Category سیاست

اسلام آباد :وفاقی وزیر موسمیاتی تبدیلی سینیٹر شیری رحمن نے کہا ہے کہ کسی بھی سیاسی لیڈر نے گرفتاری سے بچنے کیلئے کبھی اتنا تماشہ نہیں لگایا جتنا ڈرپوک خان نے لگایا ہے۔ سماجی رابطوں کی ویب سائٹ ٹوئٹر پرجاری اپنے ایک بیان میں شیری رحمن نے کہا کہ قانون کی حکمرانی کی پرچار کرنے والے عمران خان اور ان کی ڈنڈا بردار فورس کل سے قانون کی دھجیاں اڑا رہے ہے۔باعزت طریقے سے گرفتاری دینے سے سیاستدان کے قد میں اضافہ ہوتا ہے۔ انہوں نے کہا کہ ہمارے قائدین نے ہمیشہ اپنے کارکنان اور چاہنے والوں کا مان رکھا ہے۔ شہید ذوالفقار علی بھٹو، شہید محترمہ بینظیر بھٹو، آصف علی زرداری اور دیگر نے ہمیشہ ہنستے ہوئے قانون اور عدالت کا سامنہ کیا اور گرفتاریاں دیں۔ پولیس اور گرفتاری سے چھپ کر عمران خان نے اپنا مذاق اڑایا ہے۔ کون سا سیاسی قائد اپنی گرفتاری سے بچنے کیلئے کارکنان اور عورتوں کو ڈھال بناتا ہے؟ تحریک انصاف نے کل سے زمان پارک کو یرغمال بنایا ہوا ہے۔ عمران خان گرفتاری سے بچنے کیلئے اپنے کارکنان اور پولیس والوں کی زندگیاں خطرے میں ڈال رہے۔ ایک خودغرض لیڈر ہی لوگوں کی زندگیوں سے کھیلتا ہے ۔#/s#

لاہور: آئی جی پنجاب عثمان انور نے کہا ہے کہ لوگ ہم پرپتھراؤ اور ڈنڈے برسا رہے ہیں، پٹرول بم بھی پھینک رہے ہیں، والدین سے درخواست ہے کہ وہ اپنے بچوں کو سمجھائیں یہ عدالتی عمل ہے ، میڈیا سے گفتگو کرتے ہوئے آئی جی پنجاب کا کہنا تھا کہ اسلام آباد سے ڈی آئی جی عدالت کی جانب سے عمران خان کی ناقابل ضمانت گرفتاری کا وارنٹ لے کر لاہور آئے۔ انہوں نے عدالتی حکم پر عملدرآمد کے لئے لاہور پولیس سے مدد مانگی، کیونکہ ہمیں معلوم تھا کہ وہاں سے ردعمل آئے گا اس لئے ہم نے ان کی مدد کی اور ان کے ساتھ 3 سوسے زائد بندے بھیجے۔زمان پارک میں اس کے جواب میں پہلے سے حکمت عملی تیار تھی، وہاں جا کر ان کو سمجھانے کی کوشش کی گئی۔اس کے جواب میں وہاں سے پولیس پر پتھراؤ کیا گیا، ڈنڈے برسائے گئے اور پٹرول بم پھینکے گئے۔ رینجرز کی گاڑیوں پر بھی حملہ کیا گیا۔اس کے علاوہ پتہ چلا ہے کہ پی ٹی آئی کارکنوں کی جانب سے فائرنگ بھی کی گئی ہے، پولیس کی واٹر کینن کو آگ بھی لگائی گئی۔آئی جی عثمان انور کا کہنا تھا کہ جگہ جگہ طوفان بدتمیزی اور سوشل میڈیا پر لوگوں کو پولیس پر حملہ کرنے کے لئے اکسایا جا رہا ہے۔ان کا کہنا تھا کہ پولیس صرف اور صرف یہ کرنا چاہ رہی ہے کہ جو عدالت نے وارنٹ گرفتاری جاری کیا ہے اس پر عملدرآمد کرایا جائے۔ہمارا یہ کہنا ہے کہ بڑا چھوٹا قانون کے لئے سب برابر ہے، ہم صرف قانون پر عملدرآمد کروانا چاہتے ہیں۔ لوگوں کو اکسایا جائے گا اور پولیس پر حملے کئے جائیں گے تو پولیس کو لامحالہ ایکشن لینا پڑے گا۔