Tag cricket

لاہور (میڈیا 92 نیوز آن لائن ) آئی سی سی کرکٹ ورلڈ کپ کے وارم اپ میچ میں آسٹریلیا نے انگلینڈ کو 12رنز سے شکست دے دی۔ سائوتمھپٹن میں کھیلے گئے وارم اپ میچ میں انگلینڈ کی ٹیم 298 رنز کا ٹارگیٹ حاصل نہ کرپائی اور ان کی پوری ٹیم 49 اعشاریہ 3 اوورز میں 285 رنز بناکر آئوٹ ہوگئی۔

انگلینڈ کی طرف سے جیمس ونس نے 64 رنز اور جوس بٹلر 52 رنز کے ساتھ نمایاں بیسٹمین رہے ۔ اس سے قبل اسٹیو اسمتھ کے 116 رنز کی بدولت آسٹریلیا نے مقررہ 50 اوورز میں 9 وکٹوں کے نقصان پر 297 رنز بنائے تھے۔ آسٹریلیا کے بلے باز اسٹیو اسمتھ 102 گیندوں پر 8 چوکوں اور 3 چھکوں کی مدد سے 116 رنز بنائے جبکہ ڈیوڈ وارنر 43، عثمان خواجہ 31 جبکہ شان مارش اور ایلیکس کیری نے 30، 30 رنز کی اننگز کھیلی۔ انگلینڈ کی طرف سے پلنکیٹ سب سے کامیاب بولر رہے، انہوں نے 69 رنز دے تین وکٹیں حاصل کیں۔ مارک ووڈ، ٹام کرن اور ڈاؤسن نے ایک، ایک کھلاڑی کو آؤٹ کیا۔

لاہور:(ایمرا نیوزآن لائن) چیف سلیکٹر انضمام الحق کا کہنا ہے کہ ٹیم کا فائٹ بیک کرنا خوش آئند ہے، اسپنر شاداب خان کی رپورٹس مثبت آئی ہیں، امید ہے ورلڈ کپ سے قبل فٹ ہوجائیں گے، محمد حفیظ بھی فٹ ہیں اور جلد ایکشن میں دکھائی دیں گے۔لاہور پریس کلب میں پولیو کے خلاف جنگ کے حوالے سے سیمینار میں شرکت کے بعد میڈیا سے بات کرتے ہوئے انضمام الحق نے کہا کہ ہم میچ تو نہیں جیت سکے لیکن 373 رنز بننے کے باوجود گرین شرٹس نے جس عمدگی کے ساتھ کم بیک کیا ہے، یہ بڑی خوش آئند بات ہے، پلیئرزنے زبردست فائٹ کی ہے، عممومی طورپراتنے بڑے ہدف پر ٹیم کا مورال گرجاتا ہے لیکن پاکستانی ٹیم نے شاندار مقابلہ کیا ،یہ اچھی علامت ہے، چیف سلیکٹر نے امید ظاہر کی کہ جس طرح پاکستانی ٹیم نے دوسرے میچ میں عمدہ کھیل پیش کیا، اس کے بعد گرین شرٹس کو سیریز کا تیسرے میچ جیتنا چاہیے، دوسروں کی طرح میری بھی خواہش ہے کہ پاکستان جیت کر ورلڈ کپ کا حصہ بنے۔

چیف سلیکٹر نے کہا کہ ابھی سیریز کے تین اور میچز ہیں، ان میں دیکھیں گے کہ آگے کیا کرنا ہے، ویسے تو ورلڈ کپ کے لیے ٹیم کا اعلان کر رکھا ہے، اگر کوئی کھلاڑی اچھی کارکردگی دکھاتا ہے تو ورلڈ کپ کے حتمی اسکواڈ میںاس کے نام پر ضرور غور کریں گے لیکن کسی بھی کھلاڑی کے بارے میںا بھی کوئی رائے دینا قبل ازوقت ہوگا۔انضمام الحق نے کہا کہ اسپنر شاداب خان کی اب تک کی رپورٹس بہت مثبت ہیں، آئندہ دو چار روز میں ان کے مزید ٹیسٹ ہو نگے، امید ہے ورلڈ کپ سے قبل شاداب خان مکمل فٹ ہو جائیں گے،ایک اور سوال پر انضمام الحق نے کہا کہ محمد حفیظ نے پاکستان میں ہی بیٹنگ اور بولنگ شروع کردی تھی، میری رپورٹس کے مطابق محمدحفیظ فٹ ہیں، وہ جلد ایکشن میں دکھائی دے گا۔

