Tag indian

اسلام آباد(ایمرا نیوز آن لائن)وزیراعظم کی معاون خصوصی برائے اطلاعات ونشریات فردو س عاشق اعوان نے کہاہے وزیراعظم کے 7 ارب روپے کے ریلیف پیکیج کے تحت یوٹیلٹی سٹورز پر آج سے چینی، دالوں، چاول ، گھی و دیگر اشیائے ضروریہ پر 7 سے 40 روپے تک کی سبسڈی دی جائے گی۔

ماہانہ راشن ایک ہی مرتبہ حاصل کیا جاسکے گا۔ یوٹیلٹی سٹور ز کارپوریشن نے مارچ تک کیلئے 5 ارب کی خریداری مکمل کر لی۔پاسکو سے دو لاکھ ٹن گندم سستے نرخوں پر حاصل کر لی گئی ہے ۔ مستقبل قریب میں 50ملین غریب ،بے سہارا ،نادار خاندانوں کو راشن کارڈ دیئے جائیں گے ۔

وزیراعظم کی معاون خصوصی اطلاعات و نشریات ڈاکٹر فردوس عاشق اعوان نے چیئرمین یوٹیلٹی سٹور زکارپوریشن ذوالقرنین علی خان اور ایم ڈی یوٹیلٹی سٹورزکارپوریشن کے ساتھ میڈیا کو بریفنگ دے رہی تھیں۔ ڈاکٹر فردوس عاشق اعوان نے کہا وزیراعظم کا عہد ہے جوں جوں مالی پوزیشن مستحکم ہوتی جائے گی اس کا ریلیف اور فائدہ عوام کو منتقل ہوتا جائے گا۔

ریاست کمزور طبقے کا ہاتھ تھام کر سینے سے لگارہی ہے ۔ چیئرمین یوٹیلٹی سٹورز کارپوریشن ذوالقرنین علی خان نے کہا یوٹیلٹی سٹورز پر آئی ٹی سسٹم نصب کیا جارہا ہے ۔ برانڈڈ پراڈکٹ کی قیمت ہمارے بس میں نہیں اسلئے یوٹیلیٹی سٹور نے اپنا گھی متعارف کرایا تو اس کی قیمت میں بھی استحکام یقینی بنایا گیا۔

زرعی ملک ہونے کے باوجود ڈیڑھ ملین ڈالر کی دالیں پاکستان منگوانا پڑتی ہیں، اسلئے دالوں اورآئل کی قیمتیں سٹاک مارکیٹ کی طرح اوپر نیچے جارہی ہیں۔ انہوں نے کہا یہ ادارہ پیسے کمانے کیلئے نہیں بلکہ عوام کو ریلیف دینے کیلئے بنایا گیا ۔ایم ڈی یوٹیلٹی سٹور ز کارپوریشن نے کہا وزیراعظم ریلیف پیکج کے تحت 5ارب کی خریداری کرچکے ،

یہ ذخیرہ مارچ تک کیلئے کافی ہے اسکے بعد رمضان پیکج شروع ہوجائے گا ۔یو ٹیلٹی سٹورز پر تبدیلی نظر آئے گی۔ یوٹیلٹی سٹورز پر آٹا 808سے 850روپے فی 20کلو تھیلا ،چینی 68روپے فی کلودستیاب ہوگی جبکہ گھی اور آئل 30سے 40روپے فی کلو ،دالیں اور چاول 20سے 31روپے تک کم قیمت پر دستیاب ہونگی ۔

لاہور(ایمرا نیوز آن لائن)راک اسٹار علی ظفر کے چند ماہ قبل ریلیز ہونے والے بلوچی گانے ’لیلیٰ او لیلیٰ‘ کو یوٹیوب پر اب تک ایک کروڑ سے زائد بار دیکھا جا چکا ہے۔ یہ کلاسیکل بلوچی گانا 11 اکتوبر 2019 کو ریلیز کیا گیا تھا جسے راک اسٹار علی ظفر اور بلوچستان کی 12 سالہ گلوکارہ عروج فاطمہ نے بتایا اور اس گانے کو یوٹیوب پر اب تک ایک کروڑ سے زائد بار دیکھا جا چکا ہے۔

