Category تازہ ترین

لاہور: پاکستان مسلم لیگ ن کی نائب صدر مریم نواز نے کہا ہے کہ ثابت ہوگیا حکومت نے ڈسکہ کے عوام کے ووٹ پر ڈاکہ ڈالا۔

مریم نواز نے ٹویٹ کرتے ہوئے کہا ہے کہ مسلم لیگ ن کے تمام شیروں کو مبارکباد جنہوں نے نہ صرف ووٹ چور ٹولے کا ڈٹ کر مقابلہ کیا بلکہ اپنے ووٹ پر پہرہ بھی دیا۔ شاباش ڈسکہ والو،شاباش ! شاباش نوشین۔

مریم نواز نے کہا کہ آج ایک بار پھر ثابت ہوگیا کہ عمران خان اور اسکی جعلی حکومت نے ڈسکہ کے عوام کے ووٹ پر ڈاکہ ڈالا ہے۔ صرف ری الیکشن سے بات نہیں بنے گی۔ ان وارداتیوں کو ووٹ چوری کرنے اور الیکشن کمیشن کے عملے کو اغوا کرنے کے جرم کا حساب دینا ہوگا۔ انشاءاللّہ

اسلام آباد: وفاقی وزیر برائے ہوا بازی غلام سرور خان کی جانب سے آج قومی اسمبلی کو بتایا گیا ہے کہ پاکستان انٹرنیشنل ائیر لائنز کے کسی بھی اثاثے کی نجکاری کا کوئی منصوبہ نہیں ہے۔

وقفہ سوالات کے دوران ہوا بازی کے وزیر غلام سرورخان نے سوالوں کا جواب دیتے ہوئے کہاکہ موجودہ حکومت قومی فضائی کمپنی کو خودمختار اور منافع بخش ادارہ بنانے میں انتہائی دلچسپی رکھتی ہے۔

انہوں نے کہا کہ خسارے والے روٹس بند کردئیے گئے ہیں اور نفع بخش روٹس پر پروازیں بڑھانے سے خسارے میں کمی ہوئی ہے۔

ہوا بازی کے وزیر نے کہا کہ ناجائز ذرائع سے لائسنس حاصل کرنے والے بیاسی پائلٹوں کو فارغ کر دیا گیا ہے۔ لائسنسوں کے اجرا میں شفافیت یقینی بنانے کا نظام وضع کر دیا گیا ہے اور اس سلسلے میں برطانیہ کے شہری ہوا بازی کے ادارے کے ساتھ ایک معاہدے پر دستخط کئے گئے ہیں۔

انہوں نے کہا کہ شہری ہوا بازی کا بین الاقوامی ادارہ اس سال جولائی میں ہمارے شہری ہوا بازی کے ادارے کا آڈٹ کرے گا۔

غلام سرور خان نے کہا کہ کوئٹہ اور ڈیرہ اسماعیل خان کے ہوائی اڈوں کو جدید خطوط پراستوار کیاجائے گا اور پی آئی اے کی کارکردگی بڑھانے کیلئے آٹھ نئے طیارے شامل کئے جائیںگے۔

اسلام آباد: ترجمان دفتر خارجہ نے کہا ہے کہ کشمیر اور بھارت سے مذاکرات کے حوالے سے مؤقف تبدیل نہیں ہوا۔

ترجمان دفتر خارجہ زاہد حفیظ چوہدری نے ہفتہ وار میڈیا بریفنگ دیتے ہوئے کہا کہ بھارتی قابض فورسز نے دو ہفتوں میں مزید چھ کشمیری شہید کر دیے، پاکستان ماورائے عدالت اور نام نہاد سرچ آپریشن کی مذمت کرتا ہے، بھارتی اقدامات عالمی قوانین کی خلاف ورزی ہیں، پاکستان کشمیر میں ماورائے عدالت قتل کی جوڈیشل انکوائری کا مطالبہ کرتا ہے۔

زاہد حفیظ چوہدری نے کہا کہ بھارتی وزیراعظم مودی نے یوم پاکستان پر وزیر اعظم عمران خان کو مبارکباد کا پیغام دیا تھا، وزیراعظم نے بھی جواب دیا تاہم کشمیر پر پاکستان کی پالیسی میں کوئی تبدیلی نہیں ہوئی، کشمیر سمیت تمام دو طرفہ مسائل کے حل کے بغیر خطہ میں پائیدار امن قائم نہیں ہو سکتا۔
ترجمان دفتر خارجہ نے کہا کہ روسی وزیر خارجہ 6 اپریل کو پاکستان کے دورے پر آرہے ہیں، اس دورے سے دونوں ممالک کے مابین باہمی تعاون کو مزید مضبوط بنانے میں مدد ملے گی۔