لاہور:(ایمرا نیوزآن لائن) لڑکھڑاتی ٹاپ آرڈربیٹنگ پاکستان کی تشویش بڑھانے لگی تاہم مینجمنٹ ساؤتھمپٹن میں ٹیم سے بہتر کارکردگی کی خواہاں ہے۔پاکستان اور انگلینڈ کے مابین اوول، لندن میں کھیلا گیا ون ڈے سیریز کا پہلا میچ بارش کی نذر ہوا، مہمان ٹیم کی بیٹنگ لائن میں روایتی عدم استحکام کو دیکھتے ہوئے میزبان کپتان نے پہلے بولنگ کا فیصلہ کیا جو درست بھی ثابت ہوا، گرین شرٹس نے ابتدا میں ہی 2 اہم بیٹسمینوں کی وکٹیں گنوا دیں۔جارح مزاج اوپنر فخرزمان اور ٹیم کے سب سے کامیاب بیٹسمین بابر اعظم ترنوالہ ثابت ہوئے، بعد ازاں رم جھم کے دوران وقفوں میں امام الحق اور حارث سہیل نے ٹوٹل19اوورز میں 80تک پہنچایا تھا کہ ایک بار پھر موسم کی مداخلت پر کھیل ختم کرنا پڑا، ہفتے کو ساؤتھمپٹن میں ہونے والے دوسرے میچ میں بہتر آغاز اور اچھے رن ریٹ کیلیے ایک بار پھر فخرزمان پاکستان کی امیدوں کا مرکز ہوں گے۔

امام الحق سے ایک اینڈ سنبھالے رکھنے کی توقعات وابستہ ہیں،بڑے اسکور کیلیے بابر اعظم کا کردار ہمیشہ اہم ہوتا ہے،حارث سہیل کی ثابت قدمی آنے والے بیٹسمینوں پر دباؤکم کرنے کا ذریعہ بنے گی،کپتان سرفراز احمد کو رن ریٹ بہتر رکھنے کی ذمہ داری اٹھانا ہوگی۔نجی مسائل کی وجہ سے رخصت پر جانے والے شعیب ملک نے اگرچہ اسکواڈ کو جوائن کرلیا لیکن پلیئنگ الیون میں شمولیت کا فیصلہ پچ دیکھنے کے بعد ہوگا،یہ فیصلہ بھی باقی ہے کہ اگر آل راؤنڈر کو ٹیم میں لیا گیا تو کس کو جگہ خالی کرنا پڑے گی۔مینجمنٹ آصف علی کو انگلینڈ کیخلاف میچز کھلا کر پاورہٹنگ میں صلاحیتیں آزمانا چاہتی ہے، اس لیے انھیں باہر بٹھانے کا جواز نہیں بنتا، عماد وسیم نے انگلینڈ میں اب تک اچھا پرفارم کیا ہے،ان کی آل راؤنڈ کارکردگی ٹیم کیلیے اہمیت کی حامل ہوگی،بے نتیجہ میچ میں پاکستان ورلڈکپ میں شرکت کے امیدوار محمد عامر کی صلاحیتیں بھی نہیں جانچ پایا،اب پھر پیسر کیلیے ایک اچھا موقع ہوگا، فہیم اشرف، حسن علی اور شاہین شاہ آفریدی کو پیس بیٹری میں شامل رکھے جانے کا امکان ہے۔

