Category کھیل

کراچی(ویب ڈیسک)کرکٹ کے میدان سے ایک اہم خبر سامنے آئی ہے.مشہورو معروف آل رائونڈر بوم بوم شاہد آفریدی نے کرکٹ کے حوالے سے اپنی ایسی خواہش ظاہر کی ہے جس کے سننے کے بعد کرکٹ کے شائقین اور بوم بوم آفریدی کے پرستار بے حد غمگین ہیں .
تفصیلات کے مطابق سابق ٹیسٹ کپتان شاہد خان آفریدی نےمیمن سپرلیگ سیزن فائیو کی رنگارنگ افتتاحی تقریب میں شرکت کی اور وہاں اپنے خیال کا اظہار کیا اوربعد ازاں میڈیا سے گفتگوبھی کی جس میں انہوں نے کہا کہ میری خواہش ہے کہ اپنی آخری لیگ میں کوئٹہ گلیڈی ایٹر کی نمائندگی کروں۔ میمن سپرلیگ سیزن فائیو کی تقریب میں سابق ٹیسٹ کرکٹرز سمیت تاجر برادری نے بھی شرکت کی۔

شاہد آفریدی کا اس بارے میں مزید کہنا تھا کہ وہ کرکٹ اپنے فینز کی وجہ سے کھیلنا چاہتے ہیں اگلا ایڈیشن شاید ان کا آخری پی ایس ایل ہو، تاہم انہوں نے اپنی خواہش کا اظہار کرتے ہوئے کہا ہے آکری ایڈیشن کوئٹہ گلیڈی ایٹر کے ساتھ کھیلنا چاہتا ہوں اگر فرنچائز ملتان سلطانز اجازت دے تو۔
رمیز راجہ کو پی سی بی کا نیا چیئرمین بنائے جانے کے حوالےے ایک سوال پر انہوں نے کہا کہ پروفیشنل لوگوں کو بورڈ کو چلانے کے لیے آگے آنا چاہیے، چہرے بدلنے سے نظام نہیں بدل جاتا۔

موجودہ افغانستان طالبان صورتحال کے حوالے سے ان کا کہنا تھا کہ افغانستان میں کرکٹ ختم نہیں ہوئی،یہ بات خوش آئندہ ہے کہ طالبان اس مرتبہ مثبت سوچ کے ساتھ آئے ہیں .کرکٹ کھیلنے کے حوالے سے ان کا مزید کہنا تھا کہ مجھے اب بھی کرکٹ کھیلنے کا شوق ہے مگراب کم کھیلنے کی وجہ ببل سسٹم ہے.انہوں نے کہا کہ کراچی کو میمن کمیونٹی کے حوالے کردیں، کراچی میں ٹیلنٹ سامنے نا آنے کی وجہ سہولیات کی کمی ہے.

کراچی(ویب ڈیسک)اگراپ کو کبھی اپ کے گھروالےیعنی اپ کی اہلیہ یہ کہہ دیں کہ اپ نے مونچھوں‌کیساتھ گھر نہیں‌اناتو پھر یہ کیفیت اپ بہتر سمجھ سکتے ہیں،ایسا ہی ہواہے کہ معروف کرکٹراور سابق کپتان کیساتھ.
قومی کرکٹ ٹیم کے سابق کپتان وسیم اکرم کو ان کی اہلیہ شنیرا اکرم کی جانب سے ایک وارننگ دی گئی ہے۔گزشتہ روز وسیم اکرم کی جانب سے سوشل میڈیا پر ایک ویڈیو جاری کرتے ہوئے مداحوں کو اپنے نئے روپ سے متعلق آگاہ کیا گیا تھا۔

وسیم اکرم اہلیہ شنیرا اکرم اور بیٹی سے ملنے 11 ماہ بعد آسٹریلیا گئے ہیں جہاں وہ قرنطینہ میں موجود ہیں، وسیم اکرم کو قرنطینہ میں 8 دن گزر چکے ہیں اور وہ ایک کمرے میں موجود ہیں۔وسیم اکرم کی شیئر کی گئی ویڈیو میں دیکھا جا سکتا ہے کہ سابق کپتان کی قرنطینہ کے دوران شخصیت ہی بدل گئی ہے اور انہوں نے مونچھیں رکھی ہوئی ہیں۔

