا یا خارجہ پالیسی کی بنیاد پر کیا گیا۔

خیال رہے کہ گزشتہ روز برطانوی حکومت نے پاکستان، بنگلہ دیش، کینیا اور فلپائن کو ریڈ لسٹ میں شامل کرتے ہوئے ان ممالک سے برطانوی یا آئرش شہریوں کے سوا دیگر مسافروں کی آمد پر پابندی عائد کردی تھی۔

یہاں یہ بات مدِ نظر رہے کہ سفری پابندی عائد ہونے کی قیاس آرائیاں مارچ کے اوائل میں سامنے آنا شروع ہوگئی تھیں جب پنجاب اور اسلام آباد میں کورونا وائرس کیسز میں اضافہ دیکھنے میں آیا تھا۔

برطانوی رکن پارلیمنٹ ناز شاہ نے برطانوی سیکریٹری اسٹیٹ برائے خارجہ، کامن ویلتھ اینڈ ڈیولپمنٹ افیئرز کو 30 مارچ کو لکھے ایک خط میں کہا تھا کہ پاکستان ریڈ لسٹ میں شامل ہونے والا ہے اور میرے حلقے میں بڑی تعداد میں پاکستانی کمیونٹی رہتی ہے اس لیے میرا سادہ سا سوال یہ ہے کہ یہ فیصلہ کس سائنسی ڈیٹا کی بنیاد پر لیا۔

انہوں نے کہا کہ مارچ کے اوائل میں بھی میں نے یہی سوالات پارلیمانی سوالات کے طور پر اٹھائے تھے جس پر مجھے کہا گیا کہ ان سوالات کا جواب دینے کے لیے مزید وقت درکار ہے۔

ناز شاہ نے کہا تھا کہ گزشتہ 7 روز کے تازہ ترین اعداد و شمار کے مطابق فرانس، جرمنی اور بھارت میں فی لاکھ افراد میں انفیکشن کی تعداد خاصی بلند ہے۔

خط میں درج اعداد و شمار کے مطابق مختلف ممالک میں ایک لاکھ افراد میں کورونا ٹیسٹ مثبت آنے کی شرح درج ذیل ہے:

جرمنی: 137

فرانس: 403

برطانیہ: 54

بھارت: 24

کینیا: 17

بنگلہ دیش: 15

پاکستان: 13

خط میں کہا گیا کہ یہ بات بھی مدِ نظر رہے کہ پاکستان میں وائرس کی جنوبی افریقی قسم بھی مسئلہ نہیں ہے جیسا کہ فرانس اور دیگر ممالک کے لیے ہے۔

ناز شاہ نے کہا کہ اس سے یہ سوال پیدا ہوتا ہے کہ حکومت برطانیہ نے فرانس، جرمنی اور بھارت کو ریڈ لسٹ میں کیوں شامل نہیں کیا۔

ساتھ ہی انہوں نے یہ بھی کہا کہ جو کچھ حکومت کہ رہی ہے اس کے برعکس یہ واضح ہے کہ فیصلے سائنسی اعداد و شمار کی بنیاد پر نہیں لیے جارہے۔

ان کا کہنا تھا کہ یہ جان بوجھ کر پاکستان اور پاکستانی کمیونٹی کے خلاف امتیازی سلوک ہے۔

خیال رہے کہ ب گزشتہ روز پاکستان میں برطانوی ہائی کشمنر نے ایک ویڈیو پیغام میں اعلان کیا تھا کہ برطانوی حکومت نے کووڈ-19 کیسز پر متعلق نظرثانی کے بعد پاکستان کو سفری پابندیوں کی ریڈ لسٹ میں شامل کرنے کا فیصلہ کیا ہے۔

انہوں نے کہا تھا کہ ریڈ لسٹنگ کا مطلب یہ ہے کہ صرف انگلینڈ اور آئرلینڈ کے شہریوں اور برطانیہ میں رہائش کے حقوق رکھنے والے افراد کو برطانیہ آنے کی اجازت ہوگی۔

