Category سیاست

اسلام آباد:وفاقی وزیر شازیہ مری نے کہا ہے کہ حق کے حصول کی جنگ لڑنے والی خواتین کو خراجِ تحسین پیش کرتی ہوں۔وفاقی وزیر تخفیف غربت و سماجی تحفظ اور چیئرپرسن بینظیر اِنکم سپورٹ پروگرام شازیہ مری نے خواتین کے عالمی دن پر پیغام جاری کیا ہے۔شازیہ مری نے کہا ہے کہ اس دن کے منانے کا مقصد خواتین کے سماجی، سیاسی اور اقتصادی مسائل اجاگر کرنا ہے۔انہوں نے کہا کہ خواتین کی شمولیت کے بغیر کوئی بھی معاشرہ ترقی کی راہ پر گامزن نہیں ہوسکتا، پاکستان میں خواتین ہر شعبے میں مردوں کے شانہ بشانہ کھڑی ہیں۔شازیہ مری نے کہا کہ پاکستانی عورت بے شمار مسائل سے دوچار ہے، خواتین کو باوقار مقام اور روزگار کے مواقع فراہم کرنا ہماری اولین ترجیح ہے۔وفاقی وزیر نے کہا کہ ہم نے خواتین کے خلاف صنفی امتیاز اور تشدد کے واقعات کی روک تھام کے لیے اقدامات اٹھائے ہیں۔انہوں نے کہا کہ شہید محترمہ بینظیر بھٹو نے ملک میں جمہوریت اور آئین کی بالادستی کے لیے عظیم قربانیاں دیں۔شازیہ مری نے کہا کہ بینظیر کفالت کے تحت مستحق خواتین کو معاشی طور پر بااختیار بنا رہے ہیں۔وفاقی وزیر نے یہ بھی کہا کہ بینظیر تعلیمی وظائف سے مستحق خواتین کے بچے اور بچیاں تعلیم حاصل کر رہے ہیں۔

اسلام آباد:سپریم کورٹ آف پاکستان نے نیب کی رضا کارانہ اسکیم واپسی ازخود نوٹس نمٹا دیا۔چیف جسٹس پاکستان عمر عطا بندیال کی سربراہی میں 3 رکنی بینچ نے سماعت کی۔سماعت کے دوران دلائل دیتے ہوئے ایڈیشنل اٹارنی جنرل نے کہا کہ 2022 میں نیب ترامیم کے بعد سیکشن 25 اے بھی جرم تصور ہو گا، جو سزا پلی بارگین میں تھی وہی اب رضاکارانہ واپسی میں بھی ہے۔انہوں نے کہا کہ رقم کی رضاکارانہ واپسی کے بعد سرکاری عہدہ پر 10 سال کے لیے پابندی ہو گی۔پراسیکیوٹر نیب نے کہا کہ موجودہ کیس کو نیب ترامیم کے بعد سنا جائے۔ایڈیشنل اٹارنی جنرل نے کہا کہ ازخود نوٹس کا مقصد پورا ہو چکا ہے۔چیف جسٹس پاکستان عمر عطا بندیال نے ریمارکس دیتے ہوئے کہا کہ نیب کی ساری ترامیم کو سپریم کورٹ میں چیلنج نہیں کیا گیا، سرکاری ملازم پیسے دے کر کلین چٹ لیتا تھا پھر وہی کرتا تھا۔سپریم کورٹ کے چیف جسٹس عمر عطا بندیال نے کہا کہ قانون میں جو سقم تھا وہ دور کر دیا گیا، یہ والی نیب ترمیم تو اچھی ترمیم ہے، کیس کے ساتھ منسلک کی گئی دیگر درخواستوں کو علیحدہ سنا جائے گا۔سپریم کورٹ نے 9 ستمبر 2016 کو نیب کیسز میں رضاکارانہ رقم واپسی کے قانون پر ازخود نوٹس لیا تھا۔رقم کی رضاکارانہ واپسی کے بعد عہدیداران کی دوبارہ بحالی پر ازخود نوٹس لیا گیا تھا۔