زاہد حفیظ چوہدری نے کہا کہ پاکستان جیو اسٹریٹیجک سے جیو اکنامکس کی طرف منتقل ہو چکا، مستقبل میں جو اقدامات ہونگے اس میں جیو اکنامکس کو مدنظر رکھا جائے گا، پاکستان بھارت سمیت تمام ہمسائیوں سے پرامن تعلقات چاہتا ہے، وزیر اعظم واضح کر چکے ہیں کشمیر کے تنازعے کا حل ناگزیر ہے، کشمیر کے حوالے سے پاکستان کے اصولی موقف میں کوئی تبدیلی نہیں آئی، خطے میں امن اور استحکام کیلئے تصفیہ طلب تنازعات کا حل ناگزیر ہے۔

سپریم کورٹ نے قومی اسمبلی کے حلقہ این اے 75 ڈسکہ میں دوبارہ ضمنی انتخاب کرانے کا الیکشن کمیشن کا فیصلہ برقرار رکھتے ہوئے اس کے خلاف پاکستان تحریک انصاف (پی ٹی آئی) کے اُمیدوار کی درخواست مسترد کردی۔

مختصر فیصلہ سناتے ہوئے جسٹس عمر عطا بندیال نے کہا کہ عدالت نے آئین و قانون اور اپنے اختیار کو مدنظر رکھ کر فیصلہ کیا ہے، تفصیلی فیصلہ بعد میں جاری کیا جائے گا، جس میں آئندہ ایسے واقعات سے بچنے کے لیے گائیڈ لائن جاری کریں گے۔

جسٹس عمر عطا بندیال کی سربراہی میں جسٹس منیب اختر اور جسٹس سجاد علی شاہ پر مشتمل 3 رکنی بینچ نے قومی اسمبلی این اے 75 ڈسکہ میں دوبارہ انتخاب کے خلاف پی ٹی آئی امیدوار علی اسجد ملہی کی درخواست پر سماعت کی۔

آج ہونے والی سماعت میں تحریک انصاف کے اُمیدوار علی اسجد ملہی اور مسلم لیگ (ن) کی اُمیدوار نوشین افتخار بھی عدالت میں پیش ہوئیں۔

جسٹس عمر عطا بندیال نے ہدایت کی کہ ضروری نوعیت کے قانونی نکات بیان کریں، صرف ان دستاویزات پر انحصار کریں جن کی بنیاد پر الیکشن کمیشن نے فیصلہ دیا۔

الیکشن کمیشن کے وکیل میاں عبدالرؤف نے کہا کہ کمیشن کے فیصلے میں منظم دھاندلی کا ذکر نہیں، فیصلہ قانون کی خلاف ورزیوں پر مشتمل تھا۔

انہوں نے کہا کہ انسپکٹر جنرل (آئی جی) پنجاب اور دیگر حکام نے فون نہیں سنے، 13 پولنگ اسٹیشنز پر پولنگ معطل رہی اور پورے حلقے میں فائرنگ کے واقعات رپورٹ ہوئے، جس پر جسٹس عمر عطا بندیال نے کہا کہ عدالت نے پولنگ اسٹیشنز کی گنتی نہیں کرنی۔

پی ٹی آئی امیدوار علی اسجد ملہی کے وکیل شہزاد شوکت نے کہا کہ پریزائیڈنگ افسران کے ساتھ پولیس اسکواڈ نہیں تھا، صرف ایک پولیس گارڈ پریزائیڈنگ افسر کے ساتھ تھا۔

پی ٹی آئی کے وکیل کے مطابق پریزائیڈنگ افسر نے کہا کہ نجی طور پر حاصل کی گئی گاڑیوں میں وائرلیس سسٹم نہیں تھا، انتحابی مواد پہنچانا اسسٹنٹ پریزائیڈنگ افسر کا کام ہے، الیکشن کمیشن نے پریزائیڈنگ افسران کو ریکارڈ ساتھ لانے کا کیوں کہا؟

پی ٹی آئی کے وکیل کا مزید کہنا تھا کہ پریزائیڈنگ افسران سے تحقیقات کرنا ضروری تھا، جو نہیں کی گئی، سمجھ نہیں آتا کہ الیکشن کمیشن کو کیا جلدی تھی؟

