Tag ایمرانیوز

ہارورڈ(ویب ڈیسک) ہم سب نے بالوں والے دیوہیکل ہاتھیوں کا نام سنا ہے جنہیں میمتھ کہا جاتا ہے۔ اب سائنسدانوں نے اس کے ڈی این اے کی عام ہاتھیوں سے کلوننگ کے لیے ڈٰیڑھ کروڑ ڈالر کا سرمایہ بھی جمع کرلیا ہے۔

اس کی وجہ یہ ہے کہ میمتھ کی کئی لاشیں بہترین حالت میں روسی برفیلے خطوں بالخصوص سائبیریا سے ملی ہیں۔ کئی ایک لاشوں کی ہڈیوں میں گودا اور گوشت کے ٹکڑے بھی سلامت ہیں۔ یہ علاقہ ان جانوروں کے لیے ڈیپ فریزر کا کام کرتا ہے اور یوں وہ ہزاروں سال بعد بھی بہترین حالت میں ہیں۔

کوئی دس ہزار سال قبل میمتھ صفحہ ہستی سے مٹ گئے تھے۔ اگرچہ ان کی کلوننگ پر دس برس سے غور جاری ہے لیکن اب ’کلوسل‘ نامی بایوٹیکنالوجی کمپنی نے ہارورڈ کی شعبہ جینیات کے تعاون سے اپنے انقلابی منصوبے کے لیے ڈیڑھ کروڑ ڈالر کی رقم جمع کرلی ہے۔
نصف میمتھ اور آدھا ہاتھی

پہلے مرحلے میں جو جانور تخلیق کیا جائے گا وہ نصف ہاتھی اور نصف میمتھ ہوگا۔ چار مراحل میں یہ کام کیا جائے گا۔ پہلے منجمند میمتھ کے ڈی این اے سے نکال کر اس کا موازنہ ایشیائی ہاتھی سے کیا جائے گا۔ دوم ایشیائی ہاتھی کی جلد کے خلیات لے کر اسے جینیاتی انجینئرنگ سے بدل کر میمتھ کے جین شامل کئے جائیں گے۔

تیسرے مرحلے میں اسٹیم سیل کی مدد سے ایک بیضہ تیار کیا جائے گا۔ اب ایشیائی ہاتھی کے جلد کی خلیات سے مرکزہ (نیوکلیئس) نکال کر میمتھ کے ڈی این اے والا والا مرکزہ داخل کیا جائے گا۔ آخری مرحلے میں انڈے کی افزائش شروع کرکے اسے ایشیائی مادہ میں داخل کرکے اسے حاملہ کیا جائے گا۔ مدت پوری ہونے کے بعد ہاتھی کا ایسا بچہ جنم لے گا جس میں میمتھ کے خواص بھی ہوں گے۔

توقع ہے کہ اگلے چھ برس میں پہلا میمتھ نما ہاتھی اس دنیا میں آنکھ کھولے گا۔ اپنے دوغلے خواص کی بنا پر یہ ہاتھی سردی کی سختی جھیل سکے گا۔ تاہم سائنسدانوں نے روس کے مستقل برفیلے علاقوں سے ملنے والے میمتھ سے ایسے جین شناخت کرلیے گئے ہیں جو ان پر چربی کی دبیز تہہ چڑھاتے ہیں اور لمبے بال دیتے ہیں۔ لیکن اس کا تجربہ فی الحال قدرے دور ہے۔ پہلے مرحلے میں نیم میمتھ نما ہاتھی کی پیدائش متوقع ہے۔

تاہم بعض ماہرین نے اس تنقید پر عمل کرتے ہوئے کہا ہے کہ میمتھ کا مدتِ حمل عام ہاتھیوں سے زیادہ تھا اور یہ جاننا بھی ہوگا کہ آیا اس میں وہ خواص پیدا ہوسکیں گے یا نہیں۔