برطانوی ہائی کمشنر نے کہا تھا کہ اگر وہ برطانیہ آمد سے 10 روز قبل پاکستان میں مقیم رہے ہوں گے تو مسافروں کو لازمی طور پر 10 روز تک ہوٹل میں قرنطینہ کرنا ہوگا اور اس قیام کی ادائیگی بھی خود کرنی ہوگی۔

وزیراعظم کے مشیر برائے احتساب و داخلہ بیرسٹر شہزاد اکبر نے کہا ہے کہ جہانگیر ترین نے خدشات ظاہر کیے ہیں کہ ان کو ٹارگٹ کیا جارہا ہے حالانکہ ایسا نہیں ہے جبکہ کسی کا تحفظ بھی نہیں کیا جارہا ہے۔

اسلام آباد میں پریس کانفرنس کے دوران شہزاد اکبر نے کہا کہ مئی 2020 میں شوگر انکوائری کمیشن کی رپورٹ آئی تھی جس میں منی لانڈرنگ اور کارپوریٹ فراڈ سمیت دیگر معاملات کی بھی نشاندہی کی گئی تھی، حکومت نے اس رپورٹ کے تناظر میں نیب، ایف آئی اے، مسابقتی کمیشن اور صوبائی اینٹی کرپشنز کو ان معاملات کی تحقیقات کی ذمہ داری سونپی۔

انہوں نے کہا کہ حکومت کے اس فیصلے کو شہباز شریف اور جہانگیر ترین کے گروپوں نے عدالتوں میں چیلنج کیا اور اس معاملے کو اسلام آباد ہائی کورٹ، لاہور ہائی کورٹ اور سندھ ہائی کورٹ میں چیلنج کیا گیا۔

ان کا کہنا تھا کہ بعد ازاں سپریم کورٹ میں بھی چیلنج کیا گیا تاہم عدالتوں نے قرار دیا کہ حکومتی فیصلہ درست ہے۔

شہزاد اکبر نے کہا کہ جہانگیر ترین نے خدشات ظاہر کیے ہیں کہ ان کو ٹارگٹ کیا جارہا ہے حالانکہ ایسا نہیں ہے، ایف آئی اے شوگر کمیشن کے تناظر میں اقدامات کر رہی ہے، کسی کو قانون سے ہٹ کر نہ ہی ٹارگٹ کیا جارہا ہے اور نہ تحفظ فراہم کیا جارہا ہے۔

ان کا کہنا تھا کہ کسی اپنے کا احتساب کرنا تکلیف دہ عمل ہے لیکن اگر ان پر الزام غلط ثابت ہوجائے تو اس سے خوشی ہوگی، کسی ادارے کی راہ میں رکاوٹ نہیں ڈال سکتے، ہمارا کوئی ٹارگٹ نہیں ہے اور نہ ہمارے لیے کوئی مقدس گائے ہے۔

انہوں نے کہا کہ ایف آئی اے کی جانب سے رمضان شوگر ملز اور الحدیبیہ ملز کے خلاف مقدمے میں 25 ارب روپے کی منی لانڈرنگ کا الزام لگایا گیا ہے، اس مقدمے میں شہباز شریف اور حمزہ شہباز شریف سے تحقیقات ہوچکی ہیں جبکہ سلمان شہباز ملک سے مفرور ہیں جبکہ جہانگیر ترین گروپ کے خلاف مقدمے میں 4.35 ارب روپے کی ہیرپھیر کا الزام لگایا گیا ہے۔

ان کا کہنا تھا کہ جب شوگر کمیشن کی رپورٹ پر مختلف اداروں نے کارروائی شروع کی تو چینی کی قیمت کم ہوگئی تاہم کچھ عرصہ بعد کرشنگ سینزن ہونے کے باوجود چینی کی قیمت میں اضافہ ہوا۔ انہوں نے کہا کہ پیداواری لاگت کا تعین کرکے چینی کی قیمت کا تعین کیا جاسکتا ہے ماضی میں کبھی چینی کی ایکس مل قیمت مقرر نہیں کی گئی۔

