Category کھیل

پوشفسٹروم(میڈیا پاکستان) جنوبی افریقا میں ہونے والی کامن ویلتھ پاور لفٹنگ چمپئن شپ میں پاکستانی ویٹ لفٹر نے سونے کے 2 تمغے حاصل کرلیے۔ایکسپریس نیوز کے مطابق جنوبی افریقا کے شہر جوہانسبرگ میں ہونے والی کامن ویلتھ پاور لفٹنگ چیمپئین شپ میں پاکستان کے پاور لفٹر اطہر بٹ نے دو گولڈ میڈل جیت لیے۔ اطہر بٹ نے 105 کلو گرام کی دو کیٹیگریز میں 2 گولڈ میڈلز حاصل کیے۔واضح رہے کہ پاکستان کی جانب سے صرف ایک پاور لفٹر نے کامن ویلتھ پاور لفٹنگ چمپئن شپ میں شرکت کی اور نمایاں کارکردگی کا مظاہرہ کرتے ہوئے ملک کا نام روشن کیا، جب کہ بھارت کے 23 کھلاڑیوں نے اس ایونٹ میں شرکت کی ہے۔ پاکستانی پاور لفٹر اطہر بٹ کا تعلق کراچی سے ہے اور وہ پاور لفٹنگ کے متعدد ملکی و بین الاقوامی ایونٹس میں نمایاں کارکردگی کا مظاہرہ کرکے متعدد ایوارڈز اپنے نام کرچکے ہیں۔

لاہور(میڈیا پاکستان) ورلڈ الیون کے کھلاڑی آزادی کپ کھیلنے کے بعد سخت سیکورٹی میں دبئی روانہ ہوگئے جہاں سے وہ اپنے اپنے ممالک چلے جائیں گے۔ایکسپریس نیوز کے مطابق تین میچوں پرمشتمل ٹی ٹوئنٹی سیریز کے اختتام پذیرہوتے ہی ورلڈ الیون کے انٹرنیشنل کرکٹرزلاہورسے غیرملکی ائرلائن کی پروازای کے 625 کے ذریعے دبئی روانہ ہوگئے۔ غیر ملکی کھلاڑیوں کو سخت سیکورٹی حصار میں نجی ہوٹل سے علامہ اقبال ایئرپورٹ پہنچایا گیا۔ کھلاڑیوں کے لیے خصوصی بلٹ پروف بسوں کا انتظام کیا گیا تھا جب کہ ہوٹل سے ایئرپورٹ روانگی کے دوران گورنر ہاوس اورمال روڈ کو ہر قسم کی ٹریفک کے لیے بند کردیا گیا تھا اور رینجرز کے ساتھ ساتھ اضافی پولیس اہلکار روٹ پر تعینات کیے گئے تھے۔واضح رہے کہ پاکستان اور ورلڈ الیون کے درمیان گزشتہ شب سیریز کا فائنل کھیلا گیا جس میں قومی ٹیم نے شاندار کارکردگی کا مظاہرہ کرتے ہوئے فتح حاصل کی۔