اسلام آباد:صدر مملکت عارف علوی نے کہا ہے کہ خواتین کو سماجی اور اقتصادی طور پر بااختیار بنانے کی ضرورت ہے۔سماجی رابطے کی ویب سائٹ ٹوئٹر پر خواتین کے عالمی دن کے موقع پر جاری کردہ اپنے بیان میں عارف علوی کا کہنا تھا کہ خواتین کو ترقی اور آگے بڑھنے کے مساوی مواقع دینے کے عزم کا اعادہ کرتے ہیں، خواتین ٹیک ایجوکیشن، کیریئر اور گورننس میں کم نمائندگی رکھتی ہیں۔انہوں نے کہا کہ ڈیجیٹل ٹیکنالوجیز تک خواتین کی رسائی بہتر بنانے کے لیے کوششیں تیز کرنے کی ضرورت ہے، ہمیں ڈیجیٹل تقسیم کو ختم کرنے کے لیے اقدامات کرنا ہوں گے۔صدر مملکت کا مزید کہنا تھا کہ ہمیں انٹرنیٹ سروسز، لیپ ٹاپ اور دیگر ڈیجیٹل ٹیکنالوجیز تک خواتین کو رسائی دینا ہے۔

لاہور:لاہور ہائیکورٹ نے چیئرمین تحریک انصاف عمران خان کے خلاف توہین عدالت کی کارروائی کو ناقابل سماعت قرار دے دیا۔توہین عدالت کی کارروائی کے لیے درخواستوں پر سماعت ہوئی، جس پر عدالت نے آفس اعتراض کو برقرار رکھتے ہوئے درخواستوں کو ناقابل سماعت قرار دیا۔عدالت نے کہا کہ بادی النظر میں عمران خان کے بیانات سپریم کورٹ کے جج کے بارے میں ہیں، ایسے میں درخواستیں لاہور ہائیکورٹ میں کیسے قابل سماعت ہیں۔آفس ہائیکورٹ نے درخواست کے قابل سماعت ہونے پر اعتراض لگایا تھا اور آفس ہائیکورٹ نے درخواست گزار کو سپریم کورٹ سے رجوع کرنے کی ہدایت کی تھی۔ اعتراض کیا گیا تھا کہ ججوں کو درخواست میں فریق نہیں بنایا جا سکتا۔درخواست گزار نے آفس ہائیکورٹ کے اعتراض کو چیلنج کیا تھا۔ جسٹس شجاعت علی خان نے مشکور احمد کی اعتراض کی درخواست پر سماعت کی جس میں عمران خان کو فریق بنایا گیا۔درخواست میں موقف تھا کہ عمران خان کی سربراہی میں عدلیہ کے خلاف منظم مہم چلائی جا رہی ہے، ڈپٹی اسپیکر کی رولنگ کو کالعدم قرار دینے پر ججز کے خلاف مہم چلائی گئی۔اسی طرح، لاہور ہائیکورٹ اور اسلام آباد میں پیشی پر عمران خان جتھوں کے ساتھ عدالتوں میں پیش ہوئے لیکن سرکاری عمارتوں کو نقصان اور نعرے بازی کرتے ہوئے عدالت میں پیش ہونا توہین عدالت ہے۔ اسلام آباد کے جوڈیشل کمپلیکس پر پلان کر کے حملہ کیا گیا جس کے ماسٹر مائنڈ عمران خان تھے، عمران خان نے عدلیہ کو پریشرائز کرنے کے لیے ورکرز کو جوڈیشل کمپلیکس بلایا۔درخواست میں استدعا کی گئی تھی کہ لاہور ہائیکورٹ عمران خان کے خلاف توہین عدالت کی کارروائی کرے، عدالت عمران خان کو عدالت میں طلب کر کے جواب دہی کرے۔

