Category پاکستان

پشاور (ایمرا نیوز)خیبرپختونخوا حکومت نے سابق وزیر اعظم عمران خان کے خلاف واٹس ایپ گروپ میں نازیبا الفاظ استعمال کرنے پر ڈائریکٹر جنرل (ڈی جی) پروونشل ہیلتھ سروسز اکیڈمی ڈاکٹر صاحب گُل کو عہدے سے ہٹا دیا۔
اعلامیے کے مطابق ڈاکٹرصاحب گل نے عمران خان کے خلاف واٹس ایپ گروپ میں نازیبا الفاظ استعمال کیےتھے۔
اعلامیے میں کہا گیا ہے کہ ڈاکٹر صاحب گل 19اگست 2022کوڈی جی پروونشل ہیلتھ سروسزاکیڈمی تعینات تھے، انہوں نے سابق وزیر اعظم عمران خان اور ان کے خاندان سے متعلق توہین آمیزمیسج بھیجے اور ‘منیجمنٹ کیڈرایسوسی ایشن‘ کے نام والےگروپ میں میسج کرکے عمران خان کومذہبی وابستگی پربدنام کیا۔
اعلامیے کے مطابق ڈاکٹرصاحب گل نے اسٹیبلشمنٹ ڈپارٹمنٹ کی ہدایات کے باوجود گورنمنٹ سرونٹس کنڈکٹ رولز 25، 28 اور34اے کی خلاف ورزی کی۔
اعلامیے میں کہا گیا ہے کہ گریڈ 20 کے ڈاکٹر صاحب گُل کو ڈائریکٹوریٹ آف جنرل ہیلتھ سروسزرپورٹ کرنےکی ہدایت کی گئی ہے اور پرنسپل پوسٹ گریجویٹ پیرامیڈیکل انسٹیٹیوٹ پشاور ڈاکٹر سعید گُل کو ڈی جی ہیلتھ کی اضافی ذمہ داری تفویض کردی گئی ہے۔
دوسری جانب ڈی جی پروونشل ہیلتھ سروسز اکیڈمی ڈاکٹر صاحب گل کا کہنا تھاکہ سابق وزیراعظم عمران خان کےخلاف کوئی بھی پیغام یا میسج نہیں کیا، محکمے نے زیادتی کی ہے، اس سے متعلق کچھ علم نہیں۔
ان کا کہنا تھاکہ پاکستان تحریک انصاف میرےخلاف ہے، برطرفی کے خلاف عدالت سے رجوع کروں گا، میں سرکاری ملازم ہوں تمام حقائق سے بخوبی آگاہ ہوں۔

چکوال (ایمرا نیوز)پاکستان تحریک انصاف کے چیئرمین عمران خان نے گمنام نمبروں سے ملنے والی دھمکیوں پر کارکنوں کو بھی جواباً ڈرانے کی ہدایت کر ڈالی۔
چکوال میں جلسے سے خطاب کرتے ہوئے عمران خان کا کہنا تھا کہ گمنام نمبروں سے دھمکیاں دینے کے لیے فون آتا ہے، مسٹر ایکس اور مسٹر وائے لوگوں کو دھمکیاں دیتے ہیں۔
دوران خطاب عمران خان نے کارکنوں کو ہدایت دیتے ہوئے کہا کہ ان لوگوں کو جواب میں بھی دھمکیاں دو، جو ڈراتا ہے اسے جواب میں بھی ڈراؤ۔
چیئرمین پی ٹی آئی کا مزید کہنا تھا کہ خفیہ نمبروں سے ڈرانے والے کہتے ہیں کہ یہ کر لوں گا وہ کر لوں گا، ان سے کہتا ہوں کہ جو کرنا ہے کرو، ہم بھی کریں گے۔

اسلام آباد (ایمرا نیوز) ملک بھر میں کورونا سے بچاؤ کی ویکسین لگانے کی مہم آج سے شروع ہوگئی، کورونا سے بچاؤ کی ویکسین 5 سے 12 سال تک کے بچوں کو لگائی جائے گی۔
