Tag indian

صوبیدار محمد ریاض ،لانس حوالدار عزیزاللہ اور سپاہی شاہد منصب نے جام شہادت نوش کیا، آئی ایس پی آر
مظفرآباد(ایمرا نیوز آن لائن) بھارتی فوج کی لائن آف کنٹرول پر بلااشتعال فائرنگ کے نتیجے میں پاک فوج کے تین جوان شہید جبکہ ایک زخمی ہو گیا ۔پاک فوج کے شعبہ تعلقات عامہ (آئی ایس پی آر) کے مطابق بھارتی فوج کی جانب سے راولا کوٹ سیکٹر رکشکری پر بلا اشتعال فائرنگ کی گئی جس میں صوبیدار محمد ریاض، لانس حوالدار عزیز اللہ اور سپاہی شاہد منصب نے جام شہادت نوش کیا۔آئی ایس پی آر کے مطابق بھارتی فوج کی فائرنگ سے ایک جوان زخمی بھی ہوا جب کہ بھارتی اشتعال انگیزی کا بھرپور جواب دیا گیا اور بھارت کی جانب ہلاکتوں کی اطلاعات ہیں۔آئی ایس پی آر کے مطابق صوبیدار محمد ریاض کا تعلق جھنگ، لانس حوالدار عزیز کا تعلق نوشہرو فیروز اور سپاہی شاہد منصب ایبٹ آباد کا رہائشی تھا ۔ فائرنگ سے ایک سپاہی زخمی بھی ہوا ادھر پولیس انتظامیہ کا کہنا ہے کہ بھارتی فوج کی جانب سے نیزہ پیر ، تتہ پانی اور دیگر علاقوں میں بلااشتعال گولہ باری کی گئی جس میں سویلین آبادی کو نشانہ بنایا گیا ۔ بھارت کی جانب سے ہلکے اور بھاری ہتھیاروں کا بھی استعمال کیا گیا جس کے بعد علاقے میں سخت خوف و ہراس پھیل گیا ۔ پولیس انتظامیہ کے مطابق پاک فوج کی جانب سے بھرپور جوابی کارروائی عمل میں لائی گئی اس دوران پاک فوج نے بھارتی فوجیوں کی پوسٹوں کو بھی نشانہ بنایا جس میں بھارتی فوجی ہلاکتوں کا خدشہ ہے ۔

جنگ بندی معاہدے کی خلاف ورزی بند نہ ہوئی تو سرجیکل سٹرائیک کریں گے‘ جنرل بپن راوت
نئی دہلی (آن لائن) بزدل بھارتی آرمی چیف جنرل بپن راوت نے ایک بار پھر پاکستان کیخلاف ہرزہ سرائی کرتے سرجیکل اسٹرائیک کی دھمکی دے دی ہے ۔بھارتی خبر رساں ادارے کے مطابق نئی دہلی میں پریس کانفرنس سے خطاب کرتے ہوئے جنرل بپن راوت نے کہا کہ جنگ بندی معاہدے کی خلاف ورزی بند نہ ہوئی تو ایک بار پھر سرجیکل اسٹرائیک کریں گے،سرحدوں پر ہونے والی خلاف ورزی کا بھر پور جواب دیا جائےگا۔ بھارتی آرمی چیف نے اپنے فوجیوں کو مخاطب کرتے ہوئے کہا کہ اپنی فوج کو مضبوط بنائیں اور پاکستان کو بھر پور جواب دیں۔انہوں نے کہا کہ رواں سال جنگ بندی کی خلاف ورزی کی تعداد میں اضافہ ہوا ہے، ہم پاکستان کی کارروائیوں کو نہیں بھولیں گے۔

چاروں نوجوان فائرنگ کے تبادلے میں شہید ہوئے، بھارتی فورسز کا دعویٰ
سری نگر(ایمرا نیوز آن لائن)مقبوضہ کشمیر کے علاقے پلوامہ میں بھارتی قابض فورسز نے سرچ آپریشن کے نام پر مزید 4 کشمیریوں کو شہید کردیا۔ میڈیا رپورٹ کے مطابق مقبوضہ کشمیر کے ضلع پلوامہ کے علاقے لاسی پورہ میں قابض بھارتی فورسز نے محاصرے اور گھر گھر تلاشی کے نام پر کارروائی کرتے ہوئے 4 نوجوانوں کو شہید کردیا۔قابض بھارتی فورسز کا دعویٰ ہے کہ چاروں نوجوان فائرنگ کے تبادلے میں شہید ہوئے، جھڑپ کے دوران 3 بھارتی فوجی بھی شدید زخمی ہیں۔پلوامہ اور شوپیاں میں کٹھ پتلی انتظامیہ نے قابض بھارتی فورسز کی بربریت سے متعلق عوام تک معلومات کی رسائی روکنے کے لیے انٹر نیٹ سروس بند کردی ہے۔دوسری جانب ضلع اسلام آباد کے علاقے قاضی گنڈ اور ویر ناگ میں بھی قابض بھارتی فورسز کا سرچ آپریشن جاری ہے۔

