Category سائنس اور ٹیکنالوجی

لاہور (ایمرا نیوز آن لائن)
ایپل ٹی یکم نومبر کو 100 سے زائد ممالک میں متعارف کروایا جائے گا جہاں شوز، فلمز اور دستاویزی فلمیں دکھائی جائیں گی۔ دنیا کی معروف ٹیکنالوجی کمپنی ایپل کی مصنوعات کا عوام کو بیتابی سے انتظار رہتا ہے اور لوگ جاننا چاہتے ہیں کہ ایپل اس بار عوام کی سہولت کے لیے کیا نیا متعارف کرا رہا ہے۔ اپیل نے موبائل، اسمارٹ واچز اور آئی پیڈز کے بعد اب تھیڑ ٹی وی (ایپل ٹی وی) بھی متعارف کرانے کا فیصلہ کیا ہے۔آئندہ ماہ مارکیٹ میں پیش کیے جانے والے ایپل ٹی وی میں فلموں کے علاوہ ایپل کی آن لائن ویڈیو اسٹریمگ سائٹ پر ریلیز ہونے والی ویب سیریز پہلے ایپل ٹی وی (سینما) پر دیکھی جا سکیں گی۔

دی وال اسٹریٹ جرنل کی رپورٹ کے مطابق کمپنی نے امید ظاہر کی ہے کہ ایپل کی جانب سے تھیٹر کی خدمات متعارف کروانے سے فلم انڈسٹری کی اعلیٰ صلاحیتوں کو ایپل ٹی وی پر راغب کرنے میں مدد ملے گی۔رپورٹ کے مطابق ایپل تھیٹر متعارف کروانا ٹی وی اور فلم انڈسٹری کے لیے بہت معاون ثابت ہو سکتا ہے ، اس سے قبل بھی متعدد ویڈیو اسٹریمنگ سائٹ جیسے نیٹ فلیکس اور ایمیزون پرائم نے اپنی اصل فلموں میں سے کچھ سینما گھروں میں ریلیز کی ہیں جسے بے حد سراہا گیا ہے۔ایپل ٹی وی یکم نومبر کو 100 سے زائد ممالک میں متعارف کروایا جائے گا جہاں شوز، فلمیں اور دستاویزی فلمیں دکھائی جائیں گی۔

دوسری جانب ایپل کی آن لائن اسٹریمنگ سروس میں مواد محدود ہوگا جبکہ اس سروس کے ماہانہ چارجز 6.99 ڈالز یا اس سے بھی کم ہوں گے۔ایپل کی آن لائن اسٹریمنگ سروس میں اسکرپٹڈ ڈرامے، کامیڈی اور فلموں کے ساتھ ساتھ بچوں کے لیے بھی پروگرام ریلیز کیے جائیں گے جو کہ نیٹ فلکس اور ایمیزون جیسی اسٹریمنگ کمپنیوں کے لیے ایک چیلنج ہوگا۔ایپل کمپنی نے حال ہی میں یہ اعلان بھی کیا ہے کہ آئی فون، آئی پیڈ، ایپل ٹی وی، آئی پوڈ اور میک خریدنے والے صارفین کو سروس کا پہلا سال مفت میں ملے گا۔

لندن (ایمرا نیوز آن لائن) رواں ماہ آرٹیفیشل انٹیلیجنس فیچر والی لگژری کار’ویژن 100‘ کی نقاب کشائی لندن میں کی گئی۔
لگژری گاڑیاں بنانے والی جرمن کمپنی ’رولس-روائس‘ نے آرٹیفیشل انٹیلیجنس کے ذریعے چلنے والی لگژری کار’ویژن 100‘ متعارف کرا دی۔
گاڑی کو باہر سے دیکھنے کے بعد کوئی بھی اس گاڑی کے جدید فیچرز کا اندازہ با آسانی لگا سکتا ہے جس کی بناوٹ تمام گاڑیوں سے بے حد مختلف ہے۔
گاڑی میں سامان رکھنے کے لیے جدید طرز کا ’لگیج سیکشن‘ الگ سے موجود ہے جو کہ سامان تک رسائی حاصل کرنے میں بے حد مدد گار ہو گا۔
رولس-رائس کی یہ گاڑی مکمل طور پر خود کار ہے جو کہ آواز کی مدد سے سارے کام سر انجام دے گی، گاڑی میں رہنمائی کے لیے ایک ورچوئل اسسٹنٹ بھی موجود ہے۔
گاڑی کے ٹائر 25 انچ کے 65 المونیم کے ٹکڑوں سے ڈھکے ہوئے ہیں جو کہ اسے دوسری گاڑیوں سے منفرد بناتے ہیں۔
گاڑی کے ٹائر 25 انچ کے 65 المونیم کے ٹکڑوں سے ڈھکے ہوئے ہیں.
گاڑی بنانے والی کمپنی کے مالک کا کہنا ہے کہ ہمارا مقصد اور ہمارا وژن آج اس گاڑی کی شکل میں سب کے سامنے ہے اور یہ آسائش کی نقل و حرکت کا مستقبل ہے۔

لاہور(وقت آن لاین)
ائیوان: کہتے ہیں آئینہ سچ بولتا ہے لیکن جدید ٹیکنالوجی سے تیار اسمارٹ آئینہ نہ صرف سچ بولتا ہے بلکہ جلدی امراض کے بھید بھی کھولتا ہے۔

