Tag indian

نئی دہلی (ایمرا نیوز آن لائن)بھارتی ٹینس سٹار اور پاکستانی کرکٹ ٹیم کے سابق کپتان شعیب ملک کی اہلیہ نے بھارتی پائلٹ ابھی نندن کو ہیرو قرار دے دیا۔سماجی رابطے کی ویب سائٹ پر اپنے ایک ٹویٹ میں ثانیہ مرزا نے بھارتی پائلٹ کی واپسی پر خوشی کا ظہار کرتے ہوئے کہا کہ ونگ کمانڈر ابھی نندن حقیقی ہیرو ہے،ثانیہ مرزا نے بھارتی پائلٹ کو خراج تحسین پیش کرتے ہوئے کہا کہ آپ نے جس ہمت، عظمت اور بہادری کا مظاہر کیا اس پر سارا بھارت سیلوٹ پیش کرتا ہے، آپ ہمارے سچے ہیرو ہیں۔۔یاد رہے کہ چند روز قبل پاک بھارت کشیدگی کے نتیجے میں بھارتی حکمراں جماعت کے رکن پارلیمنٹ اور بی جے پی کے رہنما نے وزیر اعلی کرناٹک سے مطالبہ کیا تھا کہ ثانیہ مرزا پاکستانی بہو ہے لہذا اس سے اعزازی عہدہ واپس لیا جائے۔

24 گھنٹوں سے نکیال ،تتہ پانی ،جنڈروٹ، اور گرم چشمہ سیکٹر زمیں شہری آبادی پر بلا اشتعال فائرنگ و گولہ باری سلسلہ جاری ، پاک فوج کا بھرپور جواب،بھارتی چیک پوسٹیں تباہ
پاک فضائیہ اور نیوی الرٹ ہیں، ترجمان آئی ایس پی آر
راولپنڈی(ایمرا نیوز آن لائن )بھارتی فوج کی لائن آف کنٹرول پر شہری آبادی پر بلا اشتعال فائرنگ اور گولہ باری کے نتیجے میں پاک فوج کے 2جوانوں سمیت 4 پاکستانی شہید جبکہ خاتون سمیت 2 افراد شدید زخمی ہو گئے پاک فوج کی جانب سے بھی بھارتی جارحیت کا بھرپور جواب دیتے ہوئے دشمن کی چوکیوں کو نشانہ بنایا گیا۔پاک فضائیہ اورنیوی کسی بھی صورت حال سے نمٹنے کیلئے الرٹ ہیں۔آئی ایس پی آر کے مطابق بھارتی فوج نے لائن آف کنٹرول کے سیکٹرز نکیال ،تتہ پانی ،جنڈروٹ، اور گرم چشمہ میں شہری آبادی پر بلا اشتعال فائرنگ اور گولہ باری کی جس کے نتیجے میں نکیال سیکٹر میں پاک فوج کے 2 نوجوانوںسمیت4 پاکستانی شہید اور خاتون سمیت 2 افراد شدید زخمی ہو گئے پاک فوج کے شہید ہونے والے جوانوں میں حوالدار عبدلرب اور نائک خرم شامل ہیںجبکہ زخمیوں کو ابتدائی طبی امداد فرہم کرنے کے لئے کوٹلی سیکٹر کے ہسپتال منتقل کردیا گیا ہے پاک فوج نے بھی بھارتی جارحیت کا منہ توڑ جواب دیتے ہوئے دشمن کی چوکیوں کو نشانہ بنایااور پاک فضائیہ سمیت نیوی کو بھی مزید الرٹ کر دیا گیا ہے تاکہ دشمن کی جارحیت کا منہ توڑ جواب دیا جا سکے(اشفاق خان)