جنوبی وزیرستان(ویب ڈیسک) دہشت گردوں کی فائرنگ سے پاک فوج کے 7 جوان شہید ہوگئے۔
پاک فوج کے شعبہ تعلقات عامہ آئی ایس پی آر کے مطابق فورسز نے جنوبی وزیرستان کے ضلع آسمان منزا میں دہشت گردوں کی موجودگی کی خفیہ اطلاع پر آپریشن کیا ۔ اس دوران فائرنگ کے تبادلے میں 5 دہشت گرد ہلاک ہوگئے۔
دہشت گردوں کی فائرنگ سے پاک فوج کے 7 جوان بھی شہید ہوگئے۔ فورسز کی جانب سے مزید دہشت گردوں کا قلع قمع کرنے کےلیے علاقے میں سرچ آپریشن جاری ہے۔ وزیر داخلہ شیخ رشید احمد نے پاک فوج کے جوانوں کی شہادت کی اطلاع پرغم کا اظہار کرتے ہوئے وطن کی خاطر جان قربان کرنے والے جوانوں کو خراج تحسین پیش کیا۔ انہوں نے کہا کہ وطن کی خاطر جان دینے والوں پر پوری قوم کو ناز ہے، دہشت گردوں کے خلاف آپریشن جاری رکھیں گے۔

بلوچستان (ویب ڈیسک)بلوچستان اسمبلی میں وزیر اعلیٰ بلوچستان جام کمال کیخلاف عدم اعتماد جمع کرانے کے حوالےسے ان کا موقف سامنے آیا ہے.تفصیلات کے مطابق وزیر اعلیٰ بلوچستان جام کمال نے کہا ہے کہ اسمبلی میں میرے خلاف عدم اعتماد کی تحریک کی بالکل پرواہ نہیں۔انہوں نے اس حوالے سے اپنی ٹوئٹ میں کہا کہ الحمدللہ مجھے عدم اعتماد کی تحریک کی پرواہ نہیں ، میری جماعت اور اتحادی اگرمیرے ساتھ ہیں تو اپوزیشن سے فرق نہیں پڑتا۔ان کا مزید کہنا تھا کہ پارٹی اور جس دن میری جماعت اور اتحادیوں کی اکثریت نے عدم اعتماد کیا اس دن مجھے ایوان کا سربراہ ہونے کا حق نہیں ہوگا اور میں چلا جاوٴں گا۔

یاد رہے کہ بلوچستان میں اپوزیشن نےگزشتہ روز زیراعلیٰ بلوچستان جام کمال خان کے خلاف عدم اعتماد کی تحریک جمع کرائی ہے جس کے مطابق گزشتہ 3 سال میں جام کمال خان کی نا اہل حکمرانی کے باعث بلوچستان میں شدید مایوسی، بدامنی ،بیروزگاری اور اداروں کی کارکردگی شدید متاثر ہوئی ہے۔

سندھ(ویب ڈیسک)بالآخر پاکستان کے لیجنڈری کامیڈین عمر شریف کی سنی گئی . حکومت سندھ نےعمر شریف کے علاج کے لیے رقم دینے کا فیصلہ کر لیا.تفصیلات کے مطابق سندھ حکومت نے عمر شریف کا امریکا سے علاج کے لیے ہنگامی بنیادوں پر 4 کروڑ روپے کی رقم فراہم کرنے کا اعلان کیا ہے جس کا نوٹیفکیشن بھی جاری کردیا گیا ہے.سندھ کےمحکمہ خزانہ کی جانب سے جاری کردہ نوٹی فکیشن میں کہا گیا کہ عمر شریف کو علاج کیلئےپاکستان سے امریکا منتقل کرنے کے لیے ایئر ایمبولینس کا اہتمام کیا جائے گا اور ان کے علاوہ علاج پر آنے والے اخراجات کی مد میں یہ رقم جاری کی جا رہی ہے۔یاد رہے کہ عمر شریف گزشتہ ایک ماہ سےکراچی کے آغا خان ہسپتال میں زیر علاج ہیں۔عمر شریف کے اہل خانہ کی جانب سے رقم کے اعلان سے قبل آفیشل فیس بک پر کی گئی پوسٹ میں بتایا گیا تھا کہ سندھ حکومت نے ایئر ایمبولینس کا انتظام کرلیا ہے جس کےبعد اداکار کو امریکا منتقل کیا جائے گا ویزے کا انتظار ہے.اس کے علاوہ زرین غزل کے مطابق 15 سے 16 ستمبر تک عمر شریف کو علاج کے لیے امریکا منتقل کیا جائے گا، جہاں اداکارہ ریما خان کے شوہر ڈاکٹر طارق شہاب نے تمام انتظامات کر رکھے ہیں۔