اس آئینے کو ’ ہائی مِرر‘ کا نام دیا گیا ہے جو انتہائی گہرائی اور تفصیل سے ہر روز آپ کے چہرے کا معائنہ کرتا ہے۔ اس کا خاص نظام 8 مختلف طریقوں سے آپ کے چہرے کا جائزہ لیتا ہے۔ اس طرح چہرے کے داغ، دھبے، جھریوں، خشکی، پانی کی کمی، رنگت اور جلد کی ناہمواری کو بھی روکتا ہے۔

ہائی مِرر کا سافٹ ویئر کسی جلدی عارضے کی صورت میں لوشن اور کریم کے متعلق بھی مشورہ دیتا ہے۔ اسمارٹ مِرر میں ایلکسا بھی موجود ہے اور آپ ایک جملے سے جلد کے لیے ضروری مصنوعات آرڈر بھی کرسکتے ہیں۔

ہائی مرر کی ایک اچھی بات یہ بھی ہے کہ اگر آپ اسے چند ماہ تک استعمال کریں تو اس کے ڈیٹا بیس میں آپ کے جلد کی تفصیلات جمع ہوتی رہیں گی اور اس طرح سافٹ ویئر جھائیوں اور جلد میں دیگر تبدیلیوں کو مسلسل نوٹ کرتا رہتا ہے۔

دوسری جانب گہرے داغ دھبوں میں کمی و بیشی کو فیصد اور گراف کی صورت میں بھی دیکھا جاسکتا ہے۔ اس کا ایک اور فیچر ’ میک اپ اسٹوڈیو‘ ہے جسے استعمال کرکے آپ صرف آئینے میں ہی اپنے چہرے پر میک اپ کرکے دیکھ سکتی ہیں کہ فلاں میک اپ اور لِپ اسٹک لگانے سے چہرہ کیسا دکھائی دے گا؟ اسطرح آئی لائنر، بلش، سات طرح کی لپ اسٹک اور آئی لیشز کو استعمال کیے بغیر اسکرین پر ان کا جائزہ لیا جاسکتا ہے۔

دوسری جانب انٹرنیٹ سے جڑنے پر جلد کے بہترین ماہرین بھی مشورے کے لیے حاضر رہتے ہیں۔

لاہور(ایمرا نیوز) گاڑی آج ہر شخص کی ضرورت بنتی جا رہی ہے تاہم اچھا ماڈل رکھنا بھی ایسی خواہش ہے جو ہرایک کی پوری نہیں ہو پاتی۔اسی طرح گاڑیاں رکھنے والے افراد کلر کی خواہش بھی رکھتے ہیں کہ ان کی گاڑی کا کلر منفرد ہونا چاہیے۔عام طورپر بلیک،سلور اور وائٹ گاڑیاں ہی ہر طرف نظر آتی ہیں تاہم دیگر کلر میں بھی گاڑیاں ادھر ادھر دوڑتی نظر آتی ہیں۔
اب ایک مشہور کمپنی نے بالکل سیاہ ترین کلر کی گاڑی نکالنے کا اعلان کیا ہے جو کہ سب کی توجہ کا مرکز بن گئی ہوئی ہے۔گاڑیاں بنانے والی جرمن کمپنی بی ایم ڈبلیو نے دنیا کی سیاہ ترین کار متعارف کرانے کی تیاری کرلی۔جرمن کارساز کمپنی کی جانب سے جاری بیان کے مطابق بی ایم ڈبلیو کا اسپیشل ایکس 6 ایڈیشن دنیا کی سیاہ ترین کار ہوگی جس کی فنشنگ وینٹا بلیک مادے سے کی جائے گی۔
دنیا کی اس سیاہ ترین گاڑی کو فرینکفرٹ موٹر شو میں متعارف کرایا جائے گا جو ایکس 6 ماڈل کی تیسری جنریشن ہے۔خیال رہے کہ وینٹابلیک مادہ 2014 میں برطانیہ میں سرے نینوسسٹمز کی جانب سے تیار کیا گیا تھا جو 99.96 فیصد تک روشنی کو جذب کرنے کی صلاحیت رکھتا ہے اور اسی کی وجہ سے یہ اب تک دنیا کا سیاہ ترین مادہ ہے۔تاہم بی ایم ڈبلیو ایکس 6 کو وینٹا بلیک نہیں بلکہ اسی سے ملتے جلتے وینٹابلیک وی بی 2 سے رنگا جائے گا۔
اس مادے کو بھی سیاہ ترین تصور کیا جاتا ہے لیکن یہ وینٹا بلیک کے مقابلے میں ذرا زیادہ روشنی کو منعکس کرتا ہے۔ اس خاصیت کی وجہ سے وی بی 2 گاڑی پر رنگنے کیلئے زیادہ موزوں ہے۔ایکس 6 کو ڈیزائن کرنے والے حسین العطار کا کہنا ہے کہ وینٹا بلیک وی بی 2 نے ڈیزائنرز کیلئے نئی راہیں کھول دی ہیں۔نینوسسٹمز کے مالک اور وینٹابلیک کے موجد بین جینسن کا کہنا ہے کہ ماضی میں انہیں متعدد گاڑیاں بنانے والی کمپنیوں کی جانب سے درخواستیں موصول ہوئیں تاہم انہوں نے بی ایم ڈبلیو ایکس 6 کا انتخاب کیا۔
انہوں نے کہا کہ وینٹا بلیک ایکس 6 کے سائز اور ڈیزائن کی وجہ سے اس پر بہترین طریقے سے کام کرتا ہے تاہم وینٹا بلیک وی بی 2 کار پینٹ تیار کرنا جو کہ پائیدار بھی ہو انتہائی مشکل کام تھا۔انہوں نے بتایا کہ اب وینٹا بلیک وی بی 2 خودکار گاڑیوں کے سینسر آلات میں استعمال کیا جارہا ہے تاکہ انہیں سورج کی روشنی سے ہونے والے نقصان سے بچایا جاسکے۔بی ایم ڈبلیو ایکس 6 کو 12 سے 22 ستمبر تک ہونے والے فرینکفرٹ موٹر شو میں متعارف کرایا جائے گا جبکہ نومبر میں صارفین اسے شو رومز سے خرید سکیں گے.