بھارتی طیاروں کی بمباری کی ویڈیو نہیں بلکہ ‘آرما ٹو’ گیم کی ویڈیو ہے جو یوٹیوب گیمنگ چینل ‘ڈبل ڈوپلر’ پر5 جولائی 2015 کو جاری کی گئی تھی،رپورٹ
نیو یا رک(ایمرا نیوز آن لائن)سوشل میڈیا پر زیر گردش ا±س ویڈیو کا غیرملکی خبر رساں ادارے نے بھانڈا پھوڑ دیا جس میں کہا جارہا تھا کہ بھارتی لڑاکا طیاروں نے پاکستان کی حدود میں بمباری کی۔بھارتی شہریوں کی جانب سے اس جعلی ویڈیو کو تیزی سے وائرل کیا گیا جس میں ایک گھر پر لڑاکا طیاروں کو بمباری کرتے دیکھا جاسکتا ہے۔فرا نسیسی خبر رساں ادارے نے ویڈیو کی تفصیلات جاری کرتے ہوئے کہا ہے کہ یہ بھارتی طیاروں کی بمباری کی ویڈیو نہیں بلکہ ‘آرما ٹو’ گیم کی ویڈیو ہے جو یوٹیوب گیمنگ چینل ‘ڈبل ڈوپلر’ پر 5 جولائی 2015 کو جاری کی گئی تھی۔بھارتی پروپیگنڈا کرنے والوں نے گیمنگ ویڈیو کو ایڈٹ کر کے اسے شیئر کیا، اور غیر ملکی ادارے نے اس کی تمام تفصیلات بھی جاری کردی ہیں۔بھارتی شہریوں کی جانب سے جعلی ویڈیو تیزی سے شیئر کی گئی جسے صرف 26 فروری کو ہی 4 لاکھ سے زائد مرتبہ دیکھا گیا اور اسے مسلسل فیس بک پر شیئر کیا جاتا رہا ہے۔یاد رہے کہ بھارت نے دعویٰ کیا تھا کہ اس کے 12 لڑاکا طیارے 26 فروری کو پاکستان کی حدود میں داخل ہوئے اور بالاکوٹ کے مقام پر دہشت گردوں کے کیمپ کو نشانہ بنایا جس میں 300 کے قریب دہشت گرد ہلاک ہوگئے۔دوسری جانب بھارتی دعوے کا بھانڈا اس ویڈیو کی طرح غیر ملکی میڈیا نے بھی پھوڑ دیا ہے، جہاں الجزیرہ ٹی وی کے نمائندوں نے بالاکوٹ کے مقام کا دورہ کیا اور رپورٹ کیا کہ جس جگہ پر بھارتی طیاروں نے ایمونیشن گرایا وہاں کوئی کیمپ نہیں بلکہ درخت تھے۔

بھارتی انتہا پسند عدالت کے ذریعے آرٹیکل 35 اے کو ختم کرانا چاہتے ہیں تاکہ وادی کی مسلم اکثریت بدل جائے
نئی دہلی(ایمرا نیوز آن لائن)بھارتی سپریم کورٹ میں آرٹیکل 35 اے سے متعلق کیس کی سماعت آج منگل سے شروع کی جائے گی۔ آج صبح سے مقبوضہ کشمیر میں بھر پور احتجاج کی کال ہے۔ بھارتی انتہا پسند عدالت کے ذریعے آرٹیکل 35 اے کو ختم کرانا چاہتے ہیں تاکہ وادی کی مسلم اکثریت بدل جائے، ترجمان دفتر خارجہ نے بھارت کی جانب سے مقبوضہ کشمیر کی آئینی حیثیت میں تبدیلی کی کوششوں کی مذمت کی ہے۔ترجمان نے کہا کہ بھارتی سپریم کورٹ میں بھارتی آئین کے آرٹیکل 35اے پر بحث ہونے جا رہی ہے۔ بھارتی سپریم کورٹ میں آرٹیکل 35 اے سے متعلق کیس کی سماعت آج سے شروع کیے جانے کا فیصلہ ہوا ہے۔ آرٹیکل 35 اے کے تحت مقبوضہ کشمیر کو ایک خصوصی حیثیت حاصل ہے اور مقبوضہ کشمیر کی مستقل شہریت کا تعین کرنے کا اختیار مقبوضہ کشمیر اسمبلی کو حاصل ہے۔ مگر بھارتی انتہاپسند اب اس حق کو بھی چھین لینا چاہتے ہیں۔ایک طرف کشمیری عوام بھارتی تسلط سے تنگ ہیں تو دوسری طرف انتہاپسند بھارتی میڈیا اور سیاست دان کشمیریوں سے وہ چند حقوق بھی چھین لینا چاہتے ہیں جو شیخ عبداللہ کے ساتھ ایک معاہدے کے نتیجے میں بھارتی وزیراعظم جواہر لال نہرو نے بھارتی آئین میں درج کرائے تھے۔نہرو نے مقبوضہ کشمیر پر قبضے کے بدلے بھارتی آئین میں مقبوضہ کشمیر کو ایک خصوصی حیثیت دی تھی اور اس حیثیت کا ذکر بھارتی آئین کے آرٹیکل 35اے میں ہے۔ اس آرٹیکل کے تحت یہ اختیار مقبوضہ کشمیر کی اسمبلی کو ہے کہ وہ ریاست کے مستقل شہری کی تعریف متعین کرے۔ مقبوضہ کشمیر کا مستقل شہری ہی ریاست میں جائیداد خرید سکتا ہے۔بھارتی انتہا پسندوں نے عدالتوں میں اس آرٹیکل کے خلاف درخواستیں دائر کر رکھی ہیں اور وہ چاہتے ہیں کہ آرٹیکل 35اے کو ختم کر دیا جائے تاکہ مقبوضہ کشمیر میں مسلم اکثریت ختم کر کے مقبوضہ کشمیر پر بھارت کا غاصبانہ قبضہ مستحکم بنایا جا سکے۔