لاہور :پاکستان مسلم لیگ (ن) کے رہنما اور وفاقی وزیر ریلوے خواجہ سعد رفیق نے کہا ہے کہ اس ملک میں الیکشن ہوگا بھی یا نہیں میں نہیں جانتا، الیکشن کروانے والے ہی جانتے ہیں الیکشن کب ہوگا۔احتساب عدالت کے باہر میڈیا سے گفتگو کرتے ہوئے لیگی رہنما خواجہ سعد رفیق نے کہا کہ جب کھچڑی پکا رہے تھے اس وقت نہیں پتا تھا کہ یہ کھچڑی پکے گی تو کڑوی کھچڑی سب کو کھانی پڑے گی، اس وقت تو سارے حصے دار تھے، اب آپ کہتے ہیں الیکشن کرواؤ، اب آپ کو الیکشن یاد آگیا ہے۔ خواجہ سعد رفیق نے کہا کہ پہلے ایک جعل ساز کو ہیرو بنایا اور ہیرو کو زیرو بنایا، پھر ایسے فیصلے دیے گئے جن کی بنیاد پر ریاست کی چولیں ہل گئیں، آج آپ کہہ رہے ہیں الیکشن کروا دو۔وفاقی وزیر کا کہنا تھا کہ پارلیمنٹ اور جمہوریت کو کمزور کرنے کے عمل میں عمران خان بنیادی کھلاڑی ہیں، پارلیمنٹ کو جو زنجیریں پہنائی گئی ہیں عمران اس کھیل کا حصہ تھے، عمران خان ایک مجرم کے طور پر تاریخ کے کٹہرے میں کھڑے ہیں ان کو جواب دینا پڑے گا۔

اسلام آباد :وفاقی وزیر برائے ماحولیاتی تبدیلی سینیٹر شیری رحمان نے کہا کہ عدالتی اور پولس کارروائی میں رکاوٹ ڈالنے اور جھوٹ بولنے پر عدالت سختی سے نوٹس لے،کل پوری قوم نے دیکھا کہ عمران خان ضمانت پارک میں چھپ گئے اور پولیس کے جانے کے بعد قوم اور کارکنوں کو قانون کی حکمرانی اور اخلاقیات پر لیکچر دیا۔ان خیالات کا اظہار پیر کے روز انہوں نے اپنے ایک بیان میں کیا ،شیری رحمان کا کہنا تھا کہ قانون کی حکمرانی کی بات کرنے والے عمران خان نے گرفتاری سے بچنے کیلئے جھوٹ بولا کہ وہ گھر پہ نہیں،یہ وہی شخص ہیں جس نے ماضی میں تمام سیاسی مخالفین کو انتقام کیلئے جیل بھیجا، آصف علی زرداری اور دیگر تمام سیاستدانوں نے من گھڑت کیسز میں جرات اور حوصلے سے گرفتاری دی،عمران خان قانونی اور عدالتی کاروائی کو روکنے کے لئے ہر بار کارکان کے پیچھے چھپ جاتے ہیں، عمران خان گرفتاری سے اتنے خوفزدہ ہیں کہ ذاتی طور پر پولس سے عدالتی نوٹس بھی وصول نہیں کرتے، گرفتاری سے بچنے کیلئے ضمانت پارک میں چھپ گئے، پولس کو خالی کمرہ دکھایا گیالیکن پولس کے جانے بعد باہر آئے اور قوم اور کارکنان کو قانون کی حکمرانی اور اخلاقیات پر لیکچر دیا،انہوں نے کہا کہ یہ پوری قوم کیلئے الگ اور اپنے لئے الگ قانون اور انصاف کا مطالبہ کرتے ہیں۔

