Tag ایمرا نیوز

کراچی (ویب ڈیسک)شوبز کی کئی اداکارائیں فلاحی کاموں میں‌بڑھ چڑھ کر حصہ لیتی ہیں . اسی سلسلے میں معروف و مشہوراداکارہ ماہرہ خان گھریلو تشدد اور جنسی زیادتی کے خلاف میدان میں اتری ہیں .تفصیلات کے مطابق ماہرہ خان نے گھریلو تشدد اور جنسی حملوں کے خلاف ’کامن ویلتھ‘ کی مہم کا حصہ بننے کا فیصلہ کیا ہے۔ ماہرہ خان نےانسٹاگرام پرایک ویڈیو پیغام جاری کیا ہے جس میں انہوں نے کہا ہےکہ میں گھریلو تشدد اور جنسی حملوں کے خلاف عالمی مہم میں سب کو شرکت کی دعوت دیتی ہوں۔ ویڈیو کے کیپشن میں انہوں نے لکھا کہ ہم گھریلو تشدد اور جنسی استحصال کے بارے میں جانتے ہیں یا پھر باقاعدہ اس کا تجربہ کرچکے ہیں۔ ہم اس بارے میں جتنی زیادہ بات کرتے ہیں خاموشی ٹوٹتی جاتی ہے۔
اس کے علاوہ ماہرہ خان نے ایک اور پوسٹ شیئر کی جس میں لکھا کہ آئیں خاموشی کے اس کلچر کو توڑ ڈالیں جو ایک عرصے سے گھریلو اور جنسی تشدد کے خلاف آواز اٹھانے سے روکتا ہے۔خیال رہے کہ اس مہم میں 54 ممالک سے تعلق رکھنے والے شوبز ستاروں سمیت کھلاڑی اور دیگر سوشل میڈیا شخصیات شامل ہیں۔

اسلام آباد(ویب ڈیسک) انگلینڈ کرکٹ بورڈز (ای سی بی) کی جانب سے پاکستان میں ہونے والےشیڈول میچزکو منسوخ کر دیا گیا ہے.اس حوالے سے پاکستان نے انگلینڈ کو قانونی کارروائی کرنے کا عندیہ دیا تھا جس کےبعد برطانوی حکومت نے اس کوبورڈ کا ’ذاتی‘ فیصلہ قرار دیا ہے۔تفصیلات کے مطابق برطانوی ہائی کمشنر ڈاکٹر کرسچن ٹرنر نے واضح کیا ہے کہ دورے کو ترک کرنے کا فیصلہ ای سی بی کا ذاتی ہے.یہ ادارہ برطانوی حکومت سے آزاد ہے جبکہ کھلاڑیوں کی فلاح و بہبود کے خدشات کی بنیاد پر یہ فیصلہ کیا گیا۔انہوں نے تصدیق کرتے ہوئے کہا کہ پاکستان کا سفر کرنے کی ہماری ایڈوائزری کو تبدیل نہیں کیا گیا۔
انہوں نے کہا کہ اس دورے کی منسوخی پرمیں گہرے دکھ کا اظہار کرتا ہوں، میں ذاتی طور پر میچوں کا منتظر تھا۔
برطانوی ہائی کمشنر کا مزید کہنا تھا کہ تمام واقعات پرحکومت کا کوئی کنٹرول نہیں ، ’تمام ایونٹس میں شامل ہونا اور اسے دلچسپ بنانا آسان ہے، میری توجہ اب 2022 کے دورے پر ہے۔کرکٹ بورڈ کے خلاف ممکنہ قانونی کارروائی کے جواب میں برطانوی ہائی کمشنر کا کہنا تھا کہ یہ حکومت پاکستان اور ای سی بی کے درمیان کا معاملہ ہے۔