انتہاپسندوں کی طرف سے بد سلوکی اور جنسی طور پر اشتعال انگیز پیغامات بھی بھیجے گئے ہیں،صحافی
نئی دہلی (آن لائن) بھارت میں غیرجانبدار لکھاری کی حیثیت سے پہچان رکھنے والی بھارتی صحافی برکھادت بھی متعصب اور انتہاپسند ہندوں کے نشانے پر آگئے ہیں۔معروف سیاسی تجزیہ کار کو سوشل میڈیا پر ہراساں کیا گیا اور جان سے مارنے کی دھمکیاں بھی دی گئی ہیں۔ برکھا دت کا کہنا ہے کہ انہیں انتہاپسندوں کی طرف سے بد سلوکی اور جنسی طور پر اشتعال انگیز پیغامات بھی بھیجے گئے ہیں۔برکھادت نے بتایا کہ مجھے انتہاپسندوں کی طرف سے بد سلوکی پر مبنی ایک ہزار سے زائد پیغامات وصول ہوئے ہیں۔ ان پیغامات میں بدسلوکی، جان سے مارنے کی دھمکیاں اور فحش تصاویر تک شامل ہیں۔بھارت میں غیر جانبدار صحافی کے طور پر پہچان رکھنے والی معروف صحافی برکھا دت کو ماضی میں بھی اس قسم کی دھمکیاں ملتی رہی ہیں۔برکھا دت بھارت کی معروف سیاسی تجزیہ کار کے طور بھی جانی جاتی ہیں۔ بےباک تجزیوں اور غیر جانبداری کی وجہ سے انہیں انتہاپسندوں کی طرف سے انہیں تنقید کا نشانہ بنایا جاتا ہے۔انہوں نے کہا کہ ہے کہ میں نے دھمکیاں دینے والے کا پتا چلا لیا ہے اوراپنی شکایت سوشل میڈیا انتظامیہ کو درج کرادی ہے۔ برکھادت عالمی سطح پر جنوبی ایشیا کے حوالے سے ماہر سیاسی تجزیہ کار کے طور پر جانی جاتی ہیں۔پلوامہ حملے کا الزام پاکستان پر لگانے کے بعد بھارتی حکومت کو ملک کے اندر سے ہی تنقید کا سامنا ہے اور انتہا پسند تنظیمیں حکومتی ناقدین کو دھمکیاں دے رہی ہیں۔

