Category کھیل

راولپنڈی:نیوزی لینڈ کرکٹ ٹیم کے کوچ گیری اسٹیڈ نے کہا ہے کہ اس ٹیم کے خلاف سیریز 2 ، 2 رہی جس نے ٹی ٹوئنٹی کا ورلڈ کپ کھیلا ہے۔اپنے ایک بیان میں گیری اسٹیڈ نے کہا کہ نیوزی لینڈ کے زیادہ کھلاڑی آئی پی ایل میں مصروف ہیں تاہم پاکستان کے خلاف ٹی ٹوئنٹی سیریز کا نتیجہ شاندار رہا۔انھوں نے کہا کہ اس ٹیم کے خلاف سیریز دو دو رہی جس نے ٹی ٹوئنٹی کا ورلڈ کپ کھیلا ہے پاکستان ٹیم مکمل اسٹرینتھ کے ساتھ کھیل رہی تھی ۔ آئی سی سی کرکٹ ورلڈ کپ میں کین ولیمسن کی شرکت کے حوالے سے گفتگو کرتے ہوئے گیری اسٹیڈ نے بتایا کہ کین ولیمسن کے لیے ورلڈکپ کے دروازے بند نہیں ہوئے تجربہ کار بیٹر کین ولیمسن ورلڈ کپ تک مکمل صحت یاب ہو سکتے ہیں۔انھوں نے کہا کہ کین ولیمسن آئی پی ایل میں دائیں گھٹنے کی انجری کا شکار ہوئے، ان کا نیوزی لینڈ میں گھٹنے کا آپریشن ہوا خدشہ ظاہر کیا گیا تھا کہ کین ولیمسن ورلڈ کپ سے باہر ہو گئے، کین ولیمسن کی سرجری کامیاب ہوئی ہے، ری ہیب کے ابتدائی مرحلے میں ہیں تاہم صحتیابی کے لیے 6 ماہ درکار ہیں ا بھی ورلڈ کپ میں وقت ہے نہ کھیلنے کے بارے میں کچھ کہنا قبل از وقت ہے۔ کوچ گیری اسٹیڈ نے مزید کہا کہ کین ولیمسن جیسی کلاس کے کھلاڑی کو اتنی جلد میگا ایونٹ سے باہر نہیں کر سکتے، ان کی دستیابی کے امکانات کم ہیں لیکن کچھ بھی کہنا بہت جلد ہے، چانس مل بھی سکتا ہے اور کین ولیمسن کو نوجوان کھلاڑیوں کے لیے مینٹور کی حیثیت سے بھی ساتھ لے جانے غور ہو سکتا ہے۔

لاہور:پاکستان کرکٹ ٹیم کے فاسٹ بولر حارث روف نے کہا ہے کہ کافی وقت کے بعد آرام کا موقع ملا جس کا اب فائدہ ہوگا، تازہ دم ہو گیا ہوں، مسلسل کرکٹ کھیل رہے تھے، انرجی لیول بہتر کیا اور مسلز کو آرام ملا ہے۔ ایک انٹرویو میں حارث روف نے کہا کہ اب کوشش ہے کہ کرکٹ اسکلز پر کام کروں اور مزید بہتر کروں، جب میدان میں ہوں تو ہر میچ میں سو فیصد دینا پڑتا ہے۔انہوں نے کہا کہ نیوزی لینڈ کے خلاف کافی اہم سیریز ہے ، 5 ون ڈے اور 5 ٹی ٹوئنٹی ہیں، دونوں سیریز جیتنے کی کوشش کریں گے، ورلڈکپ آ رہا ہے ، ون ڈے سیریز اہم ہے، اس سیریز سے ہمیں تیاری کا موقع ملے گا۔حارث روف کا کہنا تھا کہ ہم ایسا نہیں سوچتے کہ نیوزی لینڈ کی ٹیم میں بڑے نام شامل نہیں، نیوزی لینڈ نے ٹیم میں تجربہ کار کھلاڑی شامل کیے ہیں، وہ انٹرنیشنل کرکٹ کا تجربہ رکھتے ہیں۔انہوں نے کہا کہ فاسٹ بولرز میں مقابلہ بڑھ رہا ہے، پاکستان کے لیے بیک اپ میں فاسٹ بولرز کا ہونا اچھی بات ہے، احسان اللہ کا آنا بھی اچھا ہے، دنیا پاکستان کے پیس بولرز کی تعریف کرتی ہے۔حارث نے کہا کہ ون ڈے سیریز سے کوشش کروں گا مزید سیکھوں اور جہاں مجھے بہتر ی چاہیے اسے بہتر کروں، کوشش ہو گی جو سیکھوں وہ ایشیا کپ اور ورلڈ کپ میں کام آئے، ایشیاکپ سے پہلے بھی ہماری ایک ون ڈے سیریز ہے تو اچھی تیاری ہو جائے گی۔قومی فاسٹ بولر نے کہا کہ کوشش کرتا ہوں کہ بیٹنگ کو بہتر کروں جس طرح شاہین آفریدی نے بہتر کی ہے، ویسے ہم بھی ایک دو چھکے لگا لیتے ہیں، شاہین آفریدی جب بیٹنگ کے لیے جاتے ہیں تو میں کہتا ہوں کہ میں بھی بیٹنگ کر لیتا ہوں، ہم ایک دوسرے سے گھلتے ملتے، اکٹھے رہتے اور مذاق کرتے ہیں۔