قومی ادارہ صحت کے مطابق کورونا سے بچاؤ کی ویکسین لگانے کی مہم 24 ستمبر تک جاری رہے گی، تعلیمی اداروں میں ویکسین لگانے کے لئے کیمپ لگائے جائیں گے، بچوں کی ویکسینیشن کیلئے نادرا میں اندراج کرانا ضروری ہوگا اور ب فارم کے ذریعے بچوں کی ویکسینیشن کی انٹری کرائی جائے گی۔
این آئی ایچ کی جانب سے ہدایات دی گئی ہیں کہ لوگ اپنے بچوں کو کورونا ویکسین کی دو خوراکیں لگوائیں، دوسری خوراک پہلی خوراک کے 21 سے 56 دنوں کے اندر لگوانا ہوگی۔
مہم کے دوران پنجاب، سندھ اور اسلام آباد میں بچوں کو کورونا ویکسین لگائی جائے گی، بچوں کو والدین کی رضا مندی سے سکولوں میں ویکسین لگائی جائے گی، والدین بچوں کو قریبی ویکسینیشن سنٹرز سے بھی ویکسین لگوا سکتے ہیں۔

لاہور (ایمرا نیوز) ملک بھر میں روپے کے مقابلے میں امریکی ڈالر کی قیمت 237 روپے کی حد بھی کراس کر گئی۔
سٹیٹ بینک آف پاکستان کی سماجی رابطے کی ویب سائٹ ٹویٹر پر جاری کردہ اعداد و شمار کے مطابق رواں ہفتے کے پہلے کاروباری روز کے دوران انٹر بینک میں روپے کے مقابلے میں امریکی ڈالر کی قیمت میں ایک مرتبہ پھر ایک روپیہ 7 پیسے کا اضافہ دیکھا گیا۔
اعداد و شمار کے مطابق انٹر بینک میں روپے کے مقابلے میں امریکی ڈالر کی قیمت 236 روپے 84 پیسے سے بڑھ کر 237 روپے 91 پیسے ہو گئی ہے۔
آئی ایم ایف قرض کی منظوری کے وقت ڈالر 220 روپے پر تھا، قرض کی منظوری سے اب تک انٹربینک میں ڈالر 17 روپے 91 پیسے مہنگا ہوا ہے۔دوسری طرف اوپن مارکیٹ میں ڈالر 3 روپے مہنگا ہو چکا ہے، جبکہ قیمت 245 روپے کی سطح پر پہنچ گئی ہے۔
اُدھر پاکستان سٹاک مارکیٹ میں 158.90 پوائنٹس کی مندی ریکارڈ کی گئی اور 100 انڈیکس 41520.59 پوائنٹس کی سطح پر پہنچ کر بند ہوا، پورے کاروباری روز کے دوران کاروبار میں 0.38 فیصد کی تنزلی دیکھی گئی۔
کاروبار کے دوران 7 کروڑ 80 لاکھ 85 ہزار 625 شیئرز کا لین دین ہوا جس کے باعث سرمایہ کاروں کو 35 ارب روپے کا نقصان برداشت کرنا پڑا۔

راولپنڈی (ایمرا نیوز) آرمی چیف جنرل قمر جاوید باجوہ نے چینی وزیردفاع سے ملاقات کی، چینی وزیر دفاع نے کہا کہ چین پاکستان میں سیلاب متاثرین کیلئے امدادی کارروائیوں میں فنی مدد کو تیار ہے، چینی وزیر دفاع نے پاک فوج کے امدادی و بحالی کاموں کی بھی تعریف کی۔
پاک فوج کے شعبہ تعلقات (آئی ایس پی آر) کے مطابق آرمی چیف جنرل قمر جاوید باجوہ چین کے 2 روزہ سرکاری دورے پر ہیں، اس موقع پر آرمی چیف کی چینی وزیر دفاع سے ملاقات ہوئی۔