قونصلر رسائی پانے والے قیدیوں میں 100 کراچی اور 2 قیدی راولپنڈی کی جیلوں میں ہیں
اسلام آباد(ایمرا نیوز آن لائن)پاکستان نے علاقائی اور خطے میں پرامن ہمسائیگی کے لیے ایک اور بڑا قدم اٹھانے کا فیصلہ کرلیا۔ذرائع کے مطابق پاکستانی جیلوں میں بھارتی قیدیوں کو قونصلر رسائی دینے کا فیصلہ کیا گیا جس کے تحت بھارتی ہائی کمیشن کے حکام کو 102 بھارتی قیدیوں تک قونصلر رسائی کی اجازت دی گئی ہے۔ذرائع نے بتایا کہ قونصلر رسائی پانے والے قیدیوں میں 100 کراچی اور 2 قیدی راولپنڈی کی جیلوں میں ہیں جن کو اس ماہ کے آخر تک رسائی دے دی جائے گی۔ذرائع کے مطابق پاکستانی جیلوں میں اس وقت 537 بھارتی قیدی موجود ہیں۔سفارتی ذرائع کا کہنا ہےکہ یہ اقدام دونوں ممالک کے درمیان اعتماد سازی کے لیے فائدہ مند ہوگا اور امید ہے کہ بھارتی جیلوں میں قید 347 پاکستانی قیدیوں کو بھی بھارت قونصلر رسائی دے گا۔

کھلاڑی کا نام ہریش گنگا دھرن ہے، جو گرین آئی لینڈ کرکٹ کلب کی سکینڈ گریڈ ٹیم کیلئے کھیلتے تھے
ولنگٹن (ایمرا نیوز آن لائن)نیوزی لینڈ میں ایک طرف جہاں ٹیم انڈیا نے نیوزی لینڈ میں ون ڈے سیریز جیت کر تاریخ رقم کر دی، وہیں اب نیوزی لینڈ سے ایک انتہائی بری خبر سامنے آئی۔ نیوزی لینڈ میں کھیلنے والے ہندوستانی نڑاد کرکٹر کی میدان پر ہی موت ہو گئی ہے۔ مرنے والے کھلاڑی کا نام ہریش گنگا دھرن ہے، جو گرین آئی لینڈ کرکٹ کلب کی سکینڈ گریڈ ٹیم کیلئے کھیلتے تھے۔33 سالہ گنگا دھرن کی ڈونیڈن کے سنی ویل اسپورٹس سینٹر پر کھیلے جا رہے میچ میں اچانک طبیعت خراب ہو گئی، انہیں سانس لینے میں پریشانی ہوئی اور وہ زمین پر گر پڑے اور ان کی موت ہو گئی۔ جس وقت یہ حادثہ پیش آیا وہ گیند بازی کررہے تھے۔نیوزی لینڈ کے اخباروں کی خبروں کے مطابق گنگادھرن نے میچ میں صرف دو اوور کی گیند بازی کی۔ گرین آئی لینڈ کرکٹ کلب کے سربراہ جان موئل کے مطابق گنگادھرن ان کے کلب کی سکینڈ گریڈ ٹیم کیلئے کھیلتے تھے۔ موئل نے حادثہ پر گہرے رنج و غم کا اظہار کرتےہوئے کہا کہ میرا دل اس خبر کی تصدیق کرنے کے دوران ٹوٹا ہوا ہے۔ گرین آئی لینڈ کلب کے ہریش گنگادھرن کو ہر کوشش کے بعد بھی بچایا نہیں جاسکا۔خبروں کے مطابق گنگادھرن ٹیم کیلئے بلے بازی اور گیند بازی کی شروعات کرتے تھے۔ گنگادھرن گرین آئی لینڈ کی طرف سے چھ سیزن سے کھیل چکےتھے۔ ہندوستان کے کوچی کے رہنے والے گنگادھرن پانچ سال پہلے ہی نیوزی لینڈ میں بس گئے تھے۔