معاون خصوصی نے کہا کہ موجودہ حکومت نے چینی کی ایکس مل قیمت مقرر کی ہے، پنجاب میں چینی کی ایکس مل 80 روپے فی کلو مقرر کی گئی ہے، سندھ حکومت سے بھی اس حوالے سے بات چیت جاری ہے۔

انہوں نے کہا کہ حکومت کے پاس ایک رپورٹ آئی کہ رمضان المبارک کے دوران چینی کی قیمتوں میں 20 سے 30 روپے فی کلو اضافے کا امکان ہے جس پر ایف آئی اے نے لاہور اور کراچی میں سٹہ بازوں کے خلاف کارروائی کی۔

ان کا کہنا تھا کہ سٹہ بازوں کے کمپیوٹر اور لیپ ٹاپ پکڑے گئے، چھ واٹس ایپ گروپ چینی کی قیمت کا تعین کر رہے تھے، ان واٹس ایپ گروپوں کے ذریعے چینی کے اسٹاک کی خرید و فروخت ہو رہی تھی جبکہ چینی اسی طرح اسٹاک میں موجود تھی۔

شہزاد اکبر نے کہا کہ یہ سٹہ باز جعلی اور بے نامی اکاؤنٹس میں رقم بھیجتے تھے، سٹہ بازوں کے 392 بے نامی اکاؤنٹس سے 667 ارب روپے کے لین دین کا پتہ چلا جن کو منجمد کردیا گیا ہے جبکہ دس ایف آئی آرز درج کی گئی ہیں۔

انہوں نے کہا کہ حکومت پنجاب نے قانون سازی کی ہے جس کے تحت چینی اور دیگر اشیائے خور و نوش کی قیمتوں میں خود ساختہ اضافے کو جرم قرار دیا گیا ہے، پنجاب میں گنے کی خریداری سے لے کر چینی کی رسد تک کی ذمہ داری کین کمشنر کو دی گئی ہے۔

ان کا کہنا تھا کہ ایف آئی اے بہترین کارکردگی کا مظاہرہ کر رہی ہے، وزیراعظم عمران خان نے قانون کے مطابق اقدامات کی ہدایت کی ہے۔

ایک سوال پر معاون خصوصی نے کہا کہ وفاقی کابینہ میں ہر شخص کو رائے دینے کا حق حاصل ہے تاہم حتمی فیصلہ تفصیلی غور و خوض کے بعد کیا جاتا ہے۔

کراچی: شہر میں موجودہ درجہ حرارت 44 ڈگری گریڈ کو چھو گیا ہے۔

کراچی میں گرمی کی شدید لہر نے ماضی کے تمام ریکارڈ توڑ دیئے ہیں، محکمہ موسمیات کا کہنا ہے کہ شہر کا موجودہ درجہ حرارت 44 ڈگری سینٹی گریڈ ریکارڈ ہوا، 14 اپریل 1947 کو کراچی کا درجہ حرارت 44.4 ڈگری سینٹی گریڈ ریکارڈ کیا گیا تھا۔

محکمہ موسمیات نے بتایا کہ دوپہر ایک بجے شہر کا درجہ حرارت 42 ڈگری سینٹی گریڈ ریکارڈ ہوا تھا جو یکدم 2 ڈگری اوپر چلا گیا، شہر میں 15 سے 20 کلومیٹر فی گھنٹہ کی رفتار سے جنوب مشرقی ہوائیں چل رہی ہیں اور اس وقت ہوا میں نمی کا تناسب 5 فیصد ہے، تاہم شام سے سمندری ہوائیں بحال ہونے کی توقع ہے۔

عوام کی ناک سے خون بہنے اور ہونٹ پھٹنے کی شکایات
ڈاکٹر آصف شیخ نے نجی ٹی وی سے گفتگو کرتے ہوئے کہا کہ کراچی میں میں خشک موسم چل رہا ہے، گرمی میں نسیں پھول جاتی ہیں اور جب ناک خشک ہو جاتی ہے تو اس کو دبانے سے خون بہنا شروع ہو جاتا ہے۔