لاھور(ایمرا نیوز)ہم میں سے بہت سے افراد نے جولائی 2015 میں منظرِ عام پہ آنے والے قدیم قرآنی نسخے کے بارے میں پڑھا یا سنا ہو گا۔ برطانیہ کی برمنگھم یونیورسٹی کی لا ئبر یر ی میں سال ہا سال سے موجود ان قرآنی صفحات کے بارے میں جب تحقیق کی گئی تو پتا چلا کہ یہ ان چند نسخوں میں سے ایک کے حصے ہو سکتے ہیں جو اسلام کے ابتدائی دور میں لکھے گئے تھے۔
قیاس کیا جا رہا ہے کہ یہ غالباً تیسرے خلیفہ راشد حضرت عثمان غنی رضی اللہ عنہ کے زمانہ میں لکھے جانے والے قرآنی نسخوں میں سے ایک کا حصہ ہو سکتے ہیں۔
اس قیاس کو ایک ایسے سائنسی طریقےسے تقویت ملی ہے جو ماہرین ِارضیات اور آثار قدیمہ کے ماہرین قدیم رکازی (فوسل) دریافتوں کی عمر کا پتا لگانے کے لیےاستعمال کرتے ہیں۔ اس طریقہ کار کو ’’کاربن ڈیٹنگ‘‘ یا ’’کاربن 14ڈیٹنگ‘‘ (Carbon-14 Dating) کہا جاتا ہے۔ لیکن سوال یہ ہے کہ کسی شے کی عمر کا پتا لگانے کا یہ سائنسی طریقہ کس طرح کام کرتا ہے؟
ہم جانتے ہیں کہ تمام جان دار، نباتات و حیوانات، ہائیڈرو کاربن کا مجموعہ ہوتے ہیں۔ یعنی ان کے جسم میں ہائیڈروجن اور کاربن پہ مشتمل خلیے ہوتے ہیں۔ کاربن ایسا ایٹم ہے ،جس کے مرکز (نیوکلیس) میں چھ پروٹون اور چھ نیوٹرون ہوتے ہیں۔ مگر تمام کاربن ایٹم ایک جیسے نہیں ہوتے۔ کچھ ایسے کاربن ایٹم بھی پائے جاتے ہیں جن کے نیوکلیس میں سات یا آٹھ نیوٹرون ہوتے ہیں۔
اس طرح کاربن کی تین شکلوں کو کاربن 12، کاربن 13، اور کاربن 14کہا جاتا ہے۔ ہمارے قدرتی ماحول میں کاربن 12کی تعداد کاربن 13اور کاربن14 کے مقا بلے میں بہت زیادہ ہوتی ہے۔ فرض کریں کہ ہم نے تجربے سے معلوم کیا ہے کہ ہوا کے کسی بھی نمونے میں اگر ایک ہزار کاربن 12کےایٹم ہیں توساتھ میں صرف ایک کاربن14 کاایٹم ہوتا ہے تو پھر کاربن12 اور کاربن14کا یہ تناسب ان تمام جان داروں میں پایا جائے گا جو ہوا کو سانس کے لیے استعمال کرتے ہیں۔
ایک اچھی بات یہ ہے کہ کاربن 14 تاب کار ہوتا ہے اور وقت گزرنےکے ساتھ کاربن14 ایک نائٹروجن ایٹم بن جاتا ہے۔ کاربن14 کی یہی تاب کارخاصیت ہماری معاون ہے۔ فرض کریں کہ کاربن14 اپنے تاب کاری اثرسے پانچ ہزار سال بعد ایک نائٹروجن ایٹم بن جاتا ہے ۔ اب اگر آپ کے پاس کسی جان دار کی ہڈی کا نمونہ ہو ،جس میں کاربن12 اور کاربن14 کا تناسب ایک ہزار بٹا ایک ہو توآپ سمجھ جائیں گےکہ یہ ہڈی بالکل نئی ہے،کیوں کہ اس میں کاربن12 اور کاربن 14 کا تناسب وہ ہی ہے جو فضا میں ہے۔
لیکن اگر آپ کے پاس ایسی ہڈی ہو جس میں ایک ہزار کاربن 12 کےایٹم ہوں ،مگر ایک بھی کاربن 14 کاایٹم نہ ہو توآ پ کو اندازہ ہوجائے گا کہ یہ ہڈی پانچ ہزار سال پرانی ہے۔ پانچ ہزار سال پہلے اس ہڈی میں کاربن 12 اور کاربن 14 کا وہ ہی تناسب تھا جو فضا میں ہے ،مگر وقت گزرنے کے ساتھ کاربن14کا ا یٹم نائٹروجن میں تبدیل ہوگیا اور اب اس نمونے میں صرف کاربن12کے ایٹم بچے ہیں۔ اس طرح کسی بھی رکاز یافوسل کی قدامت کا تخمینہ کاربن ڈیٹنگ کے ذریعے کیا جاسکتا ہے۔
ہم اسے یوں بھی سمجھ سکتے ہیں کہ ہماری زمین کی انتہائی بالائی فضاء میں موجود نا ئٹر و جن گیس سورج یا دیگرستاروں سے آنے والی تیز اور ر یڈ یا ئی شعاؤں (Radiations) کی وجہ سے اپنی نیوکلیائی ساخت بدل لیتی ہے اور ریڈیو ایکٹیو کاربن14 کے طو ر پر فضا میں شامل ہو جاتی ہے۔
یہ کاربن ایٹم چوں کہ زیادہ دیر تک اس شکل میں نہیں رہ سکتے، اس لیے یہ آکسیجن کے ساتھ مل کر کاربن ڈائی آکسائیڈ بنا لیتا ہے۔ درخت اور پو دے کاربن ڈائی آکسائیڈ جذب کرتے ہیں۔ دیگر جان داریہ پودے کھاتے ہیں۔ ان جان داروں کو گوشت خور جانور کھاتے ہیں۔ اس طرح کاربن14 ہماری فوڈ چین میں شامل ہو جاتاہے۔ یعنی یہ اس بکری یا بھیڑ کی کھال میں بھی موجود ہے جس پرمذکورہ قرآنی نسخے لکھے گئے ہوں گے۔
ریڈیو کاربن ڈیٹنگ قدرتی اشیامیں موجود ان ہی کا ر بن ایٹمز کی تعداد کے لحاظ سے یہ اندازہ لگاتی ہے کہ اس ما دّے کو ڈی کمپوزہوتےیا اجزا میں بکھرتے ہوئےکتنا عر صہ گزر چکا ہوگا۔دراصل فضا میں موجود ہر گیس کاخاص تناسب ہوتا ہے۔ یہ خاص تناسب کم و بیش ہمیشہ یکساں رہتا ہے۔ اگر ایسا نہ ہو تو ہم اس فضا میں سانس نہ لے سکیں۔ سانس کے ذریعے ہوا کا یہ خاص تناسب تمام جان داروں کے ا جسام میںیک ساں انداز میں موجود ہے۔
جب کوئی جا ن دار مر جاتاہے تو کیمیائی ٹوٹ پھوٹ کے عمل کی وجہ سے گلنے سڑنے کا عمل شروع ہوجاتاہے اور یہ تناسب بدلنا شروع ہو جاتاہے۔تاب کا رعناصر ایک خا ص تناسب سے ڈی کمپوز ہوتے ہیں۔ ان کے ڈی کمپو ز ہونےکا عمل وقت سے منسلک ہے۔ یعنی ایک خاص عر صے میں ایک خا ص مقدار ہی ڈی کمپوز ہوگی۔ اس طرح جب کسی مادّے میں موجود تابکار کاربن کے ایٹمز کا تناسب دیکھا جاتا ہے تو یہ اندازہ لگایا جا سکتا ہے کہ اس ما دّے کو گلتے ، سڑ تے ہوئے کتنا وقت گزر چکاہے۔ اسی محتا ط اندازے کو ر یڈیو کاربن ڈیٹنگ کہا جاتا ہے۔
کاربن ڈیٹنگ کس حد تک قابل اعتبارہے یایہ کتنی پرانی اشیاء کی عمر بتا سکتی ہے،اس ضمن میںبہت سے افراد کو تحفظات ہیں۔ان کا کہنا ہے کہ کاربن ڈیٹنگ کا طریقہ قابل اعتبار نہیں ہے۔ لیکن سائنس دانوں کی اکثریت ا سےدرست مانتی ہے اور اگر نمونے کی مقدار اورمعیار اچھا ہو تو تقریباً 95فی صدتک درست نتائج حاصل ہوتے ہیں۔جہاں تک اس سوال کا تعلق ہے کہ کتنے عرصے پر ا نے نمونےاس طریقے سےپرکھے جا سکتے ہیں تواس کا تعلق بھی ریڈیو ایکٹیوکاربن 14سے ہے۔
کیوںکہ اس کے ختم ہونے کا ایک وقت مقرر ہے۔ موجودہ ہواکے تناسب سے تقریباً 50 ہزار سال پرانے نمونوں کی عمر کا ا ند ا زہ لگایاجاسکتا ہے۔اس سے پرانے مادّے میں چوں کہ کاربن کم سے کم ہوتا چلا جاتا ہےاس لیے اس کی عمر کا اندازہ لگانے کا عمل بھی کم زور سے کم زور تر ہوتا جائے گا۔
بہ ہرحال، مذکورہ قرآن پاک کے نسخےکے ضمن میںیہ کا فی قابل اعتبارتصور کیا جاتاہے، کیوں کہ اس کی عمر ڈیڑھ ہزاربرس سے زیادہ نہیں ہو سکتی۔ کاربن ڈیٹنگ کے مطابق جس کھال پر وہ لکھے گئے ہیں،اسے تقریباً 568 عیسوی سے 645 عیسوی کے درمیان شمار کیا گیا ہے۔ یعنی اس نسخے کی عمر کم سے کم بھی تقریباً 1370 سال ہے۔
ریڈیو کاربن ڈیٹنگ کا طریقہ ہی استعمال کرکے سائنس دانوں نے یہ بتایا ہے کہ مصر کی بادشاہت کے قد یم، وسطی اور جدید ادوار کی تواریخ کے بارے میں ان کے اندازے درست ہیں۔ماہرین نے تحقیق کے لیے فر عو نو ں کے مقبروں سے ملنے والے جن بیجوں پر کام کیا ان کے بارے میں پتا چلا کہ ان بیجوں کے کچھ نمونے ساڑھے چار ہزار سال پرانے ہیں۔مصر کے قدیم دور کی اشیاء کے بارے میں کاربن ڈیٹنگ کے ذریعے معلومات حاصل کرنا نئی بات نہیں۔
لیکن ماہرین کا کہنا ہے کہ اس بار انہوں نے انتہائی درست طور پر اعداد و شمار بیان کرنے والے طریقوں کی مدد سے قدیم مصر کے ادوار کی تصدیق کی ہے۔
برطانیہ میں کرین فیلڈ یونیورسٹی کے پروفیسر اینڈریو شارٹ لینڈ کے بہ قول یہ جاننے کے لیے کہ ریڈیو کاربن ڈیٹنگ کی تیکنیک کتنی قابل اعتبار ہے، سب سے پہلے ا سے ان اشیا پر استعمال کیا گیا جن کے بارے میں معلوم تھا کہ وہ کب بنی تھیں۔ اب یہ تیکنیک اتنی ترقی کر چکی ہے کہ ہم اس سے یہ معلوم کر سکتے ہیں کہ مصر کی تاریخ کے بارے میں ہماری معلومات درست ہیں یا نہیں۔یاد رہے کہ کچھ عرصہ قبل کی گئی نئی تحقیق میں برطانیہ، فرانس، آسٹریا اور اسرائیل کے سائنس دانوں نے حصہ لیاتھا۔
اس تحقیق کے لیے انہوں نے عجائب گھروں سے مختلف پودوں،بیجوں اور قدیم کاغذ کے 211نمونے حاصل کیے تھے۔ تحقیق کی قیادت برطانیہ کی آکسفورڈ یونیورسٹی میں محکمۂ آثار قدیمہ کے کرسٹوفر رامسے نے کی۔ ان کی ٹیم نے انتہائی درستی سے معلوم کیا کہ مصر کی قدیم بادشاہت کے تیسرے دور کے فرعون زوزیرکے دورِ اقتدار کی تاریخ دو ہزار چھ سو اکیانوے قبل ِمسیح سے دو ہزار چھ سو پچیس قبلِ مسیح تھی۔