کراچی(شوبز ڈیسک/ایمرا نیوز) فن ،محبت ، چاہت اور رشتوں کو ویزا کی ضرورت نہیں ہوتی۔ فن کاروں کو سرحدوں میں قید نہیں کیا جاسکتا ۔ سرحدوں کے دونوں جانب رہنے والے فن کاروں کو کسی سے اجازت لینے کی ضرورت نہیں، وہ جب چاہیں محبت کرنے والوں سے ملنے آسکتے ہیں۔ ان جذبات کا اظہار بھارتی اداکارہ ادیتی سنگھ نے کراچی پریس کلب میں اپنے اعزاز میں منعقدہ تقریب میں کیا، جس کا اہتمام پاکستان فلم اینڈ ٹی وی جرنلسٹس ایسوسی ایشن نے کیا تھا۔ اس موقع پر پاکستان کی نامور اداکارہ میرا خاص طور پر مہمان فن کارہ کو ویلکم کرنے آئیں تھیں۔ بھارتی اداکارہ ادیتی سنگھ کا کہنا تھا کہ پاکستان مجھے اب اپنا اپنا سا لگتا ہے، جب دل چاہتا ہے، محبت کا ویزا لگا کر اپنوں کے درمیان پاکستان آجاتی ہوں۔ میڈیا نے ہمیشہ فن کاروں کو بلندیوں پر پہنچانے میں نمایاں کردار ادا کیا۔ مجھےجہاں بھی عزت کے ساتھ کام دیا جائے گا، میں ضرور کروں گی۔

پاکستان کی دو فلموں میں کام کیا، اس دوران فلم انڈسٹری کے سینئر اداکاروں کے ساتھ کام کرنے کا موقع ملا۔ ندیم اور جاوید شیخ نے میری بھرپور رہنمائی کی۔ جاوید شیخ نے فلم ’’وجود‘‘ میں دانش تیمور کے ساتھ مرکزی کردار کے لیے کاسٹ کیا گیا۔ یہ میری خوش نصیبی ہے اور اب ایک مرتبہ پھر میں فلم ’’چھا جارے‘‘ میں جاوید شخ اور ندیم کےسلور اسکرین پر نظر آئوں گی۔ اس موقع پر اداکارہ میرا کا کہنا تھا کہ میں کُھلے دل سے ادیتی سنگھ کو پاکستان میں خوش آمدید کہتی ہوں۔ میں نے کئی بھارتی فلموں میں کام کیا، پاکستان میں بالی وڈ موویز کی ریلیز کا بے چینی سے انتظار ہوتا ہے۔ میں نے حال ہی میں ثاقب ملک کی فلم ’’باجی‘‘ میں مرکزی کردار کیا ہے۔ فلم جلد ریلیز ہونے والی ہے۔ تقریب کی خاص مہمان ادیتی سنگھ کو پریس کلب کے صدر امتیاز فاران اور سیکرٹری ارمان صابر کی جانب سے سندھ کی روایتی اجرک اور پھولوں کی مالائیں پیش کی گئیں۔ پاکستان فلم ٹی وی جرنلسٹس ایسوسی ایشن کی جانب سے اطہر جاوید صوفی اور وسیع قریشی نےخصوصی شیلڈ پیش کی۔ ادیتی سنگھ نے صحافیوں کے سوالوں کے جوابات میں کہا کہ میں آئندہ بھی پریس کلب آتی رہوں گی۔ میری خواہش ہےکہ میرا جی، علی ظفر ، عمران عباس اور فواد خان کے ساتھ فلموں میں کام کروں۔ میں بھارت جاکرسب کو بتائوں گی کہ مجھے پاکستانی دوستوں نے کتنا پیار دیا۔ مجھے میرے ماموں اداکار ادیتہ پنچولی نے کہا تھا کہ ادیتی تم کو پاکستان میں بہت پیار ملے گا اور آج ان کی بات سچ ثابت ہوئی۔

اسلام آباد(نیٹ نیوز/ایمرا نیوز) پاکستان کے نئے چیف جسٹس آصف سعید کھوسہ کی تقریب حلف برداری کی تقریب میں بھارت کے اعلیٰ ترین جج نے نا صرف شرکت کی بلکہ پہلی سماعت بھی کی۔جسٹس آصف سعید کھوسہ نے ملک کے 26 ویں چیف جسٹس کے طور پر حلف اٹھالیا، گزشتہ روز انہوں نے بطورچیف جسٹس پہلاکیس نمٹاتے ہوئے منشیات کے کیس کا فیصلہ سنایا۔ملکی تاریخ میں یہ پہلی بار ہے کہ کسی بھی بھارتی جج نے پاکستان کی عدالت عظمیٰ کی بنچ کے ساتھ بیٹھ کر سماعت کی ہو۔بھارتی سپریم کورٹ کےسینئر جج جسٹس مادان بھماراؤ لوکر نے چیف جسٹس آصف سعید کھوسہ کے ساتھ تین مقدمات کی سماعت کی جن کا کل دورانیہ 45 منٹ تھا۔

