Tag انڈیا

ممبئی(میڈیا نائن ٹو ڈاٹ ٹی وی)20 سالہ بھارتی دوشیزہ مانوشی چھیلر نے دنیا کی حسین ترین خاتون کا تاج سر پر سجانے کے ساتھ دنیا بھر کی توجہ اپنی جانب مبذول کروالی ہے لیکن میک اپ کے بغیر ان کی تصاویر سوشل میڈیا پر وائرل ہوگئی ہیں۔
گزشتہ ہفتے چین کے شہر سائنا میں عالمی ملکہ حسن منعقد ہوا جس میں دنیا بھر کی 108 حسیناؤں نے حصہ لیا تاہم بھارت سے تعلق رکھنے والی 20 سالہ دوشیزہ مانوشی چھیلر اپنے حسن کے باعث یہ مقابلہ جیت گئیں۔
مانوشی چھیلر نے مس ورلڈ کا تاج اپنے سر پر کیا سجایا پوری دنیا ان کے حسن کی دیوانی ہوگئی جب کہ مانوشی نے راتوں رات بھارتی میڈیا پر ایسا قبضہ جمایا کہ بھارتی صحافی اور رپورٹرز کترینہ، پریانکا کو بھول گئے اب ہر طرف صرف مانوشی چھیلر کے چرچے ہی جاری ہیں۔
حسینہ عالم کا تاج سر پر سجانے والی کم سن مانوشی کا تعلق بھارتی ریاست ہریانہ سے ہے اور وہ میڈیکل کی طالبعلم ہیں۔ مانوشی کے والدین بھی ڈاکٹری کےمعتبر پیشے سے وابستہ ہیں۔
مس ورلڈ کے مقابلے کے دوران بھی انہوں نے جج کے سوال کے جواب میں کہا تھا کہ وہ اپنی والدہ سے بےحد متاثر ہیں ان کی والدہ ڈاکٹر ہیں اور وہ بھی اسی پیشے سے وابستہ ہونے کا ارادہ رکھتی ہیں اورلوگوں کی خد مت کرنا چاہتی ہیں۔
مانوشی کی مس ورلڈ منتخب ہونے سے قبل کی چند تصاویر سوشل میڈیا پر جاری ہوئی ہیں جن میں وہ دنیا کی حسین ترین دوشیزہ کے بجائے ڈاکٹر کے لباس میں ملبوس بغیر میک اپ کے ایک عام سی لڑکی نظر آرہی ہیں۔ ان تصاویر میں مانوشی چھیلر اس مانوشی سے بالکل مختلف لگ رہی ہیں جس نے رواں سال کی سب سے حسین دوشیزہ کا خطاب حاصل کیا ہے۔ یہاں تک کہ انہیں عام سے حلیے میں پہچاننا بھی مشکل ہورہا ہے۔

ممبئی(میڈیا نائن ٹو ڈاٹ ٹی وی) بی جے پی رہنما نے دپیکا اور سنجے لیلا بھنسالی کے سر کی قیمت 10 کروڑ مقرر کرتے ہوئے رنویر سنگھ کی ٹانگیں توڑنے کی دھمکی ہے۔بھارتی فلم ’پدماوتی‘ کی ریلیز میں مشکلات ختم ہونے کے بجائے مزید بڑھتی جارہی ہیں، پہلے راجپوت برادری نے فلم کی ریلیز کی صورت میں پرتشدد رویہ اختیار کرنے اور دپیکا پڈوکون کو ناک کاٹنے کی دھمکی سمیت ہدایت کار سنجے لیلا بھنسالی کے سر کی قیمت 5 کروڑ بھی مقرر کی تھی، جس کے بعد سنسر بورڈ نے بھی فلم کے سرٹیفکیٹ کے لیے دی گئی درخواست کو فلم ساز کو واپس کردیا۔
گزشتہ روز فلم کو ریلیز کرنے والی پروڈکشن کمپنی ’’ویا کوم 18‘‘ نے خود ہی فلم کی ریلیز روکنے کا اعلان کیا تھا تاہم اب پی جے پی رہنما نے بی جے پی رہنما نے دپیکا پڈوکون اور سنجے لیلا بھنسالی کے سر کی قیمت 10 کروڑ مقرر کردی ہے جب کہ رنویر سنگھ کی ٹانگیں توڑنے کی بھی دھمکی دی ہے۔
بھارتی میڈیا کا کہنا ہے کہ ہریانہ سے تعلق رکھنے والے بی جے پی کے میڈیا کوآرڈینیٹر سورج پال امو نے اعلان کیا ہے کہ جو کوئی بھی دپیکا پڈوکون اور سنجے لیلا بھنسالی کا قتل کرے گا اس کو 10 کروڑ روپے انعام دیا جائے۔ صرف یہی نہیں بی جے پی رہنما نے مزید کہا کہ اداکار رنویر سنگھ نے ہدایت کار سنجے لیلا بھنسالی کی معاونت کی لہذا اگر انہوں اپنے الفاظ واپس نہیں لیے تو رنویر سنگھ کی ٹانگیں توڑ دی جائیں گی۔
بی جے پی رہنما سورج پال امو کے بیان پر بھارتی وزیراعظم نریندر مودی نے وضاحت طلب کرلی ہے۔ دوسری جانب مدھیا پردیش کے وزیراعلیٰ شوراج سنگھ چوہان نے ریاست میں فلم پدماوتی کی ریلیز پر پابندی لگاتے ہوئے کہا ہے کہ ریاست میں فلم کسی صورت ریلیز نہیں ہونے دی جائے گی۔