دوران ملاقات چینی وزیر دفاع نے کہا کہ چین پاکستان اور فوج کے ساتھ اپنے تعلقات کو بڑی اہمیت دیتا ہے اور تعاون کو مزید فروغ دینا چاہتا ہے، سی پیک کی ترقی کا مقصد دونوں ممالک کے عوام کو فائدہ دینا ہے، منصوبہ دونوں ممالک کے عوام کی خوشحالی کا منصوبہ ہے، پاکستان اور پاک چین فوجی تعاون باہمی تعلقات کا ایک اہم ستون ہے۔
چینی وزیر دفاع نے سی پیک منصوبے کیلئے سکیورٹی اقدامات پر آرمی چیف کا شکریہ ادا کیا اور خطے میں امن و استحکام کیلئے آرمی چیف کے کردار کو سراہتے ہوئے کہا کہ امید ہے کہ سی پیک منصوبے بر وقت مکمل ہوں گے۔
ترجمان پاک فوج کے مطابق چینی وزیر دفاع کا کہنا تھا کہ چین پاکستان میں سیلاب متاثرین کیلئےامدادی کارروائیوں میں فنی مدد کو تیار ہے۔ چینی وزیر دفاع نے پاک فوج کے امدادی و بحالی کاموں کی تعریف کی، آرمی چیف نے سیلاب متاثرین کی مدد جاری رکھنے پر چینی وزیر دفاع کا شکریہ ادا کیا۔

اسلام آباد (ایمرا نیوز) اسلام آباد ہائی کورٹ نے جج دھمکی کیس میں عمران خان کیخلاف دہشت گردی کی دفعہ خارج کرنے کا حکم دیتے ہوئے کیس سیشن کورٹ منتقل کرنے کا حکم دیا ہے۔
اسلام آباد ہائیکورٹ میں خاتون جج کو دھمکیاں دینے پر عمران خان کیخلاف دہشتگردی کا مقدمہ خارج کرنے کی درخواست پر سماعت ہوئی، کیس کی سماعت چیف جسٹس اطہرمن اللہ کی سربراہی میں 2 رکنی بینچ نے کی۔
عدالت نے جے آئی ٹی سے جواب طلب کیا کہ دہشت گردی کا مقدمہ بنتا ہے یا نہیں جس پر جے آئی ٹی نے عمران خان کے خلاف دہشت گردی کا مقدمہ درست قرار دے دیا، سپیشل پراسیکوٹر راجہ رضوان عباسی نے عدالت کو آگاہ کردیا کہ دہشت گردی کی دفعہ لگتی ہے، اس کیس میں چالان رپورٹ تیار ہو گئی ہے۔
عمران خان کے وکیل بیرسٹر سلمان صفدر نے دلائل دیئے کہ دہشتگردی کی دفعات کیلئے کچھ بنیادی عناصر ضروری ہوتے ہیں، عمران خان پر درج مقدمے میں وہ تمام عناصر موجود نہیں، دہشتگردی کا مقدمہ خوف اور دہشت کی فضا پیدا کرنے پر ہی بن سکتا ہے، محض ایسی فضا پیدا ہونے کے امکان پر مقدمہ نہیں بن سکتا، درخواست اگر آتی تو ان کی طرف سے آتی جن کے لیے کہا گیا تھا۔
چیف جسٹس نے پراسیکوٹر سے کہا کہ اگر آپ تقاریر پر ایسے پرچے درج کرائیں گے تو ایک فلڈ گیٹ کھل جائے گا، عمران خان کی پوری تقریر میں تھریٹ یا نقصان پہنچانے کی بات کی گئی؟ کیا آئی جی یا ڈی آئی جی نے کوئی کمپلینٹ فائل کی ہے ؟۔