بھارتی میڈیا رپورٹس کے مطابق جسٹس لو کر اورچیف جسٹس کھوسہ 2004 سے قریبی دوست ہیں ، اس وقت جسٹس کھوسہ لاہور ہائی کورٹ میں اور جسٹس لوکر دہلی ہائی کورٹ میں اپنے فرائض انجام دے رہے تھے۔جسٹس لوکر نے چیف جسٹس کھوسہ کی تعریف میں کہا کہ جسٹس کھوسہ انتہائی اچھے انسان ہیں بہترین جج بھی۔جسٹس لوکر کو عدالت عظمیٰ کے ماحول کو دیکھ کر حیرت ہوئی ، انہوں نے کہا کہ یہاں بالکل بھی بھیڑنہیں ہوتی، اس کے بر عکس بھارتی عدالتوں کے دروازے میڈیا کے لئے کھلے رہتے ہیں۔اس سے قبل بھارتی میڈیا سے بات کرتے ہوئے انہوں نے ایسی کسی بڑی تقریب میں پاکستان آمد کا ارادہ ظاہر کرتے ہوئے کہا تھا کہ انصاف کی کوئی حدیں نہیں ہوتیں۔یہ پہلی بار نہیں ہے کہ جسٹس لوکر نے اس طرح پاکستانی چیف جسٹس کی تقریب حلف برداری میں شرکت کی ہو ، اس سے قبل وہ سابق چیف جسٹس تصدق حسین جیلانی کی تقریب حلف برداری میں بھی شرکت کر چکے ہیں۔واضح رہے بھارتی سپریم کورٹ کےسینئر جج جسٹس مادان بھماراؤ لوکر اور کومن ویلتھ جوڈیشیل ایجوکیشن انسٹیٹیوٹ کینیڈا کے بانی صدر جسٹس سندرا ای اوکسنر اپنی اہلیہ کے ہمراہچیف جسٹس آصف سعید کھوسہ کی تقریب حلف برداری میں شرکت کے لیے بذریعہ واہگہ بارڈر لاہور پہنچے ۔پنجاب حکومت کے سینئر حکام نے ان کا استقبال کیا،بعد ازاں قانون نافذ کرنے والے اداروں نے سخت ترین سیکیورٹی میں انہیں اسلام آباد پہنچایا۔

لاہور(نیٹ نیوز/ایمرا نیوز) اقوام متحدہ کے سیکریٹری جنرل اینٹونیو گوٹریس نے پاکستان اور بھارت کے درمیان مذاکرات پر زور دیاہے اور امید ظاہر کی ہے کہ دونوں ملکوں میں معنی خیز مذاکرات ہوں گے ۔اقوام متحدہ ہیڈکوارٹرز میں ایک پریس کانفرنس کے دوران اقوام متحدہ کے سیکریٹری جنرل اینٹونیو گوٹریس کا کہنا تھا کہ ‘مجھے امید ہے کہ بین الاقوامی معاملات میں اپنی اہمیت کے پیش نظر پاکستان اور بھارت معنی خیز مذاکرات کا راستہ اختیار کریں گے۔انہوں نے کہا کہ ہائی کمشنر فار ہیومن رائٹس نے حال ہی میں کشمیر کے حوالے سے ایک بہت تفصیلی رپورٹ تیار کی ہےلہذا اقوام متحدہ نے واضح طور پر اپنا کردار نبھایا ہے۔انہوں نے مزید کہا کہ ’میں اپنے دفتر کو دونوں ملکوں کے درمیان مذکرات کے آغاز کے سلسلے میں پیش کرتا رہا ہوں، لیکن اب تک کوئی کامیابی نہیں ہوئی‘۔واضح رہے وزیراعظم عمران خان کی جانب سے متعدد مرتبہ پاک بھارت امن اور مذاکرات کی بات کیے جانے کے باوجود بھارت کی جانب سے کوئی ردعمل سامنے نہیں آیا۔