ویڈیو وائرل ہونے کے بعد بڑی تعداد میں سوشل میڈیا صارفین کی جانب سے وسیم اکرم کی مونچھوں سمیت نئے روپ کو پسند کرتے ہوئے تبصرے کیے جا رہے تھے۔تاہم اب ویڈیو پر وسیم اکرم کی اہلیہ شنیرا اکرم کا ردعمل بھی سامنے آگیا ہے، شنیرا اکرم کا وسیم اکرم کی ویڈیو پوسٹ پر تبصرہ کرتے ہوئے کہنا تھا کہ یہ مونچھیں تمھارے ساتھ گھر نہیں آئیں گی۔

بعد ازاں ایک صارف کی جانب سے وسیم اکرم کی مونچھوں کی تعریف کرتے ہوئے تبصرہ کیا گیا کہ مجھے آپ کا مونچھوں کے ساتھ یہ روپ پسند ہے جس پر سابق کپتان قومی ٹیم نے جواب دیا کہ میری اہلیہ کو پسند نہیں ہے۔

ویب ڈیسک : وزیراعظم نےقومی ٹیم کےسابق کپتان رمیز راجہ کی بطورچیئرمین پاکستان کرکٹ بورڈ تقرری کی منظوری دے دی۔
تفصیلات کے مطابق وزیراعظم آفس کی جانب سےرمیزراجہ کو فون کرکے بطورچیئرمین پی سی بی تقرری سے آگاہ کیا گیا۔ سابق ٹیسٹ کرکٹررمیز راجہ کاچیئرمین پی سی بی نامزد گی کی تصدیق کرتےہوئے کہناتھا کہ بطورچیئرمین پی سی بی تقرری میرےلیےبہت اعزازکی بات ہے۔ وزیراعظم کے اعتماد پر شکر گزار ہوں، مجھے عوام کی سپورٹ اور دعاؤں کی ضرورت ہے۔
غیرملکی ویب سائٹ سے بات چیت کرتے ہوئےسابق کپتان رمیزراجہ کاکہناتھا کہ میں نے پی سی بی چیئرمین کا عہدہ قبول کرلیا ہے، بہتری کا حصول میرا ہدف ہےپاکستان کرکٹ کیلئےمیرے پاس کئی منصوبے ہیں،بورڈ آف گورنرزسےمنتخب ہوکر میڈیا سے گفتگوکروں گا۔

سابق کپتان رمیز راجہ کامزید کہنا تھا کہ وزیراعظم آفس سےچیئرمین پی سی بی تقرری کابتایاگیاہے،ابھی نہیں بتاسکتاکہ گورننگ بورڈمیں وزیراعظم کادوسرارکن کون ہوگا۔ اسد علی خان کو بھی پی سی بی بورڈ آف گورنرز کیلئے نامزد کیا گیا ہے۔

رمیز راجہ نے 1984 سے 1997 تک پاکستان کی نمائندگی کی، وہ پاکستان کرکٹ ٹیم کے کپتان اور پی سی بی کے چیف ایگزيکٹو بھی رہے ہیں۔

پاکستان اور ویسٹ انڈیز کے درمیان سیریز کا دوسرا اور آخری ٹیسٹ میچ آج سے جمیکا میں شروع ہو گا، نائب کپتان محمد رضوان نے جیت کر حساب برابر کرنے کی امیددلا دی، کہتے ہیں کہ فیلڈنگ سمیت تمام خامیاں بھلا کر اِن ایکشن ہوں گے۔

کیربینز کے دیس ٹیسٹ کرکٹ امتحان، پاکستان اور ویسٹ انڈیز کے درمیان سیریز کے دوسرے اور آخری مقابلے کیلئے دونوں ٹیمیں کنگسٹن جمیکا میں رات آٹھ بجے مدمقابل ہوں گی۔ سیریز میں ایک صفر کا خسارہ لئے قومی کھلاڑیوں کی تیاریاں مکمل ہیں، گذشتہ روز بھی جم کر پریکٹس کی۔ نیٹ سیشن میں بیٹنگ، بولنگ اور خاص طور پر فیلڈنگ کی ٹریننگ کی، خوب پسینہ بہایا۔