اسلام آباد (ویب ڈیسک)چیف الیکشن کمشنر سکندر سلطان راجہ کی تعیناتی کے حوالے سے سپریم کورٹ نے بڑا فیصلہ سنا دیا.تفصیلات کے مطابق سپریم کورٹ نے چیف الیکشن کمشنر سکندر سلطان راجہ کی تعیناتی کیخلاف کی گئی اپیل کومسترد کر دیا.کیس کی سماعت قائمقام چیف جسٹس عمر عطا بندیال کی سربراہی میں دو رکنی بینچ نے کی۔ سماعت کے دوران قائمقام چیف جسٹس نے استفسار کیا کہ کیا الیکشن کمیشن میں اس وقت کوئی جج حاضر سروس ہے؟ سوال کے جواب پر درخواست گزار علی عظیم آفریدی نے کہا کہ الیکشن کمیشن میں اس وقت کوئی حاضر سروس جج موجود نہیں .جس کے بعدعمر عطا بندیال نے کہا کہ پھر تو یہاں بات ہی ختم ہوجاتی ہے۔ کیس کے حوالے سے قائمقام چیف جسٹس کا مزید کہنا تھا کہ موجودہ چیف الیکشن کمشنر ریٹائرڈ سول سرونٹ ہیں ان کیخلاف ٹھوس گراؤنڈز نہیں. الیکشن کمشنر سمیت ممبران کی تعیناتی ان کی اہلیت اور قابلیت کی بنیاد پر ہوتی ہے۔یاد رہے کہ درخواست گزار نے 22 ویں آئینی ترمیم کی شق 27 کو چیلنج کیا تھا.

لاہور(ویب ڈیسک)وزیر صحت پنجاب ڈاکٹر یاسمین راشد کا کہنا ہے کہ حکومت 15 سے 18 سال کی عمر کے درمیان افراد کو کورونا کی ویکسین بالکل مفت لگا رہی ہے۔عوام سےاپیل ہےکسی صورت بھی 15 سے 18 سال عمر کے درمیان افراد ویکسین لگوانے کے لیے کسی کو کوئی معاوضہ ادا نہ کریں۔ انہوں نے کہا کہ کورونا ویکسین کی صرف بوسٹر یا اضافی ڈوز لگوانے والے افراد ہی حکومتی ہدایات کے مطابق معاوضہ ادا کریں۔ یاسمین راشد کامزید کہنا تھا کہ عوام کسی قسم کی معلومات یارہنمائی حاصل کرنے کے لیے ہیلپ لائن 1033 پر رابطہ کریں۔کوروناوباکوشکست دینےکیلئےعوام احتیاطی تدابیرپرعمل کریں،ویکسین کی دونوں‌‌خوراکیں ہی مہلک
وباءسےنجات کاذریعہ ہیں.

اسلام آباد(ویب ڈیسک) وفاقی حکومت نے کورونا ویکسین نہ لگوانے والے شہریوں پر سخت پابندیوں کا اعلان کردیا۔وفاقی وزیر برائے منصوبہ بندی و ترقی اور نیشنل کمانڈ اینڈ آپریشن سینٹر (این سی او سی) کے سربراہ اسد عمر نے میڈیا بریفنگ میں کہا کہ آہستہ آہستہ وبا کا پھیلاؤ نیچے آرہا ہے اور مثبت کیسز کی شرح میں کمی ہورہی ہے، چوتھی لہر کمزور پڑتی نظر آرہی ہے، آئندہ 15 روز میں اس رجحان میں مزید استحکام آئے گا اور کورونا کیسز میں کمی آئے گی جس سے اسپتالوں پر دباؤ کم ہوگا۔
وزیر منصوبہ بندی نے کہا کہ بڑے شہروں میں 15 سال سے زائد عمر کی 40 فیصد آبادی ہے جسے مکمل طور پر ویکسینیٹ کرنا ہے، یہ ہدف حاصل کرلیں تو ستمبر کے آخر میں بندشوں میں مزید کمی کریں گے، 4 سے 15 ستمبر تک کورونا سے زیادہ متاثرہ 24 اضلاع میں بندشیں لگائی تھیں، ان میں سے 18 اضلاع میں صورتحال میں بہتری آئی ہے، جہاں پابندیاں ختم کررہے ہیں، یعنی 16ستمبرسے50فیصد حاضری کے ساتھ تعلیمی ادارے کھولے جائیں گے اور انٹر سٹی بس سروس کےلیے 50فیصد سواریوں کے ساتھ اجازت ہوگی، تاہم 6 اضلاع لاہور ، فیصل آباد، ملتان ، سرگودھا ، گجرات اور بنوں میں بندشیں برقرار رہیں گی۔
اسد عمر نے کہا کہ ویکسین نہ لگوانے والے شہریوں کے لیے آہستہ آہستہ پابندیاں بڑھاتے چلے جائیں گے، ایسے کام جس سے وہ دوسروں کےلیے خطرہ بن سکتے ہیں ان سے روکنا شروع کردیں گے، 30 ستمبر تک دونوں ڈوز نہ لگوانے والوں پر سخت پابندیاں لگائی جائیں گی۔