ان کا کہنا تھا کہ ایک معصوم شخص ایکسڈنٹ میں مرتا ہے اگر وہ بھی پولیس کے اوپر ڈال دیا جاتا ہے جو کہ ثابت ہو چکا ہے کہ حادثہ تھا۔ اس کے گھر والے بھی مان چکے ہیں کہ حادثہ تھا، اس کو مدنظر رکھتے ہوئے ہم نے کوئی مسلح شخص وہاں نہیں بھیجا، اسی وجہ سے وہ لوگ ہم پر ڈنڈے برسا رہے ہیں، پتھراؤ کر رہے ہیں بلکہ پٹرول بم پھینک رہے ہیں۔آئی جی پنجاب کا کہنا تھا کہ والدین سے درخواست ہے کہ وہ اپنے بچوں کو سمجھائیں یہ عدالتی عمل ہے ، نوجوان بھی سمجھیں، اگر قانونی نظام میں رکاوٹ بنیں گے تو قانون اپنا راستہ خود اختیار کرے گا۔

اسلام آباد:وزیر خارجہ بلاول بھٹو زرداری نے کہا ہے کہ عمران خان سمجھتے ہیں کہ ان پر ملک کا کوئی قانون لاگو نہیں ہوتا،عمران خان نے بار بار قانون کی خلاف ورزی کی جس پر انہیں جواب دینا ہو گا۔ایک انٹرویو کے دوران بلاول بھٹو زرداری نے کہا کہ میرے خاندان اور پارٹی نے ڈکٹیٹر شپ کا سامنا کیا۔عمران خان سمجھتے ہیں کہ ان پر ملک کا کوئی قانون لاگو نہیں ہوتا۔انہوں نے کہا ہے کہ عمران خان کو عدالتوں میں بلایا جاتا ہے وہ پیش نہیں ہوتے، انہوں نے خود کو بچانے کے لیے اپنے کارکنوں کو پولیس کے سامنے لا کھڑا کیا ہے۔بلاول بھٹو نے کہا کہ پاکستان کو آگے بڑھانے کے لیے طویل مدتی منصوبہ بندی کرنا ہو گی، ہمیں موسمیاتی تبدیلی، غربت، معاشی حالات سے متعلق سوچ بچار کرنا ہے۔انہوں نے یہ بھی کہا کہ پاکستان کو معاشی، سیاسی اور سیکیورٹی سے متعلق چیلنجز درپیش ہیں، افغانستان اور خطیکی سیکیورٹی سے متعلق اقدامات کرنے کی ضرورت ہے۔

لاہور: پاکستان تحریک انصاف نے اتوار کو مینار پاکستان جلسے کیلئے انتظامیہ کو درخواست دیدی۔یہ درخواست پی ٹی آئی لاہور کے صدر شیخ امتیاز کی جانب سے دی گئی ہے، درخواست کے متن میں مینار پاکستان پر دن 2 بجے جلسہ کرنے کی اجازت طلب کی گئی ہے۔
درخواست میں کہا گیا ہے کہ پی ایس ایل میچ کے فائنل کی وجہ سے دن میں جلسہ رکھا گیا ہے، جلسیکی سکیورٹی کے لیے انتظامات کیے جائیں۔ تحریک انصاف کی جمع کروائی گئی درخواست میں مزید کہا گیا کہ پی ٹی آئی کا جلسہ پر امن ہو گا۔

لاہور:مسلم لیگ ن کی سینئر نائب صدر مریم نواز اور سابق وزیراعلیٰ پنجاب حمزہ شہباز نے لاہور سے الیکشن لڑنے کا فیصلہ کیا ہے۔ذرائع کے مطابق مریم نواز اور حمزہ شہباز نے پنجاب اسمبلی کے انتخابات میں لاہور سے حصہ لیں گے ۔دونوں کے کاغذات نامزدگی جمع کروائے جارہے ہیں ۔ واضح رہے سابق وزیراعلیٰ پنجاب حمزہ شہبا ز چار ماہ کے عرصے کے بعد وطن واپس پہنچ گئے ، حمزہ شہباز انتخابی سرگرمیوں میں حصہ لیں گے جبکہ مریم نواز پہلے سے مختلف شہروں میں جا کر ورکر کنونشنز میں کارکنان کو متحرک کرنے میں مصروف ہیں ۔