کھلاڑی تو پرجوش ہیں ہی، ٹیم کے بڑوں نے بھی سر جوڑ لیے۔ فائنل الیون کے لیے جوڑ توڑ، ایک تبدیلی کا امکان ہے۔

ٹیسٹ ٹیم کے نائب کپتان محمدرضوان نے جیت پر نظریں جما لیں، کہا کہ فیلڈنگ سمیت خامیوں پر قابو پا کر کامیابی سمیٹیں گے۔ ٹی 20 کے بعد ٹیسٹ سیریز سمیت ٹور کا اختتام جیت پر ہو، کھلاڑی ہی نہیں کرکٹ دیوانے بھی پرجوش ہیں۔

آئی سی سی مینز ٹی 20 ورلڈ کپ 2021 کے شیڈول کا اعلان کردیا گیا، جو متحدہ عرب امارات اور عمان میں 17 اکتوبر سے شروع ہوگا اور فائنل 14 نومبر کو دبئی میں کھیلا جائے گا۔

اس مرتبہ ٹی 20 ورلڈ کپ میں پاکستان اور بھارت کو ایک ہی گروپ میں شامل کیا گیا ہے جن کے درمیان پہلا میچ 24 اکتوبر کو ہوگا۔

پاکستان کے میچز:

24 اکتوبر: پاکستان بمقابلہ بھارت، دبئی
26 اکتوبر: پاکستان بمقابلہ نیوزی لینڈ
29 اکتوبر: پاکستان بمقابلہ افغانستان
2 نومبر: پاکستان بمقابلہ گروپ اے کے راؤنڈ 1 کوالیفائر میں دوسرے نمبر پر آنے والی ٹیم
7 نومبر: پاکستان بمقابلہ گروپ بی کے راؤنڈ 1 کوالیفائر میں پہلے نمبر پر آنے والی ٹیم
پہلا راؤنڈ
پہلے راؤنڈ میں ٹورنامنٹ 17 اکتوبر کو میزبان عمان اور پاپوا نیو گنی کے درمیان راؤنڈ 1 گروپ بی کے مقابلے سے شروع ہوگا، گروپ بی میں دیگر ٹیمیں شام 6 بجے مد مقابل آئیں گی۔

گروپ اے میں آئرلینڈ، نیدرلینڈز، سری لنکا اور نمیبیا پر مشتمل ہے جو اگلے روز ابوظبی میں ایکشن میں ہوں گے۔

راؤنڈ 1 کے میچ 22 اکتوبر تک جاری رہیں گے اور ہر گروپ میں سرفہرست دو ٹیمیں 23 اکتوبر سے شروع ہونے والے ٹورنامنٹ کے سپر 12 مرحلے میں جائیں گی۔

سپر 12
ٹورنامنٹ کا دوسرا مرحلہ، سپر 12 مرحلہ 23، اکتوبر کو ابوظبی میں شروع ہوگا جس میں گروپ 1 میں پہلا مقابلہ آسٹریلیا اور جنوبی افریقہ کے درمیان ہوگا۔

اس کے بعد دبئی میں انگلینڈ اور ویسٹ انڈیز کے درمیان میچ کھیلا جائے گا۔

پرانے حریف انگلینڈ اور آسٹریلیا 30 اکتوبر کو دبئی میں مد مقابل آئیں گے۔

گروپ کا اختتام 6 نومبر کو آسٹریلیا اور ویسٹ انڈیز کے درمیان ابوظبی اور انگلینڈ اور جنوبی افریقہ کے درمیان شارجہ میں ہونے والے میچز سے ہوگا۔

گروپ 2 کا آغاز بھارت اور پاکستان کے درمیان 24 اکتوبر کو دبئی میں ہوگا۔

اس کے بعد پاکستان 26 اکتوبر کو شارجہ میں نیوزی لینڈ کا مقابلہ کرے گا، افغانستان کا پہلا میچ 25 اکتوبر کو شارجہ میں ہوگا۔

یہ گروپ 8 نومبر کو اختتام پذیر ہوگا جب بھارت گروپ اے سے دوسرے نمبر پر آنے والے راؤنڈ 1 کوالیفائر سے مقابلہ کرے گا۔