بھارتی فوج کے بڑھتے مظالم نے کشمیر کے دانشوروں کو بھی مسلح جدوجہد پر مجبور کر دیا
سری نگر (ایمرا نیوز آن لائن ) مقبوضہ کشمیر میں قابض بھارتی فوج کے بڑھتے مظالم نے کشمیر کے دانشوروں کو بھی مسلح جدوجہد پر مجبور کر دیا، امریکی اخبار کےمطابق سال 2018 میں کشمیری نوجوانوں کی مسلح جدوجہد میں کئی گنا تیزی آ گئی۔ ادھر نوگام میںقابض فوجیوں کی فائرنگ سے 2 کشمیری جام شہادت نوش کر گئے.، امریکی میڈیا بھی بھارتی بربریت سے نظر نہ چرا سکا، اخبار لکھتا ہے کہ 2018 میں تحریک آزادی میں نوجوانوں کی شمولیت میں 52 فیصد اضافہ ہو گیا، گزشتہ سال 191 نوجوانوں نے تحریک آزادی میں شمولیت اختیار کی، پلوامہ واقعے میں مبینہ حملہ آورعادل احمد ڈار بھی انہی میں ایک تھا۔بھارتی مظالم پر محمد رفیع بھٹ جیسے پی ایچ ڈی ہولڈر بھی ہتھیار اٹھانے پر مجبور ہو گئے جو اپنے طلبا کی ہر وقت کتاب سے مدد کرنے کے لیے تیار رہتے تھے۔ وہ گزشتہ سال لاپتہ ہوئے اور دو دن بعد انہیں جعلی آپریشن میں شہید کر دیا گیا، انجینئرنگ کے طالب علم عیسی فضیلی کو بھی اسی طرح کے آپریشن میں شہید کیا گیا۔بھارتی ریاستی دہشتگردی کے تازہ واقعے میں سرینگر کے قریب نوگام میں قابض فوجیوں نے سرچ آپریشن کی آڑ میں 2 کشمیریوں کو شہید کر دیا، گزشتہ روز بھی اسی طرح کے واقعے میں 4 کشمیری کو موت کے گھاٹ اتار دیا گیا تھا۔

لاہور(ایمرا نیوز آن لائن) چیئرمین پیمرا سلیم بیگ نے کہا ہے کہ بھارتی فلموں کی پاکستان میں نمائش کی اجازت نہیں دیں گے۔آل پاکستان سیٹلائٹ گڈز ایسوسی ایشن نے غیرقانونی انڈین ڈی ٹی ایچ ڈش اور سی لائن کے آلات رضاکارانہ طور پر تلف کرنے کی تقریب کا انعقاد کیا جس میں چیئرمین پیمرا سلیم بیگ نے خصوصی شرکت کی۔چیئرمین پیمرا نے تقریب سے خطاب میں کہا کہ ہال روڈ تاجروں کا یہ اقدام خوش آئند ہے کہ انھوں نے قومی فریضے کو سمجھتے ہوئے پیمرا قوانین پر عملدرآمد کو یقینی بنایا ہے، سپریم کورٹ کے احکامات کے تحت اس مہم کو مزید تیز اور موثر بنایا جائے تاکہ پاکستانی ڈیٹی ایچ کیلیے راستہ ہموار کیا جا سکے، پیمرا غیر قانونی انڈین ڈی ٹی ایچ کا سگنل استعمال کرنے والے کیبل آپریٹرز کیخلاف کارروائی کا جلد آغاز کرے گا ۔اس موقع پر آل پاکستان سیٹلائیٹ ایسوسی ایشن کے عہدیداروں نے ہال روڈ کے تاجروں کے ہمراہ ڈی ٹی ایچ ڈش اور دیگر آلات کو نذر آتش کر کے پیمرا کے بھارتی نشریات نہ دکھا نے کے فیصلے کی تائید کی اور چیئرمین پیمرا کے حق میں نعرے لگائے ۔