جسٹس سجاد علی شاہ نے کہا کہ انتحابی مواد پریزائیڈنگ افسر ہی واپس لے کر آئے تھے۔

جسٹس عمر عطا بندیال نے کہا کہ 20 پولنگ اسٹیشنز پر قانون کی خلاف ورزیاں تو ہوئی ہیں، فائرنگ سے 2 افراد قتل اور ایک زخمی ہوا، الیکشن کمیشن ڈسکہ میں مناسب اقدامات کرنے میں ناکام رہا۔

پی ٹی آئی وکیل نے کہا کہ متنازع 20 میں سے 14 پولنگ اسٹیشنز کے نتائج سے نوشین افتخار مطمئن تھیں، کل کہا گیا رینجر تعینات نہیں تھی جبکہ الیکشن سے 14 روز قبل رینجر تعیناتی کا ذکر ہوا تھا۔

جسٹس سجاد علی شاہ نے کہا کہ الیکشن کمیشن کے مطابق رینجرز صرف گشت کر رہی تھی جس پر ای سی پی کے ڈی جی لاء نے کہا کہ 25 پولنگ اسٹیشنز پر رینجرز موجود تھی، لاپتا ہونے والے پریزائیڈنگ افسران کے پولنگ اسٹیشنز پر بھی رینجرز تھی۔

وکیل پی ٹی آئی نے کہا کہ پریزائیڈنگ افسران کو کون کہاں لے کر گیا تھا ان کی گمشدگی کے ذمہ دار سامنے آنے چاہیے، الیکشن کمیشن نے آئی جی کی رپورٹ کو غلط کہا، سمجھ نہیں آ رہا آئی جی کی رپورٹ کو غلط کس بنیاد پر کہا گیا۔

ان کا کہنا تھا کہ گوجرانوالہ کے ضمنی الیکشن میں ٹرن آؤٹ 47 فیصد تھا جبکہ ڈسکہ میں ٹرن آؤٹ 46.92 فیصد رہا جسے کہا گیا کہ کم ہے، الیکشن کمیشن کا مؤقف غلط ہے کہ لوگ ووٹ ڈالنے نہیں آ سکے۔

ان کا مزید کہنا تھا کہ این اے 75 میں 2018 کے الیکشن میں ٹرن آؤٹ 53 فیصد تھا، فائرنگ کے صرف 5 مقدمات درج ہوئے ہیں، مقدمات کے مطابق فائرنگ صرف 19 پولنگ اسٹیشنز پر ہوئی۔

پی ٹی آئی کے وکیل نے کہا کہ 24 فروری کو دوبارہ پولنگ کا بیان حلفی دیا گیا، جس پر جسٹس عمر عطا بندیال نے کہا کہ 24 فروری کو بیان حلفی آیا اور اسی روز فیصلہ ہوگیا، آپ کو بیان حلفی پر دلائل دینے کا موقع ہی نہیں دیا گیا، دوبارہ پولنگ کے نوشین افتخار کے بیان حلفی کا جائزہ نہیں لیں گے۔

جسٹس عمر عطا بندیال نے کہا کہ الیکشن کمیشن کا کام ہے شفاف اور منصفانہ انتخابات کرائے، وحیدہ شاہ نے پریزائیڈنگ افسر کو تھپڑ مارا تھا، پریزائیڈنگ افسران، جس نے بھی غائب کیے اس نے انتخابی عمل کو دھچکا لگایا۔

جسٹس عمر عطا بندیال نے ریمارکس دیے کہ نتائج متاثر ہوں تو دوبارہ پولنگ ہو سکتی ہے۔

پی ٹی آئی وکیل نے کہا کہ ڈسکہ شہر سے 2018 میں مسلم لیگ (ن) کو 24 ہزار ووٹ ملے تھے، ضمنی الیکشن میں ڈسکہ سے ن لیگ کو 21ہزار ووٹ ملے، فائرنگ کے باوجود صرف ن لیگ کو ووٹ پورے ملے، تعین کرنا ہوگا کہ فائرنگ اور قتل و غارت کا فائدہ کس کو ہوا، الیکشن کمیشن غیر جانبدار ہونے کی بجائے حقائق چھپا رہا ہے۔

خیال رہے کہ الیکشن کمیشن نے ڈسکہ میں 18 مارچ کو دوبارہ ضمنی انتخاب کا حکم دیا تھا تاہم بعد میں یہ تاریخ بڑھا کر 10 اپریل کردی تھی، بعدازاں 25 مارچ کو سپریم کورٹ نے اس کیس کی سماعت کرتے ہوئے ضمنی انتخاب کو ملتوی کرنے کا حکم دے دیا تھا۔