انہوں نے مشورہ دیا کہ ایسی صورت میں عوام دن میں تین سے چار بار ویزلین ناک پر لگائیں جس سے یہ خشک نہیں رہے گی جبکہ ماسک پہنے رہیں گے تو اس سے بھی یہ مسئلہ پیش نہیں آئے گا۔

دوسری جانب شہر قائد میں گرمی کی شدت بڑھنے کے ساتھ ہی کے الیکٹرک کی جانب سے غیراعلانیہ لوڈ شیڈنگ کا سلسلہ شروع کردیا گیا ہے۔

لانڈھی، کورنگی، ملیر، پی ای سی ایچ ایس، گلشن معمار، گلشن اقبال، گلستان جوہر، نیو کراچی، فیڈرل بھی ایریا، اورنگی ٹاؤن، ناظم آباد سمیت شہر کے مختلف علاقوں میں لوڈ شیڈنگ کا سلسلہ شروع کردیا گیا ہے اور 4 سے 10 گھنٹے کی غیراعلانیہ لوڈشیڈنگ کی جا رہی ہے۔

شدید گرمی میں کے الیکٹرک کی جانب سے بجلی کی بندش پر شہری بلبلا اٹھے اور بجلی کمپنی کے سوشل میڈیا پیج پر اپنی بھڑاس نکالتے نظر آئے۔

کے الیکٹرک کی جانب سے بجلی کی اس غیراعلانیہ لوڈ شیڈنگ پر تاحال کوئی بیان جاری نہیں کیا گیا۔

ملتان: نجی لئیق رفیق اسپتال کے میڈیکل کیمپ میں غلط سرجری کے باعث 11 مریضوں کی ایک آنکھ کی بینائی متاثر ہوگئی۔

ملتان کے علاقے گلابی والا میں انصاف صحت کارڈ پر موتیے کا آپریشن کرانے والے 11 مریض اس آنکھ کی بینائی سے محروم ہوگئے۔ ان مریضوں میں خواتین بھی شامل ہیں۔

اس اسپتال میں پہلی بار یہ سرجری کی گئی اور ڈاکٹر حسنین مشتاق نے یہ آپریشن کیا۔ اس حوالے سے صحت انصاف کارڈ کے حامل مستحق مریضوں کی مفت سرجری کرکے حکومت سے انصاف کارڈ کے تحت رقم کلیم کرنے کا فیصلہ کیا گیا تھا۔

اسپتال کے ڈائریکٹر ڈاکٹر سید علی عظمت عابدی نے کہا کہ آئی سرجن ڈاکٹر حسنین مشتاق کے کہنے پر پہلی بار ہسپتال میں آئی سرجری کروائی گئی، جس کے بعد مریضوں کو ایک دن ہسپتال میں رکھنے کے بعد ڈسچارج کیا گیا، آئی سرجن ڈاکٹر حسنین مشتاق سرجری کا سب سامان خود لے کر آئے، ڈاکٹر حسنین کے مطابق موسمی اثرات کے باعث بھی ایسا انفیکشن ہو سکتا ہے۔

وزیراعلیٰ پنجاب سردار عثمان بزدار نے مریضوں کے بینائی سے محروم ہونے کے واقعہ کا نوٹس لیتے ہوئے سیکرٹری صحت اور کمشنر ملتان ڈویژن سے رپورٹ طلب کرلی۔ انہوں نے کہا کہ واقعے کی غیر جانبدارانہ تحقیقات کرکے رپورٹ وزیراعلیٰ آفس پیش کی جائے اور ذمہ داروں کا تعین کرکے قانون کے مطابق کارروائی کی جائے، بینائی سے محروم افراد کےعلاج معالجے پر خصوصی توجہ دی جائے، حقائق منظر عام پر لائے جائیں اور ان افراد کی دادرسی کی جائے۔