’لیلیٰ او لیلیٰ‘ گانے کی میوزک ویڈیو میں عروج کی گلوکاری کےساتھ ساتھ بلوچستان کے خوبصورت مناظربھی دکھائے گئے ہیں۔اسی ضمن میں گلوکار علی ظفر نے ٹوئٹر پر اپنی خوشی کا اظہار کرتے ہوئے ایک ٹوئٹ پیغام جاری کیا۔

علی ظفر کا کہنا تھا کہ ’یہ دیکھ کر بہت حیرت اور خوشی ہوئی ہے کہ ’لیلیٰ او لیلیٰ‘ گانے کو یوٹیوب پر اب تک ایک کروڑ سے زائد بار دیکھا جا چُکا ہے‘۔

انڈونیشیا(ایمرا نیوز آن لائن) انڈونیشیا جکارتا میں بارشوں نے تباہی مچا دی، 21 افراد ہلاک انڈونیشیا کے دارالحکومت جکارتا میں بارشوں کے بعد سیلابی صورتحال کے باعث مختلف حادثات میں 21 افراد ہلاک اور ہزاروں بے گھر ہو گئے۔

غیر ملکی خبر ایجنسی کے مطابق بارش کے بعد پیدا ہونے والی سیلابی صورت حال کے باعث 30 ہزار افراد بے گھر اور بجلی کا نظام درہم برہم ہو کر رہ گیا ہے۔انڈونیشیا کی ڈیزاسٹر ایجنسی کے مطابق مختلف حادثات میں 21 افراد ہلاک اور درجنوں زخمی ہوئے، زیادہ تر اموات لینڈ سلائیڈنگ، ہائپو تھرمیا، ڈوبنے اور کرنٹ سے ہوئیں۔

دوسری جانب ماہرین موسمیات نے جکارتا میں مزید بارشوں کی پیش گوئی کی ہے۔انڈونیشیا کی الیکٹرک ایجنسی کے مطابق سیکڑوں کی تعداد میں فیڈرز بند کر دیئے گئے ہیں جس سے تقریباً 3 کروڑ کی آبادی متاثر ہو گی۔خیال رہے کہ 2007 میں انڈونیشیا میں آنے والے سیلاب میں 50 افراد ہلاک اور درجنوں زخمی ہوئے تھے۔

بھارت(ایمرا نیوز آن لائن)بھارت کے دارالحکومت نئی دہلی میں ایک فیکٹری میں آتشزدگی سے 43 افراد ہلاک اور کئی زخمی ہو گئے۔بھارتی میڈیا کے مطابق بیگ بنانے والی فیکٹری میں آتشزدگی کا واقعہ نئی دہلی کے علاقے اناج منڈی میں پیش آیا۔

حکام کے مطابق آگ لگنے کی وجوہات کا تاحال علم نہیں ہو سکا ہے تاہم اس بات کا خدشہ ظاہر کیا جا رہا ہے کہ آگ فیکٹری کی ورک شاپ میں لگی۔میڈیا رپورٹس کے مطابق حادثہ صبح 5 بجے اس وقت پیش آیا جب زیادہ تر ملازمین سو رہے تھے، واقعے میں 43 افراد ہلاک اور متعدد زخمی ہوئے۔

ریسکیو حکام کے مطابق 50 افراد کو بچا لیا گیا جب کہ فائر بریگیڈ کی 15 گاڑیاں آگ بجھانے میں مصروف ہیں۔

اسلام آباد (ایمرا نیوز آن لائن)آپ نے عموماً چارکول کو خوبصورتی نکھارنے اور بیوٹی پروڈکٹس میں استعمال کرنے کے بارے میں تو سنا ہی ہوگا لیکن کیا آپ نے کبھی چارکول سے بنی کافی کے بارے میں سنا ہے؟عام طور پر لوگوں کو بلیک کافی بے حد پسند ہوتی ہے مگر یہ بلیک کافی اپنے نام کی طرح بالکل کالے رنگ کی نہیں ہوتی بلکہ اس بلیک کافی کا مطلب یہ ہوتا کہ اس میں دودھ اور کریم شامل نہ ہو۔لیکن ہم آج آپ کو ایک ایسے کیفے کے بارے میں بتائیں گے جہاں ملنے والی کافی کو چارکول سے تیار کیا جاتا ہے اور یہ کافی گہرے کالے رنگ کی ہوتی ہے۔