کورونا وائرس کی نئی قسم کے بڑھتے ہوئے کیسز کے تناظر میں برطانیہ نے 9 اپریل سے پاکستان سمیت 4 ممالک کو پابندیوں سے متعلق ریڈ لسٹ میں شامل کرلیا۔

برطانوی ہائی کمشنر کرسچن ٹرنر سے سماجی رابطے کی ویب سائٹ ٹوئٹر پر بتایا کہ 9 اپریل سے برطانیہ میں شروع ہونے والی سفری پابندیوں میں پاکستان بھی شامل ہوگا۔

کرسچن ٹرنر نے کہا کہ برطانوی حکومت نے کووڈ-19 کیسز پر متعلق نظرثانی کے بعد سرحدی حدود میں داخلے کے حوالے سے یہ فیصلہ کیا، لہذا آج یہ اعلان کیا جاتا ہے کہ پاکستان کو برطانیہ کی سفری پابندیوں کی ریڈ لسٹ میں شامل کیا گیا ہے۔

انہوں نے کہا کہ ریڈ لسٹنگ کا مطلب یہ ہے کہ صرف انگلینڈ اور آئرلینڈ کے شہریوں اور برطانیہ میں رہائش کے حقوق رکھنے والے افراد کو برطانیہ آنے کی اجازت ہوگی۔

برطانوی ہائی کمشنر نے کہا کہ اگر وہ برطانیہ آمد سے 10 روز قبل پاکستان میں مقیم رہے ہوں گے تو مسافروں کو لازمی طور پر 10 روز تک ہوٹل میں قرنطینہ کرنا ہوگا اور اس قیام کی ادائیگی بھی خود کرنی ہوگی۔

انہوں نے بتایا کہ 9 اپریل یعنی جمعے کی صبح 4 بجے سے ان اقدامات کا اطلاق ہوگا۔

کرسچن ٹرنر نے کہا کہ دونوں ممالک کے درمیان براہ راست پروازیں جاری رہیں گی لیکن پروازوں کے شیڈول میں تبدیلی آسکتی ہے۔

بی بی سی کی رپورٹ کے مطابق برطانوی حکومت نے پاکستان سمیت 4 ممالک فلپائن، کینیا اور بنگلہ دیش کو ریڈ لسٹ میں شامل کیا ہے۔

برطانوی حکومت نے اس وقت لگ بھگ 40 ممالک کو ریڈ لسٹ میں شامل کیا ہے جن پر سفری پابندی عائد کی گئی ہے۔

کورونا وائرس کے باعث برطانیہ میں نافذ موجودہ قوانین کے مطابق غیرمعمولی وجوہات کے علاوہ برطانیہ سے غیرمعمولی سفر پر پابندی عائد کی گئی ہے۔

خیال رہے کہ 14 دسمبر 2020 کو کورونا وائرس کی نئی قسم برطانیہ میں دریافت ہوئی تھی، جسے کووڈ 19 کی تیز رفتار پھیلاؤ سے منسلک کیا گیا تھا۔

برطانیہ کے وزیر صحت میٹ ہینکوک نے اس بات کا اعلان کرتے ہوئے بتایا تھا کہ عالمی ادارہ صحت کو اس نئی قسم سے آگاہ کیا گیا ہے۔

سائنسدانوں نے جنوری 2021 میں کہا تھا کہ ایسا ممکن ہے کہ یہ نئی قسم نہ صرف زیادہ متعدی ہے بلکہ یہ زیادہ جان لیوا بھی ہوسکتی ہے۔

بعدازاں ان کی جانب سے جاری ایک نئی دستاویز میں کہا گیا تھا کہ اس بات کا قوی امکان ہے کہ اس نئی قسم سے ہسپتال میں داخلے اور موت کا خطرہ بڑھ جاتا ہے۔

جس کے بعد دسمبر ہی میں یہ قسم ایشیائی ملک ہانگ کانگ کے بعد سنگاپور بھی پہنچ گئی تھی اور فروری میں پاکستانی حکومت نے کہا تھا کہ پاکستان دنیا کے ان 92 ممالک میں شامل ہے جہاں کووڈ 19 کی برطانوی قسم پائی گئی ہے، لہٰذا لوگوں پر زور دیا تھا کہ وہ صحت کی ہدایات پر عمل کریں اور ویکسین لگوائیں۔