دوسری جانب انگلینڈ کی جانب سے پلیئنگ الیون کے ساتھ چھیڑ چھاڑ نہ کیے جانے کا امکان ہے،ورلڈکپ سے قبل آزمائشی دور سے گزرنے والے جوفرا آرچر نے بارش سے متاثرہ میچ میں بہترین بولنگ کرتے ہوئے 4اوورز میں صرف 6رنز دے کر ان فارم بیٹسمین فخرزمان کا شکار کیا تھا،نوجوان پیسر ایک بار پھر توجہ کا مرکز ہوں گے،جونی بیئراسٹو نے 2سال قبل ساؤتھمپٹن میں اپنا آخری میچ کھیلتے ہوئے 114گیندوں پر ناقابل شکست 141رنز بنائے تھے جو ان کی سب سے بڑی انفرادی اننگز بھی ہے۔اس میچ میں انگلینڈ نے ویسٹ انڈیز کیخلاف288رنز کا ہدف 12اوورز قبل ہی حاصل کرلیا تھا،کپتان ایون مورگن بھی بھرپور فارم میں ہیں، جوئے روٹ اور جارح مزاج جوز بٹلر بیٹنگ میں استحکام کی علامت ہوں گے، کرس ووئیکس اور لیام پلنکٹ پیس اور عادل رشید اسپن بولنگ کی بدولت ہوم کنڈیشنز میں بیٹسمینوں کیلیے پریشانی کا باعث بنیں گے۔ دوسرے ون ڈے کے دوران بادلوں کا آنا جانا لگا رہے گا لیکن تھوڑی بہت رم جھم سے کھیل متاثر ہونے کا امکان کم ہے۔گزشتہ روز پاکستانی کرکٹرز نے بھرپور پریکٹس کرتے ہوئے اپنی صلاحیتوں کو نکھارنے پرکام کیا،ٹاپ آرڈر نے تیز اور باؤنسی گیندوں کا سامنا کیا تو بیٹنگ کوچ گرانٹ فلاور بڑے انہماک سے کارکردگی کا جائزہ لیتے اور غلطیوں کی نشاندہی کرتے رہے،پیسرز نے بھی کنڈیشنز کے بہتر استعمال کیلیے تیاریاں مکمل کرلیں، میچ فٹنس حاصل کرنے کیلیے کوشاں محمد حفیظ اور شعیب ملک نیٹ میں بیٹ سے گرد جھاڑنے کیلیے کوشاں نظر آئے۔

کراچی(ایمرا نیوزآن لائن) پاکستان کرکٹ ٹیم کے سابق کپتان شاہد آفریدی کا کہنا ہے کہ سرفراز جتنا اوپر کے نمبروں پر بیٹنگ کریں گے اسکا ٹیم کو فائدہ ہوگا، وہ جارح مزاج اور مثبت پلیئر ہیں، امید ہے ورلڈ کپ میں ٹیم کو اچھی طرح لیڈ کریں گے۔کراچی میں میڈیا سے بات کرتے ہوئے شاہد آفریدی نے کہا کہ انہیں امید ہے کہ سرفراز احمد ورلڈ کپ میں اچھے نتائج دیں گے۔

آفریدی کا کہنا تھا کہ بڑے ایونٹ میں پلیئرز کو محنت کرنا ہوگی کیوں کہ ون ڈے فارمیٹ میں ٹیم کو ہمیشہ مشکل ہوئی ہے لیکن ٹیم میں صلاحیت ہیں کہ وہ ٹاپ فور میں جگہ بنائیں ۔سابق آل راؤنڈر نے کہا کہ انہوں نے ہمیشہ وہاب ریاض اور عامر کی حمایت کی، انہیں ٹیم میں ہونا چاہئے۔

لندن: (ایمرا نیوزآن لائن) پاکستان اور انگلینڈ کی ٹیمیں لندن سے ساؤتھمپٹن پہنچ گئیں، شاہین آج پریکٹس سیشن میں خوب پسینہ بہائیں گے، پانچ میچز کی سیریز کا دوسرا ون ڈے کل کھیلا جائے گا۔ورلڈ کپ کی تیاری، انگلش سرزمین پر پاک انگلینڈ ون ڈے سیریزجاری ہے۔ لندن میں اوول کا میدان بارش کے نام رہا۔ کل (ہفتے کو) دوسرا ون ڈے ساؤتھمپٹن میں سہ پہر تین بجے شیڈول ہے۔شاہین آج پریکٹس کے دوران بولنگ، بیٹنگ اور فیلڈنگ کی خامیوں پر قابو پانے کی کوشش کریں گے۔ انگلش ٹیم بھی مہمان سائیڈ سے دودو ہاتھ کرنے کو تیار ہے۔گرین شرٹس نے اوول ون ڈے کی حتمی الیون برقرار رکھنے کا فیصلہ کیا ہے، ساؤتھمپٹن میں دونوں ٹیمیں تین بار آمنے سامنے ہوئیں۔ دو میں انگلینڈ اور ایک میچ میں پاکستان فاتح رہا۔