اسد عمر نے وکسین نہ لگوانے والے شہریوں پر پابندیوں کی تفصیل بتائی کہ فضائی سفر پر پابندی ہوگی، شاپنگ مالز میں دکانداروں اور گاہکوں دونوں کے داخلے پر پابندی ہوگی، ہوٹلز اور گیسٹ ہاؤسز میں بکنگ بند کردی جائے گی، انڈور آؤٹ ڈور ڈائننگ اور شادیوں میں شرکت نہیں کرسکیں گے، تعلیمی اداروں میں ویکسین نہ لگوانے والا تدریسی اور غیر تدریسی تمام عملہ 30 ستمبر کے بعد اپنا کام جاری نہیں رکھ سکے گا۔

اسد عمر نے مزید کہا کہ 20 لاکھ کی آبادی والے شہر اسلام آباد میں 52 فیصد آبادی کی مکمل ویکسی نیشن ہوچکی ہے، لہذا باقی شہروں میں ویکسی نیشن نہ ہونے کی کوئی وجہ نہیں۔

کابل(ویب ڈیسک) طالبان حکومت کے وزیر خارجہ مولوی امیر خان متقی سے چین کے ایلچی وانگ یو نے ملاقات کی اور انسانی ہمدردی کی بنیاد پر مالی امداد کا اعلان کیا ہے۔ امارت اسلامیہ افغانستان کے ترجمان ڈاکٹر محمد نعیم نے سماجی رابطے کی ویب سائٹ پر اپنی ٹوئٹ میں بتایا کہ عبوری حکومت کے وزیر خارجہ مولوی امیر اللہ متقی سے افغانستان کے لیے چین کے خصوصی ایلچی وانگ یو نے اہم ملاقات کی۔

ترجمان طالبان کا کہنا تھا کہ ملاقات میں چین کے ایلچی برائے افغانستان وانگ یو نے نئی حکومت کے قیام پر مبارک باد دی اور نیک تمناؤں کا اظہار کیا۔
اس موقع پر چین کے ایلچی نے کورونا ویکسین کی 30 لاکھ خوراکیں اور انسانی ہمدردی کی بنیاد پر ڈیڑھ کروڑ ڈالر کی مالی امداد کی فراہمی سے آگاہ کیا۔
ترجمان طالبان کے مطابق ملاقات کے دوران چین کے خصوصی ایلچی نے افغانستان کے ساتھ انسانی، معاشی، سیاسی تعاون اور تعلقات قائم رکھنے کے عزم کا اعادہ بھی کیا۔
امارت اسلامیہ افغانستان کے وزیر خارجہ مولوی امیر خان متقی نے چین کی مالی امداد پر شکریہ ادا کرتے ہوئے کہا کہ چین اور افغانستان ہمسائیہ ممالک ہیں اور دوطرفہ تعلقات کی ترقی دونوں فریقوں کے مفاد میں ہے۔واضح رہے کہ 8 ستمبر کو چین کے وزیر خارجہ وانگ یی نے پاکستان، ایران اور تاجکستان، ازبکستان اور ترکمانستان کے ہم منصبوں کے ساتھ ویڈیو کانفرنس کے دوران افغان شہریوں کے لیے 3 کروڑ 10 لاکھ ڈالر کی مالی امداد کی پیشکش کی تھی جو غذائی قلت اور کورونا وبا پر خرچ کی جائے گی۔