لاہور :پاکستان تحریک انصاف کے سینئر رہنما شاہ محمود قریشی نے ہم باہمی مشاورت سے راستہ نکالنے کیلئے تیار ہیں، تحریک انصاف کوئی خون خرابہ نہیں چاہتی،پولیس سے گزارش ہے لات مت بگاڑیں، ہوسکتا ہے عمران خان خود گرفتاری دے دیں۔ لاہور میں زمان پارک کے باہر دیگر رہنمائوں کے ہمراہ میڈیا سے گفتگو کرتے ہوئے کہ ڈی آئی جی آپریشنز کارروائی کرنے آئے ہیں۔ ڈی آئی جی کہہ رہے ہیں وارنٹ لے کر آئے ہیں۔ڈی آئی جی مجھے وارنٹ گرفتاری دکھائیں۔میں وارنٹ پڑھوں گا ، چئیرمین اور وکلاء￿ سے بات کروں گا۔لاٹھی چارج، آنسو گیس اور واٹر کیننن کا استعمال بند کیا جائے۔ظل شاہ کی لاش گر چکی اور لاشیں مت گرائیں۔تحریک انصاف کوئی خون خرابہ نہیں چاہتی۔ہم نے قانون کو ہاتھ میں لیا ہے نہ لیں گے۔قانون پر عمل کرنے کیلئے ہم درمیانی راستہ نکالتے ہیں،پولیس کو کہا ہے کہ جو بات کرنی ہے مجھ سے کریں۔کیا یہ لوگ ملک میں افرا تفری پھیلانا چاہتے ہیں؟ہم باہمی مشاورت سے ایک راستہ نکالنے کیلئے تیار ہیں۔ ہم خون خرابا نہیں چاہتے ، ہم بات چیت سے مسئلہ حل کرنا چاہتے ہیں ، شاہ محمود قریشی نے کہا یہ لاشیں گرانے کا پروگرام لے کر آئے ہیں، ہم سے بات کریں، ہو سکتا ہے خون خرابے سے بچنے کے لیے عمران خان از خود گرفتاری کے لیے تیار ہو جائیں عمران خان کو ضمانت ملی ہوئی ہے۔ کیا قیامت ٹوٹ پڑی ہے کہ آج ہی گرفتار کرنا ہے۔ انہوں نے کہا کیا یہ ہماری کل کی ریلی کا رد عمل ہے ،کیا یہ انتخابات ملتوی کروانا چاہتے ہیں ،کیا نگران حکومت کا یہ مینڈیٹ ہے؟۔ان کا کہنا تھاکہ ہم کھلے ذہن سے انہیں سننا چاہتے ہیں، کوئی نہ کوئی راستہ نکالنا چاہتے ہیںانہوں نے کہا کہ ہم نہ تو جانی اور نہ ہی املاک کا نقصان چاہتے ہیں، پولیس نے چھاپہ مارا ہے، انہوں نے جو حرکت کی ہے، یہ دراصل نقصان کرنے پر تلے ہوئے ہیں۔ شاہ محمود قریشی نے مزید کہا کہ حکومت حواس باختہ ہوچکی ہے، ان کے پاؤں کے نیچے سے زمین نکلتی جارہی ہے، یہ لوگ نقصان کرنے پر تلے ہوئے ہیں۔

اسلام آباد:نیب ترامیم کے خلاف عمران خان کی درخواست کی سماعت کے موقع پر چیف جسٹس آف پاکستان نے ریمارکس دیئے ہیں کہ حکومت کا کرپشن ملزمان کو نیب کے دائرہ اختیار سے خارج نا کرنے پر ترامیم کرنا خوش آئند ہے،مجوزہ ترامیم کی منظوری کا انتظار کرنا عدالت کے لیے درست اقدام نا ہو گا،کیس کو کافی عرصے سے سن رہے ہیں مزید انتظار نہیں کر سکتے،اس کیس کے دوران ذاتی طور پر پڑھا کہ کرپشن دنیا کے دوسرے ممالک میں مسئلہ ہے یا نہیں،معاشرے میں کرپشن سے عام انسان کی نظام عدل تک رسائی میں ناکامی ہوتی ہے،پلی پارگین اور رضاکارانہ واپسی کے قانون میں ترمیم بھی خوش آئند ہے،کیا اب نیب ترامیم کے بعد آمدن سے زائد اثاثے بنانا جرم ہے یا نہیں؟منگل کو عدالت عظمی میں معاملہ کی سماعت چیف جسٹس کی سربراہی میں تین رکنی بنچ نے کی۔ منگل کو نیب نے حکومت کی جانب سے رواں سال کی گئی ترامیم کی تفصیلات جبکہ وفاقی حکومت کے وکیل مخدوم علی خان نے نیب ترمیمی آرڈیننس 2023 بھی عدالت میں جمع کروایا ہے۔دوران سماعت وفاقی حکومت کے وکیل مخدوم علی خان نے ریمارکس دیئے کہ نیب کے حالیہ قانون میں نئی ترامیم آرڈیننس کی صورت میں تجویز کر دی گئی ہیں،نیب ترامیم آرڈیننس کابینہ کی منظوری کے بعد صدر مملکت کے پاس ہے،جسٹس منصور علی شاہ نے اس موقع پر پوچھا کہ کیا نیب ترامیم نئی ہیں یا ان کا موجودہ کیس سے کوئی تعلق ہے؟ جس پر مخدوم علی خان نے بتایا کہ زیر التوا نیب قانون میں ہی مزید ترامیم کی گئی ہیں،مجوزہ ترامیم سے چئیرمین نیب کے اختیارات میں ردوبدل کیا ہے،آرڈیننس کی منظوری کے بعد چئیرمین نیب کے ریفرنس ختم کرنے کے لیے عدالت کی اجازت لینا ہو گی،نیب قانون کے سیکشن 5 سمیت متعدد شقوں میں ترمیم کی جا رہی ہے،عدالت چاہے تو صدر مملکت کی نیب ترامیم کی منظوری تک کیس ملتوی کر دے،عدالت کا قانون کالعدم قرار دینے کا اختیار بذات خود بنیادی حقوق کی خلاف ورزی ہے،عدالتی مداخلت اور کرپشن پر بحث پاکستان تک محدود نہیں ہے،ایک جریدے کے مطابق امریکہ میں دو سیاسی جماعتیں عدالتوں پر اپنے کنٹرول کے لیے لڑ رہی ہیں،عمران خان نے نیب قانون میں 2019 میں پہلی ترمیم کی جو سیاسی انتقام کے لیے تھی،عمران خان کی حکومت نے کرپشن ملزمان کو جیل میں کلاس سی دینے کی ترمیم کی،ترمیم سے اسی عرصے میں مشہور سیاسی شخصیت کو گرفتار کر کے جیل کی کلاس سی میں رکھا گیا۔چیف جسٹس نے ا س موقع پر پوچھا کہ نیب قانون میں جرم کی نوعیت کو کہاں تبدیل کیا گیا ہے؟جس پر وفاقی حکومت کے وکیل کی طرف سے بتایا گیا کہ نیب قانون میں 2019 میں کی گئی ترمیم 2021 میں آرڈیننس کے ذریعے واپس لی،اپوزیشن کی ذمہ داری پارلیمنٹ کو عبور کر کے ہر سیاسی تنازعے کو عدالت میں حل کرنا نہیں، جسٹس منصور علی شاہ نے ایک موقع پر پوچھا کہ کیا نیب ترامیم کا اطلاق ماضی سے ہونے کے نکتے پر کوئی قانونی نظیر موجود ہے؟نئی نیب ترامیم میں کیا تبدیلی کی گئی ہے؟جس پر عدالت کو وفاقی حکومت کے کونسل نے بتایا کہ نیب کا حالیہ قانون 2019 سے کی گئی ترامیم کا ہی ارتقاء ہے،حکومت نیب قانون سے کرپشن کو مزید مشکل بنا رہی ہے،عدالت نے حنیف عباسی بنام عمران خان کیس میں ایمنسٹی اسکیم سے پبلک آفس ہولڈرز کو ملے فائدے کا ذکر کیا تھا، چیف جسٹس نے اس موقع پر کہا کہ حنیف عباسی کیس پبلک فنڈز کے متعلق نہیں بلکہ کاغذات نامزدگی کی تصدیق کا تھا، مخدوم علی خان نے آپ ے دلائل جاری رکھتے ہوئے بتایا کہ موجودہ حکومت نے عمران دور میں واپس لی گئی ترامیم ہی دوبارہ بحال کیں،آمدن سے زائد اثاثے بنانا جرم ہے یہ جرم ختم نہیں ہوا۔ بعد ازاں کیس کی سماعت بدھ 15 مارچ تک کیلئے ملتوی کر دیا گیا ہے۔