ادھر محکمہ صحت کو بھی ہوش آگیا۔ سی ای او ہیلتھ نے واقعے کا نوٹس لے لیا۔ ڈسٹرکٹ ہیلتھ آفیسر (ڈی ایچ او) ڈاکٹر فاروق کی سربراہی میں پانچ رکنی کمیٹی تشکیل دے دی جس نے نجی ہسپتال کا دورہ کرکے صورتحال کا جائزہ لیا۔ ہیلتھ کیئر کمیشن کی ٹیم نے بھی انکوائری کے لیے اسپتال کا جائزہ لیا۔

انکوائری ٹیم میں ضلعی سرویلنس کوآرڈینیٹر، ڈی ڈی ایچ او ہیڈ کوارٹر ڈاکٹر ہادی، ڈرگ کنٹرولر عبدالطیف، ڈاکٹر ارم ماہر امراض چشم موجود ہیں۔

صوبائی وزیر صحت ڈاکٹریاسمین راشدنے بھی معاملے کا سخت نوٹس لیتے ہوئے کہا کہ یہ انتہائی افسوس ناک واقعہ ہے۔

شمالی وزیرستان: فورسز کے آپریشن کے دوران فائرنگ کے تبادلے میں بویا کا رہائشی دہشت گرد اشرف اللہ عرف طوفانی ہلاک ہوگیا.

پاک فوج کے شعبہ تعلقات عامہ ( آئی ایس پی آر) کے مطابق سیکیورٹی فورسز نے دہشت گردوں کی موجودگی کی اطلاع پر شمالی وزیرستان کے علاقے بویا میں آپریشن کیا۔ اس دوران دہشت گردوں کی جانب سے فائرنگ کی گئی، اور فائرنگ کے تبادلے کے دوران بویا کا رہائشی دہشت گرد اشرف اللہ عرف طوفانی ہلاک ہوگیا۔

آئی ایس پی آر نے بتایا کہ دہشت گرد اشرف اللہ تحریک طالبان پاکستان (ٹی ٹی پی) کا سرگرم دہشت گرد تھا، اور وہ ٹارگٹ کلنگ ، سکیورٹی فورسز کے خلاف دہشت گردی کی کارروائیوں ، بھتہ خوری اور دھماکہ خیز آلات لگانے میں ملوث رہا ہے.

کراچی: وزیر تعلیم سندھ کی دو ہفتے کے لئے اسکول بند کرنے کی تجویز دی ہے۔

وزیر تعلیم و محنت سندھ سعید غنی کی زیر صدارت محکمہ تعلیم سندھ اسٹیرنگ کمیٹی کا اجلاس ہوا، جس میں وزیر تعلیم نے دو ہفتے کے لئے اسکول بند کرنے کی تجویز دی۔ تاہم ذرائع کا کہنا ہے کہ پرائیوٹ اسکولز مالکان نے وزیر تعلیم کو فیصلے پر غور کرنے کی درخواست کی ہے۔

ذرائع کے مطابق اسٹیرنگ کمیٹی کے اجلاس میں اسکول بند کرنے سے متعلق دو تجاویز سامنے آئی ہیں، کچھ ممبران کمیٹی کا کہنا ہے کہ اسکولوں کو 15 دن کے لیے بند کردیا جائے۔ جب کہ دوسری جانب کچھ ممبران نے تمام اسکولوں کو بند کرنے کی مخالفت کرتے ہوئے تجویز دی ہے کہ آٹھویں جماعت تک اسکولوں کو بند کردیا جائے اور نویں سے بارہویں تک کلاسز جاری رکھی جائیں۔ جب کہ پرائیوٹ اسکولز کے نمائندے نے اعتراض کرتے ہوئے مطالبہ کیا کہ پہلے عوامی مقامات، سینما، واٹر پارک بند کرائیں، مارکیٹیں کھلی ہیں تو اسکول کیوں بند کیے جائیں۔ جس پر وزیرتعلیم سندھ سعید غنی نے کہا ہے کہ اسٹیئرنگ کمیٹی کی تجاویز کو این سی او سی میں رکھا جائے گا۔
دوسری جانب محکمہ تعلیم سندھ نے ماہ رمضان میں اسکولوں کے اوقات میں تبدیلی کردی ہے، جس کے تحت صبح کی شفٹ والے اسکولز کے اوقات 7:30 سے 11:30 ہوں گے، اور دوسری شفٹ کے اسکولز 11:45 سے 02:45 تک کھلیں گے۔