لاہور:(ایمرا نیوزآن لائن) ورلڈکپ سے قبل گرین شرٹس کی کارکردگی میں عدم تسلسل کا خوف مکی آرتھرکو ستانے لگا۔برطانوی چینل ’’اسکائی اسپورٹس ‘‘ کو ایک انٹرویو میں پاکستان کرکٹ ٹیم کے ہیڈ کوچ مکی آرتھر نے کہاکہ2سال قبل انگلینڈ میں ہی چیمپئنز ٹرافی فتح کی یادیں آج بھی تازہ ہیں،گرین شرٹس نے شاندار انداز میں مشن مکمل کیا،وہ پاکستان کرکٹ کے حیران کن 3ہفتے تھے،توقعات کے برعکس ہم ایک مضبوط ٹیم بن کر ابھرے،اس کے بعد بھی مسلسل مزید استحکام کیلیے کام کیا ہے۔

ایک سوال پر انھوں نے کہا کہ میری سب سے بڑی تشویش کارکردگی میں تسلسل کے حوالے سے ہے۔ نوجوان ٹیموں میں اس طرح کے مسائل ہوتے ہیں،ہم چیمپئنز ٹرافی میں درست ٹریک کی جانب گامزن ہوئے،ٹی ٹوئنٹی میں کارکردگی غیر معمولی رہی،مضبوط حریفوں کیخلاف مشکل کرکٹ میں بھی تاثر چھوڑا،آسٹریلیا کیخلاف سیریز میں 8اہم کھلاڑیوں کو آرام دیا اور ’’بی‘‘ ٹیم کے ساتھ کھیلے جس کی سخت ضرورت بھی تھی۔انہوں نے کہا کہ مسلسل کرکٹ کی وجہ سے جنوبی افریقہ اور انگلینڈ کی ٹیموں کے بھی ورلڈکپ سے قبل فٹنس مسائل سامنے آئے ہیں،اس سے ظاہر ہوتا ہے کہ کینگروز کیخلاف ہوم سیریز میں کھلاڑیوں کو آرام دینے کا ہمارا فیصلہ غلط نہیں تھا،ہمارا مقصد تھا کہ ورلڈکپ میں تازہ دم،سپر فٹ، مضبوط اور مستعد کھلاڑیوں پر مشتمل اسکواڈ کے ساتھ میدان میں اتریں،ویسٹ انڈیز کیخلاف میچ سے اپنی مہم کا آغاز کریں تو کوئی مسائل نہ ہوں۔