اسلام آباد :گورنر خیبر پختونخوا حاجی غلام علی نے صوبہ میں عام انتخابات کے لئے28مئی 2023ء کی تاریخ دیدی اور کہاہے کہ امید ہے الیکشن خیر خیرت سے ہو جائیں ، اصل مسئلہ امن و امان کی خراب صورتحال کاہے ،اداروں کی رپورٹ ہے اور مجھے بھی لگتا ہے کہ الیکشن ممکن نہیں۔ایوانِ صدر سے جاری بیان کے مطابق صدر مملکت عارف علوی کی دعوت پر گورنر خیبرپختونخوا حاجی غلام علی نے ایوان صدر میں ان سے ملاقات کی۔ملاقات کے دوران صدر مملکت اور گورنر نے آئین کے آرٹیکل 224 (2) اور یکم مارچ کے سپریم کورٹ کے حکم کی روشنی میں الیکشن کے حوالے سے گفتگو کی۔صدر عارف علوی نے گورنر خیبرپختونخوا کو مشورہ دیا کہ وہ الیکشن کمیشن سے مشاورت کے بعد انتخابات کی تاریخ کے حوالے سے سپریم کورٹ کے حکم پر عمل درآمد کرتے ہوئے فوری طور پر عام انتخابات کی تاریخ مقرر کریں۔صدر مملکت کا کہنا تھا کہ تقریباً 2 ہفتے گزر چکے ہیں، کسی بھی پیچیدگی سے بچنے کے لیے سپریم کورٹ کے فیصلے کے مطابق انتخابات کی تاریخ مقرر کی جائے۔عارف علوی نے آئین کی پاسداری اور مقررہ مدت کے اندر عام انتخابات کے انعقاد کی ضرورت پر زور دیتے ہوئے کہا کہ مقررہ وقت میں انتخابات آئین نے لازمی قرار دیے جس کی سپریم کورٹ نے توثیق کی ہے۔صدر کا کہنا تھا کہ مقررہ وقت میں انتخابات ملک میں پارلیمانی جمہوریت کو مضبوط بنانے کے لیے ضروری ہیں۔دریں اثناء گورنر خیبر پختونخوا حاجی غلام علی اور چیف الیکشن کمشنر سکندر سلطان راجا کے درمیان مشاورت ہوئی ہے ۔ چیف الیکشن کمشنر کی زیر صدارت الیکشن کمیشن اجلاس میں گورنر خیبر پختونخوا حاجی غلام علی نے بھی شرکت کی، اجلاس کے دوران گورنر نے صوبے کی سیکورٹی صورتحال پر کمیشن کو بریفنگ د ی اور صوبے میں 28 مئی کو پولنگ کرانے کی تجویز دی۔ بعد ازاں الیکشن کمیشن کے باہر میڈیا سے گفتگو کرتے ہوئے گورنر کے پی نے کہا کہ مجھ پر ساری قوم کا دباؤ تھا، میراکام ہے صوبے میں الیکشن کے لیے تاریخ دینا، وہ میں نے دیدی ہے، اب الیکشن کراناالیکشن کمیشن کاکام ہے، میں نے 28مئی کو خیبر پختونخوا میں الیکشن کی تاریخ دی ہے۔انہوں نے کہا کہ الیکشن کمیشن کے ساتھ اچھے ماحول میں میٹنگ ہوئی، اصل مسئلہ امن و امان کی خراب صورتحال کاہے، ضلع لکی مروت اور ٹانک میں پولیس پرحملے ہوئے، کے پی میں لوگوں کومردم شماری کے حوالے سے خدشات ہیں۔انہوں نے کہا ہے کہ سکیورٹی کے حوالے سے بہت سے سوالات اٹھے ہیں اور اٹھیں گے، امید ہے الیکشن خیر خیرت سے ہو جائیں، ہمارے قبائلی اضلاع کے لوگ ا?ج بھی احتجاج پر ہیں، ہم پہلے بھی کہہ رہے تھے اور اب بھی کہہ رہے ہیں کہ امن وامان کا مسئلہ ہے۔ ان کا کہنا تھا کہ الیکشن کمیشن اور حکومت سپریم کورٹ کے فیصلے کے پابند ہیں۔