چیف جسٹس نے کہا کہ بادی النظر میں اس کیس میں ان دفعات میں سے ایک دفعہ بھی نہیں لگتی ، دہشت گردی کے مقدمہ اندراج کا غلط استعمال تو ہوتا رہا ہے، جب آپ کہتے ہیں تقریر کے علاوہ تفتیش میں کچھ نہیں آیا تو ڈیزائن تو ختم ہو گیا، آپ نے خود تسلیم کیا ہے کہ تقریر کے علاوہ ان کے خلاف کچھ نہیں۔
اسلام آباد ہائی کورٹ نے عمران خان کے خلاف دہشت گردی کی دفعہ خارج کرنے اور دیگر دفعات برقرار رکھنے کا حکم دے دیتے ہوئے کہا کہ انسداد دہشت گردی کے سوا باقی دفعات کے تحت مقدمہ چلے گا، مقدمہ انسداد دہشت گردی عدالت سے سیشن کورٹ منتقل ہوگا۔

اسلام آباد(ایمرا نیوز)الیکشن کمیشن نے چیئرمین تحریک انصاف عمران خان کے خلاف توشہ خانہ کیس کا فیصلہ محفوظ کر لیا۔
الیکشن کمیشن میں عمران خان کے خلاف توشہ خانہ کیس کے دوران ان کے وکیل علی ظفر کے دلائل دیتے ہوئے کہا کہ اسپیکر نے شواہد کے مطابق عمران خان کو نااہل کرنے کا ریفرنس الیکشن کمیشن کو بھیجا، اسپیکر نے یہ ریفرنس 5 اراکین کی درخواست پر فائل کیا جس میں کہا گیا کہ 63 ٹو کے تحت درخواست دائر کی گئی۔
علی ظفر کا کہنا تھا کہ ریفرنس میں کہا گیا عمران خان نے توشہ خانہ تحائف الیکشن کمیشن سے چھپائے، مزید کہا گیا کہ عمران خان 62 ون ایف کے تحت نااہل ہیں کیونکہ وہ صادق امین نہیں، اسپیکر نے یہ فرض کرکے ریفرنس الیکشن کمیشن کو بھیج دیا، ریفرنس میں مزیدیہ بھی کہاگیاکہ عمران خان نے ٹیکس ریٹرن میں تحائف ظاہر کیے، نااہلی کا 62 ون ایف کے تحت سوال ہی نہیں سوائے اس کے کہ عدالت کا کوئی فیصلہ ہو۔
ان کا کہنا تھا اگر کسی نے اثاثے ظاہر نہیں کیے تو اسپیکر ریفرنس نہیں بھیجتا، یہ الیکشن کمیشن کا کام ہے، قانون اثاثے ظاہر نہ کرنے پر 120 دن میں کیس کی بات کرتا ہے، یہ نہیں کہ 10 سال بعد کیس کر دیں، یہ سیاسی کیس ہے، ہم نے سارے چالان، اثاثے، ٹیکس ریٹرن جواب میں لگا دیے ہیں،
چیئرمین تحریک انصاف کے وکیل کا یہ بھی کہنا تھا کہ کیا کسی عدالت نے ڈکلیریشن دی کہ عمران خان صادق امین نہیں، اگر عدالت کا اس حوالے سے فیصلہ نہیں تو اسپیکر عمران خان کی نااہلی کا ریفرنس کیسے بھیج سکتے ہیں۔
بیرسٹر علی ظفر کا کہنا تھا الیکشن کمیشن آئینی ادارہ ہے، آئین کے تحت کمیشن قائم ہوا، الیکشن کمیشن عدالت نہیں ہے، الیکشن کمیشن کے پاس قانونی اختیارات ہیں لیکن آپ عدالت نہیں ہیں۔
عمران خان کے وکیل بیرسٹر علی ظفر کا کہنا تھا کہ پہلے چار تحائف 2018/19 کے ہیں جو اسی سال فروخت کر دیے گئے تھے، یہ چار اثاثے ہم نے فروخت کر دیے، الیکشن کمیشن میں یہ تفصیلات دسمبر میں جمع کرانی ہوتی ہے، فروخت کی رسید انکم ٹیکس ریٹرن میں موجود ہے۔