اسلام آباد :سابق چیف جسٹس ثاقب نثار نے کہا ہے کہ میرا واٹس ایپ ہیک ہو گیا ہے،خدشہ ہے کہ ڈیٹا کو کسی خاص مقصدکیلئے استعمال کیا جاسکتا ہے،عمران خان کو مکمل طور پر صادق ، امین قرار نہیں دیا تھا، اسے سیاسی رنگ دیا گیا ، میرے مرنے کے بعد ایک کتاب شائع ہوگی جس میں تمام حقائق ہوں گے،سابق چیف جسٹس ثاقب نثار نے نجی ٹی وی سے گفتگو کرتے ہوئے کہا ہے کہ دوروز سے میرا وٹس ایپ ہیک ہو گیا ہے ، ابھی تک ریکور نہیں ہوا۔خدشہ ہے کہ میرے موبائل ڈیٹا کو کسی خاص مقصدکیلئے استعمال کیا جاسکتا ہے۔ان کا کہنا ہے کہ میرا وٹس اپ ہیک کرنے والوں کو شرمندگی ہی ہوگی۔اس سے قبل بھی میری مختلف ویڈیوز کو جوڑ کر ایک آڈیو بنائی گئی تھی۔کسی کی نجی زندگی میں مداخلت چوری کے زمرے میں آتا ہے۔انہوں نے کہا ہے کہ آج کل عدالتی فیصلوں پر وہ بات کر رہے ہیں جنہیں قانون کی زبر زیر معلوم نہیں۔جو شخص آج عدالتوں پر حملہ آور ہے وہ کبھی عدالتوں کا پسندیدہ رہا ہے۔صرف ایک مقدمہ کے علاوہ اسے ہمیشہ عدالتوں سے ریلیف ہی ملتا رہا ہے۔ ان کا کہنا ہے کہ جب چیف جسٹس نہیں بنا تھا تو نواز شریف نے مختلف حلقوں میں کہنا شروع کیا کہ یہ اپنا چیف ہے۔میں نے پانامہ کیس میں خود کو بینچ سے الگ کرلیا تھا۔نااہلی کیس میں معیاد سے متعلق اوپن نوٹس کردیا تھا کہ جو بھی معاونت کرنا چاہے کرے،نااہلی کی معیاد کا تقرر آئین قانون کی روشنی میں کیا۔ثاقب چیف جسٹس ثاقب نثار نے کہا ہے کہ عمران خان کو مکمل طور پر صادق اور امین قرار نہیں دیا تھا، اسے سیاسی رنگ دیا گیا،عمران خان کو 3 نکا ت پر صادق اور امین قرار دیا تھا،اکرم شیخ نے عمران خان سے متعلق 3 نکات لکھ کر دئیے کہ ان پر فیصلہ کیا جائے۔تینوں نکات پر عمران خان صادق اور امین ثابت ہوئے تھے۔عمران خان کیخلاف 3 نکات پر میری ججمنٹ آج بھی موجود ہے۔انہوں نے کہا ہے کہ پی کے ایل آئی کی فرانزک رپورٹ کا اگر کوئی جائزہ لے تو سر پکڑ کر بیٹھ جائے۔پی کے ایل آئی کے سربراہ کو ایک پیر کے کہنے پر لگایا گیا۔ملک کے مسائل کا حل الیکشن میں ہے۔2018میں بھی الیکشن کی راہ میں رکاوٹیں ڈالی گئیں جسے ناکام بنایا تھا،گواہ بابر یعقوب ہیں۔ان کا کہنا ہے کہ میں نے غلط فیصلے کیے ہوں گے۔ملک کی بقاء کے لیے جوفیصلے کیے ان پر عملدرآمد کیوں نہیں کرتے؟میں اب کسی کو انٹریو نہیں دوں گا،میرے مرنے کے بعد ایک کتاب شائع ہوگی جس میں تمام حقائق ہوں گے۔1997سے لیکر چیف جسٹس کے عہدے تک کی ساری کہانی لکھوں گا ۔

لاہور: چیئرمین پی ٹی آئی عمران خان نے چیف جسٹس آف پاکستان کے نام ایک اور خط لکھ دیا۔سپریم کورٹ کے چیف جسٹس عمر عطا بندیال کے نام خط میں سابق وزیراعظم عمران خان نے اپنی زندگی کو درپیش خطرات سے متعلق آگاہ کیا ہے۔عمران خان نے خط میں چیف جسٹس آف پاکستان سے استدعا کی ہے کہ مختلف مقدمات میں پیشی کے موقع پر مناسب سکیورٹی انتظامات کروائے جائیں۔ علاوہ ازیں عمران خان نے چیف جسٹس سے ویڈیو لنک کے ذریعے پیشی کی اجازت دینے کی بھی درخواست کی ہے۔ چیئرمین پی ٹی آئی نے گزشتہ ماہ بھی چیف جسٹس سمیت سپریم کورٹ کے تمام ججز کے نام ایک خط لکھا تھا، جس میں آڈیو لیکس کے سلسلے میں مؤقف اختیار کیا تھا کہ کون سا قانون کسے خفیہ ریکارڈنگز کا حق دیتا ہے اور یہ سلسلہ کب تک جاری رہے گا؟عمران خان نے فروری میں لکھے گئے خط میں استدعا کی تھی کے آڈیو لیکس کے معاملے پر میری درخواست کو فوری سماعت کے لیے مقرر کیا جائے