بھارت(ایمرا نیوز)بھارت میں بڑھتی آبادی پر قابو پانے کیلئے زبردست کوششیں کی جا رہی ہیں، حکومتی کوششوں کی وجہ سے آج صورتحال یہ ہے کہ بھارت میں بچوں کی پیدائش کی شرح کم ہو گئی ہے لیکن جتنے بچے پیدا ہو رہے ہیں ان کیلئے لوگوں کی خواہش ہوتی ہے کہ وہ لڑکے ہوں۔
سیمپل رجسٹریشن سسٹم سے حاصل ہونے والے اعداد و شمار سے معلوم ہوتا ہے کہ لوگوں کی اکثریت پہلے کے مقابلے میں کم بچے پیدا کر رہی ہے۔ رجسٹرار جنرل آف انڈیا کے مطابق، 2016ء میں بھارت میں شرح پیدائش 2.3؍ تھی جو 2017ء میں کم ہو کر 2.2؍ ہوگئی، یہ شرح مستحکم شرح یعنی 2.1؍ کے نزدیک بتائی گئی ہے۔
ایسا لگتا ہے کہ شہروں اور ساتھ ہی دیہی علاقوں میں عوام نے متفقہ طور پر کم بچے پیدا کرنے کا فیصلہ کیا ہے۔ یہ اعداد و شمار اقوام متحدہ کے اہداف کے مطابق معلوم ہوتے ہیں۔
یہی وجہ ہے کہ چین کے مقابلے میں بھارت جس سال میں آبادی کے لحاظ سے بڑا ملک بن جائے گا وہ سال بھی 2022ء سے آگے بڑھا کر 2027ء کر دیا گیا ہے۔ لیکن ایک طرف صورتحال بہتر ہو رہی ہے تو دوسری جانب صنفی لحاظ سے معاملات بگڑ رہے ہیں۔ ملک میں ہر ایک ہزار لڑکیوں کے مقابلے میں پیدا ہونے والے لڑکوں کی تعداد کم ہو کر 898؍ ہوگئی ہے جس کی وجہ لڑکے پیدا کرنے کی خواہش بتائی جا رہی ہے۔

