Category کھیل

لاہور(میڈیا پاکستان) کرکٹ کو ترسے شائقین کے مرجھائے چہرے آج کھل اٹھیں گے جب ورلڈ الیون اور پاکستان کی ٹیمیں آزادی کپ سیریز کے پہلے میچ میں مدمقابل ہونگی،عوام کا جوش وجذبہ عروج پر پہنچ گیا۔ورلڈ الیون کی پاکستان آمد کے ساتھ ہی شائقین کرکٹ کا جوش وجذبہ بھی عروج پر پہنچ چکا، آج شام 7 بجے قذافی اسٹیڈیم لاہورکی مصنوعی روشنیوں میں میچ شروع ہونے کا شدت سے انتظارکیا جا رہا ہے۔ ٹکٹ حاصل کرنے والے خوش نصیب ہوں یا گھر میں بیٹھ کر مقابلہ دیکھنے پر مجبور افراد، ملک بھر کے کروڑوں افراد سمیت دنیا بھر کے شائقین کی نگاہیں آزادی کپ سیریز کے اس میچ پر مرکوز ہوں گی۔سات ملکوں کے کرکٹرز پر مشتمل ورلڈ الیون کی آمد پر ہی خوشی سے نہال شائقین کا کہنا ہے کہ سری لنکن کرکٹ ٹیم پر دہشت گردوں کے حملے سے ویران ہونے والے میدان آباد دیکھنا بڑا خوشگوار تجربہ ہو گا۔ کرکٹ ہمارا جنون ہے، بڑی تعداد میں اسٹیڈیم پہنچ کر دنیا کو امن اور محبت کا پیغام دینگے۔پُرجوش شائقین کی موجودگی میں اسٹارز سے مزین دونوں ٹیموں میں گھمسان کا رن پڑنے کا امکان ہے،مہمان اسکواڈ میں کپتان فاف ڈوپلیسی، ہاشم آملا اور تمیم اقبال بیٹنگ میں استحکام کی علامت ہیں،جارح مزاج جارج بیلی اور کولنگ ووڈ کی صلاحیتیوں سے بھی دنیا واقف ہے،ڈیوڈ ملر اختتامی اوورز میں مار دھاڑ کیلیے مشہور ہیں،گرانٹ ایلوئیٹ، ڈیرن سیمی اور تھشارا پریرا جیسے آل راؤنڈرز میچ کا پانسہ پلٹ دینے کی صلاحیت رکھتے ہیں، وکٹ کیپر ٹم پین اچھی بیٹنگ بھی کرسکتے ہیں۔اسپن کے شعبے میں موجود عمران طاہر نے ہمیشہ ہی پاکستانی بیٹسمینوں کیلیے مشکلات پیدا کیں،سیموئل بدری ٹی ٹوئنٹی کرکٹ کا وسیع تجربہ رکھتے ہیں، پیس بیٹری میں مورن مورکل اور بین کٹنگ جیسے ہتھیار بھی موجود ہیں۔ادھر چیمپئنز ٹرافی کے فاتح گرین شرٹس کا مورال بھی بلند ہے، پریکٹس میچ میں کپتان سرفراز اور شعیب ملک نے عمدہ فارم کا مظاہرہ کیا، فخرزمان میچ ونر کے طور پر پہچان بنا چکے،اپنے اچھے دن احمد شہزاد بھی تہلکہ مچا سکتے ہیں، باصلاحیت بابر اعظم اورعمر امین کی خدمات بھی سرفراز احمد کو حاصل ہونگی، عماد وسیم، فہیم اشرف اور عامر یامین جیسے آل راؤنڈرز بھی انھیں میسر ہیں،شاداب خان کیریبیئن پریمیئر لیگ کے بعد پریکٹس میچ میں بھی گھومتی گیندوں سے پریشان کرتے رہے،ان دنوں حسن علی کا ڈنکا بج رہا ہے، رومان رئیس کو محمد عامر کا خلا پُرکرنے کیلیے پلیئنگ الیون میں جگہ مل سکتی ہے جبکہ عثمان شنواری اور سہیل خان کا آپشن بھی موجود ہے۔