مکی آرتھر نے کہا کہ گرین شرٹس کی بیٹنگ اور بولنگ میں مہارت بہترین لیکن فیلڈنگ اور فٹنس پر کام کرنے اوربہتری لانے کی ضرورت تھی، فیلڈرز نے کئی بار جہاں ایک رن بنتا تھا2دیے، یا2کے بجائے3رنز بن گئے،مجموعی طور پر ہر اننگز میں 20سے 30رنز زیادہ بنے جس کا نتائج پر بھی اثر پڑا، ہم نے فٹنس میں بہتری کیلیے کام کیا، اس وقت ہمارے ڈریسنگ روم میں چند کھلاڑی جونٹی رہوڈز تو نہیں لیکن سپر فٹ اور اچھے فیلڈرز ضرور ہیں، 2 سال کی محنت کے ثمرات نظر آنے لگے ہیں۔انھوں نے کہا کہ امید ہے کہ محمد عامر اپنی اصل فارم میں واپس آجائیں گے،چیمپئنز ٹرافی کے بعد پیسر نے رنز تو زیادہ نہیں دیے، اکانومی ریٹ 4.7بُرا نہیں،وہ حیران کن مہارت رکھنے والے بولر ہیں،ہم چاہتے ہیں کہ محمد عامر تسلسل کے ساتھ وکٹیں حاصل کریں،کسی بھی حریف کو محدود رکھنے کیلیے وکٹوں کا حصول ضروری ہے،دوسری جانب ہمیں حیران کن ٹیلنٹ میسر آیا ہے، 19سال عمر کے شاہین شاہ آفریدی اور محمد حسنین کو عالمی معیار کی بولنگ کرتے دیکھنا بڑا ہی خوشگوار تجربہ ہوتا ہے،دونوں طویل عرصے تک پاکستان کرکٹ کی خدمت کریں گے۔مکی آرتھر نے کہا کہ پی ایس ایل نوجوان کرکٹرز کو سخت مقابلوں اور مشکل صورتحال میں ڈٹ کر مقابلہ کرنے کا ہنر سکھاتی اور ڈومیسٹک کرکٹ سے ایک قدم آگے بڑھتے ہوئے عالمی معیار کی کرکٹ کھیلنے کا موقع ملتا ہے،قومی ٹیموں کیلیے اسٹارز دباؤ سے بھرپور میچز میں ہی تیار کیے جا سکتے ہیں۔

لاہور(ایمرا نیوزآن لائن) کرکٹ آسٹریلیا نے اس سال پاکستان کے خلاف کھیلی جانے والی ٹیسٹ اور ٹی ٹوئنٹی سیریز کے شیڈول کا اعلان کردیا۔پاکستان اور آسٹریلیا کے درمیان سیریز نومبر میں کھیلی جائے گی، سیریز میں دو ٹیسٹ اور تین ٹی ٹوئنٹی انٹرنیشنل میچز کھیلے جائیں گے۔شیڈول کے مطابق پاکستان کرکٹ ٹیم آسٹریلیا میں 3 ٹی 20 میچز 3، 5 اور 8 نومبر کو کھیلے گی جبکہ پہلا ٹیسٹ 21 نومبر سے برسبین میں کھیلا جائے گا۔پاکستان اور آسٹریلیا کے درمیان 29 نومبر سے ہونیوالا ایڈیلیڈ ٹیسٹ ڈے اینڈ نائٹ ہوگا۔

لاہور:(ایمرا نیوزآن لائن) ممتاز آل راؤنڈر عبدالرزاق نے ورلڈ کپ اسکواڈ کا حصہ بننے والے کھلاڑیوں کو مفید مشوروں سے نواز دیا، ان کا کہنا ہے کہ پلیئرز کو یہ بات ذہن نشین کر لینی چاہیے کہ یہ عام ٹورنامنٹ ہے اور نہ ہی دبئی میں شیڈول کوئی چھوٹی سیریز ہے ،پلیئرز سب سے پہلے پاکستان بعد میں اپنی ذات کے بارے میں سوچیں گے تو کامیابی یقینی ہے، پی ایس ایل صرف ٹوئنٹی20 ہی گیم ہے، اس طرز کی کرکٹ سے ٹیموں کے انتخاب کا طریقہ کار تبدیل ہونا چاہیے۔ڈپارٹمنٹ کرکٹ کی وجہ سے پلیئرز کے ساتھ اس کھیل کی بھی پروموشن کافی اچھی ہوتی ہے تاہم بورڈ تبدیل ہوا ہے،عمران خان کا یہ فیصلہ ہے،اس کو تھوڑا وقت ضرور دینا چاہیے، میرا مشن اور خواہش یہی ہے کہ کرکٹ کے بعد اب کوچنگ میں نام کماؤں.