لاہور :لاہور ہائی کورٹ کے جج نے عورت مارچ کی اجازت نہ دینے کے خلاف درخواست پر سماعت کرنے سے معذرت کر لی۔عدالتِ عالیہ میں عورت مارچ کی اجازت نہ دینے کے خلاف درخواست پر سماعت ہوئی،لاہور ہائی کورٹ کے جسٹس مزمل اختر شبیر نے درخواست پر سماعت سے معذرت کر لی۔جج کی جانب سے کیس دوسرے بینچ کے سامنے لگانے کی سفارش کی گئی ہے، جس کے بعد فائل چیف جسٹس لاہور ہائی کورٹ کو بھجوا دی گئی۔عدالتِ عالیہ میں درخواست عورت مارچ کے منتظمین کی جانب سے دائر کی گئی تھی۔واضح رہے کہ لاہور کی ضلعی انتظامیہ نے مختلف تنظیموں کی جانب سے احتجاج کے باعث 8 مارچ کو عورت مارچ انتظامیہ کو ناصر باغ، ایوانِ اقبال، الحمرا اور مال روڈ پر مارچ کی اجازت دینے سے انکار کر دیا تھا۔ گزشتہ روز نگراں وزیرِ اطلاعات پنجاب عامر میر نے کہا ہے کہ حکومت کی جانب سے عورت مارچ کے انعقاد میں کوئی رکاوٹ نہیں ڈالی جائے گی، عورت مارچ کے شرکا ء￿ کو پولیس کی مکمل سیکیورٹی فراہم کی جائے گی۔ایک بیان میں عامر میر نے کہا تھا کہ عورت مارچ کے منتظمین کے تحفظات دور کر دیے گئے ہیں، نگراں حکومت شخصی آزادیوں پر یقین رکھتی ہے۔انہوں نے یہ بھی کہا کہ عورت مارچ میں شریک خواتین کا تحفظ یقینی بنایا جائے گا، امید ہے کہ عورت مارچ پْر امن طریقے سے منعقد ہو گا۔

لاہور :پاکستان پیپلز پارٹی نے پنجاب میں الیکشن کے لئے امیدواروں سے درخواستیں طلب کر لیں۔اس حوالے سے قائمقام صدر پیلز پارٹی وسطی پنجاب رانا فاروق سعید نے کہا کہ پارٹی ٹکٹوں کے لیے درخواستیں صدر پاکستان پیپلز پارٹی پارلیمنٹیرینز آصف علی زرداری کے نام بھیجی جائیں،امیدوار درخواست کے ساتھ شناختی کارڈ کی کاپی اوررابطہ نمبر لکھ کر بھیجیں ۔امیدواروں کو قومی اسمبلی کے پارٹی ٹکٹ کے لیے 40ہزار اور صوبائی اسمبلی کے لیے 30ہزار روپے کا بنک ڈرافٹ بھیجنے کی ہدایت کی گئی ۔ انہوں نے بتایا کہ تمام درخواستیں8 مارچ تک پیپلز پارٹی وسطی پنجاب سیکرٹریٹ158سی، ماڈل ٹائون، لاہور کو بھجوانے کی ڈیڈ لائن ہے ۔ جنرل سیکرٹری حسن مرتضیٰ نے کہا کہ قبل ازیں درخواستیں جمع کرانیوالے امیدواران کو نئی درخواستیں دینے کی ضرورت نہیں۔