اسلام آباد(ویب ڈیسک)خوشخبری…آٹا، گھی، چینی اور دالیں،کون سی چیز کتنی سستی ہوگئی؟اس حوالے سے وفاقی وزیرخزانہ شوکت ترین نے آٹا، گھی، چینی اور دالوں پر کیش سبسڈی دینے کا اعلان کرتے ہوئے کہا ہے کہ مہنگائی صرف پاکستان میں نہیں دنیا بھر میں ہوئی ہے۔

اسلام آباد میں دیگر وفاقی وزرا کے ہمراہ پریس کانفرنس کے دوران شوکت ترین نے کہا کہ کورونا کی وجہ سے دنیا بھرمیں روزمرہ استعمال کی اشیا کی قیمتیں بڑھی ہیں، کورونا سے اشیا کے فراہمی متاثر ہوئی اوراس کے منفی اثرات مرتب ہوئے، مہنگائی صرف پاکستان میں نہیں دنیا بھر میں ہوئی ہے، بین الاقوامی مارکیٹ میں چینی فی ٹن 430 ڈالر پر چلی گئی ہے ۔

وزیر خزانہ نے کہا کہ ماضی میں زراعت کا شعبہ نظر انداز رہا اور کسان متاثر ہوا، ہمیں زرعی پیداوار بڑھانے کی ضرورت ہے، کسان سے لے کر ریٹیلر تک قیمتوں کا تعین کررہے ہیں، احساس پروگرام کا ڈیٹا آگیا ہے، جس کے تحت ہم رواں ماہ سے ٹارگٹڈ سبسڈی دیں گے، اس سے قبل گیس اور بجلی پر ٹارگٹڈ سبسڈی دے رہے تھے، اب آٹا، گھی، چینی، دالوں پر کیش سبسڈی دیں گے۔ آئندہ چند دنوں میں آٹے کی قیمت میں کمی ہوگی۔
شوکت ترین نے کہا کہ ملکی معیشت بہتر ہورہی ہے، آئی ایم ایف میں جانے سے روپے کی قدر میں کمی ہوئی۔ معیشت جب بڑھتی ہے تو قرضوں میں اضافہ ہوتا ہے، روپے کی قدر میں کمی کی وجہ سے قرضوں میں اضافہ ہوا، اب قرضے 39 ہزار 900 ارب روپے تک پہنچ چکے ہیں، یہقرضے 2018 میں 25 ہزار 290 ارب روپے تھے، 2020 میں قرض بلحاظ جی ڈی پی 85.7 فیصد تھا اور 2021 میں یہ 81.1 فیصد ہوگیاہے۔

وفاقی وزیر نے کہا کہ کامیاب پاکستان پروگرام غریب عوام کا پروگرام ہے، اس کے لئے آئی ایم ایف رضامند ہو گیا ہے، کامیاب پاکستان پروگرام میں ایسا کچھ نہیں کہ آئی ایم ایف رضامند نہ ہوتا۔ کامیاب پاکستان پروگرام گزشتہ ماہ میں شروع کیا جانا تھا، آئی ایم ایف کی رضامندی نہ ہونے کے باعث پروگرام شروع نہیں ہو سکا تھا، اب اسے رواں ماہ شروع کرنے کا فیصلہ کیا گیا ہے۔

لاہور(ویب ڈیسک) کنٹونمنٹ بورڈ کے انتخابات میں کامیابی پر لیگی قیادت کی جانب سے مبارکباد دینے کا سلسلہ جاری ہے۔

مسلم لیگ ن کے صدر شہباز شریف اور مریم نواز نے خواجہ عمران نذیر کو ٹیلی فون کرکے مبارک باد دی۔ شہباز شریف نے کہا کہ آپکی ٹیم کی شاندار کارکردگی کے باعث اللہ تعالیٰ نے ن لیگ کو کامیابی سے ہمکنار کیا، آپ اور آپ کی پوری ٹیم کو اس کامیابی پر مبارکباد دیتا ہوں۔ مریم نواز نے کہا کہ زندہ دلان لاہور نے اپنے ووٹ کی طاقت سے جعلی تبدیلی کو رد کر دیا ہے، اللہ تعالیٰ نے ہمیں عظیم کامیابی عطاء کی ہے، نواز شریف اور شہباز شریف کی قیادت میں آپکی ٹیم نے اس کامیابی میں اہم رول ادا کیا ہے، پوری ٹیم کو اس کامیابی پر مبارکباد دیتی ہوں۔