علاوہ ازیں چیئرمین پیمرا سلیم بیگ نے آل پاکستان سیٹیلایٹ ایسو سی ایشن کے عہدیداروں کے ہمراہ میڈیا سے گفتگو میں کہا کہ انڈین فلموں کی پاکستان میں نمائش کی اجازت نہیں دیں گے۔ انڈیا فلم انڈسٹری کے ذریعے پاکستان سے پیسے اکٹھے کر کے پاکستان پر ہی بمباری کرتا ہے ، میں عوامی نمائندہ ہوں ، پیمرا تاجر برادری کے ساتھ ہے ، پیمرا کا ساتھ دینے پر ہال روڈ تاجر برادری کا مشکور ہوں ۔اس موقع پر آل پاکستان سیٹیلایٹ ایسو سی ایشن کے عہدیداروں نے کہا کہ تاجر برادری انڈین مواد کیخلاف ہے اور انڈین چینلز کے مکمل بائیکاٹ کا اعلان کرتے ہیں۔

واقعے کے خلاف علاقے کے لوگ سڑکوں پر نکل آئے اور بھارتی ریاستی دہشت گردی کے خلاف شدید نعرے بازی
سری نگر(ایمرا نیوز آن لائن) مقبوضہ کشمیر میں بھارت کی ریاستی دہشت گردی جاری مزید تین کشمیریوں کو شہید کردیا گیا۔ مقبوضہ کشمیر کے ضلع شوپیاں اور ہندواڑہ میں بھارتی سیکیورٹی فورسز نام نہاد آپریشن کے نام پر فائرنگ کر کے تین کشمیری شہید کر دیے۔واقعے کے خلاف علاقے کے لوگ سڑکوں پر نکل آئے اور بھارتی ریاستی دہشت گردی کے خلاف شدید نعرے بازی کی۔ ادھربنگلور میں سری نگرسے تعلق رکھنے والے ماڈل اور انجینیرنگ کے طالب علم ابصارڈار کو جنونی انتہا پسندوں نے بہیمانہ تشدد کا نشانہ بنایا۔ کشمیری طالبعلم کو کافی شاپ میں لوہے کے راڈ مار مار کر لہولہان کر دیا۔

سری نگر(ایمرا نیوز آن لائن) مقبوضہ کشمیر میں بھارتی فوج کے پیلٹ گن کے بے دریغ استعمال کی وجہ سے صرف دو سال میں ہزار سے زائد کشمیری نوجوان، خواتین اور بزرگوں کی آنکھیں یا تو کلی طور پر بینائی سے محروم ہوگئیں یا بینائی محض 30 فیصد رہ گئی۔ سری نگر کے گورنمنٹ میڈیکل کالج نے قابض بھارتی فوج نے ظلم و بربریت کی انتہا کرتے ہوئے نہتے عوام پر پیلٹ گن سے گولیاں برسائیں جس کے نتیجے میں 1 ہزار 66 کشمیریوں کی آنکھوں کو نقصان پہنچا۔ یہ افراد جولائی 2016 سے جنوری 2018 کے درمیان زخمی ہوئے۔میڈیکل کالج کے ریکارڈ کے مطابق 10 فیصد افراد مکمل طور پر بینائی سے محروم ہوگئے اور آنکھ کی پتلی کی تبدیلی کے علاوہ اس کا کوئی علاج نہیں۔ 85 فیصد افراد کے آنکھوں کے حالت گریڈ ڈی اور گریڈ ای کے مریضوں کی طرح ہوگئی ہے جس میں بینائی 70 سے 80 فیصد تک ختم ہوجاتی ہے۔تحقیق میں مزید بتایا گیا ہے کہ 11 فیصد افراد میں آنکھ کی پتلی تو محفوظ رہی ہے تاہم ان افراد کے پپوٹوں، پلکوں اور غلاف کو نقصان پہنچا ہے۔ کچھ افراد کے آنکھ کے نہایت قریب زخم ہوگئے ہیں۔ ان افراد کی بینائی میں بھی 5 سے 10 فیصد تک کمی واقع ہوئی ہے۔پیلٹ گولیوں کا نشانہ بننے والوں میں 5 سال کے کم سن بچوں سے لیکر 60 سالہ بزرگ تک شامل ہیں۔ بزرگوں کو سب سے زیادہ تکلیف کا سامنا ہے، زیادہ عمر ہوجانے کے باعث ان میں ا?نکھ کی تبدیلی کے ا?پریشن کے کامیاب ہونے کا تناسب بھی نہایت کم رہ گیا ہے۔