کراچی (ایمرا نیوز)عسکری ذرائع کے مطابق پاکستان نیوی کی جانب سے سمندری حدود میں اینٹی شپ “حربہ” نیول کروز میزائل کا تجربہ کیا گیا جو سطح سے سطح تک مار کرنے کی صلاحیت رکھتا ہے۔ تفصیلات کے مطابق عسکری ذرائع کی جانب سے بتایا گیا ہے کہ پاک فضائیہ اور بری فوج کی طرح پاکستان کی بحریہ بھی بھارت کے کس بھی مس ایڈونچر کا منہ توڑ جواب دینے کیلئے ہر وقت تیار ہے۔
پاکستان نیوی پاکستان کی سمندری حدود میں مسلسل متحرک ہے اور دشمن پر کڑی نظر رکھے ہوئے ہے۔ جبکہ دشمن کو پیغام بھی بھیجا گیا ہے کہ پاکستان کسی بھی قسم کی جارحیت کا منہ توڑ جواب دینے کیلئے مکمل طور پر تیار ہے۔ اس سلسلے میں پاکستان نیوی نے گزشتہ دنوں سمندری حدود میں جدید کروز میزائل کا تجربہ کیا ہے۔
پاکستان نیوی کی جانب سے سمندری حدود میں اینٹی شپ “حربہ” نیول کروز میزائل کا تجربہ کیا گیا۔
“حربہ” نیول کروز میزائل سطح سے سطح تک مار کرنے کی صلاحیت رکھتا ہے۔ “حربہ” نیول کروز میزائل کا تجربہ پی این ایس عظمت سے کیا گیا۔ واضح رہے کہ پاکستان اور بھارت مقبوضہ کشمیر کی خود مختار حیثیت ختم کر دیے جانے کے بعد جنگ کے دہانے پر پہنچ چکے ہیں۔ بھارت کی جانب سے پاکستان کو ایٹمی جنگ کی دھمکیاں دی جا رہی ہیں، جبکہ سرحدوں پر فوج اور اسلحے کی تعداد میں اضافہ کرکے اشتعال انگیزی میں بھی اضافہ کر دیا گیا ہے۔ اس صورتحال میں پاک فوج بھی مکمل طور پر الرٹ ہے اور بھارت کے کسی بھی مس ایڈونچر کا منہ توڑ جواب دینے کی تیاری کیے بیٹھی ہے۔