دوسری جانب سخت حفاظتی حصار میں علی الصبح مقامی ہوٹل پہنچنے والی مہمان ٹیم نے شام 5بجے پریکٹس کیلیے قذافی اسٹیڈیم کا رخ کیا،گرین شرٹس نے بھی اسی میدان میں لہو گرمایا، دونوں ٹیموں نے 3 گھنٹے تک بیٹنگ، بولنگ اور فیلڈنگ میں صلاحیتوں کو نکھارنے کیلیے خاصی سرگرمی دکھائی، قبل ازیں سیریز ٹرافی کی تقریب رونمائی ہوئی جس میں کپتان سرفرازاور ہم منصب ڈوپلیسی نے فتح کا عزم دہرایا، پلیئرز نے ورلڈ الیون کیلیے تیار کی گئی نئی کٹس میں تصاویر بنوائیں۔قذافی اسٹیڈیم میں میڈیا سے بات چیت کرتے ہوئے میزبان کپتان سرفراز احمد نے کہاکہ ورلڈ الیون میں دنیائے کرکٹ کے نامور کھلاڑی شامل ہیں، ہم تو چاہتے ہیں کہ سیریز کے تمام میچز جیتیں لیکن یہ اتنا آسان نہیں، ہمیں بیٹنگ، بولنگ اور فیلڈنگ تینوں شعبوں میں بہترین پرفارم کرنا ہوگا۔ ہم کسی ایک شعبے پر انحصار نہیں کرینگے، انھوں نے کہا کہ ہم محمد عامر کے نہ کھیلنے سے پہلے سے ہی آگاہ تھے، متبادل آپشن موجود ہیں،حسن علی، رومان رئیس، شاداب خان اور عماد وسیم بہترین بولرز ہیں، بیٹنگ میں احمد شہزاد ،شعیب ملک ،فخر زمان اور میں خود بھی اچھا پرفارم کرنے کی کوشش کرینگے۔سرفراز نے کہا کہ ہماری کوشش ہے کہ زیادہ سے زیادہ نوجوان کھلاڑیوں کو موقع دیا جائے تاکہ وہ نہ صرف ٹی ٹوئنٹی بلکہ ون ڈے اور ٹیسٹ اسکواڈ میں بھی اپنی جگہ بنا سکیں، تمام کھلاڑیوں کیلیے اپنی سرزمین پر تماشائیوں کے سامنے اچھا کھیل دکھانے کا موقع ہے۔ انھوں نے ایک سوال پر کہاکہ میرے فیورٹ کھلاڑی ہاشم آملا ہیں، وہ نہ صرف بہترین کھلاڑی بلکہ اچھے انسان بھی ہیں۔کپتان نے کہا کہ ورلڈ الیون کے بعد دیگر ٹیمیں بھی پاکستان آئیں گی، بھارتی کھلاڑیوں کے نہ ہونے کے بارے میں معلوم نہیں کہ ان کی کیا پالیسی ہے، دیگر ٹیمیں آئیں گی تو ایک کھلاڑی کیا بھارت کی پوری ٹیم پاکستان آئے گی۔

لاہور (میڈیا پاکستان) محکمہ داخلہ پنجاب کے مطابق قذافی سٹیڈیم لاہورکو مکمل طور پر رینجرز کے حوالے کر دیا گیا ہے۔قذافی سٹیڈیم ، نشترسپورٹس کمپلیکس، سٹیڈیم کے گرد تمام علاقے کو نو گو ایریا بنا دیا گیا ہے۔ سٹیڈیم کے اردگرد سیکیورٹی ہائی الرٹ ہے۔ سٹیڈیم کے گرد ریسٹورنٹ اور دکانوں کو 15ستمبر تک بند کر دیا گیا ہے جبکہ ریسٹورنٹ اور دکانوں کے کوائف پولیس کو جمع کروادیے گئے ہیں۔ سٹیڈیم کے اطراف تمام دکانوں کو سیل کر دیا گیا، تمام دکانوں سے ایل پی جی اور گیس سیلنڈر ہٹا دیے گئے ہیں۔ سٹیڈیم کو آنے والے تمام راستوں پر جدید کیمرے پہلے سے نصب کر دیے گئے ہیں۔ورلڈالیون اور پاکستان کے درمیان میچ 13،12 اور 15 ستمبر کو کھیلے جائیں گے، امپائرز پینل کا پہلے ہی اعلان کیاجا چکا ہے۔ نامور امپائر علیم ڈار اور احسن رضا پہلا میچ سپروائز کریںگے۔