نیویارک سٹی کے ’راؤنڈ کے‘ کیفے میں آپ کو ایسی بلیک کافی ملے گی جو کہ اپنے نام کی طرح دکھنے میں بالکل گہرے کالے رنگ کی ہوتی ہے۔اس کیفے کے مالک اوکیون بیون کا ماننا ہے کہ کافی کو بالکل اس کے نام کی طرح بنایا جائے اور انہوں نے ایک ایسی کافی تیار کی جو بے حد مقبول ہوگئی۔کیفے کے مالک نے مختلف ایکٹیویٹد چارکول کو جانچنا شروع کیا جس کے بعد انہوں نے کافی میں کالا رنگ دینے کے لیے ناریل کے چھلکے کی راکھ کا انتخاب کیا۔

یہ ناریل کی راکھ کافی کو نہ صرف گہرا کالا رنگ دیتی ہے بلکہ یہ کافی کو ایک خاص ذائقہ بھی دیتی ہے۔نیویارک میں واقع یہ کیفے 2017 سے اس میٹ بلیک کافی کو بنانے کی وجہ سے بے حد مقبول ہے، کچھ لوگوں کو اس کافی کا رنگ تھوڑا عجیب لگتا ہے لیکن اب یہ مقبول ترین ڈرنک میں سے ایک بن چکی ہے۔اس کافی کو بنانے کے لیے 90 فیصد ڈچ کاکاؤ، اسپریسوشاٹ، ناریل کی راکھ، بادام کا دودھ اور معمولی برف ملا کر تیار کیا جاتا ہے۔

کیفے کے مالک نے بتایا کہ لوگ جب بھی اس کیفے میں آتے ہیں تو وہ کافی کے رنگ کو دیکھ کر حیران اور پریشان ہوجاتے ہیں لیکن جب وہ اس کافی کو پیتے ہیں تو اس کے مزیدار ذائقے سے خوب لطف اندوز ہوتے ہیں کیونکہ اس کا ذائقہ روایتی کافی سے مختلف ہوتا ہے۔نیویارک شہر میں یہ کیفے اپنی منفرد کافی کی وجہ سے بے حد مقبول ہے اور یہاں کی میٹ بلیک کافی کے ایک کپ کی قیمت 6 ڈالرہے۔

کراچی(ایمرا نیوز آن لائن)کراچی سے لاہور جانے والی قراقرم ایکسپریس حادثے کا شکار ہو گئی۔ترجمان ریلوے کے مطابق قراقرم ٹرین کا پورا انجن اور پاور پلانٹ کے دو پہیے صفدرآباد اسٹیشن کے قریب پٹری سے اتر گئے۔ترجمان کا بتانا ہے کہ حادثے کے باعث حادثے کے نتیجے میں قراقرم ٹرین کے تمام مسافر محفوظ رہے تاہم لاہور فیصل آباد سیکشن پر ٹرینوں کی آمدورفت معطل ہو گئی ہے۔

ترجمان ریلوے کا کہنا ہے کہ امدادی ٹرین اور انجن کو موقع پر روانہ کر دیا گیا ہے، دوپہر بارہ بجے تک قراقرم ٹرین منزل کی طرف روانہ کر دی جائے گی۔خیال رہے کہ گزشتہ ماہ کراچی سے راولپنڈی جانے والی تیزگام ایکسپریس رحیم یار خان میں حادثے کا شکار ہوئی تھی، لیاقت پور کے قریب ٹرین میں آتشزدگی کے باعث 75 افراد جاں بحق اور 100 سے زائد زخمی ہو گئے تھے۔

وزیراعظم عمران خان اور وزیر ریلوے شیخ رشید نے واقعے کی فوری تحقیقات کا حکم دیا تھا جس کی ابتدائی رپورٹ سامنے آنے کے بعد ریلوے کے کچھ ملازمین کو ملازمت برطرف کر دیا گیا تھا۔