علی ظفر نے مزید کہا کہ تحائف کی 5 کروڑ 80 لاکھ آمدن پر جو ٹیکس دیا وہ ہم نے ڈکلیئرکیا ہے، 2021 تک کی تفصیلات جواب میں دے دی ہے۔
انہوں نے مزید کہا کہ اگر کہیں کسی تفصیل پر شک پڑتا ہے تو الیکشن کمیشن اس کی اسکروٹنی کرتا ہے، ہمارے کیس میں الیکشن کمیشن نے کوئی اعتراض نہیں لگایا، 2019- 20 میں ہمیں 17 لاکھ کے تحائف ملے۔
ممبر کمیشن نے کہا کہ اپ نے جو تحائف خریدے، رقم توشہ خانہ کو ادا کی، وہ رقم کہاں سے آئی، جس پر وکیل عمران خان نے کہا کہ یہ بات ہم نے آپ کو نہیں دکھانی۔

اسلام آباد (ایمرانیوز)وفاقی وزیر خزانہ مفتاح اسمٰعیل نے کہا ہے کہ پاکستان تباہ کن سیلاب کے باوجود قرضوں کے باعث دیوالیہ نہیں ہوگا۔
ایک رپورٹ کے مطابق وزیر خزانہ نے اس جانب بھی اشارہ کیا کہ مشکلات کا شکار معیشت کو مستحکم کرنے کے لیے شروع کی گئیں اصلاحات پر عمل درآمد کو روکا نہیں جائے گا۔
سیلاب نے سوا 3 کروڑ پاکستانیوں کو متاثر کیا، اربوں ڈالر کا نقصان پہنچایا جب کہ اس دوران ایک ہزار 500 سے زیادہ افراد جاں بحق ہوئے ہیں، اس صورتحال کے باعث تشویش پیدا ہو رہی ہے کہ پاکستان قرض ادا نہیں کرپائے گا۔
وزیر خزانہ مفتاح اسمٰعیل نے رائٹرز سے گفتگو کرتے ہوئے کہا کہ چیلنج صورتحال میں معاشی استحکام کا راستہ مشکل تھا اور یہ اب مشکل تر ہوچکا ہے۔
لیکن اگر ہم سمجھداری، دور اندیشانہ فیصلے کرتے رہیں جو ہم کریں گے تو ہم بالکل دیوالیہ نہیں ہوں گے۔
پاکستان سخت پالیسی فیصلوں کے باعث کئی مہینوں کی تاخیر کے بعد انٹرنیشنل مانیٹری فنڈ (آئی ایم ایف) کے پروگرام کو دوبارہ بحال کرانے میں کامیاب رہا لیکن تباہ کن بارشوں سے قبل ملکی معاشی صورتحال سے متعلق مثبت رویہ مختصر وقت کے لیے تھا۔
مفتاح اسمٰعیل نے کہا کہ سیلاب سے ہونے والی تباہی کے باوجود گرتے ہوئے زرمبادلہ کے ذخائر میں اضافے سمیت معاشی استحکام سے متعلق زیادہ تر پالیسیاں اور اہداف تاحال ٹریک پر ہیں۔
انہوں نے کہا کہ اگر سیلاب کے باعث کپاس جیسی مزید درآمدات میں کرنٹ اکاؤنٹ بیلنس کو 4 ارب ڈالر تک کا نقصان پہنچے اور برآمدات پر منفی اثر پڑے تب بھی پاکستان زر مبادلہ کے ذخائر میں 4 ارب ڈالر تک کا اضافہ کرلے گا۔
انہوں نے کہا کہ سیلاب سے انتہائی غریب لوگوں کو بہت نقصان ہوا اور ان کی زندگیاں دوبارہ پہلے کی طرح بحال نہیں ہوں گی لیکن ہمارے غیرملکی اور مقامی قرضوں کی ادائیگی اور مائیکرو میکرو اکنامک استحکام کے لحاظ سے چیزیں قابو میں ہیں۔