لاہور(میڈیا پاکستان) آزادی کپ کیلئے ورلڈ الیون کی ٹیم تین ٹی ٹوئنٹی میچز کھیلنے کے لئے پاکستان پہنچ گئی ہے۔پاکستان میں انٹر نیشنل کرکٹ کا میلہ سجنے میں صرف ایک دن باقی رہ گیا ہے جس کیلئے 7 ممالک کے کھلاڑیوں پر مشتمل ورلڈ الیون کی ٹیم دبئی سے لاہور کے علامہ اقبال انٹرنیشنل ایئر پورٹ پہنچی تو چیرمین پی سی بی نجم سیٹھی سمیت کرکٹ بورڈ کے اعلیٰ حکام نے ان کا شاندار استقبال کیا۔ایئرپورٹ پر سیکیورٹی کے انتہائی سخت انتظامات کئے گئے تھے جہاں سے کھلاڑیوں کو سیکیورٹی حصار میں ہوٹل پہنچایا گیا۔قبل ازیں ورلڈ الیون کی ٹیم دبئی سے لاہور کے لئے روانہ ہوئی تو پی سی بی نے کھلاڑیوں کی فوٹیج سوشل میڈیا پر جاری کر کے اطلاع دی کہ پاکستان میں کرکٹ کے میدان دوبارہ سے آباد ہونے جا رہے ہیں۔مہمان ٹیم 3 ٹی ٹوئنٹی میچز کھیلنے کیلئے آج لاہور پہنچے گی، اس حوالے سے آئی سی سی ڈائریکٹر جائلز کلارک اور چیئرمین پی سی بی نجم سیٹھی نیوز کانفرنس کریں گے جس کے بعد ورلڈ الیون کے کپتان فاف ڈوپلیسی اور کوچ اینڈی فلاور بھی میڈیا کانفرنس کریں گے۔ورلڈ الیون کے خلاف سیریز سے قبل تیاریوں کی جانچ کیلیے تربیتی کیمپ میں شریک قومی کرکٹرز کے درمیان کل پریکٹس میچ کھیلا گیا جب کہ ورلڈ الیون کی ٹیم نے بھی دبئی میں بھرپور پریکٹس کی۔واضح رہے دونوں ٹیموں کے درمیان پہلا میچ 12 ستمبر کو کھیلا جائے گا، 13 ستمبر کو دوسرا جب کہ 15 ستمبر کو تیسرا میچ ہو گا جس کے بعد ورلڈ الیون کی ٹیم 16 ستمبر کو واپس روانہ ہو جائے گی۔

لاہور(میڈیا پاکستان سروے) ورلڈ الیون کے ساتھ کھیلے جانے والے آزادی کپ میں چند روز باقی ہیں اورکرکٹ کے دیوانے ٹکٹوں کے حصول کیلئے دربدر پھر رہے ہیں۔ پاکستا ن آزادی کپ کا پہلا میچ12ستمبر کو لاہورکے قذافی سٹیڈیم میں کھیلا جائے گا۔ اس حوالے سے کرکٹ کے دیوانوں کا جوش وخروش عروج پر پہنچ چکا ہے۔ شہریوں نے پاکستان سپر لیگ کا فائنل دیکھنے کیلئے تیاریاں مکمل کرلی ہیں۔ آزادی کپ کے پاکستان میں انعقاد حوالے سے میڈیا پاکستان سروے میں گفتگو کرتے ہوئے شہریوں نے ٹکٹ نہ ملنے پر شکوئے کئے اورٹکٹ بلیک میں فروخت ہونے کا الزام لگایا ہے۔ طلباوطالبات نے بھی بھرپور جوش وجذبے کا اظہار کرتے ہوئے ٹکٹ نہ ملنے پر مایوسی کا اظہار کیا ہے۔ جہانگیر نذیر، ساجد علوی، طاہر ، احسن اعوان، شبیر حسین، نذیر احمد، ثاقب علی، گلزار احمد ودیگر نے کہا کہ آزادی کپ کا لاہورمیں ہونا خوش آئند ہے۔ ایک لمبے عرصے کے بعد پاکستان میں انٹرنیشنل معیار کی کرکٹ دیکھنے کو ملے گی۔ اس لئے اس حوالے سے ہم بہت پرجوش اور خوش ہیں ملک میں صحتمند سرگرمیاں کافی حد تک ماند پڑچکی ہیں اورکھیل کے میدان کافی عرصے سے سنسان پڑے ہوئے ہیں۔ امید ہے آزادی کپ نہ صرف لاہوربلکہ پورے پاکستان میں عالمی کھیلوں کے شروع کرنے میں مددگار ثابت ہوگا۔ دونوں ٹیموں کو بھرپور سپورٹ کریں گے۔ آزادی کپ کی وجہ سے عالمی ٹیموں کے پاکستان میں آنے کی راہ ہموار ہوگی۔گلزار احمد، رشید باؤ، شاہد صدیق،امتیاز رشید ،ثمر حسین، خاور نے کہا کہ ہمیں ٹکٹ نہیں ملے۔ ہم پہلے دن سے کوشش کررہے ہیں لیکن ٹکٹ کا حصول ممکن نظر نہیں آرہا۔ 500روپے والے ٹکٹ دستیاب ہی نہیں ہیں۔500اور 2500والے ٹکٹ بھی نایاب ہوگئے ہیں۔ ٹکٹ خریدنے بینک جائیں تو کہا جاتا ہے ٹکٹ ہی نہیں ہیں۔ کرکٹ بورڈ بھی گئے لیکن ٹکٹ نہیں ملے۔اب تو لگتا ہے میچ گھر میں ہی دیکھنا پڑے گا یا پھر کوئی بڑی سکرین ڈھونڈیں گے۔اگرچہ بلیک میں بہت مہنگے ٹکٹ خریدنا پڑے لیکن ہم اس ایونٹ کو سپورٹ کرنے کیلئے تیار ہیں۔ ہم دشمن کو بتانا چاہتے ہیں کہ دہشت گرد اس قوم شکست دینے کا خواب دیکھنا چھوڑ دیں۔دوسری طرف سکیورٹی کے بھرپور انتظامات بھی کئے جارہے ہیں۔ میچز کے دوران قذافی سٹیڈیم میں رینجرز کی ایک کمپنی تعینات کرنے اور میٹروبس سروس کوجزوی طورپر معطل رکھنے کا فیصلہ کیا گیا ہے۔

لاہور(میڈیا پاکستان) ورلڈ الیون سے سیریز میں چوکوں، چھکوں کی برسات کیلیے بھرپور پاورہٹنگ پریکٹس شروع ہوگئی۔ورلڈ الیون سے سیریز کی تیاری کیلیے پاکستانی ٹیم کی مشقوں کا سلسلہ جمعے کو بھی جاری رہا، پہلے روز قذافی اسٹیڈیم کاگراؤنڈ گیلا ہونے کی وجہ سے صرف فیلڈنگ تک محدود رہنے والے کرکٹرز نے دوسرے روز صبح 9بجے شروع ہونے والے پہلے سیشن میں بیٹنگ اور بولنگ میں صلاحیتیں نکھارنے کاکام کیا،اس مقصد کیلیے انھیں گروپس میں تقسیم کیا گیا تھا،میدان کے وسط میں پریکٹس کیلیے مختص کی گئی دونوں پچز پر پیسرز جبکہ اطراف میں اسپنرز کی بولنگ کا سامنا کیا گیا، سب سے طویل بیٹنگ سیشن سرفراز احمد نے کیا۔
فخر زمان، احمد شہزاد،بابر اعظم، عمرامین اورفہیم اشرف کے ساتھ ٹیل اینڈرز نے بھی پاور ہٹنگ کی پریکٹس کرتے ہوئے خود کو ٹی ٹوئنٹی فارمیٹ سے ہم آہنگ کیا، شعیب ملک آخر میں بیٹنگ کیلیے آئے اور پٹھے میں کھچاؤ کی وجہ سے مشکل میں دکھائی دیے، بولرز کو رنزروکنے کا ٹاسک دیا گیا تھا، حسن علی خاصے پُرجوش تھے، سہیل خان بھرپور فارم میں نظر نہیں آئے۔بیٹنگ اور بولنگ سے فارغ کرکٹرز کو اسٹیورکسن نے فیلڈنگ میں مصروف رکھتے ہوئے کیچز کی بھرپور پریکٹس کرائی، شام کو تمام کھلاڑیوں نے این سی اے میں انڈور ٹریننگ جاری رکھی۔