بعدازاں 12 مارچ کو وائرس کی نئی قسم کے تیزی سے پھیلاؤ کے بعد وفاقی وزیر اسد عمر نے ملک میں کورونا کی تیسری لہر کی تصدیق کی تھی۔

اب برطانیہ کی جانب سے دریافت ہونے والی وائرس کی اس نئی قسم کے مزید پھیلاؤ کو روکنے کے لیے مختلف ممالک سے مسافروں پر پابندی لگائی جارہی ہے۔

وفاقی وزیر قانون و انصاف بیرسٹر ڈاکٹر محمد فروغ نسیم نے صوبائی حکومتوں کو ہدایت کی ہے کہ جنسی جرائم اور ریپ کے واقعات کی روک تھام کے لئے سرکاری ہسپتالوں میں ضلع کی سطح پر ”ریپ کرائسز سیل“ بنائے جائیں۔

وزارت قانون وانصاف کی طرف سے جاری بیان میں کہا گیا ہے کہ وفاقی وزیر قانون ڈاکٹر فروغ نسیم کی زیرصدارت اعلی سطح کا اجلاس گزشتہ روز اسلام آباد میں ہوا جس میں وزارت قانون کے اعلی حکام، صوبائی چیف سیکرٹریز ، محکمہ داخلہ اور پولیس کے اعلی حکام بھی شریک ہوئے۔ اجلاس میں جنسی جرائم اور ریپ کے واقعات کی روک تھام کے لئے وفاقی حکومت کی طرف سے نافذ کئے گئے قانون پر مکمل عملدرآمد یقینی بنانے سے متعلق امور پر تفصیلی تبادلہ خیال کیا گیا۔

شرکا سے خطاب کرتے ہوئے وفاقی وزیر قانون کا کہنا تھا کہ قانون پر عملدرآمد کے لئے ”ریپ دری کرائسز سیل“ اور مشترکہ تحقیقاتی ٹیموں کا قیام کلیدی حیثیت رکھتا ہے، اس ضمن میں کسی بھی قسم کی کوتاہی کے منفی نتائج برآمد ہو سکتے ہیں۔ انہوں نے کہاکہ تمام صوبوں کو ”انسداد ریپ کرائسز سیل“ کے لئے فوکل پرسن نامزد کرنا ہوں گے ، اس کے ساتھ ساتھ ضلع کی سطح پر کمشنر یا ڈپٹی کمشنر کو سیل کا سربراہ نامزد کیا جائے تاکہ مذکورہ سیلز باضابطہ کام کا آغاز کر سکیں۔

وفاقی وزیر قانون کا کہنا تھا کہ یہ سیل متاثرہ افراد کا طبی معائنہ اور جائے وقوعہ سے فوری شواہد اکٹھے کرنے کے لئے کام کریں گے۔ انہوں نے کہاکہ مشترکہ تحقیقاتی ٹیم کا سربراہ ضلعی پولیس افسر ہو گا جبکہ ایس پی، ڈی ایس پی اور ایس ایچ او کے ساتھ ایک خاتون پولیس آفیسر ارکان ہوں گے۔ بیرسٹر فروغ نسیم نے کہاکہ ریپ اور جنسی جرائم سے متعلق صوبوں کی طرف سے فراہم کردہ اعدادشمار ”اینٹی ریپ “ قوانین پر موثر انداز میں عملدرآمد میں معاون ثابت ہوں گے۔

اس موقع پر پنجاب کے وزیر قانون راجہ بشارت نے یقین دلایا کہ پنجاب کے تمام ڈسٹرکٹ ہیڈکوارٹرز ہسپتالوں میں ”انسداد ریپ کرائسز سیل“ کے قیام کے احکامات جاری کر دیئے جائیں گے ۔ انہوں نے بتایا کہ جنسی جرائم اور عصمت دری کے خلاف بنائے گئے قانون کے موثر نفاذ کے لئے صوبائی حکومت اپنا بھرپور کردار ادا کرے گی۔

انسداد ریپ سے متعلق قائم خصوصی کمیٹی کی سربراہ و پارلیمانی سکریٹری برائے قانون و انصاف بیرسٹر ملیکہ بخاری نے شرکاءکو آگاہ کیا کہ قوانین کے نفاذ میں پیشرفت کا جائزہ لینے کے لئے وہ ذاتی طورپر اگلے ہفتے سے صوبوں کا دورہ کریں گی۔ انہوں نے کہاکہ حال میں پیش آنے والے عصمت دری کے واقعات کے خلاف مقدمات عدالتوں میں زیرسماعت ہیں،