فائنلز
پہلا سیمی فائنل 10 نومبر کو ابوظبی میں ہوگا اور دوسرا سیمی فائنل 11 نومبر کو دبئی میں کھیلا جائے گا۔

اس کے بعد ٹورنامنٹ کا آخری تصادم 14 نومبر، اتوار کو دبئی میں ہوگا۔

لاہور: واپڈا نے ٹوکیو اولمپکس میں بہترین کارکردگی کا مظاہرہ کرنے والے ارشد ندیم اور طلحہ طالب کو 25،25 لاکھ روپے کے نقد انعام سے نواز دیا۔

واپڈا ہاؤس لاہور میں ٹوکیو اولمپکس میں عمدہ کارکردگی کا مظاہرہ کرنے والے اتھلیٹ ارشد ندیم اور ویٹ لفٹر طلحہ طالب کے اعزاز میں تقریب ہوئی، جس میں چیئرمین واپڈا لیفٹیننٹ جنرل ریٹائرڈ مزمل حسین نے جیولین تھرو میں پانچویں پوزیشن پانے والے ارشد ندیم اور ویٹ لفٹنگ میں پانچویں نمبر پر آنے والے طلحہ طالب کو پچیس پچیس لاکھ روپے کےانعامی چیک دئیے گئے۔ ارشد ندیم کے کوچ فیاض بخاری کو پانچ لاکھ روپے دئیے گئے۔ جونیئر ٹینس چیمپیئن ابوبکر طلحہ کو پچاس ہزار کا چیک دیا گیا۔

چئیرمین واپڈا کا کہنا تھا کہ ادارے کو اولمپکس میں نمیاں کارکردگی دکھانے والے ان کھلاڑیوں پر فخر ہے۔ ارشد ندیم اور طلحہ طالب پر فخر ہے ارشد ندیم اور طلحہ طالب نے دنیا میں پاکستان کا پرچم لہرایا۔ دونوں اتھلیٹس نے محدود وسائل کے باوجود بہترین کارکردگی کا دکھائی ۔ پاکستان واپڈا کھلاڑیوں کی بہبود اور کھیلوں کے فروغ میں اہم کردار ادا کررہا ہے۔
اس موقع پر ارشد ند یم اور طلحہ طالب کا کہنا تھا کہ حوصلہ افزائی کرنے پر چییرمین واپڈا کا شکر گزار ہیں۔ ان کی حوصلہ افزائی سے مستقبل میں مزید اچھی پرفارمنس دینے کی کوشش کریں گے۔

بارسلونا فٹ بال کلب کی الوداعی پریس کانفرنس میں آنسو پونچھنے کیلئے لیونل میسی کا استعمال شدہ ٹشو پیپر 1 ملین ڈالر( 16کروڑ پاکستانی روپے سے زائد) میں فروخت ہونے کیلئے تیار ہے۔

ارجنٹائن کے اسٹار فٹبالر لیونل میسی نے کچھ روز قبل ایک پریس کانفرنس میں مشہور ہسپانوی فٹبال کلب بارسلونا کو الوداع کہنے کا اعلان کیا تھا۔

پریس کانفرنس میں جب میسی نے بارسلونا کے ساتھ اپنے 21 سال کے سفر کے اختتام کا اعلان کیا تو وہ آبدیدہ ہوگئے اور جیسے ہی میسی کی اہلیہ نے اپنے شوہرکی آنکھوں میں آنسو دیکھے تو انہوں نے میسی کو ایک ٹشو پیپر دیا جس سے میسی نے آنسو صاف کیے اور پھینک دیا۔

تاہم پھینکا گیا ٹشو پیپر کوئی اٹھا لےگا اور اسے بیچنےکا اشتہار بھی لگا دے گا یہی کسی نے نہیں سوچا بھی نہیں ہوگا۔

غیر ملکی میڈیا رپورٹس کے مطابق پریس کانفرنس کے دوران ہال میں بیٹھے ایک شخص نے وہ ٹشو پیپر اٹھالیا اور اسے انٹرنیٹ پر ایک آن لائن ویب سائٹ پر 1 ملین ڈالر یعنی 16کروڑ پاکستانی روپے سے زائد میں بیچنےکا اشتہار دےدیا ۔