دوسری جانب قذافی اسٹیڈیم میں تیاریاں مکمل کرلی گئی ہیں، میدان سے اضافی گھاس کاٹی جا چکی،وسط میں ایک پچ مکمل طور پر تیاردیگر2پر کام جاری ہے،اطراف کی سڑکوں پر کارپٹنگ بھی کرلی گئی،لیسکو نے سیریز کے دوران قذافی اسٹیڈیم اور اطراف میں لوڈشیڈنگ نہ کرنے کا اعلان کردیا، اس کے باوجود جنریٹرز کا انتظام کرلیا گیا ہے، نشتر پارک کو دن کی طرح روشن رکھنے کیلیے راستوں میں بھی لائٹس کی تنصیب ہو رہی ہے۔ادھر ورلڈ الیون میں شامل پلیئرز کی دبئی آمد کا سلسلہ رات تک جاری رہا، آسٹریلوی کرکٹر بین کٹنگ نے پہنچنے پر مختصر پیغام میں کہا ’’ سلام پاکستان، دبئی میں ٹریننگ سیشن کے بعد جلد لاہور آرہا ہوں، شائقین تیار ہوجائیں، ان سے وہاں میدان میں ملاقات ہوگی۔‘‘ سری لنکن آل راؤنڈر تھشارا پریرا نے بھی دبئی میں کیمپ جوائن کرنے کے بعد اپنے پیغام میں کہا ’’ورلڈ الیون ٹیم کا حصہ بننے پر خوش اور پاکستان میں کرکٹ کھیلنے کیلیے پُرجوش ہوں۔‘‘شیڈول کے مطابق پاکستان آمد سے قبل مہمان ٹیم 2 روز تک دبئی میں قیام کرے گی، ہفتے کو اینڈی فلاور اور ڈیرن سیمی دورئہ پاکستان کے حوالے سے میڈیا سے گفتگو کریں گے،اتوار کوورلڈ الیون کا اسکواڈ دبئی انٹرنیشنل کرکٹ اسٹیڈیم میں ٹریننگ کرے گا،ہاشم آملا اور گرانٹ ایلوئیٹ کی پریس کانفرنس طے ہے، کھلاڑیوں کی لاہور آمد11ستمبرکو ہوگی، اگلے روز قذافی اسٹیڈیم میں پہلا ٹی ٹوئنٹی ہوگا۔یاد رہے کہ جنوبی افریقی فاف ڈوپلیسی کی قیادت میں ورلڈ الیون 14کرکٹرز پر مشتمل ہے، دیگر کھلاڑیوں میں ہاشم آملا، سیموئل بدری، جارج بیلی، پال کولنگ ووڈ، بین کٹنگ، گرانٹ ایلوئٹ، تمیم اقبال، ڈیوڈ ملر، مورن مورکل، ٹم پین، تھشارا پریرا، ڈیرن سیمی اور عمران طاہر شامل ہیں۔ اینڈی فلاور کوچ جبکہ ول کوئن منیجر کے طور پر اسکواڈ کے ہمراہ ہونگے۔

لاہور(میڈیا پاکستان) پاک ورلڈ الیون ٹی ٹوئنٹی سیریز کے دوران سیاسی نعرے بازی کی روک تھام کیلیے خصوصی حکمت عملی تیار کر لی گئی ہے۔پاکستان اور ورلڈ الیون کے مابین 3میچز ٹی ٹوئنٹی سیریزمیں شائقین کوسخت ضابطہ اخلاق پر عمل کرنا ہوگا، اس حوالے سے رہنمائی کیلیے واضح ہدایات اسٹیڈیم کے گیٹس اور انکلوژرز میں آویزاں کی جائیں گی۔ ڈپٹی کمشنر نے تصدیق کی کہ میچز کے دوران اسٹیڈیم میں سیاسی تحریروں پر مبنی بینرز، پوسٹرز اور دیگر مواد لانے پر پابندی ہو گی، سیاسی نعرے بازی کی روک تھام کیلیے بھی حکمت عملی تیار کر لی گئی، ہر انکلوژر میں تعینات خصوصی مجسٹریٹ شائقین سے ضابطہ اخلاق کی پابندی کو یقینی بنانے کیلیے مستعد رہیں گے، سیاسی نعرے بازی کرنے والوں کو موقع پر موجود پولیس اہلکاروں کے حوالے کردیا جائے گا۔