پاکستان میں عالمی وبا کورونا کا پھیلاؤ روز بروز شدت اختیار کرتا جارہا ہے اور حکام خدشہ ظاہر کرچکے ہیں کہ کیسز میں اضافہ یونہی جاری رہا تو صورتحال وبا کی پہلی لہر کے عروج سے زیادہ خراب ہوسکتی ہے۔

کووِڈ-19 کے اعداد و شمار کے لیے بنائی گئی سرکاری ویب سائٹ کے مطابق پاکستان میں گزشتہ 24 گھنٹوں کے دوران ملک میں 4 ہزار 723 افراد میں وائرس کی تشخیص ہوئی اور 84 مریض انتقال کر گئے۔

وائرس کی تشخیص کے لیے 31 مارچ کو مجموعی طور پر 50 ہزار 186 ٹیسٹس کیے گئے جس کے نتیجے میں ملک میں کورونا کیسز مثبت آنے کی شرح 9.4 فیصد رہی جبکہ فعال کیسز 58 ہزار 500 تک پہنچ چکے ہیں۔

ملک بھر میں مجموعی طور پر اب تک کورونا وائرس سے 6 لاکھ 82 ہزار 888 افراد متاثر ہو چکے ہیں جن میں سے 14 ہزار 697 زندگی کی بازی ہار چکے ہیں۔

علاوہ ازیں گزشتہ 24 گھنٹے کے دوران مزید 2 ہزار 486 مریض صحتیاب ہوئے اور مجموعی طور پر اب تک 6 لاکھ 9 ہزار 691 مریض صحتیاب ہوچکے ہیں۔

واضح رہے کہ ملک میں کورونا وائرس کا پہلا کیس 26 فروری 2020 کو رپورٹ ہوا تھا، جس کے بعد سے ملک میں وبا کے پھیلاؤ میں اتار چڑھاؤ جاری ہے اور اب تک بیماری کی 2 لہریں دیکھی جاچکی ہیں جبکہ تیسری لہر کا پھیلاؤ جاری ہے۔

تیسری لہر کے پیشِ نظر کئی علاقوں میں دوبارہ لاک ڈاؤن اور اسمارٹ لاک ڈاؤن لگایا گیا ہے جبکہ کاروباری سرگرمیوں کے اوقات کار بھی محدود کردیے گئے ہیں اس کے علاوہ زیادہ متاثرہ علاقوں میں تعلیمی ادارے بھی بند ہیں۔

پاکستان میں آج 3 اپریل کو چاروں صوبوں اور وفاقی اکائیوں میں کورونا وائرس کے کیسز سے متعلق رپورٹ کچھ یوں ہے:

پنجاب
وبا کی تیسری لہر نے صوبہ پنجاب کو بری طرح اپنی لپیٹ میں لے رکھا ہے اور گزشتہ 24 گھنٹوں کے دوران صوبے میں مزید 2 ہزار 403 افراد اس وائرس کا شکار بنے اور 38 انتقال کر گئے۔

پنجاب میں اب تک 2 لاکھ 28 ہزار 356 کورونا کیسز رپورٹ ہو چکے ہیں اور وبا کے باعث مرنے والوں کی تعداد 6 ہزار 523 تک پہنچ گئی ہے۔

سندھ
ملک کے دوسرے بڑے صوبے سندھ میں وبائی صورتحال نسبتاً بہتر ہے اور یہاں گزشتہ 24 گھنٹوں میں 256 کیسز رپورٹ ہوئے جس کے بعد مجموعی کیسز کی تعداد 2 لاکھ 66 ہزار 173 ہو گئی ہے۔

صوبے میں کورونا وائرس سے مزید 2 مریضوں کا انتقال ہوا، مجموعی طور پر یہاں اب تک 4 ہزار 506 افراد لقمہ اجل بن چکے ہیں۔