نیویارک (ویب ڈیسک) نیوزی لینڈ دورے کی منسوخی کے بعد پاکستان اس کی اصل وجہ معلوم کرنا چاہتا ہے.اس حوالےسے وزیر خارجہ شاہ محمود قریشی نے ایک بیان دیا ہے جس میں ان کہنا ہے کہ نیوزی لینڈ کا دورہ منسوخ کرنے کے پیچھے پڑوسی ملک بھارت کا ہاتھ ہوسکتا ہے۔ان خیالات کا اظہارانہوں نے نیویارک میں پاکستانی کمیونٹی سے خطاب کے دوران کیا. دوران خطاب شاہ محمود قریشی کا کہنا تھا کہ بیرون ملک پاکستانی ہمارے ملک کا سرمایہ ہیں، ملک کے مشکل حالات میں انہوں نے تعاون کیا، پچھلے برس اوورسیز پاکستانیوں نے 29.4ارب ڈالر کی ترسیلات پاکستان میں بھیجیں علاوہ ازیں روشن ڈیجیٹل اکاؤنٹ کے ذریعے 2 ارب ڈالر سے زائد کی رقم پاکستان منتقل ہوچکی ہے،اوورسیزپاکستانیوں کو ملکی ترقی میں حصہ ڈالنے کے لیےخوش آمدید کہیں گے۔
شاہ محمود قریشی نے نیوزی لینڈ دورے کے حوالے سے بات کرتے ہوئے کہا کہ نیوزی لینڈ کرکٹ ٹیم حفاظتی اقدامات سے مطمئن تھی، اس لیے وہ پاکستان آئی تھی. ہمارے سیکیورٹی اداروں کو کوئی تھریٹ نہیں ملا، نیوزی لینڈ کی ٹیم نے آخری وقت پربتایا کہ نہیں کھیل سکتے کیونکہ سیکیورٹی خدشات ہیں، نیوزی لینڈ کی ٹیم کو ہر طرح کی سیکیورٹی کی یقین دہانی کراتے ہوئے ہیلی کاپٹر کے ذریعے ٹیم کو اسٹیڈیم پہنچانے کی بھی پیشکش کی گئی تھی، نیوزی لینڈ کا دورہ منسوخ کرنے کے پیچھے پڑوسی ملک ہوسکتا ہے۔

بالی وڈ کے معروف ہدایتکار انوراگ کشیاپ پر ہراسانی کا الزام لگانے والی اداکارہ پائل گھوش حملے میں زخمی ہوگئیں۔
رپورٹس کے مطابق اداکارہ نے انسٹاگرام پر ایک ویڈیو میں دعویٰ کیا ہے کہ دو روز قبل ممبئی کے ایک اسٹور سے دوائیوں کی خریداری کے بعد گھر واپسی کیلئے گاڑی میں بیٹھ رہی تھی کہ اچانک ماسک پہنے افراد آگئے۔
انہوں نے کہا کہ ماسک پہنے افراد کے پاس لوہے کی راڈ تھی اور ان کے پاس ایک بوتل بھی تھی۔اداکارہ نے دعویٰ کیا کہ مسلح افراد کے پاس بوتل میں تیزاب تھا۔پائل گھوش کا کہنا تھاکہ مسلح افراد نے لوہے کی راڈ سے حملہ کیا جس سے ان کا بائیاں بازو زخمی ہوگیا تاہم میرے چیخنے پر حملہ آور فرار ہوگئے۔
انہوں نے بتایا کہ چوٹ اور خوف کی وجہ سے ساری رات سو نہیں سکی اور جلد ہی واقعے کی ایف آئی آر درج کراؤں گی۔اداکارہ کی ویڈیو وائرل ہونے کے بعد ممبئی پولیس کے اعلیٰ حکام نے ان سے گھر جاکر ملاقات کی اور واقعے سے متعلق معلومات بھی حاصل کیں۔

اسلام آباد: وفاقی حکومت نے چیف الیکشن کمشنر کے معاملے پر جارحانہ رویہ اختیار کرنے کا فیصلہ کیا ہے۔
وزیراعظم عمران خان کی سربراہی میں وفاقی کابینہ کا اجلاس ہوا جس میں ملکی سیاسی، معاشی صورتحال کا جائزہ اور نیوزی لینڈ کرکٹ ٹیم کے دورہ منسوخی سمیت 21 نکاتی ایجنڈے پر غور کیاگیا۔ اجلاس میں ازبکستان کو بزنس ویزا لسٹ میں شامل کرنے ، ٹریڈنگ کارپوریشن پاکستان کے چیئرمین ، سی ای او ڈریپ اور ریلوے بورڈ ممبران کی تقرری و تعیناتی کی منظوری، خطے کے ممالک سے فلموں کی درآمد، جموں کشمیر اسٹیٹ پراپرٹی بجٹ کی منظوری اور دیگر معاملات زیر غور آئے۔