بھارت(ایمرا نیوز آن لائن)الیکٹریکل ڈپارٹمنٹ کے سرکاری ملازمین ہیلمٹ اپنی حفاظت کے لیے پہن کر بیٹھتے ہیں کیونکہ دفتر کی بہت خستہ حال ہے اور وہ کسی بھی ان کے سر پر گر سکتی ہے موٹر سائیکل سوار افراد احتیاط کے طور پر ہیلمٹ پہن کر موٹر سائیکل چلاتے ہیں تاکہ کسی حادثے کے نتیجے میں ان کے سر پر گہری چوٹیں نہ آئیں، مگر کیا آپ نے کبھی سنا ہے کہ دفترکے اندر بھی ہیلمٹ پہن کر کام کیا جاتا ہے۔

جی ہاں، ہم آج آپ کو بتائیں گے کہ بھارتی سرکاری ملازمین دفترکے اندر کام کے دوران ہیلمٹ کیوں پہنتے ہیں؟بھارتی ریاست اُتر پردیش کے شہر بندا میں سرکاری ملازمین دفتر میں کام کے دوران ہیلمٹ پہنتے ہیں کیونکہ ان کے دفتر کی عمارت خستہ حال ہے اور وہ کسی بھی وقت ان کے سر پر گِر سکتی ہے۔بھارت کا ایسا دفتر جہاں ملازمین ہیلمٹ پہن کر کام کرتے ہیں

کسی بھی حادثے کی صورت میں خود کو محفوظ رکھنے کیلئے بھارتی سرکاری ملازمین دفتر میں ہیلمٹ پہن کر کام کرتے ہیں اور حال ہی میں ان کی تصاویر بھارتی نیوز ایجنسی نے آن لائن شیئر کی ہیں جو کہ سب کی توجہ کا مرکز بنی ہوئی ہیں۔بھارتی میڈیا کی رپورٹس کے مطابق آفس کے کمرے کی چھت میں سوراخ بھی ہیں، ملازمین کا کہنا ہے کہ ایک سال قبل اس دفتر کی عمارت کی خستہ حال چھت کو خطرناک قرار دیا جا چکا ہے مگر پھر بھی انتظامیہ کی جانب سے کوئی اقدامات نہیں کیے جارہے یہی وجہ ہے کہ اب ہم یہاں حفاظتی طور پر ہیلمٹ پہن کر کام کرتے ہیں۔

واضح رہے کہ بھارت میں ایسا پہلی مرتبہ نہیں ہوا ہے کہ سرکاری ملازمین دفتر میں ہیلمٹ پہن کر کام کر رہے ہوں بلکہ اس سے قبل 2017 میں بہار میں ملازمین کو کام کے دوران ہیلمٹ پہننے کو کہا گیا تھا کیونکہ اس دفتر کی عمارت بھی خستہ حالی کے باعث کبھی بھی گِر سکتی تھی البتہ اب تک ایسا کوئی واقعہ سامنے نہیں آیا۔

بھارت (ایمرا نیوز آن لائن)بھارتی سپریم کورٹ نے بابری مسجد کیس کا فیصلہ سناتے ہوئے مسجد کی زمین ہندوؤں کے حوالے کرتے ہوئے مرکزی حکومت کو مندر تعمیر کرنے کا حکم دیا ہے۔بھارتی سپریم کورٹ کے چیف جسٹس رانجن گنگوئی کی سربراہی میں 5 رکنی بینچ بابری مسجد کیس کا فیصلہ سنا رہا ہے، پانچ رکنی بنچ میں مسلمان جج ایس عبدالنذیر بھی شامل ہیں۔