ممبئی(میڈیا نائن ٹو ڈاٹ ٹی وی)بھارت میں ہندو انتہا پسندوں کی جانب سے اداکارہ راکھی ساونت کو ’’پدماوتی‘‘ کی حمایت پر منہ کالا کرنے کی دھمکی دی گئی ہے۔بھارتی میڈیا کے مطابق فلم ’’پدماوتی‘‘ کی تیاری اور اس کی تشہیر میں کروڑوں روپے لگے ہیں اور اسے یکم دسمبر کو ریلیز کیا جانا تھا۔ لیکن اس کی کہانی پر ہندو انتہا پسندوں کے بڑھتے دباؤ کے بعد فلم کے ہدایت کار اور پروڈیوسر نے ’’پدماوتی‘‘ کی ریلیز فی الحال منسوخ کردی ہے لیکن اس معاملے پر تنازعات بڑھتے ہی جارہے ہیں۔
ایک جانب فلم کے حوالے سے تنازعات اس قدر بڑھ گئے ہیں کہ کچھ دن پہلے ایک ہندو انتہا پسند تنظیم نے اعلان کیا تھا کہ اگر فلم ’’پدماوتی‘‘ ریلیز ہوئی تو دپیکا کی ناک کاٹ دی جائے گی۔ دوسری جانب اداکاروں اور سماجی حلقوں کی جانب سے ہر سطح پر اس فلم کی بھر پور حمایت کی جارہی ہے۔ فلم کی حمایت کرنے والوں میں سلمان خان اور کرن جوہر جیسے بڑے نام بھی شامل ہیں۔
فلم کی حمایت کے لئے بالی ووڈ کی ان اہم شخصیات کی دیکھا دیکھی راکھی ساونت نے بھی سوشل میڈیا پر ایک ویڈیو جاری کردی جس میں انہوں نے ’’پدماوتی‘‘ کی حمایت میں بھاشن دے ڈالا، ان کا کہنا تھا کہ وہ ’’پدماوتی‘‘ کی ریلیز کے حوالے سے بہت پر جوش ہیں۔ سنجے لیلا بھنسالی نے ایک اچھی فلم بنائی ہے جس میں دپیکا پڈوکون نے اچھا کام کیا ہے اور شاہد کپور بھی بہت خوبصورت نظر آرہے ہیں، اس لیے وہ لوگوں سے اپیل کرتی ہیں کہ بھارت کے اندر اور بیرون ملک لوگوں کو اس کی حمایت کرنی چاہیے۔
راکھی کی ویڈیو کیا جاری ہوئی ان کی مشکلیں بڑھ گئیں، جس تنظیم نے دپیکا کی ناک کاٹنے کا اعلان کیا تھا اب اسی تنظیم نے راکھی کا منہ کالا کرنے کی دھمکی دے دی ہے۔