لاہور(میڈیا پاکستان) پاکستان اور ورلڈ الیون کے درمیان 3 ٹی ٹوئنٹی میچز پر مشتمل آزادی کپ سیریز کا آخری میچ آج قذافی اسٹیڈیم لاہور میں کھیلا جائے گا۔قذافی اسٹیڈیم لاہور میں ورلڈ الیون اور پاکستان کرکٹ ٹیم کے مابین آزادی کپ سیریز کا پہلا میچ میزبان ٹیم نے20 رنز سے جیتا تھا،گرین شرٹس نے 5 وکٹ کے نقصان پر 197 رنز بنائے تھے۔ بابر اعظم نے بھرپور فارم کا مظاہرہ کرتے ہوئے 86 رنز اسکور کیے، جواب میں ورلڈ الیون 177 تک محدود رہی۔دوسرے میچ میں ورلڈ الیون 7 وکٹ سے سرخرو ہوئی، پاکستان نے 6 وکٹ پر 174کا مجموعہ حاصل کیا، بابر اعظم 45رنز بنانے میں کامیاب رہے، مہمان ٹیم نے ہدف ایک گیند قبل صرف تین وکٹ پر حاصل کیا، تھشارا پریرا نے 19 گیندوں پر 5 چھکوں سمیت 46 رنز جڑ کر گرین شرٹس کو فتح سے محروم رکھا،اوپنر ہاشم آملا 72 پر ناقابل شکست رہے، سہیل خان نے 4 اوورز میں 44 رنز کی پٹائی برداشت کی، رومان رئیس سمیت دیگر بولرز بھی اختتامی اوورز میں رنز کا سیلاب روکنے میں ناکام رہے۔سیریز کی فاتح ٹیم کا فیصلہ جمعے کو تیسرے میچ سے ہوگا۔
کنڈیشنز سے ہم آہنگ ہونے والے مہمان کرکٹرز نے پہلے مقابلے کی بانسبت دوسرے میں زیادہ بہتر کارکردگی کا مظاہرہ کیا، بولرز نے گرین شرٹس کیلیے رنز کا حصول مشکل بنایا تو بیٹسمین بھی ثابت قدم رہے،فیصلہ کن میچ میں کانٹے دار مقابلے کی توقع ہورہی ہے،پاکستان نے بدھ کوکمر کی تکلیف کا شکار حسن علی کی جگہ عثمان شنواری کو میدان میں اتارا لیکن انھیں ایک ہی اوور دیا گیا،چیمپئنز ٹرافی کے ہیروکی واپسی میزبان بولنگ لائن اپ میں تقویت کا باعث بن سکتی ہے۔
فہیم اشرف کو ڈراپ کرکے محمدنواز کو شامل کیا گیا تھا،ان کی کارکردگی بھی توقعات کے مطابق نہیں تھی،دونوں ٹیموں میں تبدیلیاں متوقع ہیں،بیٹنگ کے پاور شو میں پاکستان کی امیدوں کا مرکز بابر اعظم،احمد شہزاد، شعیب ملک اور فخرزمان ہونگے،ورلڈ الیون ہاشم آملا، فاف ڈوپلیسی،ڈیوڈ ملر اور تھشارا پریرا کی جارحانہ بیٹنگ پر انحصار کرے گی۔بولنگ میں شاداب خان مہمان ٹیم کو پریشان کرسکتے ہیں،حسن علی فٹ ہوئے تو حریف کو رنز بنانے سے روکنے میں مدد ملے گی،ورلڈ الیون بین کٹنگ کے ساتھ عمران طاہر کی بھرپور فارم کی متلاشی ہے۔دوسری طرف سیریز کے آخری میچ کے پُرامن انعقاد کیلیے قذافی اسٹیڈیم اور اطراف میں بدستور سخت سیکیورٹی حصار قائم ہے، آرمی، رینجرز، پولیس اور دیگر فورسز کے دستے اپنی ڈیوٹیاں سنبھالے ہوئے ہیں۔گزشتہ روز نشتر اسپورٹس کمپلیکس کی تمام سٹرکیں سنسان نظر آئیں۔ سیکیورٹی اہلکاروں، پی سی بی عہدیداروں اور میڈیا کے نمائندوں کے سوا کسی کو اس علاقے میں آنے کی اجازت نہیں تھی، سخت چیکنگ اور سرچ آپریشن بھی کیا گیا، جمعے کو قذافی اسٹیڈیم، اطراف اور ٹیموں کی آمدورفت کے روٹس پر 24 ایس پیز، 52 ڈی ایس پیزاور 114ایس ایچ اوز کی نگرانی میں 10 ہزار سے زائد پولیس اہلکار ہونگے، رسپانس یونٹ کی گاڑیاں اور ڈولفن اسکواڈ بھی پٹرولنگ کیلیے موجود ہونگے، تمام علاقے کی فضائی اور سی سی ٹی وی فوٹیج کیمروں کے ذریعے مانیٹرنگ بھی ہوگی۔موسم بہتر ہونے کی وجہ سے سیریز کے آخری میچ میں زیادہ شائقین آنے کی توقع ہو رہی ہے۔

لاہور(میڈیا پاکستان) اسلام آباد یونائیٹڈ نے پی ایس ایل 2018 کے لیے وقار یونس کو ٹیم کا ہیڈ کوچ اور ڈائریکٹر کرکٹ مقرر کردیا ہے۔وقار یونس نے کہا کہ کئی سال مصباح الحق کے ساتھ کام کر چکا ہوں، ان کے ساتھ اس وقت کام کیا جب پاکستان میں کرکٹ بہت نیچے چلی گئی تھی، اب ان کے ساتھ دوبارہ کام کرنے پر خوش ہوں۔اسلام آباد یونائیٹڈ کے کپتان مصباح الحق نے کہا کہ بیٹسمین کپتان کیلیے باؤلنگ کوچ کا ساتھ فائدہ مند ہوتا ہے اور وقاریونس کے ساتھ رہ کر بہت کچھ سیکھا جب کہ آئندہ بھی یہ سلسلہ جاری رہے گا۔
یاد رہے کہ قومی کرکٹ ٹیم کے سابق کپتان وقار یونس دو مرتبہ قومی ٹیم کے ہیڈ کوچ رہ چکے ہیں جب کہ ایک مرتبہ قومی ٹیم کے بولنگ کوچ بھی رہ چکے ہیں۔