اسلام آباد:پاکستان کرکٹ ٹیم کے مایہ ناز اور تجربہ کار آل راونڈر عماد وسیم نے کہا ہے کہ اگر اب انہیں بغیر کسی ٹھوس وجہ کے قومی ٹیم سے نکالا گیا تو وہ اس کے خلاف قدم اٹھائیں گے۔ایک انٹرویو میں انہوں نے کہا کہ ساری جگہ پرفارمنس ہورہی تھی، مجھے ہمیشہ سے اپنی صلاحیتیوں پر یقین ہے اور رہے گا، میں خود یہ بات کہتا ہوں کہ اگر اس لیول پر کارکردگی نہ دکھا سکوں تو ریٹائرمنٹ لے کر سائیڈ پر ہوجاوںگا۔آل راونڈر نے کہا الحمداللہ اللہ پاک نے اتنی عزت دی ہے، عزت سے کھیلوں گا اور عزت سے ہی ریٹائر ہوں گا۔سال سوا سال ضائع ہونے سے متعلق سوال پر عماد بولیپاکستان کی طرف سے نہ کھیلنے سے مایوسی ہوتی ہے لیکن میرا مالی طور پر کوئی نقصان نہیں ہوا بلکہ میں نے اس سے 10 گنا زیادہ ہی کمایا ہے۔عماد وسیم نے کہا کہ میں نے کچھ چیزیں سنی ہیں کہ پی سی بی نے کہا کہ کنڈیشنز ایسی تھیں کہ عماد کو نہیں کھلا سکتے تھے، اگر کنڈیشنز کا مسئلہ ہوتا تو جنوبی افریقی لیگ مجھے سائن نہ کرتی، یہ لیگ میں سیاسی مسئلے کی وجہ سے نہیں کھیل سکا، باقی بگ بیش بھی مجھے سائن نہ کرتی۔انہوں نے مزید کہا ‘میں یہاں بیٹھ کر کچھ بھی بول سکتا ہوں، کسی کو بھی نشانہ بنا سکتا ہوں لیکن مجھ میں اور ان میں پھر کیا فرق رہے گا؟ پاکستانی عوام سمیت سب کو سب کچھ پتا ہے، مجھے بحث میں نہیں پڑنا، میں نے اپنا معاملہ اللہ تعالی پر چھوڑا تھا کہ اللہ دیکھ رہا ہے۔قومی کرکٹر کا کہنا تھا کہ ‘میں کہنا چاہوں گا کہ یہ جو سال سوا سال مجھے ناچاہتے ہوئے بھی بتایا نہیں گیا اور ڈراپ کردیا، اب اس طرح نہیں ہوسکے گا کیونکہ اب اس بار میرے ایکشن اہم ہوں گے کیونکہ اب مجھے بغیر کسی وجہ کے باہر نکالا گیا تو میں پروفیشنل طریقے سے یہ معاملات حل کرنے کی کوشش کروں گا اور قدم اٹھاوں گا۔