جے ایف17 کا مقابلہ کرنے کے لیے رافیل طیاروں کےساتھ میزائل بھی فراہم کئے جائیں
حکومت کو پہلے بھی کہا تھا فراہمی یقینی بنائی جائے ،اگر رافیل ہوتے تو ہم ذلیل نہ ہوتے مقابلہ کرنے کیلئے ہمارے میزائل پرانے ہو گئے ‘نئے خرید کر دیے جائیں
اعلیٰ بھارتی فضائیہ کا نئی دہلی حکومت کو خط ارسال
نئی دہلی(ایمرا نیوز آن لائن)بھارتی فضائیہ نے اپنی حکومت سے مطالبہ کیا ہے کہ ہم موجودہ طیاروں اور میزائلوں سے پاکستان کا مقابلہ نہیں کر سکتے اس لیے کہ ہمارے پاس جدید میزائل نہیں ہیں۔خبر رساں ادارے کے مطابق اعلیٰ بھارتی فضائیہ حکام کی جانب سے نئی دہلی حکومت کو ارسال کردہ خط میں کہا گیا ہے کہ ہمارے پاس موجود میزائل پرانے ہو چکے ہیں اور ان کی عمر ختم ہو گئی ہے اب انہیں استعمال نہیں کیا جا سکتا اس لیے ہمیں فضا سے فضا میں مار کرنے والے نئے میزائل فراہم کئے جائیں ۔خط میں مزید کہا گیا کہ بھارتی فضائیہ جس نے تازہ تازہ ہی پاکستانی جے ایف 17تھنڈر طیاروں کے ہاتھوں ہزیمت اٹھائی ہے نے پہلے اپنی حکومت سے کہا تھا کہ اگر ہمارے پاس رافیل طیارے ہوتے تو ہم پاکستان کو ہرا سکتے تھے لیکن وہ نہ ہونے کی وجہ سے ہمیں شکست ہوئی اور ہمارے دو طیارے بھی مار گرائے گئے اور ایک پائلٹ بھی پکڑا گیا، ہمارے پاس فضا سے فضا میں مار کرنے والے میزائل بھی پرانے ہو گئے ہیں اور استعمال کے قابل نہیں رہے، اگر پاکستان کےساتھ جنگ ہوتی ہے تو ہمارے پاس پاکستانی طیاروں کا مقابلہ کرنے کے لیے کوئی موثر ہتھیار نہیں ہے۔

نئی دہلی، (ایمرا نیوزآن لائن) بھارتی عدالت نے سمجھوتہ ایکسپریس کیس کے چاروں ملزمان کو بری کر دیا جبکہ پاکستان نے بھارتی ہائی کمشنر کو طلب کرکے ملزمان کی بریت پر احتجاج کیا ہے ۔ تفصیلات کے مطابق ہریانہ کی این آئی اے کی خصوصی عدالت نے سمجھوتہ ایکسپریس کیس کی سماعت مکمل کرکے فیصلہ محفوظ کرلیا تھا جو گزشتہ روز سنایاگیا۔ عدالت نے اپنے فیصلے میں مرکزی ملزم سوامی آسیم آنند عرف نبا کمار سرکار ،کمال چوہان، راجندر چودھری اور لوکیش شرما کو بری کرتے ہوئے رہا کرنے کا حکم دیدیا۔عدالت نے کہا ہے کہ استغاثہ ملزمان کا دھماکے میں ملوث ہونا ثابت نہیں کر سکا۔ عدالت نے پاکستانی خاتون راحیلہ وکیل کی گواہی کی درخواست بھی مسترد کر دی۔این آئی اے نے مقدمے میں سوامی آسیم آنند سمیت بعض ہندو انتہا پسندوں کو موردِ الزام ٹھہرایا تھا اور عدالت میں دلائل دیئے تھے کہ دھماکے میں پاکستانی مسلمانوں کو ہدف بنایا گیا ۔ کیس میں 224 افراد کے بیانات ریکارڈ کئے گئے ۔یہ بات قابل ذکر ہے کہ گزشتہ دو برس میں 30 سے زیادہ گواہ منحرف ہوچکے ہیں۔ سوامی آسیم آنند کے بارے میں کہا جاتا ہے کہ اس کا تعلق ایک شدت پند تنظیم ’’ابیھنو بھارت‘‘ سے ہے ، اس مقدمے میں مجموعی طور پر 8 ملزمان تھے ، جن میں سے ایک سنیل جوشی 2007 میں قتل کر دیئے گئے تھے ، 3 ملزمان سندیپ ڈانگے ، رام چندر اور امیت مفرور ہیں۔