جرائم میں ملوث افراد کے خلاف قانون کے مطابق کارروائی عمل میں لائی جانی چاہئے۔ ملیکہ بخاری نے کہاکہ صوبائی حکومتوں کو بھی نئے قانون کے نفاذ پر فوری طورپر کام شروع کرنا ہوگا۔

پاکستان کی مقامی دوا ساز کمپنی کا ویکسین کی تیاری کے لیے چینی کمپنی سے معاہدہ طے پاگیا۔

مقامی دواز ساز کمپنی سرل فارماسوٹیکل پاکستان کا کہنا ہےکہ ویکسین کے پہلے اور دوسرے ٹرائل میں کامیابی کےنتائج زبردست رہے جب کہ تیسرے مرحلے میں 20 ہزار سے زائد افراد پر ویکسین کا اثر اور اس کی افادیت کو جانچا جائے گا، ویکسین ٹرائل کے تیسرے مرحلے میں کئی ملکوں کو شامل کیا گیا ہے۔

کمپنی کے مطابق اس نے لیوزون مفارم کے ساتھ کورونا ویکسین کی لائسنسنگ اور سپلائی کا معاہدہ کیا ہے جس کے تحت مقامی دوا ساز کمپنی کورونا ویکسین پاکستان میں تیار بھی کرےگی۔

مقامی دوا سازکمپنی نے یہ معلومات پاکستان اسٹاک ایکسچینج کو فراہم کی ہیں۔

یاد رہے کہ پاکستان میں ڈرگ ریگولیٹری اتھارٹی نے ملک میں چار کورونا ویکسین کے استعمال کی اجازت دی ہے جن میں چین کی سائنو فارم، کین سائنو، روس کی اسپوٹنک، اور آکسفورڈ یونیورسٹی کی آسٹرا زینکا شامل ہیں۔

پاکستان میں عالمی وبا کورونا وائرس کے یومیہ کیسز میں مسلسل اضافہ جاری ہے خاص کر پنجاب، خیبرپختونخوا اور اسلام آباد میں صورتحال خاصی پریشان کن ہوتی جارہی ہے۔

کووِڈ-19 کے اعداد و شمار کے لیے بنائی گئی سرکاری ویب سائٹ کے مطابق پاکستان میں گزشتہ 24 گھنٹوں کے دوران ملک میں 5 ہزار 234 افراد میں وائرس کی تشخیص ہوئی اور 83 مریض انتقال کر گئے۔

ملک میں گزشتہ 24 گھنٹوں کے دوران رپورٹ ہونے والے کورونا کیسز کی یہ تعداد 19 جون کے بعد سے سب سے زیادہ ہے جب ایک روز کے دوران 6 ہزار 604 کیسز سامنے آئے تھے۔

وائرس کی تشخیص کے لیے یکم اپریل کو مجموعی طور پر 50 ہزار 170 ٹیسٹس کیے گئے جس کے نتیجے میں ملک میں کورونا کیسز مثبت آنے کی شرح 10.4 فیصد رہی جبکہ فعال کیسز 56 ہزار 347 تک پہنچ چکے ہیں۔

ملک میں مجموعی طور پر اب تک کورونا وائرس سے 6 لاکھ 78 ہزار 165 افراد متاثر ہو چکے ہیں جن میں سے 14 ہزار 613 زندگی کی بازی ہار چکے ہیں۔

علاوہ ازیں گزشتہ 24 گھنٹے کے دوران مزید ایک ہزار 931 مریض صحتیاب ہوئے اور مجموعی طور پر اب تک 6 لاکھ 7 ہزار 205 مریض صحتیاب ہوچکے ہیں۔

واضح رہے کہ ملک میں کورونا وائرس کا پہلا کیس 26 فروری 2020 کو رپورٹ ہوا تھا، جس کے بعد سے ملک میں وبا کے پھیلاؤ میں اتار چڑھاؤ جاری ہے اور اب تک بیماری کی 2 لہریں دیکھی جاچکی ہیں جبکہ تیسری لہر کا پھیلاؤ جاری ہے۔

تیسری لہر کے پیشِ نظر کئی علاقوں میں دوبارہ لاک ڈاؤن اور اسمارٹ لاک ڈاؤن لگایا گیا ہے جبکہ کاروباری سرگرمیوں کے اوقات کار بھی محدود کردیے گئے ہیں اس کے علاوہ زیادہ متاثرہ علاقوں میں تعلیمی ادارے بھی بند ہیں۔