ممبئی(میڈیا نائن ٹو ڈاٹ ٹی وی) کرن جوہر نے اپنی نئی فلم ’’اسٹوڈنٹ آف دا ائیر 2‘‘کا پوسٹر جاری کردیا ہے جس میں ٹائیگر شیروف مرکزی کردار اداکررہے ہیں۔نامور بالی ووڈ فلمساز کرن جوہر کی 2012 کی بلاک بسٹر فلم ’’اسٹوڈنٹ آف دی ایئر‘‘ کو فلم بینوں نے بے انتہا پسند کیا تھا، فلم میں کرن جوہر نے 3 نئے نوجوان اداکاروں سدہارت ملہوترا، ورن دھون اور عالیہ بھٹ کو متعارف کرایا تھا اور مداحوں کی جانب سے تینوں نوجوان اداکاروں کی اداکاری کو بے حد سراہا گیا تھا۔
فلم کی بھرپور کامیابی کے بعد کرن جوہر نے ’’اسٹوڈنٹ آف دی ایئر‘‘ کا سیکوئل بنانے کا اعلان کیا جس میں مرکزی کردار کے لیے ٹائیگر شروف کو کاسٹ کیا گیا ہے، اب کرن جوہر نے ’’اسٹوڈنٹ آف دی ایئر2‘‘ کا پوسٹر بھی جاری کردیا ہے جس میں ٹائیگر شروف انتہائی مستی کے موڈ میں نظر آرہے ہیں جب کہ کرن جوہر نے کہا ہے کہ اب کالج نئے طالب علموں کے کھل گیا ہے۔
ابھی تک فلم ’’اسٹوڈنٹ آف دی ایئر‘‘ کے سیکوئل میں اداکار ٹائیگر شروف کے مدمقابل کسی بھی اداکارہ کو فائنل نہیں کیا گیا ہے اور فلم کی ہیروئن کے لیے نئے چہرے کی تلاش کا سلسلہ بھی جاری ہے تاہم فلم کس حد تک فلم بینوں کو متاثر کرنے میں کامیاب ہوگی یہ تو آنے والا وقت ہی بتائے گا۔

(میڈیا نائن ٹو ڈاٹ ٹی وی)
چین میں منعقدہ ’مس ورلڈ 2017‘ کے مقابلے میں بھارتی دوشیزہ منوشی چھلر نے متعدد ممالک کی حسیناؤں کو پیچھے چھوڑتے ہوئے اعزاز اپنے نام کرلیا۔

منوشی چھلر مس ورلڈ منتخب ہونے والی بھارت کی چھٹی لڑکی ہیں، جب کہ بھارت نے یہ عالمی اعزاز 17 سال بعد حاصل کیا۔اس سے قبل آخری بار بھارت کی جانب سے بولی وڈ اداکارہ پریانکا چوپڑا نے سال 2000 میں یہ اعزاز اپنے نام کیا تھا۔چین کے شہر سانیا میں ہونے والے مس ورلڈ کے 67 ویں مقابلے میں دنیا کے 118 ممالک کی حسینائیں شامل تھیں۔بھارت کی میڈیکل کی طالبہ 20 سالہ منوشی چھلر کا مقابلہ انگلینڈ، فرانس، کینیا اور میکسیکو کی حسیناؤں سے تھا۔

مس ورلڈ منتخب ہونے کے بعد 20 سالہ منوشی چھلر کو گزشتہ برس یہ اعزاز اپنے نام کرنے والی پورٹو ریکو کی حسینہ نے تاج پہنایا۔مقابلہ حسن میں جہاں بھارتی حسینہ نے دیگر دوشیزاؤں کو پیچھے چھوڑ کر اعزاز اپنے نام کیا، وہیں میکسیکو کی اینڈرا میزا فرسٹ رنر جب کہ انگلینڈ کی اسٹیفن ہل دوسری رنر اپ منتخب ہوئیں۔

ریاست ہریانہ سے تعلق رکھنے والی منوشی چھلر میڈیکل کی طالبہ ہیں، اور وہ بھارت کے دیہاتی علاقوں میں صحت و علاج کی مکمل سہولیات فراہم کرنے کا ارادہ رکھتی ہیں۔