واضح رہے کہ پانی کی بوتلیں لے جانے پر بھی پابندی عائد اور اسٹیڈیم میں موجود اسٹالز پر ہی ٹھنڈا پانی و آئس کریم وغیرہ دستیاب ہو گی۔ لبرٹی چوک اور فیروز پور روڈ سے داخل ہونے کے بعد کسی بھی موقع پر بائیو میٹرک مشینوں سے شناخت کی جائے گی، اسٹیڈیم میں داخل ہونے سے قبل جامہ تلاشی ہوگی، میٹل ڈیٹیکٹر سے بھی چیک کیا جائیگا، ضابطہ اخلاق کی خلاف ورزی کرنے والے شائقین سے کسی قسم کی رعایت نہیں برتی جائیگی۔
یاد رہے کہ پی ایس ایل فائنل کے موقع پر قذافی اسٹیڈیم ’’گونواز گو‘‘ کے نعروں سے گونج اٹھا تھا،اس کی ایک وجہ نجم سیٹھی کا حکومت کے قریبی حلقوں میں شمار کیا جانا تھا،اب وہ چیئرمین پی سی بی بن چکے جبکہ نواز شریف کو عدالت نے وزیر اعظم کے عہدے سے معزول کر دیا ہے۔

لاہور(میڈیا پاکستان سے)جونیئر کامن ویلتھ ویٹ لفٹنگ چیمپئن شپ میں پاکستان نے آسٹریلوی سر زمین پر11 سال بعد گولڈ میڈل حاصل کر لیا ،پاکستانی ویٹ لفٹر طلحہ طالب نے جونیئر ایونٹ میں گولڈ میڈل کے ساتھ سینئر چیمپئن شپ میں سلور میڈل پر بھی قبضہ جمایا،آسٹریلیا کے شہر گولڈ کوسٹ میں منعقدہ ایونٹ میں پاکستانی ویٹ لفٹر طلحہ طالب نے 11سال بعد آسٹریلوی سرزمین پر گولڈ میڈل حاصل کر تے ہوئے پاکستان کا جھنڈا بلند کیا ،طلحہ نے 62کلو گرام میں 126کلوگرام وزن اٹھاتے ہوئے گولڈ میڈل اپنے نا م کیا ،طلحہ نے سینئر کا من ویلتھ چیمپئن شپ میں بھی شرکت کی اور سلور میڈل اپنے نام کیا 17سالہ پاکستانی ویٹ لفٹر نے بھارت ،ملائشیاء،سمو آ،نارو،آسٹریلیا،نیوزی لینڈ اور انگلینڈ کے ویٹ لفٹرز کو پیچھے چھوڑا اور انہیں واحد شکست پاپو انیو گنی کے اولپمکس کے تجربہ کار ویٹ لفٹر کے ہاتھوں ہوئی،پاکستان کی جانب سے ایونٹ میں 6ویٹ لفٹڑذشریک ہیں کامن ویلتھ گیمز کے سلور میڈلسٹ اور ایشئن ٹرپل گولڈ میڈلسٹ عبدالرحمان 85کلوگرام،پلس 105کلوگرام میں کامن ویلتھ گولڈ میڈلسٹ ،جونیئر گولڈ میڈلسٹ اور سینئر برانز میڈلسٹ 19 سالہ نوح دستگیر بٹ اور نیشنل گولڈ میڈلسٹ عبداللہ بٹ بھی ایکشن میں نظر آئیں گے ،واضح رہے کہ کامن ویلتھ گیمز کے سپر ہیوی ویٹ مقابلے گولڈ کوسٹ کامن ویلتھ گیمز 2018کے لئے کوالیفائنگ راؤنڈ کا درجہ بھی رکھتے ہیں ،پاکستان ویٹ لفٹرز ایونٹ میں عمدہ کارکردگی دکھانے کے لئے پر عزم ہیں ۔

(میڈیا پاکستان) بڑے میچز کی بڑی تیاریاں، ورلڈ الیون کے تین ٹی ٹوئنٹی میچز کے لیے قذافی سٹیڈیم میں تین الگ الگ پچز تیار کر لی گئیں ہیں۔پی سی بی ذرائع نے بتایا کہ آزادی کپ کے تینوں میچز مختلف پچز پر کرانے کا فیصلہ کیا گیا ہے، ان تین پچز میں سے دو بیٹنگ اور ایک بائولنگ ٹریک ہوگا۔ پاکستان کرکٹ بورڈ زرائع کے مطابق ورلڈ الیون اور قومی کرکٹ ٹیم کے مابین ہونے والی تین میچز کی سیریز کے لیے ٹیم مختلف پچز ٹریک دینے کا فیصلہ شائقین کرکٹ کو بہتر کھیل دکھانے کے پیش نظر کیا گیا ہے جس کے لیے تیاری مکمل کر لی گئی ہے۔ذرائع کا دعوی ہے کہ دو ٹریک بیٹنگ کے لیے سازگار ہیں جبکہ ایک ٹریک کو بائولرز کے لیے سازگار بتایا جارہا ہے ،ورلڈ الیون نے 12، 13 اور 15 کو ٹی. ٹوئنٹی میچ قومی ٹیم کے خلاف کھیلنا ہے۔