کابینہ کے اجلاس میں الیکٹرانک ووٹنگ مشین اور بیرون ملک مقیم پاکستانیوں کو ووٹ کا حق دینے کے معاملے پر بریفنگ لی گئی، اس موقع پر چیف الیکشن کمشنر کے وفاقی وزرا کو نوٹسز پر بھی گفتگو ہوئی، اجلاس میں حکومت نے چیف الیکشن کمشنر کے معاملے پر جارحانہ رویہ اختیار کرنے کا فیصلہ کیا ہے۔
اجلاس کے بعد میڈیا بریفنگ کے دوران وفاقی وزیر اطلاعات فواد چوہدری نے کہا کہ ہمیں انتخابی اصلاحات کو آگے بڑھانا ہے، یہ نہیں ہوسکتا کہ اوورسیز پاکستانیوں کو ووٹ کا حق نہ دیں، ہم اوورسیز پاکستانیوں کو ان کا حق دلائیں گے۔ اگلا الیکشن نئی مردم شماری اور حلقہ بندیوں پر ہونا ہے، مردم شماری کے لیے 18 ماہ کا وقت درکار ہوگا۔واضح رہے کہ انتخابات میں الیکٹرانک ووٹنگ مشین کے استعمال کے معاملے پر حکومت اور الیکشن کمیشن کے درمیان شدید اختلافات ہیں۔ اس حوالے سے وفاقی وزرا نے چیف الیکشن کمشنر پر الزام لگایا ہے کہ وہ اپوزیشن کی زبان بول رہے ہیں۔

اسلام آباد: وفاقی کابینہ نے وڈیو شیئرنگ ایپ ٹک ٹاک نہ کھولنے کا فیصلہ کیا ہے۔
میڈیارپورٹس کے مطابق وزیر اعظم عمران خان کی سربراہی میں وفاقی کابینہ کا اجلاس ہوا، جس میں 21 نکاتی ایجنڈے پر غور کیا گیا۔ کابینہ نے عدالتی فیصلوں اور احکامات کی روشنی میں وڈیو شیئرنگ ایپ ٹک ٹاک پر پابندی سے متعلق معاملے پر غور کیا۔ ذرائع کا کہنا ہے کہ کابینہ نے ٹک ٹاک پر پابندی برقرار رکھنے کا فیصلہ کیا ہے۔
واضح رہے کہ پی ٹی اے نے ٹک ٹاک پر پابندی عائد کررکھی ہے، ایپ پر پابندی کے خلاف درخواست پر اسلام آباد ہائی کورٹ نے پی ٹی اے کو معاملہ وفاقی کابینہ میں رکھنے کا حکم دیا تھا۔
عدالت عالیہ نے اپنے تحریری فیصلے میں کہا تھا کہ پی ٹی اے ٹک ٹاک پر پابندی کا کوئی مناسب جواز پیش نہیں کر سکا، جب یہ تسلیم شدہ حقیقت ہے کہ ایک فیصد افراد ٹک ٹاک کاغلط استعمال کررہے ہیں تو سوشل میڈیا سائٹس پر پابندی حل نہیں، سوسائٹی میں تنزلی کی علامت کو سوشل میڈیا سائٹس پر موجود مواد سے نہیں ملایا جا سکتا، عالمی سطح پر ٹیکنالوجی کی غیر معمولی ترقی سوسائٹی میں بہت سے چیلنج سامنے لائی ہے۔

سرینگر(ویب ڈیسک)ایسے واقعات دنیا بھر میں ہوتے رہتے ہیں کہ دوران پرواز جہاز،چھوٹے طیارے اور ہیلی کاپٹر گر کر تباہ ہوجاتے ہیں،ایسی صورت میں بچنا کسی معجزے سے کم نہیں ہوتا،مقبوضہ کشمیر میں بھارتی فوج کا ہیلی کاپٹر پہاڑی علاقے میں گر کر تباہ ہوگیا جس کے نتیجے میں 2 پائلٹس ہلاک ہوگئے۔
بھارتی میڈیا کے مطابق مقبوضہ کشمیر کے علاقے اودھم پور میں بھارتی فوج کا ہیلی کاپٹر گر کر تباہ ہوگیا جس کے نتیجے میں 2 پائلٹس زخمی ہوگئے تھے۔ زخمیوں کو قریبی اسپتال منتقل کیا گیا تاہم دوران دونوں پائلٹس دم توڑ گئے۔
ترجمان بھارتی فوج نے بتایا کہ زخموں کی تاب نہ لاکر ہلاک ہونے والے پائلٹس میجر رینک کے افسران تھے جن کی شناخت میجر روہت کمار اور میجر انوج راجپوت کے نام سے ہوئی ہے۔ حادثے کی تحقیقات کے لیے انکوائری کمیٹی تشکیل دیدی گئی ہے۔ترجمان بھارتی فوج کا مزید کہنا تھا کہ آج صبح مقبوضہ کشمیر کے ضلع اودھم پور میں حادثے کا شکار ہونے والا ہیلی کاپٹر تربیتی مشق پر مامور تھا۔ حادثہ ممکنہ طور پر دھند کی وجہ سے پیش آیا ہے تاہم حتمی بات انکوائری کمیٹی کی رپورٹ کے بعد ہی کہی جا سکتی ہے۔