اس شخص نے دعویٰ کیا کہ ٹشو پیپرمیں میسی کا خالص جینیاتی مواد موجود ہے جو آپ کو ان جیسا فٹ بال کھلاڑی بننے میں مدد دے گا، اشتہار دینے والے شخص کا نام معلوم نہیں ہوسکا ۔

یاد رہے کہ ارجنٹائن کے معروف فٹبال اسٹار لیونل میسی نے ہسپانوی فٹ بال کلب بارسلونا سے جدا ہونے کے بعد قطری ملکیت کے فرانسیسی کلب پیرس سینٹ جرمین (پی ایس جی) سے دو سال کا معاہدہ کرلیا ہے۔

میلبورن: آئی پی ایل پر ایک اور انٹرنیشنل سیریز نچھاور کردی گئی، آسٹریلیا اور افغانستان نے باہمی ون ڈے سیریز ملتوی کردی, مجوزہ ٹی 20 ٹرائنگولر سیریز کیلیے بھی نئی تاریخیں طے کی جائیں گی, کرکٹ آسٹریلیا نے اپنے پلیئرز کو انڈین لیگ کھیلنے کیلیے این او سی دے دی, ٹاپ کھلاڑی اپنے ڈومیسٹک ایونٹ کے بھی آغاز پر دستیاب نہیں ہوں گے۔

تفصیلات کے مطابق بھارتی کرکٹ بورڈ نے دنیا کے ٹاپ کرکٹرز کی اپنی ری شیڈول آئی پی ایل میں شرکت کی راہ سے آخری کانٹا بھی نکال دیا ہے, اس کی فرمائش پر آسٹریلیا اور افغانستان نے بھارت میں ہی شیڈول 3 ون ڈے میچز کی سیریز ملتوی کردی ہے, یہ میچز ٹی 20 ورلڈ کپ سے قبل کھیلے جانے تھے, جس کے بعد مجوزہ طور پر افغانستان, آسٹریلیا اور ویسٹ انڈیز کے درمیان ٹی 20 ٹرائنگولر سیریز بھی کھیلی جانا تھی۔

افغان کرکٹ بورڈ کا کہنا ہے کہ ورلڈ کپ کے متحدہ عرب امارات منتقل ہونے کی وجہ سے پیدا ہونے والے لاجسٹک مسائل اور سفری پابندیوں کی وجہ سے اس سیریز کو ملتوی کیا جارہا ہے جبکہ ٹی 20 ٹرائنگولر سیریز کیلیے نئی تاریخ اور وینیو کو جلد فائنل کرلیا جائے گا۔
ون ڈے سیریز کے التوا کے ساتھ یی کرکٹ آسٹریلیا نے اپنے ہلیئرز کی یو اے ای میں ہی ری شیڈول ہونے والی آئی پی ایل میں شرکت کا راستہ صاف کردیا یے, اس کیلیے باقاعدہ این او سی بھی جاری کردی گئی ہے, آئی پی ایل کے باقی 36 میچز 19 ستمبر سے 15 اکتوبر کے دوران 27 روز میں کھیلے جائیں گے, اس طرح بھارتی ایونٹ کا اختتام ورلڈ کپ سے صرف 2 دن قبل ہوگا۔

ابتدائی مرحلے میں شریک ہونے والے آسٹریلیا کے ٹاپ 7 کھلاڑیوں کی واپسی اب یقینی ہے, ان میں ڈیوڈ وارنر, گلین میکسویل, اسٹیون اسمتھ, مارکس اسٹوئنس, جھے رچرڈسن, کین رچرڈز سن اور ڈینیئل سیمز شامل ہیں, فاسٹ بولر پیٹ کمنز پہلے ہی واضح کرچکے کہ اس عرصے میں ان کے پہلے بچے کی پیدائش متوقع اور وہ گھر پر ہی رہیں گے, ان کے علاوہ جوش ہیزل ووڈ، ریلی میریڈیتھ، ڈین کرسٹیان، موسس ہینرکس، مچل مارش، جیسن بہرنڈروف، ایڈم زمپا، اینڈریو ٹائی، ناتھن کولٹرنیل، کرس لین، بین کٹنگ اور جوش فلپس کے بھی مختلف آئی پی ایل فرنچائزز کے ساتھ معاہدے ہیں۔ ہیزل ووڈ، مارش اور فلپ نے کورونا وائرس کی وجہ سے رواں برس پہلے مرحلے میں لیگ میں حصہ نہیں لیا تھا مگر وہ بدستور آئی پی ایل میں واپسی کے اہل ہیں۔