انہوں نے کہا کہ عالمی منڈیوں میں پاکستان کے بارے میں ایک بے چینی کی کیفیت ہے جب کہ سیلاب کے بعد معیشت کو کم از کم 18 ارب ڈالر کا نقصان ہوچکا جو کہ 30 ارب ڈالر تک جا سکتا ہے۔
انہوں نے کہا کہ ہاں ہمارے کریڈٹ ڈیفالٹ کا خطرہ بڑھ گیا، ہمارے بانڈ کی قیمتیں گر گئیں لیکن میرے خیال میں 15 سے 20 روز میں مارکیٹ معمول پر آجائے گی اور میں سمجھتا ہوں کہ پاکستان استحکام کے لیے پرعزم ہے۔

نارووال (ایمرا نیوز)چوتھی جماعت کی طالبہ کی ماں اور بھائی کو اسکول چھوڑنے کا سرٹیفکیٹ طلب کرنے پر مبینہ تشدد کا نشانہ بنانے پر سٹی پولیس نارووال نے پرائیویٹ اسکول کے پرنسپل و مالک اور 6 خواتین اساتذہ کے خلاف مقدمہ درج کرلیا۔
ایک رپورٹ کے مطابق تشدد کے واقعے کا ویڈیو کلپ سوشل میڈیا پر اپ لوڈ ہونے کے بعد یہ معاملہ سامنے آیا تھا، نارووال کے محلہ راجن کے رہائشی مزدور انور لطیف کی اہلیہ رفعت کلثوم رانی نے بتایا کہ انہوں نے فیس جمع کرانے کی استطاعت نہ ہونے کے باعث اپنی 4 سالہ بیٹی اقرا کو نجی اسکول علی فاؤنڈیشن سے نکالنے کا فیصلہ کیا۔
رفعت کلثوم رانی نے کہا کہ 16 ستمبر کو وہ اور اس کا بیٹا اقرا کا اسکول چھوڑنے کا سرٹیفکیٹ لینے اسکول گئے جو اسے کسی کم فیس والے اسکول میں داخلے کے لیے درکار تھا۔
رفعت کلثوم رانی نے بتایا کہ اسکول کے پرنسپل اور مالک شکیل احمد نے سرٹیفکیٹ جاری کرنے کے لیے 6 ماہ کی پیشگی فیس کا مطالبہ کیا۔
متاثرہ خاتون نے کہا کہ جب میں نے پرنسپل کو بتایا کہ ان کا 6 ماہ ایڈوانس فیس کا مطالبہ بلاجواز ہے اور وہ مالی مشکلات کے باعث ایڈوانس فیس کی رقم ادا نہیں کر سکتی تو پرنسپل نے مجھے اور میرے بیٹے کو گالیاں دینی شروع کر دیں۔
خاتون نے بتایا کہ پرنسپل شکیل احمد نے اس پر وحشیانہ تشدد کیا اور تشدد کرنے میں اسکول مالک کے ساتھ کچھ خواتین اساتذہ بھی شامل تھیں۔ رفعت کلثوم رانی نے بتایا کہ پرنسپل اور اساتذہ نے اس کے کپڑے بھی پھاڑ دیے اور اس کا ہینڈ بیگ چھین لیا جس میں اس کے ماہانہ اخراجات کے لیے 27 ہزار 600 روپے تھے۔
خاتون نے الزام لگایا کہ تشدد کے بعد پرنسپل اور اساتذہ نے اسے اور اس کے بیٹے کو زبردستی کلاس روم میں لاک کر دیا۔
رفعت کلثوم رانی نے بتایا کہ اس نے اپنے موبائل فون سے پولیس ہیلپ لائن 15 پر کال کی اور مدد طلب کی، اس کی کال پر نارووال سٹی پولیس کی ٹیم اسکول پہنچی اور خاتون اور اس کے بیٹے کو ریسکیو کیا۔