چیف جسٹس رانجن گنگوئی کیس کا فیصلہ سنا رہے ہیں۔ ان کا کہنا ہے کہ بابری مسجد کیس کا فیصلہ متفقہ ہے۔’بابری مسجد کی جگہ مندر نہ بنایا تو مودی سرکار بھی نہیں رہے گی‘سپریم کورٹ کے فیصلے میں کہا گیا ہے کہ ہندو ایودھیا کو رام کی جنم بھومی جب کہ مسلمان اس جگہ کو بابری مسجد کہتے ہیں۔بھارتی سپریم کورٹ کا فیصلے میں کہنا ہے کہ عدالت کے لیے مناسب نہیں کہ وہ مذہب پر بات کرے، عبادت گاہوں کے مقام سے متعلق ایکٹ تمام مذہبی کمیونٹیز کے مفادات کا تحفظ کرتا ہے۔

فیصلے میں کہا گیا ہے کہ شواہد سے پتہ چلتا ہے کہ مسجد کی جگہ پر رام کی جنم بھومی تھی اور بابری مسجد کے نیچے اسلامی تعمیرات نہیں تھیں، بابری مسجد کو خالی پلاٹ پر تعمیر نہیں ہندو اسٹرکچر پر تعمیر کی گئی۔بھارتی سپریم کورٹ کے فیصلے کے مطابق مطابق ریونیو ریکارڈ کے مطابق زمین سرکاری تھی جب کہ بابری مسجد کی شہادت قانون کی خلاف ورزی ہے۔چیف جسٹس رانجن گنگوئی نے بابری مسجد کی زمین ہندوؤں کے حوالے کرتے ہوئے کہا کہ مسلمانوں کو ایودھیا میں متبادل جگہ دی جائے، سنی وقف بورڈ کو 5 ایکڑ متبادل زمین دی جائے۔

بھارتی سپریم کورٹ نے متنازع 2 اعشاریہ 77 ایکٹر زمین مرکزی حکومت کے حوالے کرتے ہوئے تین ماہ میں ٹرسٹ قائم کرنے کا حکم دیا ہے۔بھارتی میڈیا کے مطابق اتر پردیش میں تمام اسکول، کالج اور تعلیمی ادارے 11 نومبر تک بند کرنے کا اعلان کیا گیا ہے اور ایودھیا سمیت پورے بھارت میں سیکیورٹی انتہائی سخت کر دی گئی ہے۔

خیال رہے کہ سپریم کورٹ کے 5 رکنی بینچ نے الہ آباد ہائی کورٹ کے ستمبر 2010 کے فیصلے کے خلاف دائر 14 اپیلوں پر سماعت کی جس میں سنّی وقف بورڈ، نرموہی اکھاڑہ اور رام لالہ کے درمیان ایودھیا میں 2.77 ایکڑ متنازع زمین کو برابر تقسیم کرنے کا حکم دیا گیا تھا۔1528ء میں مغل دور حکومت میں بھارت کے موجودہ شہر ایودھیا میں بابری مسجد تعمیر کی گئی جس کے حوالے سے ہندو دعویٰ کرتے ہیں کہ اس مقام پر رام کا جنم ہوا تھا اور یہاں مسجد سے قبل مندر تھا۔

برصغیر کی تقسیم تک معاملہ یوں ہی رہا، اس دوران بابری مسجد کے مسئلے پر ہندو مسلم تنازعات ہوتے رہے اور تاج برطانیہ نے مسئلے کے حل کیلئے مسجد کے اندرونی حصے کو مسلمانوں اور بیرونی حصے کو ہندوؤں کے حوالے کرتے ہوئے معاملے کو دبا دیا۔1992 میں ہندو انتہا پسند پورے بھارت سے ایودھیا میں جمع ہوئے اور ہزاروں سیکیورٹی اہلکاروں کی موجودگی میں 6 دسمبر کو سولہویں صدی کی یادگار بابری مسجد کو شہید کر دیا۔حکومت نے مسلم ہندو فسادات کے باعث مسجد کو متنازع جگہ قرار دیتے ہوئے دروازوں کو تالے لگا دیے، جس کے بعد معاملے کے حل کیلئے کئی مذاکراتی دور ہوئے لیکن آج تک کوئی نتیجہ نہ نکل سکا۔