ٹیسٹ کرکٹر عبدالرزاق کا کہنا تھا کہ پوری قوم کی طرح ہم بھی یہی چاہتے ہیں کہ پاکستانی ٹیم ورلڈ کپ کے دوران اچھا پرفارم کرے اور یہ عالمی کپ جیت کر آئے، سلیکٹرز نے میگا ایونٹ کے لیے پلیئرز کا اچھا کمبی نیشن بنایا ہے، پلیئرز کو یہ بات ذہن نشین کر لینی چاہیے کہ یہ ورلڈ کپ ہے، اس طرح کے میگا ایونٹس میں کھلاڑیوں پر پریشر بہت زیادہ ہوتا ہے، ہمیں چاہیے کہ ہم پاکستان کے لیے کھیلیں، پی ایس ایل صرف ٹوئنٹی ٹوئنٹی ہی ہے، میں سمجھتا ہوں کہ کھلاڑیوں کے انتخاب کا طریقہ کار تبدیل ہونا چاہیے۔عبدالرزاق نے کہا کہ تینوں طرز کی کرکٹ میں کپتان بس ایک ہی ہونا چاہیے، ٹیم بھی ایک ہی ہونی چاہیے تاہم فارمیٹ کو دیکھتے ہوئے دو، تین تبدیلیاں کرنے میں بھی کوئی حرج نہیں، ڈپارٹمنٹ کرکٹ ختم کرنے کے سوال پرعبدالرزاق نے کہا کہ گو ڈپارٹمنٹ کرکٹ کی وجہ سے پلیئرز کے ساتھ اس کھیل کی بھی پروموشن کافی اچھی ہوتی ہے تاہم بورڈ تبدیل ہوا ہے،عمران خان کا یہ فیصلہ ہے،اس کو تھوڑا وقت دینا چاہیے، اگر چیئرمین پی سی بی نے مشورہ مانگا تو ضرور تجاویز دوں گا، میرا مشن اور خواہش یہی ہے کہ کرکٹ کے بعد اب کوچنگ میں نام کماؤں،چاہتا ہوں کہ گراس روٹ سے کوچنگ شروع کروںاور انڈر9سے لیکر انڈ17 تک جاؤں۔

لاہور: (ایمرا نیوزآن لائن) شاہد آفریدی نے اپنی سوانح حیات ‘گیم چینجر’ میں یونس خان کیخلاف 2009 میں ہونیوالی بغاوت کا راز بھی فاش کر دیا۔سابق آل راؤنڈر نے انکشاف کیا کہ ایک سینئر بیٹسمین نے یونس خان کیخلاف بغاوت کی اور چیمپئنز ٹرافی کے دوران دیگر کھلاڑیوں کو بھی اکسایا جس کا ساتھ دینے والوں میں رانا نوید الحسن، شعیب ملک اور سعید اجمل بھی شامل تھے۔شاہد آفریدی نے زندگی کا دردناک ترین واقعہ بیان کرتے ہوئے لکھا کہ ایک بار کاروباری نقصان کی وجہ ہم نے اپنا گھر بیچنے کا بھی سوچ لیا تھا۔

ادھر شاہد آفریدی کی گیم چینجر آپ بیتی کتاب آج کھل جائے گی، لیجنڈری جاوید میانداد اور وقار یونس کی کوچنگ پر بوم بوم بیان داغنے، شعیب ملک کے چھکے چھڑانے اور فکسرز کو آل آؤٹ کر دینے کے علاوہ کیا ہے، سب سامنے آ جائے گا، تنازعات بھری اننگز نے کرکٹ دیوانوں کو بے قرار کر دیا۔

لاہور:(ایمرا نیوزآن لائن) دورۂ انگلینڈ کے ابتدائی معرکوں میں پاکستانی ہتھیاروں کی جانچ مکمل ہو گئی جب کہ بیشتر تیر نشانے پر بیٹھنے سے مینجمنٹ نے سکھ کا سانس لے لیا۔میزبان ٹیم سے سیریز اور ورلڈکپ کی تیاریوں کیلیے قبل ازوقت انگلینڈ پہنچنے والی پاکستان ٹیم فٹنس اور دیگر مسائل سے پیچھا چھڑانے میں ناکام رہی ہے، شاداب خان خطرناک وائرس کا شکار ہونے کی وجہ سے زیر علاج ہیں، محمد حفیظ ہاتھ کا کامیاب آپریشن کرانے کے بعد بحالی فٹنس کیلیے کوشاں ہیں، شعیب ملک پہلا پریکٹس میچ کھیلنے کے بعد نجی مسائل کی وجہ سے 10دن کی رخصت پر چلے گئے۔ اس کے باوجود پاکستان نے تینوں پریکٹس میچز میں اچھی کارکردگی کا مظاہرہ کرتے ہوئے کامیابی حاصل کی۔