لاہور (ایمرا نیوز)سوشل میڈیا سائٹس دنیا میں وہ واحد ذریعہ ہیں کہ جن کے توسط سے لاکھوں میل دور بیٹھ کر بھی دوستوں سے بات چیت کی جا سکتی ہے۔فیس بک ان سوشل میڈیا سائٹس میں سب سے زیادہ شہرت رکھتی ہے۔ دنیا بھر میں سوا 2 ارب سے زائد افراداسے استعمال کرتے ہیں، مگر ان میں سے کتنے ایسے ہیں جو اس سائٹ سے لاگ آف ہونے کی زحمت کرتے ہیں؟اگر آپ بھی ان میں سے ایک ہیں جو کبھی لاگ آف نہیں ہوئے تو دنیا کی مقبول ترین سماجی رابطے کی ویب سائٹ نے اپنے ہوم پیج کے سلوگن میں خاموشی سے تبدیلی کردی ہے۔
بزنس انسائیڈر کی رپورٹ کے مطابق اس سے پہلے فیس بک کی ٹیگ لائن تھی ‘یہ مفت ہے اور ہمیشہ رہے گی’تاکہ صارفین کو بتایا جاسکے کہ اس سائٹ کا صارف بننے پر کوئی خرچہ نہیں ہوگا۔
مگر ایک دہائی سے زائد عرصے کے بعد پہلی بار اس کو بدل دیا گیا ہے بلکہ اسے انتہائی خاموشی سے 6 اور 7 اگست کے درمیان بدل کر اسے ‘کوئیک اینڈ ایزی’ کردیا گیا ہے۔اب اس کی وجہ کیا ہے وہ تو کمپنی نے نہیں بتائی مگر فیس بک نے اپنی روایتی سوچ کو ضرور خیرباد کہہ دیا ہے جو عرصے سے کہتی آئی ہے کہ یہ ویب سائٹ استعمال کے لیے مفت ہے اور اشتہارات ہی اس کا ذریعہ آمدنی ہیں۔
تاہم اس کمپنی کو صارفین کے ڈیٹا کے غلط استعمال کے مختلف اسکینڈلز کے باعث کافی مشکلات کا سامنا ہوا اور بظاہر اسی وجہ سے فیس بک نے مفت استعمال کے نکتے سے دستبردار ہونا قبول کرلیا ہے، کیونکہ ایسا کرکے وہ ٹارگٹڈ اشتہارات کو فروخت کرسکے گی۔اور یہ بھی ہو سکتا ہے کہ کچھ عرصے بعد فیس بک پر اکاؤنٹ بنانے کے لیے آپ کو پیسے بھی ادا کرنا پڑیں۔مگر یہ وقت آنے پر ہی پتا چلے گا کیونکہ اس وقت تک کمپنی انتظامیہ نے اپنے ایسے کسی ارادے سے متعلق آگاہ نہیں کیا۔