ان کی جانب سے یہ اعزاز حاصل کیے جانے کے بعد بھارتی وزیر اعظم نریندر مودی اور سابق حسینہ پریانکا چوپڑا سمیت دیگر بھارتی اعلیٰ شخصیات نے انہیں مبارک باد پیش کی۔خیال رہے کہ بھارت کی جانب سے سب سے پہلے اداکارہ ایشوریا رائے نے 1994 میں مس ورلڈ کا اعزاز حاصل کیا تھا، جس کے 2 سال بعد 1996 میں بھارت کی ریتا فاریا مس ورلڈ منتخب ہوئی تھیں۔

حیران کن طور پر اگلے سال 1997 میں بھی بھارتی لڑکی ڈیانا ہیڈن مس ورلڈ منتخب ہوئیں، بھارت نے چوتھی بار یہ اعزاز 1999 میں حاصل کیا اور یکتا موکھی مس ورلڈ منتخب ہوئیں۔بھارت کی جانب سے آخری بار اداکارہ پریانکا چوپڑا 2000 میں مس ورلڈ منتخب ہوئی تھیں، جس کے 17 سال بعد منوشی چھلر نے یہ اعزاز حاصل کیا ہے۔

ممبئی(M92) سپراسٹار شاہ رخ خان صرف بالی ووڈ کے نہیں بلکہ دلوں کے بھی بادشاہ ہیں اور فلموں کے علاوہ لوگوں کے دلوں پر حکمرانی کرنا بھی خوب جانتے ہیں۔کروڑوں دلوں کی دھڑکن اوربھارتی فلم انڈسٹری کے کنگ شاہ رخ خان کہنے کو تو شوبز انڈسٹری پر راج کرتے ہیں لیکن ان کا دل بالکل بچوں کی طرح نرم ہے جو صرف دوسروں کی مدد کرنا جانتا ہے۔ شاہ رخ خان اپنے آس پاس موجود لوگوں خاص طورپرخواتین کی بہت عزت کرتے ہیں اور بچوں سے بے انتہا محبت کرتے ہیں جب کہ بچے بھی کنگ خان کو بے حد پسند کرتے ہیں یہ کہنا غلط نہ ہوگا کہ شاہ رخ خان کے پرستاروں میں خواتین اور بچوں کی تعداد مردوں کے مقابلے میں زیادہ ہے۔
گزشتہ روز بچوں کے عالمی دن کے موقع پر جہاں بالی ووڈ کے دیگر اداکاروں نے اپنے اپنے بچپن کی یادگارتصاویر شیئر کرکے سوشل میڈیا پرتمام لوگوں کو اس دن کی مبارکباد دی وہیں شاہ رخ خان نے یہ دن بالکل منفرد انداز میں غریب بچوں کے ساتھ منایا۔ بھارتی میڈیا کے مطابق شاہ رخ خان نے گزشتہ روز100 غریب بچوں کو اپنی فلم کے سیٹ پر مدعو کیا اور پورا دن ان کے ساتھ گزارا، اپنے سامنے بالی ووڈ کے بادشاہ شاہ رخ خان کو دیکھ کر بچوں کی خوشی دیدنی تھی۔
انہوں نے بھی کنگ خان کے ساتھ مل کر خوب ہلاگلا کیا اور اس دن کو یاد گار بنایا۔ شاہ رخ خان نے بچوں کے ساتھ کیک بھی کاٹا جب کہ بچوں کو کنگ خان کی فلم دیکھنے کا موقع بھی ملا۔
شاہ رخ خان نے ٹوئٹر پر بچوں کے ساتھ گزارے گئے یاد گار لمحوں کی تصاویر اور ویڈیوز شیئر کیں اور ساتھ میں پیغام درج کیا کہ اسپارک اینڈ چینج فاؤنڈیشن کے 100 پیارے بچے آج ہماری فلم کے سیٹ پرمدعو تھے ہم نے خوب مزہ کیا یہ میرا اب تک کا سب سے یادگار(بچوں کا عالمی دن) ہے۔شاہ رخ خان نے بچوں کے ساتھ ڈانس بھی کیا اس موقع پربچے بے انتہا خوش نظرآئے۔ شاہ رخ خان نے لکھا کہ بچوں کے ساتھ وقت گزار کےانہیں اپنا بچپن یاد آگیا اور ان بچوں نے مجھے ڈانس کرنا بھی سیکھایا۔
واضح رہے کہ شاہ رخ خان ان دنوں ہدایت کار آنند لال رائے کی فلم کی شوٹنگ میں مصروف ہیں۔ فلم میں کنگ خان ایک پستہ قد آدمی کا کردار نبھارہے ہیں جب کہ ان کے ساتھ اداکارہ کترینہ کیف اورانوشکا شرما مرکزی کرداروں میں نظرآئیں گی۔