سب سے خوش آئند بات یہ ہے کہ آسٹریلیا سے سیریز میں آرام کرنے والے کھلاڑی بھی تسلسل کے ساتھ پرفارم کررہے ہیں، فخرزمان نے کینٹ سے میچ میں76رنز بنانے کے بعد نارتھمپٹن شائر کیخلاف سنچری جڑ دی،دونوں ایک روزہ میچز کے بعد لیسٹر شائر سے ٹی ٹوئنٹی میں بھی انھوں نے 30گیندوں پر52کی اننگز کھیلی، چیمپئنز ٹرافی کے ہیرو کی حالیہ فارم پاکستان کیلیے باعث اطمینان بات ہے۔بابر اعظم پہلے میچ میں ڈبل فیگر تک نہیں پہنچ پائے، دوسرے میں 68پر ناقابل شکست رہے۔ ٹی ٹوئنٹی میں انھوں نے صرف 63گیندوں پر 101کی اننگز کھیلی،عماد وسیم نے پہلے ون ڈے میں جارحانہ 117رنز بناکر ٹیم کا ٹوٹل 7وکٹ پر 358تک پہنچانے میں اہم کردار ادا کیا تھا،حارث سہیل نے بھی 75کی اننگز کھیلی۔نارتھمپٹن شائر کیخلاف امام الحق 71رنز بنانے میں کامیاب ہوئے،حیران کن طور پر ٹی ٹوئنٹی میچ میں بھی ان کو شامل کیا گیا جبکہ عابد علی کوابھی تک صرف پانی پلانے تک محدود رکھا گیا ہے۔ آصف علی تیسرے میچ میں موقع ملنے پر 22کی اننگز کھیل سکے،مجموعی طور پر بیٹنگ لائن کی کارکردگی حوصلہ افزا ہے۔بولرز میں حسن علی،فہیم اشرف،شاہین شاہ آفریدی،محمد عامر اور محمد حسنین پیس اور باؤنس کا فائدہ اٹھاتے نظر آئے،جیند خان نے ایک میچ میں حصہ لیا اور 79رنز دے کر ایک شکار کیا، شاداب خان کی بیماری کے سبب اچانک اسکواڈ میں شامل کیے جانے والے یاسر شاہ کو ایک میچ میں 90اور دوسرے میں 61رنزکی پٹائی برداشت کرنا پڑی،وہ ٹی ٹوئنٹی میچ کیلیے ٹیم میں جگہ بنا سکے۔

محدود اوورز کی کرکٹ میں یاسر کی فارم منیجمنٹ کیلیے باعث تشویش ہے تاہم عماد وسیم نے بہت کفایتی بولنگ کرتے ہوئے وکٹیں بھی حاصل کی ہیں،خدشہ یہی ہے کہ محمد حفیظ 5مئی کو انگلینڈ سے واحد ٹی ٹوئنٹی کے بعد 2ون ڈے میچز کیلیے بھی دستیاب نہیں ہوں گے،شعیب ملک بھی پہلے ایک روزہ میچ سے قبل ٹیم کو جوائن نہیں کرسکیں گے۔اس صورت میں پاکستان کو یاسر شاہ کا جوا کھیلنے یا پھر حارث سہیل اور فخرزمان جیسے پارٹ ٹائم بولرز کا سہارا لینا ہوگا۔دریں اثناء انگلینڈ سے واحد ٹی ٹوئنٹی میچ کیلیے گرین شرٹس گزشتہ روز بذریعہ بس 3گھنٹے کا سفر طے کرکے لیسٹر سے کارڈف پہنچ گئے، پلیئرزجمعے کو صبح ساڑھے 9سے ساڑھے 12بجے تک پریکٹس سیشن میں صلاحیتیں نکھارنے کی کوشش کریں گے۔