خیبر پختونخوا
صوبہ خیبر پختونخوا میں بھی بیماری کا پھیلاؤ شدت اختیار کر گیا ہے اور یہاں گزشتہ روز ایک ہزار 7 نئے کیسز سامنے آئے جبکہ 35 مریض دم توڑ گئے۔

خیبر پختونخوا میں اب تک رپورٹ ہونے والے کیسز کی مجموعی تعداد 90 ہزار 262 ہے جبکہ 2 ہزار 417 مریض انتقال کر چکے ہیں۔

بلوچستان
بلوچستان میں کئی ماہ بعد یومیہ رپورٹ ہونے والے کیسز کی تعداد 69 تک جا پہنچی اور 2 مریض دم توڑ گئے۔

صوبے میں اب تک مجموعی طور پر 19 ہزار 679 کیسز اور 211 اموات سامنے آئی ہیں۔

اسلام آباد
اسلام آباد میں گزشتہ 24 گھنٹوں کے دوران مزید796 نئے کیسز رپورٹ ہوئے جبکہ مزید 2 مریض اس وبا کے باعث زندگی کی بازی ہار گئے۔

وفاقی دارالحکومت میں اب تک مجموعی طور پر 60 ہزار 197 افراد وائرس کا شکار ہوچکے ہیں جن میں سے انتقال کرجانے والوں کی تعداد 574 ہے۔

آزاد کشمیر
آزاد کشمیر میں گزشتہ 24 گھنٹوں کے دوران مزید 192 افراد میں وائرس کی تصدیق ہوئی جبکہ 5 مریضوں کا انتقال ہوگیا۔

آزاد کشمیر میں مجموعی طور پر 13 ہزار 176 کیسز رپورٹ ہوچکے ہیں جس میں سے 363 انتقال کر گئے۔

گلگت بلتستان
گلگت بلتستان میں ملک کے دیگر حصوں کی مناسبت سے بیماری کا پھیلاؤ کافی حد تک کنٹرول میں ہے تاہم گزشتہ روز 12 نئے کیسز رپورٹ ہوئے یوں مجموعی کیسز 5 ہزار 45 ہوگئے۔

گلگت بلتستان میں 9 مارچ کے بعد مزید کسی مریض کا انتقال نہیں ہوا اور اموات کی تعداد 103 پر برقرار ہے۔

اسلام آباد: وزیراعظم عمران خان کا کہنا ہے کہ کشمیر کو حق خود ارادیت دئیے بغیر بھارت کے ساتھ تعلقات نارمل نہیں ہوسکتے۔

وزیراعظم عمران خان کی زیر صدارت بھارت کےساتھ تعلقات کے حوالے سے اہم اجلاس ہوا، جس میں وزیرخارجہ شاہ محمود قریشی اور وزارت خارجہ کے اعلی حکام نے شرکت کی۔ اجلاس میں وزارت خارجہ کی جانب سے بھارت کے ساتھ تجارت کے حوالے سے تجاویز پر بریفنگ دی گئی، اور اتفاق ہوا کہ مقبوضہ کشمیر کی آئینی صورتحال بحال ہونے تک بھارت کے ساتھ کسی قسم کی تجارت نہیں ہوسکتی۔

وزیراعظم عمران خان کا کہنا تھا کہ ہمارا اصولی موقف ہے کہ کشمیر کا مسئلہ حل کئے بغیر بھارت کے ساتھ تجارت نہیں ہوگی، اس سے غلط تاثر جائے گا کہ ہم کشمیر کو نظر انداز کرکے بھارت سے تجارت شروع کریں، کشمیر کو حق خود ارادیت دئیے بغیر بھارت کے ساتھ تعلقات نارمل نہیں ہوسکتے۔

کراچی: چیئرمین پیپلزپارٹی بلاول بھٹو زرداری کا کہنا ہے کہ حکومت معاشی فیصلے آرڈیننس کےذریعے کرناچاہتی ہے، آرڈیننس سے پاکستان کا اپنا ہی اسٹیٹ بینک آئی ایم ایف کے کہنے پر چلے گا، اسٹیٹ بینک کے حوالے سے صدارتی آرڈیننس کو چیلنج کریں گے۔