گورنر خیبر پختونخوا نے کہا کہ میں نے تاریخ دے دیں ہے لیکن سیکیورٹی کے معاملات کے حوالے سے ہم سب مل کر کوشش کریں گے کیونکہ یہ ملک، صوبہ اور عوام ہمارے ہیں۔غلام علی نے کہا کہ گزشتہ زمان پارک میں بیٹھے پی ٹی آئی کے 2 رہنماؤں نے مجھے کہا کہ صوبائی اور قومی اسمبلی کے الیکشن ساتھ ہونے چاہییں، میں نے ان کو کہا کہ آپ مجھ سے یہ بات نہیں کہیں، آپ مجھ سے یہ بات نکلوانا چاہتے ہیں، 2 قدم اندر جائیں اور وہاں جاکر یہ بات کریں کہ یہ بات ملک کے مفاد ہے۔انہوں نے کہا کہ اس وقت کوئی جماعت الیکشن کے لیے تیار نہیں ہے، گورنر نے کہا ’’میری خواہش ہے تمام اسمبلیوں پر انتخابات ایک ہی دن ہوں، سیاسی جماعتوں سے رابطے شروع کر رہا ہوں، پی ٹی آئی سمیت تمام جماعتیں ایک ہی دن الیکشن چاہتی ہیں، زمان پارک سے رابطہ ہوا ہے ان کی بھی یہی خواہش ہے۔‘‘

مانانوالہ:وفاقی وزیر میاں جاوید لطیف نے کہا ہے کہ شیخوپورہ میں ورکرز کنونشن کی کامیابی پر نواز شریف نے تمام کارکنوں کو مبارک باد کا پیغام بھیجا ہے وہ وقت دور نہیں جب میرے قائد اپنے شیر کارکنوں کے ساتھ ہوں گے وفاقی وزیر جاوید لطیف نے میڈیا کے نمائندوں سے گفتگو کرتے ہوئے کہا کہ ورکرز کنونشن کی کامیابی پر میری بہن مریم نواز شریف نے مسرت کا اظہار کیا ہے ان شاء اللہ اس ملک سے فتنہ خان کی سیاست ہمیشہ ہمیشہ کے لیے ختم ہوجائے گی قبل ازیں ورکرز کنونشن سے خطاب کرتے ہوئے کہا کہ میں آج اپنی بہن مریم نواز شریف کی جرات اور سلام پیش کرتا ہوں جو بہادری کے ساتھ میدان عمل میں ہے اور انہوں نے گیڈروں کو چھپنے پر مجبور کر دیا ہے انہوں نے کہا کہ انصاف وہ ہوگا جس میں ترازو کے دونوں پلڑے برابر ہوں میرے قائد نواز شریف کے ساتھ بے انصافی کرنے والے آج منہ چھپا کر پھر رہے ہیں اب صادق و امین کا اصل معیار قائم ہوگا اور جعلی صادق و امین کو بے نقاب کرنا پڑے گا میاں جاوید لطیف نے کہا کہ شیخوپورہ کے ہزاروں کارکنوں نے آج کنونشن میں جوق در جوق شریک ہو کر ثابت کر دیا ہے کہ کوئی مائی کا لعل شیخوپورہ میں نواز لیگ کو نقصان نہ پہنچا سکا ہے اور ان شاء اللہ یہ ہمیشہ نواز لیگ کا مضبوط قلعہ رہے گا۔

لاہور: پاکستان تحریک انصاف نے جہلم سے مسلم لیگ (ن) کی بڑی وکٹ گرا دی، پی ٹی آئی کے چیئرمین عمران خان سے مسلم لیگ(ن) کے سابق رکن پنجاب اسمبلی چودھری محمد ثقلین نے ساتھیوں سمیت ملاقات کر کے شمولیت کا اعلان کیا۔اس موقع پر مرکزی سینئر نائب صدر فواد چودھری، مرکزی نائب صدر اعجاز چودھری اور چودھری شہباز بھی موجود تھے۔ملاقات میں چودھری محمد ثقلین کی جانب سے چیئرمین تحریک انصاف عمران خان کی قیادت پر مکمل اعتماد کا اظہار کیا گیا، عمران خان کی جانب سے تحریک انصاف میں شمولیت پر چودھری محمد ثقلین کا خیر مقدم کیا گیا۔