دبئی(ایمرا نیوز آن لائن)اداکارہ میرا نے دبئی میں منعقد ایک فیشن شو میں شرکت کی جہاں بالی وڈ اداکارہ جیکولین بھی موجود تھیں۔پاکستان کی نامور اداکارہ میرا اور بالی وڈ اداکارہ جیکولین فرنینڈس نے ایک ساتھ فیشن شو میں شرکت کر کے سب کی توجہ اپنی جانب مبذول کروا لی۔رواں برس فلم ’باجی‘ میں اداکاری کے شاندار جوہر دکھانے والی اداکارہ میرا نے دبئی میں منعقد ایک فیشن شو میں شرکت کی جہاں بالی وڈ اداکارہ جیکولین فرنینڈس نے بھی بطور شو اسٹوپر واک کی۔

اس موقع پر دونوں حسیناؤں نے ایک دوسرے سے ملاقات کی اور فیشن شو پارٹی کو خوب انجوائے کیا۔پارٹی کی تھیم سفید تھی جس کے باعث دونوں نے ہی سفید رنگ کے ملبوسات کا انتخاب کیا۔فیشن شو میں اداکاراؤں نے ڈیزائنرز سمیت مخلتف شوبز شخصیات کے ساتھ تصاویر بنوائیں، اس کے علاوہ ایک دوسرے کے ساتھ خوب رقص بھی کیا۔

دونوں شوبز اسٹارز کی ایک ساتھ لی گئی تصاویر اور رقص کی ویڈیو سوشل میڈیا پر بھی وائرل ہو چکی ہیں جس میں کیپٹن نوید بھی دکھائی دے رہے ہیں۔ یاد رہے کہ گزشتہ ماہ میرا دبئی کے نجی اسپتال میں زیر علاج تھیں جہاں ان کا کامیاب آپریشن کیا گیا تھا۔

جاپان (ایمرا نیوز آن لائن)جاپان کے دارالحکومت ٹوکیو میں خطرناک ترین سمندری طوفان ہگی بس کے ٹکرانے سے 18 افراد ہلاک، متعدد زخمی اور کئی افراد لاپتہ ہوگئے۔برطانوی نشریاتی ادارے کے مطابق سمندری طوفان ’ ہگی بس‘ جاپان کے جنوب مغرب میں واقع جزیرہ نما علاقے ایزو سے ٹکرایا جو 225 کلو میٹر فی گھنٹہ کی رفتار سے مشرقی ساحل کی جانب بڑھ رہا ہے۔

رپورٹ کے مطابق طوفان کے بعد لینڈسلائیڈنگ کے نتیجے میں 18 افراد ہلاک، 128 کے قریب زخمی جب کہ کئی افراد لاپتا ہوگئے ہیں۔حکام کی جانب سے 60 لاکھ افراد کو فوری طور پر انخلا کی ہدایات جاری کردی گئی ہیں۔ہگی بس طوفان کے باعث متعدد درخت زمین سے اکھڑ گئے اور کئی علاقے بجلی سے بھی محروم ہوگئے جب کہ طوفان میں پھنسے افراد کو نکالنے کےلیے ایمرجنسی ٹیمیں تشکیل دی جاچکی ہیں۔

میڈیا رپورٹس کے مطابق ہفتے کے روز جاپان میں 60 سال کے دوران آنے والے طاقتور ترین طوفان ہگی بس سے دارالحکومت ٹوکیو سمیت ملک بھر میں سیلابی صورتحال پیدا ہوئی جب کہ کئی علاقوں میں سیلاب آچکا ہے۔طوفان کے باعث متعدد پروازیں اور ٹرینیں منسوخ کردی گئی ہیں جب کہ مارکیٹیں اور فیکٹریاں بھی بند ہوچکی ہیں۔

میڈیا رپورٹس میں بتایا گیا ہےکہ یہ طوفان 1958 میں جاپان میں آنے والے اس طوفان سے بھی زیادہ طاقتور ہوسکتا ہے جس کے نتیجے میں 1200 سے زائد افراد ہلاک یا لاپتا ہوئے تھے۔ہیٹرولوجیکل ایجنسی نے سیلابوں اور لینڈسلائیڈنگ کا خدشہ ظاہر کرتے ہوئےکہا ہےکہ طوفان مزید ریکارڈ بارشیں اور طوفانی ہوائیں چل سکتی ہیں۔