تاہم ملزم شکیل احمد نے دعویٰ کیا کہ یہ تنازع اس وقت شروع ہوا جب رفعت کلثوم رانی نے اسے اپنی بیٹی کا پانچویں جماعت کا پاسنگ سرٹیفکیٹ جاری کرنے پر مجبور کیا۔
اسکول پرنسپل نے بتایا کہ جب انہوں نے اقرا کا پاسنگ سرٹیفکیٹ جاری کرنے سے انکار کیا تو رفعت کلثوم رانی نے انہیں اور اسکول کے عملے کو گالیاں دیں ۔انہوں نے خاتون کے الزامات کو بے بنیاد قرار دیتے ہوئے شکایت کنندہ پر تشدد کی تردید کی۔
تاہم سوشل میڈیا پر زیر گردش تشدد کے واقعے کے ویڈیو کلپ کا نوٹس لیتے ہوئے ڈسٹرکٹ پولیس افسر ڈاکٹر رضوان نے پولیس کو ملزم کے خلاف کارروائی کا حکم دیا۔ڈی پی او کے حکم پر سٹی پولیس نے شکیل احمد اور اسکول کی 6 خواتین اساتذہ کے خلاف ایف آئی آر درج کر لی۔

لندن (ایمرا نیوز)وزیر اعظم شہباز شریف نے لندن میں شاہ چارلس سوم سے ملاقات کی اور ملکہ الزبتھ دوم کے انتقال پر تعزیت کا اظہار کیا۔
وزیراعظم آنجہانی ملکہ برطانیہ کی آخری رسومات میں پاکستان کی نمائندگی کے لیے ایک روز قبل لندن روانہ ہوئے تھے، وزیر دفاع خواجہ آصف اور وزیراعظم کے معاون خصوصی طارق فاطمی بھی وزیراعظم کے ہمراہ ہیں۔
گزشتہ ایک برس سے علالت کا شکار ملکہ الزبتھ دوم 96 برس کی عمر میں 8 ستمبر کو انتقال کر گئی تھیں، انہیں آج لندن کی سڑکوں پر تاریخی رسمی سفر کے بعد عالمی رہنماؤں کی موجودگی میں سرکاری اعزاز کے ساتھ سپرد خاک کیا جائے گا۔
وزیر اعظم نے شاہ چارلس سے ملاقات میں اظہار تعزیت کرتے ہوئے کہا کہ آنجہانی ملکہ دولت مشترکہ ممالک کے شہریوں کی نسلوں کے لئے تحریک اور قوت کا سرچشمہ تھیں۔
وزیر اعظم نے یاد دہانی کروائی کہ پاکستان کے لوگوں کے دلوں میں آنجہانی ملکہ کے 2 دوروں کی یادیں تازہ ہیں، شاہی خاندان اور پاکستانی عوام کے درمیان جذباتی لگاؤ وقت کے ساتھ ساتھ مزید مضبوط ہوا ہے۔
وزیراعظم نے شاہ چارلس کے بادشاہت کے منصب پر فائز ہونے پر پاکستان کے عوام اور حکومت کی طرف سے نیک خواہشات کااظہار کیا اور اس توقع کا اظہار کیا کہ وہ دولت مشترکہ ممالک کے درمیان دوستی کو مزید مستحکم کرنے کے لئے اپنی والدہ کے ورثے کو آگے بڑھائیں گے۔
وزیر اعظم نے کہا کہ ’پاکستان کے عوام شاہ چارلس سوم کا احترام کرتے ہیں اور جلد از جلد پاکستان میں ان کا استقبال کرنے کے منتظر ہیں‘۔
آنجہانی ملکہ کے جنازے میں شرکت کے بعد وزیراعظم شہباز شریف اقوام متحدہ کی جنرل اسمبلی کے 77 ویں اجلاس میں شرکت کے لیے امریکا روانہ ہوں گے جو 20 ستمبر سے 26 ستمبر تک جاری رہے