دفترخارجہ کی جانب سے جاری بیان کے مطابق بھارتی ہائی کمشنر اجے بساریہ کو دفترخارجہ طلب کرکے سمجھوتہ ایکسپریس کے ملزمان کی بریت پر شدید احتجاج کیا گیا ہے ۔ترجمان کے مطابق بھارتی ہائی کمشنر سے کہا گیا ہے کہ سمجھوتہ ایکسپریس پر ہونے والی دہشتگردی کی سنگین واردات میں 44 بے گناہ پاکستانی شہید ہوئے ، پاکستان سمجھوتہ ایکسپریس پر پیش رفت نہ ہونے کا معاملہ مسلسل اٹھاتا رہا۔ ترجمان نے اپنے بیان میں کہا ہے کہ 44 شہید پاکستانیوں کے لواحقین کو کیا جواب دیا جائے گا، یہ بھارت کا انتہائی قدم ہے ۔ترجمان نے کہا ہے کہ ملزموں کی رہائی نے بھارتی عدالتی نظام اور نظام انصاف کا بھانڈا پھوڑ دیا،فیصلے سے ہندو دہشتگردی کو پروان چڑھانے کی بھارتی ریاستی پالیسی بھی واضح ہوتی ہے ،بھارت پاکستان پر دہشتگردی کا الزام لگاتا رہا ہے مگر بھارت خود دہشتگردی کا ارتکاب کرنے والوں کو تحفظ فراہم کرتا ہے ، سرعام اپنے جرم کا اعتراف کرنے والے دہشتگردوں کو تحفظ دیا گیا ۔ترجمان دفتر خارجہ کے مطابق بری ہونے والوں میں آر ایس ایس کا دہشتگرد سوامی آسیم آنند بھی شامل ہے ،بھارت ذمہ داروں کو کیفر کردار تک پہنچانے کیلئے اقدامات کرے ۔یاد رہے لاہوراور دہلی کے درمیان چلنے والی سمجھوتہ ایکسپریس میں 2007 میں ہریانہ کے پانی پت کے مقام پر دھماکہ ہوا تھا جس میں 44 پاکستانیوں سمیت 68 افراد مارے گئے تھے ۔دریں اثناء سمجھوتہ ایکسپریس کیس میں بری ہونیوالے آسیم آنند کو دو سال کے دوران دہشتگردی کے 3 کیسوں سے بری کیا گیا۔17 اور 18 فروری 2007 کی درمیانی رات سمجھوتہ ایکسپریس میں بم دھماکہ ہوا جس میں 68لوگ مارے گئے ، 18 مئی کو حیدرآباد کی مکہ مسجد میں دھماکہ ہوا جس میں 9 افراد جاں بحق ہوئے ، اسی سال اکتوبر میں اجمیر میں خواجہ معین الدین چشتی کے مزار پر دھماکہ ہوا جس میں 3 افراد جاں بحق ہوئے ۔2007 میں آسیم آنند ان دہشتگرد حملوں میں ملوث ہونے کی وجہ سے انتہائی مطلوب شخص تھا۔آسیم آنند کو 2010 میں گرفتار کیا گیا تھا۔2010 میں جج کے سامنے اپنے ایک اعترافی بیان میں سوامی آسیم آنند نے کہا تھا کہ 2002 میں گاندھی نگر میں ایک خودکش حملے میں 30 ہندوئوں کی ہلاکت کے بعد وہ بدلہ لینا چاہتا تھا مگر بعد میں اپنے بیان سے مکر گیا۔ نیشنل انوسٹی گیشن ایجنسی نے اس پر کوئی کارروائی نہ کی۔آسیم آنند کو مارچ 2017 میں اجمیر کیس میں بری کردیا گیا جبکہ اپریل 2018 میں مکہ مسجد کیس سے بھی بری ہوگیا اور اب مارچ 2019 میں سمجھوتہ ایکسپریس کیس میں بھی بری ہوگیا۔آسیم آنند نے مختلف اوقات میں کئی نام اختیار کئے ۔ ان کا پہلا نام نبا کمار سرکار تھا اور وہ مغربی بنگال کے علاقے میں پیدا ہوا، بعد میں اس نے جتن چترجی، اوم کرناتھ سمیت کئی نام اختیار کئے ۔تفتیش کاروں کے مطابق آسیم آنند اقلیتوں کیخلاف تقریروں کی وجہ سے مشہور تھا اور خصوصی طور پر عیسائی مشنریوں کو نشانہ بناتا تھا۔تفتیش کاروں کے مطابق سوامی آسیم نے 2 دیگر حملوں میں ملوث ہونے کا بھی اعتراف کیا تھا۔