لاھور(ایمرا نیوز) اکثر دیکھا ہے کہ بار ش سے پہلے آسمان بادلوں سے گھر جاتا ہے اور بغیر بادل کے بنے ہوئے بارش کا ہونا ممکن نہیں لیکن یہ بھی سچ ہے کہ ہر بادل بارش نہیں کرتا اور بارش کےلئے کچھ خاص قسم کے بادل ہوتے ہیں، جنہیں ہم ’’برساتی بادل‘‘ کہتے ہیں۔
بادلوں تک اوپر جانے سے پہلے یہ پانی زمین پر ہی ہوتا ہے۔ سمندر کی اوپری سطح سے مسلسل پانی بھاپ کی شکل میں نکل کر فضاء میں پھیلتا رہتا ہے اور اونچائی پر بادلوں کی شکل اختیار کرلیتا ہے۔ مثلا جب ہم کسی برتن میں پانی گرم کرتے ہیں تو اس سے بھاپ نکلتی ہے اگر اس پر ایک ڈھکن رکھ دیں تو پانی کے قطرے اس پر جمے ہوئے دکھائی دیں گے، بالکل اسی طرح زمین سے پانی بھاپ کی شکل میں اُڑ کر برساتی بادل کی شکل اختیار کرلیتا ہے، پھر یہی پانی کے بہت سارے قطرے آپس میں مل کر بارش کرتے ہیں، اس کی اصل وجہ یہ ہے کہ فضا میں اونچائی کے ساتھ ساتھ ہوا کا درجہ حرارت کم ہوتا جاتا ہے اور اسی بنیاد پر پانی کے جماؤں کی سطح بنتی ہے۔
یہ جماؤ کی سطح مختلف موسموں میں الگ الگ ہوتی ہے۔ جمنے والے قطروں کے یہی بادل بارش کرتے ہیں یہی پانی کے چھوٹے ذراتی قطرے آپس میں ٹکراتے ہیں اور ٹوٹ کر زمین پر ٹپکنے یا برسنے لگتے ہیں اور پھر برسات شروع ہو جاتی ہے۔ بادلوں سے نکلی ہوئی بوندیں شروع میں بہت بڑی ہوتی ہیں لیکن زمین تک پہنچتے پہنچتے بہت چھوٹی ہوجاتی ہیں۔
بارش (Rain) بادلوں سے زمین کی سطح پر پانی کے قطروں کا علیحدہ علیحدہ گرنے کے عمل کو کہتے ہیں۔ بارش زراعت اور پودوں کے لئے زندگی کی حیثیت رکھتی ہے۔ اوسطاً بارش کا ایک قطرہ ایک یا دو ملی میٹر قطر کا ہوتا ہے۔
عام طور پر اس کا مطلب زمین اورسمندر پر گرمی کے ساتھ فضا میں تبدیلی لیا جاتا ہے۔ مجموعی طور پر مون سون، بارشوں اور موسم کے بہت بڑے نظام کا نام ہے۔ مون سون ہواؤں، بادلوں اور بارشوں کا ایک نظام ہے۔ یہ موسم گرما میں جنوبی ایشیاء، جنوب مشرقی ایشیاء اور مشرقی ایشیاء میں بارشوں کا سبب بنتا ہے۔
اپریل اور مئی کے مہینوں میں افریقہ کے مشرقی ساحلوں کے قریب خط استوا کے آس پاس بحر ہند کے اوپر گرمی کی وجہ سے بخارات بننے کا عمل ہوتا ہے، یہ بخارات بادلوں کی شکل اختیار کر لیتے ہیں اور مشرق کا رخ اختیار کرتے ہیں۔
جون کے پہلے ہفتے میں یہ سری لنکا اور جنوبی بھارت پہنچتے ہیں اور پھر مشرق کی طرف نکل جاتے ہیں۔ ان کا کچھ حصہ بھارت کے اوپر برستا ہوا سلسلہ کوہ ہمالیہ سے آ ٹکراتا ہے۔ بادلوں کا کچھ حصہ شمال مغرب کی طرف پاکستان کا رخ کرتا ہے اور 15 جولائی کو مون سون کے بادل لاہور پہنچتے ہیں۔ عموماً 15 جولائی کو پاکستان میں ساون کی پہلی تاریخ ہوتی ہے۔
(Rain Gauge)، ایک آلہ (Instrument) ہے جس کے ذریعے یہ معلوم کیا جاتا ہے کہ کس قدر بارش ہوئی۔ بنیادی طور پر بارش کے دو اہم ذرائع ہیں۔
1- قطبین پر ہوا کے دباؤ میں تبدیلی اور موسم کا بدلنا 2 – سمندر کی سطح پر موسموں کی تبدیلی کا اثر، یہ دونوں مراحل ایسے ہیں، جن کے زیر اثر بارش کے سائیکل اور اس کے نظام میں تبدیلی ہوتی ہے اور پوری دنیا میں بارش ہوتی ہے۔