نئی دہلی(M92) بھارت میں پلاسٹک کے استعمال سے ہزاروں کلومیٹر پلاسٹک کی سڑکیں تعمیر کی گئی ہیں۔ورلڈاکنامک فورم کی رپورٹ کے مطابق بھارت میں ضائع شدہ پلاسٹک کی چیزوں کو ری سائیکل کرکے سڑکوں کی تعمیر کےلیے قابل استعمال بنایا گیا ہے۔ یہ ٹیکنالوجی بھارت میں ہی ایجاد کی گئی ہے اور اس تکنیک کے ذریعے باریک پلاسٹک کو تارکول کی طرح گرم ٹھوس مادے میں شامل کیا جاتا ہے اور پھر اسے پتھروں پر ڈال دیا جاتا ہے۔
رپورٹ میں بتایا گیا ہے کہ بھارت میں 33 ہزار 500 کلومیٹر کے لگ بھگ طویل سڑکیں پلاسٹک کے استعمال سے بنائی گئی ہیں جب کہ سرکاری اعداد و شمار کے مطابق ایک لاکھ کلومیٹر سڑکیں پلاسٹک کے استعمال سے بنائی گئی ہیں۔
ماہرین کا کہنا ہے کہ ٹافیوں کے ریپر سے لے کرپلاسٹک کی بوتلوں تک کے استعمال شدہ پلاسٹک کو 170 ڈگری تک گرم کرکے پگھلایا جاتا ہے اور اسے تارکول کے طور پر روڈ کی تعمیر میں استعمال کیا جاتا ہے۔
پلاسٹک کے استعمال سے تیار کردہ سڑکیں پائیدار اور دیرپا ہوتی ہیں جو شدید گرم موسم اور سیلابی صورتحال میں بھی خراب نہیں ہوتیں۔ دوسری جانب سڑکوں پرتارکول کی نسبت پلاسٹک سے گڑھے پڑنے کی شرح بھی بہت کم ہے۔

نئی دہلی(M92) بھارتی ریاست مانی پور میں بم دھماکے میں 3 فوجی ہلاک اور متعدد زخمی ہوگئے۔بھارتی میڈیا کے مطابق ریاست مانی پور کے ضلع چندیل میں ہونے والے بم دھماکے میں اب تک 3 فوجی ہلاک ہوچکے ہیں جب کہ 6 شدید زخمی حالت میں زیرعلاج ہیں۔ بھارتی فوجی حکام نے بتایا کہ میانمار کی سرحد کے قریب مانی پور ریاست کے ضلع چندیل میں ڈسٹرک کونسل کے سامنے دھماکا ہوا۔ ریموٹ کنٹرول بم سڑک کنارے نصب کیا گیا تھا جس کے ذریعے فوجی اہلکاروں کو نشانہ بنایا گیا۔
حکام کے مطابق دھماکا صبح 6 بجے ہوا جب اہلکار معمول کے گشت پر تھے۔ دھماکا اس قدر شدید تھا کہ دور دور تک اس کی آواز سنائی دی۔ واقعے کی اطلاع ملتے ہی قریبی اضلاع کی اضافی فوجی نفری کو طلب کرلیا گیا۔ علاقے کو گھیرے میں لے کر سرچ آپریشن شروع کردیا گیا ہے۔ دھماکے کی ذمہ داری تاحال کسی تنظیم نے قبول نہیں کی تاہم مانی پور میں ماؤ باغی اور نکسل باڑی تحریک کافی سرگرم ہے۔