پاکستان میں آج 2 اپریل کو چاروں صوبوں اور وفاقی اکائیوں میں کورونا وائرس کے کیسز سے متعلق رپورٹ کچھ یوں ہے:

پنجاب
وبا کی تیسری لہر نے صوبہ پنجاب کو بری طرح اپنی لپیٹ میں لے رکھا ہے اور گزشتہ 24 گھنٹوں کے دوران مزید 2 ہزار 772 کیسز رپورٹ ہوئے جبکہ مزید 58 مریض دم توڑ گئے۔

پنجاب میں اب تک 2 لاکھ 25 ہزار 953 کورونا کیسز رپورٹ ہو چکے ہیں اور وبا کے باعث مرنے والوں کی تعداد 6 ہزار 485 تک پہنچ گئی ہے۔

سندھ
ملک کے دوسرے بڑے صوبے سندھ میں وبائی صورتحال نسبتاً بہتر ہے اور یہاں گزشتہ 24 گھنٹوں میں 237 کیسز رپورٹ ہوئے جس کے بعد مجموعی کیسز کی تعداد 2 لاکھ 65 ہزار 917 ہو گئی ہے۔

صوبے میں کورونا وائرس سے مزید 2 مریضوں کا انتقال ہوا، مجموعی طور پر یہاں اب تک 4 ہزار 504 افراد لقمہ اجل بن چکے ہیں۔

خیبر پختونخوا
صوبہ خیبر پختونخوا میں بھی بیماری کا پھیلاؤ شدت اختیار کر گیا ہے اور یہاں گزشتہ روز ایک ہزار 156 نئے کیسز سامنے آئے جبکہ 19 مریض دم توڑ گئے۔

خیبر پختونخوا میں اب تک رپورٹ ہونے والے کیسز کی مجموعی تعداد 89 ہزار 255 ہے جبکہ 2 ہزار 382 مریض انتقال کر چکے ہیں۔

بلوچستان
بلوچستان میں گزشتہ 24 گھنٹوں کے دوران 34 افراد میں وائرس کی تشخیص ہوئی اور ایک مریض دم توڑ گیا۔

صوبے میں اب تک مجموعی طور پر 19 ہزار 610 کیسز اور 209 اموات سامنے آئی ہیں۔

اسلام آباد
اسلام آباد میں گزشتہ 24 گھنٹوں کے دوران مزید 844 نئے کیسز رپورٹ ہوئے جبکہ مزید کسی مریض کا انتقال نہیں ہوا۔

وفاقی دارالحکومت میں اب تک مجموعی طور پر 59 ہزار 401 افراد وائرس کا شکار ہوچکے ہیں جن میں سے انتقال کرجانے والوں کی تعداد 572 ہے۔

آزاد کشمیر
آزاد کشمیر میں گزشتہ 24 گھنٹوں کے دوران مزید 179 افراد میں وائرس کی تصدیق ہوئی جبکہ 3 مریضوں کا انتقال ہوگیا۔

آزاد کشمیر میں اب تک 12 ہزار 984 افراد میں وائرس کی تصدیق ہو چکی ہے جبکہ مجموعی طور پر 358 افراد وفات پاچکے ہیں۔

گلگت بلتستان
گلگت بلتستان میں ملک کے دیگر حصوں کی مناسبت سے بیماری کا پھیلاؤ کافی حد تک کنٹرول میں ہے تاہم گزشتہ روز 12 نئے کیسز رپورٹ ہوئے یوں مجموعی کیسز 5 ہزار 45 ہوگئے۔

گلگت بلتستان میں 9 مارچ کے بعد مزید کسی مریض کا انتقال نہیں ہوا اور اموات کی تعداد 103 پر برقرار ہے۔

غیر ملکی خبررساں ادارے کے مطابق چین کے زیرانتظام ملک تائیوان کے شہرہوالیئن میں ’408 تروکوایکسپریس‘ مسافر ٹرین کی 4 بوگیاں ایک سرنگ میں پٹری سے اتر گئیں جس کے نتیجے میں 36 افراد ہلاک جب کہ 75 سے زائد افراد زخمی ہوگئے ہیں۔
ریسکیو ٹیم کا کہنا ہے کہ ٹرین کی بوگیوں میں پھنسے 76 افراد کو نکالنے کیلئے امدادی کارروائیاں جاری ہیں لیکن حادثہ سرنگ میں ہونے کے باعث امدادی کام میں دشواری کا سامنا ہے۔
حکام کا کہنا ہے کہ مسافر ٹرین میں 350 مسافرسوارتھے۔ ’408 تروکوایکسپریس‘ تائیوان کے باقاعدہ ٹرین نیٹ ورک میں سب سے تیز رفتارٹرینوں میں سے ایک ہے جس کی رفتار130 کلومیٹر فی گھنٹہ بتائی جاتی ہے۔