امریکا(ایمرا نیوز)صدیوں سے یہی سنتے آئے تھے کہ ’’جو سوتا ہے وہ کھوتا ہے‘‘، لیکن اب سائنس نے اس مقولے کو غلط قرار دیتے ہوئےیہ ثابت کردیا ہے کہ جو اچھی طرح سوتا ہے وہ بہت کچھ پا سکتا ہے، یعنی ایک بھرپور اور پرسکون نیند آپ کی ذہنی صلاحیتوں کو اس قدر مہمیز کردیتی ہےکہ آپ اپنے تمام کام بخوبی نمٹا سکتے ہیں۔ نیند کی اہمیت کا اندازہ اس بات سے لگائیں کہ دنیا بھر میں کئی ملٹی نیشنل کمپنیاں اپنے ملازمین کو دن کے اوقات میں نیپ ٹائم یعنی قیلولہ کرنے کے احکامات جاری کرچکی ہیں۔ قیلولہ کی عادت ہمیں اسلام سکھاتاہے، جس کی افادیت اہل مغرب نے بھی جان لی ہے، اسی لیے وہ اس پر عمل پیرا ہیں۔
جتنا سوؤ گے اتنا پائو گے
امریکی فرم’’ انشورنس گروپ آئنٹا‘‘ نیند پوری کرنے کے بدلے اپنے ملازمین کو 300ڈالر سالانہ ادا کرتی ہےتاکہ ان کی نیند پوری ہو اور کم خوابی کی وجہ سے کارکردگی متاثر نہ ہو۔ ادارے کی جانب سے ملازمین کو سختی سے ہدایات دی گئی ہیں کہ وہ کم سے کم سات گھنٹے کی نیند روزانہ لیں۔ 2009ء میں متعارف کروائی گئی اس اسکیم کے تحت اس ادارے کے ملازمین ایک مہینے یعنی 20راتوں کی نیند کے بدلے 25ڈالر کمالیتے ہیں۔
پورے چاند میں نیند
چاندنی راتوں کی رومانویت اپنی جگہ لیکن سائنسی تحقیق کے مطابق جب چودھویں کا چاند چمکتا ہے تو سبھی کی نیند پر منفی اثر ڈالتا ہے۔ ایک تحقیق میں پورے چاند کے وقت 33رضاکاروں کی نیند کا جائزہ لیا گیا تو پتہ چلا کہ اس رات لوگوں کو سونےمیں زیادہ وقت لگا اور ان کی نیند کا معیار بھی کم تھا، حالانکہ انہیں اندھیرے کمروں میں سلایا گیا تھا۔ اس تجربے میں شامل رضا کاروں میں میلاٹو نن نامی ہارمون کی کمی بھی پائی گئی۔ ان رضاکاروں کو نیند کی وادیوں میں اترنے میں 5منٹ سے زیادہ لگے اور وہ20منٹ کم سوئے۔ ریسرچر کاہو چن کا کہنا ہے، ’’چاند انسانی نیند پر اثر انداز ہوتاہے، چاہے وہ چاند کو دیکھ رہا ہو یا نہیں یااسے یہ بھی نہ پتا ہو کہ چاند کی شکل کس مرحلے میں ہے‘‘۔
نیند کے حوالے سے غلط فہمیاں
نیند ایک ایسی چیز ہے کہ اب اس کی باقاعدہ سائنس بھی وجود میں آگئی ہے، آپ ’’سلیپ اکیڈمی‘‘ سے بھی متعارف ہو چکے ہوں گے۔ہم سوتے کیوں ہیں، اس کا ذکر قرآن میں بھی ہے کہ راتوں کو آرام یعنی نیند اور دن کو کام یعنی تلاش معاش کیلئے بنایا گیا ہے۔ اسلام اور قرآن کی ہر بات پر سائنس تحقیق کرتی ہے اور تحقیق کے بعد اس بات کی وضاحت اچھی طرح ہوجاتی ہے کہ اللہ نے کوئی بھی چیز بے کار نہیں بنائی اور اس کے ہر کام میں حکمت ہے۔ ہم سوتے کیوں ہیں؟ کا جواب یونیورسٹی آف کیلیفورنیا برکلے کے نیوروسائنسز اورنفسیات کے پروفیسر میتھیو واکر اپنی نئی کتاب “Why we sleep: Unlocking the power of sleep & dreams”میں ا س کا جواب دیتے ہیںکہ نیند کی وجہ سے ہمارا مدافعتی نظام بحال رہتاہے، نیند ہی ہمارے جسم میں ہارمونز کی سطح کو توازن میں رکھنے اور بلند فشارِ خون کو کم کرنے میں مدد دیتی ہے، ساتھ ہی نیند کی وجہ سے ہمارے دماغ سے زہریلے مواد کی بھی صفائی ہوتی ہے۔
ہم نیند کے بارے میں اب ماضی کے مقابلے میں زیادہ علم رکھتے ہیں۔ اسی لیے نیند کے بارے میں ہماری کچھ غلط فہمیاں بھی دور ہورہی ہیں۔
کیا سات گھنٹے نیند ضروری ہے ؟
پروفیسر میتھیوواکر اور دیگر ماہرین کے مطابق اگر آپ کو صبح اٹھتے ہی ایک کپ کافی کی طلب ہوتی ہے تو اس کا مطلب ہے کہ آپ نے رات کو اچھی نیند نہیں لی (چاہے آپ سات گھنٹے ہی کیوں نہ سوئے ہوں)۔ ماہرین کہتے ہیں کہ اگرآپ جاننا چاہتے ہیں کہ آپ کو کتنی نیند لینی ہے تو اس کا حل یہ ہے کہ آپ تھکاوٹ کے بعد سوجائیں اور اس وقت اٹھیں جب آپ کی آنکھیں خودبخود کھل جائیں، یعنی جاگنے کیلئے آپ کو الارم لگانے کی ضرورت نہیں ہے۔ اب یہ نیند سات گھنٹے کی بھی ہوسکتی ہے اور نو گھنٹے کی بھی۔ کچھ ٹیسٹ سے پتہ چلا ہے کہ جن لوگوں نے خود کو کم مدت کی نیند کے مطابق ڈھال لیا تھا، وہ دراصل نیند کی کمی کا شکار تھے ۔
کیا نیند اورتھکاوٹ کا تعلق ہے ؟
اگر آپ یہ سمجھتے ہیں کہ نیند کی کمی سے آپ تھکاوٹ کا شکار ہیں تو ایسا نہیں ہے۔ تاہم پروفیسر واکر کے مطابق پوری نیند نہ لینے سے صحت پر پڑنے والے منفی اثرات بےشمار ہیں، جن میں کینسر، دل کے امراض، ڈپریشن اور انزائٹی سر فہرست ہیں۔
خراٹے لینا اچھی بات نہیں
اگر آپ کو مسلسل خراٹے لینے کی عادت ہے تو یہ تشویشناک ہو سکتا ہے، جس کے لیے آپ کو فوری طور پر ڈاکٹر سے رجوع کرنا چاہئے کیونکہ اس سے پیچیدہ بیماریاں سامنے آسکتی ہیں۔ دراصل خراٹے لینے کے دوران جسم میں ہوا کا گزر کم ہوجاتاہے اور دل پر دبائو بڑھ جاتاہے ، اس سے دل کی بیماری اور وزن میں اضافے کے امکانات بھی بڑھ سکتے ہیں۔ اچھی بات یہ ہے کہ خراٹے قابل علاج مرض ہے اور جن لوگوں کی خراٹوں سے جان چھوٹی، انہوں نے صبح جاگنے کے بعد خود کو بہترمحسوس کیا۔
چھٹی کے دن ہفتے بھر کی نیند
جی نہیں، ایسا نہیں ہے پورے ہفتے کی بیداری سے ویک اینڈ پر نیند پوری نہیں ہوتی، آپ کو روزانہ کے حساب سے اپنی نیند پوری کرنا بہت ضروری ہے۔