لاہور(ویب ڈیسک) پنجاب یونیورسٹی انتظامیہ نے ہاسٹل میں کارروائی کی.تفصیلات کے مطابق پنجاب یونیورسٹی انتظامیہ کی جانب سے ہاسٹلز میں غیرقانونی الاٹمنٹ کےخلاف کارروائی کی.جس کے بعد ہاسٹل کے بلوچ کونسل طلباء نے کمرہ خالی کرانے اوربرے رویئے کےخلاف وی سی آفس کے باہر احتجاجی دھرنا دیا۔ بلوچ کونسل طلباء نے وائس چانسلر آفس کے باہر یونیورسٹی انتظامیہ کےخلاف نعرے بازی کی.طلبا کا اس حوالے سے کہنا تھا کہ چیف سیکیورٹی آفیسر کا رویہ نامناسب تھا اس لیے ان کےخلاف احتجاج کر رہے ہیں . ہاسٹل انتظامیہ کا اس سلسلے میں کہنا تھا کہ بلوچ طلباء ہاسٹل نمبر 1 کمرہ نمبر 3 میں ڈگری مکمل ہونے کے باوجود رہائش پذیرہیں اس لیے کمرہ خالی کرایا گیا.یونیورسٹی انتظامیہ کا مزید کہنا تھا کہ یونیورسٹی اور ہاسٹلز میں غیرقانونی عناصر کو برداشت نہیں کیا جائے گا۔

اسلام آباد (ویب ڈیسک) نیوزی لینڈ بورڈ نے پاکستان سیریز سیکیورٹی کا بہانہ بنا کر منسوخ کر دیا اور اب انگلینڈ کی ٹیم بھی پاکستان کا دورہ نہیں کر رہی .اس سلسلے میں مختلف بیانات سامنے آ رہے ہیں .علاوہ ازیں پی سی بی اور شائقین کی جانب سے مایوسی اورغصے کا اظہار کیا جارہاہے.اس حوالے سے وفاقی وزیر اطلاعات و نشریات فواد چودھری کا کہنا ہے کہ نیوزی لینڈ اور انگلینڈ کے دوروں کی منسوخی سے پی ٹی وی کو کروڑوں کا نقصان ہوا.ان کا مزید کہنا تھا کہ دونوں بورڈز کے خلاف قانونی کارروائی کیلئے وکلا سے مشورہ کریں گے۔ ان خیالات کا اظہار انہوں نے ایک ٹویٹ کی ذریعے کیا.انہوں نے ٹویٹ میں لکھا کہ پاکستان کیخلاف ایک مخصوص بین الاقوامی لابی مصروف عمل ہے ، ہمیں جھکانے کی خواہش کبھی کامیاب نہیں ہوگی، یہ غلط فہمی جلد دور کر لیں۔

ممبئی (ویب ڈیسک)فحش فلموں کے کیس میں ملوث راج کندرا کے حوالے سے نیا انکشاف سامنے آیا ہے.اگرچہ راج کندرا کو کیس میں ضمانت پر رہا کیا جا چکا ہے مگر ان کے بارے میں ممبئی کرائم برانچ نے بڑا انکشاف کرتے ہوئے کہا ہے کہ راج کندرا 119 فحش فلموں اور ویڈیوز کو 9 کروڑ روپے میں فروخت کرنے کی منصوبہ بندی کررہے تھے۔تفصیلات کےمطابق بھارتی ذرائع ابلاغ کا کہنا ہے کہ یہ فحش ویڈیو راج کندرا کے الیکٹرانک آلات جیسے موبائل، ٹیبلیٹ اور ہارڈ ڈرائیو ڈسک سے برآمد ہوئی ہیں جو وہ مبینہ طور پر 9 کروڑ روپے میں فروخت کرنے کی منصوبہ بندی کررہے تھے۔