سٹام فورڈ(میڈیا پاکستان)لیجنڈ ریسلر انڈر ٹیکر ایک بار پھر ڈبلیو ڈبلیو ای میں واپس آرہے ہیں اور توقعات سے بھی پہلے پرستاروں کے سامنے ہوں گے،اور ان کی اس خواہش کا اظہا ر کیا ہے کہ ان کا مقابلہ جان سینا سے ہو۔انڈر ٹیکر کے بارے میں خیال کیا جا رہا تھا کہ اپریل میں ریسل مینیا 33 میں رومن رینز سے شکست کے بعد وہ ریٹائر ہوچکے ہیں۔توقع کی جارہی تھی کہ 27 سالہ کیرئیر اور کولہوں کی انجری کے مسائل کے باعث وہ اب دوبارہ رنگ میں ایکشن میں دکھائی نہیں دیں گے.مگر امریکی جریدے کے مطابق انڈر ٹیکر المعروف ڈیڈمین ایک بار پھر اسی مہینے ڈبلیو ڈبلیو ای کے ایونٹ ‘نو مرسی’ میں نظر آسکتے ہیں، یا کم از کم واپسی کا اشارہ دے سکتے ہیں۔سمر سلیم سے پہلے بھی یہ افواہیں سامنے آئی تھیں کہ انڈر ٹیکر ڈبلیو ڈبلیو ای کے ریسل مینیا کے بعد اس دوسرے بڑے ایونٹ میں آکررومن رینز سے ایک بار پھر نئے ٹکراو کی بنیاد رکھ سکتے ہیں، اس حوالے سے ان کی ایک تصویر بھی انٹرنیٹ پر گردش کرتی رہی۔مگر اب پھر انڈر ٹیکر کی ناقابل یقین واپسی کی اطلاعات سامنے آرہی ہیں اور اس بار وہرومن رینز سے لڑنے کے لیے واپس نہیں آرہے۔رپورٹ کے مطابق سمر سلیم سے قبل بھی انڈر ٹیکر رنگ میں تربیت لے رہے تھے، اگرچہ وہ اس ایونٹ کے دوران ٹیلیویڑن پر نمودار نہیں ہوئے مگر آف کیمرہ وہ رنگ میں موجود تھے اور یہ ان کی واپسی کی نشانی ہے۔

لاہور(میڈٰیا پاکستان) ورلڈ الیون کا دورہ پاکستان کے حوالے سے آن لائن ٹکٹوں کے ساتھ ہی ٹکٹ بوتھوز پر ٹکٹوں کی فروخت شروع ہو چکی ہے جبکہ 500 اور 1500 والے ٹکٹ نایاب ہو گئے ہیں۔پاکستان میں انٹرنیشنل کرکٹ کی بحالی اور ورلڈ الیون کے دورہ پاکستان کی تیاریں زور پکڑ گئیں۔ آئی سی سی کی دو رکنی سکیورٹی ٹیم کی قذافی سٹیڈیم آمد، سکیورٹی ٹیم نے روٹ اور کرکٹرز کی رہائش گاہ کی سکیورٹی کا جائزہ لیا۔ دوسری جانب ٹکٹوں کی آن لائن فروخت کے بعد بوتھوں پر بھی ٹکٹوں کی فروخت شروع ہو گئی ہے۔ شائقین کی جانب سے 500 اور 1500 روپے والے ٹکٹ نہ ملنے کی شکایت کی جا رہی ہے۔فاف ڈو پلیسی کی قیادت میں ورلڈ الیون 11 ستمبر کو لاہور پہنچ رہی ہے۔ سرفراز احمد کی کپتانی میں قومی ٹیم کا کیمپ 7 ستمبر سے لگے گا، پاکستان اور ورلڈ الیون کے درمیان تین ٹی ٹونٹی میچز، 12، 13 اور 15 ستمبر کی شام قذافی سٹیڈیم میں کھیلے جائیں گے۔