راولپنڈی:پاکستان اور نیوزی لینڈ کے درمیان پہلا ٹی ٹوئنٹی 14 اپریل کو لاہور میں کھیلا جائے گا جبکہ دوسرا ٹی ٹوئنٹی 15 اور 17 اپریل کو تیسرا ٹی ٹوئنٹی لاہور ہی میں کھیلا جائے گا۔چوتھا اور پانچواں ٹی ٹوئنٹی 20 اور 24 اپریل کو راولپنڈی میں کھیلا جائے گا۔اس کے بعد پانچ میچز کی ون ڈے سیریز شروع ہوگی، پہلا اور دوسرا ون ڈے 27 اور 29 اپریل کو راولپنڈی میں کھیلا جائے گا۔تیسرا ، چوتھا اور پانچواں ون ڈے بالترتیب تین ، 5 اور 7 مئی کو کراچی میں کھیلا جائے گا۔دوسری جانب قومی ٹیم کے غیر ملکی کوچز 11 اپریل کو لاہور پہنچ کر ذمہ داریاں سنبھالیں گے۔ کوچنگ اسٹاف کی تقرری صرف نیوزی لینڈ سیریز کے لیے کی گئی ہے۔پی سی بی نے مذکورہ عہدوں پر طویل مدتی تقرری کے لیے اشتہار بھی جاری کیا ہے جس کے تحت درخواستیں دینے کی آخری تاریخ 17 اپریل ہے۔کاغذی کارروائی پوری ہونے کے بعد طویل عرصے کے لیے ان عہدوں پر کنٹریکٹ جاری کیے جائیں گے۔

لاہور:پاکستان کرکٹ بورڈ (پی سی بی)نے پاک نیوزی لینڈ ٹی 20 اور ون ڈے سیریز کے لئے کمنٹری پینل کا اعلان کردیا۔پی سی بی نے نیوزی لینڈ کے خلاف ہوم سیریز کے لئے 7 رکنی کمنٹری پینل کا اعلان کیا۔معروف کمنٹیٹر رمیز راجہ کو ایک بار پھر نظر انداز کردیا گیا، کمنٹری پینل میں بازید خان، سکندربخت، عروج ممتاز، نیوزی لینڈ کے گرانٹ ایلیٹ، کائل ملز، آسٹریلیا کی لیزا استھالیکر اور انگلینڈ کے مارک بوچرشامل ہیں۔پی سی بی کے اعلامیے کے مطابق زینب عباس ٹی 20 اور ون ڈے سیریز میں پریزینٹرکے فرائض انجام دیں گی۔دوسری جانب پاکستان کرکٹ بورڈ نے نیوزی لینڈ کے خلاف سیریز کے لئے قومی ٹیم کی منیجمنٹ کا اعلان کردیا۔پی سی بی کے اعلامیے کے مطابق گرانٹ بریڈ برن ہیڈ کوچ، عبدالرحمان اسسٹنٹ کوچ اور ریحان الحق ٹیم منیجرہوں گے۔اس کے علاوہ اینڈریوپیوٹک بیٹنگ کوچ اورعمرگل بولنگ کوچ کے فرائض انجام دیں گے۔اعلامیے کے مطابق کلف ڈیکن فزیو تھراپسٹ، ڈریکس سائمون اسٹرینتھ اینڈ کنڈیشنگ کوچ کی ذمے داریاں نبھائیں گے۔پی سی بی اعلامیے کے مطابق میجر (ر) اظہر عارف سیکیورٹی منیجر، ڈاکٹر نجیب سومرو ٹیم ڈاکٹر ہوں گے۔اعلامیے کے مطابق گرانٹ بریڈ برن اور اینڈریو پٹیک 11 اپریل کو پاکستان پہنچیں گے۔پی سی بی اعلامیے کے مطابق نیوزی لینڈ سیریز کے بعد تقرریوں کا عمل مکمل ہونے پر ٹیم مینجمنٹ تصدیق کرے گا۔یاد رہے کہ پاکستان اور نیوزی لینڈ کے درمیان ٹی 20 سیریزکا آغاز 14 اپریل سے ہوگا۔

لاہور:میزان بینک اور جعفر برادرز نے سیمی فائنلز میں کامیابی حاصل کر کے کارپوریٹ چیلنج کے فائنل کے لئے کوالیفائی کر لیا ۔اتفاق کرکٹ گرائونڈ میں کارپوریٹ چیلنج کپ کے چوتھے ایڈیشن کے دو سیمی فائنل مقابلے ہوئے۔ پہلے سیمی فائنل میں میزان بینک نے اے ایم ٹی کو 43 رنز سے ہرا دیا۔ میزان بینک نے پہلے کھیلتے ہوئے سات وکٹوں کے نقصان پر 180 رنز بنائے۔ محسن پرویز اور رضوان اکرم نے 66،66 رنز کی شاندار اننگز کھیلی، سید وقار بخاری نے تین کھلاڑیوں کو آئوٹ کیا۔ مطلوبہ ہدف کے تعاقب میں اے ایم ٹی 137 رنز بناکر آئوٹ ہوگئی۔ علی رضا 68 رنز بناکر نمایاں رہے، نوید احمد اور محمد اشتیاق نے دو ،دو وکٹیں حاصل کیں۔ محسن پرویز کو شاندار کارکردگی دکھانے پر میچ کے بہترین کھلاڑی کا ایوارڈ دیا گیا۔ دوسرے سیمی فائنل میں جعفر برادرز نے نیٹسول کی ٹیم کو تین وکٹوں سے شکست دے کر فائنل تک رسائی حاصل کی ۔کارپوریٹ چیلنج کپ کے چوتھے ایڈیشن کا فائنل 22مارچ کو کھیلا جائے گا