واقعے کے خلاف ملازمین نے احتجاج کرتے ہوئے کام بند کردیا ہے۔ ایس ایس پی کے ملازمین سے مذاکرات بھی ناکام ہوگئے۔ ایف آئی آر کے اندراج تک احتجاج جاری رکھنے کا اعلان کردیا۔ اطلاعات کے مطابق پولیس کے اعلیٰ افسر اپنے اہلخانہ کے ساتھ پولیس ریسٹ ہاؤس کے بجائے گذشتہ 6ماہ سے سرکٹ ہاؤس حیدرآباد میں رہائش اختیار کیے ہوئے ہیں جہاں بدھ کے روز اس افسر کے 2 بیٹوں نے مبینہ طور پر3 ملازمین کو رسی کی مدد سے درخت کے ساتھ باندھ دیا۔
جن ملازمین کو باندھا گیا ان میں سرکٹ ہاؤس کا ویٹر محمد وقار، مالی رحیم بخش اور خاکروب امر لال شامل ہیں۔ متاثرہ ملازمین کے احتجاج کی ویڈیو بھی سوشل میڈیا پر وائرل ہوگئی ہے جس میں وہ بتا رہے ہیں کہ وہ معمول کے مطابق اپنے اپنے کام کررہے تھے لیکن اچانک پولیس افسر کے بیٹوں نے خاکروب کا گریبان کھلا دیکھ کر اپنے پولیس اہلکار گارڈز کو حکم دیا کہ تینوں کو باندھ دو جس کے بعد پولیس اہلکاروں نے دو ملازمین کو رسیوں کی مدد سے درخت کے ساتھ اور ایک ملازم کو پولیس موبائل کے ساتھ باندھ دیا۔ بعدازاں مقامی افراد کی مداخلت پر تینوں ملازمین کو آزاد کیا گیا۔
واقعے کے خلاف سرکٹ ہاؤس کے ملازمین نے احتجاج کیا اور کارروائی کا مطالبہ کیا۔ معلوم ہوا ہے کہ کمشنر حیدرآباد محمد عباس بلوچ نے حیدرآباد میں تعیناتی کے بعد اعلیٰ افسر کو صرف 28 اگست کو ایک ہفتے کیلیے سرکٹ ہاؤس میں رہائش کی اجازت دی تھی جس کے بعد سے اب تک پولیس کے یہ اعلی افسر اپنے اہلخانہ کے ہمراہ سرکٹ ہاؤس میں ہی رہائش پذیر ہیں۔
اعلی افسر نے پہلے چند ماہ 2 کمرے اپنے پاس رکھے اور بعدازاں تیسرا کمرہ بھی حاصل کرلیا جن پر مجموعی طور پر 2 لاکھ 60 تک کا کرایہ بنتا ہے اسی طرح کھانے پینے کا بل الگ سے ادا کرنا پڑتا ہے لیکن اعلیٰ افسر مفت میں کھانے کی سروس بھی حاصل کررہے ہیں۔
ذرائع کے مطابق اعلی افسر کے بیٹوں کی ملازمین کے ساتھ بدتمیزی و غیر انسانی سلوک کا یہ پہلا واقعہ نہیں اس سے پہلے بھی سیکیورٹی پر مامور ایک پولیس اہلکار کو گنجا کرنے کے ساتھ ایک اہلکار کو معطل کروایا جاچکا ہے جبکہ ایک اہلکار کو سخت سرد موسم میں ٹھنڈا پانی جسم پر ڈالنے کے بعد پنکھے کے سامنے بھی بٹھایا گیا تھا۔ جس پر پولیس کے دیگر افسران نے بھی پراسرار خاموشی اختیار کیے رکھی۔ دوسری طرف واقعے کے خلاف سندھ پروانشنل بلڈنگ یونائیٹڈ یونین سی بی اے کا ہنگامی اجلاس منعقد ہوا جس میں یکم اپریل سے سندھ بھر کے سرکٹ ہاؤسز اور دفاتر بند کرنے کا اعلان کیا گیا تھا۔