یہ لگاتار دوسرا سیزن ہے جس میں آسٹریلیا کے ٹاپ پلیئرز اپنے ڈومیسٹک مقابلوں کے ابتدائی راؤنڈز میں شریک نہیں ہوں گے جن کا آغاز 11 ستمبر سے مارش ون ڈے کپ سے ہورہا ہے، آئی پی ایل اور اس کے بعد ٹی 20 ورلڈ کپ کھیلنے والا کوئی بھی آسٹریلوی کرکٹر اپنے ملک میں افغانستان کے خلاف 27 نومبر سے شروع ہونے والے واحد ٹیسٹ سے قبل کوئی مسابقتی کرکٹ نہیں کھیل سکے گا۔

کنگسٹن: کنگسٹن ٹیسٹ میں حسن علی کو آؤٹ کرنے کے بعد نامناسب زبان استعمال کرنے والے ویسٹ انڈین بولر جیڈن سیلس کی سرزنش کردی گئی۔

آئی سی سی نے انھیں کوڈ آف کنڈیکٹ کی خلاف ورزی کا مرتکب قرار دیتے ہوئے ان کے ڈسپلنری ریکارڈ میں ایک ڈی میرٹ پوائنٹ بھی شامل کردیا ہے۔

یہ واقعہ پاکستان کی پہلی اننگز کے 70 ویں اوور میں پیش آیا جب سیلس نے حسن علی کو آؤٹ کرنے کے بعد انھیں نامناسب الفاظ کہے جوکہ حریف کرکٹر کو بھڑکانے کا باعث بن سکتے تھے، آن فیلڈ امپائرز گریگوری بریتھ ویٹ، جوئیل ولسن، نائجل ڈوگیڈ اور ٹی وی امپائر لیسلی ریفر نے ان ان پر کوڈ آف کنڈیکٹ کی شق 2.5 کی خلاف ورزی کا چارج عائد کیا۔
میچ ریفری رچی رچرڈسن نے اس پر ان کی سرزنش کی جس کی آئی سی سی کرکٹ آپریشن ڈیپارٹمنٹ نے توثیق کی، جیڈن سیلس نے اپنی غلطی کا اعتراف کرتے ہوئے سزا بھی قبول کی جس کی وجہ سے باقاعدہ سماعت کی ضرورت نہیں پڑی۔

اننگز میں 5 وکٹیں، جیڈن سیلس ویسٹ انڈیز کے کم عمر بولر بن گئے

جیڈن سیلس ٹیسٹ اننگز میں 5 وکٹوں کا کارنامہ انجام دینے والے کم عمر ترین ویسٹ انڈین بولر بن گئے، انھوں نے یہ کارنامہ پاکستان کے خلاف پہلے ٹیسٹ کے دوران انجام دیا، سیلس نے 19 برس اور 336 دن کی عمر میں یہ کارنامہ انجام دیا، جیڈن نے 55 رنز کے عوض 5 وکٹیں لیں۔

اس سے قبل ویسٹ انڈیز کی جانب سے اننگز میں 5 وکٹیں لینے والے کم عمر ترین بولر کا اعزاز الفریڈ لوئس ویلنٹائن کے نام تھا، جنھوں نے 20 برس اور 41 دن کی عمر میں انگلینڈ کے خلاف 1950 میں یہ کارنامہ انجام دیاتھا۔