لاہور(میڈیا پاکستان) آئی سی سی نے پاک بھارت سیریز کے معاملے میں ٹانگ اڑانے سے انکار کردیا،چیف ڈیوڈ رچرڈسن نے کہا کہ باہمی مقابلوں کا انعقاد 2ملکوں کی رضامندی سے ہوتا ہے،ہم بی سی سی آئی کو مجبور نہیں کرسکتے۔چیئرمین پی سی بی نجم سیٹھی کا کہنا ہے کہ قانونی چارہ جوئی کیلیے وکلا کیس تیار کررہے ہیں۔تفصیلات کے مطابق آئی سی سی چیف ڈیوڈ رچرڈسن نے کہا کہ تمام رکن ملک ہمارے لیے برابر ہیں، یہ تاثر درست نہیں کہ آئی سی سی بھارتی بورڈ کو زیادہ سپورٹ کرتی ہے، بھارت دنیائے کرکٹ کی ایک طاقت اور اس کی بھرپور آواز ہے لیکن آئی سی سی اسے کسی بھی اور رکن سے زیادہ اہمیت نہیں دیتی۔ورلڈ الیون میں کسی بھارتی کھلاڑی کے شامل نہ ہونے کے سوال پر انھوں نے کہاکہ دونوں پڑوسی ملکوں میں سیاسی مسائل ہیں،بھارتی ٹیم کی مصروف بھی ہیں، آئی سی سی ایونٹ میں پاکستان اور بھارت کھیلیں گے لیکن دوطرفہ سیریز کیلیے مزید کام کرنے کی ضرورت ہے، نیوٹرل وینیو پر باہمی میچ ہوسکتے ہیں لیکن اس کیلیے پی سی بی اور بی سی سی آئی کو مل کر کام کرنا ہوگا۔

لاہور(میڈیا پاکیستان) آزادی کپ سیریز کے دوسرے میچ میں ورلڈ الیون نے پاکستان کو شکست دے کر 3 میچوں کی سیریز 1-1 سے برابر کردی۔ لاہور میں 3 ٹی ٹوئنٹی میچوں پر مشتمل آزادی کپ سیریز کے دوسرے میچ میں پاکستان کے 174 رنز کے جواب میں ورلڈ الیون کی جانب سے ہاشم آملہ اور تمیم اقبال نے اننگز کا آغاز کیا۔
تمیم اقبال نے پہلے ہی اوورز سے جارحانہ بیٹنگ کا مظاہرہ کرتے ہوئے عماد وسیم کو شاندار چھکا رسید کیا۔ دونوں اوپنرز نے ٹیم کو 47 رنز کا عمدہ آغاز فراہم کیا تاہم تمیم اقبال 19 گیندوں پر 23 رنز بناکر آؤٹ ہوئے۔

لاہور( میڈیا پاکستان)آئی سی سی کے چیف ایگزیکٹو ڈیوڈرچرڈسن کا کہنا ہے کہ پاکستان میں سیکورٹی کی صورتحال بہت بہتر ہے ،اگر یہ ایسی ہی رہے توآئی سی سی کایونٹ پاکستان میں منعقد ہو سکتا ہے۔خیبرپختون خواکی حکومت کے ساتھ کرکٹ اکیڈمی بنانے کے ایم ایو سائن کریں گے:نجم سیٹھی
لاہورمیں پی سی بی کے چئیرمین نجم سیٹھی کے ہمراہ پریس کانفرنس کرتے ہوئے ان کا کہنا تھا کہ اب ہمارا اگلا ہدف پاکستان کے دوسرے شہروں میں میچزکروانا ہے ۔کوشش کر رہے کہ پی ایس ایل کے میچز بھی پاکستان میں ہوں۔اس موقع پر انہوں نے پاکستان کی سیکورٹی ایجنسیوں کی بھی تعریف کی ۔ڈیوڈرچرڈسن کا کہنا تھا کہ پاکستان کے عوام کا شکریہ ادا کرتا ہوں، پاکستان دوبارہ آکر بہت اچھا لگا۔آئی سی سی کے چیف ایگزیکٹو نے مزید کہا کہورلڈالیون کے دورے کے بعد پاکستان میں کرکٹ کی بحالی کے سفر کا آغاز ہو جائے گا۔