پشاور:خیبرپختونخوا سکواش ایسوسی ایشن کے زیر اہتمام آل پاکستان بنک آف خیبر ویمنز سینئر سکواش چیمپئن شپ گزشتہ روز پشاور سپورٹس کمپلیکس میں واقع قمرزمان سکواش کمپلیکس میں شروع ہوگئی چیمپئن شپ کا افتتاح صوبائی سیکرٹری ہائر ایجوکیشن اور صوبائی سکواش ایسوسی ایشن کے صدر دائود خان نے کیا ان کے ہمراہ بینک آف خیبر کے چیف فنانشل آفیسرعرفان سلیم اعوان ‘سکواش لیجنڈ قمرزمان‘ نائب صدر احسان اللہ‘ چیف آرگنائزر و چیف ریفری منور زمان‘ ایسوسی ایٹ ایٹ سیکرٹری سجاد خلیل‘محب اللہ خان ‘فنانس سیکرٹری وزیر زادہ‘ میڈیا مینجر بینک آف خیبر حسن طارق‘کوچزعادل فقیر اوردیگر شخصیات موجود تھیں‘ چار روزہ چیمپئن شپ میں ملک بھر سے بہترین 32 کھلاڑی شرکت کررہی ہیں جس میں پاک آرمی‘ واپڈا‘ ایس این جی پی ایل ‘ زیڈ ٹی بی ایل ‘پنجاب‘ سندھ اور کے پی کی ٹیمیں شامل ہیں‘مقابلوں میں شرکت کرنیوالی ٹاپ رینک کھلاڑیوں میں نور العین‘ مریم ملک‘ کومل خان‘ نور الہدیٰ‘ مہوش علی‘ روشنا محبوب‘ کائنات عامر‘ ام کلثوم‘ آمنہ ملک‘حراء عقیل‘ثناء بہادری‘ذہرا عبداللہ‘ مناہل عقیل‘ حفصہ یوسف‘ مائرہ حسین‘ ناہید فیض‘ وجیہہ الطاف‘ نمرہ عقیل‘ عائشہ شہباز‘ ملیحہ شاہ‘ بشریٰ شہباز‘ سارہ نور ‘ ناشیہ شاہد اور مشال خان شامل ہیں‘ گزشتہ روز ہونیوالے نمائشی میچ میں پاک آرمی کی ثناء بہادر نے زیڈ ٹی بی ایل کی روشنا محبوب کیخلاف کامیابی اپنے نام کی‘ سیکرٹری ہائر ایجوکیشن دائود خان نے سپانسر بینک آف خیبر کو خراج تحسین پیش کرتے ہوئے کہا کہ بینک نے ہمیشہ کھیلوں کے فروغ و ترقی میں اپنا کردار ادا کیا انہوں نے کہا کہ مقابلوں کے انعقاد کا مقصد خواتین کھلاڑیوں کو یکساں مواقع فراہم کرنا ہیں اور آئندہ بھی یہ سلسلہ جاری رہے گا۔

لاہور:پاکستان کرکٹ بورڈ (پی سی بی) نے افغانستان کیخلاف ٹی ٹوئنٹی سیریز کیلئے کوچز کا اعلان کردیا۔پی سی بی کی طرف سے جاری بیان کے مطابق افغانستان کیخلاف تین میچز کی ٹی ٹوئنٹی سیریز میں عبدالرحمان قومی ٹیم کے ہیڈ کوچ ہوں گے جبکہ عمرگل بولنگ اور محمد یوسف بیٹنگ کوچ ہوں گے۔پی سی بی کے مطابق عبدالمجید فیلڈنگ کوچ ، منصور رانا ٹیم منیجر کی ذمہ داریاں نبھائیں گے۔
اس کے علاوہ ڈرائیکس سائمن ٹرینر، کلف ڈیکن فزیو اور طلحہ اعجاز اینالسٹ ہوں گے۔ یادرہے کہ پاکستان اور افغانستان کے درمیان تین ٹی ٹوئنٹی میچز 24، 26 اور 27 مارچ کو شارجہ میں کھیلے جائیں گے