سیکیورٹی فورسز کی بھاری نفری کو شہر کے مرکزی علاقوں قیصر گنج اور بھوسمنڈی میں تعینات کردیا گیا
مقامی افراد نے پولیس پر مکانات کو آگ لگانے کا ذمہ دار قرار دیا
میرٹھ(ایمرا نیوز آن لائن)بھارتی ریاست اترپردیش کے شہر میرٹھ میں مبینہ تجازوات کے خلاف کارروائی کے دوران مظاہرین اور پولیس کے درمیان تصادم سے 10 افراد زخمی ہوگئے جبکہ ایک مسجد سمیت مسلمانوں کے کئی گھروں کو نذر آتش کردیا گیا۔بھارتی اخبار ٹائمز آف انڈیا کی رپورٹ کے مطابق میرٹھ کے علاقے قیصر گنج میں پولیس اور شہریوں کے درمیان تصادم میں کم ازکم 10 افراد زخمی ہوئے اورکئی گاڑیوں کو بھی نقصان پہنچا, جبکہ پولیس کی بھاری نفری وہاں موجود تھی اور اسی دوران کئی جگھیوں پر آگ لگی جس میں ایک مسجد بھی شامل تھی۔رپورٹ کے مطابق مظاہرین نے پولیس کی خلاف شدید احتجاج کیا جس کے بعد مزید سیکیورٹی فورسز کی بھاری نفری کو شہر کے مرکزی علاقوں قیصر گنج اور بھوسمنڈی میں تعینات کردیا گیا جس میں کنٹونمنٹ بورڈ اور پولیس کی مشترکہ ٹیمیں شامل تھیں۔انتظامیہ کا کہنا تھا کہ مقامی افراد فوج کی زمین پر 150 سے زائد گھر بنا کر ٹھہرے ہوئے ہیں جبکہ مقامی افراد نے پولیس کو واقع کا ذمہ دار قرار دیتے ہوئے کہا کہ سیکیورٹی اہلکاروں نے گھروں اور مسجد کو آگ لگا دی۔مقامی شہری محسن احمد کا کہنا تھا کہ ‘سب سے پہلے کنٹونمنٹ بورڈ کے عہدیداروں کے ساتھ صدر تھانے سے پولیس کی دو گاڑیاں پہنچیں, انہوں نے کچی آبادی کے رہائشیوں سے پیسوں کا مطالبہ کیا جنہوں نے ایک مکان کی تعمیر شروع کی تھی’۔ان کا کہنا تھا کہ ‘جب ہم نے احتجاج کیا تو انہوں نے بدتمیزی کی اور ایک لمحہ ضائع کیے بغیر مزید فورس کو طلب کیا اور جھگیوں اور مسجد کو ا?گ لگانا شروع کردیا جس کے بعد تصادم ہوگیا’۔انتظامی عہدیدار انیل ڈھینگرا کا کہنا تھا کہ ‘ہماری پہلی ترجیح آگ بجھانا تھی اور وہاں پھنسے افراد کو بچانا تھا اور تصادم کے حوالے سے ہم انکوائری کریں گے اور اس میں ملوث ہر کسی کے خلاف مقدمہ درج کریں گے’۔ان کا کہنا تھا کہ ‘اس وقت صورت حال کنٹرول میں ہے اور سیکیورٹی فورسز کی بھاری نفری کو علاقے میں امن بحال رکھنے کے لیے تعینات کیا گیا ہے’۔میڈیا کی رپورٹس کے مطابق مسلمانوں کے 200 گھروں کو نذر آتش کیا گیا ہے جس کا الزام مقامی مسلمان سیکیورٹی فورسز پر عائد کررہے ہیں۔پولیس کی کارروائی کے بعد علاقے میں کئی گاڑیوں کو بھی نقصان پہنچا اور بس سروس کو بھی معطل کردیا گیا ہے۔ایک بس ڈرائیور محمد اسد کا کہنا تھا کہ ‘میں آنند وہاڑ سے آرہا تھا اور بس اسٹینڈ میں پہنچنے والا ہی تھا کہ مشتعل افراد نے بس کو نشانہ بنایا جس سے بس کو نقصان پہنچا’.