جیکب آباد میں پریس کانفرنس کرتے ہوئے چیئرمین پیپلزپارٹی بلاول بھٹو زرداری کا کہنا تھا کہ 2018 کے الیکشن میں پورے ملک میں دھاندلی ہوئی، اس وقت کوشش کی گئی کہ عوامی نمائندوں کے بجائے من پسند نمائندے منتخب ہوں، 2018 میں جو دھاندلی شروع ہوئی تھی وہ آج تک جاری ہے، عوام کے نمائندوں کو روکا جارہا ہے، ہمارے جیالوں کو دباو میں لانے کی کوشش کی جارہی ہے، الیکشن کمیشن سے مطالبہ ہے ڈسکہ کی طرح ملک بھر میں شفافیت لائے، جہاں جہاں دھاندلی ہوئی وہاں الیکشن کمیشن کو آزاد خود مختار کردار ادا کرناچاہیے۔

بلاول بھٹو نے کہا کہ اپوزیشن کے خلاف نیب کو استعمال کیا جارہا ہے، باقی جماعتیں نیب کے حوالے سے پالیسی تبدیل کر دیتی ہیں، ان جماعتوں پر کیسز نہ ہوں تو کچھ نہیں کہتی، لیکن ہم کہتے ہیں نیب کالا قانون ہے، آصف زرداری کہتے ہیں کہ نیب اور معیشت ساتھ ساتھ نہیں چل سکتے۔
چیئرمین پیپلزپارٹی کا کہنا تھا کہ مہنگائی کی سونامی بڑھتی جارہی ہے، حکومت، بجلی، گیس اور پیٹرول کی قیمتوں میں اضافہ کررہی ہے، اور اپنے ہی ادارے آئی ایم ایف کے حوالے کررہی ہے، کورونا ویکسین کے حوالے سے پاکستان خطے کے تمام ممالک سے پیچھے ہے، ملک کے معاشی بحران کی وجہ عمران خان کی حکومت ہے، تین سال میں 2 وزیرخزانہ تبدیل ہوئے لیکن پالیسی ایک ہی ہے، حکومت کی پالیسی امیروں کو ریلیف اور غریبوں کو تکلیف پہنچاناہے۔

بلاول بھٹو نے کہا کہ پی ٹی آ ئی ایم ایف ڈیل کی وجہ سے آج تاریخی بیروزگاری ہے، حکومت معاشی فیصلے آرڈیننس کےذریعے کرناچاہتی ہے، آرڈیننس سے پاکستان کا اپنا ہی اسٹیٹ بینک آئی ایم ایف کے کہنے پر چلے گا، اسٹیٹ بینک کے حوالے سے صدارتی آرڈیننس کو چیلنج کریں گے، امید ہے ہمیں عدالتوں سے انصاف ملے گا۔

پیپلزپارٹی کے چیئرمین نے مزید کہا کہ مجھے بتایا گیا کہ پیپلزپارٹی اور (ن) لیگ کا ماضی ایسا ہے کہ ساتھ چلنا مشکل ہے، لیکن ان تمام خیالات کے باوجود میں نے تین سال پوری کوشش کی ساری جماعتوں کو ساتھ لے کر چلوں، اب بھی یہی عزم ہے کہ تمام جماعتیں ساتھ مل کر چلیں اور تمام معاملات مل کر حل کریں، اپوزیشن کی لڑائی کا حکومت کو کسی صورت فائدہ نہ ہو، ہم پی ڈی ایم کے پلیٹ فارم سے حکومت کو ٹف ٹائم دینا چاہتے ہیں، اپوزیشن کو تقسیم کرنے کی کوئی کوشش کامیاب نہیں ہوگی، اس حکومت اور عمران خان کو جانا پڑے گا، پیپلزپارٹی کی سی ای سی کے اجلاس میں تمام معاملات زیر غورآئیں گے۔