لاہور(میڈیا پاکستان) چیمپئنز ٹرافی میں شاندار کارکردگی سے شہرت پانے والے قومی کرکٹ ٹیم کے بیٹسمین فخر زمان پاکستان سپرلیگ کی فرنچائز ز کے لیے مرکز ِنگاہ بن گئے۔برطانوی نشریاتی ادارے کے مطابق بہترین فارمنس کی بدولت مستند اوپنر کی حیثیت سے قومی ٹیم میں جگہ بنانے والے فخر زمان میں پی ایس ایل کی فرنچائزز گہری دلچسپی لے رہی ہیں اور کم ازکم تین فرنچائزز ایسی ہیں جو انہیں اگلے سیزن میں اپنی ٹیم کا حصہ بنانے کی خواہشمند ہیں۔پی ایس ایل میں لاہور قلندرز کی نمائندگی کرنے والے فخرزمان کو ان کی شاندار کارکردگی کے صلے میں پاکستان سپر لیگ کے تیسرے سیزن کے لیے سلور کیٹگری سے ترقی دیتے ہوئے ڈائمنڈ کیٹگری میں شامل کیا گیا ہے تاہم لاہور کی ٹیم انہیں ڈائمنڈ کے بجائے گولڈ کی کیٹگری میں کھلانا چاہتی ہے۔دوسری جانب چیمپئنز ٹرافی کی فاتح ٹیم میں شامل شاداب خان اور حسن علی ایمرجنگ کیٹگری سے ترقی پا کر اب گولڈ کیٹگری میں آگئے ہیں ۔

لاہور(میڈیا پاکستان) آج پھر سیٹی بجے گی، سٹیج سجے گا، تالی بجے گی اور کھیل جمے گا۔ پاکستان اور ورلڈ الیون کے درمیان دوسرا ٹاکرا آج شام سات بجے قذافی سٹیڈیم میں ہوگا۔آزادی کپ کا پہلا ٹی 20میچ سرفراز الیون نے جیت لیا جبکہ دل ورلڈ الیون نے جیت لیے۔ پہلے ٹی 20 میچ میں بلے باز بابر اعظم بہترین بیٹنگ پر مین آف دی میچ قرار پائے، ٹرافی، ہیوی بائیک اور ایک ہزار ڈالر نقد انعام دیا گیا، کرکٹ بحالی کے ساتھ شائقین کو جوش وجذبہ بھی بحال ہوگیا، آج پھر دنیا کی نظریں قذافی سٹیڈیم لاہور پر ہوں گی، ورلڈ الیون اور قومی کرکٹ ٹیم کے درمیان آزادی کپ کا دوسرا میچ آج شام سات بجے کھیلا جائے گا، اس حوالے سے تمام تیاریاں مکمل کر لی گئیں ہیں۔

لاہور(میڈیاپاکستان) پاکستان میں انٹرنیشنل کرکٹ بحال ہونے پراسٹار کرکٹرز بھی نہال ہیں۔پاکستان میں انٹرنیشنل کرکٹ کی واپسی کا جہاں شائقین نے جشن منایا، وہاں سابق کرکٹرزنے بھی سماجی رابطوں کے ویب سائٹ پر خوشی کا اظہار کیا، رمیز راجہ نے اپنی ٹوئٹ میں لکھا کہ کرکٹ کی خوشبوہوا میں پھیلی ہوئی ہے اس کو محسوس کیا جاسکتا ہے، پاکستان دھوم مچانے کیلیے تیار ہے۔وسیم اکرم نے بھی کرکٹ کی بحالی پرخوشی کا اظہار کرتے ہوئے اس کو مستقبل کی جانب ایک بڑا قدم قرار دیا اور وقار یونس نے اپنی لاہور روانگی کا بتاتے ہوئے لکھا کہ میں وہیں جارہا ہوں جہاں 8 سال پہلے چھوڑا تھا، میرے ساتھ شامل ہوں اور تاریخ بنا ڈالیں۔شعیب اختر نے ٹوئٹر پر وڈیو شیئرکی جس میں انھوں نے پیغام دیا کہ آج پاکستان کیلیے بڑا دن ہے۔ پاکستان میں یہ کرکٹ کی بحالی ہے، مہمان کرکٹر تمیم اقبال نے اپنی تصویر کا لنک شیئر کیا جس میں وہ قذافی اسٹیڈیم لاہور میں پریکٹس کیلیے تیار ہورہے تھے، اس دارون ان کے چہرے پرمسکراہٹ دیکھی جاسکتی تھی۔ڈیرن سیمی نے اپنی سیلفی اور ایک ویڈیو بھی شیئر کی جس میں انہوں نے لکھا کہ “کھیل سے بڑھ کے”اور ہیش ٹیگ آفریدی کی طرح لکھا ’’کرکٹ کی ہے لالالا۔‘‘ میچ کے دوران کمنٹری کرنے والے رمیز راجہ، وسیم اکرم اور وقار یونس ہوم گراؤنڈ پر زیادہ ہی پرجوش دکھائی دیے، انہوں نے کھلاڑیوں کی کارکردگی کیساتھ ملک میں کرکٹ کی بحالی کے حوالے سے بھی باربارخوشی کا اظہار کیا۔