ممبئی(M92) نامور بالی ووڈ اداکارہ سنی لیون کی حال ہی میں جاری ہونے والی تصاویر اور ویڈیوز سوشل میڈیا پر وائرل ہوگئیں تصاویر میں سنی لیون خاتون کے بجائے مرد کے روپ میں نظرآرہی ہیں۔بالی ووڈ کی خوبرو اداکارہ سنی لیون فلموں میں بے باک اوربولڈ کردار کرنے کے لیے مشہورہیں جس کی وجہ سےانہیں اسی قسم کے کردارموصول ہوتے ہیں لیکن ان کی حال ہی میں جاری ہونے والی تصاویر نے ثابت کردیا کہ سنی بولڈ کردارکرنے کے علاوہ بھی بہت کچھ کرنے کی صلاحیت رکھتی ہیں۔
سنی لیون نے گزشتہ روز سماجی رابطے کی ویب سائٹ ٹوئٹر پر اپنی ویڈیو اور چند تصاویر شیئر کی ہیں جنہیں دیکھ کرکوئی بھی یقین نہیں کرسکتا کہ یہ سنی لیون ہیں کیونکہ سنی تصاویر میں مرد کے روپ میں نظرآرہی ہیں۔صارفین خوبصورت، حسین اور دلکش چہرے والی سنی لیون کی جگہ ایک مرد کو دیکھ کر حیرت زدہ رہ گئے، تصاویر کے ساتھ سنی نے پیغام درج کیاہے ’’میری ٹیم نے مجھے ایک مرد کا روپ دیاہے، میں بالکل اپنے بھائی اور والد کی طرح نظرآرہی ہوں‘‘۔
دراصل سنی نے عورت سے مرد بننے کے لئے کوئی پلاسٹک سرجری نہیں کرائی بلکہ یہ روپ انہوں نے اپنی اگلی فلم’’تیرا انتظار ‘‘کے گانے’’باربی گرل‘‘کے لیے اپنایا ہے۔ اداکارہ نے ٹوئٹر پر ایک ویڈیو بھی شیئر کی ہے جس میں ان کے میک اپ اسٹائلسٹ نے انہیں مہارت کے ساتھ ایک خاتون سے مرد میں تبدیل کردیا۔
واضح رہے کہ فلم’’تیرا انتظار‘‘میں سنی لیون اور ارباز خان مرکزی کردارادا کرتے نظر آئیں گے فلم رواں ماہ 24 نومبر کو ریلیزکی جائے گی۔

ممبئی(M92) بالی ووڈ اداکارہ انوشکا شرما اور بھارتی کرکٹرویرات کوہلی نے ایک تقریب میں شرکت کی جہاں ان کے ریڈ کارپٹ پر انٹری کے خوب چرچے ہوئے۔بھارتی میڈیا رپورٹس کے مطابق بالی ووڈ کی خوبرواداکارہ انوشکا شرما اوربھارتی کرکٹ ٹیم کے کپتان ویرات کوہلی آج کل میڈیا کی زینت بنے ہوئے ہیں، کوئی پارٹی ہویا تقریب دونوں اب برملا ساتھ ساتھ نظرآتے ہیں تاہم تاحال ان کی جانب سے اپنی گہری دوستی پرکچھ کہا نہیں گیا ہے۔رپورٹس کے مطابق دونوں ہی ایک اسپورٹس ایونٹ میں شرکت کے لیے ساتھ ساتھ گئے جہاں ان کا ریڈ کارپٹ پرپُرتپاک استقبال کیا گیا جب کہ ان کے ساتھ ساتھ آنے اوربہترین ملبوسات کے بھی خوب چرچے ہوئے۔
تقریب کے دوران دونوں ہی انتہائی خوش نظرآرہے تھے جب کہ دونوں کی ایونٹ میں لی جانے والی تصاویرسوشل میڈیا پروائرل ہوئیں جنہیں مداحوں کی جانب سے خوب سراہا گیا۔
اس سے قبل بھی ویرات اورانوشکا نے کپڑوں کے ایک برانڈ کے اشتہارمیں کام کیا تھا جس میں وہ شادی کے عہدوپیمان باندھ رہے ہوتے ہیں اوراشتہارکے باعث وہ میڈیا کی خوب زینت بنے تھے جب کہ ان کی شادی کی قیاس آرائیاں بھی کی گئی تھیں۔