جمیکا: ویسٹ انڈیز نے پاکستان کو پہلے ٹیسٹ میچ میں ایک وکٹ سے شکست دے دی۔

جمیکا میں ویسٹ انڈیز اور پاکستان کے درمیان کھیلے گئے پہلے ٹیسٹ میچ میں ویسٹ انڈیز نے 168 رنز کا ہدف 9 وکٹوں کے نقصان پر حاصل کرلیا۔ پاکستانی ٹیم دوسری اننگ میں 203 رنز بناکر پویلین لوٹ گئی تھی۔ چوتھے دن پاکستان کے پانچ کھلاڑی صرف 43 رنز کا اضافہ کرسکے۔

میچ میں جیرمین بلیک ووڈ نے 55 رنزکی اننگز کھیلی جب کہ روسٹن چیز 22 رن، جیسن ہولڈر 16 رن اور جوشنوا ڈی سلوا 13 رن بنا کر آؤٹ ہوئے۔ نکروم بونز 5، کیرن پاؤل 4 اور کپتان کریگ براتھویٹ 2 رنز بناسکے۔

پاکستان کی جانب سے شاہین آفریدی نے 4 کھلاڑیوں کو آؤٹ کیا۔ حسن علی 3 اور فہیم اشرف نے 2 وکٹ حاصل کیں۔

قبل ازیں دوسری اننگز میں بابر اعظم 55، عابد علی 34 رنز بنا کر نمایاں رہے جب کہ شاہین آفریدی بغیر کوئی رن بنائے آوٹ ہوگئے۔ پاکستان کی ساتویں وکٹ 170 رنز جب کہ نویں وکٹ 192 رنز پر گر گئی۔ ویسٹ انڈیز کی طرف سے جے ڈن سیلز نے پانچ وکٹیں حاصل کیں۔

کنگسٹن ٹیسٹ کے تیسرے روز کھیل کے اختتام تک پاکستان نے دوسری اننگز میں ویسٹ انڈیز پر 124 رنز کی برتری حاصل کی۔ ویسٹ انڈیز نے اپنی پہلی اننگز 251 رنز 8 وکٹوں کے نقصان پر دوبارہ شروع کی لیکن اس کی دونوں وکٹیں صرف 2 رنز کے اضافے کے ساتھ ہی گر گئیں، اس طرح ویسٹ انڈیز کی پہلی اننگز کا اختتام 253 رنز پر ہوا۔

پاکستان نے اپنی دوسری اننگز کا آغاز 36 رنز کے خسارے کے ساتھ کیا۔ قومی ٹیم کا اوپننگ پیئر دوسری اننگز میں بھی ناکام ہوا، عمران بٹ اور عابد علی دونوں ایک بار پھر کوئی قابل ذکر کارکردگی دکھانے میں ناکام رہے، عمران بٹ بغیر کوئی رن بنائے پویلین لوٹ گئے۔ ون ڈاؤن پوزیشن پر آنے والے اظہر علی نے عابد علی کے ساتھ مل کر 55 رنز کی شراکت قائم کی، 56 رنز کے مجموعی اسکور پر اظہر علی آؤٹ ہوئے، انہوں نے 23 رنز بنائے، ان کے بعد فواد عالم میدان میں اترے لیکن وہ بھی اپنا کھاتہ کھولے بغیر واپس لوٹ گئے، تھوڑی دیر بعد عابد علی کی مزاحمت بھی ختم ہوگئی وہ 34 رنز پر میدان بدر ہوئے۔

65 رنز کے مجموعی اسکور پر پاکستان کی 4 وکٹیں گر چکی تھیں ، ایسے موقع پر کپتان بابر اعظم اور محمد رضوان نے قومی ٹیم کو سہارا دیا۔ دونوں نے 56 رنز کی شراکت قائم کی۔ محمد رضوان کی صورت میں پاکستان کو پانچواں نقصان برداشت کرنا پڑا۔

رضوان کے آؤٹ ہونے کے بعد فہیم اشرف میدان میں اترے اور دونوں نے مل کر ٹیم کے اسکور کو آگے بڑھانے کا بیڑا اٹھایا، کھیل کے اختتام تک پاکستان نے 5 وکٹوں پر 160 رنز بنائے تھے اور اسے میزبان ویسٹ انڈیز پر 124 رنز کی برتری حاصل تھی۔ بابر اعظم 54 جب کہ فہیم اشرف 12 رنز پر بیٹنگ کر رہے ہیں۔