 ایچ بی ایل پی ایس ایل (پاکستان سپر لیگ) کی ٹیم  لاہور قلندرز کے ٹاپ آرڈر بیٹر عبداللہ شفیق کا کہنا ہے کہ فخر زمان  اس وقت بولرز کی لائن لینتھ تباہ کرنے والے بیٹرز میں سے ہیں۔

ٹیسٹ کرکٹر عبداللہ شفیق نے جیو نیوز سے گفتگو کرتے ہوئے کہا کہ پی ایس ایل کے پہلے3 میچز کیلئے میں کمبینیشن میں سیٹ نہیں ہو سکا تھا، میں نے اس وقت مینجمنٹ کے فیصلے کو قبول کیا اور پریکٹس جاری رکھی، جب مجھے موقع ملا تو میں نے پرفارم کیا اور امید ہے تسلسل کو برقرار رکھوں گا۔

جس کھلاڑی نے ملک کے لیے اچھا کیا سیکھنے کے لیے اس کے پاس جانے میں شرم محسوس نہیں کرتا: عبداللہ شفیق

عبداللہ شفیق کا ماننا ہے کہ ہر فارمیٹ کیلئے کرکٹ کی بنیادی چیزیں ایک ہی ہوتی ہیں میرے مائنڈ میں یہی ہوتا ہے کہ جو بال ملے اس کو میرٹ کے مطابق کھیلوں ،  ہر فارمیٹ کو اس کے اسٹرائیک ریٹ کے مطابق کھیلنا پڑتا ہے،  صورتحال کا جائزہ لینا پڑتا ہے،میں نے خود کو ایک فارمیٹ کیلئے محدود نہیں رکھا ہوا جو فارمیٹ ملے اس کو اس کی ضرورت کے مطابق کھیلتا ہو۔

عبداللہ شفیق فخر زمان کی صلاحیتوں کے معترف ہیں اور کہتے ہیں کہ فخر زمان اس وقت بولرز کی لائن لینتھ تباہ کرنے والے بیٹرز میں سے ہیں، ان سے بہت کچھ سیکھنے کی کوشش کرتا ہوں ان کی پاور ہٹنگ کی اسٹرینتھ کو سیکھ رہا ہوں وہ مومینٹم کو لے کر چلتے ہیں ان کی وجہ سے لاہور قلندرز کی بیٹنگ مضبوط ہے ، یہی نہیں بابر اعظم سے بھی میں بہت کچھ سیکھ رہا ہوں۔

انہوں نے مزید  بتایا کہ پشاور کے خلاف میچ سے قبل انضمام الحق جیسے کھلاڑی سے بھی ٹپس لیں میں سمجھتا ہوں کہ مجھے کوئی بھی بیٹر ملے مجھے اس سے ضرور کچھ نہ کچھ سیکھنا چاہیے،  جس کھلاڑی نے ملک کے لیے اچھا کیا میں سیکھنے کے لیے اس کے پاس جانے میں شرم محسوس نہیں کرتا۔

گزشتہ سال قطر میں ہونے والے فیفا ورلڈکپ کے فائنل میں لیونل میسی کی قیادت میں ارجنٹائن فرانس کو شکست دے کر ورلڈ چیمپئن بنا۔

تیسری بار فیفا ورلڈکپ جیتنے کے خوشی میں میسی نے اپنی ٹیم کے تمام کھلاڑیوں کو ایک شاندار تحفہ دینے کا فیصلہ کیا ہے۔

رپورٹس کے مطابق میسی نےسونے کے 35 آئی فونز 14 آرڈر کیے ،جو وہ ٹیم کے کھلاڑیوں کے ساتھ ٹیم اسٹاف کو  تحفے میں دیں گے۔

اطلاعات کے مطابق سونے کے35 آئی فونز کی مجموعی مالیت ایک لاکھ 75 ہزار یوروز جو پاکستانی روپے میں 5 کروڑ سے زائد بنتی ہے۔

میسی کی جانب سے کھلاڑیوں کو تحفے میں دیے جانے والے سونے کے آئی فونز پر ہر کھلاڑی کا نام، جرسی نمبر اور ارجنٹائن کا لوگو موجود ہے۔

غیر ملکی میڈیا رپورٹس میں بتایا گیا ہے کہ میسی کو آئی فونز کا آرڈر موصول ہوگیا ہے۔